ཆོས་ཉིད་དོན་གསལ།

ཡེ་ཤེས་སྒྱུ་འཕྲུལ་དྲྭ་བ་ལས༔ ཆོས་ཉིད་བར་དོའི་ཉམས་ལེན༔ ལྟ་བའི་ཡང་སྙིང་༔ ཆོས་ཉིད་དོན་གསལ་ཞེས་བྱ་བ་བཞུགས༔

ན་མོ་གུ་རུ་པདྨ་ཀཱ་ར་ཡེ༔ རང་བཞིན་བསམ་གཏན་བར་དོའི་གདམས་པ་ལས༔ སྐྱེ་གནས་སྦྱོང་བྱེད་བསྐྱེད་པའི་སྒོམ་ཁོག་དང་༔ འཆི་སྲིད་སྦྱོང་ལ་ཟབ་ལམ་འཕོ་བ་དང་༔ འོད་གསལ་སྟོང་སྣང་ཟིན་པའི་སྲོག་རྩོལ་ཐིག༔ གཞི་གནས་དོན་གྱི་རང་ཞལ་ཁྲེགས་ཆོད་ཀྱི༔ མ་བུ་དབྱེར་མེད་ཀ་དག་དབྱིངས་ལ་རོལ༔ ལྷུན་གྲུབ་ཐོད་རྒལ་གཞི་སྣང་ཉམས་སུ་ལེན༔ ཁྱད་པར་འཇིགས་སྐྲག་གཡང་ས་གཅོད་པ་དང་༔ སྲེད་པས་སྐྱེ་བའི་ཉིང་མཚམས་སྦྱོར་བ་གཅོད༔ སྙེམས་བྱེད་རྣམ་རྟོག་གཡོ་བའི་ཁ་རྒྱལ་རླུང་༔ ཕུང་བོ་ཕྱི་མ་དོན་གཉེར་ཟབ་མོའི་གཅོད༔ ས་མ་ཡཱ༔ བརྡ་ཡིག །འདིར་ནི་ཀུན་ལས་ཁྱད་པར་མཆོག་གི་ལམ༔ རྩོལ་མེད་ལེ་ལོ་ཅན་གྱི་ངོ་སྐལ་དུ༔ འོད་གསལ་རྫོགས་ཆེན་ཏནྟྲ་ལས་བཏུས་ནས༔ སྣང་བ་ཡུལ་དང་རིག་པ་རང་སྣང་གི༔ བློ་ཅན་གང་ལའང་ཤིན་ཏུ་འབྱོར་བའི་ཚུལ༔ བལྟས་པ་ཙམ་གྱིས་འོད་གསལ་རང་འཁྲུངས་པ༔ དོན་དམ་མཐར་ཐུག་ལྟ་བའི་ཡང་སྙིང་མཆོག༔ ཆོས་ཉིད་དོན་གསལ་ཆེན་པོ་བསྟན་པར་བྱ༔ འདི་ལའང་ནང་གསེས་བར་དོ་དྲུག་གི་དུས༔ ཕན་པའི་གདམས་པ་སོ་སོར་སྦྱོར་ཡོད་ཀྱང་༔ གཙོ་བོའི་དབང་གིས་འོད་གསལ་བར་དོ་རུ༔ བཞག་པ་ཡིན་པས་འགྲེས་འདི་ཤིན་ཏུ་གཅེས༔ ས་མ་ཡཱ༔ ལམ་ལ་སྐད་ཅིག་གཅིག་གིས་རྫོགས་པའི་ཕྱིར༔ དེ་དང་བསྟུན་ཏེ་རྣམ་པར་བཤད་པ་ནི༔ གཅུས་དཀྲུགས་གབ་པ་བཤིག་བསྡེབ་མངོན་དུ་བྱུང་༔ སྔོན་ཆད་མེད་པའི་ཨུ་དུམ་ཝ་རའོ༔ ས་མ་ཡཱ༔

འདིར་ལམ་ཐམས་ཅད་ཀྱི་མཐར་ཐུག་གི་སྐྱེལ་སོ་ནི་འོད་གསལ་རྡོ་རྗེ་སྙིང་པོ་ཀུན་ལས་ཕུལ་དུ་ཕྱིན་པ་འདི་ཡིན་ཏེ༔ སྤྲོས་བྲལ་དོན་གསལ་ཆེན་པོའི་རྒྱུད་ལས༔ སྔར་བཤད་གཞན་གྱིས་བསྟན་པ་མེད་པ་ཡི༔ ཐོས་བསམ་བསྒོམ་པར་རག་ལུས་མེད་པའི་དོན༔ རང་རིག་ཆོས་སྐུ་བཅར་ཕོག་བསྟན་པ་ཡི༔ ཚེགས་ཆུང་དོན་ཆེ་གོ་བར་སླ་བའི་ཆོས༔ བསྟན་པ་ཙམ་གྱི་བློ་དམན་ཀུན་གྱི་རྟོགས༔ ཆོས་རྣམས་ཀུན་གྱི་སྙིང་པོའི་དོན་ཆེན་ཡིན༔ འཁོར་འདས་ཐེག་པ་ཀུན་གྱི་རྩ་བ་ཡིན༔ ཞེས་སོ༔ དེ་བཤད་པ་ལ་སྐྱེ་འཕགས་ཀྱི་ལམ་གསུམ་དུ་ལྟ་བས་གཏན་ལ་ཕབ་པ་དང་༔ འཕགས་ལམ་བར་བ་ལ་བསྒོམ་པས་ཉམས་སུ་ལེན་པ༔ མཐར་ཕྱིན་དུ་འབྲས་བུ་བཙན་ས་འཛིན་པ་གསུམ་དུ་བཤད་དེ༔ བདེ་བའི་འཁོར་ལོ་དང་ཡེ་ཤེས་ནམ་མཁའ་དང་མཉམ་པའི་རྒྱུད་དང་༔ སྤྲོས་བྲལ་དོན་གསལ་ཆེན་པོའི་རྒྱུད་རྣམས་དང་དགོངས་པ་བཀའ་བསྒྲོས་དང་བཞི་ལས༔ དད་ལྡན་འགྱུར་མེད་ལས་ཅན་གྱིས༔ ལུང་ལྡན་རྡོ་རྗེ་སློབ་དཔོན་ལ༔ ཡིད་འཐད་ཕོངས་མེད་དབུལ་བ་ནི༔ ཚོགས་ཀྱི་ལམ་ཞེས་བསྟན་པ་ཡིན༔ བླ་མས་གང་ལ་གནང་སྦྱིན་པ༔ ཡིད་གཉིས་ཐེ་ཚོམ་བློ་སྤངས་ཏེ༔ མཁའ་འགྲོ་མཆོད་ཅིང་དོན་ཞུས་ཚེ༔ སྦྱོར་བའི་ལམ་ཞེས་བསྟན་པ་ཡིན༔ ད་ཡང་འདུས་པའི་འཁོར་རྣམས་ཉོན༔ ངེས་པའི་བཅུད་ལྡན་སློབ་དཔོན་གྱིས༔ ཡང་དག་གདམས་པ་ལུང་བསྟན་ནས༔ སྣོད་ལྡན་ཡིད་ཆེས་དོན་རྟོགས་ཕྱིར༔ མཐོང་བའི་ལམ་ནི་ཡིན་པར་གསུང་༔ དེ་དོན་གོ་ན་རྒྱུན་དུ་ནི༔ ངེས་དོན་ཆོས་སྐུར་སྤོང་བ་མེད༔ རང་རིག་ཡེ་ཤེས་གདངས་ཐེབ་པའི༔ བསྒོམ་པའི་ལམ་ནི་ཡིན་པར་གསུངས༔ ཡང་དག་ངེས་པའི་གདམས་ངག་ནི༔ རང་གི་ཐུགས་ལ་དོན་གསལ་བ༔ འགྱུར་མེད་གདངས་ཆུད་ཡེ་ཤེས་ཀློང་༔ མཐར་ཕྱིན་ལམ་དུ་བཤད་པ་ཡིན༔ ཞེས་དང་༔ ཐིག་ལེ་ཀུན་གསལ་ལས༔ སྒྲ་མཐུན་དོན་དཔག་ལམ་ལྔ་བཤད༔ བླ་མའི་བསྙེན་བཀུར་ཡོངས་རྫོགས་ནས༔ དམ་པའི་དྲུང་ན་འདུག་པ་ནི༔ ཚོགས་ཀྱི་ལམ་དུ་ང་ཡིས་བཤད༔ བླ་མས་གདམས་ངག་དོན་བཤད་དེ༔ གདམས་ངག་རྣམ་གཉིས་རྒྱུད་ལ་སྦྱོར༔ སྦྱོར་བའི་ལམ་དུ་ང་ཡིས་བཤད༔ ངོ་སྤྲད་རྣམ་པ་བཞིའི་སྒོ་ནས༔ ཚེ་འདིར་ངེས་པའི་བདེན་མཐོང་བ༔ མཐོང་བའི་ལམ་ཞེས་ང་ཡིས་བཤད༔ བསྒོམ་དུ་མེད་པའི་བསྒོམ་པ་དང་༔ བསྒོམ་དུ་ཡོད་པའི་མེད་པ་ཡི༔ བསྒོམ་པའི་ལམ་དུ་ང་ཡིས་བཤད༔ སངས་རྒྱས་དགོངས་པ་གདངས་ཆེན་བཞི༔ མི་གནས་ཚུལ་གྱིས་མཐར་ཕྱིན་པ༔ མཐར་ཕྱིན་ལམ་དུ་ང་ཡིས་བཤད༔ ཅེས་པ་ལྟར༔

དང་པོ་ཚོགས་ལམ་དུ་བླ་མ་བརྟེན་པ༔ སྦྱོར་ལམ་དུ་གདམས་ངག་འཚོལ་བ༔ མཐོང་ལམ་དུ་ཡེ་ཤེས་རང་རིག་པའི་མངོན་སུམ་དུ་བྱ་བ་དང་གསུམ་ལས༔ དང་པོ་ནི༔ རང་བཞིན་གྱི་བར་དོར་བབས་ཚུལ་སྔར་བཤད་པ་དེས་ཀྱང་ཅུང་ཟད་འཐེར་ཏེ༔ ཕྱི་ཆོས་ཅན་ལྟ་བས་ལྟ་བ་ནང་ཆོས་ཉིད་ལྟ་བས་ལྟ་བ་ཙམ་སོང་ཟིན་ཡང་༔ ངེས་དོན་འདུས་པ་ལས༔ སྐྱེ་ཤི་གཉིས་ཀྱི་བར་དོར་ནི༔ ཆོས་སྐུ་ངོ་སྤྲོད་མ་ཤེས་ན༔ མ་རིག་གཏི་མུག་སངས་དུས་མེད༔ སྒྲོན་མེ་མེད་པའི་མུན་ཁུང་འདྲ༔ ཞེས་གསུངས་པས་ན༔ ད་དུང་རྫོགས་པ་ཆེན་པོའི་ཁྱད་ཆོས་བླ་ན་མེད་པ་གསང་བ་རང་རིག་ལྟ་བས་ལྟ་བ་རྒྱས་པར་གཏན་ལ་མ་ཕབ་པས་སྐྱེ་གནས་ཀྱི་བར་དོར་འདི་དག་གཏན་ལ་དབབ་ཅིང་ངོ་སྤྲོད་པར་བྱ༔ དེ་ཡང་བླ་མའི་བྱིན་རླབས་དང་༔ རང་གི་མོས་གུས་ལས་འཕྲོ་རྣམས་གོང་འཛོམ་དགོས་པས་ན༔ སྔར་མི་གཞི་ངན་པ་ཞིག་ཡིན་ན་ཡང་འཆོས་པ་གལ་ཆེའོ༔ བླ་མ་ལ་སྐྱོན་དུ་མི་བལྟ་བར་ཡོན་ཏན་ལ་སེམས་དགོས་པ་ནི༔ བདེ་བ་འཁོར་ལོའི་རྒྱུད་ལས༔ རྒས་པས་ཉམ་ཆུང་བརྟེན་པ་བཞིན༔ བླ་མ་མཁས་པ་དོན་ལྡན་ལ༔ རྟག་ཏུ་བསྙེན་ཅིང་གུས་བྱས་ན༔ འབྲས་བུ་ཆོས་སྐུ་མྱུར་དུ་སྟོན༔ ཞེས་དང་༔ རྫོགས་པ་ཆེན་པོ་ཡེ་ཤེས་ནམ་མཁའ་དང་མཉམ་པའི་རྒྱུད་ལས༔ དང་པོ་དད་པས་སྔོན་སོང་ནས༔ ལུས་སྲོག་མི་ལྟ་གཏོང་ཕོད་ཅན༔ འཁོར་འདས་གཅིག་ཏུ་བསྟན་པ་ལ༔ སྐྲག་ཅིང་འཇིགས་པ་མེད་པ་ཡི༔ ཐེ་ཚོམ་མེད་པར་དུས་ཚོད་ཟིན༔ རྟོགས་པར་བྱ་བའི་ཐབས་སུ་བསྟན༔ གླང་ཆེན་མི་ལྡོག་དགྲ་འཇོམས་ལྟར༔ བླ་མ་རྡོ་རྗེ་སློབ་དཔོན་གྱི༔ སྤྱོད་པ་མི་བརྟགས་ཆོས་ལ་བརྟགས༔ ཞེས་སོ༔ དེ་ལྟ་བུའི་བླ་མ་སྟེ་མཉེས་པ་གསུམ་དང་ལྡན་པའི་སྒོ་ནས་བརྟེན་པར་བྱས་ནས་དགོངས་སྤྱོད་ཚུལ་བཞིན་བསླབས་དགོས་སོ༔

གཉིས་པ་སྦྱོར་ལམ་ནི༔ གང་གཏན་ལ་ཕབ་པའི་གཞི་ངོས་བཟུང་བ་དང་༔ ཇི་ལྟར་ཕབ་པའི་ཚུལ་ལོ༔ དང་པོ་ནི༔ དེ་ནས་གཏན་ལ་ཕབ་པ་ལ༔ ཀ་དག་རང་བྱུང་གི་ཡེ་ཤེས་ཀྱི་ངོ་བོ་གཏན་ལ་ཕབ་པ་དང་༔ སྣང་ཆ་སྐུ་དང་ཡེ་ཤེས་དེ་ད་ལྟ་སེམས་ཅན་ལ་ཇི་ལྟར་བཞུགས་པ༔ གཏན་ལ་ཕབ་པ་གཉིས་སུ་ཡོད་པ་ལས་འདི་དང་པོ་སྟེ་ཁྲེགས་ཆོད་ཀྱི་གཞིའོ༔

