བསྒྲུབ་པའི་ཆ་ལག་ཐོ་བཞི་བཙུག་པ་བར་ཆད་ཀུན་སེལ།
བསྒྲུབ་པའི་ཆ་ལག་ཐོ་བཞི་བཙུག་པ་བར་ཆད་ཀུན་སེལ་ཞེས་བྱ་བ་བཞུགས་སོ། །
འདི་ལ་ཕྱི་དང་ནང་གི་རིམ། །རྣམ་པ་གཉིས་ལས་དང་པོ་ལ། །ཐུན་མོང་མཆོད་གཏོར་བྱིན་རླབས་དང་། །དངོས་གཞི་ཐོ་བཞི་བཙུག་པ་གཉིས། །དང་པོ་དཀར་དམར་གཏོར་མཆོད་བཅས། །སྔགས་དང་ཏིང་འཛིན་གྱིས་བརླབས་པ། །སྭ་བྷ་ཝ་ཡིས་སྟོང་པར་སྦྱངས། མཆོད་རྫས་དང་བསྐང་རྫས་མི་དམིགས་པ་སྟོང་པ་ཉིད་དུ་གྱུར། སྟོང་པའི་ངང་ལས་ཉེར་སྤྱོད་འདོད་པའི་ཡོན་ཏན་ཕྱི་ནང་གསང་བའི་ཕུན་སུམ་ཚོགས་པ་མ་ཚང་བ་མེད་པ་ནམ་མཁའ་མཛོད་ཀྱི་གཏེར་ཆེན་པོར་གྱུར། ནམ་མཁའ་མཛོད་སྔགས་དང་། ཨོཾ་བཛྲ་ཨརྒྷཾ་ནས་རུ་པ་ནས་སྤརྴེ་ཨཱཿཧཱུྃ། ཞེས་བརྗོད་གཉིས་པ་ཐོ་བཞི་ལ། །རེ་རེའང་ལྷར་གསལ་བསྟིམ་བརྟན་མཆོད། །བསྟོད་དང་ཕྲིན་ལས་བཅོལ་བ་སྟེ། །ནང་གསེས་བྱེ་བྲག་ལྔ་ལྔས་བསྟན། །དང་པོ་ཤར་གྱི་ཐོ་བཙུག་ལ། །དེ་ཉིད་ལྷ་རུ་གསལ་བ་ནི། །བྷྲུཾ། མདུན་གྱི་ཐོ་བྱང་གཞལ་ཡས་ལྷུན་གྲུབ་དབུས། །སྐད་ཅིག་རང་ཤར་ཆོས་སྐྱོང་ཡུལ་འཁོར་བསྲུང་། །སྐུ་མདོག་དཀར་གསལ་གངས་ཀྱི་རི་བོ་འདྲ། །དཔའ་བོའི་ཆ་བྱད་དངུལ་གྱི་གོ་ཁྲབ་གསོལ། །དེ་ཕྱིར་རྒྱལ་ཚུལ་བེར་དང་ལ་ཐོད་ཅན། །ཕྱག་གཉིས་སྙན་འཇེབ་གཡེང་བསྲུང་ཏམྦུ་ར། །ཞབས་གཉིས་རྒྱལ་པོ་རོལ་པའི་སྟབས་ཀྱིས་བཞུགས། །དྲི་ཟ་འབུམ་གྱི་འཁོར་གྱིས་བསྐོར་བར་བསྐྱེད། །གནས་གསུམ་འོད་འཕྲོས་རི་རབ་ཤར་ཕྱོགས་ནས། །སྤྱན་དྲངས་དམ་ཡེ་གཉིས་སུ་མེད་པར་གྱུར། །གཉིས་པ་སྤྱན་དྲངས་པ་ནི། ཧཱུྃ། ཐབས་མཁས་གཞན་དོན་རྣམ་རོལ་ཅིར་ཡང་བསྒྱུར། །སྟོན་པའི་ཞལ་མཐོང་གསང་བའི་ཐ་ཚིག་ཅན། །གཙོ་འཁོར་བཀའ་སྡོད་མ་ལུས་ཐམས་ཅད་ཀུན། །བསྟན་པ་བསྲུང་ཕྱིར་གནས་འདིར་གཤེགས་སུ་གསོལ། །ཨོཾ་དྷི་ཏ་རཥྚ་བཻ་རུ་རཀྛ་ས་པ་རི་ཝ་ར་བཛྲ་ས་མ་ཡ་ཛ། གསུམ་པ་བཞུགས་སུ་གསོལ་བ་ནི། ཧཱུྃ། སྔོན་གྱི་ཐུགས་དམ་དབང་གིས་ནི། །གསང་སྔགས་རྣལ་འབྱོར་བདག་ཅག་གིས། །ཆོས་བཞིན་བསྒྲུབ་པའི་གྲོགས་མཛད་ཕྱིར། །རྟེན་འདིར་རྟེན་ཆོས་བརྟན་པར་བཞུགས། །ཨོཾ་དྷི་ཏ་རཥྚ་ཛཿཧཱུྃ་བྃ་ཧོ། བཞི་པ་མཆོད་པ་འབུལ་བ་ནི། ཨོཾ་ཕྱི་ནང་མཆོད་པའི་སྤྲིན་ཆེན་པོ། །དམ་རྫས་འདོད་ཡོན་གཏོར་མར་བཅས། །གུས་པས་བསྟི་སྟང་སྒོ་ནས་འབུལ། །དགྱེས་པར་དགོངས་ལ་བཞེས་སུ་གསོལ། །ཨོཾ་དྷི་ཏ་རཥྚ་ཨརྒྷཾ་ནས་རཱུ་པ་ནས་སྤརྴེ་མ་ཧཱ་བྷ་ལིངྟ་ཁཱ་ཧི། ལྔ་བ་བསྟོད་དང་ཕྲིན་བཅོལ་ནི། ཧོ། བདག་ཅག་གསང་སྔགས་བསྒྲུབ་པ་ལ། །ཕྱི་ནང་བར་ཆད་མ་བཏང་ཞིག །མཐུན་རྐྱེན་བསམ་དོན་ཆོས་བཞིན་བསྒྲུབ། །བཅོལ་པའི་ལས་ཀུན་ཁྱེད་ཀྱིས་བསྒྲུབ། །དྲི་ཟའི་གཙོ་ལ་ཕྱག་འཚལ་འདུད། །ཅེས་བརྗོད་ཕྲིན་ལས་བཅོལ་བར་བྱ། །གཉིས་པ་ལྷོ་ཡི་ཐོ་བྱང་ལས། །དང་པོ་ལྷ་རུ་གསལ་བ་ནི། །བྷྲུཾ། མདུན་གྱི་ཐོ་བྱང་གཞལ་ཡས་ལྷུན་གྲུབ་དབུས། །སྐད་ཅིག་རང་ཤར་ཆོས་སྐྱོང་འཕགས་སྐྱེས་པོ། །སྐུ་མདོག་མཐིང་ཀ་བཻཌཱུར་ལྷུན་པོ་འདྲ། །དཔའ་བོའི་ཆ་བྱད་ལྕགས་ཀྱི་གོ་ཁྲབ་གསོལ། །དེ་ཕྱིར་རྒྱལ་ཚུལ་བེར་དང་ལ་ཐོད་ཅན། །གཡས་གཡོན་ཕྱག་ན་རལ་གྲི་ནོར་བུ་འཛིན། །ཞབས་གཉིས་རྒྱལ་པོ་རོལ་པའི་སྟབས་ཀྱིས་བཞུགས། །གྲུལ་བུམ་འབུམ་གྱི་འཁོར་གྱིས་བསྐོར་བར་བསྐྱེད། །གནས་གསུམ་འོད་འཕྲོས་རི་རབ་ལྷོ་ཕྱོགས་ནས། །སྤྱན་དྲངས་དམ་ཡེ་གཉིས་སུ་མེད་པར་གྱུར། །གཉིས་པ་སྤྱན་དྲངས་པ་ནི། །ཧཱུྃ། ཐབས་མཁས་གཞན་དོན་རྣམ་རོལ་ཅིར་ཡང་བསྒྱུར། །སྟོན་པའི་ཞལ་མཐོང་གསང་བའི