ཚེ་རིང་མཆེད་ལྔའི་གསོལ་བསྡུས་དཔག་བསམ་ལྗོན་བཟང་།
རྡོ་རྗེ་སེམས་དཔའི་དགོངས་ཉམས་ལས༔ ཚེ་རིང་མཆེད་ལྔའི་གསོལ་བསྡུས་དཔག་བསམ་ལྗོན་བཟང་བཞུགས་སོ༔
ཀྱཻ༔ མདུན་དུ་གཡུ་ཡི་ཁང་བཟང་ནང་༔ ཇོ་མོ་བཀྲ་ཤིས་ཚེ་རིང་མཐིང་༔ མདའ་དར་དཀར་གསལ་ཚེ་བུམ་འཛིན༔ མདུན་དུ་གཏལ་དཀར་འགྲོ་བཟང་དཀར༔ ཕྱག་ན་ནོར་གྱི་གཞོང་བ་བསྣམས༔ གཡས་སུ་མཐིང་གི་ཞལ་བཟང་སེར༔ ཀུན་གསལ་པྲ་ཡི་མེ་ལོང་འཛིན༔ རྒྱབ་ཏུ་མི་གཡོ་གླང་བཟང་དམར༔ ཕྱག་ན་འདོད་འཇོའི་བ་མོ་བསྣམས༔ གཡོན་དུ་ཅོད་པན་མགྲིན་བཟང་ལྗང་༔ དཔག་བསམ་ལྗོན་ཤིང་རྒྱས་པ་བསྣམས༔ སྨན་མོ་འབུམ་གྱི་འཁོར་ཀྱིས་བསྐོར༔ གནས་གསུམ་འོད་ཟེར་རབ་འཕྲོས་པས༔ དབྱིངས་དང་རང་བཞིན་སྤྲུལ་བའི་གནས༔ རང་འདྲའི་ཡེ་ཤེས་སྤྱན་དྲངས་བསྟིམས༔ བཛྲ་ཨ་ཡཿདེ་ཝ་པཉྩ་ས་པཱ་རི་ཝ་ར་ས་མ་ཡ་ཛ་ཛ༔ པདྨ་རྒྱས་པའི་གདན་ལ་བཞུགས༔ བསྟན་པ་བསྲུང་ཕྱིར་ཕྱག་ཀྱང་འཚལ༔ དངོས་འབྱོར་ཡིད་སྤྲུལ་མཆོད་པ་བཞེས༔ གསང་གསུམ་ཡོན་ཏན་དྲན་པས་བསྟོད༔ བཛྲ་ཌཱཀྐི་མི་ཨ་ཡུཿདཱེ་ཝི་པཉྩ་ཛ་ཛ༔ ཅེས་བསྒྲུབ་མཐར༔ རཾ་ཡཾ་ཁཾ༔ མཆོད་ཚོགས་འདོད་ཡོན་རྒྱ་མཚོ་འདིའི༔ ཞིང་སྐྱོང་མཁའ་འགྲོའི་ཚོགས་རྗེ་མོ༔ ཚེ་རིང་མཆེད་ལྔ་འཁོར་བཅས་མཆོད༔ དགྱེས་བཞེས་གང་བཅོལ་ཕྲིན་ལས་བསྒྲུབ༔ སྔོན་གྱི་གཡར་དམ་ཅི་བཞིན་དུ༔ མ་འདའ་རྣལ་འབྱོར་མགོན་མཛོད་ཅིག༔ ཅེས་ཀྱང་མཉྫུ་མ་ཏིའི་ངོར་ཤྲཱི་ནས་སོ། །༈ ཀྱཻ༔ ཞིང་སྐྱོངས་ཚེ་རིང་མཆེད་སྡེ་ལྔ༔ ཡང་འཁོར་སྨན་བཙུན་འབུམ་དང་བཅས༔ འདིར་གཤེགས་མཆོད་བརྔན་བསངས་གཏོར་བཞེས༔ རྣལ་འབྱོར་བདག་གི་གྲོགས་དན་མཛོད༔ རླུང་སེམས་དབུ་མར་གསོད་པ་ཡིས༔ ལས་ཀྱི་ཕྱག་རྒྱ་ཁྱོད་ལ་བཅོལ༔ ཅེས་ཀྱང་ཉག་བླ་མ་རིན་པོ་ཆེའི་སྐུ་ཚའི་ངོར་ག་གཱས་སོ། །ཧཱུྃ༔ རྒྱལ་ཀུན་ཡེ་ཤེས་ལྔ་ཡི་རང་གཟུགས་ནི༔ ཞིང་སྐྱོང་མཁའ་འགྲོའི་དབང་མོ་ཚེ་རིང་མ༔ མཆོད་ལྔ་འཁོར་དང་བཅས་པ་ཐམས་ཅད་ལ༔ དམ་རྫས་འདོད་ཡོན་རྒྱན་གྱི་མཆོད་གཏོར་འབུལ༔ ཕྱི་ནང་རྐྱེན་སོལ་མཆོག་ཐུན་དངོས་གྲུབ་སྩོལ༔ ཅེས་ཀྱང་བླ་མ་དམ་པ་སརྦ་ཛྙཱ་དེ་ཝའི་ངོར་ག་གཱས་སོ། །