འཕོ་བའི་རྩ་བསྐྱེད་སྐུ་གསུམ་གསང་ལམ།
འཕོ་བའི་རྩ་བསྐྱེད་སྐུ་གསུམ་གསང་ལམ་ཞེས་བྱ་བ་བཞུགས་སོ༔
ན་མོ་གུ་རུ་བཛྲ་ཏེ་ཛ་ཡེ༔ ལམ་གྱི་སྦྱངས་བ་དམན་པ་ལ༔ བློ་ཆོད་སྟོང་འདེབས་ཕུལ་དུ་བླང་༔ མ་བསྒོམ་སངས་རྒྱས་ཆོས་ལྔའི་རྩེ༔ རྫོགས་པ་ཆེན་པོའི་ཁྱད་པར་ནི༔ ཁྲུས་བྱས་ཆོས་བཤད་གཤེད་དང་ཕྲལ༔ བསྲུང་བའི་འཁོར་ལོ་བསྒོམ་ནས་ནི༔ དུས་སུ་གདབ་པ་མཆོག་ཡིན་ཏེ༔ སྲིད་པ་བར་དོར་འཁྱམས་མི་སྲིད༔ རབ་ཀྱི་བར་དོ་དང་པོ་འམ༔ མིན་ཀྱང་རང་བཞིན་སྤྲུལ་བ་རུ༔ འཚང་རྒྱ་བ་ལ་ཐེ་ཚོམ་བྲལ༔ སྔོན་དུ་གོམས་པ་མཆོག་ཏུ་གཅེས༔ ས་མ་ཡཱ༔ དང་པོ་རྩ་བསྐྱེད་འདི་ལྟར་གསལ༔ ཨེ་མ་ཧོ༔ འཁོར་འདས་དག་མཉམ་ཆོས་ཀྱི་དབྱིངས་ཀྱི ༼ ངང་༽༔ རང་ལུས་དག་པ་སྐུ་ལྟར་སྣང་བའི་སྒོར༔ རང་སེམས་དག་པ་ཐུགས་རྗེ་ལྟར་སྣང་བའི༔ ཡུལ་སྣང་དག་པ་འོད་ལྟར་སྣང་བ་ནས༔ མ་དག་འཁོར་བའི་སྒོ་ཡིས་དོན་བྱས་ཏེ༔ དག་པ་ཡེ་ཤེས་དྭངས་མའི་རྩ་ལམ་ནས༔ གཉིས་མེད་མཐའ་གྲོལ་ཡེ་ཤེས་ཆོས་ཀྱི་སྐུ༔ མ་ཡི་འོད་གསལ་བླ་མ་ཀུན་ཏུ་བཟང་༔ བུ༵་ཡི་འོད་གསལ་སློབ་མ་རྣལ་འབྱོར་བ༔ གྲོང༵་འཇུག༵་དབྱེར་མེད་དུ་མ་རང་གྲོལ་ལ༔ ཤེས་རབ་སྐུ་རུ་སྨིན་པའི་མཚམས་སྦྱོར་དུ༔ སྟོང་བ་རང་གྲོལ་འོད་གསལ་ཆོས་སྐུའི་ལམ༔ འཕོ་བྱ་འཕོ་བྱེད་བྲལ་བའི་མཉམ་བཞག་གི༔ སྔར་འདྲེས་གོམས་པའི་གདེངས་ཀྱི་བྱང་ཆུབ་ནས༔ མི་ལྡོག་ཆོས་སྐུར་གྲོལ་བར་བྱིན་གྱིས་རློབས༔ ཞེས་བརྗོད་ནས་སྐུ་དང་ཡེ་ཤེས་འཇུག་པའམ་གྲོང་འཕོ་གྲོང་འཇུག་གི་འཕོ་བ་འདེབ་སོ༔