མཚན་མ་བྲལ་བ་དབུ་མ་ཆེན་པོ།

མཚན་མ་བྲལ་བ་དབུ་མ་ཆེན་པོ་ཉིད༔ ཟབ་ཞི་སྤྲོས་བྲལ་སོ་སོ་རང་རིག་པ༔ སྒྲོ་འདོག་སོ་གཉིས་ཟད་པའི་རྣམ་པར་ཐར༔ མི་ཕྱེད་སེམས་ཀྱི་རྡོ་རྗེར་མངའ་གསོལ་ལོ༔ ཟག་བཅས་དམིགས་པ་ཞི་བའི་བརྡལ་ཁྱབ་ཏུ༔ ཟག་མེད་རང་ངོ་ཤེས་པའི་དགེ་ཚོགས་ཀྱིས༔ ཟག་འབྲས་ལྷག་མར་བཅས་ཀུན་རྣམ་གཅོད་པའི༔ འོད་ཟེར་ལྡན་པའི་ཉི་མར་མངའ་གསོལ་ལོ༔ ག་བུར་དབང་བོའི་ཡུལ་ནས་ཆས་པ་ལྟར༔ སེམས་ཀྱི་གདུང་བའི་སྟུག་པོ་གཞིལ་ནུས་པའི༔ དང་པོའི་དཔལ་སྟེར་ཟིལ་ཐིག་སྟོང་འཕྲོ་བའི༔ དབང་བཅུར་ནོར་བའི་སྐལ་ནོད་མངའ་གསོལ་ལོ༔ རྣམ་པར་དབུལ་བའི་རང་མཚན་ངོམ་པའི་དུས༔ ཡིད་བཞིན་ནོར་ལ་འཁུ་བའི་རྣམ་རོལ་བརྒྱའི༔ སྐྱེ་དགུའི་དྲུག་པའི་སྨོན་ལམ་དབང་མེད་དུ༔ དགུགས་པའི་བྱེད་པོ་མཆོག་ཏུ་མངའ་གསོལ་ལོ༔ གཞན་དག་ལོག་ལྟའི་སྨོད་པར་གྱུར་བའི་དུས༔ ཕྱིར་ཞིང་ཡོན་ཏན་ཉིད་དུ་དག་དྲན་ནས༔ གཅིག་དུ་ལྟ་བ་ཟབ་མོར་དཀྱིལ་འཁོར་གྱིས༔ འཁོར་ལོར་འབྱམས་སུ་ཀླས་པར་མངའ་གསོལ་ལོ༔ རྣལ་འབྱོར་སྤྱོད་པ་ཟབ་མོར་གཞོལ་བའི་ཚེ༔ སྡིག་ཅན་བདུད་ཀྱི་རྒྱུ་བ་མི་སྦྱིན་པར༔ རྣམ་བཅས་རྣམ་མེད་ཉམས་སུ་བལྟར་བ་ཀུན༔ མཐར་ཕྱིན་གྲོགས་པོ་ཆེ་རུ་མངའ་གསོལ་ལོ༔ ཁྱོད་ནི་རྒྱལ་སྲིད་བདུན་དང་ལྡན་པ་སྟེ༔ ལོག་སྨྲ་རྩིབས་ཀྱིས་གཅོད་པའི་འཁོར་ལོ་ཆེ༔ རྣམ་དཔྱོད་ཕུན་ཚོགས་བཀྲ་བའི་བློན་པོ་སྟེ༔ མངའ་འབྱོར་ཁྱིམ་གྱི་བདག་པོར་མངའ་གསོལ་ལོ༔ ཤེས་རབ་ཟབ་མོའི་ཆོས་འབྱེད་བཙུན་མོ་ལ༔ ཟབ་རྒྱས་ཕུན་ཚོགས་མ་ཎིའི་རྒྱན་འཕྱང་འཕྲུལ༔ ཉམས་སུ་ཆུད་པའི་ཐབས་ཤེས་རྟ་མཆོག་གིས༔ འཁོར་བའི་གྲོང་ལས་རྒྱང་བསྲིང་མངའ་གསོལ་ལོ༔ མཐུ་སྟོབས་ཟབ་མོའི་སྣ་ཞགས་དྲག་ཤུལ་གྱི༔ ཕྲིན་ལས་མཚོན་ཆའི་དགྲ་དཔུང་གཞོམ་པའི་སྒྲས༔ བསྟན་ལ་འགོང་བའི་སྡེ་རིགས་ཚར་ཆོད་པའི༔ སྟོབས་ཆེན་ལྡན་པའི་གླང་པོར་མངའ་གསོལ་ལོ༔ ཤེས་རབ་ཡུལ་དུ་དྲན་པ་ཉེར་བཞག་པའི༔ གཞན་དུ་བདག་པོའི་སྟོང་བའི་རང་རྩལ་ཉིད༔ རང་སྣང་དབང་དུ་འདུས་པའི་རྣལ་འབྱོར་བས༔ གཞན་སྣང་ཟིལ་གནོན་གྲོགས་སུ་མངའ་གསོལ་ལོ༔ ཡང་དག་དགེ་ཆོས་མ་སྐྱེས་སྐྱེ་བ་དང་༔ སྐྱེས་པ་གོང་འཕེལ་སྡིག་ཕྱོགས་དེ་ལས་ལྡོག༔ བརྩོན་འགྲུས་དྲག་པོའི་ཉམས་སུ་ལོན་པ་ཡི༔ ཚོགས་ཀྱི་ལམ་བཟང་གྲོགས་སྦྱོར་མངའ་གསོལ་ལོ༔ ཞི་བའི་བསམ་གཏན་སྟོབས་སུ་འདྲེན་པ་ཡིས༔ རྐང་བཞིའི་བསྒྲོད་པའི་རྫུ་འཕྲུལ་ལ་དབང་ནས༔ དབང་ལྔ་སྟོབས་སུ་རྒྱས་པའི་སྦྱོར་མཆོག་གི༔ དྲོད་རྩེ་བཟོད་ཐོབ་གྲོགས་སུ་མངའ་གསོལ་ལོ༔ མཐོང་བའི་བདེན་དོན་བསྒོམ་པའི་རྣལ་འབྱོར་ལ༔ བྱང་ལག་བདུན་དང་འཕགས་ལམ་ཀླུ་དབང་གིས༔ ས་བཅུ་ཅིག་ཆར་བསྒྲོད་བྱེད་ཉེ་རྒྱུ་ཡིས༔ སྣང་བཞི་འབྱུང་ལྡོག་གྲོགས་སུ་མངའ་གསོལ་ལོ༔ ཁྱད་པར་རིག་སྟོང་ཐིག་ལེ་ཉག་གཅིག་ཏུ༔ རང་སྣང་རང་ངོ་ཤེས་པའི་ཤེས་རབ་ཀྱི༔ སྐད་ཅིག་བྱེ་བྲག་བྱེད་པའི་གཞན་བྱུང་མིན༔ རང་གནས་འབྲས་བུ་སྐུར་སྨིན་ཁྱད་ཆོས་ཅན༔ རྣལ་འབྱོར་བདག་གིས་ཡང་དག་གཉེར་བ་ལ༔ བར་ཆད་ཉེར་འཚེ་ཞི་བར་འགྱུར་བ་ཡིས༔ གྲོགས་པོར་ཁྱོད་ནི་རྟག་ཏུ་བརྟེན་ལགས་ཏེ༔ གཉིས་མེད་དོན་གྲུབ་གྲོགས་སུ་མངའ་གསོལ་ལོ༔ མཐར་ཐུག་སྐུ་གཉིས་འབྲས་བུ་གྲུབ་པ་ན༔ གང་འདུལ་འགྲོ་བའི་དོན་དུ་ལྷག་པའི་ཚེའང་༔ ཕྲིན་ལས་ཕྱོགས་བཅུར་རབ་ཏུ་འབར་བ་ཡིས༔ ཆོས་སྐྱོང་ཆེ་རུའང་ཁྱོད་ནི་མངའ་གསོལ་ལོ༔ མངའ་གསོལ་བྱས་སོ་རང་དོན་ཕུན་ཚོགས་མཛོད༔ མངའ་གསོལ་བྱས་སོ་གཞན་དོན་ཕུན་ཚོགས་མཛོད༔ མངའ་གསོལ་བྱས་སོ་གཉིས་དོན་ཕུན་ཚོགས་མཛོད༔ མངའ་གསོལ་བྱས་སོ་བཀྲ་ཤིས་ཕུན་ཚོགས་མཛོད༔ ཞེས་ཀྱང་ནམ་མཁའ་འཇིགས་མེད་པས་བྲིས།