དགེ་བསྙེན་ཆེན་པོ་རོལ་མོ་དབང་གཞུའི་གསོལ་བསངས་དགོས་འདོད་ཀུན་འབྱུང་།

དགེ་བསྙེན་ཆེན་པོ་རོལ་མོ་དབང་གཞུའི་གསོལ་བསངས་དགོས་འདོད་ཀུན་འབྱུང་བཞུགས་སོ༔

ཧཱུྃ༔ སྔོན་ཚེ་པདྨ་ལས་སྐྱེས་གར་དབང་པོའི༔ སྤྱན་སྔར་རོལ་མོའི་མཚམས་སྦྱར་དབང་ཐོབ་པའི༔ དགེ་བསྙེན་ཆེན་པོ་པདྨ་དབང་གི་རྒྱལ༔ སྐུ་མདོག་དམར་པོ་དགྱེས་ཆགས་ཉམས་ཀྱིས་བརྗིད༔ དབང་གི་ཕྱག་ན་རྡོ་རྗེ་ནོར་བུ་ལ༔ དགྲ་བགེགས་ཚར་གཅོད་རྣལ་འབྱོར་དགྲ་ལྷ་ཆེ༔ དོར་སྟབས་ཀྱིས་རོལ་གེ་སར་ཉིན་མཚན་མགོན༔ རྟག་ཏུ་གནས་པའི་རྒྱལ་ཚུལ་རྔམས་པ་ལ༔ རེས་འགའ་མི་དཀར་རྟ་དཀར་མདུང་དར་ཅན༔ ཞི་བའི་ལས་ལ་དབང་བསྒྱུར་འཛུམ་བག་བཅས༔ རེས་འགའ་སུ་ཝརྞ་ ༼ སེར་བོ་ ༽ཡི་ཁ་དོག་ཅན༔ ཕྱག་མཚན་རིན་ཆེན་ཚེ་ཡི་བུམ་པ་ཅན༔ རེས་འགའ་དབང་གི་ཁ་དོག་ཆགས་པ་ལ༔ ཕྱགས་ན་ལྕགས་ཀྱུ་ལྕགས་སྒྲོག་སྟེང་འོག་བསྣོལ༔ རེས་འགའ་ཆར་སྤྲིན་གར་དགུའི་རང་མཚན་ངོམས༔ ཕྱག་ན་དགྲ་སྙིང་ཉམས་པ་ཞལ་དུ་སྟོབས༔ ཏི་ར་ལ་རོལ་གྱད་ཀྱི་དོར་སྟབས་སུའོ༔ ཕྱོགས་བཞིར་མཆེད་བརྒྱད་དང་ནི་ལྕམ་དྲུག་གིས༔ འདུད་ཅིང་ལས་བྱེད་རྡོ་རྗེ་དགྲ་འཇོམས་རྩལ༔ ཕྱག་གཉིས་སྤུ་གྲི་ནོར་གཞོང་བམ་ཞགས་དཔྱང་༔ ཙ་ར་བཅིབས་ཤིང་བསེ་ཐེབ་ཆོས་གོས་གསོལ༔ རལ་བ་ཁམ་སེར་བརྫེས་ཤིང་ཁྲོ་ཉམས་ཅན༔ འཁོར་ཚོགས་དམག་ཆས་བྱེ་བ་དྲུག་སྡེར་བཅས༔ ཡིད་ལྟ་མགྱོགས་པའི་ཤུགས་ཀྱིས་གཉིས་མེད་རོལ༔ ཀུན་བཟང་མཆོད་སྤྲིན་ལ་འགྲན་བསང་གི་རྫས༔ ཟླ་རྒྱས་ཟླ་ཁྲུམ་ཇ་ཆང་གསེར་དངུལ་སོགས༔ དངོས་འབྱོར་གྱིས་འཕྲུལ་ཕྱི་ནང་གསང་སྦྱོར་སྒྲོལ༔ ཕུབ་ཁྲབ་ལ་སོགས་དཔའི་བོའི་ཆས་སྣ་ཚོགས༔ རིན་ཆེན་སྣ་བདུན་རྒྱལ་སྲིད་བཀྲ་ཤིས་རྟགས༔ མདོར་ན་དག་གསུམ་གྱིས་བསྐྲུན་མཆོད་པ་ནི༔ དཀར་གསུམ་ལ་སོགས་སྡིག་གིས་མ་སྨད་པས༔ དགེ་བསྙེན་ཆེན་པོ་འཁོར་བཅས་བསང་ཞིང་བརྔན༔ ༼ གསོལ་མཆོད༔༽ཀ ༽ཡང་ཅིག་འདི་ལྟར༔ གསེར་དངུལ་བཻཌཱུར་ཡལ་ག་རབ་དུད་ཅིང་༔ སྔོན་ཚེ་སྣང་སྲིད་དབང་བསྒྱུར་རྣལ་འབྱོར་བས༔ རྟེན་འབྲེལ་ནུས་པ་མངོན་གསུམ་བྱིན་བརླབས་བཅས༔ ཡུལ་ལྷའི་རྒྱལ་པོ་ཆེན་པོ་འཁོར་བཅས་བསངས༔ རྨུགས་པ་ཀུན་སེལ་འཐིབ་པ་ཀུན་དྭངས་ནས༔ འཁོན་སྡུམ་འཁྲུགས་བཅོས་གསོལ་མཆོད་ཐུགས་དམ་བསྐང་༔ ཁ ༽ བརྩེ་བས་རྗེས་སྐྱོངས་ཕྲིན་ལས་རབ་འབྱམས་པ༔ གང་བཅོལ་ཐམས་ཅད་ལྷུན་གྱིས་འགྲུབ་པར་མཛོད༔ བཀའ་དང་དམ་ལ་མ་འདའ་དམ་ཚིག་ཅན༔ ཞེས་པ་འདི་ཤིན་ཏུ་སྦས་པའི་རྣལ་འབྱོར་བ་ཀུན་བཟང་པདྨའི་ངོར་སྙིགས་དུས་ཀྱི་སྔགས་གཟུགས་པདྨ་ཀློང་ཡངས་ངམ་ག་གཱ་ཨ་བྷྱེས་རྨི་ལམ་འོད་གསལ་གྱི་མཐོང་སྣང་བཞིན་བྲིས་པ་སརྦ་མངྒ་ལཾ། །རོལ་མོའི་བསང་བསྡུས་ནི༔ ཀྱཻ༔ ཡུལ་ནི་ཀཻ་ལ་ཤ་ཡི་ཟླུམ་ར་ནས༔ དགེ་བསྙེན་ཆེན་པོ་རོལ་མོ་དབང་གི་རྒྱལ༔ ཟག་མེད་བདུད་རྩི་འདོད་དགུའི་བསང་མཆོད་འབུལ༔ རབ་འབྱམས་ཕྲིན་ལས་ལྷུན་གྱིས་གྲུབ་པར་མཛོད༔ ཅེས་ཀྱང་ག་གཱས་སོ། །གསེར་འཛོང་གསོལ་བསྡུས་ནི༔ ཕུད་དང་གཏོར་མ་ཟླུམ་པོའི་མཆོད༔ ཀྱཻ༔ དགེ་བསྙེན་རྡོ་རྗེ་ཐོགས་མེད་རྩལ༔ འཁོར་དང་བཅས་པ་ཐམས་ཅད་ལ༔ ཕུད་དང་གཏོར་མ་འདོད་ཡོན་སྤྲིན༔ མཆོད་དོ་འབུལ་ལོ་ཐུགས་དམ་བསྐང་༔ ཆོས་སྲིད་བསྟན་པའི་མངའ་ཐང་བསྐྱེད༔ འཚོ་བ་སྦྱོར་ལ་ཉམས་རྟོགས་སྤེལ༔ བཅོལ་པའི་ཕྲིན་ལས་འགྲུབ་པར་མཛོད༔ ཅེས་བརྗོད༔ ༈ དེ་ནས་ཀླུ་མཆོད་ནི༔ ཛཾ༔ གཙང་སྦྱར་འདོད་ཡོན་ཕུན་སུམ་འཚོགས༔ གདེང་ཀ་ནོར་བུའི་འོད་ཟེར་འབར༔ ཀླུ་ནོར་རྣམ་པ་མ་ཚང་མེད༔ བདག་གི་གུས་དང་བཅས་པས་འབུལ༔ བྱམས་བརྩེའི་སྐྱོངས་ལ་དངོས་གྲུབ་སྩོལ༔ ཕྱུགས་གཡང་ཟས་གཡང་ཆར་ལྟར་ཕོབ༔ ཁྲོ་འཁྲུགས་གདུག་རྩུབས་མ་སྟོན་ཅིག༔ བདག་གི་གཏེར་གྱི་བདག་པོ་མཛོད༔ ཅེས་ཀྱང་ག་གཱས་སོ། །ཀྱཻ༔ ཕྱོགས་འདིར་དབང་བཙན་དྲང་སྲོང་ཡང་དག་ཤེས༔ ཡུལ་ལྷའི་ཚུལ་འཛིན་རྡོ་རྗེ་མཐུ་སྟོབས་དཔལ༔ གསོལ་ལོ་མཆོད་དོ་ཐུགས་དམ་གཉན་པོ་བསྐང་༔ མ་འཁུམ་མ་འཁྲུགས་བྱམས་བརྩེའི་རྟུག་ཏུ་སྐྱོང་༔ ཅེས་ཀྱང་འབྲོག་འཇིག་ངོར་ག་གཱས་སོ། །རཾ་ཡཾ་ཁཾ༔ ཨོཾ་ཨཱཿཧཱུྃ༔ འུ་ཅོར་རྫད་དམར་ལ་གནས་པའི༔ བདུད་བཙན་དྲག་རྩལ་འབར་བ་ནི༔ འཁོར་དང་ཡང་འཁོར་བཅས་པ་ལ༔ གསོལ་ལོ་མཆོད་དོ་མངའ་གསོལ་བསྟོད༔ མ་ཤེས་མ་རིག་བག་མེད་པས༔ དཀར་དམར་ཐབ་གཞོབ་ཀུ་ཅོ་དང་༔ རི་བསྐོར་ཤིང་བཅད་ལ་སོགས་པས༔ ཐུགས་འགལ་རྒྱུ་རྐྱེན་ཅི་བྱས་ཀྱང་༔ ཕོག་ཐུགས་འགྲམ་འཁྲུགས་མ་རྐྱེན་པར༔ ཅི་བཅོལ་ཕྲིན་ལས་ཡོངས་འགྲུབ་མཛོད༔ བསྲུང་སྐྱོབས་མེལ་ཚེ་མ་གཡེལ་བར༔ རྟག་ཏུ་ཐུགས་རྗེའི་བཟུང་མཛད་གསོལ༔ ག་གཱས་སོ། །ཙཏྟའི་བསངས་བསྡུས༔ ཛ༔ བདུད་བཙན་ཀླུ་ཡི་ཆོ་རིགས་ཅན༔ ཨོ་རྒྱན་པདྨའི་དམ་འཛིན་པ༔ ཙིཏྟ་དམར་ནག་འཁོར་བཅས་བསང་༔ རྐྱེན་སོལ་བསམ་པ་ལྷུན་གྲུབ་མཛོད༔ ག་གཱས་སོ། །ཀུན་ཏུ་བཟང་མོ་བཛྲ་ཝཱ་ར་ཧི༔ ཉིད་ཞི་བདེ་མཆོག་རྡོ་རྗེ་དྲག་མོ་དང་༔ ཚུར་མཐོང་སྣང་ངོར་སྒོ་རྒྱལ་རི་བཀྲ་རྩལ༔ གསོལ་ལོ་མཆོད་དོ་ཐུགས་དམ་གཉན་པོ་བསྐང་༔ ཕོག་ཐུག་འགྲམ་འཁྲུགས་ཉམས་ཆགས་ཉེས་པ་སྐོངས༔ མི་མཐུན་ཉེར་འཚེའི་མཚན་མ་དབྱིངས་སུ་ཞི༔ བཅོལ་པའི་ཕྲིན་ལས་ཡོངས་སུ་འགྲུབ་པར་མཛོད༔ ཨོཾ་བཛྲ་ཀྲོ་ཏི་རཱ་ཛ་ཡེ༔ སརྦ་ཨ་ཁཾ་ཤུདྡྷེ་ཤུདྡྷེ་ཨཱཿཧཱུྃ༔ ཅེས་པ་འདི་ཡང་པདྨ་མཁའ་ཀློང་ཡངས་པས་སོ། །རཾ་ཡཾ་ཁཾ༔ ཨོཾ་ཨཱཿཧཱུྃ༔ ཀྱཻ༔ ས་ཕྱོགས་འདི་ན་བརྟགས་ཆགས་པའི༔ བཙུན་མོ་སྒོ་རྒྱལ་རི་བཀྲ་ནི༔ འཁོར་དང་ཡང་འཁོར་བཅས་པ་ལ༔ གསོལ་ལོ་མཆོད་དོ་ཐུགས་དམ་བསྐང་༔ ཕོག་ཐུག་འགྲམ་འཁྲུགས་བཟོད་བཞེས་ནས༔ སྡོང་གྲོགས་མཐུན་བསྒྲུབ་བྱམས་བརྩེའི་སྐྱོངས༔ ཤྲཱི་བས་སོ། །