གནོད་སྦྱིན་དཀོར་གྱི་བདག་པོའི་བསང་མཆོད་བཀྲ་ཤིས་ལྷུན་གྲུབ།

ཡེ་ཤེས་སྒྱུ་འཕྲུལ་དྲྭ་བ་ལས༔ གནོད་སྦྱིན་དཀོར་གྱི་བདག་པོའི་བསང་མཆོད་བཀྲ་ཤིས་ལྷུན་གྲུབ་ཅེས་བྱ་བ་བཞུགས་སོ༔

བརྡ་ཡིག །ན་མོ་གུ་རུ་པདྨ་ཀཱ་ར་ཡེ༔ དཀར་དམར་ཆང་སོགས་འདོད་དགུའི་རྫས༔ གསེར་གཡུ་དུང་དང་མཚལ་གྱི་ཤིང་༔ ལ་སོགས་དྲི་ལྡན་སྣ་ཚོགས་པ༔ བྱིན་གྱིས་རླབས་ཕྱིར་གཙང་ཆབ་བྲན༔ རྃ༔ གོས་དཀར་མོ་ཡི་ཐབ་ཆེན་དག་པའི་ཞུགས༔ དམ་ཚིག་སྒྲོལ་མའི་བརྟུལ་ཞུགས་དང་འགྲོགས་ཤིང་༔དག་བྱེད་གར་བསྒྱུར་མ་ཀཱི་ཕབ་ཀྱིས་བྲན༔ མེ་དུད་རབ་འབྱམས་ལྷ་མོའི་སྒྱུ་འཕྲུལ་བསྒྱུར༔ དབྱིངས་ཀྱི་ཡི་གེ་འབྲུ་གསུམ་ཆར་དུ་ཕེབ༔ རྒྱལ་ཀུན་བྱིན་རླབས་ཐུགས་རྗེ་ཡེ་ཤེས་ཀྱིས༔ སྦྱངས་ནས་ཟག་མེད་མཆོད་པའི་སྤྲིན་ཆེན་པོ༔ དགྱེས་བསྐྱེད་ཀུན་བཟང་ཏིང་འཛིན་སྒྱུ་མར་བཀོད༔ ཅེས་དང་ནམ་མཁའ་མཛོད་སྔགས་མཐར༔ ཀྱཻ༔ དབྱིངས་ཀྱི་ཡེ་ཤེས་ལྔ་ཡི་ཆོ་འཕྲུལ་ལས༔ གདེངས་ཀྱི་འཁོར་བ་རྒྱུན་མ་ཆད་བར་དུ༔ གང་འདུལ་རྣམ་བཞི་སྤྲུལ་སྐུར་མཛད་པ་སྟོན༔ དཀོར་བསྲུང་ཆེན་པོ་འཁོར་དང་བཅས་པ་ཀུན༔ རྣལ་འབྱོར་གདུང་བས་འབོད་ཀྱིས་མ་ཕྱི་བར༔ ད་ལྟ་ཉིད་དུ་འདིར་ནི་དགོངས་པ་བསྐྱེད༔ བཛྲ་ས་མ་ཛ་ཛ༔ དེ་ནས་བསང་གི་མཆོད་པ་ནི༔ ཧོ༔ ཟླ་བའི་དབང་པོ་འཁོར་དང་བཅས་པ་ལ༔ ཟག་མེད་རང་བྱུང་བསང་གི་མཆོད་པ་ནི༔ ཁམས་གསུམ་ཟ་བྱེད་དབྱིངས་ཀྱི་ཤེས་རབ་མའི༔ ལྟ་མིན་ལ་ཞུགས་མིང་གི་མཐར་བྱས་ཏེ༔ རྟོགས་པ་ཀུན་ཏུ་བཟང་པོའི་རང་བཞིན་གྱི༔ དགྱེས་སྐོངས་མཚན་མ་ཞི་བས་འཁོན་མ་དམིགས༔ ཟག་མེད་ལྷག་པའི་ལྷ་ཡི་བསང་རྫས་ནི༔ དགྱེས་མཉམ་རྡོ་རྗེའི་གར་ལ་སྙོམས་ཞུགས་པས༔ ཉི་ཟླའི་རྒྱུ་བ་བཅད་པའི་ཟིལ་མངར་བས༔ ཕྱི་ནང་དཔའ་བོ་ཌཱཀྐི་དམ་ཅན་བསངས༔ རྨུགས་འཐིབ་བག་བཅས་དྲི་མ་སངས་གྱུར་ཅིག༔ རྣམ་པའི་དངོས་པོ་རྡོ་རྗེའི་ལྷ་ཡི་ཚོགས༔ ཤེས་རབ་སྙེམས་མས་དགྱེས་བསྐྱེད་འབུམ་འབུམ་གྱི༔ བསང་རྫས་གང་འཚམས་རྟག་འཆར་ཆོ་འཕྲུལ་བསྒྱུར༔ བསང་མཆོད་འབུལ་ལོ་མཆོག་གི་དངོས་གྲུབ་སྩོལ༔ མ་དག་རྫས་ཀྱི་རྣམ་འགྱུར་དང་འགྲོགས་ཀྱང་༔ དག་པའི་ཏིང་འཛིན་ཡེ་ཤེས་སྟོབས་ལས་ཤར༔ འདོད་དགུ་མྱོང་རེག་གྲོལ་བའི་ཁྱད་པར་ཅན༔ ཕྱི་ནང་གསང་མཆོད་རང་བཞིན་ཕུན་ཚོགས་ཀྱིས༔ བསང་མཆོད་འབུལ་ལོ་མཆོག་གི་དངོས་གྲུབ་སྩོལ༔ ཁྱད་པར་དེ་བཞིན་གཤེགས་པའི་རྒྱན་ཕྲེང་བར༔ གཞོལ་པ་མིན་ཀྱང་གཞན་པས་བླར་ཕྱིན་པ༔ རིན་ཆེན་བཀོད་པའི་འཕྱང་འཕྲུལ་སྣ་ཚོགས་རྒྱན༔ བསང་མཆོད་འབུལ་ལོ་མཆོག་གི་དངོས་གྲུབ་སྩོལ༔ དཀར་གསུམ་མངར་གསུམ་བདུད་རྩིའི་རང་བཞིན་ཟས༔ རྒྱལ་སྲིད་སྣ་བདུན་བཀྲ་ཤིས་ཉེ་བ་དང་༔ ནོར་བུ་ཆ་བདུན་ལ་སོགས་སྣ་ཚོགས་པའི༔ བསང་མཆོད་འབུལ་ལོ་མཆོག་གི་དངོས་གྲུབ་སྩོལ༔ གསེར་ཤིང་མཁན་པ་གཡུ་ཤིང་ཤུག་པ་དང་༔ དུང་ཤིང་བལ་བུ་གྷནྡྷ་བྷ་དྲ་དང་༔ མཐིང་ཤིང་ཨུཏྤལ་མཚལ་ཤིང་འབྲི་མོག་སྟེ༔ དབྱིངས་ལྔ་ཁ་དོག་ལྔ་རུ་ཤར་བའི་རྫས༔ དབྱིངས་ལས་ཀུན་འབྱུང་མཚོན་པའི་དྲི་བསུང་བ༔ འགོགས་མེད་ཕྱོགས་བཅུར་བཞོན་པའི་བསྐུལ་འབྱུང་གིས༔ བསང་མཆོད་འབུལ་ལོ་ཐུན་མོང་དངོས་གྲུབ་སྩོལ༔ རྨུགས་འཐིབ་བག་བཅས་དྲི་མ་སངས་གྱུར་ཅིག༔ ཇ་ཕྲུག་གོས་དར་ཟ་འོག་བེར་ཆེན་དང་༔ རྟ་གླང་མ་ཧེ་མཛོ་འབྲི་དཔག་བསམ་ཤིང་༔ མ་རྨོས་ལོ་ཏོག་འབྲུ་དྲུག་སྨན་སྣ་ཚོགས༔ དཔག་མེད་དངོས་ཡིད་བསང་གི་མཆོད་པ་འབུལ༔ རྨུགས་འཐིབ་བག་བཅས་དྲི་མ་སངས་གྱུར་ཅིག༔ གོ་མཚོན་བཙན་རྫོང་ཀ་ཆ་དཀོར་ཆ་དང་༔ གསལ་བའི་རྒྱན་ཕྲེང་པདྨའི་གདན་གྱི་རིགས༔ མདོར་ན་བསམ་དགུ་ཕུན་ཚོགས་བསང་མཆོད་འབུལ༔ ཁོན་སྦྱངས་རྨུགས་བསལ་འཐིབ་དྭངས་དགྱེས་པ་བསྐྱེད༔ མནོལ་གྲིབ་མི་གཙང་ཐམས་ཅད་དག་གྱུར་ཅིག༔ རྟེན་འབྲེལ་རྫས་ཀྱི་ནུས་པས་སངས་གྱུར་ཅིག༔ ཐ་ཚིག་བཀའ་བསྒོས་སྟོབས་ཀྱིས་དེང་དུ་བཞེས༔ ཁྱད་པར་དམ་ཚིག་ཉམས་ཆགས་ཐམས་ཅད་དང་༔ ཆོས་ལ་དད་བཞིན་དགེ་བཤེས་ཀྱིས་ཕོངས་པས༔ བསྒོམ་སྒྲུབ་དེང་བླང་བཀའ་ཆད་མ་བཏང་ཞིག༔ བཛྲ་ས་མ་ཡ་ཨ་མྲ་སརྦ་པཱུ་ཛ་ཁཱ་ཧི༔ ཅེས་ཀྱང་ག་གཱས་ཚེ་དབང་ངོར་བྲིས་པ་ཐུན་བར་མི་ཁོམ་པའི་སྐྱོན་བཅས་མ་དག་གོ །