བཀའ་བསྲུང་གཉན་པོ་གང་ལ་སྦྱར་ཆོག་པའི་ཕྲིན་བཅོལ།

བཀའ་བསྲུང་གཉན་པོ་གང་ལ་སྦྱར་ཆོག་པའི་ཕྲིན་བཅོལ་ནི༔ ཧོ་དགོངས་སུ་གསོལ་ལོ༔ ལྷ་ཆེན་དབང་ཕྱུག་ཆེན་པོ་ཡབ་ཡུམ་སྤྲུལ་འཁོར་བཀའ་སྡོད་དང་བཅས་པ་རྣམས་བདག་ལ་སྙན་གསན་ཅིང་དགོངས་སུ་གསོལ༔ དུས་གསུམ་གྱི་རྒྱལ་བ་སྲས་དང་བཅས་པ་རྣམས་ཀྱི་བཀའ་དང་ཐ་ཚིག་གཉན་པོ་གཏའ་རུ་བཞག་ཅིང་དཔང་དུ་གཙུག་ནས་ཁྱེད་རྣམས་ལ་ཕྲིན་ལས་གཉན་པོ་བཅོལ་བ་ནི་སྨན་གཏོར་རཀྟ་ཕྱི་ནང་གསང་མཆོད་བདུད་རྩི་གསེར་སྐྱེམས་ཀྱི་མཆོད་པ་རྒྱ་ཆེན་པོ་འདི་བཞེས་ལ་བདག་ཅག་རྣལ་འབྱོར་བསྒྲུབ་པ་པོ་རྣམས་ལ་དགྱེས་པའི་ཞལ་སྟོན་ཅིག༔ སྒྲུབ་པའི་རྟགས་ཕྱུངས་ཤིག༔ འདོད་པའི་དོན་སྒྲུབ་ཅིག༔ དཔལ་དང་གཟི་མདངས་བསྐྱེད་ཅིག༔ ཚེ་དང་འབྱོར་བ་སྤེལ་ཞིག༔ འཁོར་དང་བསྟན་པ་སྐྱོངས་ཤིག༔ ཆགས་ཆེ་དང་ཉམས་ང་བཟློག་ཅིག༔ མདུན་གྱི་མཁར་བ་གྱིས་ཤིག༔ རྒྱབ་ཀྱི་བརྟེན་ས་གྱིས་ཤིག༔ ཉིན་གསུམ་གྱི་བྱ་ར་གྱིས་ཤིག༔ མཚན་གསུམ་གྱི་མེལ་ཚེ་གྱིས་ཤིག༔ ནད་དང་གནོད་པ་ལས་སྐྱོབས་ཤིག༔ མི་ལ་ན་ཚ་མ་བཏང་ཞིག༔ ཕྱུགས་ལ་གོད་ཁ་མ་བཏང་ཞིག༔ ནོར་རྫས་ལ་སྟོར་བརླག་མ་བཏང་ཞིག༔ བསམ་པ་ལ་བར་ཆད་མ་བཏང་ཞིག༔ ཁ་འཛིན་དང་སྡོང་གྲོགས་མཛོད་ཅིག༔ དགྲ་རྐུན་དང་གཅན་ཟན་གྱི་གནོད་འཚེ་སྲུངས་ཤིག༔ སྡང་བའི་དགྲ་སོད་ཅིག༔ གནོད་པའི་བགེགས་ཐུལ་ཅིག༔ བར་ཆད་ཀྱི་རྐྱེན་བཟློག་ཅིག༔ ལེགས་པ་བརྒྱ་དང་སྤྲོད་ཅིག༔ ཉེས་པ་སྟོང་དང་བསྣོལ་ཞིག༔ མཐུན་རྐྱེན་ཡིད་བཞིན་དུ་སྒྲུབས་ཤིག༔ ཚེ་དང་བསོད་ནམས་གདུལ་བྱ་དང་ཕྲིན་ལས་དར་ཞིང་རྒྱས་པར་མཛད་དུ་གསོལ༔ རྣལ་འབྱོར་བ་བདག་གིས་འདི་ཕྱིའི་རེ་སྨོན་དམ་པ་ཡིད་བཞིན་དུ་གྲུབ་ནས་བཀྲ་ཤིས་དང་བདེ་ལགས་ཕུན་སུམ་ཚོགས་པར་མཛད་དུ་གསོལ༔ དགེའོ། །ཀྱཻ༔ ཟླ་བའི་དབང་པོ་ཚེ་རིང་མ༔ གནོད་སྦྱིན་དམར་ནག་འཁོར་བཅས་ཀྱི༔ རྣལ་འབྱོར་བདག་ལ་བྱམས་བརྩེའི་དགོངས༔ གསོལ་མཆོད་ཐུགས་དམ་གཉན་པོ་བསྐང་༔ ཁྱད་པར་བདག་ལ་སྡང་བའི་དགྲ༔ བུ་ལོན་མེད་པར་ཤ་འདེད་བྱེད༔ བརྙེས་བཙུག་མ་ཉེས་ཡ་ཀ་སྒྲོགས༔ བརྡེག་བརྡུང་གསོད་གྲབ་ཕོད་བཙུགས་ཀུན༔ ད་ལྟ་ཉིད་དུ་ཐལ་བར་བརློག༔ ལྟས་ངན་ཆོ་འཕྲུལ་ཡེ་འདྲོག་ཐོངས༔ རྟགས་ཐོན་བརྟུལ་ཞུགས་ཆེ་རྔམས་ངོམས༔ བཀའ་དམ་གཉན་པོའི་ཁྲིམས་དེ་ཡིན༔ མ་འདའ་བཛྲ་ས་མ་ཡཱ༔ རཱ་ཛ་ཙནྡྲ་ས་མ་ཡ་དགྲ་བགེགས་ཆེ་གེ་མོ་ཞེས་མིང་སྤེལ་ལ་མ་ར་ཡ་རྦད་སོད༔ ཞེས་གཏོར་མ་ཤ་ཁྲག་རུས་པར་བསམ་ལ་མ་ཧཱ་ས་རཀྟ་ཙིཏྟ་ཀོ་རོ་ཙ་ན་ཀཾ་ནི་རི་ཏི་ཁ་ཧཱི༔ སརྦ་དུ་ཁ་བི་ཤྭ་ཕོབ་ཡ་ཕོབ་ཡ་ཨ་ཧཱ་ར་ཁཾ་ཧོ༔ ཅེས་ཀྱང་བླ་མ་དམ་པ་ཐུབ་ཆོས་བཀའ་མ་ལྡོག་པར་ག་གཱས་སོ། །