སྔོན་འགྲོ་རྣམ་གྲོལ་ཤིང་རྟ།

རྡོ་རྗེ་སེམས་དཔའི་དགོངས་ཉམས་ལས༔ སྔོན་འགྲོ་རྣམ་གྲོལ་ཤིང་རྟ་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ འདི་ལ་ཕྱི་ནང་གསང་བ་ཡང་གསང་བཞི༔ དང་པོ་ནི༔ ན་མོ༔ དཀོན་མཆོག་ཀུན་འདུས་བླ་མ་མཁྱེན༔ དལ་འབྱོར་ཡོན་ཏན་ཕུན་སུམ་ཚོགས༔ སྡོམ་གསུམ་སྣོད་གྱུར་དྲུག་ལྡན་ཁམས༔ དོན་དང་ལྡན་པར་བྱིན་གྱིས་རློབས༔ ཕྱི་ནང་བརྟན་གཡོ་གནས་སྐབས་སུ༔ མི་རྟག་གློག་གི་ཟློས་གར་བཞིན༔ འཇིག་མེད་རྟེན་པ་གནས་མིན་ལས༔ བློ་སྣ་འབྱོངས་བར་བྱིན་གྱིས་རློབས༔ འཁོར་བ་མེ་ཡི་འོབ་དང་འདྲ༔ སྡུག་བསྔལ་གསུམ་གྱི་རྟག་ཏུ་གཏུགས༔ བདེ་བར་འཁྲུལ་དང་བཏང་སྙོམས་ལ༔ ངེས་འབྱུང་སྐྱེ་བར་བྱིན་གྱི་རློབས༔ དཀར་ནག་བསླུ་བ་མེད་པ་ལས༔ མཁྱེན་པའི་ཚད་མ་མངའ་བས་གསུང་༔ མཐོང་ཆོས་འགའ་ཡང་མི་བསླུ་བར༔ བླང་དོར་ནུས་པར་བྱིན་གྱིས་རློབས༔ ཡོན་ཏན་ཆེ་བའི་རྙེད་དཀར་ཤེས༔ ངེས་པ་མེད་པའི་འཇིག་པར་རིག༔ མཐོང་བས་རྗེས་སུ་དཔག་པ་ཞུགས༔ སྐྱེ་སྲིད་རང་ལ་མི་རྟོགས་པ༔ ཕྱིན་ལོག་བློ་བཞི་རབ་བཞིག་ནས༔ གཅིག་ཏུ་ཆོས་ལ་བཀོལ་མཉན་གཏུབ༔ ཚེ་འདིར་སངས་རྒྱས་ཐོབ་པ་ཞིག༔ བླ་མའི་ཐུགས་རྗེས་བྱིན་གྱི་རློབས༔ གཉིས་པ་ནང་གི་སྔོན་འགྲོ་ལ༔ ན་མོ༔ ཕྱི་ནང་གསང་བ་ཡང་གསང་གི༔ རྒྱུ་དང་འབྲས་བུ་ལྷུན་གྱིས་འགྲུབ༔ དཀོན་མཆོག་གསུམ་ལ་སྐྱབས་སུ་མཆི༔ ཐུན་མཆོག་བསླབ་བྱ་བདག་གི་བཟུང་༔ ཧོ༔ སྨོན་འཇུག་བདེན་གཉིས་བྱང་ཆུབ་སེམས༔ ཁྱད་པར་བླ་མེད་བྱང་ཆུབ་སེམས༔ རང་བྱུང་ཡེ་ཤེས་བསྐྱེད་པར་བྱ༔ བསླབ་གནས་ཐམས་ཅད་མི་འདར་སྤྱོད༔ ཧཱུྃ༔ ཧཱུྃ་ལས་རྡོ་རྗེ་རྩེ་ལྔ་བ༔ དེ་ཉིད་རྡོ་རྗེ་སེམས་དཔའ་ཤར༔ ཡབ་ཡུམ་སྣང་སྟོང་སྒྱུ་མའི་ཚུལ༔ རང་གི་སྤྱི་བོར་དགྱེས་བཞུགས་པས༔ སྤྱན་སྔར་སྡིག་སྒྲིབ་ཉམས་ཆགས་ཀུན༔ བཤགས་སོ་བྱང་ཞིང་དག་གྱུར་ཅིག༔ ཝཾ་གྱི་དགྱེས་སྤྲིན་ག་བུར་རྡུལ༔ དག་བྱེད་མཆོག་གི་ཁྲུས་སུ་ཞུགས༔ དག་ཚངས་དྲི་མེད་ཤེལ་སྒོང་བཞིན༔ སླར་ཡང་གསང་གསུམ་རྡོ་རྗེའི་ལྡང་༔ ཡི་གེ་བརྒྱ་དྲུག་བཟླས་པ་བྱ༔ ཨོཾ་ཨཱཿཧཱུྃ༔ གཞི་ལམ་འབྲས་བུ་སྣང་སྟོང་ཆོས༔ གདོད་ནས་ལྷུན་གྲུབ་མཎྜ་ལ༔ ལྷ་ལ་ལྷ་རོལ་ཚུལ་དུ་མཆོད༔ སྐུ་གསུམ་འབྲས་བུ་ཐོབ་པར་ཤོག༔ གསུམ་པ་གསང་བ་ནི༔ ཧཱུྃ༔ སྣོད་བཅུད་ཡེ་ནས་འོག་མིན་ཞིང་༔ རང་སྣང་ལོངས་སྐུའི་བཀོད་པ་ཅན༔ རྣམ་སྨིན་ཆས་སུ་རྡོ་རྗེ་ཡི༔ སྤྱི་བོར་ཡེ་ཡིན་རང་གི་རིག༔ རྡོ་རྗེ་བླ་མ་ཀུན་ཏུ་བཟང་༔ ཡབ་ཡུམ་གཉིས་མེད་རོལ་བ་ལ༔ རྣམ་དག་བདུན་གྱི་མཆོད་པ་འབུལ༔ སྒོ་གསུམ་གུས་པའི་གསོལ་བ་འདེབས༔ སྐུ་གསུང་ཐུགས་དང་མཉམ་སྦྱོར་མཛོད༔ ཨོཾ་བཛྲ་གུ་རུ་ས་མནྟ་བྷ་དྲ་ཨ་ཧཱུྃ༔ སངས་རྒྱས་ཀུན་གྱི་ངོ་བོ་ཉིད༔ དཀྱིལ་འཁོར་དབང་ཕྱུག་འཁོར་ལོའི་མགོན༔ གཞི་ལམ་འབྲས་བུས་ཧེ་རུ་ཀ༔ ལྟ་བ་མཇལ་བའི་མཉམ་པར་སྦྱོར༔ གནས་གསུམ་ཁྱབ་འཇུག་ཡེ་ཤེས་ལས༔ དཀར་དམར་སྔོན་པོའི་ཕྲ་རྡུལ་འཕྲོས༔ བུམ་གསང་ཤེས་རབ་དབང་བྱིན་ཐོབ༔ སླར་ཡང་ཧཱུྃ་ལས་བསྐྱར་ཞིང་ཐིམ༔ ཚིག་གི་དབང་ཐོབ་འོད་ཞུ་བས༔ བདག་ཐིམ་དྲི་བཅས་འཛིན་པ་ཞི༔ ཡེ་ཤེས་ཆེན་པོའི་དབྱིངས་སུ་འཁྱིལ༔ ཀ་ཡ་ཝཀྐ་ཙིཏྟ་སིདྡྷི་ཕ་ལ་ཨ་ཧཱུྃ༔ མྱུར་གསང་འོད་ཀྱི་རྩ་བཞི་ནས༔ རྣམ་ཤེས་ཐིག་ལེ་རྡོ་རྗེའི་མཚན༔ རང་བཞིན་སྤྲུལ་པའི་ཞིང་དུ་འཕང་༔ བསྲེ་འཕོ་ཟུང་འཇུག་ཨེ་མ་ཧོ༔ སྲིད་པའི་བར་དོ་མི་མཐོང་བར༔ བླ་མའི་ཐུགས་རྗེའི་ཟང་ཐལ་ཤོག༔ ཧིག༔ མ་རིག་ཉོན་མོངས་ཕུང་འདྲེ་འདིའི༔ སྲིད་པའི་མུན་པར་བཅུད་སྨིན་པོ༔ སྒྱུ་མའི་མགྲོན་དུ་སྒྱུ་མ་འགྱེད༔ སྒྱུ་མའི་རྣལ་འབྱོར་འགྲུབ་པར་ཤོག༔ ཕཊ༔ སྐབས་འདིར་ཕྱིའི་རུ་ཤན་བྱས་ལ་དེ་རྗེས༔ བཞི་པ་ཡང་གསང་ནི༔ ཨོཾ་ཨཱཿཧཱུྃ༔ སྐུ་གསུང་ཐུགས་ཀྱི་ཕྲ་མོ་ཡི༔ གནས་དྲུག་རིགས་དྲུག་ས་བོན་བསྲེགས༔ བསྐལ་མང་སྐད་ཅིག་གནས་སྦྱང་གིས༔ སྦུབས་གསུམ་དབྱེར་མེད་འབྲས་བུར་སྨིན༔ ཨོཾ་ཨཱཿཧཱུྃ༔ འབུམ་བདུན་བཟླས༔ ཧཱུྃ༔ ལུས་ནི་རྡོ་རྗེ་རྩེ་གསུམ་པས༔ བགེགས་དང་ལོག་འདྲེན་ཕྲ་མོ་བསྲེག༔ སྲིད་པ་རྡོ་རྗེའི་དཀྱིལ་འཁོར་དུ༔ ཆེ་བའི་ཡོན་ཏན་ཧོ་ཡི་དབྱིངས༔ ཧོ་བཛྲ་སྭཱ་བྷ་ཝ་ཨཏྨ་ཀོ྅ཧཾ༔ ཧོ་སྦྱངས་བྱས༔ ཧཱུྃ༔ རྒྱལ་ཀུན་སྤྱི་གཟུགས་བླ་མ་གསལ༔ ལྷ་སྔགས་ཆོས་ཉིད་དབྱེར་མེད་ངང་༔ བརྟན་གཡོ་ཐལ་འབྱིན་རྣམ་བཞིའི་སྒྲོལ༔ ཀུན་ཀྱང་ཧཱུྃ་དུ་གཏམས་ཁྲིག་གདལ༔ ཧཱུྃ༔ ཧཱུྃ་སྦྱངས་བྱས༔ ཧཱུྃ་གི་ཏིང་འཛིན་རྟེན་དུ་ཤར༔ ཧཱུྃ་གི་རྫོགས་སྨིན་སྦྱངས་གསུམ་གྱིས༔ ཧཱུྃ་གི་བསླབ་གནས་ལ་བཟླས་ཏེ༔ ཧཱུྃ་ལ་སྐུ་ལྔ་ལྷུན་གྱིས་གྲུབ༔ ཨོཾ་རྡོ་རྗེ་སྐྱིལ་ཀྲུང་རྫོགས་སངས་རྒྱས༔ ཨཱ༔ རྡོ་རྗེ་ཀུན་ཁྱབ་བྱང་སེམས་རོལ༔ ཧཱུྃ་རྡོ་རྗེ་མཆོང་བས་གོམ་སྟབས་ཀྱི༔ ཚངས་པའི་ཡུལ་ས་རྩེ་ནས་གནོན༔ ཕཊ༔ གད་མོ་ཆེན་པོ་གད་རྒྱངས་ཆེ༔ ཧ་ཧ་ཧི་ཧི༔ ཞེས་སོར་གཞུག༔ ཨཱ༔ ནམ་མཁའ་ལམ་ལ་རབ་གནས་པ༔ ཡིད་བཞིན་ནོར་བུ་ཆེན་པོ་དབང་༔ དཔག་བསམ་ཤིང་ཆེན་རྒྱས་པ་ལྟར༔ བུམ་པ་བཟང་བོ་ཆེ་བའི་མཆོག༔ ཞེས་རྣལ་དུ་དབབས་སོ༔ སྐབས་འདིར་དངོས་གཞི་བསྒོམ༔ ཡང་ན་ཡང་གསང་གི་སྔོན་འགྲོ་འདི་མ་བཏོན་ཀྱང་ཆོག༔ འཕོ་བའི་གོང་དུ་ལུས་སྦྱིན་འདོན་ཏེ་དཀྲུག་པར་བྱའོ༔ རྗེས་ལ༔ དགེ་འདིས་མཚོན་དེ་དུས་གསུམ་དུ༔ བྱས་བསགས་དགེ་བའི་རྩ་བ་ཀུན༔ དུས་གསུམ་རྒྱལ་བའི་ཡོངས་བསྔོ་གྲུབ༔ འཁོར་གསུམ་དམིགས་མེད་ངང་དུ་ཨཱ༔ ཅེས་བརྗོད༔ འདི་ནི་འཇམ་ལོ་དང་རྒྱ་མཚོ་གཉིས་ཀྱི་ངོར་ག་གཱས་སོ། །དགེའོ། །བཀྲ་ཤིས་ཤོག །ཧཱུྃ༔ རང་ཉིད་སྐད་ཅིག་དྲན་རྫོགས་སུ༔ ཆེ་མཆོག་རྡོ་རྗེ་ཁྲོ་བོ་ལོད༔ དམར་ནག་ཞལ་གཅིག་ཕྱག་གཉིས་པ༔ ཕྱག་གཡས་གསེར་གྱི་རྡོ་རྗེ་ཡི༔ རྩེ་ལ་སྤྲུལ་བའི་ཁྱུང་ཁྲ་འཕྲོ༔ སྟེང་གདོན་གཟའ་དང་རྒྱུ་སྐར་སྡེ༔ འོག་གདོན་ཀླུ་དང་ས་བདག་ཚོགས༔ མ་ལུས་ཐལ་བའི་བརྡུལ་དུ་རློག༔ ཕྱག་གཡོན་གནམ་ལྕགས་ཕུར་བ་གཟིར༔ ལྕགས་སྡིག་ནག་པོའི་ཟི་ར་འཕྲོ༔ རྒྱལ་འགོང་སྡེ་བརྒྱད་སྤྱི་ནས་ཟ༔ ཞབས་གཉིས་གྱད་ཀྱི་འདོར་སྟབས་སུ༔ སྟག་མོ་གྲུས་མའི་སྟེང་ན་འགྱིངས༔ དུར་ཁྲོད་དཔལ་གྱི་ཆས་རྣམས་རྫོགས༔ ཞལ་ནས་དྲག་པོའི་གད་རྒྱངས་སྒྲོགས༔ འབར་བའི་གར་གྱི་བརྗིད་པ་ཡི༔ སྐུ་ལས་མེ་དཔུང་མཚོན་ཐུན་དང་༔ ཁྲོ་ཆུང་ཕོ་ཉའི་འཕྲོ་འདུ་ཡི༔ གནོད་བྱེད་འབྱུང་པོ་ཐམས་ཅད་ཀུན༔ ཚར་གཅོད་བརྡུལ་དུ་བརླག་པ་དང་༔ ཤ་ཁྲག་ཧབ་ཧབ་ཟོས་པར་བསམ༔ དམ་ཚིག་ཏིང་འཛིན་དཀྱིལ་འཁོར་ལ༔ དབྱིངས་བཞུགས་རྒྱལ་བ་ཞི་ཁྲོའི་ཚོགས༔ སྤྱན་དྲངས་གཉིས་སུ་མེད་པར་བསྟིམ༔ དབྱེར་མེད་ལྟ་བ་མཇལ་ཕྱག་འཚལ༔ ཁམས་གསུམ་དུག་གསུམ་ཤ་ཁྲག་རུས༔ དབྱིངས་གྲོལ་ཆེན་པོའི་མཆོད་པ་འབུལ༔ མཚན་མ་རྣམ་དག་ཤུགས་ཁྲོའི་ངང་༔ སྒོ་གསུམ་གུས་པས་ཕྱག་འཚལ་བསྟོད༔ ཨོཾ་ཨཱཿཧཱུྃ༔ བཛྲ་གུ་རུ་ཁྲོ་བོ་ལོད་ནིརྨ་ཀ་ཡ་ཁྲོཾ་ཏི་པ་ཙ་སརྦ་བིགྣན་ན་ག་རཱ་ཛ་མ་ར་ཡ་ཕཊ༔ ཅེས་ཅི་མང་བཟླའོ༔ མཐར་ནི་མཆོད་བསྟོད་བསྡུ་རིམ་ལ༔ ཧཱུྃ༔ སྣང་སྲིད་གཞིར་བཞེངས་མཆོད་པ་འབུལ༔ ཡོན་ཏན་མངོན་ཤེས་ལྟ་བས་བསྟོངས༔ དག་པའི་རྟེན་འབྲེལ་སྒྱུ་འཕྲུལ་ཀུན༔ མི་དམིགས་ཆོས་ཀྱི་དབྱིངས་སུ་ཨཱ༔ ཅེས་བརྗོད་དེ་ཡི་ནད་ལས་གྲོལ༔ རིག་འཛིན་མཆོག་གི་ངོས་སྐལ་དུ༔ ཁྲག་འཐུང་ག་གཱ་ཨ་བྷྱེས་སོ། །