ཡང་བར་དོ་ངོ་སྤྲོད།

ཡང་བར་དོ་ངོ་སྤྲོད་ནི། འོ། འཇིག་རྟེན་འདི་ནས་ཕ་རོལ་ཏུ་ཚེ་དུས་ལས་འདས་པ་ཁྱོད་ཉོན་ཅིག །ད་ལྟ་ཁྱོད་ལ་སྔར་དང་མི་འདྲ་བའི་སྣང་བ་སྣ་ཚོགས་འཆར་བ་འདི་ཁྱོད་བར་དོ་ལ་འཁྱམས་པའི་རྟགས་ཡིན་ནོ། །དེ་ཡང་ཁར་སང་ཕན་ཆད་ཀྱི་འཇིག་རྟེན་འདི་སྣང་གི་ངེས་པ་འགགས་ནས། ལུས་འོད་དུ་སྣང་བ་དང་། ཕྱི་ས་རྡོ་རི་བྲག་སོགས་ཀྱི་དངོས་པོ་ཐམས་ཅད་ཀྱང་འོད་ཁ་དོག་དཀར་སེར་དམར་ལྗང་དུ་སྣང་ཞིང་༔ དེའི་ནང་དུ་ཐིག་ལེ་དང་ཐིག་ཕྲན་གྱི་དབུས་སུ་སྐུ་ཞི་བ་བཞི་བཅུ་རྩ་གཉིས་དང་། འབར་བ་ཁྲག་འཐུང་ལྔ་བཅུ་རྩ་བརྒྱད་སོགས་ཀྱི་དཀྱིལ་འཁོར༔ ཆེ་བ་རི་རབ་ཙམ་ནས་ཆུང་བ་ཡུངས་འབྲུ་ཙམ་གྱི་བར་གྲངས་མེད་པའི་སྐུར་སྣང་བས། གསུང་འབྲུག་སྟོང་དུས་གཅིག་ཏུ་ལྡིར་བ་ལྟ་བུའི་མགོ་བོ་འགས་སྙམ་བྱེད་ཅིང་༔ དེ་དག་གི་ཐུགས་ཀ་ནས་འོད་ཟེར་མཚོན་ཆའི་རྣམ་པ་གསལ་འཚེར་མིག་གིས་མི་བཟོད་པས་ཁྱོད་ལ་གཟས་པར་སྣང་བ་ལོག་པའི་མ་ངེས་པ་དེ་དག་ནི་ཆོས་ཉིད་ཀྱི་བར་དོ་ཡིན་པས་ངོ་ཤེས་པར་གྱིས་ལ། སྒྲ་ཡིས་མ་དངངས། སྐུ་ཡིས་མ་སྐྲག །འོད་ཀྱིས་མ་འཇིགས། ཟེར་གྱིས་མ་ཞེད་པར། རང་ལ་གནས་པའི་ཡི་དམ་གྱི་ལྷ་རྣམས། བར་དོར་བསུ་མ་ལ་ཕེབས་པ་རེད༔ སྐྱབས་སུ་མཆི། ཐུགས་རྗེ་མ་ཆུང་བར། སྤྱིར་ཁམས་གསུམ་འཁོར་བ། དགོས་ངན་སོང་གསུམ། ཁྱད་པར་བར་དོ་འཁྲུལ་སྣང་གི་སྡུག་བསྔལ་ལས་སྐྱོབ་ཅིང་། བདེ་ཆེན་དག་པའི་ཞིང་ཁམས་སུ་འདྲེན་པའི་དེད་དཔོན་དམ་པ་མཛད་དུ་གསོལ། ཅེས་གསོལ་བ་ཐོབ་དང་ལྷ་དེ་དག་གི་ཐུགས་དང་དབྱེར་མེད་དུ་གྲོལ་ནས་སངས་རྒྱས་པར་འགྱུར་རོ། །ཞི་ཁྲོའི་ལྷ་ཚོགས་དེ་རྣམས་རང་ངོ་མ་ཤེས་པས། སྒྲ་འོད་ཟེར་གསུམ་ལ་འཇིགས་སྐྲག་སྐྱེས་ནས་བྲོས་པར་བརྩམས་ཀྱང་གང་དུ་ཕྱིན་པར་རྗེས་བསྙེགས་ནས་བྱུང་བ་ན། མཐར་རང་སྣང་བདུད་དུ་ལངས་ཤིང་ཞི་བ་རྣམས་མགོན་པོ་ནག་པོ་དང་། ཁྲོ་བོ་རྣམས་གཤིན་རྗེའི་རང་བཞིན་དུ་སྣང་བ་སྟེ། དེ་ཡང་གཤིན་རྗེའི་གྲོང་ཁྱེར་མེ་འབར་བ། དབུས་སུ་ལྕགས་མཁར་འཇིགས་སུ་རུང་བའི་ནང་དུ་བྱོལ་སོང་གཙོ་བོ་བརྒྱད་ཀྱིས་བཏེགས་པའི་ཁྲི་སྟེང་དུ་ཆོས་ཀྱི་རྒྱལ་པོ་ཆེན་པོ་མི་ཡི་ལུས་ལ་མ་ཧེའི་གདོང་ཅན། ཤ་ཚུགས་འཇལ་འཇུར་དུ་ཡོད་པ། སྐུ་ཆེ་བ་རི་རབ་ལྟ་བུ། ཡ་སོས་མ་མཆུ་མནན་པ། མིག་ཤེལ་མིག་དུ་བརྡོག་པ། སྐྲ་སྤྱི་བོར་བཅིངས་པ། སྐུ་གསུས་པ་ཆེ་ལ་རྐེ་རྩ་ཕྲ་བ། ལག་ན་ཁྲམ་ཤིང་ཐོགས་པ། ཁ་ནས་རྒྱོབ་སོད་ཀྱི་སྒྲ་ཐོག་སྟོང་དུས་གཅིག་ཏུ་འཚེར་བ་ལྟར་སྒྲོགས་པ། གཞན་ཡང་ཡཀྴ་ཕག་མགོ དར་མ་སྤྲེལ་མགོ གདུག་པ་སྦྲུལ་མགོ ཨ་ཝ་གླང་མགོ་ལ་སོགས་པ། འབྲིང་པོ་ན་རི་བདུན་ཙམ། ཆུང་བ་ན་རི་ཕྲན་ཙམ་དུ་འཆར་རོ། །དེ་དག་ཀྱང་འཇིགས་སུ་རུང་བའི་གཟུགས་ཅན། མཚོན་ཆ་སྣ་ཚོགས་ཐོགས་པ། རྔམ་སྒྲའི་སྲིད་གསུམ་འགེང་བས། འཇིག་རྟེན་གྱི་ཁམས་གང་ནས་འོང་ངོ་། །དེའི་ཚེ་ལྷན་ཅིག་སྐྱེས་པའི་ལྷས་དགེ་བ་བྱས་ཚད་བསགས་ནས་རྡེའུ་དཀར་པོར་བསྒྲང་ཞིང་། མཉམ་པོར་འོང་བའི་བདུད་ཀྱིས་སྡིག་པ་བསྒྲུབ་ཚད་ཀྱི་གྲངས་རྡེའུ་ནག་པོར་བསྒྲང་ངོ། །དེའི་དུས་སུ་ཁྱོད་ཤིན་ཏུ་བྲེད་པ་དང་། དངངས་པ་དང་། སྐྲག་པ་དང་། འདར་བར་གྱུར་ནས་ངས་སྡིག་པ་མ་བྱས་ཟེར་ནས་རྫུན་ཟེར་རོ། །དེར་ཆོས་ཀྱི་རྒྱལ་པོ་ཆེན་པོ་ན་རེ། ངས་མེ་ལོང་། ཡིག་ཆུང་། རྒྱ་མ་གསུམ་ལ་དྲི་གསུངས་ནས། ལས་ཀྱི་མེ་ལོང་བསྟན་དུས་དགེ་སྡིག་གང་བཀྲ་ལམ་མེ་གསལ། ཡིག་ཆུང་བཏོན་དུས། ཐ་ན་རྣམ་རྟོག་དཀར་ནག་ཤར་བ་ཡན་ཆད་ཐེབ་འདུག །རྡེའུའི་ཡང་ལྗིད། རྒྱ་མ་ལ་བཏེགས་པས་དགེ་སྡིག་གི་ལྕི་ཡང་ལེགས་པར་ཤར་བ་ན་རྫུན་མ་ཤོད་བར་དགེ་བ་བྱས་པ་རྣམས་ནི་དབུགས་དབྱུང་། གཟེངས་བསྟོད་མཛད་དེ་མཐོ་རིས་སམ་དག་པའི་ཞིང་ཁམས་སུ་སྐྱེལ་ལོ། །དེ་ནས་སྲིད་པའི་བར་དོ་ལ་འཁྱར་ཏེ། གསོན་གྱི་གནས་སྐབས་ན་མིག་མེད་ཀྱང་། ད་ལྟ་གཟུགས་མཐོང་བ། རྣ་བ་མེད་ཀྱང་སྒྲ་ཐོས་པ་སོགས་དབང་པོ་ཀུན་ཚང་བ། ཤེས་པ་སྔར་བས་བདུན་འགྱུར་གྱིས་གསལ་བ། མངོན་ཤེས་རྫུ་འཕྲུལ་ཕྲ་བ་ཡོད་པ། ཕར་གསོན་པོ་ཐམས་ཅད་མཐོང་བ། ཚུར་རང་གི་རིགས་མིན་པས་མི་མཐོང་བ། ཉེ་འབྲེལ་རྣམས་ཀྱི་དྲུང་དུ་སོང་ནས་བོས་ཀྱང་མི་མཐོང་། མི་ཐོས་པ་ན་རང་ཤི་བ་མི་ཤེས་པར་ང་ལ་གཏམ་མི་སྨྲ་བར་འདུག་སྙམ་དུ་ཞེ་སྡང་ལངས། རིག་པ་རྟེན་སའི་ལུས་མེད་པས་གཡོ་བའི་རླུང་ཁ་རྒྱལ་དུ་སོང་ནས་བྱ་སྒྲོ་རླུང་གིས་ཁྱེར་བ་ལྟ་བུ་དང་། གང་བ་བསམ་པའི་ས་ལ་རྨི་ལམ་ལྟ་བུར་སྐད་ཅིག་གིས་སླེབ་པ། རི་དང་ཁང་ཁྱིམ་ས་རྡོ་རི་བྲག་ལ་ཐོགས་པ་མེད་པ། ནང་གི་ཁམས་དཀར་དམར་མེད་པས་ནམ་མཁའ་ལ་ཉི་ཟླ་མེད་པས་སྣང་མུན་འོད་ཀྱི་བར་དོ་བསྐལ་པའི་མུན་ནག་འཁྲིགས་པའི་ཀློང་དུ། རྡོས་བཅས་རགས་པ་མེད་པས་ས་ལ་རྐང་རྗེས་མེད་ཅིང་། ལུས་ལ་གྲིབ་མ་མེད་པ། གནས་ལ་ངེས་པ་མེད་པར་གྲོགས་སྟོང་ལ་སོགས་པ་གང་དུའང་སླེབས། རྟེན་ལ་ངེས་པ་མེད་པ་མཆོད་རྟེན་དང་ཟམ་ངུར་སོགས་ལ་བརྟེན། སྤྱོད་ལམ་ལ་ངེས་པ་མེད་པར་སྐད་ཅིག་སྐད་ཅིག་གིས་འགྱུར། སྣང་བ་ལ་ངེས་པ་མེད་པར་བདེ་སྡུག་སྣ་ཚོགས་པར་ཤར། གྲོགས་ལ་ངེས་པ་མེད་པ་ཤི་གསོན་ཐམས་ཅད་དང་འགྲོགས། ཟས་ལ་ངེས་པ་མེད་པ་དྲི་དང་གསུར་ཙམ་གྱིས་ཚིམ་པ་འབྱུང་། དེའི་དུས་སུ་ང་ལ་ཅི་བྱུང་སྙམ་དུ་འཁུ་འཁྲིགས་ཟ་བ་ན། ད་གདོད་ཤི་བ་ཡིན་པར་ངོ་ཤེས་ནས་འཇིགས་སྐྲག་གི་ངང་ལ་བརྒྱལ་ལོག་གིས་འགྲོ། ཅི་ཞིག་ན་བརྒྱལ་སད་པ་དང་། ད་ཇི་ལྟར་བྱ་སྙམ་དུ་སྡུག་བསྔལ་དྲག་པོ་ཉ་བྱེ་ཚན་གྱི་ཐང་ལ་འདྲེ་བ་ལྟར་འབྱུང་། རེས་ལས་ཀྱི་གཤིན་རྗེའི་སྐྱེས་བུ་མཚོན་ཆ་ཐོགས་པ་དང་། སྔར་བསད་པའི་སེམས་ཅན་གྱིས་བདས་པ་ན། གཡང་ས་ཆེན་པོ་མཐོ་ཁྱད་རི་རབ་ཙམ་པ། སྐྱ་ཆད་དེ་བ་ནག་ངམ་མེ་བ་དམར་ཟང་ངེ་བ་དག་ལ་ལྷུང་ནས་སྣང་བའི་སྡུག་བསྔལ། ཡང་ཞག་བདུན་རེས་མཚམས་ནས་སྔར་གྱི་འཆི་རྐྱེན་དེའི་རེ་རེ་འཆི་བའི་སྡུག་བསྔལ། དཀོར་ཟས་དང་ལན་ཆགས་ཀྱི་བདག་པོ་དང་། སྲོག་བཅད་པའི་སེམས་ཅན་དང་། དོམ་དང་བུ་ལོན་གྱི་བདག་པོ་མང་པོའི་ལག་པ་ཟེད་ནས་བདས་པ་དང་། རྗེས་ཟིན་ན། ཤ་སྤར་ཆོད་དུ་ཟ་བ་ལ་སོགས་པས་སྡུག་བསྔལ་ཞིང་། ཡང་ཉེ་འབྲེལ་དང་གདུང་བ་ཀུན་གྱི་དྲུང་དུ་སོང་ནས་ཁྱོད་མ་ངུ་། ང་འདི་ན་ཡོད་ཅེས་སྨྲས་ཀྱང་མ་ཐོས་པས། ད་ནི་ངེས་པར་ཤི་ནས་འདུག་སྙམ་ནས་སྡུག་བསྔལ། ངས་ལུས་ཤིག་ཐོབ་ཐབས་ལ་ཅི་དྲག་སྙམ་ནས་ཐམས་ཅད་དུ་ལུས་ཚོལ་དུ་འགྲོའོ། ཡང་སྔར་གྱི་ལུས་དེ་ཡོད་དམ་སྙམ་དུ་འོང་ཀྱང་ལོགས་ས་མ་རྙེད་པས་སྡུག་བསྔལ། ལུས་དེ་མེའི་ཚིགས་པ། ཆུའི་ཁྱེར། འབུས་གཡེང་ནས་མེད་ཅིང་མཐོང་ན་དགའ་སྣང་ཤར། ལུས་མེད་པས་སྡུག་བསྔལ་ནས་རི་བྲག་ས་རྡོ་ཐམས་ཅད་ཀྱི་ནང་དུ་འཚང་ངོ་། སྐྲག་སྔངས་ཆེ་བས་བླ་མ་དང་མཆོད་གནས་རྣམས་ཀྱི་དྲུང་དུ་ཕྱིན་ཀྱང་མ་མཐོང་ཞིང་། ཕན་མ་བྱུང་བས་ཡིད་ཆད། བླ་མཆོད་ཀྱི་རློམ་སེམས་སྐྱེས་པ་སོགས་བར་དོའི་རྣམ་ཤེས་སྣང་བ་དགུ་འགྱུར་གྱིས་ཤེས་ནས། ལོག་ལྟ་དང་ཞེ་སྡང་། རྒྱུ་རྫས་གཞན་གྱིས་ཐོབ་ཤ་བྱེད་པ་ལ་ཕངས་སེམས་དང་ཁོང་ཁྲོ་སྐྱེ། དེ་ལྟར་སྲིད་པའི་བར་དོ་ཤིན་ཏུ་སྡུག་བསྔལ་བ་ཞག་ཉི་ཤུ་རྩ་ལྔ་གཅིག་ཏུ་འོང་ངོ་། །དེ་ནས་འཁྲུལ་པའི་བར་དོ་ལ་ལུས་འབྱུང་བ་ལྔ་ལ་གཡར་བས། ནམ་མཁའི་སྣང་བ་ལུས་གཡང་ལ་ལྷུང་བ་ལྟ་བུའི་སྡུག་བསྔལ་ཞག་ལྔར་མྱོང་ངོ་། །དེ་ནས་སའི་སྣང་བ་ལུས་ས་འོག་ཏུ་ཆུད་པ་ལྟ་བུ་དང་། རིའི་འོག་ཏུ་ནོན་པའི་སྡུག་བསྔལ་ཀྱང་ཞག་ལྔ། ཆུ་ཆེན་པོའི་ཁྱེར་བ་དང་། ཆུའི་ནང་དུ་ཞག་ལྔར་འཁྱགས་པ་ལ་སྡོད་དོ། །མེ་ཆེན་པོའི་ནང་དུ་ཞག་ལྔར་བསྲེག་གོ །དེ་ནས་རླུང་གིས་གྲང་ཞིང་ཐམས་ཅད་དུ་ཁུར་བ་ལ་ཞག་ལྔར་སྡོད་དོ། །དེ་ལྟར་ཞག་ཉེར་ལྔ་ལ་སྡུག་བསྔལ་ལོ། །དེ་ནས་རྫོགས་ལྡན་མུན་པའི་རྒྱལ་ཁམས། ཉིན་མཚན་གྱི་སྣང་བ་མེད་པར་མུན་ནག་འཐིབ་པའི་ནང་ན་ཞག་བདུན་དུ་སྡོད་དོ། །དེ་ནས་དམྱལ་བར་སྐྱེ་བའི་སྔ་ལྟས་སུ་ལུས་བལ་ནག་རླུང་གིས་གཡེང་བ་ལྟ་བུ་དང་། མགོ་ཐུར་དུ་བསྟན་ནས་འགྲོ་བའི་སྣང་བ། གནས་མེ་ཆུའི་ནང་དུ་འདུག་པ། སྣང་བ་ཚ་གྲང་ལ་སྲེད་པ། ཡི་དྭགས་སུ་མགོའི་ལྟ་ཕྱོགས་དེ་དང་མཐུན་པ་ལ། ལུས་སྤྲིན་སེར་པོ་ཉི་མ་ཤི་བའི་མདོག །གནས་འཇག་མའི་བྱིལ་བུའམ་གྲོགས་སྟོང་དུ་ཡོད་པ་དང་། སྣང་བ་ཟས་ལ་འདོད་པ་སྐྱེ་བ། དུད་འགྲོར་སྐྱེ་བའི་སྔ་ལྟས་སུ་མགོ་འཕྲེད་དུ་བལྟ་བ། ལུས་ཁྲག་བཙོའམ། བལ་ནག་རླུང་གིས་གཡེང་བ། གནས་གྲོགས་པོ་ཕུག་རྡུགས་སུ་ཚུད་པར་སྣང་བ། བླུན་རྨོངས། ལྷ་མ་ཡིན་ལ་སྐྱེ་བའི་སྔ་ལྟས་སུ། ལུས་འགལ་མེའི་འཁོར་ལོ་ལྟ་བུ། གནས་ཆར་སྨུག་པ། སྣང་བ་ཕྲག་དོག་མནར་སེམས། ལྷར་སྐྱེ་བའི་སྔ་ལྟས་སུ་ལུས་ལོ་བརྒྱད་ལོན་པའི་ན་ཚོད་འདྲ་བ། གོས་དང་བཅས་མགོ་གྱེན་དུ་བལྟ་བ། སྣང་བ་འདོད་ཁམས་སུ་སྐྱེ་ན་གཟུགས་ལ། གཟུགས་ཁམས་འོད་ལ། གཟུགས་མེད་སྟོང་བྱད་ཀྱི་ཉམས་ལ་དགའ་གདུང