ཨོ་རྒྱན་ཆེན་པོས་གསོལ་འདེབས་འདི་འདས་རྗེས་མན་ངག
དེ་ཡང་ཨོ་རྒྱན་ཆེན་པོས་གསོལ་འདེབས་འདི་འདས་རྗེས་མན་ངག་རྣམས་ལྟར་ལ། བག་ཆགས་རང་གྲོལ་དང་། སྒོམ་རིམ་ལྷན་སྐྱེས་ལས་བྱང་རྣམས། ཚིག་གསུམ་པའི་རྒྱུད་དང་། མན་ངག་སྙིང་དགོངས། ཀློང་གསལ། རབ་འབྱམས། སྒྲོན་མ་སྣང་བྱེད། གསང་སྙིང་། དོང་སྤྲུགས་ལ་སོགས་གསང་བདེ་འཇིགས་བྱེད། ཀྱཻ་བདེ་དུས་འཁོར་སོགས་རྒྱུད་མཐའ་དག་གི་དཀྱིལ་འཁོར་རིགས་འདུས་པར་བསྡེབས། བརྒྱ་ཕྱག་ནི་ཞི་ཁྲོ་སྤང་སྐོང་དང་བཤགས་རྒྱུད་ལས་བསྡེབས། ཀློང་བཤགས་ནི་བཤགས་རྒྱུད་དང་དགོངས་འདུས་ལས་བསྡེབས། སྐོང་བཤགས་ནི་དོང་སྤྲུགས། གཟུངས་མཆོག་དང་། གསང་འདུས། དབང་མཆོག་གི་རྒྱུད་ལས་བསྡེབས། ཁྲུས་ཆོག་དབང་དང་བཅས་པ་དོང་སྤྲུགས་དང་། ༼ དེའི་ནང་དུང་ཕྲེང་གི་ལོ་རྒྱུས་བྱུང་མཆན། ༽ རྫོགས་པ་རང་བྱུང་སོགས་ཀྱི་དོན་བསྡུས་སུ་བསྡེབས་ཏེ། སྦྱིན་བསྲེགས། དབང་རྒྱས་འབྲིང་བསྡུས་གསུམ་དང་། བསྐྱེད་རིམ་གྱི་སྒྱུ་ལུས་ཕྱོགས་སུ་ཉམས་སུ་བླངས་ནས། ཉམས་ལེན་ཨ་ཏིའི་མ་ཧཱ་ལྟར་དང་། མཆོག་དབང་གསུམ་དང་ལུས་དཀྱིལ་སྒོམ་རིམ། བག་ཆགས་རང་གྲོལ། འོག་སྒོ་བདེ་བ་ཆེན་པོ་སོགས་ཨ་ནུའི་ཉམས་ལེན། རིག་པ་རང་གྲོལ། གཅེར་མཐོང་རང་གྲོལ། བསམ་གཏན་བར་དོའི་ཁྲིད་རྣམས་ཕྱག་རྫོགས་ཐུན་མོང་གི་ཉམས་ལེན། སྐུ་གསུམ་ངོ་སྤྲོད་ཐོད་རྒལ་སྒྲོན་དྲུག་སོགས་ཡང་ཏི་དང་། སྤྱི་ཏི་བཅུ་བདུན་རྒྱུད་ཀྱི་ལུགས་ལྟར་མན་ངག་གི་སྡེའི་ཉམས་ལེན། དེ་དག་ལ་བརྟན་པ་གདེངས་སུ་མ་གྱུར་ན། འདའ་ཀ་མའི་མན་ངག་འཕོ་བའི་སྐོར། འཕོ་བ་མ་ཐེབ་ན་སུན་མ་ལྟ་བུའི་ཆོས་ངོ་སྤྲོད་ཐོས་པ་རང་གྲོལ། དེ་དག་དང་མ་འཕྲད་ན་རིགས་དྲུག་གི་གནས་འདྲེན་ཕུང་པོ་བསྲེགས་སྦྱངས་ལས་བཞིའི་སྦྱིན་བསྲེགས་རྣམས་ཀྱིས་ལམ་ཁ་ཚང་བ་འདི་མཛད་དེ། དེ་ཡང་བར་དོ་དྲུག་གི་ཉམས་ལེན་ནུས་པའི་བརྩོན་འགྲུས་ཅན་ལ། རང་རྒྱུད་འདུལ་སྦྱོངས་སྔོན་འགྲོའི་རྒྱུད་དག་པར་བསྒྲུབ། སྐྱེ་གནས་བར་དོའི་ཁྲིད་ཀྱིས་ཞི་ལྷག་ངོ་སྤྲད། བསམ་གཏན་གྱིས་ཉམས་ལེན་བསྐྱངས། སྒྲོན་དྲུག་གི་ཁྲིད་ཀྱིས་སྣང་བཞི་ངོ་སྤྲད་དེ། གསལ་བའི་བོག་འདོན་དུ་བྱས། འོག་སྒོའི་བདེ་བའི་བོག་འདོན་དུ་བྱས། གཏི་མུག་ལམ་ཁྱེར་གྱིས་མི་རྟོག་པའི་བོག་འདོན་ཕྱིར་གསུངས་ལ། བསྐྱེད་རིམ་ཀྱིས་སྐྱེ་གནས་སྦྱོངས། རྫོགས་རིམ་འོད་གསལ་གྱིས་འོད་གསལ་སྡུད་རིམ། ཁྲེགས་ཆོད་ཀྱིས་འོད་གསལ་ལས་ཟུང་འཇུག་ཏུ་འཆར་ཀའི་ཀ་དག་གི་འཆར་རིམ། ཐོད་རྒལ་གྱིས་ལྷུན་གྲུབ་སྣང་བའི་བར་དོའི་གདམས་པ། སྲིད་པ་བར་དོའི་ཉམས་ལེན། འོག་སྒོ་མངལ་སྒོ་འདམ་དགགས་རུ་ལོག་གི་བྱས། དེ་ཀུན་གྱིས་བསྐྱེད་རྫོགས་ཀྱི་གཞི་བསམ་གཏན་བར་དོའི་ཁྲིད་ཀྱི་འདེང་ཕྱིར། འཁོར་བ་ཐོག་མཐའ་གཅོད་པའི་རྒྱུད་དང་བར་དོའི་རྒྱུད་ལས་ཁ་བསྐང་སྟེ་ཏིང་འཛིན་བར་དོ་བསྟན། ལམ་གྱི་ཚོད་འཛིན་དུ་རྨི་ལམ་བར་དོའི་རྒྱུད་དང་འཇམ་དཔལ་རྩ་རྒྱུད་ལས་སྡེབ་ཏེ་ཁ་བསྐང་། ཀུན་གྱི་བློ་ཆོད་འཕོ་བའི་གདམས་པ་འཆི་ཁའི་གདམས་པ་གཙོ་བོར་བྱས་པ་སྟེ། མདོར་ན་ཕ་རྒྱུད་ཀྱི་བསྐྱེད་རིམ་དང་། རླུང་གིས་རྫོགས་རིམ་སྒྱུ་ལུས། མ་རྒྱུད་ཀྱི་འོད་གསལ་འཆར་བའི་ཐབས་ཐིག་ལེའི་རྫོགས་རིམ། གཉིས་མེད་རྫོགས་ཆེན་གྱིས་དེ་དག་ཟུང་འཇུག་གི་སྟེང་དུ། ཤིན་ཏུ་རྣམ་པར་དག་པའི་དོན་འོད་དང་ཟུང་འཇུག་གི་སྒྱུ་ལུས་ཀྱི་མངོན་དུ་བྱེད་པའི་བསྐྱེད་རྫོགས་རིམ་གཉིས་ཟུང་འཇུག་ལ་རིམ་ལྔ་སྦྱོར་དྲུག །ཆོས་དྲུག་རྣལ་འབྱོར་བཞི་བསྲེ་བསྐོར་དགུ །མ་རྒྱུད་ཀྱི་འཕོ་སྐུར་དགུ །རྫོགས་ཆེན་སྙིང་ཐིག་གི་རྒྱུད་ཐམས་ཅད་ཀྱི་རྩོལ་བཅས་རྩོལ་མེད་རང་བཞག་གི་རྫོགས་རིམ་ཐམས་ཅད་མདོར་འདུས་ལ་ཆིངས་ཆེ་བ་ཁ་འདུམ་ལ་ཆོད་ཆེ་བ། གནད་ཟབ་ལ་ཐབས་བདེ་བླག་ཏུ་རྫོགས་པར་བསྡུ། དཀྱིལ་འཁོར་འདིར་དབང་དང་བསྙེན་སྒྲུབ་ཐང་ན་དཀྱིལ་འཁོར་ཐམས་ཅད་དུ་དབང་ཐོབ། བསྙེན་བསྒྲུབ་ཐེང་པ་ཡིན་ཏེ། རྣམ་སྣང་གིས་ཀུན་རིགས། རྡོར་སེམས་ཀྱིས་གསང་འདུས། སྣང་མཐའི་ཚེ་དབང་དང་ཞིང་དབང་། ཆེ་མཆོག་གིས་དུས་འཁོར། བཛྲ་དགྱེས་རྡོར། པདྨས་བདེ་མཆོག །ཀརྨ་ཕུར་བ། རཏྣ་དང་འཇམ་དཔལ་ཞི་དྲག་གིས་གཤིན་རྗེའི་གཤེད། ཐུགས་ཆེན་གྱིས་མ་ཎི་དང་དེའི་སྒྲུབ་པ། ཕྱུག་རྡོར་གྱིས་དེའི་དབང་སྒྲུབ། རྟ་མགྲིན་གྱིས་དེའི་དབང་བསྒྲུབ། ཡུམ་ཆེན་ཞི་ཁྲོ་ལྔའི་ཕག་མོ་ཁྲོས་མ་ཡུམ་ཆེན་མོ། སྒྲོལ་མའི་མཎྜལ་བཞི་ཆོག་དང་དབང་བསྒྲུབ་རྣམས། སེདྷ་མུ་ཁའི་སེང་གདོང་མའི་དབང་བསྒྲུབ། ཐུབ་དྲུག་གི་སངས་རྒྱས་སྟོང་དབང་དང་སྒྲུབ་པ། དབང་མོའི་དྲེགས་པའི་སྡེ་དཔོན་སོགས་ཆོས་སྐྱོང་ཐམས་ཅད་ཀྱི་སྲོག་དབང་ཐོབ་ནས་བསྒྲུབ་པ་ཚང་སོ། །དེ་ལས་སྒྲུབ་སྡེ་བཀའ་བརྒྱུད་ཀྱི་དབང་དང་སྒྲུབ་ཐབས་ཀྱང་རྒྱས་པར་རྫོགས་ཏེ། འཇམ་དཔལ་སྐུ་ནི་རཏྣ། པདྨ་གསུང་ནི་རྟ་མགྲིན། བདུད་རྩི་ཡོན་ཏན་ནི་ཆེ་མཆོག་འཁྱིལ་བ། ཡང་དག་ཐུགས་ནི་བཛྲ། ཕུར་བ་ཕྲིན་ལས་ཀརྨ། དམོད་པ་དྲག་སྔགས་ཀྱི་གཙོ་བོ་སྟོབས་ཆེན། གནས་ཡུལ་སྒོ་དབང་གིས་སྲིད་པ་མ་མོའི་དཀྱིལ་འཁོར་དང་། སྡེ་བདུན་སོགས་ཀྱིས་འཇིག་རྟེན་མཆོད་བསྟོད། ལུས་དཀྱིལ་གྱིས་རིག་འཛིན་དཔའ་བོ་བརྒྱད་དང་། ལྷ་སོ་སོའི་རིགས་བདག་གིས་བླ་མ་རིག་འཛིན་གྱི་དཀྱིལ་འཁོར་ཡོངས་སུ་རྫོགས་པ་སྟེ། འདི་དཀྱིལ་འཁོར་ཐམས་ཅད་ཀྱི་གཙོ་རིགས་འདུས་པའི་དབང་ཡིན་པས། ཉི་མ་དང་འོད་ཟེར་འདུ་འབྲལ་མེད་པ་ལྟར་རང་རྩལ་གྱི་འཁོར། བཀའ་བརྒྱད་ཀྱི་བདུན་བརྒྱ་ཉེར་ལྔ། དུས་འཁོར་གྱི་སྟོང་དང་བརྒྱད་ཅུ། སྡོམ་པ་ཆེ་ཆུང་གི་སོ་དྲུག་དང་དོན་གཉིས། གསང་འདུས་ཀྱི་ཉིས་བརྒྱ་སོ་དྲུག །སྒྱུ་འཕྲུལ་གྱི་ཉིས་བརྒྱ་བདུན་ཅུ་རྩ་བཞི་སོགས་ལྷ་ཐམས་ཅད་ཀྱི་དབང་དང་སྒྲུབ་ཕྲིན་འདི་ལ་འདུས་པར་མཛད་ནས། རྒྱུད་ཐམས་ཅད་ཀྱི་སྤྱིའི་ཆོ་གར་བསྒྲིགས་ནས་གཅུས་དཀྲུགས་གབ་པའི་གནད་བསལ་བ། པདྨའི་རང་ལུགས་དམ་པའོ། །ཞེས་པ་ལྟར་དང་། རྡོ་རྗེ་འཆང་གིས། ང་སྤྲུལ་རིག་འཛིན་དམ་པས་སྡེབས། གསུང་བ་ལྟར་མཛད་དེ། བོད་ཀྱི་རྒྱལ་པོའི་ཐུགས་དམ་དུ་བསྩལ་ཞིང་། སླར་གཏེར་དུ་སྦས་པ་དུས་ཕྱིས་པདྨའི་ཕྲིན་ལས་ཀྱི་སྤྲུལ་པ་ཀརྨ་གླིང་བས་གཏེར་ནས་དྲངས་ཏེ་བསྩལ་བ་འདིའི་དགོས་པ་ནི། ཆུ་ཀླུང་རོལ་པའི་མདོ་ལས། ང་ཡི་བསྟན་པ་ཆོས་ཀྱི་གཞུང་། །ཐུགས་ནས་ཐུགས་ཀྱི་དཀྱིལ་དུ་སྦོས། །ཡང་ན་ས་ཡི་སྙིང་པོར་བྱ། །ཅི་ཕྱིར་མུ་སྟེགས་ཅན་མགོ་རྒོད། །ངེས་དོན་དཀྲུགས་པར་འགྱུར་ཏ་རེ། །དེའི་ཕྱིར་ཆུ་ཀླུང་རྒྱུན་མི་གཅོད། །ཅེས་དང་། མདོ་ལས། དོན་ལ་ངེས་པའི་གདེངས་རྙེད་ན། །སེམས་ལ་ཆོས་གཏེར་འབུམ་ཕྲག་རྡོལ། །ཞེས་དང་། རྒྱུད་དགོངས་འདུས་ལས། སུ་ཞིག་ཐུགས་ཀྱི་དཀྱིལ་འཁོར་དུ། །གཏེར་དུ་ལྡན་ནོ་སྐལ་བ་ཆེ། །ཞེས་དང་། དཔལ་མཆོག་གི་རྒྱུད་ལས། རྒྱུད་དང་རྒྱུད་ཀྱི་རྒྱལ་པོ་གང་། །ཕྱག་ན་རྡོ་རྗེ་ཁྱོད་ཉིད་ཀྱིས། །གཏེར་ནས་གཏེར་དུ་ཕྱུངས་ཤིང་སྩོལ། །ཞེས་པ་ལྟར། དམ་ཉམས་དང་འདྲེའི་ཁྱེར་གྱིས་མ་བསླད་པ་སོགས་སོ། །རྡོ་རྗེ་ནམ་མཁའ་དང་མཉམ་པའི་རྒྱུད་ལས། མ་འོངས་སྐྱེ་བོ་འཆོལ་རྙོགས་པའི། །གཟུ་ལུམ་རེས་ཆོད་དར་བའི་ཚེ། །ཟབ་ཆོས་ཕལ་གྱི་ནུས་མཐུ་ཡལ། །སྒྲུབ་ཀྱང་དོན་མེད་ངལ་བའི་རྒྱུ། །བརྩེ་ཆེན་འགྲོ་ལ་ཕན་བཞེད་ནས། །ཟབ་མོའི་གདམ་པ་ཇི་སྙེད་པ། །བཀའ་རྒྱས་བཏབས་ནས་གཏེར་དུ་སྦས། །ཞེས་སོ། །དེའི་ན་འདི་དོང་སྤྲུགས་དང་། གསང་སྙིང་སོགས་ཕྱོགས་གཅིག་གི་རྒྱུད་དུ་རློམ་པ་ནི་ཤེས་མཐོང་གི་རྒྱ་ཆུང་བ་སྟེ། ཐོས་གྲོལ་འདིའི་ཚིག་དང་བརྗོད་སྒྲོས་རྒྱབ་ལུང་། དེ་དག་ཏུ་མེད་པའི་རྫོགས་རིམ། དབང་གི་ངོ་སྤྲོད་ཀྱང་ཡེ་ཤེས་མར་མེའི་རྒྱུད་ཀྱི་ཚིག་དངོས་འབྱུང་བའི་དོན་མེད་ལ། སྣོད་བཅུད་སྣང་སྲིད་སོགས་དང་། གསང་མཆོག་ཀློང་གསལ་སོགས་ཀྱི་ཚིག་རིས་དངོས་སུ་ཡོད། ལུས་ལ་ལྷ་བཞུགས་པ་བར་དོར་ནམ་མཁའ་ལ་ཐོན་ནས་འཆར་བར་རྒྱུད་དེ་དག་ཏུ་མ་དམིགས། ལུང་གི་ཧེ་རུ་ཀ་བཞི་མེད་པ་དང་། ལྷའི་ཞལ་ཕྱག་ཀྱང་དོང་སྤྲུགས་དང་མི་འགྲིགས། ལྷའི་བཀོད་ཚུལ་ཀྱང་ཁྲོམ་དཀྲུགས་ཡིན་ལ། ངོ་སྤྲོད་ཀྱི་ཚིག་དང་གཙོ་བོ་བཀོད་ཚུལ་ཀྱང་། གསང་སྙིང་མ་ཡིན་པའི་ཉི་ཚེའི་བའི་སྒྲུབ་ཐབས་དང་རྒྱུད་དུ་མི་བཟུང་། རྡོ་རྗེ་ཐེག་པ་མཐའ་དག་གི་སྤྱིའི་དཀྱིལ་འཁོར་སྒྲུབ་ཕྲིན་དུ་རིག་པའི་ངེས་ཤེས་དང་ལྡན་པའི་ངང་ནས། ཁྱོད་རང་གི་༴ སརྦ་མངྒ་ལཾ། །