རེ་ཏི་དཔོན་གཡོག་བསྡུས་པ།
རེ་ཏི་དཔོན་གཡོག་བསྡུས་པ་ནི༔ ཧཱུྃ༔ རང་ཉིད་རྡོ་རྗེ་འཛིན་པ་ཡི༔ མདུན་དུ་རླུང་ནག་འཚུབ་མའི་དཀྱིལ༔ ཐོད་མཁར་དབུས་སུ་བོང་དམར་ནི༔ མཇུག་མར་མིག་གཉིས་ཡོད་པའི་སྟེང་༔ བྷྱོཿལས་ལྷ་མོ་ནག་མོ་ཆེ༔ རོ་དང་ཉི་མའི་གདན་ལ་རོལ༔ ཞལ་གཅིག་རལ་བརྫེས་ཁྲག་ཆར་འཕྲོ༔ སྤྱན་དམར་ཞལ་གདངས་མཆེ་བ་གཙིགས༔ དུར་ཁྲོད་ཆས་བརྒྱད་སྐུ་ལ་གསོལ༔ སེང་ཆེན་དྲིལ་བུ་ཉི་ཟླས་བརྒྱན༔ རྨ་བྱ་རིན་ཆེན་གླད་ལ་ལྡིང་༔ ཕྱག་གཡས་རལ་གྲི་གཡོན་ནོར་སྐྱོག༔ དབང་གི་ལྕགས་སྒྲོག་རྐང་བར་གསོལ༔ ཕྱག་རྒྱ་ལྔ་ཡི་རབ་ཏུ་མཛེས༔ མདུན་དུ་མ་ལས་རེ་མ་ཏི༔ དྲེལ་རྟ་ནག་མོ་ཟངས་སོ་ཅན༔ རྒྱུ་མའི་སྲབ་མཐུར་བསེ་སྟན་བསྟད༔ དེ་སྟེང་ཁྲོ་མོ་ཆར་སྤྲིན་མདོག༔ སྐེམ་མ་ཆུ་སྲིན་གདོང་བ་ཅན༔ མིག་དམར་མཆེ་བ་མན་དུ་གཙིག༔ རེ་ལྡེ་སྟོད་དུ་ལྡིང་ཐབས་ཀླུབས༔ རྐེད་ལ་མི་ལྤགས་སྟག་ཤམ་དཀྲིས༔ ཁྲམ་བམ་གཡས་ལ་མཚོན་གྲུ་གཡོན༔ ཤྭ་རྡིལ་གློར་བཏགས་ཟངས་དྲྭས་བརྒྱན༔ ནད་རྐྱལ་མཆན་བཅུག་གདེང་ཀ་ཅན༔ བྱ་ནག་གླད་ལྡིང་ཉི་ཟླས་གསལ༔ ནད་ཀྱིས་ཁ་རླངས་སྔོ་དམར་འཁྲིགས༔ འཁོར་དུ་མ་མོ་འབུམ་དང་བཅས༔ མེ་རི་མདོག་ལྔའི་དབུས་སུ་བསྒོམ༔ འོད་འཕྲོས་རི་རབ་རྩེ་མོ་ནས༔ རང་བཞིན་དཀྱིལ་འཁོར་སྤྱན་དྲངས་བསྟིམ༔ ཕྱག་འཚལ་དངོས་ཡིད་མཆོད་པ་འབུལ༔ ཐུགས་བསྐྱེད་དམ་ཚིག་ལྡན་ལ་བསྟོད༔ ཧཱུྃ་བྷྱོ་མ་མ་ཨ་ར་ལི་ཛ་བྷྱོ༔ འབོད་སྔགས་སོ༔ རྦད་རྦད་ཅེས་དང་༔ དགྲ་བགེགས་མ་ར་ཡ་ཕཊ༔ ཅེས་པས་རྦད་བསད་ཐམས་ཅད་ཚང་༔ མཆོད་བསྐང་མངའ་གསོལ་ཕྲིན་བཅོལ་དང་༔ འཁྲུགས་བསྐང་རྣམས་ནི་འདི་ལྟ་སྟེ༔ ཧཱུྃ་བྷྱོ་ཛ༔ མཐུན་རྫས་འདོད་ཡོན་ནམ་མཁའ་མཛོད༔ མཆོད་འབུལ་མ་མོའི་ཐུགས་དམ་བསྐང་༔ འཁྲུགས་བཅོས་བསྲུང་མར་མངའ་ཡང་གསོལ༔ རབ་འབྱམས་ལས་ཀུན་ཁྱོད་ཀྱིས་བསྒྲུབ༔ ཧཱུྃ་བྷྱོ་མ་ཨེ་དམ་བྷ་ལིང་ཏ་པཱུ་ཛ་ཁཱ་ཧི༔ ཅེས་ཀྱང་ཚོང་ཆེན་མགོན་པོ་ལ། །ག་གཱ་ཨ་བྷྱེས་མཆོད་པ་འབུལ། །དགེའོ། །མངྒ་ལཾ། །