ཞིང་སྐྱོང་ཚེ་རིང་མཆེད་ལྔའི་བསྐང་གསོལ་བསྡུས་པ་ཕྲིན་ལས་འཁོར་ལོ།
ཞིང་སྐྱོང་ཚེ་རིང་མཆེད་ལྔའི་བསྐང་གསོལ་བསྡུས་པ་ཕྲིན་ལས་འཁོར་ལོ་བཞུགས་སོ༔
བརྡ་ཡིག །ན་མོ་གུ་རུ་པདྨ་ཀཱ་ར་ཡེ༔ འབྱོར་ཚོགས་ཡོ་བྱད་སྣ་ཚོགས་བཤམས༔ ནམ་མཁའ་མཛོད་ཀྱི་སྔགས་རྒྱས་རླབས༔ རྃ་ཡྃ་ཁྃ༔ ཨ་ཨཱཿཧཱུྃ༔ ཀྱཻ༔ དབྱིངས་ཀྱི་ཡུམ་ལྔའི་ཐབས་མཁས་རྣམ་རོལ་མཛད༔ སྒྱུ་འཕྲུལ་རྡོ་རྗེ་ཚེ་རིང་མཆེད་སྡེ་ལྔ༔ སྔོན་ནས་ཐུགས་དམ་ཡལ་བར་མ་དོར་བར༔ ད་ལྟ་ཉིད་དུ་གནས་འདིར་གཤེགས་སུ་གསོལ༔ དད་གུས་པདྨ་ཉི་ཟླའི་གདན་ལ་བཞུགས༔ སངས་རྒྱས་བསྟན་སྲུང་ཕྲིན་ལས་མཛད་ཕྱག་འཚལ༔ ཤ་ཁྲག་དམར་གཏོར་འདོད་ཡོན་ལྷ་མོའི་གར༔ དགྱེས་སྐོངས་གླུ་གར་དཀར་དམར་སྐྱེམས་སྣ་ཚོགས༔ གདུགས་དང་དར་དཔྱང་རིན་ཆེན་པདྨའི་ཕྲེང་༔ དྲི་ཞིམ་བསུང་ངད་བྱ་རིགས་སྙན་པའི་སྒྲ༔ སྤྱན་གཟིགས་མདངས་མདོས་དྲི་ཆབ་རོལ་མོའི་འགྱུར༔ པི་ཝཾ་གླིང་བུ་ཕེག་རྡོབ་ཞུན་སྒྲོན་མེད༔ ཁྱད་པར་དྲིལ་བུ་གཡེར་ཁ་ཅོད་པཎ་འཕན༔ རིན་ཆེན་སྲོག་ཞུ་གར་ཆས་རྒྱན་ཕྲེང་འབར༔ རྔ་དང་རྫ་རྔ་རྒྱུད་མང་ཆས་སྣ་ཚོགས༔ ཆ་མ་ཆོ་དགུ་རྣམ་པ་བཟང་དགུའི་དངོས༔ ཆང་དང་དཀར་གསུམ་གཞལ་ཡས་བསྟོད་པའི་དབྱངས༔ ཡུམ་ཆེན་སྡེ་ལྔ་འཁོར་དང་བཅས་ལ་འབུལ༔ རྣལ་འབྱོར་ཉམས་ཆགས་བག་རྡུལ་ཡོངས་དག་ནས༔ བསྲུང་མའི་ཐུགས་ཟིན་བར་ཆད་ཞི་བ་དང་༔ ཉོན་མོངས་ཡེ་ཤེས་ཆེན་པོར་གྲོལ་བ་ཡི༔ ལྷན་སྐྱེས་དངོས་ཡིད་རིག་གཟུང་ཁྱོད་ཀྱིས་མཛོད༔ སྟོང་ཉིད་རྟགས་ཀྱི་ཐིག་ལེའི་འཕེལ་ཚད་རྫོགས༔ རྣམ་དག་དབྱིངས་གྱི་ངོ་བོ་མངོན་དུ་གྱུར༔ ཁུ་རྡུལ་རླུང་གི་རྒྱུ་བ་རྩད་བཅད་ནས༔ རྩ་རླུང་ཐིག་ལེ་ཡི་གེའི་འགྲོས་ཐིམ་བཞིའི༔ རང་བྱུང་འབྲས་བུ་ཡུམ་གྱི་མཁའ་དབྱིངས་སུ༔ ནམ་མཁའི་རྣལ་འབྱོར་བདེ་བ་ཆེན་པོར་སྦྱོར༔ དུས་གསུམ་འབྲལ་མེད་ཟུང་དུ་འཇུག་པ་དང་༔ བཀའ་ཡི་སྟོན་དང་བསྟན་བསྲུང་ཡི་དམ་གྱི༔ རྣམ་འཕྲུལ་བསམ་གྱིས་མི་ཁྱབ་མཐའ་ཡས་པ༔ ཁམས་གསུམ་འགྲོ་འདྲེན་ཕྲིན་ལས་མཐར་ཕྱིན་གྱི༔ གྲོགས་ཀྱི་དྭངས་མ་ལྷ་མོ་ཁྱོད་ཀྱིས་མཛོད༔ བཀའ་དང་དམ་ལ་མ་འདའ་ས་མ་ཡཱ༔ཅེས་ཀྱང་ག་གཱས་སོ། །