གནོད་སྦྱིན་དཀོར་གྱི་བདག་པོའི་དབང་བསྐུལ་ཕྲིན་ལས་ལྷུན་གྲུབ།

གནོད་སྦྱིན་དཀོར་གྱི་བདག་པོའི་དབང་བསྐུལ་ཕྲིན་ལས་ལྷུན་གྲུབ་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ འགུགས་པ་སྔོན་དུ་འགྲོ་བྱས་ཏེ༔ ཧཱུྃཿཛ༔ སྔོན་ཚེ་ཀློང་གསལ་རྡོ་རྗེ་བདུད་འདུལ་ལས༔ ཁས་བླངས་ཇི་བཞིན་དགོངས་ལ་གནས་བསྐྱོད་དེ༔ རྣལ་འབྱོར་བདག་ལ་ཕྲིན་ལས་རབ་འབྱམས་བསྒྲུབ༔ ལས་བཞི་འདམ་མེད་སླད་ཆར་འདིར་སྡོམ་ཅིག༔ གང་ཞིག་བཅོམ་ལྡན་བསོད་ནམས་དཔྱིད་དཔལ་ལས༔ འཁྲུངས་བའི་རྒྱལ་སྲིད་རིན་ཆེན་རྣམ་བདུན་སོགས༔ དགུགས་པའི་ཕོ་ཉར་ཆོས་སྐྱོངས་ཁྱོད་བརྟེན་པས༔ འདིར་བྱོན་རྣལ་འབྱོར་སྐལ་བར་ལྷུན་གྲུབ་མཛོད༔ ཡང་ཅིག་བཀོད་པས་གྲུབ་པ་རྟགས་མིན་ཟུངས༔ རྒྱ་མཚོའི་གོས་དང་ལྷ་ལམ་ཁམས་འགེངས་པའི༔ དབྱིངས་གཞི་གངས་ཆེན་ཁམས་ཀྱི་དཔལ་ཡོན་ཏན༔ དགུགས་སླད་རང་གནས་དམ་པས་སྐུར་བསྐྱོད་ཅིག༔ ལྟོས་འཇོག་འོག་ཕྱོགས་ནཱ་གའི་གྲོང་ཁྱེར་ནས༔ རཱ་ཛ་བརྒྱད་དང་རྒྱ་མཚོའི་ནོར་བུའི་དཔལ༔ མ་ལུས་བསྡུས་ནས་སྒྲུབ་མཆོག་བདག་ལ་སྩོལ༔ ཐུགས་དམ་གནད་ནས་བསྐུལ་ལོ་ད་བཞེངས་ཤིག༔ ཕྱོགས་མཐར་དཔུང་བཞིའི་འདེགས་པ་ལྷུན་གྲུབ་པ༔ བདོག་དགུའི་ཡོན་ཏན་སྤུངས་པའི་རབ་རྩེ་མོ༔ ཐུགས་རྗེའི་སྟོབས་ཀྱིས་ཡོ་བྱད་ལ་དབང་ཁྱོད༔ བསྐུལ་བོས་ཡིད་ལ་ཆས་ཆོད་མེད་པར་མཛོད༔ གཞན་ཡང་ཚེ་དཔལ་འབྱོར་དྲུག་རྒྱས་པ་དང་༔ མོས་བཞི་དབང་བསྡུད་ཐུགས་དམ་གནད་བསྐུལ་གྱིས༔ བཞེངས་ཤིག་དབང་གི་ཕྲིན་ལས་མཛད་ཕྱིར་བཞེངས༔ མཛོད་ཅིག་བདག་གི་རེ་སྨོན་མ་བསྙེལ་ཅིག༔ པདྨ་འབྱུང་གནས་བདུད་འདུལ་ཀློང་གསལ་སྙིང་༔ བཀའ་དམ་གཉན་པོ་མ་འདའ་ས་མ་ཡཱ༔ ཉམས་ཉེས་རང་ལ་ཆད་པའི་བཀའ་རྟགས་རྒྱ༔ རྣལ་འབྱོར་བཅོལ་བའི་ཕྲིན་ལས་ལྷུན་གྲུབ་མཛོད༔ ཅེས་བཅོལ་རཀྟའི་སྐྱེམས་ཀྱིས་མཐའ་རུ་ཕྱིན༔ ཚེ་དབང་རིག་འཛིན་གྱི་ངོར་ག་གཱ་ཨ་བྷྱེས་སོ། །དགེའོ། །དགེའོ། །དགེའོ། །མངྒ་ལཾ། ༈ ཡང་ཅིག་དབང་གི་བསྐུལ་བ་ནི༔ ཧཱུྃ༔ ཞི་མཛད་ཐར་བའི་ཞིང་གི་མགོན་བྱེད་ལྷ༔ དབང་གི་ཕྲིན་ལས་མཛད་པའི་གྲོགས་ལ་བསྐུལ༔ རྒྱས་མཛད་ཡོན་ཏན་དབྱིངས་ལས་དོན་གྲུབ་རྒྱལ༔ དབང་གི་ཕྲིན་ལས་མཛད་པའི་གྲོགས་ལ་བསྐུལ༔ དབང་མཛད་པདྨའི་ངང་ལས་བསྟན་སྐྱོངས་རྒྱལ༔ དབང་གི་ཕྲིན་ལས་མཛད་པའི་གྲོགས་ལ་བསྐུལ༔ དྲག་པོ་ཕྲིན་ལས་མངོན་སྤྱོད་སྟག་མདའ་དབང་༔ དབང་གི་ཕྲིན་ལས་མཛད་པའི་གྲོགས་ལ་བསྐུལ༔ རིགས་ཀུན་འཁོར་ལོའི་དབང་ཕྱུག་ཡིད་བཞིན་ནོར༔ དབང་གི་ཕྲིན་ལས་མཛད་པའི་གྲོགས་ལ་བསྐུལ༔ སྐྱེ་མེད་ངང་ལས་འགགས་མེད་གར་བསྒྱུར་བ༔ དབང་གི་ཕྲིན་ལས་མཛད་པའི་དུས་ལ་བབས༔ ལྷ་འདྲེ་མི་གསུམ་ཟས་ནོར་ལོངས་སྤྱོད་དང་༔ རྒྱལ་བློན་དམངས་དང་བྲན་འཁོར་མཛའ་བའི་གྲོགས༔ ཆོས་དོན་ལས་སོགས་གང་ལ་སྨོན་པའི་དོན༔ ད་དུས་འགྲོ་བའི་ཕྱི་ནང་རྒུད་ཕོངས་རིགས༔ སེལ་བའི་ཐུགས་བསྐྱེད་དམ་བཅའ་ཇི་བཞིན་ཏུ༔ འདི་ན་སྣོད་བཅུད་དཔལ་ཡོན་མ་ལུས་པ༔ དབང་བསྡུད་དབང་གི་ཕྲིན་ལས་མཛད་དུ་གསོལ༔ ཨོཾ་རཱ་ཙནྡྲ་ཝ་ཤཾ་ཀུ་རུ་ཧོ༔ བཛྲ་ས་མ་ཡ་ཛ་ཛ༔ རྟ་མགྲིན་ངོར་ག་གཱས་སོ། །