ཡིད་བཞིན་དབང་རྒྱལ་གྱི་ཟ་ངུ་བསྡུས་པ།

ཡིད་བཞིན་དབང་རྒྱལ་གྱི་ཟ་ངུ་བསྡུས་པ་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ རྣལ་འབྱོར་མ་ཉེས་དགྲ་བྱུང་ནས༔ རྦད་བསྐུལ་གཏོར་ཟོར་སྣ་བསྟན་མཐར༔ འཁོན་སྡུམ་ཟས་ནོར་གྱིས་འབྲེལ་ན༔ ཟ་ངུའི་གནད་འདི་རབ་ཏུ་ཟབ༔ གསེར་སྐྱེམས་གཏོར་མ་སྦྱངས་སྤེལ་བསྒྱུར༔ ཧཱུྃ༔ ཡེ་ཤེས་སྤྱན་ལྡན་ཆོས་སྐྱོང་ཆེ༔ འཇིག་རྟེན་དྲེགས་པའི་ཚུལ་བཟུང་བ༔ དཀོར་སྲུང་རྒྱལ་པོ་ཙནྡྲ་གསལ༔ སྤྲུལ་འཁོར་བྱེ་བ་དང་བཅས་པ༔ བདག་ལ་གསན་ཅིང་དགོངས་སུ་གསོལ༔ ང་ནི་མ་ཉེས་མ་ལན་བཞིན༔ ཡོངས་ལ་གནོད་པའི་དགྲ་བོ་འདིས༔ སྔགས་འཆང་སྒྲུབ་ལ་བར་དུ་གཅད༔ འཚོ་བསྐྱང་རྫས་ལ་ཆོམ་རྐུན་བྱས༔ མི་ལ་གནོད་ཅིང་ལྷ་ལ་བརྙེས༔ སྲུང་མ་གཉན་པོ་ར་མདར་སྦྲན༔ ད་ནི་འཇིག་རྟེན་མཐུན་འཇུག་ལས༔ གནོད་རྒོལ་ལ་འཇིགས་བྱ་ཐབས་བྲལ༔ དེ་མཐུས་ཟས་ནོར་འབྲེལ་བ་དང་༔ སྲུང་དང་རིམ་གྲོ་བགྱི་བའི་ཚུལ༔ ཇི་ལྟར་བྱས་ཀྱང་གཤེད་དུ་ཕོབ༔ སྡུག་ཡུས་རང་ལ་མ་སྟོན་ཅིག༔ མི་དང་འདུམ་ཀྱང་ལྷར་མ་འདུམ༔ མ་ཟད་བར་དུ་ཟ་ངུ་གྱིས༔ ཟད་ནས་འབྱུང་བ་བཞི་ལ་སྟོན༔ བཅོལ་བའི་ཕྲིན་ལས་འགྲུབ་པར་མཛོད༔ མཐུ་རྩལ་ཆེ་བའི་རང་མདངས་ངོམས༔ བཀའ་དང་དམ་ཚིག་གཉན་པོའི་རྒྱ༔ མ་མདའ་བཛྲ་ས་མ་ཡཱ༔ ཅེས་ཀྱང་འོད་ཟེར་མཐའ་ཡས་ཀྱི་ངོར་ག་གཱ་ཨ་བྷྱེས་སོ། །ཆོས་སྐྱོང་ཟ་ངུ་བསྡུས་པ་བཞུགས༔ ཕུད་སྐྱེམས་བཤམས་ནས་འདི་སྐད་དོ༔ ཀྱཻ༔ ཡིད་བཞིན་དབང་རྒྱལ་འཁོར་བཅས་དགོངས་སུ་གསོལ༔ རྣལ་འབྱོར་བདག་ནི་མ་ཉེས་མ་ལན་སྟེ༔ སྡང་བའི་དགྲ་བོ་འདི་ཡིས་ཆད་པས་གཟིར༔ མི་གསོད་ནོར་འཕྲོགས་བརྡེགས་བརྡུང་གླེང་བརྗོད་བརྙེས༔ འཇིག་རྟེན་ལམ་ནས་གནོད་ལན་མ་འབྱོར་བས༔ ཡེ་ཤེས་ལྷ་ལ་མཐུ་དཔུང་ར་མདར་སྦྲན༔ སླད་ཀྱི་མཐུན་འཇུག་འཁོན་སྡུམ་ཁ་སེམས་དད༔ རྒྱུ་རྫས་ཆོས་ཀྱི་འབྲེལ་བ་འདྲེས་ཤོར་དང་༔ མ་ཚོར་བའམ་ཤེས་བཞིན་བག་མེད་ཀྱིས༔ བསྲུང་བཟློག་ལ་སོགས་ཇི་ལྟར་བྱས་ཀྱང་རུང་༔ དེ་མ་ཐག་ཏུ་འཁྲེན་གཟེར་མ་རྐྱེན་པར༔ ཤོང་ཡང་བསྐྱེད་ཅིག་ཆོས་སྐྱོང་རིན་པོ་ཆེ༔ ཡེ་ཤེས་ལྷ་ཡིས་སྡུག་ཡུས་མི་མཛད་དུ༔ མཁའ་མཉམ་ཐུགས་ལ་བཏང་སྙོམས་ཆེ་གནས་སླད༔ རྣལ་འབྱོར་བདག་ལ་བཀའ་ཆད་མི་འབབ་རྒྱུ༔ རྒྱུ་འབྲས་བདེན་པ་བསླུ་མེད་སྨིན་པའི་གཤིས༔ ད་དུང་ལས་ངན་སྐྱེ་བརྒྱུད་ཆད་པ་དང་༔ རྣམ་སྨིན་སྡིག་ཡུན་ཐུང་ཞིང་གཏན་བདེ་ལ༔ སྦྱོར་སྲིད་སྡང་བའི་དགྲ་ལ་ཟ་ངུ་གྱིས༔ བཀའ་དམ་མ་འདའ་བཛྲ་ས་མ་ཡ༔ ཅེས་ཀྱང་ན་ཐའི་ངོར་ག་གཱས་སོ། །ཀྱཻ༔ དབང་གི་རྒྱལ་པོ་འཁོར་བཅས་དགོངས་སུ་གསོལ༔ རྣལ་འབྱོར་བདག་ལ་དགྲ་བྱུང་བྱད་བྱས་སླར༔ འཁོན་སྡུམ་མཐུན་འཇུག་ཤེས་དང་མ་ཤེས་ལས༔ ཇི་ལྟར་བྱས་ཀྱང་སླར་ལ་མ་ལྡོག་པར༔ དགྲ་བགེགས་མ་ཟད་བར་དུ་ཟ་ངུ་གྱིས༔ ཤྲཱི་བས་སོ། །