བརྒྱུད་འདེབས་དངོས་གྲུབ་བང་མཛོད།

ཡེ་ཤེས་སྒྱུ་འཕྲུལ་དྲྭ་བ་ལས༔ དཀོར་བསྲུང་ཡིད་བཞིན་དབང་རྒྱལ་གྱི༔ བརྒྱུད་འདེབས་དངོས་གྲུབ་བང་མཛོད་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ བརྡ་ཡིག །མོས་གུས་གདུང་ཤུགས་དྲག་པོ་ཡིས༔ གསོལ་འདེབས་འདི་ལ་རྟག་ཏུ་བརྩོན༔ ཨེ་མ་ཧོ༔ སོ་སོར་རྟོགས་པའི་ཡེ་ཤེས་ཆོས་ཀྱི་སྐུ༔ སྣང་བ་མཐའ་ཡས་ཞབས་ལ་གསོལ་བ་འདེབས༔ རབ་འབྱམས་ཕྲིན་ལས་ལྷུན་གྲུབ་དངོས་གྲུབ་སྩོལ༔ སྙིང་རྗེ་ཆེན་པོའི་འགྲོ་ཁམས་དོང་ནས་སྤྲུག༔ སྤྱན་རས་གཟིགས་དབང་ཞབས་ལ་གསོལ་བ་འདེབས༔ རབ་འབྱམས་ཕྲིན་ལས་ལྷུན་གྲུབ་དངོས་གྲུབ་སྩོལ༔ སྦྱོར་སྒྲོལ་ཐབས་ཀྱིས་དྲེགས་པ་ཀུན་འདུལ་དཔལ༔ པདྨ་དབང་ཆེན་ཞབས་ལ་གསོལ་བ་འདེབས༔ རབ་འབྱམས་ཕྲིན་ལས་ལྷུན་གྲུབ་དངོས་གྲུབ་སྩོལ༔ སངས་རྒྱས་མཛད་པས་དམན་འགྲོའི་རེ་བ་སྐོངས༔ རིན་ཆེན་མང་དབང་ཞབས་ལ་གསོལ་བ་འདེབས༔ རབ་འབྱམས་ཕྲིན་ལས་ལྷུན་གྲུབ་དངོས་གྲུབ་སྩོལ༔ རིགས་སྔགས་འཆང་བའི་གར་གྱིས་མི་བསྲུན་འདུལ༔ པདྨ་ཐོད་ཕྲེང་རྩལ་ལ་གསོལ་བ་འདེབས༔ རབ་འབྱམས་ཕྲིན་ལས་ལྷུན་གྲུབ་དངོས་གྲུབ་སྩོལ༔ གནོད་སྦྱིན་ནོར་ལྷའི་སྐུར་བཞེངས་དབུལ་ཕོངས་སྐྱོབས༔ མ་ཧཱ་དེ་ཝའི་ཞབས་ལ་གསོལ་བ་འདེབས༔ རབ་འབྱམས་ཕྲིན་ལས་ལྷུན་གྲུབ་དངོས་གྲུབ་སྩོལ༔ འདོད་པའི་ཁམས་སུ་ཡིད་བཞིན་གཏེར་དབང་སྩོལ༔ རྣམ་མང་ཐོས་སྲས་ཞབས་ལ་གསོལ་བ་འདེབས༔ རབ་འབྱམས་ཕྲིན་ལས་ལྷུན་གྲུབ་དངོས་གྲུབ་སྩོལ༔ སླར་ཡང་དྲེགས་པའི་སྐུར་བསྟན་རྣལ་འབྱོར་སྐྱོངས༔ ཡིད་བཞིན་དབང་གི་རྒྱལ་ལ་གསོལ་བ་འདེབས༔ རབ་འབྱམས་ཕྲིན་ལས་ལྷུན་གྲུབ་དངོས་གྲུབ་སྩོལ༔ ལྟ་བའི་གདེངས་ལྡན་ཆོས་སྐྱོང་སྐྱེ་བརྒྱུད་མཁྱེན༔ ཀློང་གསལ་སྙིང་པོའི་ཞབས་ལ་གསོལ་བ་འདེབས༔ རབ་འབྱམས་ཕྲིན་ལས་ལྷུན་གྲུབ་དངོས་གྲུབ་སྩོལ༔ རང་སྣང་དབང་འདུས་གཞན་སྣང་ཟིལ་གྱིས་གནོན༔ བདུད་འཇོམས་རྡོ་རྗེའི་ཞབས་ལ་གསོལ་བ་འདེབས༔ རབ་འབྱམས་ཕྲིན་ལས་ལྷུན་གྲུབ་དངོས་གྲུབ་སྩོལ༔ མངོན་སུམ་བྲན་ཁོལ་ཕྲིན་ལས་ཐོགས་མེད་རྩལ་༼ སྩལ་དཔྱད། ༽༔ ནམ་མཁའ་འཇིགས་མེད་ཞབས་ལ་གསོལ་བ་འདེབས༔ རབ་འབྱམས་ཕྲིན་ལས་ལྷུན་གྲུབ་དངོས་གྲུབ་སྩོལ༔ གཞན་ཡང་སྒྲུབ་བརྟེན་མཆོད་ཅིང་དོན་གཉིས་གྲུབ༔ རྡོ་རྗེ་འཛིན་པའི་ཚོགས་ལ་གསོལ་བ་འདེབས༔ རབ་འབྱམས་ཕྲིན་ལས་ལྷུན་གྲུབ་དངོས་གྲུབ་སྩོལ༔ དེ་ལྟར་གསོལ་བ་བཏབ་པའི་མཐུ་བྱིན་གྱིས༔ མཆོད་བསྟོད་དྲེགས་པའི་དཀྱིལ་འཁོར་ཆེན་པོ་རུ༔ དུས་གསུམ་བདེ་གཤེགས་དགོངས་པ་དབྱེར་མེད་དུ༔ ཡོངས་གྲུབ་སྐུ་གཉིས་འབྲས་བུ་མངོན་གྱུར་ཤོག༔ གནས་སྐབས་མི་མཐུན་རྒུད་པ་ཀུན་ཞི་ནས༔ ཕུན་ཚོགས་དྲུག་ལྡན་ཁམས་གསུམ་དབང་དུ་འདུས༔ བསྟན་ལ་གནོད་བྱེད་ཡིད་བསྲུབ་ཚར་ཆོད་ནས༔ ཨ་བྷི་ཙརྱ་མཐའ་རུ་ཕྱིན་པར་ཤོག༔ ཅེས་ཀྱང་འབྲོག་འཇིག་ཞེས་བྱ་བས། །ཡང་དང་ཡང་དུ་བསྐུལ་བ་ལས། ཁྲག་འཐུང་ག་གཱ་ཨ་བྷྱེ་ཡིས། །མཁའ་འགྲོའི་གསང་མཛོད་ཉིད་ལས་བཤུས། །དགེའོ། །དགེའོ། །དགེའོ། །སརྦ་མངྒ་ལཾ།