དཔལ་ནག་པོ་ཆེན་པོའི་མངའ་གསོལ་བསྡུས་པ་དབང་གི་ཞགས་པ།
དཔལ་ནག་པོ་ཆེན་པོའི་མངའ་གསོལ་བསྡུས་པ་དབང་གི་ཞགས་པ་བཞུགས་སོ༔
ཧཱུྃ༔ ཀུན་བཟང་ཆེ་མཆོག་སྙིང་རྗེའི་གཏེར་མཛོད་དབང་༔ བསྟན་འགྲོའི་དོན་དུ་རྔམ་བརྗིད་འབར་བའི་ཚུལ༔ དཔལ་ལྡན་མགོན་པོ་མ་ཧཱ་ཀ་ལར་བཞེངས༔ བདག་གིས་གཏན་གྱི་བསྲུང་མར་དམ་བཅའོ༔ བརྒྱུད་གསུམ་བླ་མའི་ངོ་བོར་མངའ་གསོལ་ན༔ བྱིན་རླབས་དབང་གི་ཆུ་རྒྱུན་སྩལ་དུ་གསོལ༔ ཡི་དམ་དཀྱིལ་འཁོར་འཁོར་ལོར་མངའ་གསོལ་ན༔ མཆོག་ཐུན་དངོས་གྲུབ་ཆར་ཆེན་དབབ་ཏུ་གསོལ༔ མ་བརྒྱུད་མཁའ་འགྲོའི་འཁོར་ལོར་མངའ་གསོལ་ན༔ རབ་འབྱམས་ཕྲིན་ལས་མ་ལུས་སྒྲུབ་ཏུ་གསོལ༔ དཀོན་མཆོག་གསུམ་གྱི་ངོ་བོར་མངའ་གསོལ་ན༔ འདི་ཕྱི་གཏན་གྱི་སྐྱབས་གནས་མཛད་དུ་གསོལ༔ ཆོས་སྐྱོངས་ཡོངས་ཀྱི་ངོ་བོར་མངའ་གསོལ་ན༔ ས་ལམ་བར་ཆད་ཐམས་ཅད་བསྒྲལ་དུ་གསོལ༔ ནོར་དང་གཡང་གི་ལྷ་རུ་མངའ་གསོལ་ན༔ རྒྱུ་འབྲས་དབུལ་བ་མཐའ་དག་བསལ་དུ་གསོལ༔ ཟས་དང་གྲོགས་ཀྱི་ལྷ་རུ་མངའ་གསོལ་ན༔ མཐུན་རྐྱེན་འདོད་དགུ་ཡིད་བཞིན་སྦྱོར་དུ་གསོལ༔ དཔུང་དང་དགྲ་བླའི་མཆོག་ཏུ་མངའ་གསོལ་ན༔ ནུས་མཐུ་སྟོབས་དང་རྩལ་ཤུགས་བསྐྱེད་དུ་གསོལ༔ སྡང་དགྲ་གསོད་པའི་མཚོན་ཆར་མངའ་གསོལ་ན༔ ཐལ་བའི་རྡུལ་དུ་བརླག་པའི་ཕྲིན་ལས་མཛོད༔ ཁ་རྗེ་དབང་ཐང་གྲགས་ལྷར་མངའ་གསོལ་ན༔ སྙན་པའི་བ་དན་སྲིད་རྩེར་བསྒྲང་དུ་གསོལ༔ བྱད་བཟློག་དྲང་སྲོང་ཁྲོ་བོར་མངའ་གསོལ་ལོ༔ བསམ་སྦྱོར་ངན་པའི་འབྲས་བུ་རང་སར་བཟློག༔ བསྟན་པ་ཡོངས་ཀྱི་བསྲུང་མར་མངའ་གསོལ་ལོ༔ གཙུག་ལག་ཆོས་འཁོར་གཉན་པོའི་གཉེར་འཛིན་མཛོད༔ བསྟན་དགྲ་སྒྲོལ་གིང་ཆེན་པོར་མངའ་གསོལ་ན༔ མུ་སྟེགས་ལྟ་ལོག་རྒོལ་ངན་རྨེགས་མེད་མཛོད༔ སངས་རྒྱས་བསྟན་བསྲུང་དཀོན་མཆོག་དབུ་འཕང་བསྟོད༔ དགེ་འདུན་སྡེ་སྐྱོངས་བསྟན་པའི་མངའ་ཐང་བསྐྱེད༔ རྣལ་འབྱོར་གྲོགས་མཛོད་ཡོན་བདག་མགོན་པོར་མཛོད༔ འགྲོ་ཀུན་ཕན་བདེའི་བཀྲ་ཤིས་མཆོག་སྩོལ་ཅིག༔ ཞེས་དང་༔ བསྡུ་ན་བར་གྱི་ཕྲིན་གསོལ་ཚིག་རྣམས་བསྟུང་ཀྱང་ཆོག་གོ༔ ཅེས་ཀྱང་སྣ་བོ་ཆེའི་བཞེད་སྐོངས་སུ་གསེར་ལྗོང་གི་རྣ་བོ་ཆེ་ག་གཱས་སོ། །