མདུན་དཀྱིལ་ཕྲིན་ལས་འོད་ཕྲེང་།
ཡེ་ཤེས་སྒྱུ་འཕྲུལ་དྲྭ་བ་ལས༔ དཀོར་སྲུང་ཡིད་བཞིན་དབང་རྒྱལ་གྱི་མདུན་དཀྱིལ་ཤིན་ཏུ་བསྡུས་པ་ཕྲིན་ལས་འོད་ཕྲེང་བཞུགས་སོ༔
ན་ནོ་གུ་རུ་པདྨ་ཀཱ་ར་ཡེ༔ བརྡ་ཡིག །རྒྱས་པར་སྤྲོ་ན་གཞུང་བཞིན་ལ༔ ཉེ་བར་བསྡུ་ན་འདི་ལྟ་སྟེ༔ རང་ཉིད་ལྷ་ཡི་ང་རྒྱལ་གྱི༔ ཧཱུྃ༔ རང་ཉིད་ལྷ་ཡི་མདུན་ས་རུ༔ པད་ཉི་བམ་གྱི་གདན་སྟེང་དུ༔ ཆོས་སྐྱོངས་ཆེན་པོ་ཡིད་བཞིན་དབང་༔ ཞལ་གཅིག་ཕྱག་གཉིས་ཌ་དྲིལ་འཁྲོལ༔ པདྨའི་གཉེན་ཞུ་དབུ་ལ་གསོལ༔ རྣལ་འབྱོར་ཆས་རྫོགས་བཞེངས་སྟབས་སུ༔ མཛེས་བརྗིད་རྔམས་པའི་གར་གྱིས་འགྱིང་༔ བསྟན་པ་བསྲུང་བའི་བྱེད་པོར་ཤར༔ ཤར་དུ་ཐལ་སྐྱོང་སྐུ་མདོག་དཀར༔ ཕྱག་གཡས་ནོར་བུ་འབར་བ་བསྣམས༔ ལྷོ་རུ་དོན་གྲུབ་རྒྱལ་པོ་སེར༔ ཕྱག་གཡས་གཏེར་གྱི་བུམ་པ་བསྣམས༔ ནུབ་ཏུ་ཝ་ཀི་པ་ལ་དམར༔ ཁམས་གསུམ་འགུགས་པའི་ལྕགས་ཀྱུ་གཡས༔ བྱང་དུ་སྟག་མདའ་སྐུ་མདོག་ནག༔ ཕྱག་གཡས་སྤེན་གྲི་ཀླད་ལ་ཕྱར༔ ཀུན་ཀྱང་གཡོན་པས་འདོད་དགུ་ཡི༔ བཀང་བའི་རིན་ཆེན་གཞོང་བ་བསྣམས༔ ཞི་རྒྱས་དབང་དྲག་རྒྱན་ཆ་ལུགས༔ མ་ལུས་ཡོངས་སུ་རྫོགས་པར་གསལ༔ རུ་འདྲེན་སྡེ་བཞིའི་འཁོར་གྱིས་བསྐོར༔ ཡང་སྤྲུལ་ལྷ་སྲིན་སྡེ་བརྒྱད་དང་༔ བཀའ་ཉན་ལས་བྱེད་བསམ་མི་ཁྱབ༔ རང་རང་འཚམ་པའི་གདན་ལ་བཞེངས༔ གནས་གསུམ་འོད་ཟེར་རབ་འཕྲོས་པས༔ གར་བཞུགས་གནས་ནས་སྤྱན་དྲང་བསྟིམ༔ དེ་ནས་སྤྱན་འདྲེན་བཞུགས་གསོལ་ནི༔ ཧཱུྃ༔ཆོས་སྐྱོང་ཆེན་པོ་འཁོར་དང་བཅས༔ ཐུགས་དམ་དབང་གིས་གཤེགས་སུ་གསོལ༔ དམ་ཚིག་ཆེན་པོའི་གདན་ལ་བཞུགས༔ མི་འབྲལ་ཐུགས་རྗེ་བརྩེ་བས་སྐྱོངས༔ རཱ་ཛ་ཙནྡྲ་བཛྲ་ས་མ་ཡ་ཛ་ཛ༔ ས་མ་ཡ་ཏིཥྛ་ལྷན༔དེ་ནས་ཕྱག་འཚལ་མཆོད་འབུལ་ནི༔ ན་མོ༔ སངས་རྒྱས་བསྟན་སྲུང་མཐུ་བོ་ཆེར༔ སྒོ་གསུམ་གུས་པས་ཕྱག་འཚལ་ལོ༔ འཇིག་རྟེན་འཇིག་རྟེན་འདས་པ་ཡི༔ མཆོད་ཆེན་དམ་པའི་བསྟི་སྟངས་བརྗིད༔ ན་མོ་སརྦ་མ་ཧཱ་པཱུ་ཛ་ཁཱ་ཧི༔ དེ་ནས་བསྟོད་པ་བྱ་བ་ནི༔ ཧཱུྃ༔ སྔོན་ཚེ་པདྨ་གར་དབང་ཕྱུག༔ རྣམ་སྲས་དབང་རྒྱལ་ཆོ་འཕྲུལ་གྱིས༔ འགྲོ་ཀུན་རྒྱུ་འབྲས་དབུལ་སེལ་ལྷ༔ འཁོར་དང་ཡང་འཁོར་བཅས་ལ་བསྟོད༔ དེ་ནས་འབོད་རྦད་ལས་སྔགས་ནི༔ ཧཱུྃ༔ བདག་ཉིད་ཡི་དམ་ཐུགས་ཀ་ནས༔ འོད་འཕྲོས་ཆོས་སྐྱོངས་ལ་བསྐུལ་ཏེ༔ ཐུགས་ཀར་སྲོག་མཐར་སྔགས་ཕྲེང་ལས༔ འོད་འཕྲོས་འཁོར་འདས་དཔལ་ཡོན་ཀུན༔ བསྡུས་ཏེ་ཞི་རྒྱས་དབང་དྲག་གི༔ དངོས་གྲུབ་ཆར་བཞིན་བབས་པར་བསམ༔ ཨ་རཱ་ཛ་ཙནྡྲ་ས་མ་ཡ་ཛ་ཛ༔ སརྦ་སིདྡྷི་ཕ་ལ་ཝ་ཤཾ་ཀུ་རུ་ཧོ༔ ས་མ་ཡཱ༔ དེ་ལྟར་རྒྱུན་དུ་བརྩོན་བྱས་ན༔ འགྲུབ་རྟགས་ཉི་མ་བདུན་ན་འབྱུང་༔ སྟན་གྱི་དྲོད་མ་ཡལ་བ་དང་༔ ཏིང་འཛིན་ལྷ་ཡི་གཟེར་ལྡན་པས༔ སྔགས་བཟླས་དག་ཀྱང་བར་མ་ཆད༔ དེ་ལྟར་མི་ལྡན་གྱི་ན་བས༔ ཆོས་སྐྱོང་འགྲུབ་པ་ཤིན་ཏུ་དཀའ༔ གནད་ལྡན་མི་འགྲུབ་མི་སྲིད་དེ༔ འཇིགས་སྐྲག་སློང་ན་ངེས་པའི་རྟགས༔ དེ་ནས་དངོས་ཉམས་རྨི་ལམ་དུ༔ རྗེས་བཟུང་རབ་འབྱམས་ཕྲིན་ལས་བསྒྲུབ༔ ས་མ་ཡཱ༔ གྲུབ་རིགས་ག་གཱ་ཨ་བྷྱེ་ཡིས། །སྐལ་བཟང་སློབ་མས་བསྐུལ་ངོར་སྨྲས༔ ཡི་གེའི་རིས་སུ་བཀོད་པ་ནི། །ཨ་བྷ་ཡ་ཡི་མིང་གིས་སོ། །སརྦ་མངྒ་ལཾ། །ཡག་སོ། །ཡག་སོ། །