ཡིད་བཞིན་དབང་གི་རྒྱལ་པོའི་གཡང་གི་བྱིན་འབེབས་བཀྲ་ཤིས་ཆར་འབེབས།

ཡིད་བཞིན་དབང་གི་རྒྱལ་པོའི་གཡང་གི་བྱིན་འབེབས་བཀྲ་ཤིས་ཆར་འབེབས་ཞེས་བྱ་བ་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ བརྡ་ཡིག །ཆོས་དབྱིངས་ཀུན་སྣང་དཀྱིལ་འཁོར་ནས༔ མ་ལུས་རབ་འབྱམས་འཁོར་ལོའི་བསྒྱུར༔ མོས་པའི་ཡིད་ཀྱིས་ཕྱག་རྒྱ་བཞིའི༔ གཡང་གི་རྫས་ལ་སྤྱན་དྲངས་ཕྱིར༔ སྲི་ཞུའི་གུས་པས་རོལ་མོ་སྦིར༔ དེ་ནས་ཚིག་གིས་འབོད་བསྐུལ་དུ༔ ཨེ་མ་ཧོ༔ ངོ་མཚར་ཐུགས་རྗེ་ཆེན་པོའི་རྩལ་ཤུགས་ཀྱིས༔ རྩོལ་མེད་ངང་བྱུང་སྒྱུ་མར་རོལ་བ་ལས༔ དུས་གསུམ་མགོན་པོ་ཡེ་ཤེས་ལྷ་ཡི་ཚོགས༔ སེམས་ཅན་གདུང་བ་སེལ་ཕྱིར་དེང་གི་དུས༔ ཆགས་ཐོགས་སྒྲིབ་བྲལ་སྤྱན་ལྔའི་མངོན་རྟགས་ཅན༔ བདག་གིས་མངོན་སུམ་ཡུལ་དུ་མ་གྱུར་བས༔ རེ་ཞིག་བསྐུལ་ཞིང་གསོལ་བས་འབོད་ལགས་ཀྱི༔ ད་ལྟ་ཉིད་དུ་གཡང་ལ་བྱིན་ཆེན་ཕོབ༔ ༈ ཨོཾ༔ ཡེ་ཤེས་ལྔ་ལྡན་འགྱུར་མེད་ཕོ་བྲང་ནས༔ བཅོམ་ལྡན་ཞི་ཁྲོ་རྒྱལ་བ་རིགས་ལྔ་ལ༔ སྐུ་གསུང་ཐུགས་ཡོན་ཕྲིན་ལས་འཁོར་གྱིས་བསྐོར༔ དེང་འདིར་བསོད་ནམས་གཡང་ལ་བྱིན་ཆེན་ཕོབ༔ ཤེས་རབ་ལྔ་ལྡན་འོད་ཀྱི་ཕོ་བྲང་ནས༔ བདེ་གཤེགས་ཞི་ཁྲོ་ཡུམ་ཆེན་མཁའ་འགྲོ་ལྔ༔ འབུམ་ཕྲག་ཡངས་བའི་ཐབས་ཤེས་འཁོར་གྱིས་བསྐོར༔ དེང་འདིར་བསོད་ནམས་གཡང་ལ་བྱིན་ཆེན་ཕོབ༔ སྙིང་རྗེ་ཆེན་པོ་བཅུ་དྲུག་དཀྱིལ་འཁོར་ནས༔ བྱང་ཆུབ་ལྕམ་དྲལ་ཞི་ཁྲོ་བཅུ་དྲུག་ལ༔ མས་བསྒྲོད་ཚུལ་དངོས་གྲངས་མེད་འཁོར་གྱིས་བསྐོར༔ དེང་འདིར་བསོད་ནམས་གཡང་ལ་བྱིན་ཆེན་ཕོབ༔ ཕྱི་ནང་རྡོ་རྗེ་བཀོད་པའི་དཀྱིལ་འཁོར་ནས༔ རྒྱུད་སྡེ་བཞི་དྲུག་ཡི་དམ་ལྷ་ཚོགས་ལ༔ ཕྱོགས་བཅུའི་གངས་ཅན་རབ་འབྱམས་འཁོར་གྱིས་བསྐོར༔ དེང་འདིར་བསོད་ནམས་གཡང་ལ་བྱིན་ཆེན་ཕོབ༔ ངེས་མེད་གདུལ་བྱའི་རང་སྣང་འཇིག་རྟེན་ནས༔ བདེ་གཤེགས་བསྐལ་བཟང་སངས་རྒྱས་སྟོང་རྩ་ལ༔ སྤྲུལ་སྐུ་བྱེ་བ་གྲངས་མེད་འཁོར་གྱིས་བསྐོར༔ དེང་འདིར་བསོད་ནམས་གཡང་ལ་བྱིན་ཆེན་ཕོབ༔ ཡེ་ཀློང་མཉམ་ཉིད་རང་སྣང་འོག་མིན་ནས༔ བཀའ་དྲིན་མཚུངས་མེད་རྩ་བའི་བླ་མ་ལ༔ བརྒྱུད་པ་དགུ་ལྡན་མགོན་པོའི་འཁོར་གྱིས་བསྐོར༔ དེང་འདིར་བསོད་ནམས་གཡང་ལ་བྱིན་ཆེན་ཕོབ༔ ཐུགས་གསུང་ཟབ་ཡངས་མཁའ་ཁྱབ་དཀྱིལ་འཁོར་ནས༔ རང་བཞིན་ཐབས་གྱུར་རྫོགས་པ་ཆེན་པོ་ལ༔ ལུང་རྟོགས་ཆོས་ཕུང་བརྒྱད་ཁྲིའི་འཁོར་གྱིས་བསྐོར༔ དེང་འདིར་བསོད་ནམས་གཡང་ལ་བྱིན་ཆེན་ཕོབ༔ བསླབ་གསུམ་འདུ་འབྲལ་མེད་པའི་དཀྱིལ་འཁོར་ནས༔ རྒྱ་བོད་པཎ་གྲུབ་རིག་འཛིན་རྒྱ་མཚོ་ལ༔ ཕྱོགས་བཅུའི་ཐེག་གསུམ་དགེ་འདུན་འཁོར་གྱིས་བསྐོར༔ དེང་འདིར་བསོད་ནམས་གཡང་ལ་བྱིན་ཆེན་ཕོབ༔ བཀའ་དང་དམ་ཚིག་གཉན་པོའི་དཀྱིལ་འཁོར་ནས༔ དཔལ་མགོན་དྲེགས་དཔོན་སྐྱེ་བརྒྱུད་བདག་པོ་ལ༔ ཡེ་ཤེས་འཇིག་རྟེན་ཆོས་སྐྱོང་འཁོར་གྱིས་བསྐོར༔ དེང་འདིར་བསོད་ནམས་གཡང་ལ་བྱིན་ཆེན་ཕོབ༔ ཐུགས་བསྐྱེད་དམ་བཅའ་འདུ་འབྲལ་མེད་ཀློང་ནས༔ རྣམ་སྲས་ཛམ་ལྷ་དཔལ་ལྷ་གྲོགས་མོར་བཅས༔ ནོར་ལྷ་ལྷ་ཆེན་བསམ་ཡས་འཁོར་གྱིས་བསྐོར༔ དེང་འདིར་བསོད་ནམས་གཡང་ལ་བྱིན་ཆེན་ཕོབ༔ ཚུལ་བསྟན་ཐབས་ལ་མཁས་པའི་དཀྱིལ་འཁོར་ནས༔ ཡིད་བཞིན་པདྨ་བསྟན་སྐྱོང་ཟླ་བའི་དབང་༔ སྤྲུལ་བ་དབང་བསྡུད་རུ་འདྲེན་འཁོར་གྱིས་བསྐོར༔ དེང་འདིར་བསོད་ནམས་གཡང་ལ་བྱིན་ཆེན་ཕོབ༔ ༈ ཀྱཻ༔ ཉོན་མོངས་དུག་ལྔ་དབུལ་ཕོངས་རྒྱུ་ཡིན་ཏེ༔ ཡེ་ཤེས་རྣམ་ལྔའི་བྱིན་ཆེན་དབབ་ཏུ་གསོལ༔ རྐུ་འཕྲོགས་མི་དགེ་དབུལ་ཕོངས་འདུ་བྱེད་ལས༔ ཕྲིན་ལས་དོན་ཡོད་གྲུབ་པར་བྱིན་གྱིས་རློབས༔ འབྱུང་བཞིའི་དར་རྒུད་དབུལ་ཕོངས་རྐྱེན་ཡིན་ཏེ༔ རྣམ་དག་ཞིང་ཁམས་ཆེན་པོར་བྱིན་ཕོབ་ཅིག༔ སྡུག་བསྔལ་རྣམ་གསུམ་དབུལ་ཕོངས་དངོས་ཡིན་གྱི༔ བདེ་ཆེན་འདུ་འབྲལ་མེད་པར་བྱིན་ཕོབ་ཅིག༔ དགོས་འདོད་འབྱུང་བ་ཡིད་བཞིན་ནོར་བུའི་གཡང་༔ དེང་འདིར་བསོད་ནམས་གཡང་ལ་བྱིན་ཆེན་ཕོབ༔ འཛད་པ་མེད་པ་གཏེར་ཆེན་བུམ་པའི་གཡང་༔ དེང་འདིར་བསོད་ནམས་གཡང་ལ་བྱིན་ཆེན་ཕོབ༔ གོང་དུ་འཕེལ་བ་དཔག་བསམ་ལྗོན་ཤིང་གཡང་༔ དེང་འདིར་བསོད་ནམས་གཡང་ལ་བྱིན་ཆེན་ཕོབ༔ ནུབ་པ་མེད་པ་རྒྱལ་མཚན་དམ་པའི་གཡང་༔ དེང་འདིར་བསོད་ནམས་གཡང་ལ་བྱིན་ཆེན་ཕོབ༔ མུན་པ་སེལ་བ་ཉི་ཟླ་ཟུང་འབྲེལ་གཡང་༔ དེང་འདིར་བསོད་ནམས་གཡང་ལ་བྱིན་ཆེན་ཕོབ༔ འཕོ་འགྱུར་མེད་པ་རི་རྒྱལ་ལྟ་བུའི་གཡང་༔ དེང་འདིར་བསོད་ནམས་གཡང་ལ་བྱིན་ཆེན་ཕོབ༔ ས་ཆུ་མེ་རླུང་འབྱུང་བ་ནམ་མཁའ་བཅས༔ རང་སེམས་བག་ཆགས་བརྟན་པའི་སྣང་གཟུགས་བརྙན༔ གཞན་ན་མེད་དེ་ཆོས་ཉིད་མིག་འཕྲུལ་གཡོ༔ ཕྱྭ་གཡང་དངོས་གྲུབ་ཕུན་ཚོགས་བྱིན་ཕོབ་ཅིག༔ འཛད་མེད་བཅུད་ལྡན་ཟས་ཀྱི་གཡང་བྱིན་ཕོབ༔ བཀྲག་དར་དྲོ་འཇམ་གོས་ཀྱི་གཡང་བྱིན་ཕོབ༔ རིན་ཆེ་གྲངས་མང་ནོར་བུའི་གཡང་བྱིན་ཕོབ༔ གྲགས་མཛངས་འཕན་དར་བུ་ཡི་གཡང་བྱིན་ཕོབ༔ ནད་མེད་འཚེ་བྲལ་ཚེ་ཡི་གཡང་བྱིན་ཕོབ༔ དཔའ་སྟོབས་ཤེས་རྒྱ་སྤོབ་པའི་གཡང་བྱིན་ཕོབ༔ དབུལ་སེལ་རེ་སྐོང་ཕྱུགས་ཀྱི་གཡང་བྱིན་ཕོབ༔ འདུན་མའི་རྩེར་ཕྱིན་ཆོས་ཀྱི་གཡང་བྱིན་ཕོབ༔ དབང་ཕྱུག་བརྒྱད་དང་གྲུབ་པའི་གཡང་བྱིན་ཕོབ༔ རང་གཞན་ཀུན་སྨོན་ལྷུན་གྲུབ་གཡང་བྱིན་ཕོབ༔ ༈ གནས་མཆོག་འདི་རུ་བྱིན་ཆེན་དབབ་ཏུ་གསོལ༔ བསྒྲུབ་མཆོག་བདག་ལ་དངོས་གྲུབ་སྩལ་དུ་གསོལ༔ གཡང་རྫས་འདི་ལ་དབང་ཆེན་བསྐུར་དུ་གསོལ༔ རྟེན་འབྲེལ་འདི་ལ་མཚན་མ་བསྟན་དུ་གསོལ༔ སྐད་ཅིག་ཉིད་ལ་གཡང་གི་བྱིན་ཆེན་ཕོབ༔ ད་ལྟ་ཉིད་དུ་གཡང་གི་བྱིན་ཆེན་ཕོབ༔ མྱུར་བ་ཉིད་དུ་གཡང་གི་བྱིན་ཆེན་ཕོབ༔ སྔོན་སྨོན་བསོད་ནམས་བསགས་པའི་རྣམ་སྨིན་ལ༔ ཕུན་ཚོགས་བདེ་ལེགས་ཡོད་པ་ཆོས་ཉིད་ན༔ ནོར་ལྷ་གཡང་ལྷའི་ཐུགས་རྗེས་ཅི་ཞིག་བྱ༔ དེ་བས་མྱུར་མགྱོགས་མཐུ་རྩལ་རྫུ་འཕྲུལ་གྱིས༔ བཀྲེན་ཆེན་བདག་ལ་གཡང་གི་བྱིན་ཕོབ་ལ༔ མཆོག་དང་ཐུན་མོང་དངོས་གྲུབ་སྩལ་དུ་གསོལ༔ ཨ་ཨཱཿཧཱུྃ་ན་མོ་རཏྣ་ཏྲ་ཡ་ཡཱ༔ གུ་རུ་དྷེ་ཝཱ་ཌཱཀྐི་ནི་དྷརྨཱ་པཱ་ལ་ས་པཱ་རི་ཝཱ་ར་ས་མ་ཡ་ཕེཾ་ཕེཾ་ཛ་ཛ༔ སརྦ་སིདྡྷི་ཕ་ལ་ཧོ༔ ཞེས་བརྗོད་གཡང་བསྐྱེད་འགུགས་བརྟན་བྱ། །རྒྱུ་འབྲས་དབུལ་བ་སེལ་བྱེད་འདི། །བུག་ཐོའི་བསྐུལ་བ་དོན་ཡོད་ཕྱིར། །སྔགས་ནག་ག་གཱ་ཨ་བྷྱེས་བྲིས། །མངྒ་ལཾ། །