གནོད་སྦྱིན་དབང་གི་རྒྱལ་པོ་ལ་བརྟེན་ནས་རྡོ་རྗེའི་ཚེ་སྒྲུབ་པའི་ཆོ་ག་འཆི་མེད་དཔལ་སྟེར།

ཡེ་ཤེས་སྒྱུ་འཕྲུལ་དྲྭ་བ་ལས༔ གནོད་སྦྱིན་དབང་གི་རྒྱལ་པོ་ལ་བརྟེན་ནས་རྡོ་རྗེའི་ཚེ་སྒྲུབ་པའི་ཆོ་ག་འཆི་མེད་དཔལ་སྟེར་ཞེས་བྱ་བ་བཞུགས་སོ༔

འདིར་ཡང་རྡོ་རྗེའི་ཚེ་སྒྲུབ་ཐབས༔ རྒྱས་པར་ཟུར་བ་ལས་གསལ་ཀྱང་༔ འདིར་ནི་མདོར་བསྡུས་བསྟན་པ་ལ༔ འདི་ནི་གསུང་གི་དཀྱིལ་འཁོར་ལ༔ གསུང་གི་འབྲས་ཆོས་ལྔ་རྫོགས་པའི༔ ཡོན་ཏན་ཚེ་དཔལ་རྒྱས་པའི་སྟོབས༔ མངའ་བའི་ངེས་ཤེས་ཐོབ་པའི་གདེངས༔ མེད་ཐབས་མེད་དོ་ས་མ་ཡཱ༔ ས་མ་ཡ༔ བརྡ་ཡིག །དང་པོ་ཚེ་སྒྲུབ་བསྡུས་པ་ནི༔ ཧཱུྃ་ཧྲཱི༔ འགྱུར་མེད་ཡེ་གྲོལ་གཞི་ཡི་ཚེ་དཔག་མེད༔ ཆོས་ཀུན་ཆོས་ཉིད་གཉུག་མ་སྐྱེ་འཆི་བྲལ༔ རྒྱུད་གསུམ་འབྲེལ་བའི་རང་བཞིན་ངོ་བོ་ཉིད༔ དེ་ལས་མི་འདའ་རྡོ་རྗེའི་ཕྱག་རྒྱས་བཏབས༔ འགགས་མེད་གཅིག་གྲོལ་རང་བྱུང་རྟ་མགྲིན་དབང་༔ སྟོབས་དང་མི་འཇིགས་ཟག་མེད་ཡོན་ཏན་ལྡན༔ སེམས་ཀྱི་སྙིང་པོ་རྒྱུ་མེད་ཡེ་ཤེས་ཆེ༔ མ་དག་མཚན་མས་ཡེ་ནས་བསླད་མ་མྱོང་༔ རིག་པའི་རྒྱན་སྣང་ཀུན་འབྱུང་ཐུགས་རྗེ་ཆེ༔ སྐུ་ལྔ་རིགས་ལྔ་ཞི་ཁྲོ་ཕྲ་མེན་ཚུལ༔ བཟང་ངན་མེད་མཉམ་འདས་དང་མ་འདས་རྟོགས༔ གཅིག་དང་དུ་མའི་ཚད་བཟུང་ཡུལ་ལས་འདས༔ དེ་ཕྱིར་གཞི་ཡི་སངས་རྒྱས་ངག་གི་དབང་༔ ཁྱོད་ནི་ཡེ་ནས་བདུད་བཞི་བཅོམ་པའི་སླད༔ དབང་ཕྱུག་ཡོན་ཏན་དྲུག་གི་ཀུན་ནས་མཛེས༔ དེ་ཕྱིར་བདག་ལ་མཆོག་ཐུན་དངོས་གྲུབ་སྩོལ༔ ཚེ་འགུགས་རྐྱང་བ་ལ༔ ཨ་རཱ་ཛ་ཙནྡྲ་ས་མ་ཡཱ༔ སརྦ་ཨ་ཡུ༔ ཝ་ཤཾ་ཀུ་རུ་ཧོ༔ སིདྡྷི་ཕ་ལ་ཧཱུྃ༔ སྤྲོ་ན་སྐབས་འདིར་ཚེ་བསྒྲུབ་པའི་སྔར་བྱུང་གི་རབས་བརྗོད་ལ༔ དེ་རྗེས་སུ༔ ཀྱཻ༔ ཁྱད་པར་སྙིགས་མའི་ཡང་མཐར་སྐྱེས་པ་ལ༔ རང་བཞིན་ཚེ་ཡི་འདུ་བྱེད་ཐུང་བ་དང་༔ནད་དང་གདོན་བགེགས་གློ་བུར་དགུ་བཅུ་གཅིག༔ འཇིགས་པ་བརྒྱད་དང་གཤིས་ངན་འགུམ་པའི་ཚུལ༔ ཚེ་དང་ལས་དང་བསོད་ནམས་འཕེན་རྫོགས་ཟད༔ རྐྱེན་ངན་ཉི་ཁྲི་ཆིག་སྟོང་ལ་སོགས་པའི༔ ཚེ་དང་སྲོག་ལ་བར་དུ་གཅོད་པའི་རྐྱེན༔ ཤིན་ཏུ་བརྡོ་བའི་གཞན་དབང་གྱུར་བ་ལ༔ འཕགས་མཆོག་ཐུགས་རྗེའི་ལྕགས་ཀྱུའི་བཟུང་དུ་གསོལ༔ ཧཱུྃ༔ དབུས་ཕྱོགས་མི་འགྱུར་རྡོ་རྗེའི་དཀྱིལ་འཁོར་ནས༔ བཅོམ་ལྡན་མགོན་པོ་རཏྣ་ཚེ་དཔག་མེད༔ དྲག་པོའི་སྐུར་བཞེངས་རཏྣ་ཧྱ་གྷ༔ སྤྲུལ་བའི་རོལ་གར་དོན་གྲུབ་རྒྱལ་པོ་ཡིས༔ ཐུགས་མཆོག་རཏྣ་རིགས་ཀྱི་ཚེ་གཡང་ཁུག༔ མི་མཐུན་ཚེ་ཡི་བར་ཆད་དབྱིངས་སུ་སོལ༔ ཚེ་བསོད་ཡེ་ཤེས་རྒྱས་པའི་ཕྲིན་ལས་མཛོད༔ ཤར་ཕྱོགས་མངོན་པར་བྱང་ཆུབ་དཀྱིལ་འཁོར་ནས༔ བཅོམ་ལྡན་མགོན་པོ་རྡོ་རྗེ་ཚེ་དཔག་མེད༔ དྲག་པོའི་སྐུར་བཞེངས་བཛྲ་ཧྱ་གྷ༔ སྤྲུལ་བའི་རོལ་གར་གནོད་སྦྱིན་ཐལ་བ་སྐྱོངས༔ སྐུ་མཆོག་རྡོ་རྗེ་རིགས་ཀྱི་ཚེ་གཡང་ཁུག༔ མི་མཐུན་ཚེ་ཡི་བར་ཆད་དབྱིངས་སུ་སོལ༔ ཚེ་བསོད་ཡེ་ཤེས་རྒྱས་པའི་ཕྲིན་ལས་མཛོད༔ ལྷོ་ཕྱོགས་ཡེ་ཤེས་ཆོས་སྐུའི་དཀྱིལ་འཁོར་ནས༔ བཅོམ་ལྡན་མགོན་པོ་བུདྡྷ་ཚེ་དཔག་མེད༔ དྲག་པོའི་སྐུར་བཞེངས་བུདྡྷ་ཧྱ་གྷ༔ སྤྲུལ་བའི་རོལ་བ་ཡིད་བཞིན་རྒྱལ་པོ་ཡིས༔ ཡོན་ཏན་བུདྡྷ་རིགས་ཀྱི་ཚེ་གཡང་ཁུག༔ མི་མཐུན་ཚེ་ཡི་བར་ཆད་དབྱིངས་སུ་སོལ༔ ཚེ་བསོད་ཡེ་ཤེས་རྒྱས་པའི་ཕྲིན་ལས་མཛོད༔ ནུབ་ཕྱོགས་ལོངས་སྤྱོད་རྫོགས་སྐུའི་དཀྱིལ་འཁོར་ནས༔ བཅོམ་ལྡན་མགོན་པོ་པདྨ་ཚེ་དཔག་མེད༔ དྲག་པོ་སྐུར་བཞེངས་པདྨ་ཧྱ་གྷ༔ སྤྲུལ་བའི་རོལ་བ་ཝ་ཀི་པཱ་ལ་ཡིས༔ གསུང་མཆོག་པདྨའི་རིགས་ཀྱི་ཚེ་གཡང་ཁུག༔ མི་མཐུན་ཚེ་ཡི་བར་ཆད་དབྱིངས་སུ་སོལ༔ ཚེ་བསོད་ཡེ་ཤེས་རྒྱས་པའི་ཕྲིན་ལས་མཛོད༔ བྱང་ཕྱོགས་སྤྲུལ་བ་སྐུ་ཡི་དཀྱིལ་འཁོར་ནས༔ བཅོམ་ལྡན་མགོན་པོ་ལས་ཀྱི་ཚེ་དཔག་མེད༔ དྲག་པོའི་སྐུར་བཞེངས་ཀརྨ་ཧྱ་གྷ༔ སྤྲུལ་བའི་རོལ་བ་གནོད་སྦྱིན་སྟག་མདའ་ཡིས༔ ཕྲིན་ལས་ཀརྨ་རིགས་ཀྱི་ཚེ་གཡང་ཁུག༔ མི་མཐུན་ཚེ་ཡི་བར་ཆད་དབྱིངས་སུ་སོལ༔ ཚེ་བསོད་ཡེ་ཤེས་རྒྱས་པའི་ཕྲིན་ལས་མཛོད༔ སྒྱུ་མ་ཀུན་མཆོག་གཟུངས་ཀྱི་ཕྱག་རྒྱ་ཆེ༔ སྒྲོལ་མ་དཀར་མོ་གཙུག་ཏོར་སྡེ་ལྔ་དང་༔ ཚེ་ཡི་ལྷ་ཚོགས་དཔག་མེད་འཁོར་གྱིས་བསྐོར༔ མི་མཐུན་ཚེ་ཡི་བར་ཆད་དབྱིངས་སུ་སོལ༔ ཚེ་བསོད་ཡེ་ཤེས་རྒྱས་པའི་ཕྲིན་ལས་མཛོད༔ རྣམ་སྨིན་ཚེ་དབང་ཕྱག་རྒྱ་ལྷུན་གྲུབ་ཀྱི༔ རིག་འཛིན་བཞི་དང་དབང་བཅུའི་མངའ་བ་ཡིས༔ བྱང་ཆུབ་སེམས་དཔའི་ཚེ་ལ་དབང་ཐོབ་ཚོགས༔ མི་མཐུན་ཚེ་ཡི་བར་ཆད་དབྱིངས་སུ་སོལ༔ ཚེ་བསོད་ཡེ་ཤེས་རྒྱས་པའི་ཕྲིན་ལས་མཛོད༔ ཨོ་རྒྱན་ཆེན་པོ་བི་མ་ལ་མི་དྲ༔ བོ་དྷི་ས་ཏྭ་དམ་པ་སངས་རྒྱས་དཔལ༔ ཐང་སྟོང་རྒྱལ་པོ་རྩ་བརྒྱུད་བླ་མ་ཡིས༔ མི་མཐུན་ཚེ་ཡི་བར་ཆད་དབྱིངས་སུ་སོལ༔ ཚེ་བསོད་ཡེ་ཤེས་རྒྱས་པའི་ཕྲིན་ལས་མཛོད༔ གསང་བ་ཡེ་ཤེས་མཁའ་འགྲོ་མཚོ་རྒྱལ་མ༔ ཛྙཱ་ན་ཝཱ་ར་ཀུ་རུ་ཀུལླེ་དང་༔མཁའ་སྤྱོད་འདོད་གཟུགས་གྲུབ་པའི་རིག་འཛིན་གྱིས༔ མི་མཐུན་ཚེ་ཡི་བར་ཆད་དབྱིངས་སུ་སོལ༔ ཚེ་བསོད་ཡེ་ཤེས་རྒྱས་པའི་ཕྲིན་ལས་མཛོད༔ ཧཱུྃ༔ སྔོན་ཚེ་བཅོམ་ལྡན་འདས་ཀྱི་སློབ་མར་གྱུར༔ དེ་རྗེས་རིགས་འཛིན་བརྒྱུད་པའི་དམ་ལ་གནས༔ ཚངས་པ་ལ་སོགས་ཚེ་ཡི་རིགས་བྱེད་བདག༔ མི་མཐུན་ཚེ་ཡི་བར་ཆད་དབྱིངས་སུ་སོལ༔ ཚེ་བསོད་ཡེ་ཤེས་རྒྱས་པའི་ཕྲིན་ལས་མཛོད༔ ཧཱུྃ༔ ཤར་གྱི་རུ་འདྲེན་འཁོར་དང་བཅས་པ་ཡིས༔ འབྱུང་བ་ས་ཡི་ཁམས་ཀྱི་དྭངས་བཅུད་བསྡུས༔ ཤ་ཡི་ཁམས་ནས་བླ་ཚེ་སྲོགས་ཉམས་པ༔ སོར་ཆུད་སྲུ་བ་མེད་ལ་བརྟན་ཐོབ་མཛོད༔ ཧཱུྃ༔ ལྷོ་ཡི་རུ་འདྲེན་འཁོར་དང་བཅས་པ་ཡིས༔ འབྱུང་བ་ཆུ་ཡི་ཁམས་ཀྱི་དྭངས་བཅུད་བསྡུས༔ ཁྲག་གི་ཁམས་ནས་བླ་ཚེ་སྲོག་ཉམས་པ༔ སོར་ཆུད་གཤེར་བ་མེད་ལ་བརྟན་པར་མཛོད༔ ཧཱུྃ༔ ནུབ་ཀྱི་རུ་འདྲེན་འཁོར་དང་བཅས་པ་ཡིས༔ འབྱུང་བ་མེ་ཡི་ཁམས་ཀྱི་དྭངས་བཅུད་བསྡུས༔ དྲོད་ཀྱི་ཁམས་ནས་བླ་ཚེ་སྲོག་ཉམས་པ༔ སོར་ཆུད་ཚ་བ་མེད་ལ་བརྟན་པར་མཛོད༔ ཧཱུྃ༔ བྱང་གི་རུ་འདྲེན་འཁོར་དང་བཅས་པ་ཡིས༔ འབྱུང་བ་རླུང་གི་ཁམས་ཀྱི་དྭངས་བཅུད་བསྡུས༔ དབུགས་ཀྱི་ཁམས་ནས་བླ་ཚེ་སྲོག་ཉམས་པ༔ སོར་ཆུད་གཡོ་བ་མེད་ལ་བརྟན་པར་མཛོད༔ ཧཱུྃ༔ སྔོན་གྱི་ཤུལ་མཚོན་འཁོར་དང་བཅས་པ་ཡིས༔ འབྱུང་བ་ནམ་མཁའི་ཁམས་ཀྱི་དྭངས་བཅུད་བསྡུས༔ སེམས་ཀྱི་ཁམས་ནས་བླ་ཚེ་སྲོག་ཉམས་པ༔ སོར་ཆུད་ཁྱབ་པ་མེད་ལ་བརྟན་ཐོབ་མཛོད༔ ཛ༔ ཤར་དང་ཤར་ལྷོའི་འཁོར་དང་དཔུང་ཚོགས་ཀྱིས༔ དྲན་བྱེད་རླུང་ཁམས་བླ་ཚེ་ཡར་བ་ཀུན༔ ཐུགས་རྗེའི་ལྕགས་ཀྱུའི་མོད་ལ་དབང་བྱས་ནས༔ ཡེ་རླུང་མི་འགྱུར་གཉུག་མའི་ཚེ་མཆོག་སྩོལ༔ ཧཱུྃ༔ ལྷོ་དང་ལྷོ་ནུབ་འཁོར་དང་དཔུང་ཚོགས་ཀྱིས༔ བསྐྱེད་བྱེད་རླུང་ཁམས་བླ་ཚེ་ཡར་བ་ཀུན༔ ཐུགས་རྗེའི་ལྕགས་ཀྱུའི་མོད་ལ་དབང་བྱས་ནས༔ ཡེ་རླུང་མི་འགྱུར་གཉུག་མའི་ཚེ་མཆོག་སྩོལ༔ བྃ༔ ནུབ་དང་ནུབ་བྱང་འཁོར་དང་དཔུང་ཚོགས་ཀྱིས༔ ལོངས་སྤྱོད་རླུང་ཁམས་བླ་ཚེ་ཡར་བ་ཀུན༔ ཐུགས་རྗེའི་ལྕགས་ཀྱུའི་མོད་ལ་དབང་བྱས་ནས༔ ཡེ་རླུང་མི་འགྱུར་གཉུག་མའི་ཚེ་མཆོག་སྩོལ༔ ཧོ༔ བྱང་དང་བྱང་ཤར་འཁོར་དང་དཔུང་ཚོགས་ཀྱིས༔ བདེ་ཆེན་རླུང་ཁམས་བླ་ཚེ་ཡར་བ་ཀུན༔ ཐུགས་རྗེའི་ལྕགས་ཀྱུའི་མོད་ལ་དབང་བྱས་ནས༔ ཡེ་རླུང་མི་འགྱུར་གཉུག་མའི་ཚེ་མཆོག་སྩོལ༔ ཧཱུྃ༔ བཀའ་ཉན་ཡང་བྲན་བྱེད་བ་འབུམ་སྡེ་ཡིས༔ བདེ་སྐྱོངས་རླུང་ཁམས་བླ་ཚེ་ཡར་བ་ཀུན༔ ཐུགས་རྗེའི་ལྕགས་ཀྱུའི་མོད་ལ་དབང་བྱས་ནས༔ ཡེ་རླུང་མི་འགྱུར་གཉུག་མའི་ཚེ་མཆོག་སྩོལ༔ ཧཱུྃ༔ རང་བཞིན་ཤུགས་ཀྱིས་ཟད་པའི་ཚེ་སྲོག་ཁུག༔ གློ་བུར་རྐྱེན་གྱིས་ཡར་བའི་ཚེ་སྲོག་ཁུག༔ འབྱུང་བོའི་བརྐུས་དང་འཕྲོག་པའི་ཚེ་སྲོག་ཁུག༔ བྱད་བྱུར་གཏད་ཁྲམ་ཚུད་པའི་ཚེ་སྲོག་ཁུག༔ མི་མཐུན་ཚེ་ཡི་བར་ཆད་དབྱིངས་སུ་སོལ༔ ཚེ་བསོད་ཡེ་ཤེས་རྒྱས་པའི་ཕྲིན་ལས་མཛོད༔ ཨོཾ༔ ལུས་ནི་མཚན་དང་དཔེ་བྱད་ལྡན་ཞིང་བསྒྲེས་རྒུད་འདོར་ལེན་མེད་པ་རྟག་པའི་སྐུ་རུ་ཚེ་དབང་སྩོལ༔ ངག་གི་ཡན་ལག་དྲུག་ཅུའི་དབྱངས་ལྡན་རྫུན་ཕྲ་ཞེ་གཅོད་མེད་པ་འགགས་མེད་གསུང་དུ་ཚེ་དབང་སྩོལ༔ སེམས་ནི་སྟོབས་བཅུ་མི་འཇིགས་བཞི་ལྡན་མི་དགེ་ཉོན་མོངས་མེད་པ་འཁྲུལ་མེད་ཐུགས་སུ་ཚེ་དབང་སྩོལ༔ མགོན་པོ་མཆོག་ཁྱོད་ཡོན་ཏན་ཕྲིན་ལས་གསང་བ་ཡང་རྫོགས་གོ་འཕང་བླ་ན་མེད་པའི་ཚེ་དབང་སྩོལ༔ སྨོན་ལམ་བཀྲ་ཤིས་ཀྱིས་མཐའ་བརྒྱན་པར་བྱའོ༔ ཅེས་ཀྱང་འབྲོག་འཇིག་ཤེས་རབ་གཉིས་ཀྱི་ངོར་ག་གཱས་སོ། །ཧཱུྃ༔ སྔོན་གྱི་བསྐལ་བའི་དང་པོ་ལ༔ སྒྲོན་མ་མཆོག་གི་ཞིང་ཁམས་སུ༔ འཇིག་རྟེན་སྣང་བྱེད་འོད་ལྔ་བྱུང་༔ འབྲས་བུ་རྡོ་རྗེ་བཙུན་མོ་ལྔ༔ སྐྱེ་བ་མེད་ཅིང་འཆི་བ་མེད༔ ཆགས་སྡང་ཨ་འཐས་འཛིན་པ་ཡིས༔ ངན་ཞེན་འབྱུང་བ་ཆེན་པོ་ལྔ༔ སྐྱེ་དང་འཆི་བ་གཉིས་སུ་འབྱུང་༔ ཕྱི་ནང་རྒྱུ་དྲུག་འབྲས་དྲུག་འཁོར༔ གཟུགས་བརྙན་གྱིས་ནི་བརྟན་གཡོ་འབྱུུང་༔ ཕྲ་རཊ་རྒྱུན་དང་སྐད་ཅིག་གིས༔ མི་རྟག་འབྱུང་ཞིང་འཇིག་པ་སྲིད༔ དངོས་དང་གཟུགས་བརྙན་བཅོམ་ལྡན་འདས༔ དེ་བཞིན་ཉིད་དུ་རོ་གཅིག་ལས༔ རྒྱུན་གྱི་རྟགས་ ༼ རྟག་དཔྱད། ༽པ་ཆེན་པོར་སྲིད༔ སྲིད་པ་དེ་བཞིན་ཚེ་སྲོག་བརྟན༔ ཧཱུྃ༔ ཡང་ཅིག་ལྷན་སྐྱེས་ཞིང་ཁམས་སུ༔ བྱང་ཆུབ་སེམས་ཀྱི་ཁྱེའུ་ལྔ༔ ཕ་མེད་མ་མེད་རང་བྱུང་གྲུབ༔ སྐུ་ལ་རྡོ་རྗེའི་ཆོས་བདུན་ལྡན༔ ཐུགས་ལ་གཡུང་དྲུང་ཆོས་ཉིད་འཆང་༔ རྒྱལ་བུ་དེ་རྣམས་རྐང་འཁྱམས་པས༔ རང་ས་མ་ཟིན་ཀུན་འབྱུང་གིས༔ འཕོ་འཇིག་སྡུག་བསྔལ་བཟོད་མེད་མྱོང་༔ ཡེ་ནས་རྒྱལ་པོར་རང་གནས་པའི༔ བཙན་ས་ཟིན་དང་ཆབ་གཅིག་ཏུ༔ ཀུན་ལ་དབང་བསྒྱུར་དབང་ཕྱུག་ལ༔ འཇིགས་མེད་གདེངས་ཐོབ་ཚེ་སྲོག་རྟགས་ ༼ རྟག་དཔྱད། ༽༔མི་བདེན་བདེན་རྫུའི་སྟོབས་ཟད་དེ༔ བདེན་དོན་ཡང་དག་བདེན་པ་ཟབ༔ ཟབ་པའི་མཐུ་སྟོབས་བདེན་བདར་ཏེ༔ རྡོ་རྗེའི་ཚེ་སྲོག་འགུགས་པ་སྲིད༔ ཧཱུྃ༔ སྔོན་ཚེ་ཀུན་ཏུ་བཟང་པོ་ཡིས༔ སྐྱེ་འཆི་གཉིས་ཀྱི་སོ་མཚམས་ཟིན༔ འཆི་བདག་བདུད་ནི་བཅོམ་པ་དེའི༔ ངོ་བོ་ཉིད་རྟགས་ ༼ རྟག་དཔྱད། ༽ཚེ་མཆོག་གྲུབ༔ བཅོམ་ལྡན་རྒྱལ་བ་རིགས་ལྔ་ཡིས༔ ཕྱག་རྒྱ་ལྔ་ཡི་དཀྱིལ་འཁོར་དུ༔ བདུད་བཞི་བཅོམ་ནས་སྐྱེ་བཞི་བཅད༔ རྒྱུན་གྱི་རྟགས་ ༼ རྟག་དཔྱད། ༽ པའི་ཚེ་མཆོག་གྲུབ༔ བསྐལ་བཟང་སངས་རྒྱས་སྟོང་རྩ་ཡིས༔ སྒྲོན་མ་བཀོད་པའི་ཞིང་ཁམས་སུ༔ སྐྱེ་དང་འཆི་བར་བསྟན་དུས་ནས༔ སྐྱེ་འཆི་མེད་པའི་ཚེ་མཆོག་འགྲུབ༔ དེ་ནས་ཚེ་བསྒྲུབ་གར་སྲིད་ན༔ རྒྱལ་བོ་ཆེན་པོ་ཡུལ་འཁོར་བསྲུངས༔ གནས་པའི་འདུ་བྱེད་ཟད་པ་ལ༔ སྔགས་འཆང་ནུས་ལྡན་རྡོ་རྗེ་ཡིས༔ ཚེ་ཡི་དཀྱིལ་འཁོར་ཞལ་ཕྱེས་ནས༔ དྲུག་སྟོང་བཞུགས་པའི་ཚེ་མཆོག་གྲུབ༔ ལྷ་ཡི་རྒྱལ་བོར་ང་ལས་ནུའི༔ བསྒྲོན་བྱེད་སྔ་ལྟས་མཐོང་བ་ན༔ རིག་སྔགས་འཆང་བ་སེམས་ལྷག་ཅན༔ སྤྱན་དྲངས་རྡོ་རྗེའི་ཚེ་མཆོག་བསྒྲུབ༔ སླར་ཡང་བརྒྱ་བྱིན་སོ་གཉིས་ཀྱི༔ སྲིད་དུ་ཚེ་ལ་བྱིན་གྱིས་བརླབས༔ ཨོ་རྒྱན་པདྨ་འབྱུང་གནས་དང་༔ ལྷ་ལྕམ་མནྡྷ་ར་བ་ཡིས༔ ཚེ་ཡི་དཀྱིལ་འཁོར་ཞལ་ཡང་ཕྱེས༔ རྡོ་རྗེའི་ཚེ་མཆོག་བསྒྲུབ་པ་ན༔ ཚེ་དཔག་མེད་པ་དངོས་སུ་བྱོན༔ བསྐལ་བར་བཞུགས་པའི་ཚེ་མཆོག་གྲུབ༔ དེ་བཞིན་རྣལ་འབྱོར་བདག་གིས་ཀྱང་༔ ཡེ་ཤེས་འཇིག་རྟེན་སྣ་ཚོགས་ཚུལ༔ ཚེ་ཡི་དཀྱིལ་འཁོར་ཞལ་ཕྱེས་ཏེ༔ རྡོ་རྗེ་ལྟ་བུའི་ཚེ་བསྒྲུབ་ཀྱི༔ མཆོག་དང་ཐུན་མོང་རྣམ་གཉིས་ཀྱིས༔ ཚེ་དབང་རིག་འཛིན་ཆེན་པོར་ཟུངས༔ ཅེས་ཚེ་མཆོག་བསྒྲུབ་པའི་སྔོན་བྱུུང་གི་རབས་འདི་ཡང་བརྡ་ཆད་དུ་སོང་བས་སླར་ཡང་ཁ་བསྐང་བའོ། །ཀྱཻ༔ ཁྱད་པར་སྙིགས་མའི་ཡང་སོགས།