ཚོགས་མཆོད་བསོད་ནམས་མཆོག་སྟེར།

ཡིད་བཞིན་དབང་གི་རྒྱལ་པོ་ཡི༔ ཚོགས་མཆོད་བསོད་ནམས་མཆོག་སྟེར་བཞུགས་སོ༔

བརྡ་ཡིག །ཧྱ་གྷྲི་ཝ་ལ་ན་མོ༔ ཡིད་བཞིན་དབང་གི་རྒྱལ་པོ་ཡི༔ ལས་བྱང་མཇུག་གི་རིམ་པ་ནི༔ ཚོགས་བསྐུལ་ཆད་བསྟན་རོལ་བའི་བྲོ༔ དངོས་གྲུབ་བཟོད་གསོལ་བསྡུ་ལྡང་བསྔོ༔ བཀྲ་ཤིས་ལ་སོགས་བཅུ་ཡིས་བསྟན༔ ས་མ་ཡཱ༔ དང་པོ༔ ཡོ་བྱད་བཟང་དགུ་ཚོགས་སུ་བཤམས༔ སྔགས་དང་ཕྱག་རྒྱས་བྱིན་རླབས་ཏེ༔ ཧཱུྃ་ཧྲཱི༔ མི་དམིགས་སྒྱུ་འཕྲུལ་མཉམ་པའི་དབྱིངས༔ མཐའ་ཡས་ཀུན་ནས་གཟུགས་སྐུར་བཞེངས༔བླ་མ་ཡི་དམ་མཁའ་འགྲོ་དང་༔ ཆོས་སྐྱོང་འདུས་པ་ཟླ་བའི་དབང་༔ འཁོར་བཅས་ཚོགས་ལ་སྤྱན་འདྲེན་ནོ༔ ཨོཾ་གུ་རུདྷེ་ཝ་དྷཱ་ཀི་ནི་དྷརྨཱ་པཱ་ལ་རཱ་ཙ་ཙནྡྲ་སརྦ་ས་མ་ཡ་ཧྲིང་ཧྲིང་ཛ་ཛ༔ ཏིཥྛ་སིདྡྷི་ཧཱུྃ༔ ཧཱུྃ་ཧྲཱི༔ དངོས་འབྱོར་ཡིད་སྤྲུལ་བླ་ན་མེད༔ ཀུན་བཟང་ཟག་པ་མེད་པ་ཡི༔ མཆོད་སྤྲིན་ནམ་མཁའ་གང་བ་འདིས༔ དཀོན་མཆོག་རྩ་གསུམ་ཆོས་སྐྱོང་དང་༔ ཕྱོགས་སྐྱོང་ནོར་ལྷ་ཀུན་གྱི་བདག༔ ཡིད་བཞིན་དབང་གི་རྒྱལ་པོ་ཡི༔ ཐུགས་དམ་གཉན་པོ་དེས་བསྐང་ལ༔ གང་འདོད་དབྱིག་གི་ཆར་ཕོབ་ཅིག༔ ཨོཾ་སརྦ་ཙནྡྲ་ག་ཎ་ཙཀྲ་ཧོ༔ ཧཱུྃ་ཧྲཱི༔ རྩ་བ་སྐུ་གསུང་ཐུགས་མཆོག་དང་༔ ཡན་ལག་དམ་ཚིག་ཉི་ཤུ་ལྔ༔ གཞན་ཡང་མ་རིག་རྐྱེན་དབང་གིས༔ སྡོམ་དང་བསླབས་བྱ་དམ་ཚིག་གང་༔ འགལ་བ་ཅི་མཆིས་བཤགས་པར་བགྱི༔ བཛྲ་ས་མ་ཡ་ཨཱ༔ ཧཱུྃ་ཧྲཱི༔ གཉིས་འཛིན་འཁྲུལ་བ་ལས་ཤར་བའི༔ དགྲ་བགེགས་རང་བཞིན་གང་ལགས་པ༔ དེ་ཀུན་ཆོས་ཀྱི་དབྱིངས་སུ་སྒྲོལ༔ ཡེ་ཤེས་དག་པ་མཐར་ཐུག་པའི༔ ཞལ་གྱི་ཧོམ་དུ་དགྱེས་པར་རོལ༔ ནྲ་ཏྲི་མཱ་ར་ཡ་རྦད༔ ཧ་ལ་པཉྩ་ཨ་མྲ་ཏ་ཁ་རཾ་ཁཱ་ཧི་ཧོ༔ ཧཱུྃ་ཧྲཱི༔ དཔལ་གྱི་བཀའ་བཞིན་ལས་ཀྱི་བདག༔ འཇིག་རྟེན་དྲེགས་པའི་སྡེ་ཚོགས་ཀྱིས༔ དམ་རྫས་འདི་ལོངས་ཕྲིན་ལས་བཞི༔ དམ་བཅའ་བཞིན་དུ་སྒྲུབ་པར་མཛོད༔ ཨོཾ་ཨུ་ཙྪིཥྚ་ཧོ༔ བྷ་ལིངྟ་ཁཱ་ཧི༔ གཉིས་པ་ནི༔ ཧཱུྃ་ཧྲཱི༔ བསྐུལ་ལོ་དྲག་པོའི་ཐུཊ་དམ་བསྐུལ༔ མ་གཡེལ་མ་འགྱང་དབྱིངས་ནས་བསྐྱོད༔ དམར་གྱི་གཏོར་མ་འདི་རོལ་ལ༔ དམ་ཉམས་དགྲ་བགེགས་བྱད་མ་རྣམས༔ མིང་ཙམ་མེད་པར་རྡུལ་དུ་རློག༔ ནྲཿཏྲིཿ མཱ་ར་ཡ་རྦད་ཛ༔ རྦད་ཆོམ༔ བྷྱོ་བཟློག༔ རུ་ལུ་རུ་ལུ་ཧཱུྃ་ཕཊ༔ གསུམ་པ་ནི༔ ཧཱུྃ་ཧྲཱི༔ སྔོན་ཚེ་ཀུན་བཟང་རྟ་མཆོག་རོལ་བ་དང་༔ རིག་འཛིན་བརྒྱུད་པའི་བཀའ་དམ་གཉན་པོ་རྣམས༔ ཚུལ་བཞིན་བསྒྲུབ་པའི་ཆད་མདོ་མ་གཡེལ་ན༔ རྣལ་འབྱོར་བདག་ཀྱང་དམ་ཚིག་གཅིག་གིས་འབྲེལ༔ དེ་ཕྱིར་དམ་རྫས་བརྒྱན་གྱི་མཆོད་གཏོར་འབུལ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ ས་མ་ཡ་ཨི་ཏན་ན་ར་ཀན༔ བཛྲ་ས་མ་ཡ་སྟྭཾ༔ བཞི་པ་ནི༔ ཧཱུྃ་ཧྲཱི༔ རྒྱལ་ཀུན་འདུས་པ་རྔ་ཡབ་གླིང་བ་པད་འབྱུང་གི༔ སྤྱན་སྔར་དམ་མནོས་བསྟན་སྐྱོང་བོད་ཁམས་སྲུང་མའི་ཚོགས༔ མ་ལུས་འདིར་བྱོན་རྒྱན་གྱི་གཏོར་མ་འདི་བཞེས་ལ༔ གཡར་དམ་གཉན་བསྐང་བཅོལ་བའི་ཕྲིན་ལས་འགྲུབ་པར་མཛོད༔ མ་མ་སརྦ་ཧྲིཾ་ཧྲིཾ་བྷ་ལིངྟ་ཁཱ་ཧི༔ ཡ་ཧི་གཙྪ༔ ལྔ་པ་ནི༔ ཧཱུྃ་ཧྲཱི༔དཔལ་གྱི་རྟ་སྐད་རྔམ་པར་སྒྲ་ཆེན་དང་༔ ཁྲོ་བོ་ཀུན་གྱི་གླུ་བྲོ་ཆེན་པོ་ཡིས༔ གནོད་བྱེད་དམ་སྲི་ཕྱེ་མ་རྡུལ་བཞིན་བརླགས༔ བྱང་ཆུབ་བར་དུ་ལྡང་བར་མ་གྱུར་ཅིག༔ ཨོཾ་ཧྱ་གྷྲི་ཝ་རུ་ལུ་རུ་ལུ་ཧཱུྃ་བྷྱོ་ཧཱུྃ་ཕཊ༔ ཧྲཱི་ཧྲཱི་ཧྲཱི༔ ཕཊ་ཕཊ་ཕཊ༔ གནོད་པར་བྱེད་པ་སྟྭཾ་བྷ་ཡ་ནན༔ དྲུག་པ་ནི༔ ཧཱུྃ་ཧྲཱི༔ རྩ་གསུམ་འདུས་པ་ཡིད་བཞིན་དབང་གི་རྒྱལ༔ ཁྱེད་ཀྱི་དགྱེས་པའི་ཞལ་བཟང་དམ་པ་ཉིད༔ ད་ལྟ་བསྒྲུབ་བརྩོན་རྣལ་འབྱོར་བདག་ལ་གཟིགས༔ དངོས་གྲུབ་དམ་པ་མྱུར་བའི་ཤུགས་ཀྱིས་སྩོལ༔ ཨོཾ་རཱ་ཙ་ཙནྡྲ་སརྦ་སིདྡྷི་ཧཱུྃ་ཧཱུྃ༔ བདུན་པ་ནི༔ ཧཱུྃ་ཧྲཱི༔ དགོངས་ཤིག་དཀྱིལ་འཁོར་མ་ལུས་དགོངས༔ དེང་གི་རྣལ་འབྱོར་སྒྲུབ་པ་པོས༔ མ་འབྱོར་བ་དང་མ་དག་དང་༔ སྤང་ལེན་ཐེ་ཚོམ་འགལ་འཁྲུལ་ཀུན༔ གནོང་འགྱོད་དབང་གིས་མཐོལ་བཤགས་འབུལ༔ དག་ཚངས་དངོས་གྲུབ་སྩོལ་བ་དང་༔ རྟག་ཏུ་མི་འབྲལ་བུ་བཞིན་སྐྱོང་༔ ཧེ་རུ་ཀ་ས་མ་ཡ་ས་ཏྭ་ཨཱ༔ ཏིཥྛ་སིདྡྷི་ཕ་ལ་ཧཱུྃ༔ བརྒྱད་པ་ནི༔ ཧཱུྃ་ཧྲཱི༔ དམ་ཡེ་འཛིན་པ་དབྱིངས་སུ་དག༔ དམིགས་མེད་སྤྲོས་བྲལ་རྗེན་པར་ཡན༔ ཨ་ཨ་ཨཱ༔ རྗེས་ཐོབ་ལྷར་སྣང་ཕྱག་རྒྱ་ཆེ༔ ཕྲིན་ལས་འགྲོ་བའི་དོན་དུ་ཤར༔ ཧཱུྃ་ཧཱུྃ་ཧཱུྃ༔ དགུ་བ་ནི༔ ཧཱུྃ་ཧྲཱི༔ འདིས་མཚོན་དམིགས་བཅས་དམིགས་པ་མེད༔ ཡེ་ཤེས་ཚོགས་ཆེན་གང་ལགས་པ༔ དེ་ཀུན་མཁའ་ཁྱབ་འགྲོ་ལ་བསྔོ༔ ཀུན་ཀྱང་གདོད་མའི་སར་ཕྱིན་ཤོག༔ བཅུ་བ་ནི༔ ཧཱུྃ་ཧྲཱི༔ བླ་མ་རྣམས་ཀྱི་བཀྲ་ཤིས་ཤོག༔ ཡི་དམ་ལྷ་ཚོགས་བཀྲ་ཤིས་ཤོག༔ དཔའ་བོ་མཁའ་འགྲོའི་བཀྲ་ཤིས་ཤོག༔ ཆོས་སྐྱོང་སྲུང་མའི་བཀྲ་ཤིས་ཤོག༔ དུས་གསུམ་དགེ་བའི་བཀྲ་ཤིས་ཤོག༔ དམ་གཙང་རྡོ་རྗེའི་བཀྲ་ཤིས་ཤོག༔ འོད་གསལ་ལྷུན་གྲུབ་བཀྲ་ཤིས་ཤོག༔ སྐུ་གསུམ་གང་འདུལ་རོལ་བའི་བཀྲ་ཤིས་ཤོག༔ ས་མ་ཡཱ༔ གང་འདི་སྙིགས་མའི་མཐར་ཐུག་ལ༔ ལས་འབྲས་ཁྱད་དུ་གསོད་པ་དང་༔ རྟག་ཆད་ལྟ་བ་མཐར་ཞེན་དང་༔ འབྱུང་བོའི་ཡུལ་ཁམས་དཀྲུགས་པའི་དུས༔ རྒྱལ་བའི་ཕྲིན་ལས་གང་འདུལ་དུ༔ ཡོངས་ཤར་ཡིད་བཞིན་དབང་གི་རྒྱལ༔ འཇིག་རྟེན་དྲེགས་པའི་སྐུ་རུ་བཞེངས༔ དེ་ཉིད་སྒྲུབ་པའི་རིམ་པ་ཡང་༔ མང་ནའང་འདི་རུ་ཐམས་ཅད་འདུས༔ ཁྲག་འཐུང་ནམ་མཁའི་རྡོ་རྗེ་ཡིས༔ གང་ཤར་བརྡ་ལ་བཅོས་བསྒྱུར་མེད༔ སྙན་སྙན་ཚིག་གི་སྤྲོས་པ་མེད༔ དེ་ཕྱིར་གསང་བའི་གནད་གཟེར་ཡིན༔ ཕྲིན་ལས་འོད་ཆེན་སྟོང་འབར་ཤོག༔ སརྦ་མངྒ་ལཾ༔ ཡི་གེ་པ་ནི་བསྟན་འཛིན་རྣམ་པར་རྒྱལ་བའོ། །