་ཐ་ཚིག་ཅན། །གཙོ་འཁོར་བཀའ་སྡོད་མ་ལུས་ཐམས་ཅད་ཀུན། །བསྟན་པ་བསྲུང་ཕྱིར་གནས་འདིར་གཤེགས་སུ་གསོལ། །ཨོཾ་བཻ་རུ་དྷ་ཀ་ས་པཱ་རི་ཝ་ར་བཛྲ་ས་མ་ཡ་ཛ། གསུམ་པ་བཞུགས་སུ་གསོལ་བ་ནི། ཧཱུྃ། སྔོན་གྱི་ཐུགས་དམ་དབང་གིས་ནི། །གསང་སྔགས་རྣལ་འབྱོར་བདག་ཅག་གིས། །ཆོས་བཞིན་བསྒྲུབ་པའི་གྲོགས་མཛད་ཕྱིར། །རྟེན་འདིར་རྟེན་ཆོས་བརྟན་པར་བཞུགས། །ཨོཾ་བཻ་རུ་དྷ་ཀ་ཛཿཧཱུྃ་བྃ་ཧོ། །བཞི་པ་མཆོད་པ་འབུལ་བ་ནི། །ཨོཾ། ཕྱི་ནང་མཆོད་པའི་སྤྲིན་ཆེན་པོ། །དམ་རྫས་འདོད་ཡོན་གཏོར་མར་བཅས། །གུས་པས་བསྟི་སྟང་སྒོ་ནས་འབུལ། །དགྱེས་པར་དགོངས་ལ་བཞེས་སུ་གསོལ། །ཨོཾ་བཻ་རུ་དྷ་ཀ་ཨརྒྷཾ་ནས་རཱུ་པ་ནས་སྤརྴེ་མ་ཧཱ་བྷ་ལིངྟ་ཁཱ་ཧི། ལྔ་པ་བསྟོད་དང་ཕྲིན་བཅོལ་ནི། ཧོ བདག་ཅག་གསང་སྔགས་བསྒྲུབ་པ་ལ། ཕྱི་ནང་བར་ཆད་མ་བཏང་ཞིག །མཐུན་རྐྱེན་བསམ་དོན་ཆོས་བཞིན་བསྒྲུབ། །བཅོལ་བའི་ལས་ཀུན་ཁྱེད་ཀྱིས་བསྒྲུབ། །གྲུལ་བུམ་གཙོ་ལ་ཕྱག་འཚལ་འདུད། །ཅེས་བརྗོད་ཕྲིན་ལས་བཅོལ་པར་བྱ། །གསུམ་པ་ནུབ་ཀྱི་ཐོ་བྱང་ལས། །དང་པོ་ལྷ་རུ་གསལ་བ་ནི། །བྷྲུཾ། མདུན་གྱི་ཐོ་བྱང་གཞལ་ཡས་ལྷུན་གྲུབ་དབུས། །སྐད་ཅིག་རང་ཤར་ཆོས་སྐྱོང་སྤྱན་མི་བཟང་། །སྐུ་མདོག་དམར་པོ་པད་རག་ལྷུན་པོ་འདྲ། །དཔའ་བོའི་ཆ་བྱད་ཟངས་ཀྱི་གོ་ཁྲབ་གསོལ། །དེ་ཕྱིར་རྒྱལ་ཚུལ་བེར་དང་ལ་ཐོད་ཅན། །གཡས་གཡོན་ཕྱག་ན་མཆོད་རྟེན་སྦྲུལ་ཞགས་འཛིན། །ཞབས་གཉིས་རྒྱལ་པོ་རོལ་པའི་སྟབས་ཀྱིས་བཞུགས། །ཀླུ་དབང་འབུམ་གྱི་འཁོར་གྱིས་བསྐོར་བར་བསྐྱེད། །གནས་གསུམ་འོད་འཕྲོས་རི་རབ་ནུབ་ཕྱོགས་ནས། །སྤྱན་དྲངས་དམ་ཡེ་གཉིས་སུ་མེད་པར་གྱུར། །གཉིས་པ་སྤྱན་དྲངས་པ་ནི། ཧཱུྃ། ཐབས་མཁས་གཞན་དོན་རྣམ་རོལ་ཅིར་ཡང་བསྒྱུར། །སྟོན་པའི་ཞལ་མཐོང་གསང་བའི་ཐ་ཚིག་ཅན། །གཙོ་འཁོར་བཀའ་སྡོད་མ་ལུས་ཐམས་ཅད་ཀུན། །བསྟན་པ་བསྲུང་ཕྱིར་གནས་འདིར་གཤེགས་སུ་གསོལ། །ཨོཾ་བཻ་རུ་པཀྵ་ས་པཱ་རི་ཝ་ར་བཛྲ་ས་མ་ཡ་ཛ༔ གསུམ་པ་བཞུགས་སུ་གསོལ་བ་ནི། །ཧཱུྃ། སྔོན་གྱི་ཐུགས་དམ་དབང་གིས་ནི། །གསང་སྔགས་རྣལ་འབྱོར་བདག་ཅག་གིས། །ཆོས་བཞིན་བསྒྲུབ་པའི་གྲོགས་མཛད་ཕྱིར། །རྟེན་འདིར་རྟེན་ཆོས་བརྟན་པར་བཞུགས། །ཨོཾ་བཻ་རུ་པཀྵ་ཛཿཧཱུྃ་བྃ་ཧོ། །བཞི་པ་མཆོད་པ་འབུལ་བ་ནི། ཨོཾ། ཕྱི་ནང་མཆོད་པའི་སྤྲིན་ཆེན་པོ། །དམ་རྫས་འདོད་ཡོན་གཏོར་མར་བཅས། །གུས་པས་བསྟི་སྟང་སྒོ་ནས་འབུལ། །དགྱེས་པར་དགོངས་ལ་བཞེས་སུ་གསོལ། །ཨོཾ་བཻ་རུ་པཀྵ་ཨརྒྷཾ་༴ནས་རཱུ་པ་ནས་སྤརྴེ་མ་ཧཱུ་བྷ་ལིངྟ་ཁཱ་ཧི། ལྔ་བ་བསྟོད་དང་ཕྲིན་བཅོལ་ནི། ཧོ། བདག་ཅག་གསང་སྔགས་བསྒྲུབ་པ་ལ། །ཕྱི་ནང་བར་ཆད་མ་བཏང་ཞིག །མཐུན་རྐྱེན་བསམ་དོན་ཆོས་བཞིན་བསྒྲུབ། །བཅོལ་པའི་ལས་ཀུན་ཁྱེད་ཀྱིས་བསྒྲུབ། །ཀླུ་དབང་གཙོ་ལ་ཕྱག་འཚལ་འདུད། །ཅེས་བརྗོད་ཕྲིན་ལས་བཅོལ་བར་བྱ། །བཞི་བ་བྱང་གི་ཐོ་བྱང་ལས། །དང་པོ་ལྷ་རུ་གསལ་བ་ནི། བྷྲུཾ། མདུན་གྱི་ཐོ་བྱང་གཞལ་ཡས་ལྷུན་གྲུབ་དབུས། །སྐད་ཅིག་རང་ཤར་ཆོས་སྐྱོང་རྣམ་ཐོས་སྲས། །སྐུ་མདོག་སུ་ཝརྞ་ཡི་ལྷུན་པོ་འདྲ། །དཔའ་བོའི་ཆ་བྱད་གསེར་གྱི་གོ་ཁྲབ་གསོལ། །དེ་ཕྱིར་རྒྱལ་ཚུལ་བེར་དང་ལ་ཐོད་ཅན། །གཡས་གཡོན་ཕྱག་ན་བེ་ཅོན་ནེའུ་ལེ། །ཞབས་གཉིས་རྒྱལ་པོ་རོལ་པའི་སྟབས་ཀྱིས་བཞུགས། །གནོད་སྦྱིན་འབུམ་གྱི་འཁོར་གྱིས་བསྐོར་བར་བསྐྱེད། །གནས་གསུམ་འོད་འཕྲོས་རི་རབ་བྱང་ཕྱོགས་ནས། །སྤྱན་དྲངས་དམ་ཡེ་གཉིས་སུ་མེད་པར་གྱུར། །གཉིས་པ་སྤྱན་དྲངས་པ་ནི། ཧཱུྃ། ཐབས་མཁས་གཞན་དོན་རྣམ་རོལ་ཅིར་ཡང་བསྒྱུར། །སྟོན་པའི་ཞལ་མཐོང་གསང་བའི་ཐ་ཚིག་ཅན། །གཙོ་འཁོར་བཀའ་སྡོད་མ་ལུས་ཐམས་ཅད་ཀུན། །བསྟན་པ་བསྲུང་ཕྱིར་གནས་འདིར་གཤེགས་སུ་གསོལ། །ཨོཾ་བཻ་ཤྲཱ་མ་ཎ་ས་པཱ་རི་ཝ་ར་བཛྲ་ས་མ་ཡ་ཛཿ གསུམ་པ་བཞུགས་སུ་གསོལ་པ་ནི། ཧཱུྃ། སྔོན་གྱི་ཐུགས་དམ་དབང་གིས་ནི། །གསང་སྔགས་རྣལ་འབྱོར་བདག་ཅག་གིས། །ཆོས་བཞིན་བསྒྲུབ་པའི་གྲོགས་མཛད་ཕྱིར། །རྟེན་འདིར་རྟེན་ཆོས་བརྟན་པར་བཞུགས། །ཨོཾ་བཻ་ཤྲཱ་མ་ཎ་ཛཿཧཱུྃ་བྃ་ཧོ༔ བཞི་པ་མཆོད་པ་འབུལ་པ་ནི། ཨོཾ། ཕྱི་ནང་མཆོད་པའི་སྤྲིན་ཆེན་པོ། །དམ་རྫས་འདོད་ཡོན་གཏོར་མར་བཅས། །གུས་པས་བསྟི་སྟང་སྒོ་ནས་འབུལ། །དགྱེས་པར་དགོངས་ལ་བཞེས་སུ་གསོལ། །ཨོཾ་བཻ་ཤྲཱ་མ་ཎ་ཨརྒྷཾ་ནས་རཱུ་པ་ནས་སྤརྴེ་མ་ཧཱ་བྷ་ལིངྟ་ཁཱ་ཧི། ལྔ་པ་བསྟོད་དང་ཕྲིན་བཅོམ་ནི། ཧོ། བདག་ཅག་གསང་སྔགས་བསྒྲུབ་པ་ལ། །ཕྱི་ནང་བར་ཆད་མ་གཏང་ཞིག །མཐུན་རྐྱེན་བསམ་དོན་ཆོས་བཞིན་བསྒྲུབ། །བཅོལ་བའི་ལས་ཀུན་ཁྱེད་ཀྱིས་བསྒྲུབ། །གནོད་སྦྱིན་གཙོ་ལ་ཕྱག་འཚལ་འདུད། །ཅེས་བརྗོད་ཕྲིས་ལས་བཅོལ་བར་བྱ། །འདི་ནི་པདྨ་བློ་གྲོས་གསུང་བསྐུལ་ངོར། །གཏེར་དུ་མེད་ཀྱང་ག་གཱས་བསྒྲིགས་ཆོག་ཡིན། ། བརྡ་ཡིག །གཉིས་པ་ནང་གི་སྒོ་བཞིའི་བྱང་བུ་གདགས༔ ཧཱུྃ༔ ཤར་ཕྱོགས་སྤྲིན་གྱི་གདན་སྟེང་ན༔ སྒོ་སྐྱོང་སྐྱེ་མེད་གཏིང་གསལ་ནི༔ ཡབ་ཡུམ་གཉིས་མེད་སྐུ་མདོག་དཀར༔ ལྕགས་ཀྱུ་དྲིལ་འཛིན་འཁྲིལ་སྤྱོར་རོལ། །སྐུ་ལས་འོད་འཕྲོས་ཆོས་དབྱིངས་ནས༔ ཡེ་ཤེས་སྤྱན་དྲངས་གཉིས་མེད་གྱུར༔ ཨོཾ་བཛྲ་བི་ཛ་ཡ་ས་པཱ་རི་ཝ་ར་ས་མ་ཡ་ཛ་ཛ༔ ཛཿཧཱུྃ་བྃ་ཧོ༔ བཛྲ་ཨརྒྷཾ་ནས་རཱུ་པ་ནས་སྤརྴེ་སརྦ་པཉྩ་རཀྟ་བྷ་ལིངྟ་མ་ཧཱ་སུ་ཁ་ཛྙཱ་ན་པཱུ་ཛ་ཁཱ་ཧི༔ ཧཱུྃ༔ རྒྱལ་ཀུན་མེ་ལོང་ཡེ་ཤེས་སྒྱུ་མའི་འཕྲུལ༔ གདུལ་བྱའི་དོན་དུ་འཇོམས་པ་ཁྲོ་བོའི་སྐུ༔ ཕུང་པོའི་བདུད་དང་སྐྱེ་བའི་སྡུག་བསྔལ་འཇོམས༔ ཡོན་ཏན་ལྷུན་གྲུབ་མཆོག་ལ་ཕྱག་འཚལ་བསྟོད༔ ཨོཾ་བཛྲ་ཀྲོ་ཏ་བི་ཛ་ཡ་ཧཱུྃ་ཕཊ༔ ཞེས་བཟླས༔ མཆོད་བསྟོད་སྔར་བཞིན་མཐར༔ ཧོ༔ ཁྲོ་བོ་ཆེན་པོ་དགོངས་སུ་གསོལ༔ སྔོན་གྱི་ཐུགས་དམ་ཆེན་པོ་བཞིན༔ ཕྱི་ཡི་བར་ཆད་ནང་མ་བཏང་༔ ནང་གི་དངོས་གྲུབ་ཕྱིར་མ་བཏང་༔ སྔགས་འཆང་འབྲས་བུ་བསྒྲུབ་པ་ཡིས༔ འདོད་དོན་མྱུར་འགྲུབ་སྡོང་གྲོགས་མཛོད༔ ཞེས་བརྟན་བཞུགས་ཕྲིན་ལས་བཅོལ༔ གཉིས་པ་ལྷོ་ཡི་བྱང་བུ་བཏགས་ལ༔ ཧཱུྃ༔ ལྷོ་ཕྱོགས་འཇའ་ཚོན་གདན་སྟེང་ན༔ སྒོ་བསྲུང་ངང་དངས་ཆེན་པོ་ནི༔ ཡབ་ཡུམ་གཉིས་མེད་སྐུ་མདོག་སེར༔ བེ་ཅོན་ཞགས་པ་དྲིལ་བུ་འཛིན༔ སྐུ་ལས་འོད་འཕྲོས་ཆོས་དབྱིངས་ནས༔ ཡེ་ཤེས་སྤྱན་དྲངས་གཉིས་མེད་གྱུར༔ ཨོཾ་བཛྲ་ཡ་མནྟ་ཀ་ས་པཱ་རི་ཝ་ར་ས་མ་ཡ་ཛ་ཛ༔ ཛཿཧཱུྃ་བྃ་ཧོ༔ བཛྲ་ཨརྒྷཾ་ནས་རཱུ་པ་ནས་སྤརྴེ་སརྦ་པཉྩ་རཀྟ་བྷ་ལིངྟ་མ་ཧཱ་སུ་ཁ་ཛྙཱ་ན་པཱུ་ཛ་ཁཱ་ཧི༔ ཧཱུྃ༔ རྒྱལ་ཀུན་མཉམ་ཉིད་ཡེ་ཤེས་སྒྱུ་མའི་འཕྲུལ༔ གདུལ་བྱའི་དོན་དུ་འཇོམས་པ་ཁྲོ་བོའི་སྐུ༔ ཉོན་མོངས་བདུད་དང་ན་བའི་སྡུག་བསྔལ་འཇོམས༔ ཡོན་ཏན་ལྷུན་གྲུབ་མཆོག་ལ་ཕྱག་འཚལ་བསྟོད། ཨོཾ་བཛྲ་ཀྲོ་ཏ་ཡ་མནྟ་ཀ་ཧཱུྃ༔ ཞེས་ཅི་མང་བཟླས་མཐར་མཆོད་བསྟོད་དང་ཕྲིན་བཅོལ་སྔར་བཞིན་བྱ༔ ནུབ་ཀྱི་བྱང་བུ་བཏགས་ལ༔ ཧཱུྃ༔ ནུབ་ཕྱོགས་སྨིག་རྒྱུའི་གདན་སྟེང་ན༔ སྒོ་བསྲུང་རང་དངས་ཆེན་པོ་ནི༔ ཡབ་ཡུམ་གཉིས་མེད་སྐུ་མདོག་དམར༔ ཐོད་དབྱུག་ལྕགས་སྒྲོག་དྲིལ་བུ་འཛིན༔ སྐུ་ལས་འོད་འཕྲོས་ཆོས་དབྱིངས་ནས༔ ཡེ་ཤེས་སྤྱན་དྲངས་གཉིས་མེད་གྱུར༔ ཨོ་བཛྲ་ཧྱ་གྷྲི་ཝ་ས་པཱ་རི་ཝ་ར་ས་མ་ཡ་ཛ་ཛ༔ ཛཿཧཱུྃ་བྃ་ཧོ༔ བཛྲ་ཨརྒྷཾ་ནས་རཱུ་པ་ནས་སྤརྴེ་སརྦ་པཉྩ་རཀྟ་བྷ་ལིངྟ་མ་ཧཱ་སུ་ཁ་ཛྙཱ་ན་པཱུ་ཛ་ཁཱ་ཧི༔ ཧཱུྃ༔ རྒྱལ་ཀུན་སོར་རྟོགས་ཡེ་ཤེས་སྒྱུ་མའི་འཕྲུལ༔ གདུལ་བྱའི་དོན་དུ་འཇོམས་པ་ཁྲོ་བོའི་སྐུ༔ ལྷ་བུའི་བདུད་དང་རྒ་བའི་སྡུག་བསྔལ་འཇོམས༔ ཡོན་ཏན་ལྷུན་གྲུབ་མཆོག་ལ་ཕྱག་འཚལ་བསྟོད༔ ཨོཾ་ཧཱུྃ་བཛྲ་ཀྲོ་ཏ་ཧྱ་གྷྲི་ཝ་ཧཱུྃ༔ ཅི་འགྲུབ་བཟླས་མཐར༔ མཆོད་བསྟོད་དང་ཕྲིན་བཅོལ་སྔར་བཞིན་བྱ༔ བྱང་གི་བྱང་བུ་བཏགས་ལ༔ ཧཱུྃ༔ བྱང་ཕྱོགས་ན་བུན་གདན་སྟེང་ན༔ སྒོ་བསྲུང་ཀ་དག་དྲི་བྲལ་ནི༔ ཡབ་ཡུམ་གཉིས་མེད་སྐུ་མདོག་ལྗང་༔ རྒྱ་གྲམ་དྲིལ་འཛིན་འཁྲིལ་སྦྱོར་རོལ༔ སྐུ་ལས་འོད་འཕྲོས་ཆོས་དབྱིངས་ནས༔ ཡེ་ཤེས་སྤྱན་དྲངས་གཉིས་མེད་གྱུར༔ ཨོཾ་བཛྲ་ཨ་མྲི་ཏ་ཀུཎྜ་ལི་ས་པཱ་རི་ཝ་ར་ས་མ་ཡ་ཛ་ཛ༔ ཛཿཧཱུྃ་བྃ་ཧོ༔ བཛྲ་ཨརྒྷཾ་༴ ནས་རཱུ་པ་ནས་སྤརྴེ་སརྦ་པཉྩ་རཀྟ་བྷ་ལིངྟ་མ་ཧཱ་སུ་ཁཱ་ཛྙཱ་ན་པཱུ་ཛ་ཁཱ་ཧི༔ ཧཱུྃ༔ རྒྱལ་ཀུན་བྱ་གྲུབ་ཡེ་ཤེས་སྒྱུ་མའི་འཕྲུལ༔ གདུལ་བྱའི་དོན་དུ་འཇོམས་པ་ཁྲོ་བོའི་སྐུ༔ འཆི་བདག་བདུད་དང་འཆི་བའི་སྡུག་བསྔལ་འཇོམས༔ ཡོན་ཏན་ལྷུན་གྲུབ་མཆོག་ལ་ཕྱག་འཚལ་བསྟོད༔ ཨོཾ་བཛྲ་ཀྲོ་ཏ་ཨ་མྲི་ཏ་ཀུཎྜ་ལི་ཧཱུྃ༔ ཅི་འགྲུབ་མཐར་ནི་མཆོད་བསྟོད་བྱ༔ དེ་ནས་བརྟན་བཞུགས་ཕྲིན་ལས་བཅོལ༔ ཉིན་རེ་བཞིན་ཡང་མཆོད་ཁ་གསོ༔ འདི་ཡིས་བགེགས་དང་བར་ཆད་བསྲུང་༔ དབྱིངས་ཀྱི་མཁའ་འགྲོའི་བརྡ་ཚིག་ལ༔ གབ་སྦས་ཕྲི་བསྣན་མེད་པ་སྟེ༔ གང་དང་མི་འདྲ་ཁྱད་འཕགས་འདི༔ པདྨ་མ་ཏིའི་གསུང་ནན་བཞིན༔ མི་ཆོས་བླ་མའི་རྩེར་ཕྱིན་པ༔ ག་ག་ཨ་བྷྱེ་དེ་ཡིས་སོ༔