བསྲེགས་བླུགས་བསྡུས་པ་བཀྲ་ཤིས་རྒྱན་ཕྲེང་།

བསྲེགས་བླུགས་བསྡུས་པ་བཀྲ་ཤིས་རྒྱན་ཕྲེང་ཞེས་བྱ་བ་ནི༔ ཡོད་རིགས་ཀྱི་རྫས་ཚོགས་པར་བྱས་ཏེ༔ རཾ་ཡཾ་ཁཾ༔ གིས་བསྲེགས་གཏོར་སྦྱངས༔ སྭ་བྷ་ཝ་ཡིས་ལྟ་བའི་ངང་༔ ཨོཾ་ཨཱཿཧཱུྃ་བྱུང་བདུད་རྩིར་བརླབས༔ དེ་ནས་ཐབ་ཏུ་མེ་སྦར་ལ༔ ཨཱཾ་པཱཾ་ཧྲཱིཿརཾ༔ ཞེས་མེ་ལྷ་བཞི་ཡིན་པར་ཤེས་པའི་ངེས་ཤེས་བསྐྱེད་དེ་ཡཾ་ཞེས་མེ་ཡབ་ཀྱིས་བསྐུལ༔ དཀྱིལ་འཁོར་གང་ཡིན་གྱི་རྩ་སྔགས་ཀྱིས་དེའི་ནང་དུ་ལྷ་གསལ་ལམ༔ མིན་ཀྱང་ཆོས་ཉིད་དག་མཉམ་ཡུམ་གོས་དཀར་མོའི་བྷ་ག་ལ་དཀྱིལ་འཁོར་ཐམས་ཅད་ཀྱང་རྫོགས་པའི་ལྟ་བསྒོམས་དྲན་པའི་ངང་ནས༔ ཨོཾ༔ མི་དམིགས་ཆོས་དབྱིངས་སྤྲོས་བྲལ་ལས༔ རང་རིག་སོར་རྟོགས་ཤེས་རབ་མེའི༔ རང་བཞིན་ཡེ་ནས་དཀྱིལ་འཁོར་གྱི༔ གསུང་གཅིག་ཀུན་བཟང་ཨེ་མ་ཧོ༔ རང་གི་ཐུགས་ཀ་ནས་འོད་ཟེར་འཕྲོས་པས་ཐུགས་དམ་ཀྱི་རྒྱུད་བསྐུལ་ཏེ༔ འཇིག་རྟེན་དང་འཇིག་རྟེན་ལས་འདས་པའི་མེ་ལྷ་དང་༔ བསྲེགས་ལྷ་བཅོམ་ལྡན་འདས་ཞི་ཁྲོ་རོལ་བའི་འཁོར་ལོ་ཐམས་ཅད་སྤྱན་དྲངས་ཏེ་མཚོ་ལ་ཁ་ཆར་བབས་པ་བཞིན་དུ་སིབ་སིབ་ཐིམ་པར་མོས་ལ༔ ཨོཾ་བཛྲ་ཛྙཱ་ན་ས་མ་ཡ་ཨགྞེ་དེ་ཝ་ཨེ་ཧྱ་ཧི་མ་ཧཱ་ཀ་རུ་ཎི་ཀ་དྲ་ཤ་ཧོ༔ ཛཿཧཱུྃ་བཾ་ཧོ༔ བརྟན་པར་བྱས་ལ༔ ཨོཾ་ཨ་མྲ་ཏེ་སྭཱ་ཧཱ༔ ཞེས་བྱོན་སྐྱེམས་བདུན་ཕུལ༔ ཧཱུྃ་ཧཱུྃ༔ རིགས་ལྔའི་ཞི་ཁྲོའི་དཀྱིལ་འཁོར་ནི༔ འཁོར་དང་བཅས་པའི་ཞལ་ཧོམ་ཡངས༔ གཏི་མུག་འཇོམས་པའི་མེ་ནི་སྨུག་ལ་མཐུག༔ ཞེ་སྡང་འཇོམས་པའི་མེ་ནི་དཀར་ལ་ཚ༔ ང་རྒྱལ་འཇོམས་པའི་མེ་ནི་སེར་ལ་བརྗིད༔ འདོད་ཆགས་འཇོམས་པའི་མེ་ནི་དམར་ལ་ཞུགས༔ ཕྲག་དོག་འཇོམས་པའི་མེ་ནི་ལྗང་ལ་ཟ༔ ཞི་རྒྱས་དབང་དྲག་ཕྲིན་ལས་ལྷུན་གྲུབ་ཅིང་༔ རིགས་ལྔ་མཁའ་འགྲོའི་རང་བཞིན་གྱིས་བརྒྱན་པར༔ ཟག་མེད་བདུད་རྩིའི་མཆོད་པ་འདི་འབུལ་བས༔ སྡིག་སྒྲིབ་ཉམས་ཆག་ཀུན་དག་ནས༔ ཚོགས་གཉིས་ཡོངས་སུ་རྫོགས་པར་ཤོག༔ རྟོག་པའི་ཡན་ལག་བརྒྱད་ཅུ་ནི༔ ཡེ་ཤེས་ལྷ་དང་མཉམ་སྦྱོར་ཞིང་༔ ཆོས་སྐུ་སྐྱེ་མེད་དོན་རྟོགས་ཏེ༔ རང་གྲོལ་གཏན་སྲིད་ཟིན་པར་ཤོག༔ རྩ་སྔགས་མཐར༔ ཨོཾ་མ་ཧཱ་པཱུ་ཛ་ཁཱ་ཧི༔ སརྦ་སིདྡྷི་ཕ་ལ་ཧཱུྃ༔ ཅེས་སམ༔ ཡང་ན་རྫས་སྐོར་ཚང་བར་སོང་མཐར་གཞུང་གི་ཚོགས་འཁོར་རམ་གཞན་དུ་ཕྱི་ནང་གི་མཆོད་པའི་སྔགས་ཐམས་ཅད་ཀྱིས་མཆོད་དེ༔ ཧཱུྃ༔ ཡེ་ཤེས་འཇིག་རྟེན་མེ་དབྱིངས་ན༔ རྫོགས་པའི་དཀྱིལ་འཁོར་བསམ་མི་ཁྱབ༔ ཡོན་ཏན་རྣམ་ཐར་དྲན་པ་ཡིས༔ མཆོད་ཅིང་བསྟོད་དེ་ཕྱག་ཀྱང་འཚལ༔ ཞེས་བསྟོད་ལ༔ ཧཱུྃ༔ ཨ་མྲ་ཏེ་ཁཱ་ཧི༔ ལན་བདུན་གྱིས་གཤེགས་སྐྱེམས་ཕུལ་ལ༔ ཡིག་བརྒྱའི་ནོངས་པ་བཤགས༔ བཛྲ་ཀ་ཡ་ཝཀྐ་ཙིཏྟ་བཛྲ་སྭ་བྷ་ཨཏྨ་ཀོ྅ཧཾ༔ ཞེས་བསྡུ་ལྡང་བསྐྱེད་རྫོགས་ཟུང་འཇུག་གི་ལྷ་སྐུ་དབྱེར་མེད་དྲན་པར་བྱས་ལ༔ དེས་སྤྲོས་པ་མ་ཞི་ན༔ བཛྲ་མུཾ༔ གྱིས་གཤེགས་སུ་གསོལ༔ རང་གཞུང་གི་བསྔོ་སྨོན་བཀྲ་ཤིས་བརྗོད་དོ༔ ཞི་ཁྲོའི་རྩ་བསྒྲུབ་གྱིས་མཚོན་ནས་གང་ལའང་བཏགས་ཆོག་པའི་བསྡུས་ཐབས་འདི་ཡང་ཀུན་ལ་ཕན་ཕྱིར་ཤེས་རབ་བློ་འཕེལ་ཁྲོས་པའི་ངང་ཚུལ་ཅན་གྱིས་བསྐུལ་ངོར་ག་གཱས་སོ། །གཡུ་ལོ་བཀོད་པའི་ཞིང་སྨོན་ནི༔ ཨེ་མ་ཧོ༔ སངས་རྒྱས་ཡེ་ཤེས་དབྱིངས་ཆེན་འབྲལ་མེད་ལ༔ དག་པ་བག་ཆགས་གསུམ་གྱི་རང་དུ་སོང་༔ རྣམ་པར་ཤར་ལས་རང་སྣང་གཡུ་ལོ་བཀོད༔ བདེ་སྐྱིད་ཡོན་ཏན་བསམ་མི་ཁྱབ་ལྡན་པར༔ བྱ་བ་གྲུབ་པའི་ཡེ་ཤེས་གཟུགས་སྐུ་ནི༔ དོན་ཡོད་གྲུབ་པ་གཙོ་འཁོར་འཆར་བའི་དབྱིངས༔ དམ་ཚིག་སྒྲོལ་མ་ཆེན་པོའི་ཞབས་དྲུང་དུ༔ བདག་སོགས་འཆི་འཕོ་ལས་ཀྱི་རྣམ་སྨིན་དུ༔ སྐད་ཅིག་ཉིད་ལ་ཡར་གྱི་ཟང་ཐལ་དུ༔ རང་གྲོལ་ངོ་བོའི་གཏན་སྲིད་ཟིན་པར་ཤོག༔ སྤྲུལ་སྐུའི་བྱ་བ་རྣམ་པ་བཞི་ལྡན་གྱི༔ འགྲོ་བ་འདྲེན་པའི་དཔལ་དུ་འགྲུབ་པར་ཤོག༔ ཅེས་ཀྱང་བླ་མ་ཨཀྵ་རིས་མིང་གི་བསྐུལ་ངོར་ག་གཱས་སོ། །དགེའོ། །