དབང་གི་མངའ་གསོལ་ཞེས་པ་ནི་སྔར་གྱིས་དེ་དག་གང་མོས་ཀྱིས་འཐུས་སོ༔

དབང་གི་མངའ་གསོལ་ཞེས་པ་ནི་སྔར་གྱིས་དེ་དག་གང་མོས་ཀྱིས་འཐུས་སོ༔ འོན་ཀྱང་ཤིན་ཏུ་བསྡུས་བའི་འདོད་སྨོན་ཙམ༔ ཧོ༔ སོར་རྟོགས་ཡེ་ཤེས་རྒྱལ་ཀུན་གསུང་དབང་ཕྱུག༔ གཞི་ལམ་རྣལ་འབྱོར་འབྲས་བུས་ཁྱོད་ཉིད་ལ༔ རང་ཆས་ལྷུན་གྱིས་གྲུབ་པའི་ངེས་ཤེས་ཀྱིས༔ མྱ་ངན་འདས་པའི་དབང་པོར་མངའ་གསོལ་ལོ༔ ཡེ་འབྲེལ་ཐུགས་རྗེའི་འཆར་བྱེད་མ་འགགས་པས༔ སེམས་ཅན་ཀུན་གྱི་མགོན་པོར་ཁྱོད་བཞེངས་ལས༔ སྲིད་ན་ཆེ་བའི་ལྷ་ཡི་ལྷ་མཆོག་ཏུ༔ དེང་ནས་རྣལ་འབྱོར་བདག་གིས་མངའ་གསོལ་ལོ༔ ཁྱད་པར་ཕྱི་ནང་དཀོར་ནོར་བདག་པོ་དང་༔ བསྟན་དང་བསྟན་འཛིན་ཡོངས་ཀྱི་སྲུང་མ་དང་༔ བསྟན་བཤིག་བདུད་རིགས་སྡེར་བཅས་འདུལ་མཛད་ཀྱི༔ ཕྲིན་ལས་ཕོ་ཉ་མཆོག་ཏུ་མངའ་གསོལ་ལོ༔ སྔོན་ཀྱི་ཆོས་སྐྱོངས་སྲུང་མ་ཐམས་ཅད་ཀྱང་༔ ཁྱོད་གཅིག་དུས་བབས་དབང་གིས་ཚུལ་བསྟན་ཟོལ༔ དོན་ལ་ངོ་བོ་དབྱེར་མེད་ཆེན་པོ་རུ༔ རྒྱལ་བའི་ཕྲིན་ལས་དབང་པོར་མངའ་གསོལ་ལོ༔ ཁམས་གསུམ་དབང་བསྡུད་དབང་གི་རྒྱལ་བོ་དང་༔ དབང་ཕྱུག་ཕྱི་ནང་གཏེར་གྱི་བུམ་པ་བཟང་༔ དབང་བཅུ་དབང་མཛད་དཔག་བསམ་ལྗོན་པ་རྒྱས༔ དབང་གི་མཆོད་སྡོང་མཆོག་ཏུ་མངའ་གསོལ་ལོ༔ གང་ཞིག་དམ་ཆོས་ཚུལ་བཞིན་བསྒྲུབ་པ་ཡི༔ འཚོ་བ་སྦྱོར་ཞིང་རྟག་ཏུ་བུ་བཞིན་སྐྱོངས༔ བསྟན་དང་གུས་པའི་སྦྱིན་བདག་འཁོར་སློབ་དང་༔ དཀོར་ནོར་ལོངས་སྤྱོད་བདག་པོར་མངའ་གསོལ་ལོ༔ མདོར་ན་འཁོར་བའི་རྒྱ་མཚོ་མ་སྟོངས་བར༔ ཐུགས་དམ་མཐའ་ལ་ཐུག་པ་མ་དམིགས་པས༔ གང་ལ་གང་འདུལ་རྣམ་པའི་ཆོ་རོལ་གྱིས༔ བྱ་གྲུབ་ཡེ་ཤེས་སྤྲུལ་སྐུར་མངའ་གསོལ་ལོ༔ དེ་མཐུས་བདག་ཅག་རྣལ་འབྱོར་བསྒྲུབ་པ་པོའི༔ དཔུང་དང་དགྲ་ལྷར་རྟག་བཞུགས་ས་མ་ཡཱ༔ ཅེས་ཀྱང་རྟ་མགྲིན་ངོར་ག་གཱས་སོ། །འཕྲིན་བཅོལ་ནི་དེ་དག་གི་ཞོར་ལ་འཐུས་སོ། །སརྦ་མངྒ་ལཾ། ། ཨེ་མ་ཧོ༔ སྲིད་ཞིའི་ཆེ་བའི་ཡོན་ཏན་ཡོངས་རྫོགས་དཔལ༔ ཟླ་བྲལ་སྤྱི་ཕུད་པདྨ་བསྟན་བསྲུངས་རྒྱལ༔ འཁོར་འདས་དབང་ཕྱུག་ཀུན་གྱིས་མངའ་གསོལ་བཞིན༔ དངོས་པོ་སྟོབས་ཞུགས་ངེས་ཤེས་ཡི་རང་གིས༔ དབུ་འཕང་ཆོས་ཀྱི་དབྱིངས་སུ་བདག་བསྟོད་ཀྱིས༔ བཅོལ་བའི་ཕྲིན་ལས་མ་ལུས་འགྲུབ་པར་མཛོད༔ ཅེས་ཀྱང་ཤེས་རབ་ངོར་ག་གཱས་སོ། །