ཞིང་སྐྱོང་ལྷ་མོའི་གསོལ་མཆོད།
ཞིང་སྐྱོང་ལྷ་མོའི་གསོལ་མཆོད་ནི༔ དམར་གཏོར་དགུའི་མཐར་བྷ་ལིང་བསྐོར༔ བརྟེན་པའི་རྫས་ནི་ཤ་ལྔ་དང་༔ ཁྱད་པར་བྱང་ཆུབ་དཀར་དམར་ཡིན༔ མཆོད་པ་བདུད་རྩི་ལྷག་མ་བཞི༔ བསྐང་རྫས་ལ་ནི་མདོས་མདངས་མཆོད༔ མཐུན་པ་ནལ་བུའི་བྱང་ཆུབ་སེམས༔ ས་མ་ཡཱ༔ བརྡ་ཡིག །བྷྱོ༔ མདུན་དུ་གཏུམ་འབར་དུར་ཁྲོད་དཀྱིལ༔ ཐོད་མཁར་འབར་བ་གྲུ་གསུམ་དབུས༔ པདྨ་ཉི་མ་བམ་གྱི་སྟེང་༔ སྔགས་བདག་ལྷ་མོ་ངན་ནེ་མ༔ དམར་མོ་དུར་ཁྲོད་ཆས་དང་ལྡན༔ ཕྱག་གཡས་སྙིང་དང་གཡོན་མེ་ལོང་༔ ཞབས་གཉིས་འདོར་སྟབས་སྡང་མིག་གཡོ༔ ཕྱོགས་བཞིར་སྤྲུལ་པ་རང་འདྲ་བཞི༔ མཚམས་ཕྱོགས་བརྒྱད་དུ་ལྕམ་དྲྭལ་དང་༔ ཡང་འཁོར་བྱེ་བ་ས་ཡ་གསལ༔ འོད་འཕྲོས་གནས་ནས་སྤྱན་དྲངས་ཏེ༔ གདན་ལ་བཞུགས་གསོལ་གུས་ཕྱག་འཚལ༔ མཐུན་རྫས་ཕྱི་ནང་གསང་མཆོད་འབུལ༔ གདུང་དབྱངས་རྣམ་ཐར་དྲན་པས་བསྟོད༔ མི་འབྲལ་སྙིང་ཉེ་འགྲོགས་བདེར་འཁོར༔ མ་མ་བཛྲ་ས་མ་ཡཱ༔ དེ་ནས་བསྙེན་ན༔ ཧཱུྃ༔ མ་མོའི་ཐུགས་ཀར་ཉི་གདན་ལ༔ བྷྱོ་ཡིག་མཐའ་མར་སྔགས་ཀྱིས་བསྐོར༔ བཟླས་པས་བཀའ་ཉན་གསུང་སྡོད་དེ༔ ཕྲིན་ལས་རབ་འབྱམས་བསྒྲུབ་པར་བསམ༔ བྷྱོ་ཤྨ་ཤ་ན་དེ་ཝ་ས་མ་ཡཿཛ༔ཅེས་ཀྱང་ཏིང་འཛིན་མ་གཡེལ་བར༔ འབྲུ་འབུམ་ཞིག་གིས་ལྷ་མོ་འཁོར༔ དེ་ནས་གསོལ་མཆོད་བསྡུས་པ་ནི༔ རཾ་ཡཾ་ཁཾ༔ ཨ་ཨཱཿཧཱུྃ༔ གཏོར་མ་སྐྱེམས་ཕུད་མཆོད་པའི་སྤྲིན༔ ཡེ་ཤེས་བདུད་རྩིར་བྱིན་རླབས་ཏེ༔ དུར་ཁྲོད་ལྷ་མོ་འཁོར་བཅས་མཆོད༔ རྣལ་འབྱོར་བསམ་དོན་ཆོས་བཞིན་བསྒྲུབ༔ ཨེ་དམ་བྷ་ལིངྟ་ཁཱ་ཧི༔ ཀརྨ་སརྦ་སིདྡྷི་ཧོ༔ ཅེས་ཀྱང་མགོན་པོའི་བསྐུལ་ངོར་ག་གཱས་སོ། །༈ ཨོཾ་བཛྲ་རཱ་ཏི་ཁུག་ཛ༔ ཞེས་པས་རིག་མ་དབང་དུ་འདུས༔ ཨོཾ་བཛྲ་ཤ་མ་ཤ་ན་ནྲ་ཏྲི་རྦད་རྦད༔ ཅེས་དགྲ་ལ་རྦད་དོ༔ ཡང་ཐན་འགྱེད་སྔགས༔ ཨོཾ་མུ་ཁཱ་བི་ཤྭ་རཱུ་པ་སྟོན་ཡ་རྦད་ཡ༔ ཞེས་དང་༔ བསད་སྔགས་ནི༔ ཨ་བཛྲ་སྟི་ར་དཱི་པ་པ་ཏི༔ སརྦ་བིགྷྣན་མ་ར་ཡ་ཕཊ༔ སོད་སོད༔ ཅེས་ཀྱང་བསྟན་འཛིན་གསུང་ངོར་ག་གཱས་སོ། །བྷྱོ༔ ཞིང་སྐྱོང་མ་མོ་མིང་སྲིང་འཁོར་བཅས་དགོངས༔ བདག་ནི་མ་རིག་བག་མེད་དབང་གྱུར་བས༔ སྐུ་གསུང་ཐུགས་དང་འགལ་བའི་ལས་བགྱིས་པ༔ གནོང་འགྱོད་དྲག་པོའི་མཐོལ་བཤགས་བཟོད་པར་གསོལ༔ ཨ་བཛྲ་ཤྨ་ཤ་ན་དེ་ཝི་ས་ཏྭ་ས་མ་ཡ༔ ཞེས་ཡི་གེ་བརྒྱ་པ་དང་དྲུག་པ་བཟླས་ན་འཁྲུགས་བསྐང་གྱི་མཆོག་ཏུ་འགྱུར་རོ༔ ཀློང་ཡངས་ངོར་ག་གཱས་སོ། །