ཞིང་སྐྱོང་དུར་ཁྲོད་ལྷ་མོའི་ཕྲིན་ལས་ཉེར་མཁོའི་བུམ་བཟང་།

ཡེ་ཤེས་སྒྱུ་འཕྲུལ་དྲྭ་བ་ལས༔ ཞིང་སྐྱོང་དུར་ཁྲོད་ལྷ་མོའི་ཕྲིན་ལས་ཉེར་མཁོའི་བུམ་བཟང་ཞེས་བྱ་བ་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ བརྡ་ཡིག །འདི་ལྟར་བསྒྲུབ་བའི་གང་ཟག་གིས༔ ལས་གཞུང་ཚུལ་བཞིན་གྲུབ་པ་དང་༔ རྩ་བསྙེན་ཅི་འགྲུབ་བཟླས་པའི་མཐར༔ མཆོག་གི་དངོས་གྲུབ་ཀུན་འབྱུང་གཏེར༔ ཤེས་རབ་སྣང་བ་བསྒྲུབ་རྩོམ་ན༔ སྔགས་ཀྱི་བསྒྲུབ་པའི་གོ་ས་རུ༔ ཧཱུྃ༔ ཆོས་སྐུ་ཤེས་རབ་ཕ་རོལ་ཕྱིན༔ ལོངས་སྐུ་སྣ་ཚོགས་ཡུམ་ཆེན་མོ༔ སྤྲུལ་སྐུ་ལྷ་མོ་དབྱངས་ཅན་མ༔ ཡང་སྤྲུལ་དུར་ཁྲོད་བདག་མོ་སྟེ༔ ངོ་བོ་དབྱེར་མེད་རིག་པ་དང་༔ རྐང་བར་ལྡན་པའི་ཏིང་འཛིན་གྲོགས༔ ལྷ་མོའི་སྙིང་ཁར་ཡེ་ཤེས་སེམས༔ སྣ་ཚོགས་བདག་མོ་སྐུ་མདོག་སེར༔ གཅེར་བུ་གྲི་ཐོད་གཡས་གཡོན་འཛིན༔ ཞབས་གཉིས་བརྐྱང་བསྐུམ་རྟ་བབས་ཚུལ༔ ཕྱེད་བཅིངས་དབུ་སྐྲ་ལན་ཚར་ཅན༔ ཉི་ཟླའི་གའུ་ཁ་སྦྱོར་དབུས༔ པདྨའི་གདན་ལ་བཞུགས་པ་ཡི༔ ཐུགས་དབུས་འཁོར་ལོའི་ལྟེ་བར་ཧྲཱི༔ རྩིབ་བཞིར་རང་སྔགས་མཚམས་བཞི་རུ༔ མཁའ་འགྲོ་སྤྱི་དྲིལ་མཆན་བརྒྱད་དུ༔ ཤེས་རབ་ཡེ་ཤེས་སྙིང་པོ་བཀོད༔ བཟླས་པས་འོད་ཟེར་སུ་ཝར་མདོག༔ ཡར་འཕྲོས་སངས་རྒྱས་བྱང་སེམས་དང་༔ ཉན་ཐོས་རང་རྒྱལ་ཐམས་ཅད་ཀྱི༔ གཟུངས་ཀྱི་སྒོ་བཞི་སྤོབ་པའི་གཏེར༔ སོ་སོ་ཡང་དག་རིག་པ་བརྙེས༔ རྣོ་མྱུར་ཟབ་གསལ་རྒྱ་ཆེ་བའི༔ བདག་མེད་བདེན་པ་མངོན་མཐོང་རྩལ༔ སོ་སོར་རྟོགས་པའི་གཅོད་ཁམས་ཀྱི༔ རྒྱུ་ལས་བྱུང་བའི་ངོ་བོ་ཡི༔ ཕ་རོལ་ཚུར་མཐོང་གནས་རྣམས་ལ༔ སྒྲོ་འདོག་ཅིག་ཆོད་བྱེད་ལས་ཅན༔ ཇི་ལྟ་ཇི་སྙེད་མཁྱེན་པའི་འབྲས༔ ཡོན་ཏན་དབང་བྱིན་དངོས་གྲུབ་འོད༔ སེར་གསལ་རྣམ་པས་བདག་ལ་ཐིམ༔ འཁོར་ལོ་དྲག་ཏུ་འཁོར་བ་ཡིས༔ མི་ཤེས་སྒྲིབ་པའི་རྒྱ་ཕྲལ་ཏེ༔ ཤེས་བྱའི་དཀྱིལ་འཁོར་ཐམས་ཅད་ལ༔ བློ་མཆོག་པདྨོ་རྒྱས་པར་བསམ༔ མར་འཕྲོས་འགྲོ་བ་སེམས་ཅན་གྱི༔ རྒྱུ་འབྲས་རྨོངས་བ་ཀུན་བསལ་ནས༔ ཡེ་ཤེས་སེམས་དཔའི་གནས་ཐོབ་གྱུར༔ ཨོཾ་བཛྲ་བི་ཤྭ་ཧ་རི་ནི་ས་ཧྲིཾ༔ པྲ་ཛྙཱ་ཛྙཱ་ན་གརྦྷ་ཨཱཿཧཱུྃ༔ སརྦ་སིདྡྷི་ཕ་ལ་ཧཱུྃ༔ ཅེས་བརྗོད་ཤེས་རབ་རིལ་བུ་ནི༔ འཇམ་དཔལ་རྟག་ངུ་པདྨའི་རག༔ མི་བརྗེད་གཟུངས་ལ་སྔགས་འཆང་རྒྱལ༔ བྱང་ཆུབ་སེམས་དང་དུརྦ་བ༔ ཁྱད་པར་སྲིད་བཅུད་དང་དྲིལ་བའི༔ ཤིང་ཤིང་དྲིལ་བུ་ལྔ་བ་ལ༔ ཧྲཱིཾ་མཚན་ཡི་གེར་ལྡན་པ་བསྒྲུབ༔ རིལ་བུ་དབྱངས་ཅན་སྐུའི་ཕྲ་མོ༔ ཁོང་དུ་བཏང་པས་བློ་གཏེར་དང་༔ མི་གཉིས་ཡེ་ཤེས་མྱུར་དུ་ཐོབ༔ གཉིས་པ་ཐུན་མོང་དངོས་གྲུབ་ལ༔ མཐོ་རིས་ཡོན་ཏན་ཀུན་གྱི་རྩེ༔ ནོར་དང་ལོངས་སྤྱོད་བསྒྲུབ་འདོད་ན༔ ཧཱུྃ༔ དུར་ཁྲོད་ལྷ་མོའི་ཐུགས་ཀ་རུ༔ གཏེར་གྱི་བུམ་པའི་གདན་སྟེང་དུ༔ ཡེ་ཤེས་སེམས་དཔའ་དབྱངས་ཅན་མ༔ གསེར་མདོག་འབྲས་ཀྱི་སྙེ་མ་གཡས༔ རིན་ཆེན་གཏེར་གྱི་བུམ་པ་གཡོན༔ གྲོགས་མོ་ལྷ་མོ་བརྒྱད་ཀྱིས་བསྐོར༔ ཐུགས་ལས་འོད་འཕྲོས་འཁོར་འདས་ཀྱི༔ དཔལ་ཡོན་དྭངས་བཅུད་ཀུན་བསྡུས་ཏེ༔ བདག་གི་གནས་ཁང་བང་མཛོད་དང་༔ སླས་མལ་ཡུལ་བཀོད་ཐམས་ཅད་ཀུན༔ མེར་མེར་ཏིང་ཏིང་གང་བར་བསམ༔ ཡང་བཅུད་འོད་སེར་སྙིང་པོ་ནི༔ ཉི་ཟླའི་གའུར་སྲོག་ལ་ཐིམ༔ སྦ་བསྟིམ་རྒྱས་གདབས་འཕོ་མེད་ཀྱི༔ རྡོ་རྗེ་མི་འགྱུར་སྲོག་ཐོབ་ཞིང་༔ རྣམ་སྲས་ནོར་ལ་དབང་འབྱོར་དམིགས༔ ཨོཾ་ཤྲཱི་ས་ར་སྭ་སྟ་ ༼ སྟི་དཔྱད། ༽ཡེ༔ མ་མ་བ་སུ་དྷ་ར་བྷྲཱུྃ་འདུས༔ ཅེས་དང་གཡང་འགུགས་བསྡུས་པ་ནི༔ ཧཱུྃ༔ དུས་གསུམ་རྒྱལ་བའི་དཔལ་ཡོན་བདག༔ འཇམ་དཔལ་གཤིན་རྗེའི་བདེན་པ་དང་༔ རྗེ་བཙུན་འཕགས་མ་སྒྲོལ་མ་ཡིས༔ ནོར་དང་གཡང་ལྷར་ཐུགས་བསྐྱེད་པ༔ ལྷ་མོ་དབྱངས་ཅན་མཆེད་སྡེ་བརྒྱད༔ རྣམ་སྲས་ཛམ་ལྷ་ནོར་གྱི་བདག༔ ཁྱད་པར་དཀོར་བདག་ངན་ནེ་མ༔ འཁོར་དང་བཅས་པས་གཡང་ཁུག་ཅིག༔ ཟས་ནོར་ལོངས་སྤྱོད་འདོད་དགུའི་གཏེར༔ ལྷ་ཀླུ་མི་ཡི་འཇིག་རྟེན་དཔལ༔ མཁའ་སྤྱོད་ས་སྤྱོད་ཞིང་གི་རྒྱན༔ འབྱོར་སྟོབས་གཟི་བརྗིད་གཡང་ཁུག་ཅིག༔ སྤྲིན་ཕུང་བཞིན་དུ་འཁོར་གྱུར་ཅིག༔ ཉི་ཟླ་བཞིན་དུ་ཤར་ཞིང་བྱོན༔ ཕྱྭ་ཡི་དཀྱིལ་འཁོར་ཆེན་པོ་ལ༔ གཡང་གི་རཏྣའི་ཕྲ་ཚོམ་མཛེས༔ སྦྱིན་པའི་ཕ་རོལ་ཕྱིན་པ་ཡིས༔ རང་གཞན་དོན་ནི་ལྷུན་གྲུབ་ཤོག༔ ཅེས་བཀྲ་ཤིས་ཀྱང་བརྗོད་དོ༔ ཡང་ནི་བར་ཆད་སེལ་བ་ལ༔ ཧཱུྃ༔ ཡང་སྤྲུལ་དུར་ཁྲོད་ལྷ་མོ་ཡི༔ ཐུགས་ཀར་ཡེ་ཤེས་སེམས་དཔའ་ནི༔ དུར་ཁྲོད་བདག་མོ་སྐུ་མདོག་མཐིང་༔ ཕྱག་གཡས་ཁྲམ་བམ་གཡོན་ཐོད་ཁྲག༔ ཐུགས་ཀར་སྙིང་པོའི་ཡི་གེ་བྷྱོས༔ མཐའ་མར་སྔགས་ཀྱི་ཕྲེང་བ་ལས༔ འོད་ཟེར་ཡར་ལ་འཕྲོས་པ་ཡིས༔ འཇམ་དཔལ་དགོངས་པ་འཁོར་ལོ་བཞིའི༔ བདུད་བཞི་དབྱིངས་སྒྲོལ་ནུས་མཐུ་བསྡུས༔ བདག་ཐིམ་གཟི་བྱིན་ནུས་མཐུ་འབར༔ མར་འཕྲོས་འགྲོ་བའི་ཉེར་འཚེ་བསལ༔ ཕར་འཕྲོས་སྣང་སྲིད་དྲེགས་པ་ཀུན༔ དབང་བསྡུད་བྲན་ཁོལ་ཟིལ་གྱིས་མནན༔ རྔམས་སེམས་འདུ་བར་མི་བཏུབ་པ༔ ཁྲོ་མོ་འབར་བས་ལྷག་རོལ་ཡང་༔ མེད་པར་ཧབ་ཧབ་ཟོས་པར་བསམ༔ ཨ་བཛྲ་བེ་ཏ་ལི་ཛྙཱ་ན་ཀརྨ་དེ་ཝི་དགྲ་བགེགས་མ་ར་ཡ་ཕཊ་ཕཊ༔ ཅེས་པས་ཕྱི་ནང་བར་ཆད་སེལ༔ ཡང་ཅིག་འགོས་ནད་བསྲུང་བ་ཡི༔ སྨན་ནི་གླ་རྩི་སྨན་ཆེན་དང་༔ ག་བུར་ནག་པོ་དྲི་ལྡན་བཅིངས༔ རིལ་བུར་དྲིལ་ནས་བསྒྲུབ་པར་བྱ༔ ཧཱུྃ༔ དུར་ཁྲོད་མ་མོའི་ཐུགས་ཀ་རུ༔ དབྱངས་ཅན་ནག་མོ་ལོ་གྱོན་མ༔ སྐུ་མདོག་དུག་འདྲའི་ཡེ་ཤེས་སེམས༔ ཕྱག་གཡས་སྐྱབས་སྦྱིན་གཡོན་རྣམ་རྒྱལ༔ སྐུ་ལས་འོད་ཟེར་ཡར་འཕྲོས་ནས༔ རྒྱལ་བ་སྲས་བཅས་བྱིན་བརླབས་བཅུད༔ བདུད་རྩིའི་ཟེགས་མའི་ཚུལ་དུ་བྱུང་༔ བདག་ཐིམ་ནད་མེད་གཟི་མདངས་འབར༔ ཕར་འཕྲོས་འགྲོ་བ་ཐམས་ཅད་ཀྱི༔ ནད་ཀྱི་རྒྱུ་དང་དུག་གསུམ་དང་༔ ནད་ལ་འདུ་བ་བཞི་བརྒྱ་སོགས༔ རིགས་དྲུག་སྡུག་བསྔལ་ཀུན་བསལ་ནས༔ རྗེ་བཙུན་འཕགས་མའི་གོ་འཕང་ལ༔ བཀོད་པས་རྣམ་དག་ཞིང་དུ་བསམ༔ ཨོཾ་ཤྨ་ཤ་ན་དཱེ་ཝ་ཤཱིནྟཾ་པ་ཎ་ཤ་ཝ་རི་སརྦ་ཛྭ་ར་དྲ་ཤ་མ་ན་ཡ་ཕཊ༔ ཅེས་པས་སེལ་ལོ༔ ས་མ་ཡཱ༔ དེང་སང་ཆོས་ལ་རིས་ཆོད་མཁན༔ ཡེ་ཤེས་འཇིག་རྟེན་སོ་སོ་ཞེས༔ རང་རང་ལས་རྐྱང་ཐ་དད་འཛིན༔ དེ་ལས་ཅིག་ཤོས་མི་ནུས་སྐད༔ འཇིག་རྟེན་མེད་ན་ཡེ་ཤེས་མེད༔ དེ་གཉིས་ཆོས་ཅན་ཆོས་ཉིད་ཕྱིར༔ འཇིག་རྟེན་ཐ་སྙད་མ་བརྟེན་པར༔ ཡང་དག་ཡེ་ཤེས་ལྷ་མི་འགྲུབ༔ དེ་གཉིས་ཐབས་ལས་ཐབས་བྱུང་ཕྱིར༔ ཐ་དད་མིན་ལས་ཐ་དད་གཟུགས༔ སྒྲོལ་མ་ཉེར་གཅིག་གར་མཛད་ཀྱིས༔ ལོ་གྱོན་མ་དང་ལྷ་མོ་དཔལ༔ དབྱངས་ཅན་མ་ནི་འཇམ་དཔལ་ཡུམ༔ ལོངས་སྐུ་སྣ་ཚོགས་ཡུམ་ཆེན་དང་༔ སེམས་མ་བརྒྱད་ལས་གིརྟི་མ༔ ཡུམ་ཆེན་མ་ཉིད་ཁྲོས་པའི་དུས༔ བེ་ཏ་ནག་མོ་དུར་ཁྲོད་བདག༔ ཀཽ་རི་བརྒྱད་ཀྱི་བེ་ཏ་མ༔ དེ་དག་གཅིག་ཏུ་འབྲེལ་འབྱུང་གིས༔ བསྒྲུབ་པ་འདི་ཡི་དོན་པོའང་༔ གཤིན་རྗེའི་རྒྱུད་ཆེན་ལས་འཁོར་ལས༔ དབྱིངས་དང་ལས་ཀྱི་དུར་ཁྲོད་བདག༔ ཡུམ་དང་སྐོར་ནི་བགོ་བའི་ཕྱིར༔ རྒྱུ་མཚན་ཤེས་ན་ངོ་མཚར་འདྲེན༔ མཆོག་ཐུན་འགྲུབ་པའི་ངེས་ཤེས་སྐྱེ༔ སྐྱེས་འཕྲལ་ཡིད་གཉིས་སྤངས་བསྒྲུབས་པས༔ ཐོབ་པ་དེ་ནི་འགྲུབ་རྟགས་ལགས༔ དེ་ལས་མང་ན་དགོས་པ་མེད༔ ས་མ་ཡཱ༔ སྔགས་ནག་ག་གཱ་ཨ་བྷྱེ་ཡིས། །རྡོ་རྗེ་རྒྱལ་མཚན་གསུང་བསྐུལ་ངོར། །རང་གར་མ་བསྡད་གཅོས་གཏམ་ཡིན། །བཀྲ་ཤིས་ཤོག །