དཀོར་བསྲུང་གཡང་སྒྲུབ་ཕྱག་ལེན་ལ་ཡི་དམ།
དཀོར་བསྲུང་གཡང་སྒྲུབ་ཕྱག་ལེན་ལ་ཡི་དམ་ནི། ཧཱུྃ༔ རང་ཉིད་པདྨ་ཐོད་ཕྲེང་རྩལ༔ སོགས་ལས་གཞུང་ཆེ་ཆུང་གང་རུང་གི་བསྙེན་མཐར་ཕྲིན་བཅོལ་འདོད་འཇོའི་དཔལ་སྟེར་ལས་ཁྱད་པར་མདུན་བསྐྱེད་ནས་དབང་སྔགས་ཅུང་ཟད་བཟླའོ། །གཡང་བསྒྲུབ་ལས་བདག་མདུན་གཙོ་བོའི་སོགས་ནས་ཝ་ཤཾ་ཀུ་རུ་ཧོས་བར་ཅི་ནུས་བཟླས། དེ་ནས་རྦད་བསད་སྔགས་ལན་གསུམ་རེའི་མཐར་མཆོད་བསྟོད་རྒྱས་བསྡུས་གང་འཚལ་བྱ། དེ་ནས་གསོལ་མཆོད་ནི། བདག་ཉིད་ཡི་དམ་གྱི ༴ ཨ་ཀ་རོ་དང་མཛོད་སྔགས་བརྗོད་ལ། ཙ༔ འདི་ནས་ནུབ་ཀྱི་སོགས་དང་། དཀོར་བསྲུང་ཙན ༴ དཀོར་སྲུང་ཆེན་པོ་ཟླ་བ་ཡི༔ སོགས་གསོལ་མཆོད་རྒྱས་བསྡུས་གང་རིགས་འདོན་ལ་ཚོགས་མ་བཏོན་ཚེ་བསྐང་ཆེན་བར་འདིར་འདོན་ཡང་ཕྲིན་བཅོལ་རིགས་གང་མོས་བྱས་ལ། སྐབས་འདིར་ཚོགས་རྒྱས་བསྡུས་གང་མོས་མཐར་ཟ་ངུ་གྲངས་མང་བརྗོད་ཀྱང་འགལ་བ་མེད་དེ་ནས་འཁྲུགས་བསྐང་སོགས་བཤགས་པ་རྒྱས་བསྡུས་མཐར། ཚོགས་གང་འོས་ཀྱི་ལྷག་མའི་མགོར་མངའ་གསོལ་ཆུང་འབྲིང་འདོན། དེ་ནས་དགུགས་གཞུགས་འགོང་བཀར་རྒབ་འདྲེ་མནན་པ་བསྲུང་འཁོར་བཅས་མཐར། བསང་དང་བསང་ཁྲུས་བྱེད་པ་རྣམས་དང་སྔགས་དྲུག་ཕྱག་དྲུག་མཐར། རཾ་ཡཾ་ཁཾ་སྟོང་བའི་ངང་ལས་སོགས། སྐབས་འདིར་གཡང་གི་བྱིན་འབེབས་དང་། དེ་ནས་གཡང་རྫས་ལྷར་བསྐྱེད། གཏོར་འབུལ་ཡན་རྫོགས་ནས། གཞུང་གི་མཆོད་བསྟོད་བྱས་མཐར། ཕྲིན་མཅོལ་མཐའི་དབང་སྔགས་དང་། གཡང་སྒྲུབ་འགོའི་དབང་སྔགས་བཟླས་མཐར། དབང་འགུགས་དབང་བསྐུལ་བཅས་མཐར། གཡང་རབས་གཡང་འགུགས་ཝ་ཤཾ་ཀུ་རུ་ཡེ་སྭཱ་ཧཱ། གྲངས་བསོགས་ནི༔ ཀྱཻཿ མཁྱེན་བརྩེ་ནུས་པའི་ནས་བཟུང་སྟེ་འདིའི་བར་གཡང་འགུགས་བསྡུས་པ་བསག་གོ །མཐར་གཡང་གཏད་རྗེས་སུ་རྟེན་བཞུགས་ཀྱི་གཡང་སྒོ་འདིར་བསྡམས། དེ་ནས་ལྷག་ཆོག་སོགས་ཀྱིས་མཐའ་བསྐྱང་ཀྱང་ཆོག གོ་རིམ་བཞིན་བཏོན་ནས་ཚོགས་ཀྱི་གཤེགས་གསོལ་འགོར་ཡང་གཡང་བརྟེན་པར་བྱ་བས་གཡང་སྒོ་བསྡམ་ཀྱང་ཆོག