ཨ་ཕྱི་ཆོས་ཀྱི་སྒྲོན་མའི་གསོལ་བསྡུས།
ཨ་ཕྱི་ཆོས་ཀྱི་སྒྲོན་མའི་གསོལ་བསྡུས་བཞུགས་སོ༔
བརྡ་ཡིག །ཧོཿ དབྱིངས་ཕྱུག་མི་འགྱུར་རྡོ་རྗེ་བཙུན་མོ་ནི༔ ལོངས་སྤྱོད་ཡུམ་ལྔ་སྒྲོལ་མ་ཉི་ཤུ་གཅིག༔ སྤྲུལ་སྐུ་ཞིང་སྐྱོང་ཚེ་རིང་མཆེད་ལྔ་དང་༔ ཡང་སྤྲུལ་ཨ་ཕྱི་ཆོས་ཀྱི་སྒྲོལ་མ་སྟེ༔ སྐུ་གསུང་ཐུགས་སྤྲུལ་འབུམ་ཕྲག་མཁའ་འགྲོའི་དངོས༔ གནས་ཡུལ་དུར་ཁྲོད་བསྟན་པ་སྤྱིའི་བསྲུང་མ༔ རྣམ་ཐར་བསམ་གྱིས་མི་ཁྱབ་ཁྱོད་ཕྱག་འཚལ༔ དམ་ཚིག་གཉེར་དགོངས་སྐད་ཅིག་འདིར་གཤེགས་ཤིག༔ རིན་ཆེན་ཉི་ཟླ་པདྨར་བཞུགས་གསོལ་འདེབས༔ ཐབས་མཁས་རྣམ་རོལ་མཛད་ལ་རྗེས་ཡི་རང་༔ ཕྱི་ནང་གསང་བ་དེ་བཞིན་ཉིད་ཀྱིས་མཆོད༔ བདག་གི་དོན་ཕྱིར་ཐུགས་རྗེའི་སྟོབས་ཀྱིས་བཞེས༔ ཚེ་རབས་གཏན་གྱི་བསྲུང་མར་མངའ་གསོལ་ལོ༔ སྲིད་ཞིའི་ཡོན་ཏན་མཆོག་མངའ་ཁྱོད་ལ་བསྟོད༔ ཕྲིན་ལས་རབ་འབྱམས་ཐམས་ཅད་ཁྱེད་ཀྱིས་བསྒྲུབ༔ ཐུགས་འགལ་དམ་ཉམས་མཆོད་བརྟེན་ཆགས་ལ་སོགས༔ མ་བྱམས་བུ་ཡི་འཁྲུལ་པ་ཇི་བཞིན་དུ༔ དགོངས་ཀློང་ཆོས་ཀྱི་དབྱིངས་སུ་ཡངས་པར་མཛོད༔ མི་ནོར་ཚེ་གཡང་གྲོགས་ལྷར་མཛད་ནས་ཀྱང་༔ གཞི་ཕྱིའི་ལམ་དོན་ཀུན་ཏུ་ཁ་འཛིན་བཅོལ༔ སྲིད་འདས་སྲིད་པའི་ཆ་སྟོན་མཁའ་འགྲོའི་གཙོ༔ ཁྱོད་མཁའ་བདེ་ཆེན་སྡུག་པོ་བཀོད་པ་རུ༔ མཐར་ཐུག་ལྟོས་བཅས་སེམས་ཅན་ཐམས་ཅད་ཀུན༔ མཉམ་གྲོལ་ཡུམ་ཆེན་སྲས་སུ་བཟུང་དུ་གསོལ༔ ཨོཾ་བཛྲ་དྷརྨ་ཏཱ་རེ་ཛྙཱ་ན་ཌཱཀྐི་ནི་ས་པཱ་རི་ཝ་ར་ཨེ་དཾ་བྷ་ལིང་ཏ་ཁཱ་ཧི༔ ཞེས་སོ༔ ཡང་བསྡུ་ན༔ ཧཱུྃ༔ སྐུ་གསུམ་དབྱིངས་དང་དབྱིངས་བཞུགས་ཀྱི༔ འཁོར་འདས་ཡོངས་ཀྱི་ཨ་ཕྱི་ཆེ༔ འདིར་གཤེགས་མཆོད་བཞེས་བསྲུང་མར་བཞུགས༔ མཆོག་ཐུན་དངོས་གྲུབ་རྒྱ་མཚོ་སྩོལ༔ སརྦ་པཱུ་ཛ་ཨེ་དཾ་བྷ་ལིང་ཏ་ཁཱ་ཧི༔ རྣལ་འབྱོར་གང་ཞིག་དམ་ལྡན་གྱིས༔ འདི་ལྟར་ཡང་དག་མཆོད་བྱས་ན༔ འདི་ཕྱིའི་མི་མཐུན་རྒུད་པ་སེལ༔ ཕུན་སུམ་ཚོགས་པའི་སྐལ་བཟང་ཐོབ༔ ཡེ་ཤེས་འཇིག་རྟེན་དམ་ཚིག་དང་༔ ཤ་ཟ་ལས་ཀྱི་མཁའ་འགྲོ་སྟེ༔ སྲིད་པ་མ་མོའི་དཀྱིལ་འཁོར་གྱི༔ སྤྱི་དཔལ་འདི་ལས་གཞན་ཡོད་མིན༔ ཆོས་སྐུའི་ཕྲིན་ལས་གཟུགས་སྐུ་དང་༔ དྲེགས་པ་དམ་བཏགས་སླས་འཁོད་གཉིས༔ གོང་འོག་ཁྱད་པར་གནམ་ས་ཙམ༔ ཡོད་ཀྱང་རྨོངས་པས་མ་མཐོང་ངོ་༔ གྲུབ་ཐོབ་གསུང་གི་དགོངས་གཞི་ནི༔ ལྷ་ལ་ཡིད་ཆེས་ཡོད་མེད་ཀྱི༔ ཉམས་སད་ལྟ་བ་མ་ལོན་ནས༔ སྤོངས་ལེན་བྱེད་པ་ཁྱེད་ཚོའི་འཁྲུལ༔ ཅེས་ཀྱང་བོ་ཚེའི་བསྐུལ་ངོར་ག་གཱ་པས་སོ། །