གཉིས་པ་ལ་རྒྱུ་ལས་མ་བྱུང་བའི་འབྲས་བུ་རང་ལ་གནས་པར༔ དེ་སེམས་ལས་མ་བྱུང་བའི་སངས་རྒྱས་ཡེ་ནས་ཡིན་པར༔ དེ་ལུང་ལས་མ་བྱུང་བའི་གདམས་ངག་གི་རྟོགས་པར་བཤད་པ་གསུམ་སྟེ༔ ཡེ་ཤེས་ནམ་མཁའ་དང་མཉམ་པའི་རྒྱུད་ལས༔ སེམས་ལས་མ་བྱུང་སངས་རྒྱས་དང་༔ རྒྱུ་ལས་མ་བྱུང་འབྲས་བུ་དང་༔ ལུང་ལས་མ་བྱུང་གདམས་ངག་དང་༔ ཁྱད་ཕར་འཕགས་པའི་མན་ངག་རྣམས༔ ཞེས་བསྡུས་པའི་དོན་གྱི་ངེས་པ་བཟུང་སྟེ༔ གཞན་ལས་གཞི་ལམ་འབྲས་གསུམ་དུ་བཞག་ཀྱང་འདིར་གསུམ་པོ་གཏན་ལ་དབབ་བྱ་དང་འབེབས་བྱེད་དུ་བྱས་ནས༔ ཁྱད་འཕགས་ཀྱི་གདམས་ངག་ནི་བསྒོམ་པའི་ལམ་དུ་བསྟན་ན་འཐད་པར་ཁོ་བོས་མཐོང་ངོ་༔

དེ་ལ་གསུམ་པོའི་ཕྱོགས་སོ་སོ་ནས་བཤད་པ་དང་༔ གནད་བསྡུས་ཏེ་སྤྲོས་བྲལ་གྱི་མཛུབ་ཚུགས་སུ་བསྟན་པ་གཉིས་ལས༔ དང་པོ་ལ་གསུམ་གྱི་རྒྱུ་ལས་མ་བྱུང་བས་འབྲས་བུ་ནི་རྒྱུ་ལས་མི་བྱུང་ཚུལ་དང་༔ འབྲས་བུ་རང་གི་ངོ་བོ་གནས་ལུགས་གཏན་ལ་ཕབ་པ་གཉིས་ལས༔ དང་པོ་ནི༔ ཆོས་སྐུ་རྒྱུ་རྐྱེན་ལ་མི་གནས་པ་དཔེའི་སྒོ་ནས་གཞལ༔ རྒྱུ་རྐྱེན་མི་འཐད་པར་དོན་གྱི་སྒོ་ནས་གཞལ་པའོ༔ དང་པོ་ནི༔ ཆོས་སྐུ་རྒྱུ་ལ་གནས་པ་མ་ཡིན་པའི་དཔེ་ནི༔ དཔེར་ན་ནོར་བུ་རིན་པོ་ཆེ་རྒྱུ་རྐྱེན་གྱིས་བསྐྱེད་མི་དགོས་པར་རྒྱ་མཚོར་གནས་པ་ལྟར༔ ཆོས་སྐུ་རྒྱུ་རྐྱེན་གང་གིས་ཀྱང་མ་བསྐྱེད་པར་སེམས་ཅན་ཐམས་ཅད་ལ་ཁྱབ་པའི་ཕྱིར་ནི༔ མདོ་ལས༔ བདེ་གཤེགས་སྙིང་བོས་འགྲོ་བ་ཡོངས་ལ་ཁྱབ༔ ཞེས་དང་༔ ངེས་དོན་འདུས་པ་ལས༔ རྒྱུ་རྐྱེན་མེད་པའི་མཐུན་དཔེ་ནི༔ ནོར་བུ་རིན་ཆེན་ཀུན་ལྡན་བཞིན༔ ཆོས་སྐུ་རྒྱུ་ལ་རག་མ་ལུས༔ རྐྱེན་ལ་མི་ལྟོས་སྨོས་ཅི་དགོས༔ ཞེས་དང་༔ ནམ་མཁའ་ཀློང་ཡངས་ཆེན་པོའི་རྒྱུད་ལས༔ རང་བྱུང་སྙིང་པོ་ཆོས་སྐུ་ང་༔ སངས་རྒྱས་རྣམས་ཀྱིས་ང་མ་མཛད༔ སེམས་ཅན་རྣམས་ཀྱིས་ང་མ་བཅོས༔ འབྱུང་བ་ལྔ་ལ་རག་མ་ལུས༔ ད་ཡང་འདུས་པའི་སྙིང་པོ་ཉོན༔ ཐིག་ལེ་ཆོས་སྐུའི་གཞི་ཉིད་ནས༔ རྒྱུ་རྐྱེན་གཉིས་ལས་འདས་པ་དང་༔ གཉེན་པོ་ཅིས་ཀྱང་མི་ཚུགས་དང་༔ དུས་གསུམ་མི་འགྱུར་ཡང་དག་ཡོད༔ ཅེས་དང་༔ མུ་ཏིག་ཕྲེང་བ་ལས༔ སྟོང་བས་ཁྱབ་དང་གསལ་བས་ཁྱབ༔ ཞེས་པའོ༔

གཉིས་པ་ནི༔ དེ་ལྟ་བུའི་གཞི་རྒྱུད་སེམས་ཅན་ཐམས་ཅད་ལ་ཁྱབ་པ་དེ་ཉིད་ཡེ་ནས་ཡོད་པ་མ་ཡིན་པར་འཕྲལ་དང་སླད་ནས་རྒྱུ་ཚོགས་གཉིས་ཀྱིས་བསྐྱེད་པར་འདོད་པ་ནི་ཤིན་ཏུའང་མི་རིག་སྟེ་ཆོས་སྐུ་འཇིག་པར་འགྱུར་བས་སོ༔ ཅིས་ཕྱིར་དཔེར་ན་རྒྱུ་རྐྱེན་འདུས་པས་བྱས་པའི་འབྲས་བུ་ནི་མེད་པ་ཞིག་ནས་ཡོད་པར་འགྱུར་བའམ༔ མཐར་ཡོད་པའི་རྒྱུ་འབྲས་ལྡོག་པའི་མེད་པར་འགྱུར་བ་བཞིན་དུ༔ དེ་ལྟ་ན་སྔར་མེད་པས་ཆོས་སྐུ་རྒྱུས་རྐྱེན་གྱིས་བྱས་པས་འཇིག་པ་དང་༔ རྒྱུ་རྐྱེན་ལྡོག་པས་དེ་ཡང་ཟད་པར་འགྱུར་ན་མི་རུང་བའི་ཕྱིར་རོ༔ ལར་ཕྱི་ནང་གནས་དོན་ལུས་གསུམ་གྱི་ཆོས་ཐམས་ཅད་བག་ཆགས་མ་རིག་པས་རྒྱུ་བྱས་པས༔ རྐྱེན་བཞིའི་དམིགས་པ་མ་དག་པས་བྱུང་བ་ཡིན་པར་ཕྱིར་ན་སླར་ཡང་དེ་དག་དང་མཚུངས་བར་ལྡན་པའི་ཡེ་ཤེས་ཀྱི་ཚོགས་དམིགས་པ་མེད་པ་ལ་བློ་བཞག་པ་དང་༔ བསོད་ནམས་ཀྱི་ཚོགས་བདག་གཞན་མཚན་འཛིན་ལ་གཡེངས་པ་ནི་སངས་རྒྱས་ཐོབ་པ་ལ་དངོས་རྒྱུར་མི་འགྱུར་ཏེ༔ ཡེ་ཤེས་ནམ་མཁའ་དང་མཉམ་པའི་རྒྱུད་ལས༔ རྒྱུ་ནི་འདུས་བྱས་མི་རྟག་པས༔ གཉེན་པོས་འཇིག་ཕྱིར་རྐྱེན་ཁར་འགྲོ༔ དེ་ཕྱིར་རྐྱེན་གྱིས་མ་བསྐྱེད་པའི་༔ རང་བྱུང་ཆོས་སྐུ་འགྱུར་མེད་དེ༔ ཆོས་རྣམས་ཀུན་གྱི་སྙིང་པོ་ཡིན༔ ཕྱི་ནང་ཀུན་གྱི་བག་ཆགས་ཀྱི༔ རྒྱུ་རྐྱེན་ངན་པས་བསྐྱེད་པས་ན༔ རང་གིས་རང་བསླུས་འཛིན་པ་ཡི༔ འཁྲུལ་བ་ཡིན་པར་ཐེ་ཚོམ་བྲལ༔ དེ་ཕྱིར་འཁོར་འདས་མ་རེག་པས༔ ངེས་དོན་ཆོས་སྐུ་སྙིང་བོའི་དོན༔ རྒྱུ་ལས་མ་བྱུང་རང་བྱུང་སྐུ༔ རྐྱེན་གྱིས་མ་བསྐྱེད་འབྲས་བུ་ཡིན༔ ཞེས་དང་༔ དྲང་དོན་སངས་རྒྱས་རྒྱུ་རྐྱེན་ནི༔ ཐབས་དང་ཤེས་རབ་ཡིན་ཞེས་ཟེར༔ ཇི་སྲིད་ཐབས་ནི་བརྟེན་གྱི་བར༔ ཆང་དང་དུག་འདྲེས་འཆི་བ་འདྲ༔ དེ་ཕྱིར་རང་བྱུང་ཐབས་མི་དགོས༔ ཞེས་སོ༔

གཉིས་པ་འབྲས་བུ་རང་གི་ངོ་བོས་གནས་ལུགས་གཏན་ལ་དབབ་བ་ནི༔ མདོ་རྒྱས་བསྡུས་གསུམ་ལས༔ དང་པོ་ནི༔ དེ་ལྟ་བུའི་གཞི་དེ་སྟོང་གསལ་ཟུང་འཇུག་ཏུ་བསྟན་པ་ནི༔ གཞི་ནི་སྤྲོས་པ་ཐམས་ཅད་དང་བྲལ་པའི་བེམ་སྟོང་ངམ་སེམས་གསལ་རིག་ཙམ་གང་གིས་ཕྱོགས་སུ་མ་ལྷུང་བ་སྟེ༔ ཡེ་ཤེས་གསལ་བར་སྟོན་པའི་རྒྱུད་ཕྱི་མ་ལས༔ སྟོང་གསལ་རིག་པ་བཤད་ཀྱི་ཉོན༔ གཞི་ཉིད་སྟོང་པ་གསལ་བ་སྟེ༔ དེ་ཉིད་མ་རྟོགས་འཁྲུལ་བ་ཡིན༔ དེས་ན་སྟོང་གསལ་ངོ་ཡི་བཟུང་༔ ཞེས་སོ༔

གཉིས་པ་ལ༔ གནས་ལུགས་རང་དུ་ངོ་སྤྲོད་པས་ཕྱི་འབྱམས་གཤིས་ཤོར་གྱི་མུན་པ་བསལ༔ དེའི་ཟུར་གསུམ་རྒྱས་པར་བཀྲལ་བས་སྐུ་གསུམ་ལ་ངེས་པ་སྦྱིན་པ་གཉིས་ལས༔ དང་པོ་ནི༔ དེ་ཡང་ཁ་ཕྱིར་བལྟས་ཏེ་ག་ཤེད་ན་ཅི་ཡང་མི་མཐོང་བ་ཞིག་མ་ཡིན་པར་སེམས་ཀྱི་གནས་ལུགས་རང་བཞིན་གྱི་བབས་སུ་ལྷུན་གྱིས་གྲུབ་པ་ནི༔ རིན་པོ་ཆེ་ཡོན་ཏན་ཀུན་འབྱུང་གི་རྒྱུད་ལས༔ ཡིན་ནི་ད་ལྟའི་ཤེས་པ་ལ༔ དེ་དོན་ཀུན་ལ་གནས་པའི་ཕྱིར༔ འཆར་ནུབ་འབྲལ་པ་མེད་པའི་མཆོག༔ ལ་བཟློས་སྤངས་ལེན་ངོ་ཤེས་པའི༔ སྐྱོན་མེད་ཐམས་ཅད་མེད་པར་དག༔ དེ་ཕྱིར་དུས་འདིར་འབྲས་བུ་གྲུབ༔ རང་གི་སེམས་ཉིད་ཡིན་པ་དེ༔ གང་དང་འདྲ་མེད་ངེས་པའོ༔ ཞེས་སོ༔

གཉིས་པ་ལ༔ སོ་སོར་བཤད༔ དོན་བསྡུས་པ་གཉིས་ལས༔ དང་པོ་ལ་གསུམ་གྱི་ངོ་བོ་སྟོང་པར་བཤད་པའི༔ ཆོས་སྐུ་རྒྱུ་ལས་མ་བྱུང་བར་རང་ལ་ཡོད་པར༔ རང་བཞིན་གསལ་བར་བཤད་པས༔ ལོངས་སྐུ་རྒྱུ་ལས་མ་བྱུང་བར་རང་ལ་ཡོད་པར༔ ཐུགས་རྗེ་ཀུན་ཁྱབ་ཏུ་བཤད་པས༔ སྤྲུལ་སྐུ་རྒྱུ་ལས་མ་བྱུང་བར་རང་ལས་ཡོད་པར་ངེས་པ་སྦྱིན་པའོ༔