ཡང་གཡང་གཏད་འགོར་ཚོགས་ལ་རོལ། ལྷག་མ་བསྐུལ་བ་ཆད་བརྟན་རྟ་བྲོ་ཡན་བྱས་ལ། མཆོད་བསྟོད་ཀྱི་མཐར་དངོས་གྲུབ་བླངས་ལ། མངའ་གསོལ་རྒྱས་པ་དང་བཤགས་པའི་མཐར། དཀྱིལ་འཁོར་བསྡུ་བའི་འགོར། གཡང་གཏད་དང་གཡང་སྒོ་བསྡམས་པའི་རྟེན་བཞུགས་བྱས་ལ། བཀྲ་ཤིས་རྒྱས་བསྡུས་བཅས་བྱས་ལ། བསྡུ་ལྡང་དང་གཞུང་གི་བཀྲ་ཤིས་ཀྱིས་མཐའ་བརྒྱན་པར་བྱའོ། །ཡང་གཡང་བསྒྲུབ་རྐྱང་བ་ལ་བཏགས་བསམ་ན། འདོན་ལུགས་གཞན་འདི་ལྟར་ཡོད་དེ། ཡི་དམ་བསྐྱེད་རྗེས་འགོང་བོ་བཀར་མཚམས་གཅོད་བར་བྱས་ལ། གཡང་རྫས་བྱིན་རླབས། གཡང་རྫས་ལྷ་བསྐྱེད་གཏོར་འབུལ་ཡན་བྱས་ལ། གཏོར་འབུལ་གྱི་མཐར། སྤྲོ་ན་གསོལ་མཆོད་ཕྲིན་བཅོལ་ཚོགས་ལྷག་ཡན་ཆད་བྱ། དེ་ནས་བསྟོད་པ་དང་མངའ་གསོལ་བྱས་ལ། འགུགས་གཞུགས་དབང་བསྐུལ། གཡང་རབས་གཡང་འགུགས་མཐར་ལྷག་བསྐུལ་ཆད་བརྟན་བྲོ་མཆོད་བསྟོད་དངོས་གྲུབ་བཤགས་པའི་མཐར་གཡང་གཏད་བརྟན་བཞུགས་བསྡུ་ལྡང་བཀྲ་ཤིས་རྒྱས་བསྡུས་ཀྱིས་མཐའ་བརྒྱན་ཀྱང་ཆོག སྨད་ལས་བཏོན་ན་ཚོགས་བསྒྲལ་ལ་བཏགས། དགྲ་མནན་བྲོ་མནན་འགོར་བཏགས་པ་སོགས་དབང་དྲག་གཞུང་སྦྲེལ་ཀྱང་ཆོག དགྲ་ཆོས་བྱེད་ན་ཚོགས་བསྐུལ་མཐར་བྱེད། རྣལ་འབྱོར་བ་ཇི་སྲིད་འཚོའི་བར་དུ་བསྡུ་ལྡང་མ་བྱས་ཀྱང་རུང་ངོ་། །དུས་ཕྱིས་གཡང་བསྒྲུབ་བྱ་ན་གཡང་བསང་གི་མཐར་གཡང་སྒོ་ཕྱེ་བས་གཡང་སྒྱེ་ཁ་བཤིགས་དགོས་ཀྱི་རང་གར་མ་ཡིན་ནོ། །ལར་གསོལ་མཆོད་ལ་གཡང་འགུགས་རེ་རྒྱུན་དུ་བཏགས་ཀྱང་རབ་ཏུ་མཐོང་ངོ་། །ཕྱག་བཞེས་ལ་འདི་ཞེས་མཐའ་གཅིག་ཏུ་ཨ་མཐས་མ་བྱས་ཀྱང་གང་རུང་རུང་གིས་ཆོག་ལགས། ཨ་ཡེ་དེང་སངས་དུས་ཀྱི་ཐ་མ་ལ། །ས་དགེ་གསར་རྙིང་ལ་གྲགས་པའི། །རྒྱུད་སྡེ་བཞི་དྲུག་ཡི་དམ་ལྷ། །ངོ་བོ་གཅིག་ཏུ་གནས་པ་དང་། །རྒྱལ་བའི་བཀའ་རུ་མ་ཤེས་པས། །ལྷ་ཁ་འགྲིགས་དང་མི་འགྲིགས་ཟེར། །ཆོས་ཕུང་བརྒྱད་ཁྲི་བཞི་སྟོང་ལས། །བཟང་ངན་ཆོས་སྤངས་མཐོལ་ལོ་བཤགས། །སློབ་དཔོན་སྲུང་མ་སློབ་མས་སྤངས། །བཀའ་དྲིན་ཐོབ་འཕྲལ་བླ་མ་ལ། །ཕར་འཁོར་རྗེས་ནས་དུད་མོ་ལྡིར། །གྲོགས་མཆེད་མི་བརྩི་དགྲ་ལྟར་བྱེད། །གདམ་ངག་མི་བསྒོམ་ཆོས་བརྒྱད་ལེན། །ཤི་བརྡོའི་གསོན་བརྡོའི་ཐུགས་དམ་ཅན། །ལྟར་སྣང་གཏན་ཚིགས་རེ་འགའ་བས། །སྒྲོ་བསྐུར་ལས་ངན་བསགས་པ་ཡིས། །མིག་གི་ལིང་ཐོག་གྱུར་བའང་། །བསྲུང་མ་འདི་ཡིས་ལན་པ་མིན། །དེ་ཕྱིར་སྔོན་བྱོན་དམ་པ་ཚོས། །འདི་ལ་ལེའུ་ལྷར་མཛད་པ་ཡིན། །ཅེས་ཀྱང་འཇིག་དགས་བསྐུལ་ངོར་སྔགས་འཆང་ག་གཱ་ཨ་བྷྱེས་སོ། །བཀྲ་ཤིས་པར་གྱུར་ཅིག །དགེའོ། །དགེའོ། །དགེའོ། །