དབྱངས་ཅན་ལུས་དཀྱིལ་བསྡུས་པ།
རྡོ་རྗེ་སེམས་དཔའི་དགོངས་ཉམས་ལས༔ དབྱངས་ཅན་ལུས་དཀྱིལ་བསྡུས་པ་བཞུགས༔
རྒྱལ་ཀུན་ཚངས་པའི་གསུང་གསང་འཆར་བའི་དབྱིངས་༼ དབྱངས་དཔྱད། ༽༔ གཞོམ་མེད་རྡོ་རྗེ་གསུམ་ལྡན་ན་དཱའི་དངོས༔ ཕྱག་རྒྱ་ཆེན་པོ་མཚོ་བྱུང་དགྱེས་པའི་གར༔ ཅིར་ཡང་བསྒྱུར་མཛད་ངག་དབང་དབྱངས་ཅན་མ༔ རབ་དཀར་ཟླ་བས་མི་མཚོན་མཚན་དཔེའི་ཞལ༔ ཞི་འཛུམ་གཞོན་ཚུལ་ལོངས་སྐུའི་རྒྱན་ཆས་ཅན༔ ཕྱག་གཉིས་ཏམྦུ་ར་ཡི་རྒྱུད་སྦྲེང་བས༔ བསྡུ་བ་རྣམ་བཞིའི་འགྲོ་ཀུན་རྗེས་སུ་འཛིན༔ ལུས་ལ་ཟག་མེད་བདེ་བ་ཆེན་པོ་སྤོར༔ ངག་ལ་ངག་གི་དཔལ་སྟེར་བཀྲ་ཤིས་སྦྱིན༔ ཡིད་ལ་ཡེ་ཤེས་མཆོག་གི་རྒྱས་འདེབས་པས༔ རང་བྱུང་ཡེ་ཤེས་ལྷ་མོར་རང་ཤར་པའི༔ ཐུགས་ཀར་ཟླ་བའི་གའུ་ཁ་སྦྱོར་དབུས༔ གསེར་འཁོར་རྩིབས་དྲུག་ལྟེ་བར་ཧྲཱིང་གི་མཐར༔ སྔགས་ཕྲེང་སྤུ་ཤད་ལྟ་བུའི་བསྐོར་བ་ལས༔ འོད་ཟེར་འཕྲོ་འདུས་རྒྱལ་ཀུན་དབང་བྱིན་བསྡུས༔ བདག་དང་འགྲོ་བློས་མི་ཤེས་མུན་པ་བསལ༔ ཇི་ལྟ་ཇི་སྙེད་མཁྱེན་པའི་ངང་རྒྱས་བསམ༔ གསང་སྔགས་རིག་སྔགས་གཟུངས་སྔགས་སྙིང་པོའི་སྔགས༔ གཅིག་དྲིལ་ངོ་བོ་ཉིད་དུ་སྔགས་སྒྲ་སྒྲོགས༔ རྩ་སྔགས་ནི༔ ཨོཾ་དེ་ཝི་སུ་གྷོ་ཥ་ཧྲིང་༔ ལས་སྔགས་ནི༔ པྲཛྙཱ་ཛྙཱ་ན་ཝཱ་ཀི་ཤཱ་ཁྱ་སརྦ་སིདྡྷི་ཕ་ལ་ཨ་ཧཱུྃ༔ ཞེས་བཟླའོ༔ ལར་གསུང་རྡོ་རྗེའི་མཐར་ཐུག་ངག་མི་ཤིགས་པའི་ཐིག་ལེ་བསྒྲུབ་གཞིར་བྱས་ཏེ་གནད་དུ་བསྣུན་པས་བསྐྱེད་རྫོགས་རྫོགས་ཆེན་གྱི་རྡོ་རྗེ་གསུམ་རོ་གཅིག་པའི་གནད་ཀྱིས་ལྷ་ཚོགས་མ་ལུས་པ་འགྲུབ་ཅིང་༔ ཤེས་རབ་ཡེ་ཤེས་ཆེན་པོའི་ངང་རྒྱས་པ་ནི་གཏན་ཚིག་གོ༔ འདི་ཀྲི་ཡ་སོགས་ཕྱི་རྒྱུད་ཀྱི་ལྷར་འདོད་པའང་གང་ཟག་གི་བློ་ཁྱད་ཀྱི་འབྱེད་པས་ན། འདིར་ལྷ་ལོངས་སྐུའི་ཆ་བྱད་དང་ལྡན་པས་བླ་མེད་ལུགས་སུ་འདྲེན་མི་ཆོག་ཅིང་། དེའི་ལུགས་ཀྱང་མེད་པར་རྣམ་པ་ཀུན་ཏུ་འགོགས་མི་ནུས་ཤིང་། གལ་ཏེ་ཀྲི་ཡ་ལྟར་འདོད་པ་ལ་ཡང་ལྷ་སྤྲུལ་སྐུའི་ཆ་བྱད་ལས་ལོངས་སྐུའི་རྒྱན་ཆས་ཅན་འོས་མིན་གཞན་ལའང་དཔྱད་པ་མཚུངས་སོ། །པདྨ་ཀཱ་རའི་གསུངས་དཀོན་མཆོག་མཚན་གྱི་བཞེད་སྐོངས་སུ་ག་གཱ་ཨ་བྷྱེས་དག་སྣང་ངོ་། །མངྒལཾ། །