རྒབ་འདྲེ་མནན་པ་ཉུང་བསྡུས་དངོས་གྲུབ་འབྱུང་གནས།
ཡེ་ཤེས་སྒྱུ་འཕྲུལ་དྲྭ་བ་ལས༔ རྒབ་འདྲེ་མནན་པ་ཉུང་བསྡུས་དངོས་གྲུབ་འབྱུང་གནས་བཞུགས་སོ༔
ལིང་གཟུགས་ཐེའུ་བྲང་ཆ་ལུགས་ལ༔ འགུགས་གཞུགས་ལན་གསུམ་བྱས་ནས་སུ༔ ཧཱུྃ༔ དྲག་པོ་མངོན་སྤྱོད་རོལ་པའི་ལྷ༔ ཡིད་བཞིན་པདྨ་དབང་གི་རྒྱལ༔ ཕྲིན་ལས་ཕྱག་རྒྱ་ཆེན་པོ་ནི༔ སྟག་མདའ་མགོན་པོ་འཁོར་བཅས་ཀྱི༔ ཆོས་ཀྱི་དབྱིངས་ནས་སྐུར་བཞེངས་ལ༔ མ་རུང་བསྟན་པའི་རུ་ཏྲའི་སྡེ༔ རྣལ་འབྱོར་ཅན་གྱི་བགེགས་བྱེད་ཅིང་༔ དངོས་གྲུབ་རྐུ་འཕྲོག་རྒབ་འདྲེའི་ཚོགས༔ ཕོ་ཉ་མང་པོའི་འདུ་འཕྲོའི་ཁུག༔ གཟུགས་བརྟེན་ལིངྒ་འདི་ལ་བསྟིམས༔ མཐུ་སྟོབས་ནུས་པའི་རྩལ་ཤུགས་ཆིངས༔ མགོན་བྱེད་ལྷ་དང་ད་ཕྲོལ་ཞིག༔ ཡེ་ཤེས་འབར་བའི་མཚོན་ཐུན་ཕོབ༔ འཁུ་སེམས་བརྟན་ཕྲོགས་རྨོངས་པར་གྱིས༔ ལྔ་ཕུང་ཐལ་བའི་བརྡུལ་དུ་རློག༔ རྣམ་ཤེས་ཆོས་ཀྱི་དབྱིངས་སུ་དྲོངས༔ ཤ་ཁྲག་རུས་གསུམ་བཞེས་ཤིག་རོལ༔ སླར་ཡང་གསར་བྱུང་ནག་པོའི་དཔུང་༔ མིང་གི་ལྷག་མ་མེད་པ་རུ༔ ཁྲོས་ཞིང་རྔམ་པས་ཕྲིན་ལས་མཛོད༔ ཨོཾ་བཛྲ་ས་མ་ཡ་སརྦ་བིགྣན་ཡ་ཏ་ཀ་ལ་ས་ཤ་ཨ་མ་ར་ཡ་ཁཱ་ཧི༔ ཅེས་པས་བར་ཆད་ཕྱོགས་ལས་རྒྱལ༔ རཱུ་པ་བྱང་ཕྱོགས་ངོས་སུ་ནས༔ ལྷ་ཚོགས་ཞལ་དུ་འབུལ་བར་བྱ༔ ཡང་ན་དུག་ཤོག་ལ༔ ཤྭ་བ་རྣ་བ་གླ་བ་རྒོ༔ འཕར་བའི་མགོ་ཅན་དབུས་ཕྱོགས་བྲི༔ ལུས་ནི་གཅེར་བུ་ཟ་མ་ཏོག༔ མཆན་ཁུང་གཡོན་དུ་སྦེད་པ་ཡི༔ དབུས་ཀྱི་སྙིང་གར༔ ཨུ་ཏྲ་ཁ་ཤི་ཕེ་ན་ཁུ་ཁུག་ནན༔ ཤར་གྱི་ལ༔ ན་ག་ར་ཤ་ཏྲུྃ་གླུང་ཡ་ཛ་ཕོབ་ནན༔ ལྷོར༔ ཡ་མ་ས་རི་ན་ཏྲི་ཕུ་ཧྲིང་ཁུག་ཆིངས༔ ནུབ་ལ༔ ཙ་ཡ་ཨུ་ཧྲུ་ཏྭ་ཊ་ཁུག་ནན༔ བྱང་གི་ལ༔ སུ་ན་མ་ལོ་ཡེ་ཙོ་ར་ས་ཡ་མུ་ཀུ་ཛྭ་ལ་ཧེ་ཁུག་ནན༔ ཞེས་ཏྲིའི་མཐའ་བསྐོར་བཀོད་ལ་དངོས་གྲུབ་བསྒྲུབ་ཆེན་ཤུལ་དང་༔ གཡང་དང་ཚེ་བསྒྲུབ་མ་དགེ་བའི་མཆོད་རོ་ཕུང་ས་བླང་བྱུག༔ ཡན་ལག་བཞི་ལ་ཛ་ཁྲམ་སོགས་སྤྱི་ལྟར་བྲི་ཐབས་ལ་འགྲོས་བསྟུན༔ མཐའ་བསྐོར་དུ་ཛ་ཏྲི་ཕུ་ཀ་ནན༔ ཧཾ་ཀ་ཏམྤུ་ཤེབྟན་ཏི་ཧྲི་ཀིརྣ་ལི་ཡ་བྷེ་ཥི་ནན༔ ཀ་ཝ་ཙི་བིགྣན་ནན་ནན༔ ཅེས་མཐར་ཛ་ཁྲམ་སོགས་མནན་སྤྱིའི་ལུགས་ལྟར་བྲི་ཐབས་དྲིལ་སྟངས་བྱས་ནས༔ ལུང་གསུམ་མདོར་ཁྱི་ཐོད་དུ་མནན་ནོ༔ ཅེས་ཀྱང་ཤྲི་བས་སོ། །ཡང་འགུགས་གཞུགས་ཅི་མང་དང་༔ སྨད་ལེའུ་བསྡུས་པའི་མཐར་སྔགས་འདི་བཟླ་བཞིན་མནན་ཀྱང་ཆོག༔ རྒྱས་པར་གཞུང་གི་མནན་ལེའུ་ལ་སྔགས་འདི་གདགས་པས་མནན་ནོ༔ ཡང་བསྡུ་ན་སྟོད་ལེའུ་ཚོགས་བཅས་ཀྱི༔ བྲོ་མནན་འགོར་འགུགས་གཞུགས་གྲངས་མང་མཐར༔ སྔགས་འདིའི་མནན་ནས་རྟ་བྲོ་སྟེང་དུ་བརྡུང་ཀྱང་འཐེར་རོ༔ ཅེས་ཀྱང་ག་གཱས་སོ། །བརྡ་ཡིག །ཏྲྸིུ དགེའོ། །སརྦ་མངྒ་ལཾ། །