ཕྲིན་བཅོལ་བསྡུས་པ་ཡིད་བཞིན་ནོར་བུ།
ཕྲིན་བཅོལ་བསྡུས་པ་ཡིད་བཞིན་ནོར་བུ་བཞུགས༔
ན་མོ་གུ་རུ་པདྨ་ཀཱ་ར་ཡེ༔ བརྡ་ཡིག །འབྱོར་ཚོགས་འདོད་ཡོན་རབ་བཀོད་དེ༔ ནམ་མཁའ་མཛོད་ཀྱི་སྔགས་རྒྱས་བརླབས༔ ཀྱཻ༔ དཀོར་གྱི་བདག་པོ་འཁོར་བཅས་ལ༔ དངོས་ཡིད་ཏིང་འཛིན་མཆོད་པ་འབུལ༔ ཡིད་ལ་གང་ལྟར་སྨོན་གསོལ་བའི༔ ཕྲིན་ལས་མྱུར་དུ་འགྲུབ་བར་མཛོད༔ ཞེས་ཅི་འགྲུབ་དགོས་པའི་ལས་ལ་དམིགས་པའི་ཁ་བསྒྱུར་བས་མྱུར་དུ་ལྷུན་གྱིས་གྲུབ་པར་གདོན་མི་ཟའོ། །ཀྱཻ༔ ཟླ་བའི་དབང་པོ་འཁོར་བཅས་ལ༔ ཕྱི་ནང་གསང་བའི་མཆོད་པ་འབུལ༔ བྱམས་དང་བརྩེ་བས་བུ་བཞིན་སྐྱོངས༔ རབ་འབྱམས་ཕྲིན་ལས་ལྷུན་གྲུབ་མཛོད༔ ཅེས་ཀྱང་ག་གཱས་སོ། །༈ ཧོ༔ རྒྱལ་བའི་རྣམ་འཕྲུལ་པདྨ་དབང་གི་རྒྱལ༔ བདག་ནི་རིག་འཛིན་རྣལ་འབྱོར་སྒྲུབ་པ་པོའི༔ རྩེ་གཅིག་ཟོལ་ཟོག་མེད་པར་གུས་ཡིད་ཀྱིས༔ མཆོད་བརྟེན་སྒྲུབ་བསྟོད་སྐྱབས་གནས་ཁྱེད་གཅིག་པུ༔ དེ་སླད་བརྩེ་བས་རྗེས་སུ་བཟུང་མཛད་དེ༔ གང་བསམ་འདོད་དོན་མ་ལུས་ལྷུན་གྲུབ་མཛོད༔ ཅེས་ཀྱང་ཡེ་ཤེས་ངོར་ག་གཱས་སོ། །ཀྱཻ༔ དུས་གསུམ་རྒྱལ་བའི་ཕྲིན་ལས་དཔལ༔ གནོད་སྦྱིན་དཀོར་བདག་འཁོར་བཅས་ལ༔ གསོལ་ལོ་མཆོད་དོ་ཐུགས་དམ་བསྐངས༔ གང་བསམ་ཅི་བཅོལ་ཡོངས་གྲུབ་མཛོད༔ ཨོཾ་བཛྲ་ས་མ་ཡཱ་ཀརྨ་ཀུ་རུ་ཧོ༔ ག་གཱས་སོ། །རཾ་ཡཾ་ཁཾ༔ ཨོཾ་ཨཱཿཧཱུྃ༔ ཧ་ཧོ་ཧྲཱི༔ ཛ༔ གནོད་སྦྱིན་ནོར་བདག་དབང་གི་རྒྱལ༔ འཁོར་དང་བཅས་པ་འདིར་བྱོན་ལ༔ འདོད་ཡོན་མཆོད་པ་དམ་པ་བཞེས༔ གང་བཅོལ་ཕྲིན་ལས་ལྷུན་གྲུབ་མཛོད༔ ཅེས་ཀྱང་ཤྲཱི་བས་སོ། །ཧྲཱི༔ དབང་ཆེན་པདྨའི་བཀའ་ཉན་མཐུ་བོ་ཆེ༔ སངས་རྒྱས་བསྟན་སྲུང་ཡིད་བཞིན་དབང་གི་རྒྱལ༔ འདིར་གཤེགས་འདིར་བཞུགས་མཆོད་པ་དམ་པ་བཞེས༔ ཕོག་ཐུག་འགྲམ་འཁྲུགས་འཁོར་འདྲེས་བཟོད་པར་གསོལ༔ འཇིག་རྟེན་འཇིག་རྟེན་འདས་པའི་དངོས་གྲུབ་སྩོལ༔ ཞེས་ཀྱང་མཉྫུ་མ་ཏིའི་ངོར་ག་གཱ་ཨ་བྷྱེས་སོ། །སྨན་བསྲུང་དུ་གསོལ་ན༔ ཀྱཻ༔ རྒྱལ་ཆེན་དྲང་སྲོང་འཁོར་དང་བཅས༔ འཚོ་བྱེད་བཅུད་ལེན་སྨན་གྱི་ཕུད༔ རོ་དྲུག་ནུས་སྟོང་གཟི་འབར་བ༔ ཆོས་ཅན་ཆོས་ཉིད་བདུད་རྩི་བཞི༔ བདག་གིས་གུས་པའི་ཡིད་ཀྱིས་མཆོད༔ འགྲོ་བའི་ནད་དང་སྡུག་བསྔལ་ཀུན༔ མིང་གི་ལྷག་མ་མེད་པ་རུ༔ ངོ་མཚར་ཕྲིན་ལས་རང་རྟགས་སྟོན༔ བཛྲ་ས་མ་ཡ་ཨ་མྲ་ཏ་ཨ་མོ་གྷ་སརྦ་དུ༔ ཁ་ཕཊ་ཕཊ༔ ཅེས་ཀྱང་བླ་མ་ཚུལ་ཁྲིམས་པས་བསྐུལ་ངོར་ག་གཱས་སོ། །