དང་པོ་ནི༔ དེ་ཡང་སྤྲོས་པའི་གྲྭ་ཟུར་ཐམས་ཅད་ལས་འདས་པའི་རང་གི་རིག་པ་འདི་ལས་བཟང་ངན་གྱི་དབང་དུ་མ་སོང་བའི་དབང་གིས་སངས་རྒྱས་ལ་བཟང་པོར་ཡོད་པ༔ དམྱལ་སོགས་ལ་ངན་པར་ཡོད་པ་མ་ཡིན་པར་མཉམ་པ་ཉིད་ཕྱལ་བ་ཡེ་གནས་ཆེན་པོ་ཡིན་ཏེ༔ དེ་ལྟར་གནས་པ་ནི་ཀ་དག་སྤྲོས་བྲལ་གྱི་ཆོས་སྐུར་ཤེས་པར་བྱའོ༔ ནམ་མཁའ་ཀློང་ཡངས་ལས༔ ཐོག་མ་མ་ཡིན་ཐ་མ་མིན༔ ད་ལྟའི་ཤེས་པ་འདི་ཉིད་ལས༔ བཟང་པོར་སོང་པ་གང་ཡང་མེད༔ ཅེས་དང་༔ ཡོན་ཏན་ཀུན་འབྱུང་གི་རྒྱུད་ལས༔ སངས་རྒྱས་སྙིང་པོ་ཆོས་སྐུ་ནི༔ འགྲོ་དྲུག་སེམས་ཅན་ཐམས་ཅད་ལ༔ རང་བྱུང་ཡེ་ཤེས་ངོ་བོ་ཡོད༔ ཀུན་ཏུ་ཁྱབ་པའི་ནམ་མཁའི་འདྲ༔ ཞེས་དང་༔ ནམ་མཁའ་འབྲུག་སྒྲོག་གི་རྒྱུད་ལས༔ ཆོས་རྣམས་སེམས་ཀྱི་འཁྲུལ་སེམས་ཡིན༔ བྱར་མེད་བློ་འདས་ཆོས་རྣམས་མེད༔ སེམས་མེད་ཀ་དག་ཀློང་དུ་གྱུར༔ ཞེས་སོ༔ དེས་ན་ཀ་དག་ངོ་བོ་ཉིད་ཀྱི་ལྡོག་ཆ་ནས༔ སེམས་ཉིད་རང་བྱུང་གི་ཡེ་ཤེས་ནི༔ སྟོང་པ་ལྷུན་གྲུབ་ཆེན་པོ༔ རྒྱུ་མེད་པ༔ རྐྱེན་མེད་པ༔ འཕོ་འགྱུར་མེད་པ༔ དངོས་པོ་ཅིར་ཡང་མེད་པ༔ དཔེས་མཚོན་དུ་མེད་པ༔ གཅིག་པུ་ཟླ་མེད་པ༔ ཁ་དོག་མེད་པ༔ དབྱིབས་མེད་པ༔ ཕྱོགས་མེད་པ༔ ཕྱི་ནང་མེད་པ་ཞིག་ཡིན་པས་ན༔ ནམ་མཁའ་འབར་པའི་རྒྱུད་ལས༔ རང་བཞིན་སྟོང་པ་ལྷུན་གྲུབ་ཡིན༔ རང་བཞིན་རྒྱུ་རྐྱེན་མེད་པ་ཡིན༔ རང་བཞིན་འཕོ་འགྱུར་མེད་པ་ཡིན༔ རང་བཞིན་ཅིར་ཡང་མེད་པ་ཡིན༔ རང་བཞིན་དངོས་པོ་མེད་པ་ཡིན༔ སེམས་ལ་དཔེ་མེད་ཟླ་མེད་གྲུབ་པ་མེད༔ སྟོང་གསལ་དངོས་མེད་ཁ་དོག་དབྱིབས་ཀྱང་མེད༔ སྐྱེ་མེད་ཀ་དག་ཕྱོགས་དང་མུ་མཐའ་མེད༔ དངོས་མེད་ཟང་ཀ་གཏད་མེད་གཏིང་མཐའ་ཡས༔ ཞེས་སོ༔

གཉིས་པ༔ ལོངས་སྐུ་རང་བཞིན་ལྷུན་གྲུབ་སྐུ་དང་ཡེ་ཤེས་གཏིང་གསལ་གྱི་ཚུལ་ལ༔ སྐུ་དང་ཡེ་ཤེས་འོད་དང་ཐིག་ལེ་ལ་སོགས་པ་ཡོན་ཏན་ཐམས་ཅད་ཡེ་ནས་སེམས་ཉིད་ལ་ལྷུན་གྲུབ་ཏུ་ཡོད་པ་ཡིན་པས་ན་རྒྱུ་ཚོགས་གཉིས་ཀྱིས་བསྐྱེད་མི་དགོས་ཏེ༔ ངེས་དོན་འདུས་པ་ལས༔ སྐྱེ་མེད་རང་བྱུང་དོན་རྟོགས་པས༔ ཚོགས་གཉིས་བསགས་ལས་ཁྱད་པར་འཕགས༔ དེ་ཕྱིར་ཚོགས་བསགས་རྩེད་མོ་འདྲ༔ དྲང་དོན་ཚོགས་བསགས་གཡེང་བས་ཕུང་༔ གཟུགས་སྐུ་ཚོགས་གཉིས་ལས་མ་བྱུང་༔ དེ་ཕྱིར་ཆོས་སྐུ་རྟོགས་གྱུར་ན༔ ཚོགས་མ་བསགས་པར་གཟུགས་སྐུ་རྫོགས༔ དེ་ཕྱིར་རྒྱུ་མེད་འབྲས་བུ་ཡོད༔ ད་ཡང་འདུས་པའི་འཁོར་རྣམས་ཉོན༔ ངོ་བོ་གཅིག་ལ་ཐ་དད་མེད༔ བྱད་དང་མེ་ལོང་གཟུགས་བརྙན་བཞིན༔ ཆོས་སྐུའི་རང་རྩལ་གཟུགས་སྐུ་གཉིས༔ ཚོགས་མ་བསགས་པར་ཤུགས་ལ་ཡོད༔ སྐུ་གསུམ་འགྲོ་དོན་ཐ་དད་ཀྱང་༔ དེ་ཕྱིར་ཆོས་སྐུའི་རང་རྩལ་ནི༔ མཐོང་སྣང་སྣ་ཚོགས་ཅིར་ཡང་འཆར༔ དེ་ཙམ་ཉིད་ན་རྒྱུ་རྐྱེན་བྲལ༔ ཞེས་དང་༔ རང་ཤར་ཆེན་པོ་ལས༔ སེམས་ཅན་ཀུན་གྱི་རང་རྒྱུད་ལ༔ ཡང་དག་སངས་རྒྱས་དགོངས་པ་ནི༔ སྐུ་དང་ཡེ་ཤེས་ཚུལ་དུ་གནས༔ ཞེས་སོ༔

གསུམ་པ་ནི༔ སྤྲུལ་སྐུ་ཐུགས་རྗེ་ཀུན་ཁྱབ་ཀྱི་བདག་ཉིད་ནི༔ དེ་ལྟ་བུའི་ཟུང་འཇུག་གི་བདག་ཉིད་རིག་པ་བྱང་ཆུབ་སེམས་ཀུན་ལ་ཁྱབ་པའི་ཕྱིར་ཤེས་རིག་གི་རང་རྩལ་ཤེས་རབ་ཀྱི་རྩལ་བཞི་དང་བཅས་པའང་ལྷུན་གྱིས་གྲུབ་པ་ཡིན་ཏེ༔ ཐལ་འགྱུར་ལས༔ ཐོག་མའི་ངོ་བོ་རང་བཞིན་དང་༔ ཐུགས་རྗེ་རྣམ་པ་གསུམ་དུ་གནས༔ ཞེས་སོ༔

གཉིས་པ་ལ༔ རྒྱུད་སྡེ་ཆུ་བོ་གཅིག་འདྲེས་སུ་དགོངས་པ་བླངས་པས༔ གང་དུ་གནས་པའི་རྩ་བའི་དཀྱིལ་འཁོར་ངོས་བཟུང་བས༔ རྒྱུ་མཚན་གྱི་སྒོ་ནས་ཆོས་རྗེས་སུ་འབྲང་བས་རྒྱུ་ལས་མ་བྱུང་བས་འབྲས་བུ་ལ་ངེས་པ་སྦྱིན་པའོ༔

དང་པོ་ནི༔ དོན་གྱི་གནད་བསྡུས་ན༔ ངོ་བོ་སྟོང་པས་འཁོར་འདས་གང་དུའང་ཕྱོགས་སུ་མ་ལྷུང་༔ རང་བཞིན་གསལ་བའི་ཡེ་ཤེས་ཀྱི་གདངས་མ་འགགས༔ ཐུགས་རྗེ་ཀུན་ཁྱབ་ཀྱི་སྣང་སྟོང་དབྱིངས་ཡེ་ཟུང་འཇུག་གི་བདག་ཉིད་ཆེན་པོ་བསྟན་པས༔ དོན་སྒྲུབ་བྱེད་དུ༔ ཕྱི་མཚན་ཉིད་ཐེག་པ་ལས༔ རྣམ་པར་ཐར་པའི་སྒོ་སྟོང་པ་ཉིད་དང་༔ མཚན་མ་མེད་པ༔ སྨོན་པ་མེད་པ་གསུམ་དང་༔ བཀའ་ཐ་མའི་དགོངས་འགྲེལ་ལས༔ ཆོས་ཉིད་ཀྱི་རིགས་པ༔ ལྟོས་པའི་རིགས་པ༔ བྱ་བ་བྱེད་པའི་རིགས་པ་གསུམ༔ སྒྱུ་འཕྲུལ་ལས༔ རྒྱུ་གཅིག་པ༔ ཡིག་འབྲུ༔ བྱིན་རླབས༔ མངོན་སུམ་བཞི་རྣམས་དང་༔ ལྟ་བ་ཐམས་ཅད་ཀྱི་སྙིང་པོའི་རྒྱུད་ལས༔ ཡིད་ཆེས་པ་ཡི་གཏན་ཚིག་ནི༔ རང་སེམས་སྐྱེ་མེད་གཏན་ཚིག་གི༔ ལྷུན་གྱིས་གྲུབ་པར་ཡིད་ཆེས་བྱ༔ རོལ་བ་འགགས་མེད་གཏན་ཚིག་གིས༔ གང་ཡང་མི་འགག་ཡིད་ཆེས་བྱ༔ མཚན་ཉིད་གཉིས་མེད་གཏན་ཚིག་གིས༔ ཆོས་རྣམས་གཅིག་པར་ཡིད་ཆེས་བྱ༔ ངོ་བོ་བློ་བྲལ་གཏན་ཚིག་གིས༔ རྩོལ་བ་མེད་པར་ཡིད་ཆེས་བྱ༔ ཞེས་སོགས་དང་༔ ཐིག་ལེ་ཀུན་གསལ་ལས༔ ང་ཡི་དོན་གྱི་ཕྱོགས་རེ་ནས༔ ཐེག་བརྒྱད་རང་བཞིན་སོ་སོར་སྣང་༔ ཐམས་ཅད་ང་ཡི་དབང་དུ་འདུས༔ ཞེས་སོགས་ཀྱི་བསྟན་པའི་མཐར་ཐུག་པའོ༔ དེ་ལྟ་བུའི་རྒྱུད་དེ་སེམས་ཅན་ཐམས་ཅད་ཀྱི་རྒྱུད་ལ་ཏིལ་ལ་མར་གྱིས་ཁྱབ་པ་ལྟར་ཡེ་ནས་གནས་ཀྱང་མ་མཐོང་བ་ཡིན་པས་ཐེག་པ་སོ་སོའི་ཟུར་རེ་བསྟན་པས་རིམ་གྱི་གོ་བས་རྣམ་གཅོད་མཐར་ཐུག་བསྟན་པར་མ་བཞག་ཀྱང་འདིར་ཡོངས་སུ་གབ་སྦས་མེད་པར་ཡོངས་གཅོད་དུ་བཞག་པའི་ཁྱད་ཙམ་དུ་བས་སོ༔ རང་བྱུང་བདེ་བ་འཁོར་ལོའི་རྒྱུད་ལས༔ ང་ཡི་རྒྱུད་ཆེན་ངེས་དོན་འདིས༔ རྩ་བ་རང་བྱུང་ཡེ་ཤེས་དོན༔ ཀུན་ལ་ཡོད་ཀྱང་རྟོགས་དཀའ་བ༔ དོན་གྱི་གནས་ལུགས་ངོ་བོ་ནི༔ ད་ལྟའི་ཤེས་པ་སོ་མ་ལ༔ ཅི་ཡང་མ་བསམ་མ་འགགས་པ༔ དེར་ནི་དོན་གྱི་སྙིང་པོ་བསྡུས༔ དེ་དོན་རྟོགས་ཐབས་ལུང་ལྡན་གྱིས༔ ངེས་དོན་མ་ནོར་བསྟན་པས་གོ༔ ཞེས་སོ༔

གཉིས་པ་ཡེ་ཤེས་ལུས་ལ་གནས་པའི་ཚུལ་བསྟན་པ་ནི༔ གོང་དུ་བསྟན་པའི་ཡེ་ཤེས་དེ་ཉིད་ལུས་ལ་ཅི་ལྟར་གནས་ན༔ ཙིཏྟ་རིན་པོ་ཆེ་མཆོག་གི་གུར་ནང་ན་ཡེ་ཤེས་སུམ་བརྩེགས་ཀྱི་ཚུལ་དུ་གནས་སོ༔ དགོངས་པ་བཀའ་བསྒྲོས་ལས༔ ད་ལྟའི་ལུས་སེམས་འདི་ཉིད་ལ༔ ཆོས་སྐུ་གཞི་ལྡན་ཡོད་པའི་ཕྱིར༔ འབྱུང་བ་ལྔ་ཡི་དྭངས་མ་ནི༔ སྙིང་ཀ་ཆོས་ཀྱི་འཁོར་ལོ་ན༔ རྟེན་བཅས་གཟུགས་ཀྱི་ནང་ནས་ནི༔ ཙིཏྟ་རིན་ཆེན་གཞལ་ཡས་ཁང་༔ གུར་ཕུབ་འདྲ་བའི་ནང་ཤེད་ན༔ ཆོས་སྐུ་བཞི་ལྡན་ཡོད་པ་སྟེ༔ ཞེས་དང་༔ ཐལ་འགྱུར་ལས༔ སྙིང་ནང་ཡེ་ཤེས་ཆེན་པོར་གནས༔ ཞེས་སོ༔ རྒྱུ་མཚན་དེ་ལྟ་བུའི་སངས་རྒྱས་རྒྱུས་མ་བསྐྱེད་པར་རང་ལ་གནས་པ་ཞེས་བྱའོ༔

