གནོད་སྦྱིན་ནོར་ལྷའི་རྒྱལ་པོ།

གནོད་སྦྱིན་ནོར་ལྷའི་རྒྱལ་པོ་ཡི༔ དབང་གི་མངའ་གསོལ་དངོས་གྲུབ་འདུས༔ ཡེ་ཤེས་སྒྱུ་འཕྲུལ་རོལ་བ་ལས༔ རང་ཤར་ཆེན་པོ་འདི་ཉིད་དོ༔

ན་མོ་གུ་རུ་པདྨ་ཀཱ་ར་ཡེ༔ གང་ཟག་དམ་ལྡན་སྒྲུབ་པ་པོའི༔ ལྷ་ཡི་ཡོན་ཏན་དྲན་པའི་ངང་༔ སྲིད་ཞིའི་མཆོད་པ་སྣ་ཚོགས་བཀྲམ༔ བསྟོད་ཅིང་མངའ་གསོལ་འདི་ལྟར་བྱ༔ ཧོ༔ འཁོར་འདས་དབྱིངས་གཅིག་ཀ་དག་གདོད་མའི་མགོན༔ བསམ་གྱིས་མི་ཁྱབ་རྣམ་ཐར་སྒོ་གསུམ་ལྡན༔ ཐམས་ཅད་ཀུན་མཉམ་མ་གྲོལ་མིང་ཙམ་མེད༔ ཐིག་ལེ་ཆོས་ཀྱི་སྐུ་རུ་དབུ་འཕང་བསྟོད༔ དབྱིངས་དང་འདུ་འབྲལ་མེད་པའི་ཡེ་ཤེས་སྐུ༔ གནས་དོན་ལུས་ཀྱི་སེལ་དུ་གྱུར་བ་ལས༔ མ་དག་མཚན་མར་གནས་པ་རྡུལ་ཙམ་མེད༔ སངས་རྒྱས་ལོངས་སྤྱོད་ཆེན་པོར་དབུ་འཕང་བསྟོད༔ ཡེ་ཤེས་རང་རྩལ་དྲང་པོར་ཤར་བ་ལས༔ སྙིང་རྗེའི་ཞི་ལ་འགོང་བར་མ་གཡུར་བར༔ བདེ་གཤེགས་སྙིང་པོའི་རང་གཟུགས་ཆུ་ཟླ་བཞིན༔ རང་སྣང་སྟོན་པ་སྤྲུལ་བར་དབུ་འཕང་བསྟོད༔ མ་དག་སེམས་ཅན་ཐུགས་རྗེའི་གཟུངས་བའི་གཟུགས༔ སྣ་ཚོགས་བེམ་པོ་སྐྱེ་བར་གང་འདུལ་ལས༔ གཟུགས་པོར་དྲེགས་པའི་ཚུལ་མང་བརྒྱུད་མར་སྟོན༔ འགྲོ་འདུལ་སྤྲུལ་བ་མཆོག་གི་དབུ་འཕང་བསྟོད༔ འདི་ན་སྤྱི་བརྟོལ་སྨོན་པའི་འཁོར་ལོའི་བསྒྱུར༔ མཚུངས་དཔེར་འདྲེན་པའི་དབུ་འཕངས་བསྟོད་མོད་དེ༔ ལས་དང་ཐུགས་རྗེའི་འཕེན་པས་ཕྱོགས་མི་མཚོན༔ མཚོན་མིན་མཚོན་དཔེའི་ཉེར་འཇལ་མངའ་གསོལ་ལོ༔ ཡེ་ཤེས་ལྷ་ནི་འགྲུབ་ཐག་རིང་བར་འཛིན༔ སྔོན་གྱི་དྲེགས་ཚོགས་མཐའ་བཞིའི་བསྡུས་པར་འཛིན༔ སེམས་ཀྱི་སར་བ་གྱད་དུ་གྱུར་བ་ལས༔ དགོས་པ་གཞན་དབང་བསྟན་པའི་ཐབས་མཁས་པོ༔ མི་མཐུན་ཉེར་འཚེ་ཕྲིན་ལས་རྩིབས་ཀྱིས་གཅོད༔ འགྲོ་ཆོས་བཅུ་ཡི་ཕན་བདེའི་ཤུལ་ཀྱང་མཚོན༔ མཐར་ཐུག་གོ་འཕང་མཆོག་ལ་དཀྲི་མཁས་པའི༔ འཁོར་ལོ་རིན་ཆེན་མཆོག་ཏུ་མངའ་གསོལ་ལོ༔ གཤིས་ལ་སྒྲིབ་གཉིས་མེད་པའི་ཆོ་རིགས་བཙུན༔ མཚན་དཔེ་འདུ་འབྲལ་མེད་པའི་ལང་ཚོའི་སྒེགས༔ ཆོས་འབྱོར་དབང་ཐང་བཀྲུན་པའི་མ་ཆེན་མོ༔ ཤེས་རབ་མཛངས་མ་མཆོག་ཏུ་མངའ་གསོལ་ལོ༔ གང་ཞིག་བསོད་ནམས་མེད་ལ་སྙད་དེ་བཏགས༔ དངོས་གྲུབ་སྩོལ་བར་མ་ནུས་ནོར་བུ་ཕལ༔ དཀོན་མཆོག་ཁྱོད་ཉིད་སྒྲིབ་གསུམ་ཅན་ལའང་༔ དགོས་འབྱུང་ཡིད་བཞིན་རིན་ཆེན་མངའ་གསོལ་ལོ༔ རང་དོན་ནམ་མཁའི་མཛོད་ཀྱི་ཏིང་འཛིན་ཐོབ༔ གཞན་དོན་གཏན་པ་མེད་པའི་མཆོད་སྦྱིན་གྱིས༔ བསྡུ་བཞིའི་དབུ་འདྲེན་ཡང་དག་གནས་སུ་སྦྱོར༔ ཁྱིམ་བདག་རིན་པོ་ཆེ་རུ་མངའ་གསོལ་ལོ༔ སངས་རྒྱས་བསྟན་ལ་འགོང་པའི་ཀླ་ཀློའི་དཔུང་༔ རྣལ་འབྱོར་དབུ་འཕང་སྨད་པའི་ཞིང་བཅུའི་དཔུང་༔ རྣམ་དཀར་ངང་ཚུལ་ཉམས་པའི་བདུད་སྡེས་དཔུང་༔ མཐར་བྱེད་དམག་དཔོན་ཆེན་པོར་མངའ་གསོལ་ལོ༔ ཡིད་མགྱོགས་ཕལ་གྱི་རྫུ་འཕྲུལ་རྩེ་མོ་རུ༔ རྐང་བཞིའི་འདེགས་པའི་རླུང་ཤུགས་ཐུན་མོང་མིན༔ སྤྱན་ལྔའི་དབང་བཀྲ་མངོན་ཤེས་ཅིང་ངག་འབྱིན༔ རྟ་མཆོག་རིན་ཆེན་མཆོག་ཏུ་མངའ་གསོལ་ལོ༔ ཡོན་ཏན་ཕུན་ཚོགས་རིན་ཐང་གཞལ་དུ་མེད༔ སྙིང་རྗེའི་སྣ་ཞགས་འདོད་དགུའི་བུམ་པ་འཛིན༔ སྒྲུབ་པ་པོ་ལ་དབྱིག་གིས་རྒྱལ་ཐབས་དབང་༔ སྤྱི་བོའི་བསྐུར་བའི་གླང་བོར་མངའ་གསོལ་ལོ༔ ལན་གཅིག་དངོས་གྲུབ་སྩོལ་ཀྱང་བྲི་གང་རྐྱེན༔ འཇིག་རྟེན་ཁམས་སུ་རྒྱུ་བའི་ཐེའུ་བྲང་གཟུགས༔ ཁྱོད་ཀྱི་ཡེ་ཤེས་བདག་རྐྱེན་གོང་དུ་འཕེལ༔ འཛད་མེད་གཏེར་གྱི་བུམ་པར་མངའ་གསོལ་ལོ༔ ནོར་བུའི་རྡོ་ཁམས་ཡོན་ཏན་ཉེ་ཚེ་བས༔ རྗེས་སུ་བྱེད་པའི་འབྲས་བུ་ཙམ་མིན་པར༔ བློ་དང་ཡིད་ཀྱིས་དཔག་བསམ་ལྷུན་གྱི་གྲུབ༔ རེ་སྐོང་ལྗོན་པའི་མཆོག་ཏུ་མངའ་གསོལ་ལོ༔ སྔོན་སྨོན་བསོད་ནམས་བཟང་པོའི་ས་བོན་ལ༔ བརྡོག་དགུའི་འབྲས་བུ་འབྱུང་བ་ཆོས་ཉིད་ན༔ ཁྱོད་བརྟེན་མ་བཏབས་ཕུན་ཚོགས་གཡུལ་དུ་ཟ༔ མ་རྨོས་འཁྲུངས་པ་མཆོག་ཏུ་མངའ་གསོལ་ལོ༔ ནོར་ལྷ་ཕལ་ལས་ཐོབ་བའི་འབྱོར་བའང་༔ སྡིག་དང་བརྡོས་པས་ལོག་འཚོས་མ་འདྲེས་མེད༔ ཆོས་དང་མཐུན་པའི་ཁ་ཟས་དངར་བོའི་སྐྱེས༔ སྩོལ་མཁས་འདོད་འཇོའི་བ་རུ་མངའ་གསོལ་ལོ༔ ལྷ་ཡི་ཕྱྭ་དང་སྣོད་དང་བཅུད་ཀྱི་ཁམས༔ བརྟན་གཡོས་དྭངས་མ་གཟུངས་སྨོན་དག་པའི་བྱིན༔ མ་ལུས་བཙན་ཐབས་ཉིད་དུ་འགུགས་པ་ཡི༔ འཁོར་འདས་དབང་བསྡུད་ལྕགས་ཀྱུར་མངའ་གསོལ་ལོ༔ ཚེ་བསོད་ཉམས་པ་གསོ་ཞིང་ཡལ་བ་བཀུགས༔ འཐོར་བ་སྡུད་ཅིང་ཟད་པ་བསྲིང་བ་དང་༔ ཕྱིན་ཆན་ཟག་སྡོམ་འགྱུར་མེད་བརྟན་པོར་བཅིང་༔ བྱམས་པའི་ཞགས་པ་མཆོག་ཏུ་མངའ་གསོལ་ལོ༔ གནོད་བྱེད་མུ་ལ་བསེ་རག་འགོང་པོའི་སྡེ༔ ཆགས་འཇུངས་ཀུན་ནས་མནར་བའི་འདུ་ཤེས་ཅན༔ སྟོབས་ནུས་དབང་བོ་ཡན་ལག་བཅས་པ་ཀུན༔ གྲུམ་ཆིངས་སྒྲོག་གི་མཆོག་ཏུ་མངའ་གསོལ་ལོ༔ བསོད་ནམས་ཚོགས་ཆེན་དག་པའི་འབྲས་བུ་ཡིས༔ ཕ་རོལ་སེར་སྣའི་ཉེས་དམིགས་སྟོང་རྒྱས་འདེབས༔ དབང་བཅུའི་མངོན་རྟགས་རྗེས་འཛིན་སྙན་པར་སྒྲོགས༔ རྒྱས་འདེབས་དྲིལ་བུའི་མཆོག་ཏུ་མངའ་གསོལ་ལོ༔ རྒྱུ་འབྲས་འཆོལ་བའི་མུན་པའི་རུམ་དུ་འཁྱམས༔ སྡུག་བསྔལ་ཚ་བས་བསིལ་བའི་སྐབས་མེད་ལ༔ ཡང་དག་ལམ་མཚོན་བདེ་བས་སིམ་པའི་སྐུ༔ གདུང་སེལ་ཟླ་བའི་དབང་པོར་མངའ་གསོལ་ལོ༔ འགྱུར་མེད་རྟགས་༼ རྟག་དཔྱད། ༽པ་ཐུགས་ཀྱི་ཡེ་ཤེས་དབྱིངས༔ བསམ་གྱིས་མི་ཁྱབ་ཕ་མཐའ་གཞལ་དུ་མིན༔ དཔེ་དོན་སྒོ་བསྟུན་ཆོས་འབྱུང་བདེ་ཆེན་གདལ༔ ཚད་མེད་ནམ་མཁའ་ཡངས་པར་མངའ་གསོལ་ལོ༔ གང་གསུང་གནས་སྐབས་མཐར་ཐུག་བདེན་པའི་འབྲས༔ ལམ་དང་ལམ་གྱི་རྟེན་དུ་དངོས་བརྒྱུད་འབྲེལ༔ དབུལ་སེལ་སྨོན་ལམ་ཤུགས་ཀྱི་བརྒྱན་པས་མཛེས༔ པདྨ་མ་ཆགས་མཆོག་ཏུ་མངའ་གསོལ་ལོ༔ ཡོན་ཏན་གཏིང་རྟོགས་མེད་པར་ཟབ་པའི་སྤྲིན༔ སྲིད་དང་འདས་པའི་རྡུལ་ཕྲན་བསྒྲང་དུ་མེད༔ དགོས་འདོད་བསམ་འཕེལ་གཏེར་ཆེན་གྱིས་གཏམས་པའི༔ རྒྱ་མཚོ་བཞི་བའི་མཆོག་ཏུ་མངའ་གསོལ་ལོ༔ ཕྲིན་ལས་ཀུན་ཏུ་རྟགས་ཐོགས་མི་མངའ་ཞིང་༔ རབ་འབྱམས་ངང་བྱུང་རྫོགས་པའི་ཆོ་འཕྲུལ་ལ༔ བར་ཆད་ཉེར་འཚེའི་མཚན་མས་མི་བརྫི་པའི༔ རྡོ་རྗེ་རིན་ཆེན་མཆོག་ཏུ་མངའ་གསོལ་ལོ༔ སྲིད་པ་འདི་ན་ཆེ་བཙན་དྲེགས་ལྡན་པ༔ བརྡོག་གོ་ཅོག་གི་གསེར་རིའི་ཕྲེང་བ་ལས༔ ཀུན་གྱི་གཙུག་ན་ལྷང་ངེར་གཅིག་དུ་སྤོ༔ རིན་ཆེན་ལྷུན་པོའི་མཆོག་ཏུ་མངའ་གསོལ་ལོ༔ སྒྲོན་མེའི་ཉི་ཚེ་ཟླ་བའི་ཆ་ཤས་ལྟར༔ སུས་ཀྱང་ཉེ་རིང་མུན་ལྟའི་མཐའ་དག་གདུང་༔ བསལ་བར་མི་སྤྱོད་ཁྱོད་གཅིག་ནུས་བྱིན་འབར༔ ཉིན་མོའི་མགོན་པོའི་བླ་མར་མངའ་གསོལ་ལོ༔ ཧཱུྃ༔ ཡང་ཅིག་ཁྱོད་ལ་སྔོན་རབས་མངའ་གསོལ་བས༔ རྣམ་པའི་རྒྱ་རྟགས་ད་དུང་མ་ཞིག་ཏུ༔ བདེ་གཤེགས་མངའ་གསོལ་ཆོས་འབྱུང་དབུ་རྒྱན་རྫོགས༔ རང་རིག་གསུང་གི་ཐུགས་མཆོག་ཆེན་པོ་མཚོན༔ དུས་གསུམ་བླ་མ་རྣམས་ཀྱི་མངའ་འབུལ་དུ༔ སྣ་ཚོགས་རྡོ་རྗེ་འབར་བའི་དབང་རྟགས་ཀྱིས༔ རིག་སྟོང་མི་འགྱུར་མེ་ལོང་ཡེ་ཤེས་མཚོན༔ བདག་ཀྱང་ཡོན་ཏན་ཤེས་པས་དབུ་འཕངས་བསྟོད༔ རྒྱུད་སྡེ་བཞི་དྲུག་ཡི་དམ་མངའ་གསོལ་བས༔ སྲིད་ལ་མི་གནས་ཕུར་བ་ཆེ་མཆོག་འདུས༔ མཉམ་པ་ཉིད་ལ་ཆེ་བའི་ཡོན་ཏན་མཚོན༔ བདག་ཀྱང་ཡོན་ཏན་ཤེས་པས་དབུ་འཕངས་བསྟོད༔ མ་རྒྱུད་མཁའ་འགྲོ་རྣམས་ཀྱིས་མངའ་འབུལ་བས༔ བརྟུལ་ཞུགས་རོལ་བའི་ཅང་དྲིལ་མཛེས་པར་སྤུད༔ སོར་རྟོགས་ཡེ་ཤེས་ཆགས་པ་མེད་པར་མཚོན༔ བདག་ཀྱང་ཡོན་ཏན་ཤེས་པས་དབུ་འཕངས་བསྟོད༔ ཆོས་སྐྱོངས་བསྲུང་མ་རྣམས་ཀྱིས་མངའ་འབུལ་བས༔ སྒྲོལ་བའི་ཆས་རྒྱན་ཧོམ་དང་སྤེན་གྲིའི་བརྒྱན༔ བྱ་བ་གྲུབ་པའི་ཕྲིན་ལས་ཐོགས་མེད་མཚོན༔ བདག་ཀྱང་ཡོན་ཏན་ཤེས་པས་དབུ་འཕངས་བསྟོད༔ དཀར་བོའི་ལྷ་རྣམས་ཀུན་ཀྱིས་མངའ་འབུལ་བས༔ པཉྩ་ལི་ཀའི་གཟན་ཁྲ་སྐུ་ལ་གསོལ༔ ཆོས་དབྱིངས་ཡེ་ཤེས་ལྷུན་གྲུབ་དོན་རྟགས་མཚོན༔ བདག་ཀྱང་ཡོན་ཏན་ཤེས་པས་དབུ་འཕངས་བསྟོད༔ ནཱ་ག་ཀླུ་ཡི་ཚོགས་ཀྱིས་མངའ་འབུལ་བས༔ སྐུ་སྨད་ཐིང་ཤམ་སྔོན་པོའི་མཛེས་པར་དཀྲིས༔ འདའ་དཀའ་ཡེ་ཤེས་འགྱུར་མེད་དོན་དུ་མཚོན༔ བདག་ཀྱང་ཡོན་ཏན་ཤེས་པས་དབུ་འཕངས་བསྟོད༔ དམར་བོ་བཙན་རྣམས་ཀུན་གྱིས་མངའ་འབུལ་དུ༔ ལེབ་རྒན་དར་གྱི་སྐུ་རགས་ལྷོད་པ་མེད༔ ཀློང་གྱུར་ཡེ་ཤེས་སྤྱི་ཆིངས་ཕྱག་རྒྱ་མཚོན༔ བདག་ཀྱང་ཡོན་ཏན་ཤེས་པས་དབུ་འཕངས་བསྟོད༔ འཕན་པོ་གཉན་གྱི་སྡེ་དཔོན་མངའ་འབུལ་དུ༔ ཐུན་དུག་རྫས་ཀྱི་གཉན་རྭ་གཡས་སུ་བཅིང་༔ དབྱིངས་གྲོལ་ཡེ་ཤེས་ཆུད་མི་ཟ་བར་མཚོན༔ བདག་ཀྱང་ཡོན་ཏན་ཤེས་པས་དབུ་འཕངས་བསྟོད༔ ཆེ་བཙུན་རྒྱལ་བོའི་ཚོགས་ཀྱིས་མངའ་འབུལ་དུ༔ འཁོར་དུ་དཔུང་ཚོགས་རུ་འདྲེན་ཤ་ར་ར༔ མཐའ་གྲོལ་ཡེ་ཤེས་བཟང་ངན་མཉམ་ཉིད་མཚོན༔ བདག་ཀྱང་ཡོན་ཏན་ཤེས་པས་དབུ་འཕངས་བསྟོད༔ ལྕམ་མོ་སྨན་བཙུན་ཡོངས་ཀྱིས་མངའ་འབུལ་དུ༔ རིན་ཆེན་རྒྱན་གྱི་སིལ་མ་ཁྲོ་ལོ་ལོ༔ འདོད་ཡོན་རྒྱན་དུ་ཤར་བའི་དོན་དུ་མཚོན༔ བདག་ཀྱང་ཡོན་ཏན་ཤེས་པས་དབུ་འཕངས་བསྟོད༔ དཔའ་བོ་རིག་འཛིན་རྣམས་ཀྱིས་མངའ་འབུལ་དུ༔ ལྕང་ལོ་རལ་བས་སྐུ་རྒྱབ་ཁེབ་པར་སྤུད༔ གདུལ་བྱ་རྗེས་སུ་འཛིན་པའི་དོན་དུ་མཚོན༔ བདག་ཀྱང་ཡོན་ཏན་ཤེས་པས་དབུ་འཕངས་བསྟོད༔ རིན་ཆེན་རྣམ་པ་གསུམ་གྱིས་མངའ་འབུལ་དུ༔ ཆོས་གོས་རྣམ་གསུམ་ནང་གོས་ཚུལ་དུ་མནབ༔ འཁོར་བའི་སྐྱོན་གྱི་མ་གོས་དོན་དུ་མཚོན༔ བདག་ཀྱང་ཡོན་ཏན་ཤེས་པས་དབུ་འཕངས་བསྟོད༔ གཡུང་དྲུང་བོན་པོ་ཡོངས་ཀྱིས་མངའ་འབུལ་དུ༔ བེར་དང་སག་ལྷྭམ་རྔམ་པའི་ཡོན་གྱི་བསྟབས༔ ངན་སྔགས་ཐོག་རྡུག་ནག་པོར་དོན་དུ་མཚོན༔ བདག་ཀྱང་ཡོན་ཏན་ཤེས་པས་དབུ་འཕངས་བསྟོད༔ མུ་སྟེགས་ལོག་ལྟ་རིངས་བས་མངའ་འབུལ་དུ༔ ཐོད་འཕྲེང་ཚར་དུ་བརྒྱུས་པའི་རྒྱན་དུ་སྤེལ༔ འདིས་ཀྱང་དུག་གསུམ་སྒྲོལ་བའི་དོན་དུ་མཚོན༔ བདག་ཀྱང་ཡོན་ཏན་ཤེས་པས་དབུ་འཕངས་བསྟོད༔ ནོར་ལྷ་ལྷ་ཆེན་ཀུན་གྱིས་མངའ་འབུལ་དུ༔ ཕྱག་གཡོན་ཟས་གཞོང་རིན་ཆེན་སྙིང་པོར་བཀྲམ༔ འདིས་ཀྱང་རང་བྱུང་ཡེ་ཤེས་དོན་དུ་མཚོན༔ བདག་ཀྱང་ཡོན་ཏན་ཤེས་པས་དབུ་འཕངས་བསྟོད༔ ཧཱུྃ༔ དགྲ་ཚིལ་དྲོན་མོར་བཞུས་པའི་སྣང་གསལ་འདི༔ སྤྱན་ལ་མངའ་འབུལ་སྒྲིབ་མེད་མངོན་ཤེས་སྩོལ༔ ཡེ་ཤེས་སྤྱན་དང་ལྡན་པར་མངའ་གསོལ་བས༔ ཉམ་ཉེས་གཡང་ལས་ཐུགས་རྗེའི་ལམ་སྟོན་ཅིག༔ གྲི་རྐང་ཕྲ་གསང་རྔམ་པའི་ཐོད་རྔའི་སྒྲ༔ སྙན་ལ་མངའ་འབུལ་ལྷ་ཡི་རྣ་བ་སྩོལ༔ མངོན་ཤེས་དྲུག་དང་ལྡན་པར་མངའ་གསོལ་བས༔ གྲགས་སྙན་ཐེག་ཆེན་སེང་གེའི་སྒྲ་སྒྲོགས་ཤིག༔ ཤ་ཚིལ་གསུར་དུད་འཁྲིགས་པའི་སྤོད་སྦྱར་གྱིས༔ ཤངས་ལ་མངའ་གསོལ་ཚུལ་ཁྲིམས་བསུངས་ཞིམ་སྩོལ༔ བསླབ་གསུམ་ཡོན་གྱི་འབྱུངས་གནས་མངའ་གསོལ་བས༔ འགལ་འཁྲུལ་ཉམས་ཆགས་བག་མེད་གཉིད་ལས་སློང་༔ ཉམས་དགྲ་ཞིང་བཅུའི་ཤ་སྣ་སྦྱར་བའི་ཟས༔ ལྗགས་ལ་མངའ་འབུལ་ཏིང་འཛིན་རོ་མཆོག་སྩོལ༔ འགོགས་ལམ་མཐར་ཐུག་མགོན་པོར་མངའ་གསོལ་བས༔ དྲེགས་པ་རང་བརྒྱུད་བརྙེས་བཙུགས་རྟོག་སྒྲིབ་སོལ༔ ཆེ་རྔམས་བསྒོ་བའི་གོས་གསུམ་ལ་སོགས་རེག༔ སྐུ་ལ་མངའ་འབུལ་རྡོ་རྗེའི་གོ་བཙན་སྩོལ༔ ཆོས་བདུན་ལྡན་པའི་ཁྲོ་བོར་མངའ་གསོལ་བས༔ སྲིད་གསུམ་མཐུ་རྡུགས་ཟིལ་གནོན་ཚར་ཕྱིན་ཅིག༔ ཧཱུྃ༔ ཕྱི་ལྟར་ཉེར་སྤྱོད་རྣམ་པ་བདུན་གྱིས་མཆོད༔ འཕགས་པའི་ནོར་བདུན་རྒྱན་གྱི་བརྒྱན་པར་བཀུར༔ རྒྱལ་སྲིད་ནོར་བུ་ཟུང་བདུན་ལྡན་པའི་མཆོད༔ བྱང་ཆུབ་ཡན་ལག་གྲུབ་པའི་ངོ་བོར་བཀུར༔ བཀྲ་ཤིས་རྫས་རྟགས་ཟུང་རྣམས་བརྒྱད་ཀྱི་མཆོད༔ འཕགས་ལམ་རྣམ་ཐར་དབང་འབྱོར་མཆོག་ཏུ་བཀུར༔ ཧཱུྃ༔ ནང་ལྟར་འདོད་ཡོན་རྣམ་པ་ལྔ་ཡི་མཆོད༔ སྐུ་ལྔ་ལྷུན་གྱི་གྲུབ་པོའི་མཆོག་ཏུ་བཀུར༔ དྲག་པོ་རྒྱན་གྱི་དབང་པོའི་མེ་ཏོག་མཆོད༔ གསུང་ལྔ་ལྷུན་གྱི་གྲུབ་པོའི་མཆོག་ཏུ་བཀུར༔ དུག་ལྔ་རང་གྲོལ་མཉམ་པ་ཉིད་ཀྱིས་མཆོད༔ ཐུགས་ལྔ་མ་བརྩལ་ལྷུན་རྫོགས་ཆེན་པོར་བཀུར༔ ཧཱུྃ༔ གསང་བ་བདུད་རྩི་སྨན་རཀ་གཏོར་མའི་ ༼ མས་དཔྱད། ༽མཆོད༔ སྐུ་གསུམ་ལྷུན་གྱི་གྲུབ་པོའི་མཆོག་ཏུ་བཀུར༔ ཡང་གསང་གཉིས་ཤོར་གཉིས་མཉམ་བདེ་སྒྲའི་གདེང་༔ དབྱིངས་ཡེ་ཟུང་འཇུག་བུམ་པའི་སྐུ་རུ་བཀུར༔ མཆོག་གསང་དགྲ་བགེགས་ཤ་ཁྲག་རུས་པས་མཆོད༔ དུག་གསུམ་དབྱིངས་སུ་སྒྲོལ་བའི་དཔའ་བོར་བཀུར༔ ཨོཾ༔ ལྷ་ཁྱོད་སྤྱི་བོའི་གཙུག་ཏུ་མི་བཀུར་དུ༔ མཆོག་དང་དཔལ་སྟེར་ཡོན་ཏན་སྩོལ་བའི་ཕྱིར༔ སྒྲིབ་པོའི་གདུང་ཤུགས་གསོལ་བ་མི་འདེབས་སུ༔ བསྐུལ་བའི་ཐུགས་རྗེ་ཉེ་བའི་རྐྱེན་སད་སླད༔ དབུ་འཕང་ཆོས་ཀྱི་དབྱིངས་སུ་མི་བསྟོད་དུ༔ མཉམ་ཉིད་དོན་ལས་ཞེན་གོལ་དཔྲལ་བའི་ཕྱིར༔ ཆོས་ཅན་སྨོན་པའི་སྐུ་རུ་མི་བསྟོད་དུ༔ ངེས་དངོས་ངེས་ཤེས་སྒྲོ་བསྐུར་མི་འཁྱམས་སླད༔ ཚུར་མཐོང་ཟོལ་ལ་བྱེ་བྲག་སྒེར་བསྟོད་དུ༔ ཕྲིན་ལས་ཁྱད་ཆོས་རིག་ཤིང་ནུས་འབྱིན་ཕྱིར༔ བཀུར་བསྟི་རིམ་གྲོར་བཅས་ཏེ་མངའ་གསོལ་དུ༔ ཚིག་གི་ཕ་མཐར་འཁྱམས་ལས་བཟུང་བས་ཕྱིར༔ རྟགས་ཀྱི་དོན་མཚོན་རྩལ་འདོན་མི་བྱེད་དུ༔ མུ་ཅོར་རྒྱན་གྱི་བཅིངས་ལས་སྤག་པའི་ངང་༔ མངའ་གསོལ་བྱས་སོ་དགྱེས་པའི་ཞལ་བཟང་སྟོན༔ མངའ་གསོལ་བགྱིས་སོ་འཛུམ་པའི་མདངས་ཀྱང་ཕྱུངས༔ མངའ་གསོལ་བྱས་སོ་གསུང་གིས་དབུགས་དབྱུང་ཕོབ༔ མངའ་གསོལ་བྱས་སོ་སྙིང་རྗེའི་ཐུགས་ཀྱི་དགོངས༔ མངའ་གསོལ་བྱས་སོ་ཕྲིན་ལས་རྣམ་བཞི་བསྒྲུབ༔ མངའ་གསོལ་བྱས་སོ་དབང་ཕྱུག་རྣམ་བརྒྱད་སྩོལ༔ མངའ་གསོལ་བྱས་སོ་གྲུབ་གཉིས་ཕུན་ཚོགས་མཛོད༔ མངའ་གསོལ་བྱས་སོ་མ་འགྱང་མ་གཡེལ་ཞིག༔ མངའ་གསོལ་བྱས་སོ་མ་འཁུ་མ་ཞུད་ཅིག༔ མངའ་གསོལ་བྱས་སོ་ལུས་དང་གྲིབ་བཞིན་འགྲོགས༔ སྔོན་ནས་ཐུགས་བསྐྱེད་ཡལ་གམ་བཙན་པ་དང་༔ བར་དུ་ཚུལ་བསྟན་བཀའ་དམ་བཙན་པ་དང་༔ ཐ་མ་བསྒྲུབ་པོའི་ཆད་ལ་བཙན་པ་ཡིས༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ དེ་ལྟར་གུས་གདུང་ཤུགས་བསྐྱེད་དེ༔ རྣམ་ཀུན་བསྟོད་པའི་སྐལ་བཟང་གིས༔ རང་འབྱམས་ལས་ཀུན་ཐོག་མེད་དུ༔ འགྲུབ་འགྱུར་འདི་ལ་ཐེ་ཚོམ་བྲལ༔ ས་མ་ཡཱ༔ ཚུལ་འདི་ག་གཱ་དཔའ་བོ་ཡིས། །བརྒྱུད་འཛིན་སྙིང་པོའི་བསྒྲུབ་བརྩོན་རྣམས། །ལོག་འཚོའི་འཇིགས་ལས་སྐྱོབས་བའི་ཕྱིར། །ནམ་མཁའི་མཛོད་ལས་བསྒྱུར་བའོ། །དགེའོ། །དགེའོ། །དགེའོ། །