དོན་གྲུབ་རྒྱལ་པོ།

དོན་གྲུབ་རྒྱལ་པོ་ནི༔ གྷ༔ སྦྱིན་པའི་ཕ་རོལ་ཕྱིན་པ་མངོན་གྱུར་བའི༔ དངོས་གྲུབ་སྣ་ཚོགས་དཔག་བསམ་ཤིང་བཞིན་སྩོལ༔ དོན་གྲུབ་རྒྱལ་པོ་ཕན་གནོད་རྣམ་འགྱུར་ཅན༔ གུས་པས་མཆོད་དོ་བཀྲ་ཤིས་དར་རྒྱས་མཛོད༔

ཡང་གསང་སྔགས་གླིང་བས། ཧཱུྃ༔ ཆོས་སྐྱོང་རྒྱལ་པོ་ཆེན་པོ་ཡིད་བཞིན་དབང་། །རྫུ་འཕྲུལ་སྟོབས་ཀྱི་དབང་ཕྱུག་ཧེ་རུ་ཀ །ནོར་གྱི་བདག་པོ་ཙནྡྲ་སྨྲ་ར་ཅན། །རྫུ་འཕྲུལ་འཁོར་དང་བཅས་ལ་ཕྱག་འཚལ་བསྟོད། །ཅེས་དང་ག་གཱས། སྔོན་ཚེ་རིག་འཛིན་ཀློང་གསལ་སྙིང་པོ་དང། །བདུད་འདུལ་རྡོ་རྗེ་བདུད་འཇོམས་གླིང་བ་ཡི། །སྤྱན་སྔར་ཇི་ལྟར་ཁས་བླངས་དམ་བཅས་བཞིན། །དེང་འདིར་རིག་འཛིན་རྣལ་འབྱོར་བདག་ཉིད་ཀྱི། །གང་ལྟར་བཅོལ་བའི་ཕྲིན་ལས་རབ་འབྱམས་ཀུན། །ཐོགས་པ་མེད་པར་མྱུར་དུ་འགྲུབ་པར་མཛོད། །ཅེས་བསྟོད་པ་དང་ཕྲིན་གསོལ་བསྡུས་པ་སྤེལ་དེ་སྨྲས་པའོ། །ཧཱུྃ་བཻ༔ སྲས་བཅས་རྒྱལ་བའི་ཕྲིན་ལས་གར་དབང་པོ༔ མྱུར་མགྱོགས་མཐུ་རྩལ་མངོན་ཤེས་རྫུ་འཕྲུལ་སྟོབས༔ འགྲན་བྲལ་ཡིད་བཞིན་དབང་གི་རྒྱལ་པོ་ཡི༔ གསང་གསུམ་ཡོན་ཏན་དྲན་པས་བདག་བསྟོད་དོ༔ ཞེས་དང་༔ བདག་ནི་རིག་འཛིན་རྣལ་འབྱོར་སྒྲུབ་པ་པོའི༔ རྩེ་གཅིག་ཟོལ་ཟོག་གཡོ་སྒྱུ་མེད་བརྟན་བློའི༔ རྣམ་ཀུན་ནེམ་ནུར་བྲལ་བར་ཁྱེད་སྒྲུབ་ན༔ གང་བསམ་སྨོན་པའི་ཕྲིན་ལས་ཡོངས་གྲུབ་མཛོད༔ ཅེས་ཀྱང་ག་གཱས་སོ། །དགེའོ། །ཧོ༔ བཀའ་བསྲུང་ཆོས་སྐྱོང་གཉན་པོ་ཁྱེད་ལ་མཆོད་སྦྱིན་གྱི་གཏོར་མ་དང་བདུད་རྩི་གསེར་སྐྱེམས་ཀྱི་མཆོད་པ་དམ་པ་འདི་འབུལ་བས་ཐུགས་བརྩེ་བ་ཆེན་པོའི་བདག་གིར་བཞེས་ནས་སྤྱིར་ལུང་རྟོགས་ཀྱི་བསྟན་པ་དང་༔ ཁྱད་པར་འོད་གསལ་རྫོགས་པ་ཆེན་པོའི་ཆོས་ཀྱི་རྒྱལ་མཚན་ནུབ་པ་མེད་པར་གོང་ནས་གོང་དུ་སྲིད་པའི་རྩེ་མོར་བསྒྲོང་ཞིག༔ དེ་ཉིད་འཛིན་སྐྱོང་སྤེལ་བའི་སྐྱེས་བུ་དམ་པ་རྣམས་ཀྱི་སྐུ་ཚེ་དང་མཛད་ཕྲིན་ཡར་ངོའི་ཟླ་བ་ལྟ་བུར་གསལ་བར་མཛོད་ཅིག༔ བསྒྲུབ་པ་ཉམས་སུ་ལེན་པའི་སྐལ་ལྡན་གྱི་གང་ཟག་གི་འགལ་རྐྱེན་བར་ཆད་བྱང་ཆུབ་བསྒྲུབ་པ་ལ་གནོད་ཅིང་འཚེ་བ་ཐམས་ཅད་བཟློག་བསྒྱུར་ཞི་བར་མཛོད་ཅིག༔ མཐུན་རྐྱེན་ཆོས་ལྡན་སྡིག་མེད་ཀྱིས་འཚོ་བ་སྦྱོར་ལ་ཡོན་བདག་གྱིས་ཤིག༔ རྟོགས་པ་ཁྱད་པར་ཅན་རྒྱུད་ལ་བསྐྱེད་ཅིག༔ མདོར་ན་ཕྲིན་ལས་རབ་འབྱམས་ལྷུན་གྱིས་གྲུབ་པ་དང་༔ རང་གཞན་སེམས་ཅན་ཐམས་ཅད་ཀྱི་བདེ་སྐྱིད་རྫོགས་ལྡན་གསར་བའི་སྒོ་འཕར་ཡངས་པ་ཕྱེས་ཤིག༔ བཀྲ་ཤིས་དང་བདེ་ལེགས་ཕུན་སུམ་ཚོགས་པར་མཛོད་ཅིག༔ ཅེས་བརྗོད་ག་གཱས་སོ། །ཧོ༔ རྒྱལ་བའི་བསྟན་སྲུང་ཆེན་པོ་ཁྱེད་ཀྱིས་བདག་ཅག་སྒྲུབ་པ་པོ་ལ་བརྩེ་བའི་ཞལ་སྟོན༔ འཛུམ་པའི་མདངས་ཕྱུངས༔ བྱམས་པའི་ཐུགས་ཀྱིས་དགོངས་ལ༔ སྐུ་གསུང་ཐུགས་ཀྱི་རྟེན་རྣམས་ལ་བླ་རྡོ་ཆོས༔ འཇིག་རྟེན་དང་ཆོས་ཀྱི་རྒྱལ་སྲིད་སྐྱོངས༔ བཀྲ་ཤེས་དང་བདེ་ལེགས་སྤེལ༔ རབ་འབྱམས་ཀྱི་ཕྲིན་ལས་སྒྲུབ༔ ཁྱད་པར་དུ་ཁམས་གསུམ་དབང་དུ་བསྡུས༔ སྲིད་གསུམ་ཟིལ་གྱིས་གནོན་པ་དང་༔ བརྒྱུད་འཛིན་བུ་བཞིན་སྐྱོངས་ཞིང་༔ བསོད་ནམས་དང་སྙན་གྲགས་རྒྱས་པ་དང་༔ ལོངས་སྤྱོད་དབྱར་མཚོ་ལྟར་སྤེལ་ཞིང་༔ རུ་ང་དང་ཕྲག་དོག་ཀོ་ལོང་མི་བཙན་པར༔ གནོད་བྱེད་ལྟོག་འགོང་འགབ་འདྲེ་བྱུར་གསུམ་ཐམས་ཅད་མིང་གི་ལྷག་མ་མེད་པར་རྡུལ་དུ་བརླག་ནས་ནམ་མཁའ་མཛོད་ཀྱི་གཏེར་ཁ་འབྱེད་པའི་ཕྲིན་ལས་མཛོད་ཅིག༔ ཨོཾ་ཨཱཿཧཱུྃ་བཛྲ་ས་མ་ཡཱ༔