ཀླུ་མཆོད་བསྡུས་པ།
ཀླུ་མཆོད་བསྡུས་པ་ནི༔ མཆོད་གཏོར་བྱིན་གྱིས་བརླབས་པ་ནི༔ རཱ་ཛ་པྲ་བྷ་མ་ལེ་ས་མ་ཡ་ཕེམ་ཛ༔ ཨོཾ༔ འདོད་ཡོན་རྒྱན་གྱི་འཁོར་ལོ་དང་༔ ཀླུ་ནོར་ཆ་མ་ཆོ་དགུའི་ཚོགས༔ ནད་གསོས་སྨན་དང་འཆི་གསོས་རྩི༔ ནོར་བུའི་སྒྲོན་མེ་གདེངས་ཀ་འབུམ༔ མཁའ་ལྡིང་སྐྱོབས་པའི་རྡོ་རྗེར་གུར༔ བཟའ་བཏུང་གོས་རྒྱན་མི་ཟད་དཀོར༔ ཡེ་ཤེས་རོལ་པས་བྱིན་རླབས་ལྡན༔ ཕྱོགས་འདིའི་ས་བདག་ཀུན་གྱི་བཤེས༔ ཀླུ་རྒྱལ་འོད་ཀྱི་ཕྲེང་མཛེས་མཆོད༔ ཡུམ་མཆོག་བཀྲ་ཤིས་ཆར་འབེབས་མཆོད༔ སྲས་གཅིག་ཀུན་ཏུ་དགེ་བྱེད་མཆོད༔ བཀའ་སྡོད་མུན་སེལ་གདུང་སྐྱོབས་མཆོད༔ འཁོར་དང་བཅས་པ་ཐམས་ཅད་མཆོད༔ སངས་རྒྱས་བསྟན་པ་བསྲུང་བ་དང་༔ རྣལ་འབྱོར་ཉམས་རྟོགས་འཚོ་ཆས་བསྒྲུབ༔ ཀླུ་ཡི་གདུག་རྩུབས་མ་བཏང་ཞིག༔ ས་ཕྱོགས་ཡུལ་རིས་བདེ་བ་དང་༔ བཀྲ་ཤིས་བདེ་ལེགས་དཔལ་རྒྱས་ཤོག༔ ཅེས་ཀྱང་རིག་འཛིན་ཆེན་པོའི་གསུང་བཞིན་ག་གཱས་སོ། །༈ ཀླུ་རྒྱལ་ཕྱག་གཡས་ནོར་བུ་དང་༔ གཡོན་འབྲུག་བསྣམ་པ༔ ཡུམ་ཕྱག་གཡོན་བུམ་པ༔ སྲས་སྨན་ཕོར་བསྣམས་པའོ༔ བློན་པོ་སྦྲུལ་ཞགས་དང་༔ ཀུན་ཀྱང་དབུ་ལ་གདེངས་ཀ་འབར་བ༔ སྐུ་སྨད་གསེར་གཡུ་མུ་ཏིག་མུ་མིན་ཀྱིས་སྦྲུལ་དུ་རིམ་པར་འཁྱིལ་བ༔ འོད་ཟེར་ཅན་མའི་རྒྱུན་བསངས་བཞུགས་སོ༔ མུྃ༔ ཆོས་སྐུ་སྣ་ཚོགས་ཡུམ་ཆེན་མོ༔ ལོངས་སྐུ་རྗེ་བཙུན་ཏཱ་རེ་དང་༔ སྤྲུལ་སྐུ་འོད་ཟེར་ཅན་མ་སྟེ༔ སྐུ་གསུམ་དབྱེར་མེད་འགྲོ་འདུལ་དཔལ༔ རང་བཞིན་ཆོས་དབྱིངས་གནས་མཆོག་དང་༔ མ་ལ་ཡ་ཡི་ཚལ་གྱི་རྩེར༔ ལྷ་མོ་ཆེན་མོའི་སྐུར་བཞེངས་པ༔ ཁྲོ་འཛུམ་ལྗང་སེར་འོད་དུ་འབར༔ ཞལ་གཅིག་ཕྱག་གཉིས་གཡས་པ་ཡིས༔ རྣོ་གཅོད་རལ་གྲི་འབར་བ་དང་༔ གཡོན་པའི་ཕྱག་གིས་ལྕགས་སྒྲོག་བསྣམས༔ ཞབས་གཉིས་སེམས་མའི་སྐྱིལ་ཀྲུང་གིས༔ པདྨ་ཉི་མའི་གདན་ལ་བཞུགས༔ འཁོར་དུ་རང་འདྲའི་རིགས་བཞི་དང་༔ བྱེ་བ་འབུམ་སྡེའི་མ་ཚོགས་བསྐོར༔ གདུང་ཤུགས་དད་པས་ཐུགས་དམ་བསྐུལ༔ ཐུགས་རྗེ་ཆེན་པོའི་རྗེས་དགོངས་ལ༔ མཆོད་བརྟེན་གནས་འདིར་གཤེགས་སུ་གསོལ༔ བསངས་རྫས་ ༼ གཏོར་མ་ ༽ ཟག་མེད་མཆོད་པའི་སྤྲིན༔ ནམ་མཁའ་རབ་འབྱམས་མཐའ་ཀླས་པར༔ སྔགས་དང་ཕྱག་རྒྱ་ཏིང་འཛིན་གྱི༔ རོལ་མོ་ཡེ་ཤེས་བྱིན་འབར་བ༔ འགྲོ་བའི་དོན་དུ་སྤྱོད་དུ་གསོལ༔ བདག་དང་སེམས་ཅན་ཐམས་ཅད་ཀྱི༔ ཕྱི་ནང་བདུད་དགྲ་བགེགས་ཀྱི་ཚོགས༔ ཉེ་བར་ཞི་བའི་ཕྲིན་ལས་མཛོད༔ མཐར་ཐུག་མགོན་པོའི་གསང་གསུམ་ཀྱི༔ གོ་འཕང་མཆོག་ལ་རགས་གྱུར་ཅིག༔ ག་གཱས་སོ། །དགེའོ། །དགེའོ། །དགེའོ། །