འདི་ལའང་སྔོན་འགྲོ་དངོས་གཞི།

འདི་ལའང་སྔོན་འགྲོ་དངོས་གཞི་རྗེས༔ རིམ་པ་གསུམ་དུ་མཆིས་པ་ལས༔ སྔོན་དུ་འགྲོ་བ་རྣམ་གྲངས་བདུན༔ དང་པོ་སྐྱབས་སུ་འགྲོ་བ་ནི༔ ན་མོ༔ སྐྱབས་གནས་མཆོག་གྱུར་དཀོན་མཆོག་གསུམ༔ སྐུ་གསུམ་རྩ་གསུམ་ཆོས་སྐྱོང་ལྷ༔ ཡེ་ཤེས་གཅིག་གི་ཆོ་རོལ་དུ༔ རང་ཤར་ཆེན་པོར་སྐྱབས་སུ་མཆི༔ གཉིས་པ་སེམས་བསྐྱེད་ནི༔ ཧོ༔ མ་གྱུར་འགྲོ་བ་ཀུན་དོན་དུ༔ བྱམས་དང་སྙིང་རྗེའི་གང་འདུལ་བའི༔ སངས་རྒྱས་ཕྲིན་ལས་མཛད་པའི་ཕྱིར༔ ཡེ་ཤེས་འཇིག་རྟེན་ཚུལ་དུ་བསྒྲུབ༔ གསུམ་པ་བདུན་རྣམ་དག་མཆོད་པ་ནི༔ ན་མོ༔ དཀོན་མཆོག་ཕྲིན་ལས་དབང་ཕྱུག་ལ༔ བསྟན་པ་བསྲུང་ཕྱིར་གུས་ཕྱག་འཚལ༔ དངོས་འབྱོར་ཡིད་སྤྲུལ་མཆོད་སྤྲིན་གཏིབ༔ ཐུགས་འགལ་ཉམས་ཆགས་ཉེས་ལྟུང་བཤགས༔ གང་འདུལ་མཛད་ལ་རྗེས་ཡི་རང་༔ ཆོས་འཁོར་བསྲུང་སྐྱོབས་བསྐོར་བར་བསྐུལ༔ མྱ་ངན་མི་འདའ་བརྟན་བཞུགས་གསོལ༔ དགེ་ཚོགས་བྱང་ཆུབ་རྒྱུ་རུ་བསྔོ༔ འགྲོ་ཀུན་སངས་རྒྱས་ཐོབ་པར་ཤོག༔ བཞི་བ་བགེགས་བསྐྲད་བཀའ་བསྒོ་བ༔ ཧཱུྃ༔ ང་ནི་ཁྲོ་བོ་ཆེན་པོ་སྟེ༔ ཕྲིན་ལས་མཚོན་ཐུན་དྲག་ཐབས་སྤྱོད༔ དངོས་གྲུབ་བར་ཆད་བྱེད་པའི་བགེགས༔ བརྔན་པ་འདི་ཡིས་ཚིམ་བྱོས་ལ༔ རྒྱ་མཚོ་ཆེན་པོའི་ཕ་མཐར་དེངས༔ ཅི་སྟེ་ད་དུང་འཚེར་སྤྱོད་ན༔ གསོད་གཅོད་རྡུལ་དུ་བརླག་པར་བྱེད༔ དེ་བས་ད་ལྟ་ཉིད་དུ་སོང་༔ ཧཱུྃ་བཞིའི་སྔགས་བརྗོད་ཉུང་ཐུན་བྲབ༔ ལྔ་བ་མཚམས་གཅོད་བསྒོམ་པ་ནི༔ བྷྲཱུྃ་ཧཱུྃ༔ འོད་ཟེར་ཚུར་འདུས་ཡོངས་གྱུར་ལས༔ བསྲུང་བའི་འཁོར་ལོ་རིམ་ལྔའི་བསྐོར༔ ཕྱི་རིམ་སྟག་མདའི་དམག་ཚོགས་ཀྱིས༔ བསྲུང་བཟློག་ཕྲིན་ལས་ལྷུན་གྱིས་གྲུབ༔ བཛྲ་རཏྣ་པདྨ་ཀརྨ་བུདྡྷ་བྷྲཱུྃ་རཀྵ་རཀྵ༔ དྲུག་པ་བྱིན་ཆེན་དབབ་པ་ནི༔ ཧཱུྃ༔ འཇིག་རྟེན་འཇིག་རྟེན་འདས་པ་ཡིས༔ སྣ་ཚོགས་གར་མཛད་ཧེ་རུ་ཀའི༔ གསང་གསུམ་དགེ་མཚན་བཀྲ་ཤིས་ཀྱི༔ བྱིན་ཆེན་ཕོབ་ཅིག་བཅོམ་ལྡན་འདས༔ ཨོཾ་མ་ཧཱ་མངྒ་ལཾ་སིདྡྷི་ཕ་ལ་ཕེམ་ཕེམ༔ བདུན་པ་མཆོད་རྫས་བྱིན་རླབས་ནི༔ ཧཱུྃ༔ བདག་ཉིད་ལྷ་ཡི་ཐུགས་ཀ་ནས༔ འོད་འཕྲོས་མཆོད་རྫས་ཉེས་སྐྱོན་སྦྱངས༔ ཕྱི་ནང་གསང་བ་རྨད་བྱུང་གི༔ ངོ་མཚར་སྤྲིན་གྱི་ཕུང་པོར་འབར༔ ཨོཾ་བཛྲ་ཨརྒྷཾ་སོགས་ནས་རུ་པ༴ ནས་སྤརྴེ་ཨཱཿཧཱུྃ༔ སརྦ་པཉྩ་རཀྟ་བྷིང་ཏ་བྷོ་དྷི་ཙིཏྟ་ཛྙཱ་ན་ཙཀྲ་ཨཱཿཧཱུྃ༔ ཞེས་ཀྱང་འཇིག་དགའི་ཡི་རང་ཞིང་། །པདྨ་བློ་གྲོས་བསྐུལ་དོན་དུ། །སྨྱོན་པ་ག་གཱ་ཨ་བྷྱེས་སོ། །