ཚོགས་མཆོད་འདོད་ཡོན་རྒྱ་མཚོ།

ཡིད་བཞིན་པདྨ་བསྟན་སྐྱོང་གི༔ ཚོགས་མཆོད་འདོད་ཡོན་རྒྱ་མཚོ་ཞེས་བྱ་བ་བཞུགས་སོ༔

ཡིད་བཞིན་པདྨ་དབང་རྒྱལ་གྱི་ཚོགས་བསྐང་འདོད་ཡོན་རྒྱ་མཚོ་ཞེས་བྱ་བ༔ ན་མོ་གུ་རུ་པདྨ་ཀཱ་ར་ཡེ༔ བསོད་ནམས་དམ་པའི་མཆོག་གྱུར་བ༔ སྤྱི་དམིགས་རྣམ་པ་བཅུ་དགུ་ལས༔ དང་པོ་ཚོགས་བསྐང་བྱིན་རླབས་ནི༔ ཧཱུྃ༔ རང་ཉིད་ལྷ་ཡི་ཐུགས་ཀ་ནས༔ འབྱུང་བའི་ཡི་གེ་རཾ་ཡཾ་ཁཾ༔ འཕྲོས་པས་ཚོགས་ཀྱི་དངོས་འཛིན་སྦྱངས༔ ཨ་ཨཱཿཧཱུྃ་གི་འོད་ཟེར་གྱིས༔ ཟག་མེད་ཡེ་ཤེས་བདུད་རྩིར་གྱུར༔ འདོད་ཡོན་ལྷ་མོའི་སྤྲིན་ཕུང་གཏིབས༔ རཾ་ཡཾ་ཁཾ༔ ཨ་ཨཱཿཧཱུྃ༔ གཉིས་པ་སྤྱན་འདྲེན་པ་ནི༔ ཧཱུྃ༔ དམ་ཚིག་ཐུགས་དམ་དབང་གིས་ནི༔ བླ་མ་རྒྱལ་བ་སྲས་བཅས་དང་༔ ཕྲིན་ལས་དབང་ཕྱུག་དབང་གི་རྒྱལ༔ འཁོར་བཅས་འདོད་ཡོན་ཚོགས་ལ་བྱོན༔ ག་ན་ཙཀྲ་ཛྙཱ་ན་ལོ་ཀ་དཱེ་ཝ་ས་པཱ་རི་ཝ་ར་ཕེཾ་ཛ༔ ཨེ་ཧྱ་ཧི༔ གསུམ་པ་ཚོགས་མཆོད་འབུལ་བ་ནི༔ ཧཱུྃ༔ ངོ་བོ་རང་རྩལ་འདུ་འབྲལ་མེད༔ གང་འདུལ་ཚུལ་གྱིས་འགྲོ་དོན་མཛད༔ བླ་མ་ལྷ་དང་བསྲུང་མར་བཅས༔ ཟག་མེད་འདོད་ཡོན་ཚོགས་མཆོད་འབུལ༔ ག་ཎ་ཙཀྲ་པཱུ་ཙ་ཁཱ་ཧི༔ བཞི་བ་ཐུགས་དམ་བསྐངས་བ་ནི༔ ཨོཾ༔ ཉེར་སྤྱོད་བཟང་དགུ་ཕྱི་ཡི་རྫས༔ ༼ བུམ་དབང་དང་མཐུན་པའི་མཆོད་པ། ༽ འདོད་ཡོན་ལྷ་མོ་ནང་གི་གར༔ ༼ གསང་དབང་དང་མཐུན་པའི་མཆོད་པ། ༽སྨན་རཀ་གཏོར་མ་སྦྱོར་སྒྲོལ་གླུ༔ ༼ ཤེར་དབང་དང་མཐུན་པའི་མཆོད་པ། ༽ཡེ་ཤེས་ཕྱག་ ༼ ཚིག་དབང་དང་མཐུན་པའི་མཆོད་པ། ༽རྒྱ་བླ་ན་མེད༔ རྩ་གསུམ་སྲུང་མར་བཅས་པ་ཡི༔ ཐུགས་དམ་གཉན་པོ་བསྐང་ཕྱིར་འབུལ༔ བརྟུལ་ཞུགས་ཆས་དང་བསྐོར་བའི་རྒྱ༔ ཏིང་འཛིན་ལྟ་བ་རྨད་དུ་བྱུང་༔ གྲོལ་ཡན་བྱང་ཆུབ་སེམས་གཉིས་ཀྱི༔ མཆོད་ཆེན་དམ་པའི་རྣམ་པར་ཐར༔ ཉམས་ཆགས་ཉེས་ལྟུང་སྐོངས་ཕྱིར་འབུལ༔ བརྩེ་ཆེན་ཐུགས་རྗེའི་བཞེས་སུ་གསོལ༔ ཨོཾ་སརྦ་པཱུ་ཛ་ར་ཏི་ཨ་ཧཾ་ཧོ༔ ཁཱ་ཧི་ཁཱ་ཧི༔ ལྔ་བ་ཉེས་པ་བཤགས་པ་ནི༔ ཨཱ༔ རང་བཞིན་མཉམ་པའི་ཆོས་སྐུ་ལས༔ བརྫུ་བག་ཐབས་ལ་མཁས་པའི་ཆར༔ ལྟ་བ་དམན་སོགས་སྤྱོད་པ་ཡི༔ ཚུལ་ཉམས་མཐའ་དག་མཐོལ་ལོ་བཤགས༔ དགོངས་པ་ཚད་དུ་མ་འཁྱོལ་བར༔ མཆོད་པ་ལོ་ཟླར་འདས་པ་དང་༔ སྔགས་བཟླས་གྲངས་ཀྱིས་མ་ལོང་བ༔ འདོད་ཡོན་མཆོད་པ་འདིའི་བསྐང་ངོ་༔ ལྷ་ལ་བརྙེས་སྨོད་རང་གི་སྐྱོན༔ བཀལ་ནས་ཡིད་ཆད་བྱས་པ་དང་༔ རྒྱུ་ཆུང་ཕུད་ཉམས་ལ་སོགས་པ༔ བཤགས་སོ་འཁོན་འདྲེས་དག་གྱུར་ཅིག༔ བཛྲ་ས་མ་ཡཱ་ཤུདྡྷེ་བི་ཤུདྡྷེ་ཨཱ༔ དྲུག་པ་བསྒྲལ་བའི་མཆོད་པ་ནི༔ ཕཊ༔ བདག་འཛིན་གདོན་གཟུགས་དོན་ཤར་བ༔ དགྲ་བགེགས་རེ་དོགས་ཕན་གནོད་ཀྱི༔ རྒྱུ་འབྲས་མཚན་མ་དབྱིངས་སུ་བཟློག༔ རྣམ་ཤེས་ཆོས་ཀྱི་དབྱིངས་སུ་དྲོངས༔ མ་ཧཱ་བིགྣན་ནྲ་ཏྲི་ཤ་ཏྲཾ་མ་ར་ཡ་ཕཊ༔ བདུན་པ་ཕུང་ཁམས་ཡབ་ཡུམ་སྦྱོར་མཆོད་ནི༔ ཝཾ༔ བདེ་ཆེན་རྡོ་རྗེ་ཡབ་ཀྱི་ངང་༔ ཨེ་དབྱིངས་ཡུམ་ལྔའི་སྙིགས་མ་ཡང་༔ དག་པས་དག་པ་མཉམ་སྦྱོར་བར༔ ཨ་ནུ་ཡོ་གའི་ཀློང་དུ་རོལ༔ མ་ཧཱ་ར་ག་པཱ་ལ་ཨ་རོ་ལིཀ༔ པཱུ་ཛ་ཁཱ་ཧི༔ ཞེས་བརྗོད་འདོད་ཡོན་ཚོགས་ལ་རོལ༔ བརྡའ་དང་བརྡའ་ལེན་འདི་ལྟར་རོ༔ ཀྱཻ༔ ལྷ་དང་བླ་མ་མཁའ་འགྲོ་མ༔ དམ་ཅན་རྒྱ་མཚོ་ངམ་ཟིན་གྱི༔ རྣལ་འབྱོར་ཕུང་ཁམས་རྡོ་རྗེའི་སྐུ༔ ཐེག་ཆེན་འདི་ཡི་རྒྱན་ལ་རོལ༔ ཨ་ཧོ་མ་ཧཱ་སུ་ཁ་པཱུ་ཛ་ཁཱ་ཧི༔ དེ་ནས་དབང་འབྱོར་ལས་དྲངས་ནས༔ ཧོ༔ བདུད་རྩི་ཡོན་ཏན་ཚིམ་པ་དྲུག་ལྡན་ནི༔ ཨ་ཧཾ་འབར་འཛག་ནང་གི་བསྲེགས་ཤིང་གྱུར༔ མཚན་དཔེ་དགའ་བ་བཅུ་དྲུག་རྡོ་རྗེའི་སྐུ༔ སྟོང་ཉིད་ལང་ཚོ་རྒྱས་པའི་དཔྱིད་དུ་ཤར༔ ཨ་ལ་ལ་ཧོ༔ ཞེས་རོལ་ལོ༔ ལྷག་མཆོད་འདོད་ཡོན་རྒྱ་མཚོར་བརླབས༔ ཧཱུྃ༔ དབང་ཕྱུག་མ་སོགས་སྔོན་བྱུང་གི༔ ལྷག་ལ་དབང་པའི་ཕོ་ཉ་དང་༔ འཁོར་གྱི་དྲེགས་པ་སྡེ་བརྒྱད་དང་༔ ཕྱག་བརྙན་རྒྱ་མཚོར་མཆོད་པ་འབུལ༔ མཆོག་ཐུན་དངོས་གྲུབ་གྲོགས་མཛོད་ཅིག༔ དམ་ལ་མ་འདའ་ས་མ་ཡཱ༔ ཨུཥྩི་ཊ་བྷ་ལིངྟ་ཁཱ་ཧི༔ དེ་ནས་བསྐུལ་བསྡུས་བྱེད་ན༔ ཛ༔ ཆོས༵་སྐྱོངས་འགྲོ་འདུལ་ཐུགས་རྗེའི་བདག༔ ཆོས༵་དབྱིངས་ཀློང་ནས་སྐུར་བཞེངས་ཤིག༔ ཆོ༵ས་བཞིན་བསྒྲུབ་པའི་བར་ཆད་སོལ༔ ཆོས༵་སྲིད་དབང་ཐང་དར་རྒྱས་མཛོད༔ ཆོས༵་ལ་སྡང་བའི་བསྟན་དགྲ་སོད༔ ཆོས༵་འཁོར་གཉན་པོ་བསྲུང་སྐྱོབས་མགོན༔ ཆོས༵་ཉིད་བདེན་པའི་རང་ཀློང་དུ༔ ཆོས༵་ཅན་འཁོར་བ་དབྱིངས་སུ་བཟློག༔ ཨ་རཱ་ཛ་ཙནྡྲ་ས་མ་ཡ་ཀརྨ་སརྦ་ཧོ་ཡེ་སིདྡྷི༔ ཅེས་ཀྱང་ག་གཱས་སོ། །བཅུ་གཅིག་ཆད་མདོ་སྐྱོང་བ་ནི༔ ཧཱུྃ༔སྔོན་ཚེ་པདྨ་གར་དབང་ཕྱུག༔ ཀློང་གསལ་བདུད་འདུལ་ཁྲོ་བོ་ལོད༔ ཁྲག་འཐུང་ག་གཱ་ཨ་བྷྱེ་ཡི༔ སྤྱན་སྔར་ཁས་བླངས་དམ་བཅས་པའི༔ ཆད་ལ་བརྩོན་པའི་དམ་ཅན་ཚོགས༔ ཤ་ཁྲག་དམར་གྱི་གཏོར་མ་བཞེས༔ ཕྲིན་ལས་རབ་འབྱམས་ཁྱོད་ཀྱིས་བསྒྲུབ༔ སངས་རྒྱས་བསྟན་དང་བསྟན་འཛིན་སྐྱོང་༔ རཏྣ་བྷ་ལིངྟ་མཾ་ས་རཀྟ་སརྦ་ནིརྟི་ཁཱ་ཧི༔ བཅུ་གཉིས་བསྟན་མའི་མཆོད་འབུལ་ནི༔ བྷྱོ༔ བོད་ཁམས་སྐྱོང་མཛད་མ་སྲིང་སྡེ༔ བསྟན་པ་བསྲུང་བར་ཞལ་བཞེས་པ༔ འཁོར་བཅས་འདིར་བྱོན་མཆོད་པ་བཞེས༔ མུ་སྟེགས་རྒྱུ་བའི་ལམ་སྲང་ཆོད༔ མ་ཧཱ་བྷ་ལིངྟ་ཁཱ་ཧི༔ དེ་ནས་དམ་སྲི་མནན་པ་ནི༔ དགུགས་གཞུགས་ལན་གསུམ་བགྱིས་པའི་མཐར༔ གཏོར་གཞོང་དགྲ་བགེགས་སྟེང་དུ་མནན༔ རི་རབ་ཆེན་པོའི་ལྷན་ནེར་བསྒོམ༔ སྟེང་དུ་དཀྱིལ་འཁོར་ལྷ་ཚོགས་ཀྱིས༔ གླུ་བྲོ་གར་གྱི་བརྟུལ་ཞུགས་སྤྱོད༔ བྷྲཱུྃ༔ གཏོར་གཞོང་ཀེང་རུས་རི་རབ་དབྱིབས༔ ནང་ནི་མནར་མེད་ཁང་བ་རྔམ༔ སྟེང་རོལ་དཀྱིལ་འཁོར་བཀོད་པ་རྫོགས༔ གར་གྱིས་སྟོབས་བཅོམ་ཉོན་མོངས་མེད༔ སྡིག་ཟད་ཐེག་པ་རིམ་དགུ་རྟོགས༔ བྱང་ཆུབ་ཡང་དག་མ་སྐྱེས་པར༔ ལྡང་མེད་ཐབས་ཀྱི་གཡོ་བ་འདིའི༔ དེ་མ་ཐག་ཏུ་གྲོལ་ཐར་རྒྱ༔ སྟྭཾ་བྷ་ཡ་ནན༔ ཀ་ཡ་ཝཀྐ་ཙིཏྟ་བཛྲ་ནན༔ བཅུ་བཞི་དངོས་གྲུབ་བླངས་བ་ནི༔ ཧཱུྃ༔ རྩ་གསུམ་རྣམ་རོལ་དབང་གི་རྒྱལ༔ བསྒྲུབ་མཆོག་བདག་ལ་དགྱེས་ཞལ་སྟོན༔ མཆོག་ཐུན་དངོས་གྲུབ་མ་ལུས་པ༔ མྱུར་བའི་ཤུགས་ཀྱིས་ད་ལྟ་སྩོལ༔ ཧཱུྃ་ཧཱུྃ་རཱ་ཛ་ཙནྡྲ་པདྨ་དྷརྨཱ་པཱ་ལ་སརྦ་སིདྡྷི་ཕ་ལ་ཧོ༔ བཅོ་ལྔ་ཐུགས་འགལ་བཤགས་པ་ནི༔ ཧཱུྃ༔ བདག་ནི་རྣལ་འབྱོར་བསྒྲུབ་པ་པོའི༔ རྡོ་རྗེ་ཐེག་པའི་དམ་ཚིག་སྤྱི༔ གསང་བ་རྒྱལ་བོའི་ཁྱད་པར་བ༔ བསྲུང་མ་གཉན་པོའི་ལྷག་གང་གིས༔ ཉམས་ཆགས་རྟོག་སྒྲིབ་མཐོལ་ལོ་བཤགས༔ དག་ཚངས་སྙིང་རྗེས་བཟོད་པར་བཞེས༔ སརྦ་ཤུདྡྷེ་ཨཱ༔ བཅུ་དྲུག་དཀྱིལ་འཁོར་བསྡུ་བ་ནི༔ ཨེ༔ ཆོས་སྐུ་སྤྲོས་བྲལ་རོ་གཅིག་གིས༔ རྒྱ་མཚོ་ཆེ་ལ་ཆུ་བོ་འདུས༔ འཁོར་འདས་བཟང་ངན་འཛིན་ཞེན་གོལ༔ རང་གྲོལ་ལྟ་བ་རྒྱ་འབྱམས་ལྷུག༔ ཨ་ཨ་ཨཱ༔ སླར་ཡང་ལྡང་བའི་རིམ་པ་ནི༔ ཨོཾ༔ མཚན་མ་སྐུ་གསུང་ཐུགས་དབྱེར་མེད༔ ཡེ་ཤེས་སྤྲུལ་སྐུ་སྣང་བའི་དཔལ༔ ཕྲིན་ལས་འགྲོ་བའི་མགོན་པོ་ནི༔ ཕྱག་རྒྱ་གཅིག་སྐུ་འབྲས་བུར་བཞེངས༔ རཱ་ཛ་ཙནྡྲ་ཧོ༔ བཅོ་བརྒྱད་བསྔོ་བ་སྨོན་ལམ་ནི༔ ཧཱུྃ༔ འདིའི་མཚོན་དམིགས་བཅས་དམིགས་མེད་ཀྱི༔ བསོད་ནམས་ཡེ་ཤེས་ཚོགས་རབ་མཐུས༔ འགྲོ་ཀུན་བདེ་ལེགས་ཕུན་སུམ་ཚོགས༔ པདྨ་ཧེ་རུའི་གནས་ཐོབ་ཤོག༔ བཀྲ་ཤིས་དཔལ་འབར་འདུན་སྨོན་ནི༔ ཧཱུྃ་ཧྲཱི༔ ངོ་བོ་དབྱིངས་མཉམ་དཀོན་མཆོག་དགུ་སྤྲུག་ལྷ༔ རྣམ་པ་སྣང་མཉམ་སྒྱུ་མ་རྟགས་ཀྱི་སྐུ༔ ཕྲིན་ལས་གཞོལ་མཉམ་རྣམ་མཁྱེན་མཆོག་ལ་འབབ༔ རྩ་གསུམ་བསྲུང་མར་བཅས་པའི་བཀྲ་ཤིས་ཤོག༔ མི་ལ་བཀྲ་ཤིས་བདེ་སྐྱིད་ཕུན་སུམ་ཚོགས༔ དཔལ་ལ་བཀྲ་ཤིས་འཕགས་ནོར་རྒྱན་གྱིས་སྤུད༔ ཟས་ལ་བཀྲ་ཤིས་ཏིང་འཛིན་ཟག་པ་མེད༔ སྲིད་གསུམ་གཞི་ལ་བཞེངས་བའི་བཀྲ་ཤིས་ཤོག༔ དེ་སྲིད་མི་མཐུན་ཕྱོགས་ཀུན་ཞི་བ་དང་༔ མཐོ་རིས་ཡོན་ཏན་འབྱོར་བ་དྲུག་ལྡན་རྒྱས༔ ཁམས་གསུམ་མོས་བཞིར་དབང་བསྡུད་བྲན་དུ་ཁོལ༔ གནོད་བྱེད་དྲག་ཐབས་སྣ་ཚོགས་ཐབས་ཀྱིས་འདུལ༔ བདེ་སྐྱིད་རྫོགས་ལྡན་གསར་བའི་སྒོ་འཕར་ཕྱེས༔ བཀྲ་ཤིས་བདེ་ལེགས་དམ་པ་མཛད་དུ་གསོལ༔ ས་མ་ཡཱ༔ ཐུགས་བསྐྱེད་དུས་བབས་པདྨ་བསྟན་སྐྱོང་གི༔ ཚོགས་མཆོད་འདོད་ཡོན་སྤྲིན་ཕུང་ཞེས་བྱ་བ༔ དུས་མཐའི་སྔགས་མིང་ག་གཱ་ཨ་བྷྱེ་ཡིས༔ སྐལ་བཟང་སློབ་མས་བསྐུལ་ངོར་གསལ་བར་བྱས༔ ཅེས་ཀྱང་དགའ་རབ་རྡོ་རྗེའི་ངོར་སྐལ་ག་གཱས་སོ། །དགེའོ། །དགེའོ། །དགེའོ། །