གསུམ་པ་ནི༔ འོ་ན་རྒྱུ་མེད་པའི་འབྲས་བུ་སྲིད་དམ༔ སྲིད་ན་མུ་སྟེགས་པ་དང་ཁྱད་པར་མེད་དེ་རྟག་པར་ལྟ་བའི་ཕྱིར་ཞེ་ན༔ སྐལ་མེད་དག་ལ་ཡིན་ཡང་༔ གཞི་ནི་དཔེའི་སྒོ་ནས་བསྟན་ན༔ ནམ་མཁའ་ལ་རྒྱུ་མེད་པས་རྐྱེན་གྱིས་འཇིག་པ་མེད་པ་ལྟར༔ ཆོས་སྐུ་འགྱུར་བར་མི་རུང་བའི་གཏན་ཚིག་གིས་རྐྱེན་ལ་མ་རེག་པར་ཡོད་པ་ཡིན་ཏེ༔ བདེ་བའི་འཁོར་ལོའི་རྒྱུད་ལས༔ ནམ་མཁའ་སྟོང་བ་རྒྱུས་མ་བསྐྱེད༔ རིག་པ་སྟོང་ལ་རྒྱུས་མ་བསྐྱེད༔ ནམ་མཁའ་འབྱུང་བའི་རྐྱེན་མི་ཚུགས༔ དེ་བཞིན་ཆོས་སྐུ་འགྱུར་མེད་ཕྱིར༔ དེ་ཕྱིར་རྐྱེན་ལས་མ་སྐྱེས་པའི༔ འབྲས་བུ་ངེས་པར་ཡོད་པའོ༔ ཞེས་སོ༔ ལོངས་སྐུ་དང་སྤྲུལ་སྐུའི་ཡེ་ཤེས་ཀྱང་རྒྱུ་ལ་མ་ལྟོས་པར་ཡོད་པ་སྟེ༔ རིག་པའི་གསལ་ཆ་མ་འགགས་པའི་མདངས་ཡེ་ཤེས་ལྔ་དང་༔ ཡུལ་སོ་སོར་རྟོགས་པའི་ཤེས་རབ་ཐུགས་རྗེ་ཕྱོགས་མེད་དུ་རིག་པའི་སྙིང་པོར་ཤར་བས་ན་རྒྱུ་མེད་པར་ཡོད་ཚུལ་མེད་ན་མི་རུང་བར་འགྱུར་ཏེ༔ རྐྱེན་གདུལ་བྱའི་ལས་སྨོན་དང་སངས་རྒྱས་ཀྱི་ཐུགས་རྗེ་འཕྲད་ནས་འབྱུང་བར་འདོད་པ་ནི་ཆོས་སྐུ་འགྱུར་བར་མི་རུང་བས་གཏན་ཚིག་གིས་མི་འགྲུབ་པ་སྟེ༔ དེའི་ཕྱིར་ན༔ རྒྱ་མཚོའི་གསེར་ལ་རྒྱུ་མེད་བཞིན་ཡོད་པ་དང་༔ དེ་ལ་གཡའ་ཡིས་མི་གོས་པའི་དཔེར་བྱས་ནས་མཚོན་ཏེ༔ བདུད་རྩི་རྒྱ་མཚོ་ལས༔ རྒྱ་མཚོའི་གསེར་ལ་རྒྱུ་མེད་ལྟར༔ རིག་པ་རང་གྲོལ་རྒྱུས་མ་བསྐྱེད༔ གསེར་དེ་གཡའ་ཡིས་མི་གོས་ལྟར༔ ཆོས་སྐུ་རྐྱེན་གྱིས་མི་འགྱུར་བས༔ དེ་ཕྱིར་རྒྱུ་ལས་མ་བྱུང་བས༔ གཟུགས་སྐུ་ངེས་པར་ཡོད་པའོ༔ ཞེས་སོ༔ དེ་ལྟ་བུའི་རྒྱུ་ལས་མ་བྱུང་བའི་འབྲས་བུ་ནི་སྔར་ཡང་ནས་ཡང་དུ་བཤད་ཀྱང་དེང་སང་གླན་ཀ་ཚོལ་བ་མང་དུས་དེར་གཟི་བརྗིད་ངོམ་པ་ཞེས་བྱའོ༔

གསུམ་པ་དོན་བསྡུ་བ་ནི༔ འདི་དག་ལ་ནི་རྫོགས་པ་ཆེན་པོའི་རྒྱུད་ཀྱི་གནད་འདུས་པ་ཡིན་པས་བཟུང་བར་འོས་པ་སྟེ༔ ཡེ་ཤེས་མཁའ་མཉམ་ལས༔ ངེས་པ་བཞི་ཡི་ཁྱད་འཕགས་པ༔ ཁྱོད་ལ་ལེགས་པར་ངས་བསྟན་གྱི༔ ཡིད་ལ་ཟུངས་ལ་ངེས་པར་འཆོང་༔ ཞེས་སོ༔

གཉིས་པ་སེམས་ལས་མ་བྱུང་བའི་སངས་རྒྱས་བཤད་པ་ལ༔ མདོར་བསྟན་པ༔ རྒྱས་པར་བཤད་པ༔ དོན་བསྡུ་པའོ༔ དང་པོ་ནི༔ ཐེག་པ་ཐུན་མོང་ལས་སེམས་ལ་སངས་རྒྱས་ཞེས་བཏགས་པ་དང་ཕྱག་ཆེན་དང་འདིར་སེམས་ཉིད་དང་ད་ལྟའི་ཐ་མལ་གྱི་ཤེས་པ་ཞེས་བྱ་བ་དག་ཚིག་མཐུན་ཡང་དོན་གྱིས་མི་མཚུངས་ཏེ༔ འདི་ནི་རང་བྱུང་གི་ཡེ་ཤེས་ལ་བརྗོད་པ་དང་༔ གཞན་ནི་གཞན་བྱུང་གི་ཤེས་པ་ལ་འདོད་པས་དེ་ལྟ་ན༔ སེམས་ནི་གཞི་ལས་ལོག་པར་གོལ་བ་ཡིན་པས་ངོ་བོ་ཉིད་ཀྱི་འཁྲུལ་བ་དེ་ལ་སྟེགས་འཆའ་ན་ནམ་ཡང་སངས་རྒྱས་དུས་མེད་པ་ཞིག་སྟེ༔ རང་བྱུང་གི་ཡེ་ཤེས་ནི་སེམས་མེད་པ་ཡེ་རིག་དོན་དམ་པའི་ངོ་བོ་སྐུའི་དཀྱིལ་འཁོར་དུ་བཞུགས་པའོ༔ དེ་སྐད་དུ་ཡང་༔ རང་བྱུང་བདེ་བ་འཁོར་ལོ་ལས༔ སེམས་ནི་འཁྲུལ་པ་ཡིན་པའི་ཕྱིར༔ ཆོས་ཀུན་གོལ་སེམས་ཡིན་པས་ན༔ ཡང་དག་ཉིད་ནི་སེམས་དང་བྲལ༔ སེམས་མེད་རང་བྱུང་རིག་པའི་སྐུ༔ ཞེས་སོ༔

གཉིས་པ་ནི་སེམས་སངས་རྒྱས་ཡིན་པར་མི་རུང་བར་བསྟན༔ སེམས་ཀྱི་ཕྱོགས་ལས་བཙལ་བས་རྙེད་པར་བསྟན༔ སེམས་དང་ཡེ་ཤེས་ཕྱེད་པ་བྱེ་བྲག་ཏུ་བསྟན༔ དེ་ཉིད་སངས་རྒྱས་དང་གྲུབ་ཐོབ་ཀུན་གྱི་དགོངས་ཀློང་དུ་བཤད་དོ༔ དང་པོ་ནི་སེམས་སུ་སྣང་བ་ཉིད་ནི་རང་བྱུང་གི་ཡེ་ཤེས་ལ་སྒྲིབ་པར་བྱེད་པའི་དྲི་མ་སྟེ༔ ཇི་ལྟར་ན་ཐུགས་རྗེ་ལྟར་ཤར་བའི་སྒོ་ལོག་པར་གོལ་བས་དྲང་པོ་ཇི་ལྟ་ཇི་སྙེད་ཀྱི་མཁྱེན་པར་ཤར་པ་བསྒྲིབ་པས་ཕྱིར་སྤྲིན་དང་འདྲའོ༔ རང་བྱུང་གི་ཡེ་ཤེས་ནི་དེ་དང་མི་གཅིག་སྟེ་སེམས་དང་བྲལ་བའི་ཕྱིར་རོ༔ དེའི་ཕྱིར་རྒྱུད་ལས༔ དེ་ཕྱིར་ཆོས་ཀུན་རྩ་བ་ནི༔ ཆོས་སྐུ་རང་གི་སེམས་ཀྱིས་སྒྲིབ༔ སེམས་ནི་དོན་མེད་འཁྲུལ་བའི་ཕྱིར༔ ཆོས་སྐུའི་གོལ་ས་སེམས་ཡིན་ནོ༔ རང་བྱུང་ཆོས་ཉིད་སེམས་དང་བྲལ༔ ཞེས་སོ༔ གལ་ཏེ་ངེས་དོན་སེམས་ཡིན་ན་མི་རུང་སྟེ༔ སེམས་ནི་རྒྱུ་རྐྱེན་གྱིས་བསྐྱེད་པའི་ཕྱིར༔ ཆོས་སྐུ་རྒྱུ་རྐྱེན་ལས་སྐྱེས་པར་འགྱུར་བས་སྐྱེ་བ་མེད་པ་དང་འགལ་ཏེ༔ ཀུན་བྱེད་ལས༔ སེམས་ཉིད་སྐྱེ་བ་མེད་པར་ཀུན་སྟོན་ཡང་༔ སྐྱེ་མེད་སྔོན་དུ་ཀུན་གྱིས་རྟོགས་པ་མེད༔ ཅེས་དང་༔ ངེས་དོན་འདུས་པ་ལས༔ སྣ་ཚོགས་སེམས་ནི་གཞན་དབང་ཅན༔ རང་གི་སེམས་ཞེས་དེ་ལ་བྱས༔ སྐྱོན་གྱི་རྩ་བ་སེམས་ཡིན་པས༔ དེ་ཕྱིར་སེམས་ཀྱི་སངས་མི་རྒྱ༔ སེམས་ནི་རྒྱུ་རྐྱེན་སྐྱེས་པའི་ཕྱིར༔ ངེས་དོན་མ་ཡིན་འཁྲུལ་བའི་བློ༔ ཞེས་སོ༔ ཡང་སེམས་ནི་ཡུལ་སྣ་ཚོགས་སུ་མེད་ལ་ཡོད་པར་ཞེན་པའི་རྟོག་པ་སྣ་ཚོགས་པ་ཞིག་སྟེ༔ དུ་མ་སྐྱེ་འགགས་གི་རང་བཞིན་ཅན་དང་༔ ཡོད་མེད་རྟག་ཆད་དུ་འཛིན་པའི་བློ་ཡིན་པས་ན་ཆོས་སྐུར་འདོད་ན༔ དུ་མའི་མཐའ་ལ་ལྟུང་བ་དང་སྐྱེ་འགགས་ཀྱི་མཐའ་དང་རྟག་ཆད་འཛིན་པས་མཐའ་ལ་རྟོགས་པས་ཀྱང་མི་རུང་སྟེ༔ དེ་ཉིད་ལས༔ སེམས་ནི་འཁོར་བའི་རྩ་བ་སྟེ༔ ཡུལ་ནི་སྣ་ཚོགས་སྣང་བ་ལ༔ སེམས་ཀྱི་རྟོག་པ་སྣ་ཚོགས་ཞེན༔ དེ་ཕྱིར་སེམས་ནི་འཁོར་བའི་རྒྱུ༔ རྟག་ཆད་འཛིན་པ་སེམས་ཡིན་པས༔ ལྟ་བའི་གོལ་བ་སེམས་ལས་བྱུང་༔ ཞེས་སོ༔ ཡང་སེམས་ལས་བྱུང་བས་རྣམ་རྟོག་ཆགས་སྡང་རྨོངས་གསུམ་ཐམས་ཅད་ཀྱི་གཞིར་གྱུར་པ་དང་༔ འཁོར་བ་དང་མྱང་འདས་ཀྱི་འབྲས་བུ་ཐམས་ཅད་རེ་དོགས་སེམས་ཀྱིས་བྱས་ཏེ་མཉམ་པ་ཉིད་དང་འགལ་བ་དང་༔ ཆོས་སྐུ་ཉོན་མོངས་ཅན་དུ་འགྱུར་བའི་སྐྱོན་གྱིས་མི་རུང་སྟེ༔ དེ་ཉིད་ལས༔ སེམས་ལས་བྱུང་བས་རྣམ་རྟོག་གིས༔ ཆགས་སྡང་ཐམས་ཅད་སྐྱེད་པར་བྱེད༔ འཁོར་འདས་རེ་དོགས་སེམས་ཀྱིས་བྱས༔ དེ་ཕྱིར་འཁོར་བའི་རྒྱུར་སེམས་གོལ༔ ཞེས་སོ༔ ཡང་སེམས་ཀྱི་སྲེད་པས་སྐྱེ་བ་འཕེན་པས་སྡུག་བསྔལ་གྱི་རྒྱུར་གྱུར་པ་དང་༔ སེམས་ཀྱི་སྐྱེ་བ་གྲངས་མེད་པ་གློ་བུར་བར་མེད་ལ་ཡོད་པར་བཟུང་ནས་བྱས་པས་ན༔ ཆོས་སྐུ་དང་གཅིག་ན་ཆོས་ཀུན་འབྱུང་དུ་འགྱུར་བ་དང་༔ གློ་བུར་བས་འཁྲུལ་པར་འགྱུར་བས་མི་རུང་སྟེ༔ དེ་ཉིད་ལས༔ སེམས་ཀྱིས་བྱས་པ་རྟོགས་པ་ཡི༔ སྐྱེ་བ་བརྒྱུད་པ་གྲངས་མེད་ཀྱང་༔ སེམས་འདིས་བྱས་ཕྱིར་སྡུག་བསྔལ་རྒྱུ༔ དེ་ཕྱིར་སེམས་ནི་གློ་བུར་འཁྲུལ༔ ཞེས་སོ༔

གཉིས་པ་ནི༔ འོན་ཀྱང་སེམས་ཀྱི་ཕྱོགས་ལས་བཙལ་ན་རྙེད་པ་ཡིན་ཏེ༔ དཔེར་ན་གླང་པོ་ཆེ་ཞིག་བོར་པ་ལ༔ དེའི་རྗེས་ལ་མ་བརྟེན་རྙེད་པ་མེད་ན་ཡང་༔ རྗེས་ལས་དེད་པས་རྙེད་པ་བཞིན༔ སེམས་ཀྱི་བྱུང་གནས་འགྲོ་གསུམ་གྱི་རྗེས་ལྟ་བུ་ལས་དེད་པས་རང་བྱུང་གི་ཡེ་ཤེས་སེམས་མེད་པ༔ གཟུང་འཛིན་མེད་པ༔ སྤྲོས་བྲལ་བདེ་བ་ཆེན་པོ་རྣམ་ཀུན་མཆོག་ལྡན་གྱི་སྟོང་ཆེན་ཡེ་ནས་འབྲལ་པ་མེད་པར་གནས་པ་ཉིད་རྙེད་པར་འགྱུར་ཡང་༔ རྗེས་དེ་གླང་བོ་ལ་ནོར་ན་བཞད་གད་ཀྱི་གནས་སུ་འགྱུར་བ་ལྟར༔ སེམས་ནི་རང་རིག་འོད་གསལ་བའི་དགོངས་པའོ་ཞེས་མི་བྱ་བ་ཁོ་ན་ཡེ་ཤེས་འཁོར་ལོའི་རྒྱུད་དང་བདེ་བ་འཁོར་ལོའི་རྒྱུད་གཉིས་མཐུན་པར༔ དེ་ཉིད་བཙལ་པའི་མཐུན་དཔེ་ནི༔ རྗེས་བཙལ་བས་ནི་གླང་པོ་རྙེད༔ སེམས་ཀྱི་ཕྱོགས་ནས་དོན་བཙལ་བས༔ རང་རིག་རྒྱལ་པོ་ཡེ་ཤེས་རྙེད༔ དེ་རྙེད་སེམས་ཀྱི་འཛིན་པ་བྲལ༔ འཛིན་བྲལ་སེམས་མེད་རང་རིག་སྐུ༔ དེ་དོན་འབྲལ་མེད་བྱང་ཆུབ་ཀློང་༔ སེམས་བྲལ་ཏིང་འཛིན་རྒྱུན་དུ་གནས༔ ཞེས་སོ༔

