གཟའ་ཡི་མངའ་གསོལ་བཀྲ་ཤིས་དཔལ་ཕྲེང་།

གཟའ་ཡི་མངའ་གསོལ་བཀྲ་ཤིས་དཔལ་ཕྲེང་བཞུགས་སོ༔

བརྡ་ཡིག །ཧོ༔ སངས་རྒྱས་ཡེ་ཤེས་བླ་ན་མེད་པ་བརྙེས༔ གདུལ་བྱའི་དོན་མཛད་ཐབ༵ས་ཀྱི༵་ཕ༵་རོལ༵་ཕྱིན༔ ཕྱོགས་མེད་སེམས་ཅན་ཀུན་ལ་མ༵་ལྟར་བྱམ༵ས༔ བྱིན་རླབས་ཀུན་གྱི་རྩ་བར་མངའ་གསོལ་ལོ༔ ཆོས་སྐུ་རྣམ་སྣང་ལོངས་སྐུ་ཧེ་རུ་ཀ༔ སྤྲུལ་པའི་རོལ་མཛད་དྲང་སྲོང་ར་ཧུ་ལ༔ ཡེ༵་ཤེས༵་ཕར་ཕྱིན༵་ཡི་དམ་ཀུན་འདུས་དཔལ༔ དངོས་གྲུབ་འབྱུང་གནས་དམ་པར་མངའ་གསོལ་ལོ༔ ཆོས་དབྱིངས་མཁའ༵་ལ་རྟོགས་པའི་རྩལ་གྱིས་འ༵གྲོ༔ སྙིང་རྗེའི་ཤུགས་ལྡན་འགྲོ་ཁམས་ཁྱབ༵་པར་འཇུག༵༔ སྲིད་ཞིར་མི་གནས་ཤེས༵་རབ༵་ཕ༵་རོལ༵་ཕྱིན༵༔ མ་རྒྱུད་མཁའ་འགྲོའི་དབང་པོར་མངའ་གསོལ་ལོ༔ དཔག་ཡས་ནམ་མཁའི་ཁྱོན་ལ་དབང་བསྒྱུར་ཞིང་༔ སྲིད་གསུམ་སྐྱེ་འགྲོ་ཀུན་གྱི་སྲོག་ལ་དབང་༔ སྣང་སྲིད་གཡོ་འཁྲུགས་ནུས་པའི་རྩལ་ཤུགས་ལྡན༔ སྟོབ༵ས་ཀྱི༵་ཕ༵་རོལ༵་ཕྱིན༵་པར་མངའ་གསོལ་ལོ༔ ཕྱོགས་མེད་བསྟན་པ་བསྲུང་བར་རང་དན་བཅས༔ རིག་འཛིན་རྣལ་འབྱོར་ཡོངས་ཀྱི་མགོན་གཅིག་པུ༔ གཙུག་ལག་ཆོས་འཁོར་གཉན་པོ་སྐྱོབས་པའི་གདུགས༔ སྨོན༵་ལམ༵་ཕ༵་རོ༵ལ་ཕྱིན༵་པ༵ར་མངའ་གསོལ་ལོ༔ ཀུན་སྦྱོར་གསུམ་སྤངས་རང་ཤ་སྟེར་ལ་གུས༔ ཀུན་རྫོབ་ཡོན་ཏན་ནམ་མཁའ་མཛོད་དབང་བསྒྱུར༔འགྲོ་ཀུན་ཡིད་བཞིན་རེ་སྐོང་ཡོངས་འདུས་ལྗོན༔ སྦྱིན༵་པ༵འི་ཕ༵་རོལ༵་ཕྱིན༵་པར༵་མངའ་གསོལ་ལོ༔ ཉེས་སྤྱོད་མི་དགེའི་མཚན་མས་མ་གོས་ཤིང་༔ དགེ་ལེགས་ཡོན་ཏན་རྒྱ་མཚོའི་ཁུར་ཆེན་བཟོད༔ མཐའ་ཡས་འགྲོ་ཕན་རྩོལ་མེད་ལྷུར་ལེན་པའི༔ ཚུལ༵་ཁྲིམ༵ས་ཕ༵་རོལ༵་ཕྱིན༵་པར༵་མངའ་གསོལ་ལོ༔ ཐུགས་དབྱིངས་མཉམ་ཉིད་བཏང་སྙོམས་ཆེན་པོ་ལ༔ ཉོན་མོངས་དུག་ལྔའི་རྟོག་པ་ཀ་ནས་དག༔ འབྲས་བུ་ཡོན་ཏན་མཚན་དཔེའི་གཟི་འོད་འབར༔ བཟོ༵ད་པ༵འི་ཕ༵་རོལ༵་ཕྱིན༵་པར༵་མངའ་གསོལ་ལོ༔ རང་དོན་གྲངས་མེད་གསུམ་གྱི་ཚོགས་གཉིས་བརྩོན༔ གཞན་དོན་སྲིད་པ་ཇི་སྲིད་གོ་ཆ་བགོས༔ རིང་དུ་ལྟ་བ་དང་འབྲེལ་ཡོངས་སུ་ཟད༔ བརྩོ༵ན་འགྲུས༵་ཕ༵་རོལ༵་ཕྱིན༵་པར༵་མངའ་གསོལ་ལོ༔ ཞིབ་མོར་རྟོགས་མཁས་སྙོམས་འཇུག་རང་དབང་ཐོབ༔ བསྒྲངས་ཡས་ཏིང་འཇིན་གཏེར་ཁུང་རྡོལ་བ་ཡིས༔ ཕྱི་ནང་བདུད་ཚོགས་མཐའ་དག་འཇོམས་མཛད་པ༔ བས༵མ་གཏ༵ན་ཕ༵་རོལ༵་ཕྱིན༵་པར༵་མང༵འ་གསོ༵ལ་ལོ༵༔ ཐུགས་ཀྱི་གསུང་མཆོག་སྣང་བ་མཐའ་ཡས་ཉིད༔ མེ་གཟའ་དམར་བོར་བཞེངས་ནས་ལས་ཅན་ཀུན༔ གོས་དཀར་མོ་ཡི་ཀློང་དུ་རྒྱས་འདེབས་པའི༔ སོ༵ར་རྟོག༵ས་ཡེ༵་ཤེས༵་ཧེ་རུར་མངའ་གསོལ་ལོ༔ ཐུགས་ཀྱི་སྐུ་མཆོག་རྡོ་རྗེ་སེམས་དཔའ་ཆེ༔ ཆུ་གཟའ་དཀར་པོར་བཞེངས་ནས་ལས་ཅན་ཀུན༔ མ་མ་ཀི་ཡི་ཀློང་དུ་རྒྱས་འདེབས་པའི༔ མེ༵་ལོང༵་ཡེ༵་ཤེས༵་ཧེ་རུར་མངའ་གསོལ་ལོ༔ ཐུགས་ཀྱི་ཡོན་ཏན་རིན་ཆེན་འབྱུང་ལྡན་ཉིད༔ ས་གཟའ་སེར་པོར་བཞེངས་ནས་ལས་ཅན་ཀུན༔ སངས་རྒྱས་སྤྱན་མའི་ཀློང་དུ་རྒྱས་འདེབས་པའི༔ མཉམ༵་ཉིད༵་ཡེ༵་ཤེས༵་ཧེ་རུར་མངའ་གསོལ་ལོ༔ ཐུགས་ཀྱི་ཕྲིན་ལས་དོན་ཡོད་གྲུབ་པ་ནི༔ རླུང་གཟའ་ལྗང་གུར་བཞེངས་ནས་ལས་ཅན་ཀུན༔ དམ་ཚིག་སྒྲོན་མའི་ཀློང་དུ་རྒྱས་འདེབས་པའི༔ བྱ༵་གྲུབ༵་ཡེ༵་ཤེས༵་ཧེ་རུར་མངའ་གསོལ་ལོ༔ ཐུགས་ཀྱི་ཐུགས་མཆོག་རྒྱལ་བ་ཀུན་ཏུ་བཟང་༔ མཁའ་གཟའ་མཐིང་དཀར་བཞེངས་ནས་ལས་ཅན་ཀུན༔ ཀུན་ཏུ་བཟང་མོའི་ཀློང་དུ་རྒྱས་འདེབས་པའི༔ ཆོས༵་དབྱིངས༵་ཡེ༵་ཤེས༵་ཧེ་རུར་མངའ་གསོལ་ལོ༔ མ་དག་ཉོན་མོངས་དུག་ལྔའི་དགྲ་གདོན་བགེགས༔ ཕྲིན་ལས་དྲག་པོའི་སྒྲོལ་མཛད་ཁྲོས་པའི་སྐུར༔ ཤར་གྲོལ་དབྱིངས་ཀྱི་ངོ་བོར་ཡེ་སངས་རྒྱས༔ དྲང་སྲོང་ཡེ་ཤེས་མགོན་པོའི་དབུ་འཕང་བསྟོད༔ དེ་ལྟར་དབུ་འཕང་བསྟོད་པའི་མཐུ་བྱིན་གྱིས༔ གནས་སྐབས་ཡིད་སྲུབ་སྡེར་བཅས་ཚར་ཆོད་པའི༔ དྲག་པོ་མཐུ་ཡི་གྲགས་པས་ས་སྟེང་ཁྱབ༔ སངས་རྒྱས་བསྟན་པའི་ལྕགས་རིར་ཡོངས་འཁོར་ནས༔ མཐར་ཐུག་དྲང་སྲོང་གོ་སར་སྙོགས་པར་ཤོག༔ ཅེས་པ་འདི་སུས་ཀྱང་སྔོན་ཚེ་གོང་བསྟན་གྱི་་སངས་རྒྱས་འདི་དག་དང་༔ དུས་ཕྱིས་སུ་སངས་རྒྱས་རིན་ཆེན་མང་གི་སྤྱན་སྔར་གདུལ་བྱ་ལམ་ལ་སྤྲོ་བ་བསྐྱེད་པའི་ཕྱིར་དུ་ཐུགས་བསྐྱེད་ནས༔ བསྟན་པའི་དགེ་འདུན་བྱང་ཆུབ་སེམས་དཔའ་ཆེན་པོར་བཞུགས་ཚུལ་དང་༔ ཡང་འགལ་བྱེད་ཆམ་ལ་འབེབས་མཛད་དྲག་པོའི་ཆོ་རོལ་གྱིས་བསྟན་པ་བསྲུང་བའི་ཐུགས་དམ་ཀློང་དུ་མ་གྱུར་བཞིན་དུ༔ གཟའ་བཏོན་ན་འཁུ་ལྡོག་ཆེ༔ གོལ་འགྲོ་ཟེར་བ་ལ་སོགས་པའི་ཚུལ་མ་མཐོང་བའི་གསལ་སྒྲོན༔ ལོག་རྟོག་གི་གཉེན་པོ༔ ཡེ་ཤེས་གཟའ་རྒོད་ཀྱི་ཡོན་ཏན་ལ་ངེས་ཤེས་ཆེན་པོའི་སྒོ་ནས་བསྟོད་པའོ༔ ཡང་ཡེ་ཤེས་པ་ལས་འཇིག་རྟེན་མྱུར་ཞེ་ན་དེ་ནི་སྨྲེ་ངན་ཤོར་བ་ཡིན་གྱི༔ གཞན་དུ་ཆགས་ཐོགས་མེད་པའི་ཡེ་ཤེས་ཀྱི་གཟིགས་པ་མངའ་ཞིང་༔སྟོབས་བཅུའི་སྟོབས་དང་ལྡན་པ་ཞིག་ལས༔ མི་ཤེས་པའི་རྒྱུ་ཡོད་ཅིང་༔ ལས་ཉོན་གྱི་གཞན་དབང་དུ་སོང་བ་དང་༔ སྟོབས་ཉི་ཚེ་བ་ཞིག་གི་མྱུར་ན་གད་མོའི་གནས་སུ་ཆེ་བ་དེ་ལས་གཞན་སུ་ཡོད་ཧོ་ཧོ༔ དེས་ནི་སྲིད་ཞི་ཀུན་ཁྱབ་ཀྱི་སྤྱི་གཟུགས་འདིའི་ཡོན་ཏན་སྲུང་མ་གཞན་གྱིས་འགྲན་ཟླ་མེད་པའི་དབང་གིས་རྒྱལ་པོ་ཆེ་ཧོ༔ ས་མ་ཡཱ༔ རྒྱ་རྒྱ་རྒྱ༔ཅེས་པ་འདི་ཡང་ཟླ་བ་ཞེས་བྱའི་བསྐུལ་བ་དོན་ཡོད་པའི་སླད་དུ། རང་བཞིན་རྫོགས་པ་ཆེན་པོའི་དོན་གྱི་ཉམས་མྱོང་གིས་དབུལ་ནའང་ཚིག་ཙམ་ཡང་རྣལ་འབྱོར་དུ་བྱེད་པར་སྤྲོ་བ་འཕེལ་ཞིང་། རིག་འཛིན་བརྒྱུད་པའི་ཞལ་ལུང་ལས། སྤྱིར་འཁོར་འདས་ཆོས་སྐུར་གོ་བ་དང་། ཁྱད་པར་དྲང་སྲོང་ཆེན་པོ་ཡེ་ཤེས་པར་རྟོགས་པའི་ངེས་བརྗོད་དུ་ག་གཱ་ཨ་བྷྱེ་ཞེས་བྱའི་བཀོད་པ་ཐོག་མཐའ་བར་གསུམ་ཀུན་ཏུ་དགེ་བར་གྱུར་ཅིག །དགེའོ། །དགེའོ། །སརྦ་མངྒ་ལཾ།།