གཏེར་སྲུང་རྨ་གཉན་སྤོམ་རའི་སྒྲུབ་ཐབས་བསྡུས་པ་བསོད་ནམས་ལྗོན་ཤིང་།
གཏེར་སྲུང་རྨ་གཉན་སྤོམ་རའི་སྒྲུབ་ཐབས་བསྡུས་པ་བསོད་ནམས་ལྗོན་ཤིང་བཞུགས་སོ༔
ན་མོ་གུ་རུ་པདྨ་ཀཱ་ར་ཡེ༔ བརྡ་ཡིག །གཏོར་མ་པདྨ་འདབས་བརྒྱད་སྟེང་༔ ནོར་བུ་གཅིག་རྡོག་འདབ་བཞིའི་ཚུལ༔ མཆོད་གཏོར་དཀར་བཤོས་སྦྲུལ་དཀྲིས་ཅན༔ ཉ་སྦྲུལ་སྦལ་ལྕོང་དག་གིས་བསྐོར༔ དར་དང་རཏྣའི་བརྒྱན་པར་བྱ༔ རང་ཉིད་ཡི་དམ་ང་རྒྱལ་གྱིས༔ ཧཱུྃ༔ རང་ཉིད་ཡི་དམ་ལྷར་གསལ་བའི༔ མདུན་དུ་བཻཌཱུར་སྐུ་མཁར་ལ༔ རིན་ཆེན་ཤེལ་གྱི་ཁ་པད་ཅན༔ དེ་ནང་པདྨའི་དམ་འཛིན་པ༔ གཏེར་སྲུང་རྨ་གཉན་ལྷ་ཆེན་པོ༔ སྐུ་མདོག་ཉ་རྒྱས་ཟླ་བའི་མདངས༔ ཞལ་གཅིག་ཕྱག་གཉིས་གནོད་སྦྱིན་ཉམས༔ ཕྱག་གཡས་ས་ལུའི་ལྗང་བུ་དང་༔ གཡོན་པས་རིན་ཆེན་གཏེར་བུམ་བསྣམས༔ ཞབས་གཉིས་རིན་ཆེན་ཁྲི་སྟེང་དུ༔ རྟ་བབས་སྐྱིལ་མོ་ཀྲུང་གིས་རོལ༔ སྐུ་ལ་ནང་ནས་དཔའ་ཆས་དང་༔ ཕྱི་རོལ་ཆུ་དར་དཀར་པོ་ནི༔ གསེར་གྱི་ཧ་རིས་བཀྲ་བའི་བེར༔ གསོལ་ནས་བདག་ལ་རིངས་བས་གཟིགས༔ ཕྱོགས་བཞིའི་པདྨའི་གདན་སྟེང་དུ༔ རྡོ་རྗེ་དྲག་རྒྱལ་གཡོན་ནས་འདུད༔ སྲས་མཆོག་ནོར་བུ་དགྲ་འདུལ་མདུན༔ ཞིང་བོ་གོང་རྒྱལ་དྲག་བཙུན་གཡས༔ ལྕམ་གཅིག་རྡོ་རྗེ་གཡུ་སྨན་རྒྱབ༔ བཙུན་མོ་རིན་ཆེན་མཛེས་ཚུལ་དང་༔ དཔའ་བོ་བློན་པོའི་ཆ་ལུགས་བསྐྱེད༔ ཕྱི་རིམ་གཉན་དམག་འབུམ་གྱིས་བསྐོར༔ ཀུན་ཀྱང་ཀྭི་བསྭོ་ཆ་སྒྲ་སྒྲོགས༔ ལས་བྱེད་སྤྲུལ་བ་བསམ་མི་ཁྱབ༔ ཐུགས་ཀར་བཻ་ལས་འོད་འཕྲོས་པས༔ དམ་ཚིག་གནས་ནས་སྐད་ཅིག་གིས༔ ཡིད་ལྟར་མགྱོགས་པའི་རྫུ་འཕྲུལ་གྱིས༔ བྱོན་ནས་གཉིས་མེད་བརྟན་པར་བཞུགས༔ བསྟན་པ་བསྲུང་ཕྱིར་ཡིད་ཕྱག་འཚལ༔ ས་བཅུའི་ཡོན་ཏན་ལྡན་ལ་བསྟོད༔ ཐུགས་སྲོག་མཐའ་མར་སྔགས་ཀྱིས་བསྐོར༔བཟླས་པས་དམ་ཚིག་སྲོག་ཐོབ་བསམ༔ ཨོཾ་བཱཻ་ནཱ་ག་ཕུ་ཏྲི་པཱ་རི་ཛ་ཀྵཾ་ཤྲཱི༔ ཛ་ཛ༔ ཀུ་ལུ་མིན་མལ་ས་མ་ཡ་ཕེཾ་ཕེཾ༔ ཞེས་བཟླའོ༔ སྤྲུལ་བ་ལས་ལ་དགོངས་ཙ་ན༔ རེས་འགའ་དཀར་གསལ་མདུང་དར་དང་༔ རིན་ཆེན་བུམ་པ་འཛིན་པ་དང་༔ རེས་འགའ་སེར་པོ་ནོར་བུ་འཛིན༔ རེས་འགའ་དབང་མདོག་ལྕགས་ཀྱུ་དང་༔ པད་འཛིན་རེས་འགའ་བུང་བས་མདོག༔ ཕྱག་ན་རལ་གྲི་ཞགས་པ་འཛིན༔ གཞན་ཡང་རྣམ་འགྱུར་བསམ་མི་ཁྱབ༔ རྟོག་གེ་གཅིག་དུ་ཞེན་པ་ཚོས༔ དཔེར་ན་ཤཱཀྱ་ཐུབ་པ་ནི༔ རྟག་པར་ཕོར་བ་བཟུང་བར་བལྟ༔ དེ་ཡང་གཞན་གྱིས་གད་མོའི་གནས༔ ཧ་ཧ༔ རེས་འགའ་བཞོན་པ་ཡོད་པའང་༔ རྟ་དཀར་གླང་ཆེན་ལ་སོགས་པ༔ དྲེགས་པའི་ཆོ་རོལ་བསམ་མི་ཁྱབ༔ རྫུ་འཕྲུལ་ཅན་གྱི་རྣམ་པ་ནི༔ བསམ་གྱིས་མི་ཁྱབ་ཕ་མཐའ་ཡས༔ སྔགས་འདི་མཁའ་འགྲོའི་སྐད་དུ་བསྒྱུར༔ དེ་ཡིས་ལས་མྱུར་སྙིང་ཡང་ཉེ༔ པདྨ་ཀཱ་རའི་ཁྱད་ཆོས་སོ༔ གཉིས་པ་གསོལ་མཆོད་བསྡུས་པ་ནི༔ རཾ་ཡཾ་ཁཾ༔ ཨོཾ་ཨཱཿཧཱུྃ༔ དངོས་འབྱོར་ཡིད་ཀྱི་རྣམ་སྤྲུལ་ནས༔ སྔགས་དང་ཕྱག་རྒྱའི་སྟོབས་ཤུགས་ཀྱིས༔ ཡེ་ཤེས་རོལ་མོར་བྱིན་གྱིས་བརླབས༔ དག་གཙང་ཟག་མེད་མཆོད་པའི་སྤྲིན༔ གཅིག་ལས་དུ་མ་འཆར་བའི་འཕྲུལ༔ གཏེར་སྲུང་ས་བཅུའི་དབང་ཕྱུག་ལ༔ ཐ་ཚིག་བཀའ་ཡི་ཆད་ཐོར་འབུལ༔ ལྷ་ཆེན་སྤོམ་རའི་ཐུགས་དམ་བསྐང་༔ རྡོ་རྗེ་དྲག་རྒྱལ་ཐུགས་དམ་བསྐང་༔ སྲས་མཆོག་ནོར་བུའི་ཐུགས་དམ་བསྐུང་༔ སྐུ་ཞང་དྲག་བཙུན་ཐུགས་དམ་བསྐང་༔ ལྷ་ལྕམ་གཡུ་སྨན་ཐུགས་དམ་བསྐང་༔ འཁོར་ཚོགས་སྤྲུལ་པའི་ཐུགས་དམ་བསྐང་༔ བཀའ་སྡོད་ཕྱག་ཚང་ཐུགས་དམ་བསྐང་༔ ཡང་འཁོར་ལྷ་སྲིན་ཐུགས་དམ་བསྐང་༔ ཐུགས་དམ་བསྐང་བའི་ཡོན་ཏན་གྱིས༔ ཕོག་ཐུག་སྤང་བླང་ཉམས་ཆགས་བཤགས༔ ནོར་དང་གཡང་གི་དངོས་གྲུབ་སྩོལ༔ དགྲ་བགེགས་ཀླ་ཀློའི་རྒྱུ་འགྲུལ་ཆོད༔ བཀྲ་ཤིས་བདེ་ལེགས་དཔལ་རྒྱས་མཛོད༔ ཨོཾ་བཛྲ་ཤྲཱི་རཏྣ་ཨེ་དཾ་བྷ་ལིངྟ་ཁཱ་ཧི༔ ཅེས་བརྗོད༔ བསྡུ་ན༔ ཀྱཻ༔ གཏེར་སྲུང་རྨ་རྒྱལ་སྤོམ་ར་ནི༔ འཁོར་དང་ཡང་འཁོར་བཅས་པ་ལ༔ ཟག་མེད་བདུད་རྩིའི་ ༼ བསང་མཆོད་འབུལ༔ ཞེས་ཁ་བསྒྱུར། ༽ མཆོད་པ་འབུལ༔ རྐྱེན་སོལ་བསམ་དོན་ལྷུན་གྲུབ་མཛོད༔ རཏྣ་ཨེ་དཾ་བ་ལིཾ་ཏ་དྷཱུ་པྤེ་པཱུ་ཛ་ཁཱ་ཧི༔ དེ་ནས་གཡང་འབོད་བསྒྲུབ་པ་ནི༔ ཨོཾ་བཻ་ཀརྞ་ཌ་ཤ་ཥ་ཡནྟུ་ཙ་ཌ་ནོར་དང་གཡང་གི་དངོས་གྲུབ་སྩོལ་ཅིག༔ གླེ་པ་ཁ་ཌ་ལ་ཡ་ཤསྟི་སྤཱ་པཱ་ཧོ༔ ཞེས་བཟླས་མཐར༔ ཧཱུྃ༔ སྔོན་ཚེ་ཐུགས་བསྐྱེད་རྨ་གཡང་ནོར་འཛིན་པ༔ བསྐུལ་ལོ་མ་གཡེལ་ཡལ་གམ་ཅི་བཞིན་དུ༔ འཛད་མེད་གཏེར་དང་རྐང་བཞི་ཕྱུག་གི་གཡང་༔ རྨ་གཡང་ཟས་གཡང་བང་མཛོད་ཤེས་རབ་སྟོབས༔ གཟུགས་དང་གཟི་བརྗིད་བཀྲ་ཤིས་གཟུང་སྨོན་དབང་༔ སངས་རྒྱས་དཔལ་ཡོན་གྲུབ་པའི་ཉམས་མྱོང་དང་༔ དབང་ཕྱུག་བརྒྱད་དང་སྲིད་ཞིའི་ཕུན་སུམ་ཚོགས༔ མ་ལུས་བསྒྲུབ་མཆོག་བདག་ལ་སྩལ་དུ་གསོལ༔ གཡང་གི་ཟོ་ཞབས་མི་འཕར་བརྟན་པ་དང་༔ ཕར་འགྲོའི་རྗེས་སུ་མ་བཏང་ཚུར་འོང་གི༔ མི་ཕྱུགས་ཀུན་ཀྱི་རྗེས་སུ་གཡང་ཁུག་ཅིག༔ ཁ་ནས་མི་བོ་ཞབས་ལས་མི་ཟག་པར༔ བརྒྱ་སྟོང་ཁྲི་འབུམ་འཕེལ་བའི་ཕྲིན་ལས་མཛོད༔ ཀུན་ཀྱང་སྒྲུབ་མཆོག་བདག་ལ་སྩལ་དུ་གསོལ༔ ཁུ་ལེ་ཁུ་ཁུ་ཕྱྭ་ཁུ་ཡེ༔ ཕྱྭ་ཁ་ལ་ལ་ཁ་ཁ་ཁ་སྟོབས༔ ཞེས་པས་འཐུས་སོ༔དགྲ་ལ་གཟས་ན་གསོལ་མཆོད་མཇུག་ཏུ༔ སྔོན་ལས་འཕྲལ་རྐྱེན་ལོ་ཟླ་ཞག་དུས་ཚོད༔ སྤར་སྨེ་ཚེས་གྲངས་ཕྱི་ནང་དགྲ་དར་བ༔ ཁ་དཀར་ཞེ་གནག་སྦྱོར་ངན་ཡ་ག་སྒྲོགས༔ སྐུ་འཕྲོག་དམག་ཇག་འགྲན་བཙལ་འགྲས་ཚོལ་མཁན༔ མིང་གི་ལྷག་མ་མེད་པར་རྡུལ་དུ་བརློག༔ དགྲ་ཁ་ཆོད་ལ་མཚོན་ཁ་བསྒྱུར་དུ་གསོལ༔ དབུ་རྨོག་ལུས་ཀྱི་གོ་བཙན་ཁྱོད་ཀྱིས་མཛོད༔ རྟག་པར་མེལ་རྩེ་བྱ་ར་མ་གཡེལ་ཅིག༔ བན་བྱད་བོན་བཙོ་ཀྱིམ་ཤང་གཤེད་བསྡེབས་དང་༔ མནན་གཏད་ཁྲམ་ཤྭ་ཧོམ་ཟོར་ངན་པ་བཟློག༔ བསྲུང་སྐྱོབས་རྡོ་རྗེའི་གུར་ཁང་མགོན་དུ་གསོལ༔ ནམ་ཡང་ལྡང་མེད་གསང་གསུམ་བྲོ་རྒྱས་ཐོབ༔ སརྦ་ཤ་ཏྲུཾ་བིགྣན་མ་ར་ཡ་བྷྱོ་བཟློག་ནན་ནན༔ ཅེས་བྱས་ནས་ཐལ་མོ་བརྡབ་པས་འཐུས་སོ༔ ཅེས་པ་འདི་ཡང་བཀའ་གཉེར་ཆེན་པོའི་མདུན་ན་འདོན་གྱིས་ཇི་སྨོན་བཞིན་ག་གཱ་ཨ་བྷྱེས་སོ། །