དོན་གསུམ་པ་སེམས་དང་ཡེ་ཤེས་ཕྱེད་པ་བྱེ་བྲག་ཏུ་བཤད་པ་ནི༔ སེམས་དང་ཡེ་ཤེས་ཕྱེད་པ་འདི་ཨ་ཏིའི་ཁྱད་ཆོས་སུ་བཤད༔ དེ་ལྟར་ཕྱེད་པ་དངོས་བཤད༔ དེའི་ཡོན་ཏན་གྱི་སྒོ་ནས་བཤད་པ་གསུམ༔ དང་པོ་ནི༔ ཐེག་པ་འོག་མ་བརྒྱད་པོ་ཐམས་ཅད་ཀྱིས་སེམས་ཆོས་སྐུ་ཡིན་པས༔ དེ་ཉིད་སེམས་ཀྱི་དམིགས་པ་ལུས་ཀྱི་ཚོགས་བསགས་སོགས་ཐབས་ཤེས་ཁྱད་པར་ཅན་གྱིས་ཟིན་པས་སེམས་གནས་སུ་གྱུར་ནས་སངས་རྒྱས་པར་འདོད་པ་དང་༔ བསྐྱེད་རྫོགས་ཁྱད་པར་ཅན་དུ་བློས་བཅོས་པས་འཛིན་སྟངས་དོན་མཐུན་པའི་སྒོ་ནས་ཕྲིན་ལས་རྣམ་བཞི་སྤྱོད་ཅིང་འབྲས་བུ་ཡང་དག་པར་ཐོབ་པར་འདོད་པ་ནི་ཀུན་བཏགས་འབའ་ཞིག་པ་སྟེ༔ མ་རིག་པའི་རྩ་བ་ཅན་འཁོར་བའི་སེམས་ཀྱི་ལས་སྣ་ཚོགས་པ་དེ་དག་གི་འབྲས་བུ་མྱུར་དུ་མི་ཐོབ་པར་འབྱང་ ༼ འགྱང་དཔྱད། ༽ བར་འགྱུར་བ་ནི་འདུ་བྱེད་ཀྱི་ལས་སྣ་ཚོགས་པ་དེ་ལ་སྣོན་མ་ཙམ་དུའང་འགྱུར་ཉེན་ཆེ་བས་ན༔ ཐམས་ཅད་ཀྱང་སེམས་ལས་མ་བྱུང་བའི་སངས་རྒྱས་མ་ཡིན་ཏེ༔ དཔལ་ནམ་མཁའ་དང་མཉམ་པའི་རྒྱུད་ལས༔ མ་རིག་ཆོས་ནི་བདེན་གཉིས་སུ༔ བློ་ཡི་ནན་ཏན་སེམས་ཀྱིས་བརྟགས༔ ཚོགས་བསགས་སྒྲིབ་སྦྱང་ཀུན་བརྟགས་པས༔ སེམས་བྲལ་རང་བྱུང་ཆོས་ཀྱི་སྐུ༔ སེམས་ལས་མ་བྱུང་སངས་རྒྱས་འདི༔ ཐེག་པ་ཀུན་ལས་ཁྱད་པར་འཕགས༔ ཕྱི་ནང་གསང་སྔགས་བསྐྱེད་རྫོགས་ནི༔ ཏིང་འཛིན་གསུམ་གྱི་ལྷར་བསྒོམ་ནས༔ ཕྲིན་ལས་རྣམ་བཞིའི་ལོངས་སྤྱོད་ཀུན༔ འབྲས་བུ་མི་ཐོབ་ཀུན་བརྟགས་པས༔ ཡིད་སྨོན་ཀུན་བརྟགས་དཀྱིལ་འཁོར་ཀུན༔ དྲང་དོན་ཡིན་ཕྱིར་འཁྲུལ་བའི་སེམས༔ གསལ་བརྟན་ཏིང་འཛིན་གོམས་གྱུར་ཡང་༔ སེམས་ལས་མ་བྱུང་སངས་རྒྱས་མིན༔ ཞེས་སོ༔

གཉིས་པ་ཕྱེད་པ་དངོས་ནི་མན་ངག་ཁྱད་པར་ཅན་དེ་ཉིད་གསལ་རྒྱན་ལྟར་དང་༔ འདིར་ཅུང་ཟད་ཙམ་བྱེད་ན༔ ངོ་བོ་དང་༔ གནས་ཀྱི་སོགས་དང་༔ དུས་གསུམ་གྱི་རྟོག་པས་ཁྱད་པར་ཕྱེད་པའོ༔ དང་པོ་ངོ་བོའི་ཁྱད་པར་ནི་སེམས་ཀྱི་ངོ་བོ་མ་རིག་པ་འཁྲུལ་པའི་རྟོག་པ་དང་༔ རིག་པའི་ངོ་བོ་ཆོས་སྐུའི་ཆ་ལས་ཤེས་རིག་གི་ལྡོག་པ་ལ་བཤད་དེ༔ ཐལ་འགྱུར་ལས༔ སེམས་ཞེས་བྱ་བ་འཁྲུལ་རྟོག་ལ༔ ངོ་བོ་འཇུག་ཅིང་ཁྱབ་པ་ལ༔ དྲན་བསམ་རྣམས་ཀྱི་གཞི་མའོ༔ ཡེ་ཤེས་རྟོགས་པ་མ་ཡིན་ཏེ༔ ངོ་བོ་རང་གསལ་སྙིང་པོའི་དོན༔ ཞེས་དང་༔ འཁོར་ལོའི་རྒྱུད་ལས༔ སེམས་ནི་མ་རིག་མུན་པ་ཡིན༔ སངས་རྒྱས་སེམས་བྲལ་ཡེ་ཤེས་སྐུ༔ ཞེས་སོ༔ ཡང་སེམས་ཀྱི་ངོ་བོ་ནི་རྟག་ཆད་གཉིས་འཛིན་རིག་པའི་ངོ་བོ་གཉིས་མེད་ཆོས་སྐུ་སྟེ༔ སྒྲོན་མ་སྣང་བ་ལས༔ རྟག་ཆད་འཛིན་པ་མ་རིག་པ༔ དེ་ལས་མ་བྱུང་སྒྲོ་སྐུར་བྲལ༔ རྟག་ཆད་སེམས་མེད་ཆོས་ཀྱི་སྐུ༔ སེམས་ལས་མ་བྱུང་སངས་རྒྱས་ཡིན༔ ཞེས་དང་༔ དོན་འདུས་ལས༔ ད་ལྟའི་ཆོས་སྐུ་འདི་ལས་ནི༔ འདུས་མ་བྱས་ཕྱིར་རྟག་ཆད་མེད༔ ཅེས་སོ༔ ཡང་སེམས་ནི་བྱིང་རྒོད་སྣ་ཚོགས་པས་བྲི་གང་ཅན༔ རིག་པ་ནི་དེ་དག་དང་བྲལ་བ་སྟེ༔ ཡོན་ཏན་ཀུན་འབྱུང་ལས༔ ཕྱོགས་མེད་ཆོས་སྐུ་རང་གསལ་བས༔ བྱིང་རྨུག་བྱ་བའི་མིང་ཡང་མེད༔ དངོས་པོ་མེད་པའི་གསལ་དོན་གྱི༔ བཏང་སྙོམས་རྟིང་པོའི་མུན་པ་སེལ༔ ཞེས་དང་༔ ཡེ་ཤེས་ནམ་མཁའ་དང་མཉམ་པར༔ སངས་ནི་བྱིང་རྨུག་རྒོད་པ་སངས༔ རྒྱས་ནི་ཆོས་སྐུ་གསར་བ་རྒྱས༔ དེ་ཕྱིར་སེམས་ལས་མ་བྱུང་བས༔ ཡེ་ཤེས་རང་སངས་རྒྱས་པ་ཡིན༔ ཞེས་སོ༔ ཡང་སེམས་ནི་འཁྲུལ་བའི་ཡུལ་ལ་སོ་སོར་མིང་བརྟགས་དོན་བཟུང་དངོས་པོར་བལྟས་ཤིང་འཛིན་པ་ཞིག་ལ༔ རིག་པ་ནི་འཛིན་པ་ཐམས་ཅད་དང་བྲལ་ཞིང་གཡོ་འགུལ་མེད་པའི་ཡེ་ཤེས་ངང་གི་རྒྱས་པ་སྟེ༔ དེ་ཉིད་ལས༔ སངས་ནི་འཁྲུལ་པར་འཛིན་པས་སངས༔ རྒྱས་ནི་ཆོས་སྐུ་མི་གཡོ་རྒྱས༔ དེ་ཕྱིར་སེམས་ལས་མ་བྱུང་བས༔ ཡེ་ཤེས་རང་སངས་རྒྱས་པ་ཡིན༔ ཞེས་སོ༔ ཡང་སེམས་ནི་དུས་གསུམ་གྱི་ཆ་སྐྱེ་འགགས་གནས་པར་སྣང་བའི་རང་བཞིན༔ ཡེ་ཤེས་སྐྱེ་བ་མེད་དུས་གསུམ་མཉམ་པ་ཉིད་ཀྱི་ཆོས་ཉིད་ཏེ༔ ནམ་མཁའ་མཉམ་པ་ལས༔ སེམས་ལ་དུས་གསུམ་ཡོད་པས་ན༔ དེ་ལ་སྔ་ཕྱི་ད་ལྟ་བྱུང་༔ སེམས་ལ་འཕོ་འགྱུར་ཡོད་པས་ན༔ དེ་ཕྱིར་ལུས་ལ་སྐྱེ་འཆི་བྱུང་༔ ཞེས་དང་༔ སྐྱེ་མེད་རང་བྱུང་ཡེ་ནས་གནས༔ དེ་ཉིད་ལམ་གྱི་ཡེ་ཤེས་གནས༔ ཐོག་མཐའ་ཆོད་ན་དུས་གསུམ་གཅིག༔ ཆོས་སྐུ་གཅིག་ཕྱིར་འཕོ་འགྱུར་མེད༔ དོན་ལ་འགྱུར་མེད་སྡུག་བསྔལ་བྲལ༔ སྔ་ཕྱི་མེད་པའི་རང་བྱུང་སྐུ༔ སེམས་ལས་མ་བྱུང་ཆོས་སྐུའོ༔ ཞེས་སོ༔ སེམས་ལ་བདེ་སྡུག་བར་གསུམ་ཡོད་པ་དང་༔ ཡེ་ཤེས་ལ་དེ་དག་མེད་པའི་ཁྱད་པར་ཡང་ཡོད་སྟེ༔ ཀུན་ཏུ་བཟང་པོ་ཡེ་ཤེས་གསལ་བར་སྟོན་པའི་རྒྱུད་ལས༔ བརྗོད་མེད་རང་གི་ངོ་བོ་ལ༔ ཚོར་བ་བདེ་སྡུག་གང་ཡང་མེད༔ དེ་ཕྱིར་ཆོས་ཉིད་བདེན་པའི་ངང་༔ སེམས་ལས་མ་བྱུང་སངས་རྒྱས་ཡིན༔ ཞེས་སོ༔ ཡང་སེམས་ནི་ཕྱིའི་ཡུལ་ལ་འདི་དང་འདིའོ་སྙམ་དུ་གཟུང་འཛིན་གཉིས་སུ་རྟོག་པའི་རྣམ་རྟོག༔ རིག་པ་ནི་གཟུང་འཛིན་དང་བྲལ་བ་སྟེ༔ ནམ་མཁའ་ཀློང་ཡངས་ལས༔ ད་ལྟའི་ཤེས་པ་འདི་ཉིད་ལས༔ གཟུང་འཛིན་མེད་པའི་བྱང་ཆུབ་སེམས༔ ཞེས་སོ༔ སེམས་ནི་ཡུལ་འདོད་པ་དང་མི་འདོད་པ་ལ་དགག་སྒྲུབ་སྣ་ཚོགས་སུ་འཛིན་པའི་བློ་ལ༔ ཡེ་ཤེས་ནི་ཆགས་སྡང་དགག་སྒྲུབ་ལས་འདས་པ་སྟེ༔ འཁྲུལ་པའི་རྟོག་པ་ཆགས་སྡང་ཡུལ༔ དགག་སྒྲུབ་རྣམ་རྟོག་བྲལ་པའོ༔ ཞེས་སོ༔ ཡང་སེམས་ནི་ཡུལ་ལ་ལྟོས་ནས་འཕྲལ་བྱུང་ཡིན་ལ༔ རིག་པ་རང་བྱུང་རྒྱུ་རྐྱེན་ལས་འདས་པ་ཡེ་ཤར་ཡེ་གདལ་ཆེན་པོ་དང་གཅིག༔ སེམས་ནི་ཡུལ་ཡོད་མེད་བཟང་ངན་ཡིན་མིན་གྱིས་མཐའ་རྣམ་པར་འབྱེད་པ་དང་༔ ཡེ་ཤེས་ནི་མཐའ་དང་བྲལ་བའོ༔ གཞན་ཡང་ཤན་དབྱེ༔ འབྱེད་པ་མེད་པ༔ འཛིན་པ་མེད་པ༔ རང་གསལ་བ༔ རྒྱ་མ་ཆད་པ༔ ལྷུན་གྱིས་གྲུབ་པ་རིག་པའི་མཚན་ཉིད་ལྔ༔ ཡེ་ཤར་ཡེ་གདལ༔ སྟོང་པ་འགྱུར་མེད༔ ཡོན་ཏན་འབྱུང་བ༔ དྲི་མ་མེད་པ༔ ཟང་ཐལ་ཐོགས་པ་མེད་པ༔ མཚན་མའི་ཆོས་དང་བྲལ་བའི་སྟོང་པ༔ སྤྲོས་པའི་མཐའ་བྲལ་བའི་ཆོས་སྐུའི་ཁྱད་པར་བདུན་ལྡན་སོགས་ཀྱང་སྤྲོས་བྲལ་དོན་གསལ་ལས་པདྨ་ཀ་ར་ངས་བཤད་པ་ལྟར་ཤེས་པར་གྱིས་ཤིག༔

