སྔགས་བསྲུང་ཤ་ཟ་ཧོར་མོའི་མཆོད་གསོལ་ཕྲིན་ལས་ལྷུན་གྲུབ།
སྔགས་བསྲུང་ཤ་ཟ་ཧོར་མོའི་མཆོད་གསོལ་ཕྲིན་ལས་ལྷུན་གྲུབ་བཞུགས༔
བརྡ་ཡིག །མཆོད་རྫས་སྦྱངས་སྤེལ་བསྒྱུར་གསུམ་མཐར༔ ཨ་ཨཱཿཧཱུྃ༔ ཐིག་ལེ་ཆོས་མིན་བྷ་ག་ཡངས་པ་ནས༔ སྣ་ཚོགས་ཆོས་འབྱུང་ཐུགས་རྗེའི་རླུང་ཤུགས་ལས༔ འཕེན་པས་ཡེ་ཤེས་ཤེས་རབ་ལྷ་མོའི་གཟུགས༔ འཇིག་རྟེན་འདས་ཀྱང་འཇིག་རྟེན་པ་ཡི་ངོར༔ མྱུར་མགྱོགས་དྲག་ཤུལ་བདག་མོའི་ཚུལ་བསྟན་པ༔ སངས་རྒྱས་བསྟན་བསྲུང་ཤ་ཟ་ཧོར་མོ་ཆེ༔ འཁོར་བཅས་དད་དང་དམ་ཚིག་དབང་གིས་བྱོན༔ ཉི་ཟླ་རིན་ཆེན་བཤམས་པའི་གདན་ལ་བཞུགས༔ ཕྱི་ནང་གསང་བའི་མཆོད་པ་རྒྱ་ཆེན་བཞེས༔ དབང་འབྱོར་བདག་མོ་ཁྱོད་ལ་མངོན་པར་བསྟོད༔ རླུང་བཅུ་དབུ་མར་བཅིང་པའི་སྔགས་འཆང་ལ༔ ཉེ་རྒྱུའི་སྤྱོད་པས་མཆོག་གི་དངོས་གྲུབ་ཆེ༔ བསྒྲུབ་པའི་སྟོངས་འདེབས་ལྷ་མོའི་འདོད་ཡོན་ཉིད༔ རྒྱན་དུ་ཐོགས་ཕྱིར་རང་དབང་བརྟན་པ་དང་༔ ཕྲལ་ཞིང་འགུགས་པའི་རེ་ལྟོས་ཁྱོད་ལ་འཆའ༔ སྦྱིན་པའི་རྒྱགས་ཕྱེ་འབྱུང་བའི་གཞི་མོ་ནི༔ ཡིད་བཞིན་ནོར་དང་བུམ་པ་བཟང་པོ་ལྟར༔ ནུབ་པ་མེད་པར་བརྒྱ་སྤྱད་སྟོང་འཕེལ་བའི༔ ཟས་དང་གྲོགས་ཀྱི་གཏེར་ཁ་ཁྱོད་ཀྱིས་ཕྱེས༔ ལོངས་སྤྱོད་ལྷ་ཀླུ་མི་ལ་ཡོད་དགུ་བོ༔ ཁྱོད་ཀྱི་མཐུ་ཡིས་རྣལ་འབྱོར་བདག་ལ་སྩོལ༔ དོ་བཟློ་ཕོད་བཙུགས་འགྲན་སེམས་གོ་ས་འཕྲོགས༔ སྐབས་ལྟ་བྱེད་སྙམ་དགྲ་བོའི་སྙིང་ཁྲག་རོལ༔ མདོར་ན་བསམ་པའི་དོན་རྣམས་ཐམས་ཅད་པ༔ སྔགས་བསྲུང་ཤ་ཟའི་རྒྱལ་མོ་ཁྱོད་ཀྱིས་བསྒྲུབ༔ བཀའ་དམ་མ་འདའ་བཛྲ་ས་མ་ཡཱ༔ ཅེས་ཀྱང་རང་འདོད་ཆེད་བཞག་གིས་ག་གཱ་ཨ་བྷྱེ་ནས་གསོལ་བ་གདབས་པའོ། །མངྒ་ལཾ། །