གསོལ་མཆོད།
གཉིས་པ་གསོལ་མཆོད་ནི༔ རྒྱས་པ་གཞན་ལྟར་ལ༔ ཉིད་ཀྱི་ངོས་སྐལ་དགོངས་པ་ལ༔ རཾ་ཡཾ་ཁཾ༔ ཨོཾ་ཨཱཿཧཱུྃ༔ གཏོར་མཆོད་མི་དམིགས་སྟོང་པ་ཉིད་དུ་གྱུར༔ སྟོང་པའི་ངང་ལས་ངོ་བོ་ཟག་མེད་ཡེ་ཤེས་ཀྱི་རང་བཞིན་ལ་རྣམ་པ་ཕྱི་ནང་གསང་བའི་མཆོད་སྤྲིན༔ མཆོད་རྫས༔ བསྐང་རྫས༔ བརྟེན་རྫས༔ སྒྲུབ་རྫས་མ་ཚང་བ་མེད་པ་དང་༔ ཁྱད་པར་གནས་ཁང་རྐང་འགྲོ་ཀ་ཆ་དཀོར་ཆ་དམག་ཆས་རིན་ཆེན་ནོར་སྣ་རྒྱན་གོས༔ བཟའ་བཅའ་བཏུང་བ་ལྡག་གཞིབ་གང་ལ་གང་འདོད་པ་འབྱུང་བའི་རང་བཞིན་ནམ་མཁའི་མཐའ་དང་མཉམ་པར་གྱུར༔ ནམ་མཁའ་མཛོད་སྔགས་ཀྱིས་བརླབས་ལ༔ ཀྱཻ༔ སྐུ་གསུམ་རིག་འཛིན་བརྒྱུད་པའི་བླ་མ་དང་༔ ཨོ་རྒྱན་པད་འབྱུང་ཀློང་གསལ་སྙིང་པོ་ཡི༔ བཀའ་དང་དམ་ཚིག་གཉན་པོ་དཔང་བཙུགས་ཏེ༔ འབོད་དོ་ཡིད་བཞིན་པདྨ་དབང་གི་རྒྱལ༔ འཁོར་བཅས་སྐད་ཅིག་ཉིད་ལ་གཤེགས་སུ་གསོལ༔ རྣལ་འབྱོར་བདག་གི་བསྲུང་སྐྱོབས་མགོན་དུ་བཞུགས༔ རྟག་ཏུ་གཡེལ་བ་མེད་པར་བྱམས་བརྩེའི་སྐྱོངས༔ བསྟན་དང་རྣལ་འབྱོར་སྐྱོངས་མཛད་ཐུགས་བསྐྱེད་ཅན༔ སངས་རྒྱས་ཕྲིན་ལས་མཆོག་ལ་ཕྱག་འཚལ་བསྟོད༔ ཐུགས་དམ་དགྱེས་པ་སྐོངས་ཕྱིར་མཆོད་པའི་རྫས༔ ཞི་རྒྱས་དབང་དྲག་བརྟེན་བསྐངས་བསྐུལ་འོས་པ༔ འཇིག་རྟེན་འཇིག་རྟེན་འདས་པའི་རྣམ་པར་ཐར༔ འདོད་ཡོན་མ་ཚང་མེད་པའི་སྤྲིན་ཆེན་པོར༔ རྫས་སྔགས་ཏིང་འཛིན་ཕྱག་རྒྱའི་སྟོབས་འབར་བ༔ འཛད་མེད་ནམ་མཁའི་མཛོད་ཀྱི་ཆོ་རོལ་ཅན༔ དཀོན་མཆོག་ཕྲིན་ལས་པདྨ་བསྟན་བསྲུང་དང་༔ ཞི་རྒྱས་དབང་དྲག་སྤྲུལ་བའི་རྒྱལ་ཆེན་བཞི༔ རབ་འབྱམས་ཕྲིན་ལས་ཕོ་ཉ་རུ་འདྲེན་ཚོགས༔ དཔུང་ཚོགས་ཡན་ལག་རྣམ་བཞི་ཡང་འཁོར་བཅས༔ ཐུགས་དམ་གཉན་པོ་བསྐང་ཕྱིར་འབུལ་ལེགས་ན༔ བརྩེར་དགོངས་སྙིང་རྗེའི་ཤུགས་ཀྱིས་དེང་བཞེངས་ལ༔ ཉམས་ཆགས་འགལ་འཁྲུལ་ཉེས་ལྟུང་བཟོད་པར་གསོལ༔ ཆོས་སྲིད་འདི་ཕྱིའི་བར་ཆད་དབྱིངས་སུ་སོལ༔ ཁ་འཛིན་སྡོང་གྲོགས་རྒྱབ་བརྟེན་མེལ་ཚེ་མཛོད༔ ཚེ་སྲོག་ལུས་དང་དབང་ཐང་ཡར་ལ་བསྐྱེད༔ སྟོབས་འབྱོར་བཟི་བརྗིད་གཙང་རིས་ལྷ་བཞིན་སྤེལ༔ ཁམས་གསུམ་དབང་བསྡུད་སྲིད་གསུམ་ཟིལ་གནོན་གྱིས༔ ཆེ་དགུའི་གཙུག་ན་ཡིད་བཞིན་ནོར་བུ་ལྟར༔ མངོན་འཕགས་ཕས་རྒོལ་འཇོམས་ཤིང་གང་བརྩམས་ལས༔ མཐའ་དག་མྱུར་འགྲུབ་བཀྲ་ཤིས་བདེ་ལེགས་མཛོད༔ པདྨ་ཤྭ་རི་རཱ་ཛ་ས་པཱ་རི་ཝ་ར་ཨེ་དཾ་བྷ་ལིངྟ་ཁཱ་ཧི༔ ཀརྨ་སིདྡྷི་ཕ་ལ་ཧོ༔ གསོལ་བསྡུས་གཞན་རྣམས་གྲངས་བསགས༔