གཉིས་པ་གནས་སོགས་ཀྱི་དབྱེ་བ་ནི༔ འོད་གསལ་གནད་ཡིག་ལས་ཤེས་པར་བྱའོ༔ གསུམ་པ་དུས་གསུམ་གྱི་ཤེས་པ་དང་ཕྱེས་ནས་ངོ་སྤྲོད་པས༔ སེམས་ལས་མ་བྱུང་བའི་སངས་རྒྱས་རང་ངོ་འཕྲོད་པ་སྟེ༔ སྤྲོས་བྲལ་དོན་གསལ་ལས༔ དུས་གསུམ་ཕྱེ་ལ་ངོ་སྤྲད་པ༔ གང་ཟག་གཅིག་གི་ཤེས་རྒྱུད་ལ༔ བསམ་གྱི་མི་ཁྱབ་གྲངས་མེད་ཀྱང་༔ ཤེས་པ་བཞི་རུ་འདུས་པའོ༔ དུས་གསུམ་དག་གི་ཤེས་པ་དང་༔ དུས་མེད་རྟོག་པའི་ཤེས་པའོ༔ ཞེས་སོ༔ དེ་དག་ནི་འདས་པ་དང་མ་འོངས་པ་དང་ད་ལྟར་གྱི་ཤེས་པ་གསུམ་ནི་འཁོར་བའི་ཆོས་སོ༔ དེ་གསུམ་གྱི་རང་བཞིན་མཉམ་ཉིད་བདག་མེད་པ་འཛིན་པ་གྲོལ་བ༔ མ་བྱས་པ་མ་བཅོས་པ་མ་བསྒྱུར་བ་ཡེ་གནས་པ་སྤྲོས་བྲལ་གྱི་ངོ་བོ་མ་འགགས་པས་འོད་གསལ་བ༔ དེ་ཉིད་ལ་ངོ་སྤྲད་པར་བྱ་སྟེ༔ དེ་ཡང་རྣམ་རྟོག་མེད་པར་རང་ཤེས་རང་གནས་པས་ཝལ་པོ༔ གཟུང་འཛིན་མེད་པས་ཧད་དེ་བ༔ འགགས་པ་མེད་པས་སལ་ལེ་བ༔ རྒྱུ་རྐྱེན་མེད་པས་རང་བྱུང་བ་ཉིད་དེ༔ དེ་ཉིད་ལས༔ བདག་འཛིན་གྲོལ་བ་དུས་གསུམ་དག༔ ཧད་དེ་ཝལ་ལེ་སལ་ལེ་བ༔ དེ་ལས་རང་བྱུང་ཡེ་ཤེས་ཏེ༔ རྒྱུ་རྐྱེན་མེད་པའི་རང་བྱུང་ཡིན༔ ཞེས་སོ༔ ཁྱད་པར་ད་ལྟའི་ཤེས་པའི་གནས་ལུགས་སྣང་སྟོང་ཟུང་འཇུག་བརྗོད་དང་བྲལ་བ་ལ་ངོ་སྤྲད་དེ་ཆོས་སྐུ་བཞི་ལྡན་གྱི་དགོངས་པ་ཞེས་བྱའོ༔ སྟོང་པ༔ གསལ༔ ཟུང་འཇུག་གི་རྩལ་གཉིས་སྟེ་བཞི་ཚོགས་པའོ༔ ཡོན་ཏན་ཀུན་འབྱུང་ལས༔ ད་ལྟའི་ཤེས་པ་འདི་ཉིད་ལ༔ ཡིད་ཆེས་གདེངས་ལྡན་མ་རིག་སངས༔ ཆོས་སྐུ་བཞི་ལྡན་ངོས་བཟུང་ངོ་༔ དཔེར་ན་མིག་གི་འབྲས་བུ་བཞིན༔ ཧྲིག་གེ་བ་ལ་དྲན་པས་ཟིན༔ ཡེ་རེ་བ་ལ་ཤེས་པ་དལ༔ རང་རིག་ཞེན་མེད་གདེང་གི་གསལ༔ སྤྲིན་མེད་སྟོན་ཀའི་ནམ་མཁའ་བཞིན༔ སེང་ངེ་བ་ལ་མཐའ་དབུས་མེད༔ གང་གི་མནོ་བསམ་མ་བཏང་ཕྱིར༔ བྱིང་རྨུགས་སྤྲོས་པ་གང་ཡང་མེད༔ ཉི་མ་གཟའ་བྲལ་ལྷང་ངེ་བཞིན༔ སལ་ལེ་པ་ལ་འགྱུ་བ་མེད༔ བདེ་ལ་མི་རྟོག་རྒྱུན་དུ་གནས༔ དེ་ཕྱིར་རང་བྱུང་འགྱུར་བ་མེད༔ གཡའ་མེད་མེ་ལོང་བྱད་བལྟ་བཞིན༔ ཝ་ལེ་བ་ལ་དངོས་པོ་མེད༔ དེ་ཙམ་ཉིད་ན་ཆོས་ཀྱི་དབྱིངས༔ ཞེས་སོ༔

ཞར་ལ་སེམས་དང་ཡེ་ཤེས་ཀྱི་རྣམ་གྲངས་བཤད་པ་དང་༔ ངེས་ཚིག་བཤད་པ་ནི༔ སེམས་ཀྱི་གྲངས་ནི་ཚོགས་བརྒྱད་དང་༔ ཡེ་ཤེས་ལ་གསུམ་ལྡོག་པས་དབྱེ་བའོ༔ དགོངས་པ་འདུས་པའི་རྒྱུད་ལས༔ སེམས་ནི་རྣམ་ཤེས་ཚོགས་བརྒྱད་དེ༔ འགགས་མེད་ནམ་མཁའི་ཆོ་འཕྲུལ་འདྲ༔ ཞེས་དང་༔ ཐལ་འགྱུར་ལས༔ གཞི་ལ་གནས་པའི་ཡེ་ཤེས་དང་༔ མཚན་ཉིད་འཛིན་དང་ཡུལ་ཁྱབ་བོ༔ ཞེས་འབྱུང་བ་ལྟར་རོ༔

སེམས་ཀྱི་ངེས་ཚིག་ནི༔ ཡུལ་ལ་གཟུང་འཛིན་དང་བཅས་པར་སེམས་པ་དང་༔ ཡེ་ཤེས་ཀྱི་ངེས་ཚིག་ནི་ཡེ་ནས་གཞི་ལ་གནས་པའི་ཆ་ནས་བཞག་པ་སྟེ༔ དོན་དུ་གཟུང་འཛིན་མེད་པའི་ཤེས་པ་ཡུལ་མེད་རང་གསལ་ཆེན་པོ༔ གཞི་མེད་རྩ་བ་དང་བྲལ་བའོ༔ ངེས་ཚིག་བསམ་པས་དྲན་ཡུལ་སྐྱེ༔ གང་ལ་སེམས་དང་གང་གིས་སེམས༔ གང་སེམས་པ་དང་གང་ཕྱིར་སེམས༔ ཞེས་དང་༔ ངེས་ཚིག་ཡེ་ནས་གནས་པའི་དོན༔ དེ་ལྟར་གནས་པའི་ཡེ་ཤེས་སོ༔ ཞེས་སོ༔

དེ་ལྟར་སེམས་དང་ཡེ་ཤེས་ཕྱེད་པའི་ཡོན་ཏན་ནི༔ ཡེ་ཤེས་ཀྱི་ངོ་བོ་ཅི་ལྟ་བ་བཞིན་དུ་མཐོང་བས་དེ་ཕྱིན་ཆད་མ་བརྗེད་མ་ཡེངས་ཙམ་ནས་མ་རིག་པའི་སྐྱོན་ཐམས་ཅད་ཀྱིས་གོས་པར་མི་འགྱུར་བར་གཞི་ནས་དག་པ་དང་༔ དེའི་རྩ་བ་ཅན་གྱི་ཉོན་མོངས་གཞི་ནས་གྲོལ་བ་དང་༔ ལས་ངན་པ་བསགས་པའི་རྒྱུ་དང་༔ བག་ཆགས་དང་འབྲས་བུ་ངན་པ་དག་གིས་ཀྱང་མི་གོས་པར་ད་ལྟ་ཉིད་ནས་སངས་རྒྱས་ཀྱི་ས་ལ་གནས་པའང་ཡིན་ཏེ༔ རྫོགས་ཆེན་གྱི་ངེས་དོན་ཐམས་ཅད་འདུས་པའི་སྙིང་པོ་ཡེ་ཤེས་ཀློང་གི་རྒྱུད་ལས༔ ཀུན་བཟང་རྟོགས་པ་ངེས་པའི་དོན༔ ནམ་མཁའི་མཐོངས་སུ་ཉི་ཤར་འདྲ༔ གདོད་ནས་མ་རིག་སྐྱོན་མ་གོས༔ ལུང་ལ་མ་བརྟེན་རིག་ཅིང་རྟོགས༔ སངས་མ་རྒྱས་པའི་རིག་པ་ལས༔ རང་བྱུང་ཡེ་ཤེས་དེ་ལ་བྱ༔ ཞེས་དང་༔ བདེ་བའི་འཁོར་ལོ་ལས༔ ངོས་ཟིན་དོན་ལ་གནས་ཐབས་ནི༔ མར་མེ་མུན་སེལ་སྣང་བ་བཞིན༔ སྐད་ཅིག་གཅིག་གི་ཏིང་འཛིན་གྱིས༔ བག་ཆགས་ལས་ཀྱི་མ་རེག་པས༔ དོན་ཉིད་ཡེ་ཤེས་དྲན་པ་ཡིན༔ ཉོན་མོངས་ལས་ཀྱིས་གོས་པ་མེད༔ དེ་བས་གདམས་ངག་དྲན་པས་ནི༔ སྒྱུ་མ་སངས་ནས་འཁྲུལ་བྲལ་ནས༔ མཚན་འཛིན་རྟོག་བྲལ་དོན་ཤེས་པས༔ སྤྲོས་བྲལ་དོན་གྱི་སྙིང་པོར་གནས༔ ཞེས་དང་༔ ཡེ་ཤེས་གཏིང་རྫོགས་ལས༔ ཡེ་ཤེས་རྟོགས་ནས་མཉམ་པའི་དོན་ཉིད་ལ༔ རྒྱུན་དུ་མ་བརྗེད་རིག་པའི་གསལ་ཐེབ་ནས༔ བག་ཆགས་ཉོན་མོངས་རྟོག་པའི་སྐྱོན་གྱིས་ཀྱང་༔ དེ་ལ་རྡུལ་ཙམ་མི་སྒྲིབ་ཡེ་ཤེས་གསལ༔ ཞེས་དང་༔ རི་བོ་བརྩེགས་པའི་རྒྱུད་ལས༔ སེམས་རིག་ཕྱེད་པས་ཡེ་ཤེས་དོན་རྟོགས་ན༔ སེམས་དང་སེམས་བྱུང་ཉོན་མོངས་ཐམས་ཅད་ཀྱང་༔ དེ་མ་ཐག་ཏུ་བག་ཆགས་ལས་ཉོན་བཅས༔ མིང་མཐར་མི་གནས་ཐོད་རྒལ་རང་སར་གྲོལ༔ ཞེས་སོ༔

བཞི་པ་དེ་ཉིད་སངས་རྒྱས་དང་གྲུབ་ཐོབ་ཐམས་ཅད་ཀྱི་དགོངས་ཀློང་དུ་བཤད་པ་ནི༔ དེ་ལྟ་བུའི་ཡེ་ཤེས་འདི་ཉིད་ལ་དུས་གསུམ་གྱི་སངས་རྒྱས་ཐམས་ཅད་ཀྱི་དགོངས་པ་འདུས་པ་ཡིན་ཏེ༔ མདོ་ལས་སེམས་ཀྱི་རང་བཞིན་འོད་གསལ་བ་ཞེས་བྱ་ལ༔ སྔགས་སུ་གཞི་རྒྱུད་བདེན་པ་དབྱེར་མེད་ཅེས་བྱ་ཞིང་༔ ཕྱག་རྫོགས་དབུ་མ་ལ་སོགས་མིང་ཅི་ལྟར་བརྗོད་ཀྱང་༔ དོན་དུ་སེམས་མེད་པའི་ཡེ་ཤེས་ཉག་གཅིག་ལ་ཡེ་ཤེས་ཆོས་སྐུ་ཡིན་པའི་ཕྱིར་ནའོ༔ འདིར་སྤྲོས་གཅོད་རྒྱས་པར་མཐུན་སྒྲུབ་དང་བཅས་པ་ཡོད་ཀྱང་དེ་ཙམ་གྱིས་མ་འཐེར་བ་མེད་དོ༔ ཀུན་བྱེད་ལས༔ ང་ཡི་རང་བཞིན་འདི་ལ་ནི༔ སྐུ་འདུས་གསུང་འདུས་དགོངས་པ་འདུས༔ ཞེས་དང་༔ དུས་གསུམ་སངས་རྒྱས་ཐམས་ཅད་ཀྱི༔ ཐུགས་བརྟོལ་ཉག་གཅིག་དགོངས་དོན་གཅིག༔ ཅེས་དང་༔ གཞན་ལས་ཀྱང་༔ སྔ་རབས་འདས་པའི་སངས་རྒྱས་རྣམས་ཀྱིས་ཀྱང་༔ རང་གི་སེམས་ལས་གཞན་དུ་ཆོས་བཙལ་མེད༔ ད་ལྟ་བཞུགས་དང་སླད་ནས་འབྱོན་པའང་༔ རྟོག་མེད་མཉམ་པ་ཉིད་ཀྱིས་གྲུབ་པའོ༔ དུས་གསུམ་སངས་རྒྱས་ཐམས་ཅད་ཀྱི༔ དགོངས་པའི་དོན་ནི་ང་ལ་འདུ༔ ཞེས་དང་༔ མཚན་བརྗོད་ལས༔ སངས་རྒྱས་ཀུན་གྱི་ཐུགས་ཆེ་བ༔ སངས་རྒྱས་ཀུན་གྱི་བསྟན་པ་གཅིག༔ རྣམ་པར་ཤེས་པས་ཆོས་ཉིད་འདས༔ ཡེ་ཤེས་གཉིས་མེད་ཚུལ་འཆང་པ༔ རྣམ་པར་རྟོག་མེད་ལྷུན་གྱིས་གྲུབ༔ དུས་གསུམ་སངས་རྒྱས་ལས་བྱེད་པ༔ སངས་རྒྱས་ཐོག་མ་ཐ་མ་མེད༔ ལ་སོགས་པས་བསྟན་པའོ༔

