སྔགས་སྲུང་བ་ཤ་ཟ་ཧོར་མོའི་བདེན་སྨོན་དཔང་རྒྱའི་བསྒྲུབ་པ་ཤེལ་གྱི་ཟ་མ་ཏོག

ཡེ་ཤེས་སྒྱུ་འཕྲུལ་དྲྭ་བ་ལས༔ སྔགས་སྲུང་བ་ཤ་ཟ་ཧོར་མོའི་བདེན་སྨོན་དཔང་རྒྱའི་བསྒྲུབ་པ་ཤེལ་གྱི་ཟ་མ་ཏོག་བཞུགས་སོ༔

བརྡ་ཡིག །ན་མོ་གུ་རུ་པདྨ་ཀཱ་ར་ཡེ༔ ཀྱཻ༔ གསང་སྔགས་གྲུབ་པའི་ལྷ་རྗེ་མོ༔ འགྲོ་བ་ཡོངས་ལ་ཕན་པའི་ཕྱིར༔ རྣམ་པར་གཟིགས་དང་གསེར་ཐུབ་མགོན༔ འོད་སྲུང་ཤཱཀྱ་ཐུབ་པའི་དྲུང་༔ ལན་གཅིག་ཙམ་ཞིག་མ་ལགས་པར༔ བྱང་ཆུབ་སེམས་བསྐྱེད་དུས་སྨིན་ནས༔ ལྷ་ཡི་ཡུལ་དུ་ཚིག་གཅིག་བདག༔ བདེ་ཆེན་ལྷ་མོ་ཙནྚི་ཀ༔ དམ་ཚིག་ལོ་མ་གྱོན་མ་སྟེ༔ ཨུ་མ་དཱེ་ཝའི་སྲས་མོ་ཆེ༔ ཀླུ་ཡི་ཡུལ་དུ་ཤ་ཟ་མོ༔ ཧོར་མོ་སྤུན་དགུ་ཞེས་སུ་བྱ༔ ཁྱོད་ཀྱི་དགོངས་གཞི་ཅི་ཡིན་ན༔ སངས་རྒྱས་བསྟན་པ་བསྲུང་བ་དང་༔ སེམས་ཅན་བདེ་སྐྱེད་སྤེལ་བ་དང་༔ བསྟན་འཛིན་མགོན་བཙུན་མཛད་པ་དང་༔ དགྲ་བགེགས་རྡུལ་དུ་བརླག་པ་དང་༔ ལེགས་ཉེས་གཉིས་ཀྱི་སྟངས་འཛིན་ཅིང་༔ དམ་ཚིག་གཉན་པོ་རྗེས་གཅོད་དང་༔ ཆོས་འཁོར་བསྲུང་བ་དེ་མིན་ནམ༔ དེ་བས་ལྷ་ཁྱོད་མ་གཡེལ་བར༔ ད་ལྟ་ཉིད་དུ་རང་གཟུགས་སྟོན༔ ཁྱོད་དང་རྣལ་འབྱོར་བདག་ཉིད་གཉིས༔ མི་དང་མི་ལབ་ཇི་བཞིན་དུ༔ ལས་མྱུར་སྙིང་ཉེ་གདུག་རྩུབ་སྤོངས༔ ཀྱཻ༔ སངས་རྒྱས་སྤྱན་སྔར་དངོས་བཞུགས་ནས༔ མདོངས་གསོལ་སྲོག་གི་སྙིང་པོ་ཕུལ༔ བདེན་པ་དེ་ཡིས་ལྷ་མོ་ཁྱོད༔ ཆུད་མི་ཟ་བ་ཚིག་སྡོམ་གྱིས༔ ད་ལྟ་ཉིད་དུ་རང་གཟུགས་སྟོན༔ ཁྱོད་དང་རྣལ་འབྱོར་བདག་ཉིད་གཉིས༔ མི་དང་མི་ལབ་ཇི་བཞིན་དུ༔ ལས་མྱུར་སྙིང་ཉེ་གདུག་རྩུབ་སྤོངས༔ ཀྱཻ༔ ཡི་དམ་རྡོ་རྗེ་གོས་སྔོན་ཅན༔ ཁྱོད་ཀྱི་དངོས་པོའི་བཤེས་གཉེན་ཏེ༔ མཚན་གསོལ་དབང་བསྐུར་འདོད་པ་བསྒྲུབ༔ དམ་ཚིག་དབང་སྐལ་གཉེར་བསྒྲགས་པས༔ ད་ལྟ་ཉིད་དུ་རང་གཟུགས་སྟོན༔ ཁྱོད་དང་རྣལ་འབྱོར་བདག་ཉིད་གཉིས༔ མི་དང་མི་ལབ་ཇི་བཞིན་དུ༔ ལས་མྱུར་སྙིང་ཉེ་གདུག་རྩུབ་སྤོངས༔ ཀྱཻ༔ ལྷ་ཆེན་དབང་ཕྱུག་ཆེན་པོ་ནི༔ བཀའ་བཙན་ཡབ་ཀྱི་རུས་ཡིན་པས༔ མཚང་ནས་བཟུང་བ་འདི་ཉིད་པས༔ བདེན་པ་ཆེན་པོའི་མཐུ་བྱིན་གྱིས༔ ད་ལྟ་ཉིད་དུ་རང་གཟུགས་སྟོན༔ ཁྱོད་དང་རྣལ་འབྱོར་བདག་ཉིད་གཉིས༔མི་དང་མི་ལབ་ཇི་བཞིན་དུ༔ ལས་མྱུར་སྙིང་ཉེ་གདུག་རྩུབ་སྤོངས༔ ཀྱཻ༔ དབྱིངས་ཀྱི་རྗེ་མོ་ཨེ་ཀ་ཛ༔ ཁྱོད་ཀྱི་ཡི་དམ་ལྷ་ཡིན་པས༔ བསྒྲུབ་བརྟེན་མཆེད་གྱུར་སྲོག་གཏའ་ཡིས༔ བདེན་པ་ཆེན་པོའི་མཐུ་བྱིན་གྱིས༔ད་ལྟ་ཉིད་དུ་རང་གཟུགས་སྟོན༔ ཁྱོད་དང་རྣལ་འབྱོར་བདག་ཉིད་གཉིས༔མི་དང་མི་ལབ་ཇི་བཞིན་དུ༔ ལས་མྱུར་སྙིང་ཉེ་གདུག་རྩུབ་སྤོངས༔ ཀྱཻ༔ སངས་རྒྱས་ཤཱཀྱ་ཐུབ་པ་ནི༔ ཁྱོད་ཉིད་དབུགས་དབྱུང་མགོན་ཡིན་པས༔ བསྟན་པ་གཅིག་གིས་བསྡུས་པའི་ཕྱིར༔ བདེན་པ་ཆེན་པོའི་མཐུ་བྱིན་གྱིས༔ ད་ལྟ་ཉིད་དུ་རང་གཟུགས་སྟོན༔ ཁྱོད་དང་རྣལ་འབྱོར་བདག་ཉིད་གཉིས༔མི་དང་མི་ལབ་ཇི་བཞིན་དུ༔ ལས་མྱུར་སྙིང་ཉེ་གདུག་རྩུབ་སྤོངས༔ ཀྱཻ༔ འདོད་པ་ཁམས་སུ་དབང་ཕྱུག་ཆེ༔ དེ་ནི་ཐུགས་བསྐྱེད་ཡུལ་ཡིན་པས༔ སྐྱེ་གནས་གྲྭལ་བཞུགས་གཅིག་པའི་ཕྱིར༔ བདེན་པ་ཆེན་པོའི་མཐུ་བྱིན་གྱིས༔ ད་ལྟ་ཉིད་དུ་རང་གཟུགས་སྟོན༔ ཁྱོད་དང་རྣལ་འབྱོར་བདག་ཉིད་གཉིས༔མི་དང་མི་ལབ་ཇི་བཞིན་དུ༔ ལས་མྱུར་སྙིང་ཉེ་གདུག་རྩུབ་སྤོངས༔ ཀྱཻ༔ བལ་བོད་ཡུལ་གྱི་གྲྭལ་སླེབས་སུ༔ མཐུ་སྟོབས་རང་གཟུགས་བསྟན་པའི་ཕྱིར༔ ཨོ་རྒྱན་པདྨ་འབྱུང་གནས་ནི༔ ཁྱོད་གྱི་བརྡ་བསྟན་གྲོགས་ཡིན་པས༔ བདེན་པ་ཆེན་པོའི་མཐུ་བྱིན་གྱིས༔ ད་ལྟ་ཉིད་དུ་རང་གཟུགས་སྟོན༔ ཁྱོད་དང་རྣལ་འབྱོར་བདག་ཉིད་གཉིས༔མི་དང་མི་ལབ་ཇི་བཞིན་དུ༔ ལས་མྱུར་སྙིང་ཉེ་གདུག་རྩུབ་སྤོངས༔ སླར་ཡང་རྡོ་བོད་མཚམས་ཤེད་ན༔ ཆེ་མཆོག་བདུད་འཇོམས་རྡོ་རྗེ་ནི༔ ཁྱོད་ཀྱི་མཛའ་གཅུགས་ཟླ་ཡིན་པས༔ བདེན་པ་ཆེན་པོའི་མཐུ་བྱིན་གྱིས༔ ད་ལྟ་ཉིད་དུ་རང་གཟུགས་སྟོན༔ ཁྱོད་དང་རྣལ་འབྱོར་བདག་ཉིད་གཉིས༔མི་དང་མི་ལབ་ཇི་བཞིན་དུ༔ ལས་མྱུར་སྙིང་ཉེ་གདུག་རྩུབ་སྤོངས༔ ཀྱཻ༔རིག་འཛིན་བསྒྲུབ་པའི་རྣལ་འབྱོར་བདག༔ ཁྱོད་ལ་རེ་བ་གདུང་བ་སྟེ༔ འཇིག་རྟེན་ཆེ་དགུ་གཞན་མི་ཚོལ༔ བདེན་པ་ཆེན་པོའི་མཐུ་བྱིན་གྱིས༔ ད་ལྟ་ཉིད་དུ་རང་གཟུགས་སྟོན༔ ཁྱོད་དང་རྣལ་འབྱོར་བདག་ཉིད་གཉིས༔མི་དང་མི་ལབ་ཇི་བཞིན་དུ༔ ལས་མྱུར་སྙིང་ཉེ་གདུག་རྩུབ་སྤོངས༔ ཀྱཻ༔ ལུས་དང་གྲིབ་བཞིན་འགྲོགས་པ་རུ༔ དཀོན་མཆོག་གསུམ་གྱི་བཀའ་བཙན་བདར༔ ཆོས་ཅན་བསླུ་བ་མེད་པ་ཡིས༔ བདེན་པ་ཆེན་པོའི་མཐུ་བྱིན་གྱིས༔ ད་ལྟ་ཉིད་དུ་རང་གཟུགས་སྟོན༔ ཁྱོད་དང་རྣལ་འབྱོར་བདག་ཉིད་གཉིས༔མི་དང་མི་ལབ་ཇི་བཞིན་དུ༔ ལས་མྱུར་སྙིང་ཉེ་གདུག་རྩུབ་སྤོངས༔ ཀྱཻ༔ རྩ་གསུམ་ལྷ་ཡི་ཕྱག་རྒྱ་ཆེ༔ འདའ་དཀའ་ཡལ་གམ་གཉན་པོའི་བདར༔ ཆོས་ཅན་བསླུ་བ་མེད་པ་ཡིས༔ བདེན་པ་ཆེན་པོའི་མཐུན་བྱིན་གྱིས༔ ད་ལྟ་ཉིད་དུ་རང་གཟུགས་སྟོན༔ ཁྱོད་དང་རྣལ་འབྱོར་བདག་ཉིད་གཉིས༔མི་དང་མི་ལབ་ཇི་བཞིན་དུ༔ ལས་མྱུར་སྙིང་ཉེ་གདུག་རྩུབ་སྤོངས༔ ཀྱཻ༔ སྐུ་གསུམ་རྒྱལ་བའི་རང་དོན་ནི༔ དུས་ལས་མི་ཡོལ་བཀའ་བརྟགས་བདར༔ ཆོས་ཅན་བསླུ་བ་མེད་པ་ཡིས༔ བདེན་པ་ཆེན་པོའི་མཐུ་བྱིན་གྱིས༔ ད་ལྟ་ཉིད་དུ་རང་གཟུགས་སྟོན༔ ཁྱོད་དང་རྣལ་འབྱོར་བདག་ཉིད་གཉིས༔མི་དང་མི་ལབ་ཇི་བཞིན་དུ༔ ལས་མྱུར་སྙིང་ཉེ་གདུག་རྩུབ་སྤོངས༔ ཀྱཻ༔ དངོས་ངན་བདག་གིས་ཐ་ཚིག་ཀྱང་༔ ཆོས་མཛད་བླ་མས་སྲོག་གཏད་བདར༔ ཆོས་ཅན་བསླུ་བ་མེད་པ་ཡིས༔ བདེན་པ་ཆེན་པོའི་མཐུ་བྱིན་གྱིས༔ ད་ལྟ་ཉིད་དུ་རང་གཟུགས་སྟོན༔ ཁྱོད་དང་རྣལ་འབྱོར་བདག་ཉིད་གཉིས༔མི་དང་མི་ལབ་ཇི་བཞིན་དུ༔ ལས་མྱུར་སྙིང་ཉེ་གདུག་རྩུབ་སྤོངས༔ དེ་ལྟར་བདེན་པ་བདར་པ་ན༔ གསང་སྔགས་འདི་ནི་མིང་ཡིན་ཏེ༔ རཀྨོ་ཤ་ཟ་ཧོར་མོ་ཞེས༔ རིག་སྔགས་འདི་ཀོ་སྲོག་ཡིན་ཏེ༔ མ་བྷྱོ་ཛ་ཡིས་ལས་ལ་སྦྲན༔ གཟུངས་སྔགས་འདི་ནི་འབོད་ཚིག་སྟེ༔ ས་མ་ཡ་དང་ཕེཾ་དུ་བྱུང་༔ དམ་སྔགས་འདི་ནི་ལོག་གནོན་ཏེ༔ ཙ་མ་ཡ་དང་མ་ཨུ་དྲ༔ རང་སྔགས་འདི་ནི་མཚང་ཡིན་ཏེ༔ རཀྟ་ཙ་ཏྲི་ཕ་ཡ་ལ༔ དགོས་སྔགས་འདི་ནི་བརྡ་ཡིན་ཏེ༔ ཁ་ཤ་ད་ཀི་ཨེ་ལནྜ༔ སྨྲས་སྔགས་འདི་ནི་བརྡ་ལན་ཏེ༔ བརླ་དང་ལིངྒ་རཱ་ག་ཧོ༔ དེ་ཡོད་མི་ལྡོག་རིགས་གཙོ་ཁྱོད༔ ཡེ་ཤེས་ཐབས་མཁས་རྒྱུན་མ་འགགས༔ ཨ་ལ་ལ་ཧོ༔ ཞེས་བརྗོད་མངོན་སུམ་མིག་སྔར་འཁོར༔ ཀུས་འདེབས་ངུ་འབོད་སྒྲ་བྱུང་ན༔ ཤ་ཟའི་དམ་ཚིག་ཉམས་རྟགས་ཡིན༔ དེ་ཕྱིར་ཚོགས་དང་གཏོར་མས་བསྐང་༔ གཞན་དུ་ཕྲིན་ལས་སྣ་དགུ་འགྲུབ༔ ས་མ་ཡཱ༔ ཡང་ན་མཆོད་བསྒྲུབ་འདོད་པའི་མིས༔ སིནྡྷུ་ར་ཡིས་སྐུ་གཟུགས་བཅས༔ སོ་ཕག་གིས་ནི་སྲ་སྙིང་བཙུགས༔ དེ་ཡི་དབུས་སུ་རང་སྔགས་འཛུག༔ ཅེས་ཀྱང་མ་འགྲུབ་མཚང་ནས་དམོད༔ དང་པོ་སྒྲུབ་པ་འདི་ལྟར་བྱ༔ ཀྱཻ༔ མདུན་དུ་དུར་ཁྲོད་རབ་འཇིགས་དབུས༔ ཁྲག་ཞག་རླབས་ཕྲེང་དགུང་ལ་བསྙེགས༔ དེ་དབུས་སོ་རྒྱོབ་འབྲུག་སྟོང་འཚེགས༔ ༼ འཚེར་དཔྱད། ༽༔ མི་རོ་རྟ་རོ་འབུམ་བརྩིགས་དབུས༔ རྒྱུ་མའི་དྲ་བ་མཆིན་ཁྲིའི་གདུགས༔ མཁལ་མའི་ཏོག་ལ་གཟོབ་པོའི་ནི༔ རྒྱབ་ཡོལ་ལ་བརྟེན་ཙིཏྟ་ཡིས༔ རྒྱལ་མཚན་ཕྱོགས་སུ་དཔྱང་བའི་དབུས༔ མགོ་བརྒྱའི་བ་གམ་ལྷུན་མཐོའི་ཁྲིར༔ ཐན་གྱི་རྔ་མོང་ཀ་བའི་སྟེང་༔ གློ་མཚེར་མཆིན་པས་སྒ་ཆ་བྱས༔ ཡན་ལག་མདུད་པས་གློ་གོང་སྨེད༔ དེ་ལ་མི་མིན་སྲིན་མོ་ཆེ༔ གཅེར་བུ་རལ་བ་ས་ལ་དྲུད༔ སྔ་རུ་སྟེང་ན་གཅན་གཟན་བརྒྱ༔ ཕྱི་རུའི་སྟེང་ན་བྱ་འུག་བརྒྱ༔ ཟ་གསོད་སྤྲུལ་པའི་ཁྲ་ཐབས་འགྱེད༔ སྐུ་སྟོད་མི་སྤགས་རློན་པ་ཀླུབས༔ སྦྲུལ་བརྒྱའི་ཆུན་པོ་རྐེད་ལ་འཁྱུག༔ སྐྱེས་བུའི་མིག་གིས་དོ་ཤལ་ཅན༔ མགུལ་ལ་ཐེ་ཚོ་ནེ་ཚོའི་ཕྲེང་༔ གཡས་སུ་བཙན་མོ་མུ་ཁ་ལེ༔ དངར་ནག་ཁྲག་གི་རལ་བ་གཡོ༔ སྟག་མོ་ཆིབས་ནས་མི་རྒོད་མནན༔ རུས་སྦལ་ཁོག་པས་སྒ་ཆ་བྱས༔ ལྕགས་སྤྱང་མགོ་དགུ་རོལ་དུ་ཁྲིད༔ མིག་ནས་ཉི་ཟླའི་འོད་ཟེར་འཕྲོ༔ ཁ་ནས་འབྲུག་སྒྲོགས་ཐོག་ཀྱང་འཕེན༔ རྐན་སྒྲས་སྟོང་གསུམ་བསྟན་པ་འཕྲོགས༔ མི་རོ་བཞི་ཡི་གོས་ཚུལ་སྤྲད༔ བཙན་གྱི་ཤྭ་རྡེའུ་གློ་ལ་བཏགས༔ གཡོན་དུ་ཀླུ་མོ་ཤིནྟཾ་མ༔ ཆིབས་སུ་བྱ་རྒྱལ་ཁྱུང་ཆེན་བཀོལ༔ རོ་ཉེའི་པ་ཏྲས་སྒ་ཆ་བྱས༔ འབྲུག་ཆེན་ལུས་སྟོང་རོལ་དུ་ཁྲིད༔ སྣ་ནས་བསྐལ་པའི་མེ་ཆེན་འབར༔ སྣམ་ནས་ཁྲག་གི་ཆར་བ་འབབས༔ གླལ་བས་ལྷ་བརྒྱ་སྐྱི་བོང་འདོན༔ སྐུ་ལ་ཆུ་སྲིན་སྦུབས་ལུགས་གསོལ༔ ཚོན་གྱི་གྲུ་གུས་སྔ་ཤད་དང་༔ ནད་ཀྱི་རྐྱལ་བ་ཕྱི་ཤད་བྱས༔ ཀུན་ཀྱང་ཕྱག་གཡས་ཕུར་པ་དང་༔ གཡོན་པས་བྱ་འུག་ཁྲ་ཐབས་སྤྲུལ༔ སྡིག་པ་ར་ཛས་འོག་ལྤགས་གསོལ༔ གཡུ་འབྲུག་སྔོན་པོས་རེངས་བྱས་པ༔ ཤ་ཟ་འབུམ་གྱིས་བསྐོར་བར་བསྒོམ༔ གནས་གསུམ་འོད་ཀྱིས་རང་གནས་ནས༔ སྤྱན་དྲངས་དམ་ཚིག་དཀྱིལ་འཁོར་ལ༔ ཆུ་ལ་ཆུ་བཞག་ཅི་བཞིན་གྱུར༔ དེ་ནས་སྤྱན་འདྲེན་པ་ནི༔ བྷྱོ་བྷྱོ༔ ཆོས་ཉིད་མཁའ་འགྲོ་དབྱིངས་ལ་རོལ༔ ཀུན་ཏུ་བཟང་མོ་གཤེགས་སུ་གསོལ༔ ཡེ་ཤེས་མཁའ་འགྲོ་འགགས་པ་མེད༔ ཡུམ་ཆེན་རིགས་ལྔ་གཤེགས་སུ་གསོལ༔ དམ་ཚིག་མཁའ་འགྲོས་དངོས་གྲུབ་སྩོལ༔ འབུམ་ཕྲག་ཡངས་མ་གཤེགས་སུ་གསོལ༔ སྣ་ཚོགས་མཁའ་འགྲོས་བསྟན་པ་སྐྱོང་༔ གནས་ཡུལ་ཞིང་སྐྱོངས་གཤེགས་སུ་གསོལ༔ ཤ་ཟ་མཁའ་འགྲོའི་དགྲ་བགེགས་སྒྲོལ༔ དྲག་རྩལ་ཤུགས་ལྡན་གཤེགས་སུ་གསོལ༔ ལས་བྱེད་མཁའ་འགྲོས་བདེ་ཆེན་མཚོན༔ ཞིང་སྔགས་ལྷན་སྐྱེས་གཤེགས་སུ་གསོལ༔ དུར་ཁྲོད་མཁའ་འགྲོས་བརྟུལ་ཞུགས་སྤྱོད༔ རོ་སྙོམས་དབང་ཕྱུག་གཤེགས་སུ་གསོལ༔ མདོར་ན་སྣང་སྲིད་འཁོར་འདས་ཀུན༔ ཁྱོད་ཀྱི་ཕྱི་ནང་གསང་བའི་སྲས༔ ཀུན་འབྱུང་ཤ་ཟ་ཧོར་མོ་ནི༔ ས་དགུའི་རྟོག་པ་ཟིལ་གནོན་པའི༔ སྤུན་དགུའི་རོལ་སྟབས་མིག་ཡངས་མ༔ མངོན་ཤེས་རྫུ་འཕྲུལ་མྱུར་ཤུགས་ཀྱིས༔ འཁོར་དང་སྤྲུལ་བ་ཡང་སྤྲུལ་བཅས༔ སྐད་ཅིག་ཉིད་ལ་ད་ཚུར་བྱོན༔ མ་བྷྱོ་ཛ༔ རཀྨོ་མཾ་ས་ཁཱ་ཧ་མ་ཧཱ་ཀ་རུ་ཎི་ཀ་དྲི་ཤ་ཧོ༔ དེ་ནས་བཞུགས་གསོལ་ནི༔ ཧཱུྃ༔ དམར་གསལ་ཡིད་འཕྲོག་དབང་གི་ཁ་དོག་ཅན༔ ཆགས་མེད་རྦ་བརྒལ་སྲིད་པ་ཀློང་དུ་ཐིམ༔ རྟོག་མེད་བམ་ཆེན་རྩིགས་མ་འབུམ་དུ་བརྡལ༔ བ་གམ་ལྷུན་མཐོའི་བརྗིད་ཆགས་འབར་འཁྲིགས་ཞུགས༔ འཛིངས་བསྣོལ་གོ་སྐབས་མེད་པའི་དལ་དབུས་སུ༔ སྲ་མཁྲེགས་འགྱུར་མེད་དྲག་པོའི་གཞལ་ཡས་ལ༔ རབ་གསལ་ཡིད་འོང་ཉི་ཟླ་པདྨ་དང་༔ དྲེགས་པ་སྤྱི་ཆིངས་དཔའ་རྟགས་གདན་བཤམས་པར༔ མ་སྲིང་གྲོགས་ཀྱི་ཚུལ་དུ་བཞུགས་ནས་ཀྱང་༔ དམ་ཚིག་གཅིག་པའི་རྣལ་འབྱོར་བདག་ཉིད་ལ༔ དགོས་འདོད་ཀུན་འབྱུང་ཕ་རོལ་དཔུང་འཇོམས་པའི༔ བཀྲ་ཤིས་བདེ་ལེགས་རུ་མ་མཛད་དུ་གསོལ༔ བཛྲ་མ་བྷྱོ་ཛ༔ ཏིཥྛ་ས་མ་ཡ་ལྷན༔ དེ་ནས་ཕྱག་གི་བསྟི་སྟངས་ནི༔ ཧོ༔ ཤ་ཟ་ཆེན་མོ་སྲིད་གསུམ་འཁོར་ལོའི་བསྒྱུར༔ ཤ་ཟ་ཆེན་མོ་ཡེ་སངས་རྒྱས་པའི་ལྷ༔ ཤ་ཟ་ཆེན་མོ་ཆེ་དགུའི་གཙུག་ན་དཔའ༔ ཤ་ཟ་ཆེན་མོ་ཁྱོད་ལ་ཕྱག་འཚལ་ལོ༔ དཀོན་མཆོག་གསུམ་གྱི་རང་བཞིན་ཁྱོད་ཕྱག་འཚལ༔ དཀོན་མཆོག་གསུམ་ཀྱི་ཕྲིན་ལས་ཁྱོད་ཕྱག་འཚལ༔ དཀོན་མཆོག་གསུམ་གྱི་ཐབས་ལྡན་ཁྱོད་ཕྱག་འཚལ༔ དཀོན་མཆོག་གསུམ་གྱི་ཞབས་འདེགས་ཁྱོད་ཕྱག་འཚལ༔ རྣལ་འབྱོར་ཡོངས་ཀྱིས་མགོན་པོ་ཁྱོད་ཕྱག་འཚལ༔ རྣལ་འབྱོར་སྔགས་སྐྱེས་ལྷ་མོ་ཁྱོད་ཕྱག་འཚལ༔ རྣལ་འབྱོར་ཉམས་བྱེད་དགྲ་འདུལ་ཁྱོད་ཕྱག་འཚལ༔ རྣལ་འབྱོར་དྲོད་འཕྲོག་སྲི་འདུལ་ཁྱོད་ཕྱག་འཚལ༔ ན་མོ་ན་མ༔ དེ་ནས་མཆོད་པ་ནི༔ ཧཱུྃ༔ སྲིད་པའི་མ་ཆེན་འཁོར་བཅས་ལ༔དངོས་སུ་བཤམས་པའི་མཆོད་པ་ནི༔ རྒྱུད་བཀོད་ཞིང་གི་ཉེར་སྤྱོད་དུ༔ རྣམ་པར་སྤྲུལ་བས་འབུལ་ལགས་ཀྱི༔ མཁའ་འགྲོའི་ཐུགས་དམ་བསྐང་གྱུར་ཅིག༔ ཁྱད་པར་དགྲ་བགེགས་བསྒྲལ་བ་ཡི༔ མིག་ཆུ་ཁ་ཆུ་དྲི་ཆུ་དང་༔ བྱང་སེམས་ཁྲག་མཁྲིས་ཕྱག་ཞབས་བསིལ༔ བྱུག་པས་བདེ་བ་བསྐྱེད་ཕྱིར་འབུལ༔ ཤ་ཡི་དྭངས་མ་སྙིང་གླད་དང་༔ སྙིགས་མ་ནང་ཁྲོལ་ཤ་ཚིལ་རྒྱུས༔ ཞེ་སྣང་རུས་པའི་གྲམ་ཁྲོད་བཅས༔ ཞལ་ཟས་བཅའ་བའི་མཆོག་ཏུ་འབུལ༔ དབང་ལྔའི་མེ་ཏོག་མཛེས་པ་དང་༔ རྐང་ཆེན་ཞུན་མེ་སློག་ཆེན་གོས༔ རྡོ་རྗེ་དྲི་ཆེན་བདུག་པའོ་སྤོས༔ མཁའ་འགྲོ་འདུ་བའི་དམ་ཚིག་འབུལ༔ རྐང་གླིང་ཐོད་པ་ཏི་རའི་རྔ༔ རུ་ཏྲའི་དཔྱི་ཡི་རྔེའུ་ཆུང་༔ ངག་གི་སྒྲ་སྐད་རྒྱུད་མང་འཇེབ༔ ཡེ་ཤེས་རོལ་མོར་རླབས་ཏེ་འབུལ༔ སྨན་གཏོར་རཀྟ་སྦྱོར་སྒྲོལ་ཐབས༔ རྒྱན་ཕྲེང་ནོར་དབྱིག་ཟས་སྣ་ཚོགས༔ དཔུང་བཞི་རྒྱལ་སྲིད་རིན་ཆེན་ཚོགས༔ མ་མོའི་ཐུགས་དམ་བསྐང་ཕྱིར་འབུལ༔ རྒྱུ་ཆུང་ཕུད་ཉམས་ལྷག་རོལ་དང་༔ སྤྱི་དགོས་དམ་ཚིག་ཉམས་ཆགས་ཀྱིས༔ ཐུགས་འགལ་འཁོན་འཁྲུགས་གདུག་རྩུབས་ཀུན༔ དག་ཚངས་སོར་ཆུད་དངོས་གྲུབ་སྩོལ༔ ཨོཾ་བཛྲ་ཨ་རྒྷཾ་ནས། ཤ་བྟ་རུ་པ་ནས། སྤ་རྴེ་མ་ཧཱ་པཉྩ་རཀྟ་བ་ལིངྟ་བྷོ་དྷི་ཙིཏྟ་ཨ་མྲི་ཏ་ལ་ཁ་རཾ་ཁཱ་ཧི༔ དེ་ནས་བསྟོད་པ་ནི༔ ཧཱུྃ༔ འཁོར་འདས་མཁའ་ལ་རོལ་པའི་མ༔ཏིང་འཛིན་ཟག་མེད་དབྱིངས་ལ་བསྟོད༔ ཤེས་རབ་ཆེན་པོས་མིག་སྟོང་བཀྲའི༔ མཁྱེན་གསལ་སྲིད་ཞིའི་དབང་པོར་བསྟོད༔ གསང་གསུམ་མཛད་པའི་སྣང་འགྲོས་གཙང་༔ ཚངས་པ་ཆེན་པོ་ཁྱོད་ལ་བསྟོད༔ ཆོས་སྲིད་གཉིས་ལ་ཁྱོད་དབང་བཙན༔ འཁོར་ལོས་བསྒྱུར་རྒྱལ་དབང་པོར་བསྟོད༔ སྐྱེ་འགྲོ་ཀུན་ལ་ཐུགས་རྗེས་སྐྱོངས༔ བྱང་ཆུབ་བསླབ་སྤྱོད་ཁྱོད་ལ་བསྟོད༔ མཁའ་མཉམ་ཐུགས་ལ་ཉེ་རིང་མེད༔ ཉི་ཟླའི་འོད་འཕྲོག་ཁྱོད་ལ་བསྟོད༔ གར་དགུའི་རོལ་རྩེད་སྟབས་གཅིག་གིས༔ སྲིད་གསུམ་ཟིལ་གནོན་ཁྱོད་ལ་བསྟོད༔ ཞིང་བཅུའི་སྲོག་ལ་ཧྃ་མ་ཡཱ༔ སྲོག་བདག་ཆེན་མོ་ཁྱོད་ལ་བསྟོད༔ བགེགས་དཔུང་རི་བོ་ཐལ་མར་བསིལ༔ དྲག་རྩལ་ཐོག་རྒོད་ཁྱོད་ལ་བསྟོད༔ རྫུ་འཕྲུལ་འཁོར་འདས་ཐེང་གཅིག་བསྐོར༔ མྱུར་མགྱོགས་བདག་མོ་ཁྱོད་ལ་བསྟོད༔ མངོན་ཤེས་ཕྲ་རགས་ཉེ་རིང་གཅོད༔ ཐམས་ཅད་མཁྱེན་མངའ་ཁྱོད་ལ་བསྟོད༔ དེ་ནས་འཛབ་བཟླས་བྱ་བ་ལ༔ བསྙེན་བསྒྲུབ་ལས་ལ་སྦྱོར་བ་ལས༔ གབ་བྱང་མེད་པའི་ལེའུ་གཉིས༔ བདག་ཉིད་ཡི་དམ་གྱི་ཐུགས་ཀའི་སྲོག་སྔགས་ལས་འོད་ཟེར་མཆོད་པའི་སྤྲིན་དུ་ཤར་བས་བཀུར་བསྟི་ལྷ་མོ་འཁོར་བཅས་ལ་ཁྱབ་པར་བྱས་པས་ཐུགས་མཛའ་གཅུགས་བྱམས་སྐྱོང་གི་དགོངས་པ་ལ་ཞུགས་པར་བསམ་ལ༔ ཨོཾ་རཀྨོ་མ་ཧཱ་ཀྲོ་ཏི་ཤ་ཟ་ཧོར་མོ་ས་པཱ་རི་ཝ་ར་ས་མ་ཡ་ཡོ་ག་ནཱ་ཐ་ཛ་ཛ༔ ཞེས་བརྗོད་ཤེས་པ་མ་ཡེངས་བར༔ འབྲུ་འབུམ་ཞིག་གིས་དངོས་ཞལ་མཇལ༔ འབུམ་ཐེར་གསུམ་གྱིས་ཕྲིན་ལས་འགྲུབ༔ ཡང་ཅིག་བསྒྲུབ་པར་བྱ་འདོད་ན༔ བདག་གི་ཐུགས་ཀའི་འོད་ཟེར་བསྐུལ་མའི་ཚུལ་དུ་འཕྲོས་པས་རང་སྲོག་བྷྱོ་ཡིག་གི་རྣམ་པར་གྱུར་ཏེ་ཡི་དམ་གྱི་ཐུགས་སྲོག་ལ་ཁབ་ལེན་ལ་ལྕགས་ཕྱེ་དུ་བ་ལྟར་སིབ་སིབ་ཐིམ་པར་བསམ་ལ༔ ཨོཾ་མ་བྷྱོ་ཛཿརཀྨོ་མ་ཧཱ་ཀྲོ་ཏི་ཤྭ་རི་ཤ་ཟ་ཧོར་མོ་ས་མ་ཡ་ཝ་ཤཾ་ཀུ་རུ་ཡེ་སྭཱ་ཧཱ༔ ཞེས་གནད་ལ་དབབས༔ དེས་ཀྱང་མ་འགྲུབ་ན༔ མ་མོ་བྲན་དུ་བཀོལ་བ་ནི༔ རང་གི་ཐུགས་སྲོག་ལས་འོད་ཟེར་རྡོ་རྗེ་གཏུམ་པོའི་སྐུ་ཕྲ་མོའི་རྣམ་པར་འཕྲོས་ནས་མ་མོའི་སྲོག་གི་སྙིང་པོ་རང་དབང་མེད་པར་འཕྲོག་ནས་ཡི་དམ་གྱི་ཐུགས་སྲོག་གི་གདན་དུ་བཏིང་བར་བསམ་མོ༔ ཨོཾ་མ་ཧཱ་རཀྨོ་ཤ་ཟ་ཧོར་མོ་ཙིཏྟ་དཱ་ན་སིདྡྷི་ཕ་ལ་ཧཱུྃ༔ ཅེས་སོ༔ དེས་ནི་མི་འགྲུབ་མི་སྲིད་ཀྱི༔ འོན་ཀྱང་སྔ་ན་མ་མོའི་འཁྲེན༔ དེ་ཕྱིར་དུས་གནད་ཤེས་པ་དང་༔ གོང་ནོན་ལྷ་དང་ཏིང་འཛིན་གཙོ༔ དེང་སང་སྐྱེ་བོ་འདོད་པ་ཆེ༔ ལྟ་བསྒོམ་རྫོང་འཕྲང་ལྕགས་སྲོག་དང་༔ བྱང་ཆུབ་སེམས་ཀྱི་སྙིང་པོ་ལ༔ ལམ་ཁའི་རྡོ་བཞིན་ཅི་མི་སྙམ༔ བསྟན་པའི་སྤྱི་དགྲ་ལངས་ལ་ཤོར༔ རང་གི་ཁ་འཐབ་ཙམ་ཞིག་གིས༔ ཆོས་བརྒྱད་དོན་གཉེར་བསམ་སྦྱོར་གནག༔ ཞེ་སྡང་འབྲས་བུ་དམྱལ་བ་བསགས༔ གཟེར་མེད་དགྲ་ལ་ཅི་ལྟོ་སྟེ༔ དམ་ཚིག་རང་ལ་མེད་པ་ནའང་༔ བསྒྲུབ་པ་ཐམས་ཅད་ལོག་པ་ཡིན༔ ཡིད་ཆད་ལྷ་ལ་བྱེད་པ་ཚོ༔ པདྨ་ང་ཡི་རྐང་འདྲེན་ཡིན༔ དེ་འདྲའི་ཡིན༔ དེ་འདྲའི་རིགས་ལ་མ་བསྟན་ཅིག༔ སྐལ་བ་ལྡན་པའི་ཆོས་མཛད་ལ༔ མ་སྒྲུབ་ཆོས་སྐྱོང་རང་འཁོར་ན༔ བརྟེན་བསྒྲུབ་ཚུལ་བཞིན་བྱས་པ་ལ༔ འབྲས་བུ་བླ་མེད་མ་མཐོང་ན༔ ཨོ་རྒྱན་ང་ཡིས་བསླུས་པ་ཡིན༔ ས་མ་ཡཱ༔ སྐུའི་རྒྱ༔ གསུང་གི་རྒྱ༔ ཐུགས་ཀྱི་རྒྱ༔ བརྡ་ཡིག །ཅེས་པའང་མཐུ་ཆེན་ངོར་ག་གཱས་སོ། །ཡང་ཅིག་ཕྱག་རྒྱ་རྒྱས་སྤྲོ་ན༔ གཙོ་བོ་གསུམ་མཐར༔ མདུན་དུ་ཐབས་ལྡན་རྣ་ཁུ་མ༔ སྐུ་མདོག་དམར་ནག་མེ་འོད་འབར༔ ཞལ་གཅིག་ཕྱག་གཉིས་མེ་འབྲུག་དང་༔ གཡོན་ན་སྲེ་མོང་ཁྲག་མིག་བསྣམས༔ ཧ་ཧ་རྒོད་པའི་མགོ་ཕྲེང་གིས༔ ཐོད་གདེངས་དང་ནི་དོ་ཤལ་བརྒྱན༔ སྐུ་ལ་སྐལ་ཤལ་རྒྱས་པར་གསོལ༔ ཞལ་ནས་དགྲ་རོ་ཐད་ཀར་འཛིན༔ ཆིབས་སུ་ཀོ་ཅི་རྣ་བོ་ཆེ༔ རལ་གྲི་འབར་བའི་གཤོག་པ་ཅན༔ ཆུ་གྲི་ངར་མའི་སྡེར་མོ་གཟིང་༔ ཞིང་ཆེན་གཡང་གཞིའི་སྟན་བསྟད་དེ༔ སྦྲུལ་ནག་གསོན་མའི་མཐུར་ཆིངས་འཁྱུག༔ རྒྱབ་ཏུ་ནག་མོ་ཁུས་འདེབས་མ༔ སྐུ་མདོག་ནག་མོ་མུན་པ་གཏིབ༔ ཨ་ཚ་ཨ་ནས་སྨྲ་སྐད་དང་༔ ཁུས་འདེབས་སྟོང་གསུམ་འཇིགས་སྐྲག་སློང་༔ ཕྱག་གཡས་རྫས་ངན་གཉན་རྭ་དང་༔ གཡོན་པས་ཐོད་དབྱུག་དགུ་བརྩེགས་བསྣམས༔ སྐུ་ལ་རེ་ནག་ཐུལ་བ་གསོལ༔ ཞབས་ལ་དོམ་ནག་ཁྲག་རལ་བཅིབས༔ ཀླུ་རྒྱལ་སྤགས་པའི་སྒ་སྟན་བསྟད༔ རྒྱུ་མ་རློན་པས་མཐུར་དུ་བྱས༔ ཐན་དང་ནད་དལ་ཡོ་ལམ་འཕྱོ༔ ཐོ་ཕྱི་མཚན་མོའི་ལྤགས་པའི་འཁོར༔ ཤར་ལྷོར་མིག་མེད་ཁུང་གསལ་མ༔ སྐུ་མདོག་གཟི་འོད་འབར་བ་སྟེ༔ མིག་འབྲུ་བསྒྲིགས་པས་གོ་ཟུ་ཅན༔ ཕྱག་གཡས་འདྲེན་བྱེད་རྒྱལ་མཚན་བརྗིད༔ གཡོན་ན་ཁྲམ་ཤིང་ཁྲག་རིས་ཅན༔ ཙིཏྟའི་ཕྲེང་བརྒྱུས་སྲོག་ཞུར་བཅས༔ ཆིབས་སུ་ལྟོ་འགྲོ་འཛིང་བསྣོལ་བ༔ རྐང་ལག་དཔག་ཚད་སླེབས་པ་ལ༔ སྤིར་གྱི་གསོབ་པོའི་སྒ་ཆ་བྱས༔ ཁ་རླངས་མཛེ་རིགས་བཅོ་བརྒྱད་འཕྲོ༔ སྐད་ཅིག་སྟོང་གསུམ་དགུ་བསྐོར་ཆིབས༔ ཀུན་མཁྱེན་ཀུན་གཟིགས་ངོ་བོར་རྟགས༔ ལྷོ་ནུབ་རྐེད་མེད་ཕྲ་མེན་ཁྲོ༔ རོ་སྟོད་ཁྲོ་མོ་ཁྲོས་པའི་གདོང་༔ རྐེད་པ་ནམ་མཁའ་སྟོང་བའི་གཟུགས༔ སྐུ་སྨད་འཇའ་ཚོན་འཁྱིལ་བ་སྟེ༔ གཡས་ཕྱག་དགུ་ནས་རལ་གྲིའི་གཏུབས༔ གཡོན་ཕྱག་དྲེགས་པ་ཆེ་དགུ་བཅིངས༔ རླུང་ནག་འཚུབས་མའི་ཆིབས་ཀྱིས་བསྐྱོད༔ ན་བུན་འཁྲིགས་པའི་ན་བཟའ་ཅན༔ སྐུ་ལ་མཁའ་མའི་ཆུན་འཕྱང་བརྒྱན༔ དོན་སྙིང་ནང་ཁྲོལ་སྟོན་དང་སྦེད༔ ནུབ་བྱང་རྐང་མེད་མཁའ་འགྲོ་མ༔ ལུས་མེད་མགོ་བོའི་འཁོར་མར་གཟིང་༔ ལག་མེད་མིག་མེད་རླུང་ཤུགས་ཀྱིས༔ ཁ་གདེང་རྐན་སྒྲའི་སྲིད་གསུམ་བསྒུལ༔ ཕྱོགས་བཅུའི་བསྟན་དགྲ་རྔུབས་ཐབས་ཅན༔ འོད་འབར་མཚན་ཞིང་སྲོད་ལ་རྒྱུ༔ སྡིག་པ་རི་ཙམ་སྟེང་ན་རོལ༔ བྱང་ཤར་ཁ་རམ་ཆེན་མོ་ནི༔ མགོ་མེད་མེ་དཔུང་ལུས་པོ་ཅན༔ ཁ་སྟོང་བསྒྲད་ཅིང་ངུ་འབོད་འཐེན༔ ཡ་ཚ་འཚུབས་ཤིང་སྲི་ངན་འཐུལ༔ མཆེ་བ་གཙིགས་ཤིང་ལྗགས་དམར་འདྲིལ༔ ཁ་ཁུག་གཉིས་སུ་མིག་གཉིས་རེ༔ རྡེབ་པས་གློག་གི་ཕྲེང་བ་འཕྲོ༔ ཕྱག་གཡས་བརླག་བྱེད་ཐུན་ཟོར་དང་༔ གཡོན་ནས་གནོན་བྱེད་རི་རབ་བསྣམས༔ ལྕགས་ཀྱི་ཕ་ཝཾ་སྟེང་ན་འགྱིང་༔ ཞེས་གཞུང་ལ་འཇུག་གོ༔ མཐུ་ཆེན་གནམ་ལྕགས་མེ་འབར་བའི་ངོར་ག་གཱས་སོ། །༈ མ་སྐྱེས་ཆོས་ཉིད་སྐྱེ་བ་མེད་པ་ལས༔ མ་འགགས་རང་བྱུང་རྡོ་རྗེ་མཁའ་འགྲོ་ཆེ༔ མ་རྩལ་ཕྲིན་ལས་བྱེད་པོར་ཡོངས་ཤར་བ༔ མ་ཅིག་ཤ༵་ཟ༵་ཧོར༵་མོ༵་ཁྱོད་ལ་བསྟོད༔ ག་གཱས་སོ། །