་སྐྱེ། གཞལ་ཡས་ཁང་གི་ཡང་ཐོག་ན་འདུག་པར་སྣང་བ་དང་། མིར་སྐྱེ་ན། ལུས་མིའི་གཟུགས་མགོ་གྱེན་བསྟན། སྐྱེ་བོ་འདུས་པའི་ཅ་ཅོ་ཐོས་པ། ནམ་རྨུག་པའི་ནང་ན་འདུག་པར་སྣང་ངོ་། །སྐྱེ་གནས་དེ་དག་ཐམས་ཅད་སྡུག་བསྔལ་གྱི་རང་བཞིན་ལས་མ་འདས་པའི་མཚངས་ཤེས་པས་གང་ལའང་མ་ཆགས་པར། ཇི་ལྟར་བསྟན་པའི་ལམ་ལ་ཐེ་ཚོམ་མེད་པར་སོང་ཞིག །ཞེས་སོ། འཕོ་བ་སོགས་དང་སྦྲེལ་ན། བརྡ་ཡིག །མགོན་པོ་འོད་དཔག་མེད་ལ་གནས་པོའི་འདུ་ཤེས་ཞོག་ཅིག །རྒྱལ་སྲས་བྱང་ཆུབ་སེམས་དཔའི་ཚོགས་ལ་བསུ་མའི་འདུ་ཤེས་ཞོག་ཅིག །ཁྱོད་རང་གི་རྣམ་ཤེས་ལ་མགྲོན་པོའི་འདུ་ཤེས་བསྐྱེད་ལ། ཞིང་མཆོག་དེ་རུ་ད་ལ་ལ་སོང་ཤིག །ལར་བསྐལ་བ་གྲངས་མེད་ནས་སྐྱེ་འཆིའི་འཁོར་བ་ཁ་བརྒྱུད་ཀྱང་ཐམས་ཅད་དོན་མེད་དུ་སོང་། ད་རིས་སངས་རྒྱས་ཀྱི་བསྟན་པ་ཡོད་པའི་ཞིང་དུ་སྐྱེས། དམ་པའི་ཆོས་ཀྱིས་རྒྱབ་དཔུང་བསྐྱེད། འཕགས་པའི་དགེ་འདུན་རྣམས་ར་མདར་སྦྲན་དུ་ཡོད་པའི་དུས་སུ་འཆི་འཕོ་བ་འདི་ལ་བརྟེན་ནས། གཏན་བདེ་སངས་རྒྱས་ཀྱི་ས་ལ་བསྒྲོད་དུ་ཡོད་པ་ལ་དགའ་བ་བསྒོམ་ཤིག །སེམས་ཁུང་དུ་ཆུད་པར་མ་བྱེད་པར་དཔའ་གདེངས་བསྐྱེད་ཅིག །ཁྱད་པར་དུ་སྡིག་པོ་ཆེ་བཙན་ཐབས་སུ་སངས་རྒྱས་པའི་ཆོས། མ་བསྒོམས་པར་གྲོལ་བའི་ཐབས། མཐོང་གྲོལ་འཁོར་ལོ། ཐོས་གྲོལ་འཕོ་བ། བཏགས་གྲོལ་ཙཀྲ རེག་གྲོལ་མུ་དྲ། མྱོང་གྲོལ་དམ་རྫས་ལྔར་ཡོད་པའི་སྤྱི་ཕུད་ཐུགས་རྗེ་ལྕགས་ཀྱུའི་འཕོ་བ་འདེབས་པའི་སྐབས་སུ་བབས་པས་དམིགས་པ་འདི་བཞིན་དུ་མཛོད་ཅིག །གམ། ཡང་དབང་བཤད་ལྟ་བུ་ལ་སྔར་གྱི་གང་ལའང་མ་ཆགས་པར་ཇི་ལྟར་བསྟན་པའི་ལམ་ལ་ཐེ་ཚོམ་མེད་པར་སོང་ཤིག །ཅེས་བརྗོད་དོ། །ཅེས་འདི་ཡང་བཟོ་སྐོམ་ངོར་ག་གཱས་སོ། །