གསུམ་པ་དོན་བསྡུ་བ་ནི༔ ད་ལྟའི་རིག་པ་བཞི་ཆ་གསུམ་བྲལ་ཆེན་པོ་སེམས་ལས་འདས་པ་འདི་ཡིན་ཏེ༔ ཡེ་ཤེས་ཀློང་རྒྱུད་ལས༔ དུས་གསུམ་གཅིག་པའི་ཆོས་སྐུ་ལ༔ རང་ལ་རང་དུ་ཆོས་སྐུར་ཤེས༔ ད་ལྟའི་རིག་པ་འདི་ཡིན་ཏེ༔ དུས་རྣམས་ཀུན་ཏུ་འདུ་འབྲལ་མེད༔ སེམས་ལས་མ་བྱུང་སངས་རྒྱས་ནི༔ རང་བྱུང་ཀུན་ཏུ་བཟང་པོ་བྱ༔ ཞེས་སོ༔

གསུམ་པ་ལུང་ལས་མ་བྱུང་བའི་མན་ངག་བཤད་པ་ནི༔ ལུང་ལས་མ་བྱུང་པའི་མན་ངག་གཞི་ལ་ལྷུན་གྱིས་གྲུབ་པར་བཤད༔ ལུང་ལས་མན་ངག་གི་ལམ་ནས་རྟོགས་ཚུལ་བཤད་པ་གཉིས་ལས༔ དང་པོ་ལ་ཡེ་ནས་གཞི་ལ་གྲུབ་ཚུལ༔ སྔོན་གྱི་སངས་རྒྱས་ཀྱིས་རྟོགས་ཚུལ་ལོ༔

དང་པོ་ནི་ལུང་ལ་མ་བརྟེན་པའི་གདམས་ངག་གི་ངོ་བོ་སྟོང་ཞིང་འོད་གསལ་བདག་མེད་པའི་དོན་སྐུ་གསུམ་ལྷུན་གྲུབ་ཀྱི་སངས་རྒྱས་ནི་ཡེ་ནས་རང་ལ་ཡོད་པའི་ཕྱིར་རྒྱུ་རྐྱེན་གྱིས་མ་བསྐྱེད་པའི་ཆོས་སྐུ་དམ་པས་ཕྱག་གི་ཡེ་རྒྱས་ཐེབ་པ་ཡིན་ཏེ༔ རྒྱུ་ཚོགས་གཉིས་ལས་འབྲས་བུ་གསར་དུ་བཅོས་མི་དགོས་ན་དབང་པོ་ཡང་རབ་ཀྱི་དེ་རྟོགས་པར་རུང་ཏུ་གནས་པས་ན་ལུང་ལས་མ་བྱུང་བའི་མན་ངག་གཞི་ན་ཡོད་པ་ཡིན་ལ༔ གཞི་དེ་ངོ་བོ་ཡེ་ནས་དག་ཅིང་སྒྲིབ་བྱེད་མ་རིག་པས་མིང་ཙམ་ཡང་མེད་པས་ཀྱང་རྟོགས་སུ་རུང་བར་སྐྱེས་པ་དང་༔ རྟོགས་ཕྱིན་ཆད་གྲོལ་བ་ཡང་རྡོ་རྗེའི་དམ་བཅའ་བཞི་དང་ལྡན་པའི་གནད་ཀྱི་སྟེ༔ ནམ་མཁའ་དང་མཉམ་པའི་རྒྱུད་ལས༔ སངས་རྒྱས་ཀུན་གྱི་ཡེ་ཤེས་སྐུ༔ རང་བྱུང་ངོ་བོ་རྟོགས་ལས་བྱུང་༔ འདུས་མ་བྱས་ཀྱི་ནམ་མཁའ་འདྲ༔ གང་ཡང་མེད་པའི་སྔོན་རོལ་དུ༔ རང་བྱུང་ངོ་བོ་ཉིད་ཀྱི་སྐུ༔ ལུང་ལས་མ་བརྟེན་གདམས་ངག་ཆོས༔ རང་གི་རིག་པས་རང་རྟོགས་ཕྱིར༔ འཁྲུལ་མ་མྱོང་ལ་རྟོགས་མ་མྱོང་༔ དེ་ཚེ་འཁོར་འདས་འབྱུང་བ་མེད༔ གཞི་ཤེས་རང་བྱུང་རིག་པ་ལ༔ གཞི་ནས་མ་རིག་མེད་པའི་ཕྱིར༔ རྐྱེན་གྱི་སྔོན་འཁྲུལ་མ་མྱོང་བས༔ ལུང་ལྡན་ཀུན་གྱི་བསྟན་མི་དགོས༔ དེ་ཕྱིར་ལུང་ལས་མ་བྱུང་ཆོས༔ ཡ་མཚན་རྨད་དུ་བྱུང་བའི་བཀའ༔ སངས་རྒྱས་ཐམས་ཅད་དེ་ལས་སྐྱེས༔ ཞེས་སོ༔ འོན་ཀྱང་ཆོས་ཐམས་ཅད་ཀྱི་གནས་ལུགས་སྤྲོས་བྲལ་བདག་མེད་པ་དེ་མཚན་ཉིད་པས་ཀྱང་འདོད་པ་དང་༔ གཞི་རྒྱུད་ཟུང་འཇུག་སྐུ་དང་ཡེ་ཤེས་དབྱིངས་སུ་འདུ་འབྲལ་མེད་པ་སྔགས་སུ་འདོད་པའི་ཕྱིར༔ དེ་དག་གི་རང་ངོ་ལ་མ་རིག་པ་མེད་པས་ན་མི་མཐོང་བས་ཁྱད་མེད་པར་རིགས་སོ༔ ལྟ་ཞིག་ན་ནི་ཁྱོད་ཁོ་ནས་ཁྱད་ཆོས་སུ་མ་ཐལ་ལོ་སྙམ་ན༔ ཡོད་དེ་མཚན་ཉིད་པས་ཆོས་ཉིད་ཀྱི་གནས་ལུགས་ཡོངས་གཅོད་དུ་བསྟན་མ་བྱུང་ལ༔ རྡོ་རྗེ་ཐེག་པའི་གནས་འགྱུར་འདོད་པ་དང་གཉིས་ཀས་ཀྱང་དྲི་བཅས་དྲི་མེད་ཀྱི་གཞི་ཞེས་བརྗོད་པས་ན་འཁོར་འདས་གཞི་མཐུན་པས་སེམས་ལ་ལམ་དངོས་སུ་བཟུང་བས་སྤྲོས་བྲལ་མཛུབ་བཙུག་གི་ཚུལ་དུ་དྲི་བྲལ་ཀུན་ཏུ་བཟང་པོ་མ་མཐོང་བའི་ཕྱིར་དང་༔ གལ་ཏེ་ཆོས་སྐུ་འདུས་མ་བྱས་ཡིན་པའི་ཕྱིར་ཐབས་ཤེས་རྒྱུ་རྐྱེན་ལ་ལྟོས་དགོས་པ་མི་འཐད་པ་དང་༔ དེ་ལྟ་ན་སྔགས་དང་མཚན་ཉིད་གཞི་ལ་མ་གྲུབ་ཤིང་ལུང་སྤང་བྱར་ཡང་འགྱུར་བ་དང་༔ གྲོལ་བ་ཐམས་ཅད་ཀྱང་སོ་སོ་རང་རིག་རྟོགས་པས་གྲོལ་ན་གྲོལ་ཚུལ་གཞན་པོ་མ་ཤེས་པས་ཀྱང་གནོད་པ་མེད་ལ་འཐད་པ་དང་བཅས་པའོ༔ ཡང་གལ་ཏེ་དབྱིངས་ཡེ་འདུ་འབྲལ་མེད་པའི་ཆོས་སྐུ་རང་ལ་ཡོད་པ་ཡེ་ཤེས་རང་རིག་གི་ཚུལ་དུ་མཐོང་ནས་གྲོལ་ན་ནི་ལུང་ལས་མ་བྱུང་བས་མན་ངག་ཡིན་པར་འུབ་ཆུབ་པས་དེ་ལྟར་འོག་མ་ན་གབ་པ་གོང་མས་གསལ་བར་ཤིན་ཏུའང་ཁས་བླང་བར་བྱའོ༔

གཉིས་པ་སྔོན་གྱི་སངས་རྒྱས་ཀྱིས་རྟོགས་ཚུལ་ནི༔ དེ་ཡང་ཆོས་སྐུ་ཀུན་ཏུ་བཟང་པོ་ནི༔ སྟོན་བྱེད་སློབ་དཔོན་མེད་པར་ཁྱད་ཆོས་དྲུག་གིས་སངས་རྒྱས་པས་ན་སྔོན་གྱི་རྟོགས་ཚུལ་ལོ༔ ཇི་ལྟར་ན་གཞིའི་ཆོས་སྐུ་ཀུན་ཏུ་བཟང་པོ་རྒྱུ་ལས་མ་བྱུང་བས་སངས་རྒྱས་ཡིན་པའི་གནད་ཀྱིས་ཡེ་ནས་སྣང་སྟོང་ཟུང་འཇུག་ཆེན་པོར་ལྷུན་གྱིས་གྲུབ་པས་སྐུ་དང་ཡེ་ཤེས་ཀྱི་སྣང་བ་རབ་འབྱམས་པ་ལ༔ སེམས་ལས་མ་བྱུང་པས་རང་རིག་པའི་ཡེ་ཤེས་བརྗོད་པ་དང་བྲལ་བའི་ལུང་ངམ་སྟོན་བྱེད་ཀྱི་སློབ་དཔོན་གཞན་མེད་པར་གཉིས་འཛིན་དང་བྲལ་བར༔ རང་གི་སེམས་ཉིད་ཀྱི་སྣང་ལྡོག་དེ་ལྟར་ཡེ་ནས་རང་ཤར་ཆེན་པོ་དབྱིངས་སེམས་ཉིད་འོད་གསལ་གྱི་ངོར་སྣང་བ་ཡིན་པར་ཤེས་པའི་འབྱེད་བྱེད་ཀྱི་ཤེས་རབ་ཆེན་པོ་སྐྱེས་ནས་གྲོལ་བ་ཡིན་ན༔ རང་སྣང་བ་ཡིན་པར་ཤེས་པས་གཟུང་བ་ཡུལ་མེད་དུ་རྟོགས༔ རང་ཤར་བ་ཡིན་པས་འཛིན་པ་རང་ཞིར་གྲོལ་ཏེ༔ མ་རིག་པ་གཞི་ནས་སངས་བས་རང་གྲོལ་བ་ཡིན་ཏེ༔ སྟོན་པ་ཀུན་ཏུ་བཟང་པོའི་དེ་ལྟར་རྟོགས་ནས་སངས་རྒྱས་པའོ༔ ཡེ་ཤེས་ནམ་མཁའ་དང་མཉམ་པའི་རྒྱུད་ལས༔ རང་བྱུང་ཀུན་ཏུ་བཟང་པོ་ལ༔ ཡུལ་མེད་འཛིན་པ་མེད་པའི་ཕྱིར༔ དུས་དེ་ཉིད་ནས་མ་རིག་སངས༔ དེ་ཕྱིར་ལུང་ལས་མ་བྱུང་བས༔ ངེས་དོན་སྙིང་པོའི་ཆོས་ཞེས་བྱ༔ ཀུན་བཟང་སློབ་དཔོན་མེད་པའི་ཕྱིར༔ ཕྱི་ནང་ཆོས་ཀུན་བཤད་ལུང་མེད༔ དེ་ཕྱིར་གཞན་ལ་མ་བརྟེན་པའི༔ རང་གི་རིག་པས་ཤེས་པའི་ཕྱིར༔ ལུང་ལ་མ་བརྟེན་མན་ངག་ཆོས༔ རྒྱལ་བ་རྣམས་ཀྱི་རྟོགས་ཚུལ་ཡིན༔ ལུང་ལ་མ་བརྟེན་ཆོས་སྐུ་ལ༔ འཁོར་བ་བཙལ་གྱིས་མ་རྙེད་པས༔ སངས་རྒྱས་ཀུན་ཏུ་བཟང་པོ་བྱ༔ བག་ཆགས་ཀུན་གྱིས་མ་གོས་ཕྱིར༔ རྟོག་པ་མེད་ཕྱིར་ཡེ་ཤེས་རྒྱས༔ ལུང་ལ་མ་བརྟེན་གདམས་ངག་ཡིན༔ ཞེས་སོ༔

