གནོད་སྦྱིན་དཀོར་གྱི་བདག་པོའི་དྲག་བསྐུལ་དགྲ་བགེགས་ཚར་གཅོད
གནོད་སྦྱིན་དཀོར་གྱི་བདག་པོའི་དྲག་བསྐུལ་དགྲ་བགེགས་ཚར་གཅོད་བཞུགས་སོ༔
ན་མོ་གུ་རུ་པདྨ་ཀཱ་ར་ཡེ༔ ཁྲག་སྐྱེམས་དམར་གྱི་གཏོར་མ་ལ༔ འགུགས་གཞུགས་གསུམ་བྱས་འདི་སྐད་བསྐུལ༔ ཧཱུྃ༔ ཕྱོགས་ནི་ཉི་མ་བྱང་ཤར་མཚམས༔ ཡུལ་ནི་རབ་རྔམས་བྷཾ་ག་བྱང་༔ སྐུ་ཡི་ལྷ་གཅིག་ཐལ་བ་སྐྱོངས༔ བསྐུལ་ལོ་ཐུགས་དམ་གནད་ནས་བསྐུལ༔ ཡུལ་ནི་གངས་ཀྱི་ར་བ་ནས༔ གྲོང་ལྗོངས་སྒ་ཡི་མཆོད་རྟེན་དུ༔ ཐུགས་གྱི་ལྷ་གཅིག་ཟླ་བའི་དབང་༔ བསྐུལ་ལོ་ཐུགས་དམ་གནད་ནས་བསྐུལ༔ ཡུལ་ནི་བྱང་ཕྱོགས་ཤམ་བྷ་ལར༔ ལྗོངས་སུ་བྷ་ཏམ་རཱ་ཛ་ནས༔ གསུང་གི་ལྷ་གཅིག་ཝ་ཀི་ཤྭ༔ བསྐུལ་ལོ་ཐུགས་དམ་གནད་ནས་བསྐུལ༔ ༼ ཡུལ་ནི་ཙི་ནའི་གནས་མཆོག་ནས༔ རི་བོ་གྲུ་འཛིན་ལྷོ་ཡི་ཆར༔ ཡོན་ཏན་ལྷ་གཅིག་དོན་གྲུབ་རྒྱལ༔ བསྐུལ་ལོ་ཐུགས་དམ་གནད་ནས་བསྐུལ༔ བརྡ་ཆད་སླར་ཁ་བསྐང་ངོ་། ༽ ཡུལ་ནི་མདོ་ཁམས་སྒང་གི་རྒྱུད༔ ལྗོངས་སུ་སྡེ་བཞིའི་གྲུ་ཕྱོགས་ནས༔ ཕྲིན་ལས་ལྷ་གཅིག་སྟག་མདའ་གདོང་༔ བསྐུལ་ལོ་ཐུགས་དམ་གནད་ནས་བསྐུལ༔ དྲག་པོ་སྐུ་ཡི་ཟིལ་བསྐྱོད་ལ༔ རྒོད་གཤེ་གསུང་གི་ང་རོ་སྒྲོགས༔ རྔམ་ཞི་ཐུགས་ཀྱི་ངར་བསྐྱེད་ལ༔ དགྲ་དཔུང་བརླག་ཕྱིར་སྐུར་བཞེངས་ཤིག༔ བསྐུལ་ལོ་ཐུགས་དམ་གནད་ནས་བསྐུལ༔ ཁྱོད་ནི་སྔོན་ནས་ཡེ་སངས་རྒྱས༔ འོན་ཀྱང་གདུལ་བྱ་གང་འདུལ་དུ༔ སྣ་ཚོགས་གཟུགས་ཀྱི་རོལ་མོ་བརྡུང་༔ བསྐུལ་ལོ་ཐུགས་དམ་གནད་ནས་བསྐུལ༔ དགྲ་བགེགས་རྡུལ་དུ་བརླག་པའི་ཕྱིར༔ བཞེངས་ཤིག་རང་ཀློང་གནས་ནས་བཞེངས༔ སངས་རྒྱས་བསྟན་པ་བསྲུང་པའི་ཕྱིར༔ བཞེངས་ཤིག་རང་ཀློང་གནས་ནས་བཞེངས༔ བསྐུལ་ལོ་སྡང་བའི་དགྲ་ལ་བསྐུལ༔ སྔགས་འཆང་དབུ་འཕང་བསྟོད་པའི་ཕྱིར༔ ལིང་ཤོར་དམ་ཉམས་སྒྲོལ་བའི་ཕྱིར༔ བསྐུལ་ལོ་སྡང་བའི་དགྲ་ལ་བསྐུལ༔ ༼ བསྐུལ་ལོ་ཐུགས་དམ་གནད་ནས་བསྐུལ༔ ཞེས་དཔེ་གཅིག་ན་སྣང་། ༽ནམ་མཁའི་ཁམས་ནས་ཆས་པ་ན༔ མྱུར་མགྱོགས་གློག་ལྟར་ངོམ་ལ་སོང་༔ བར་སྣང་ཁམས་ནས་ཆས་ཙམ་ན༔ ང་རོ་འབྲུག་ལྟར་སྒྲོགས་ལ་སོང་༔ ས་གཞིའི་ཁམས་སུ་བསྐྱོད་ཙ་ན༔ ཞུགས་ཀྱི་དངོས་བཞིན་གང་འཕྲད་པའི༔ དངོས་པོ་རྡུལ་དུ་བརླག་གྱིན་སོང་༔ དགྲ་བགེགས་སྟེང་དུ་ཕེབ་ཙ་ན༔ བྲག་ལ་ཐོག་བཞིན་ཐལ་བར་མཛོད༔ བླ་ཡིད་སེམས་གསུམ་གྲུམ་ཆིང་གྱིས༔ ཟས་ཀྱི་ལྷག་རོལ་ལོང་མ་གཏད༔ མིག་འབྲས་ཐང་ལ་ལྷུང་བར་གྱིས༔ སྙིང་ཁྲག་དམར་བོ་ཁ་ནས་ཕྱུང་༔ མགོ་དང་དོན་སྙིང་བདག་ལ་སྤྲོད༔ སངས་རྒྱས་བསྟན་པ་ཡལ་མ་དོར༔ སྔགས་འཆང་རྣལ་འབྱོར་ཡིད་མ་བཅད༔ བསྟན་དགྲ་ཡན་པར་མ་བཏང་ཞིག༔ བསྐུལ་ལོ་ཐུགས་དམ་གནད་ནས་བསྐུལ༔ བཞེངས་ཤིག་ཆོས་ཀྱི་དབྱིངས་ནས་བཞེངས༔ ཆོ་ཡ་ཆོ་ཡ་དགྲ་ལ་རྒྱུག༔ རཱ་ཛ་ཙནྡྲ་ས་མ་ཡ་དགྲ་བགེགས་གནོད་བྱེད་ཀྱི་སྟེང་དུ་རྒྱུག་རྒྱུག་མ་ར་ཡ་ཕཊ༔ ཅེས་ཀྱང་ཚེ་དབང་བས་བསྐུར་ངོར་ག་གཱ་སྨྱོན་པ་ནས་སོ། །