དཀོར་བསྲུང་གསོལ་བསྡུས།
དཀོར་བསྲུང་གསོལ་བསྡུས་འགོར་ལས༔ ཧཱུྃ༔ རང་ཉིད་པདྨ་ཐོད་ཕྲེང་རྩལ༔ ཞི་མ་ཁྲོ་འཛུམ་གཟི་བརྗིད་འབར༔ ཕྱག་གཡས་རྡོ་རྗེ་གཡོན་ཚེ་བུམ༔ མགུལ་ལ་རྡོ་རྗེ་ཐོད་ཕྲེང་གསོལ༔ ཧེ་རུ་ཀ་པའི་ཆ་བྱད་རྫོགས༔ ཐུགས་ཀར་རྡོ་རྗེ་ཧཱུྃ་གི་མཐར༔ ཐུགས་སྲོག་ཏིང་འཛིན་སེམས་དཔའ་ནི༔ གུ་རུ་པདྨ་ཐོད་ཕྲེང་རྩལ༔ བཟླས་པས་སྣང་སྲིད་དྲེགས་པ་ཀུན༔ འོད་ཀྱིས་དབང་བསྡུད་ཟིལ་གྱིས་གནོན༔ བཀའ་ཉན་གསུང་སྡོད་ཅི་བཅོལ་བའི༔ རབ་འབྱམས་ཕྲིན་ལས་བསྒྲུབ་བསམ་ཞིང་༔ ཡར་འཕྲོས་སངས་རྒྱས་བྱང་སེམས་སོགས༔ འོད་ཀྱི་རྣམ་པར་སྤྱན་དྲང་བསྟིམ༔ འཁོར་འདས་སྲོག་སྙིང་དུས་གཅིག་ཐོབ༔ ཆེ་མཆོག་དཔལ་གྱི་ང་རྒྱལ་ལས༔ ཨོཾ་བཛྲ་གུ་རུ་པདྨ་ཐོད་ཕྲེང་རྩལ༴ པདྨ་བློ་གྲོས་ངོར་ག་གཱས་སོ། །དང་པོ་སྐྱབས་ཡུལ་སྤྱན་འདྲེན་ནི༔ རང་གི་སྙིང་ཀའི་ཧཱུྃ་ལས་འོད་ཟེར་ལྕགས་ཀྱུ་ལྟ་བུ་འཕྲོས་པས་ཕྱོགས་བཅུ་དུས་བཞིའི་རྒྱལ་བ་སྲས་བཅས་བླ་མ་ཡི་དམ་མཁའ་འགྲོ་ཆོས་སྐྱོང་དམ་ཅན་རྒྱ་མཚོ་མ་ལུས་ཤིང་ལུས་པ་མེད་པ་ཐམས་ཅད་སྐྱབས་སེམས་ཚོགས་ཞིང་གི་རྟེན་དུ་བཛྲ་ས་མ་ཡཱ་ཛཿཛ༔ བྱིན་འབེབས་འགོར༔ མོས་གུས་གདུང་བའི་ཤུགས་དྲག་པོ་བསྐྱེད་པས་རྩ་གསུམ་ཆོས་སྐྱོང་རྒྱལ་བ་སྲས་དང་བཅས་པ་ཐམས་ཅད་སྐུ་ཕྱག་རྒྱ་གསུང་ཡིག་འབྲུ་ཐུགས་ཕྱག་མཚན་ཡོན་ཏན་དང་ཕྲིན་ལས་ཀྱི་དབང་བྱིན་དངོས་གྲུབ་ཐམས་ཅད་འོད་ཕུང་ཁ་དོག་ལྔ་ལྡན་གྱི་རྣམ་པར་བྱོན་ནས་བདག་གནས་ཡོ་བྱད་གཡང་རྫས་སྲོག་རྟེན་བླ་རྡོ་རྣམས་ལ་སིབ་སིབ་ཐིམ་པས་ཞིང་ཁམས་རབ་འབྱམས་རྟེན་དང་བརྟེན་པར་བཅས་པའི་དཔལ་ཡོན་ཡོངས་སུ་རྫོགས་པར་བྱིན་གྱིས་བརླབས་པར་བསམ་ལ༔ ཞེས་བྱིན་འབེབས་ལ་འཇུག་གོ༔ ཅེས་ཀྱང་ཤེས་རབ་བློ་འཕེལ་དང་འཇིག་དགའ་གཉིས་ཀྱི་ངོར་ནམ་མཁའ་འཇིགས་མེད་ནས་སོ། །