གཉིས་པ་དེ་ཉིད་ལམ་རྣལ་འབྱོར་བས་རྟོགས་ཚུལ་ལས་ཀྱང་ལུང་ལས་མ་བྱུང་བའི་མན་ངག་ཡིན་ཏེ༔ མཚན་ཉིད་པས་ནི་རྟགས་དང་གཏན་ཚིགས་ལ་བརྟེན་ནས་རྣམ་གཅོད་ཀྱི་གོ་ཡུལ་ཙམ་ལས་རང་གནས་ཀྱི་ཡེ་ཤེས་རང་ལ་བརྟེན་ནས་ཡོངས་གཅོད་དུ་གཏན་ལ་ཕབ་པ་མེད་པ་དང་༔ དེ་ནས་དང་པོ་རྟོག་པས་བཟོས་པའི་སྤྲོས་བྲལ་ལ་བློ་བཞག་ནས་དེའི་བག་ཆགས་གོམས་པས་མཐར་གནས་ལུགས་མཐོང་བས་ལམ་དུ་རེ་སྨོན་འདེབས་ན༔ འདིར་ནི་བླ་མའི་བརྡ་ཙམ་སྦྱར་བས་རྐྱེན་བྱས་ཏེ༔ ནང་རང་གནས་ཀྱི་ཡེ་ཤེས་ཉིད་ཀྱིས་མཚན་དཔེ་གདམས་པར་ཤར་བ་ལས་ལམ་བྱེད་ཅོག་བཞག་རང་མལ་དུ་འགོད་པས་ཁྱད་པར་ཡོངས་སུ་གཅོད་པ་ཞེས་བྱ་བས་ན་རྟོགས་པའང་དངོས་དང་གཟུགས་བརྙན་དུ་ཁྱད་ཆེ་བས་དམན་པ་ལ་དགག་སྒྲ་སྦྱར་ནས༔ ལུང་གིས་གཏན་ལ་མི་ཕབ་སྟེ་དད་པས་རྗེས་སུ་འགྲོ་བ་ཡིན་ཟེར་གྱི་བླ་མའི་ཞལ་ལུང་ཙམ་དང་༔ རྡོ་རྗེ་འཆང་གི་རྒྱུད་དུ་བསྟན་པ་དག་ཀྱང་མཐོང་མ་དགོས་ཞེས་པ་དོན་དུ་ངེས་པ་མེད་པ་དང་༔ ཡང་ཨ་ཏི་རང་མ་གཏོགས་པའི་ལུང་གཞན་ལས་མ་བྱུང་བའི་སྤྲོས་བྲལ་མཛུབ་བཙུག་ལ་གོ་ཡང་རུང་བའོ༔ རྒྱ་མཚོ་ཀློང་གསལ་ལས༔ དཔེར་ན་མུན་ནག་རྫས་སྟོར་ལ༔ ལག་ནོམ་བཙལ་བས་རྙེད་པར་དཀའ༔ སྣང་གསལ་སྒྲོན་མེ་ལ་བརྟེན་ནས༔ བཙལ་བས་རྙེད་པར་ཐེ་ཚོམ་མེད༔ དེ་བཞིན་མ་རིག་མུན་ནག་ཏུ༔ ཆོས་ཉིད་ནོར་བུ་སྟོར་བ་དེ༔ ཐ་སྙད་ཚིག་གིས་རྙེད་པར་དཀའ༔ མ་ནོར་བླ་མའི་ཞལ་དྲིན་གྱི༔ རིན་ཆེན་བརྡ་ཡིས་རྙེད་པར་འགྱུར་ཞེས་སོ༔ ༜ དེ་ཡང་ཀུན་མཁྱེན་གྱིས་སྔར་གྲོལ་བ་དང་ད་འོངས་ཐམས་ཅད་དུ་ལམ་འདིས་གྲོལ་པ་ཁྱད་ཆོས་དྲུག་གི་ཀུན་ཏུ་བཟང་པོ་བཞིན་གྲོལ་བར་གསུངས་པས་ན་ལུང་ལས་མ་བྱུང་བའི་མན་ངག་ཞེས་བྱ་སྟེ༔ ༜ ཡེ་ཤེས་ཀློང་གི་རྒྱུད་ལས༔ གདོད་ནས་མ་རིག་སྐྱོན་མ་གོ༔ ལུང་ལ་མ་བརྟེན་རིག་ཅིང་རྟོགས༔ སངས་མ་རྒྱས་པའི་རིག་པ་ལ༔ རང་བྱུང་ཡེ་ཤེས་དེ་ལ་བྱ༔ ཞེས་སོ༔

སྐབས་འདིར་རྒྱུད་སྡེ་གཞན་ལས་སྟོང་ཐུན་ཅུང་ཟད་བླང་ན༔ འཇམ་དཔལ་གྱི་རྒྱུད་ཐུན་མོང་པ་ལས༔ སངས་རྒྱས་ཐོག་མ་ཐ་མ་མེད༔ དང་པོའི་སངས་རྒྱས་རྒྱུ་མེད་པ༔ ཡེ་ཤེས་མིག་གཅིག་དྲི་མ་མེད༔ ཡེ་ཤེས་ལུས་ཅན་དེ་བཞིན་གཤེགས༔ ཞེས་གསུངས་ཏེ༔ ཡེ་ནས་མ་འཁྲུལ་མ་མྱོང་བ་སྤྲོས་བྲལ་གཞིའི་སང༵ས་རྒྱས༵་ཉིད་སྔར་མེད་པ་ལས་དུས་རེ་ཞིག་ན་འབྱུང་པ་དང་༔ བྱེད་རྩོལ་གྱིས་བསླད་ནས་བསྒྲུབ་ནས་གྲུབ་པ་མིན་པར་ཐོ༵ག་མ༵་ནས་སངས་རྒྱས་སུ་ཡོད་པ་དང་༔ ཐ༵་མ༵་འདི་ཙམ་ནས་རྒྱུད་ཆད་པ་མེ༵ད་པས་ཐོག་མ་དང་ཐ་མ་མེད་པ་ཞེས་བྱ་ལ༔ ད༵ང་པོ༵འི་དུས་ནས་མ་རིག་པ་གཞི་ལ་མ་གྲུབ་པས་སང༵ས་པ་དང་༔ སྐུ་དང་ཡེ་ཤེས་ཡོན་ཏན་གྱི་ངང་མ་བཙལ་ལྷུན་གྱིས་གྲུབ་པར་རྒྱས༵་ཤིང་༔ སྐྱེད་བྱེད་རྒྱུ༵་རྐྱེན་གྱི་དངོས་པོ་ཚོགས་གཉིས་སོགས་གང་ཡང་དགོས་པ་མེ༵ད་པ༵འི་རང་བྱུང་བ༔ ངོ༵་བོ༵་སྤྲོས་པ་དང་བྲལ་བའི་སྟོང༵་པ༵་ཆོས༵་ཀྱི་སྐུ༵་དང་འདུ་འབྲལ་མེད་པར་ར༵ང་བཞི༵ན་འོད་གས༵ལ་ཡེ༷་ཤེས༷་ཀྱི་སྣང་ཆ་མ་འགགས་པས་རང་གསལ་བ༵་ལོང༵ས་སྤྱོད་རྫོགས་པའི་སྐུ༵༔ ཐུགས༵་རྗེ༵་ཇི་ལྟ་ཇི་སྙེད་དབྱེར་མེད་མཁྱེན་པའི་ཡེ་ཤེས་མི༷ག་གཅི༷ག་སྤྲུལ༵་བའི་སྐུའི༵་འཁོར་འདས་ཀུན༵་ལ་ཁྱབ༵་པའི་རྩལ་ཉིད་རྩོགས་པའི་བག་ཆགས་དང་བདག་གཞན་དུ་འཛིན་པའི་མ་རིག་པ་དང་༔ དེའི་རྒྱུ་ལས་བྱུང་བའི་ལས་དང་ཉོན་མོངས་ཀྱིས་དྲི༷་མ༷་ཀུན་གྱི་གོས་པ་མེ༷ད་པ༔ འབྲས་ཆོས་ཀྱི་ཡོན་ཏན་ཐམས་ཅད་པའི་རྟེན་དུ་གྱུར་བས་ཡེ༷་ཤེས༷་ངོ་བོ་སྐུར་གནས་པའི་ཆ་ནས་ལུས༷་ཅ༷ན་དུ་བླ་དག་སྦྱར་བ་དེ་ནི་རྒྱུ༵་ལ༵ས་མ༵་བྱུང༵་བ༵ས་འབྲས༵་བུ༵་རང་ལ་ཡོད་པའི་དེ༷་བཞི༷ན་གཤེ༷གས་པ་ཞེས་བྱའོ༔

ཡང་༔ རྣམ་པར་ཤེས་པ་ཆོས་ཉིད་འདས༔ ཡེ་ཤེས་གཉིས་མེད་ཚུལ་འཆང་པ༔ རྣམ་པར་རྟོག་མེད་ལྷུན་གྱིས་གྲུབ༔ དུས་གསུམ་སངས་རྒྱས་ལས་བྱེད་པ༔ ཞེས་གསུངས་པས༔ སྣང་ལུགས་རྣ༷མ་པ༷ར་ཤེས༷་པ༷་ཚོགས་བརྒྱད་ཀྱི་གནས་ལུགས་ཆོས༷་ཉིད༷་ནི༔ ཕྱོགས་སམ་སྤྲོས་པའི་གྲྭ་ཟུར་ཐམས་ཅད་ལས་འདས༷་པ་དབྱིངས་དང་ཡེ༷་ཤེས༷་སྣང་སྟོང་གཉིས༷་མེ༷ད་མཉམ་པ་ཉིད་ཀྱི་ཚུལ༷་འཆ༷ང་པ༷་རང་རིག་པའི་ཡེ་ཤེས་ལ༔ བློའི་ཡུལ་ལ་རྣམ༷་པར༷་རྟོག༷་པའི་གཟུང་འཛིན་ངང་གིས་མེ༷ད་ཅིང་ཡོན་ཏན་ལྷུན༷་གྱིས༷་གྲུབ༷་པར་རྫོགས་པའོ༔ བདེ་བར་གཤེགས་པའི་སྙིང་པོ་དེ་ཉིད་ཡོད་པའི་གནད་ཀྱིས་དེ་ཐོག་མ་ནས་ཡེ་སངས་རྒྱས་པ་དང་ད་ལྟའང་ཉམས་པ་མེད་པ་དང་༔ ཐ་མ་མངོན་དུ་འགྱུར་རུང་བའི་ལས་ཀྱང་བྱེད༔ རང་ངོར་དུས་གསུམ་སངས་རྒྱས་སྔར་བྱོན་པ་ཐུབ་པའི་དབང་པོ༔ ད་ལྟ་དགེ་བའི་བཤེས་གཉེན༔ མ་འོངས་པ་ན་ཚོགས་སྦྱོར་སྤྲུལ་སྐུ༔ མཐོང་བསྒོམ་དུ་ལོངས་སྐུ༔ དེ་ཡན་ཆད་ཆོས་སྐུའི་སྣང་བ་འགོག་མེད་དུ་སྣང་བའང་དེའི་དབྱིངས་ཀྱི་གཟུགས་བརྙན་ཡིན་པ་དང་༔ གཞན་ཡང་དུས༷་གསུམ༷་གྱི་སང༷ས་རྒྱས་འབྱུང་བ་ཐམས་ཅད་ཀྱང་འདི་ཉིད་ལ་རང་ས་ཟིན་པའི་སྟོབས་ལས་ཡིན་པས་ན༔ ལ༷ས་བྱེད༷་པ༷་ཞེས་སེམས༵་ལ༵ས་མ༵༵་བྱུང༵་བ༵འི་དུས་གསུམ་གྱི་སངས༵་རྒྱས༵་བསྟན་པ་དང་༔ ཡང་ཤེས་རབ་ཆེན་པོའི་སྐད་ཅིག་ལ༔ ཆོས་ཀུན་ཁོང་དུ་ཆུད་པར་འཆང་༔ ཞེས་དང་རྒྱུད་དཀྲུགས་པས་དབང་གི༔ སྐད་ཅིག་གཅིག་གིས་བྱེ་བྲག་ཕྱེད༔ སྐད་ཅིག་གཅིག་གིས་རྫོགས་སངས་རྒྱས༔ ཞེས་བསྡུས་ཏེ་འཆད་ན༔ གཞི་ལས་གཞི་སྣང་ཤར་བ་ལ་ཤེས༷་ར༷བ་ཆེན༷་པོ༷འི་སྐད༷་ཅི༷ག་དེ་མ་ཐག་པ་ལ༷་ར༵ང་ངོ༵ར་རང་སྣང༵་བ༵ས་ཆོ༷ས་ལྷུན་གྲུབ་སྒོ་བརྒྱད་པོ་དེ་དག་ཀུན༷་གཞན་དུ་མ་བཟུང་བར་རང་སྣང་ཡིན་པར་ཤེས་ནས་གྲོལ་འཁྲུལ་གང་དུ་ཡང་ལུང་མ་བསྟན་པའི་གཞི༵་ལ༵ས་འཕ༵གས་ཏེ་གྲོལ་གཞི་རུ་སོང་བ༵་དང་༔ རང་སྣང་དེ་ཡང་དབྱིངས་ལ་ཡོན་ཏན་ལྷུན་གྱིས་གྲུབ་པར་ཡོད་པ་ཉིད་ཤར་པ་ཡིན་པ་ཁོང༷་དུ་ཆུད༷་པ༷འི་ཤེས་རབ་ཀྱི་རྩལ་འཆ༷ང་གིས་སྐད༷་ཅིི༷ག་གཅི༷ག་གི༷་འགྱུ་བ་རང་ཐོག་ཏུ་ཆོད་བྱེ༵་བྲག༵་ཕྱེད༵་པའི་རྟོགས་པ་སྐྱེས༔ བྱེ་བྲག་ཕྱེད༵་པས་ཐོ༵ག་ཏུ༵་སྐད༷་ཅི༷ག་གཅི༷ག་གི༷ས་ཤེས་རབ་སྐུར་སྨིན་ནས་ཡེ་ཤེས་ཆོས་ཀྱི་སྐུ་དང་དབྱེར་མེད་མངོན་པར་རྫོགས༷་པར་གྲོལ༵་བ༵་ཐོབ་སྟེ་གཞ༵ན་གྱིས་བསྟན་པས་ལུང༵་ལ༵ས་མ༵་བྱུང༵་བ༵ས་དཔལ་རང་བྱུང་གི་སང༷ས་རྒྱས༷་རང་ཐོག་ཏུ་ར༵ང་ས༵ར་ཟིན་ནས་ཕྱིན་ཆད་འཁྲུལ་མི་ཤེས་པར་གནས༵་པ༵་ནི༔ ལུང་ལས་མ་བྱུང་བའི་མན་ངག་གོ༔ ཁྱད་ཆོས་དྲུག་གི་གྲོལ་བ་འདི་སྔ་ཕྱིར་སངས་རྒྱས་པ་ཐམས་ཅད་ལ་ཡོད་པ་ཡིན་ནོ༔

ད་ནི་དེ་དག་གི་གནད་བསྡུས་ཏེ་སངས་རྒྱས་མཛུབ་བཙུག་ཏུ་བཤད་པ་ནི༔ རང་གི་ད་ལྟར་གྱི་རིག་པ་བསམ་དུ་མེད་པ༔ འདུས་མ་བྱས་པ་ཡུལ་དང་ཡུལ་ཅན་གཉིས་སུ་མེད་པ༔ རྣམ་རྟོག་གི་གཡོ་བ་མེད་པ༔ ངོ་བོ་འགྱུར་བ་མེད་པ༔ རང་བཞིན་སྐྱེ་བ་མེད་པ༔ ངག་གིས་བརྗོད་དུ་མེད་པ༔ རྒྱུ་རྐྱེན་གྱིས་སྒྲུབ་དུ་མེད་པ་སྟེ༔ གཡོ་རྩོལ་དང་དགག་སྒྲུབ་དང་༔ ཡིད་དཔྱོད་དྲན་རྟོག༔ ཆགས་འཛིན་ཞེན་པ༔ འབད་རྩོལ་བཅས་བཅོས་ཐམས་ཅད་སངས་ཤིང་༔ སྤྲོས་བྲལ་གྱི་ངང་རྒྱས༔ རིག་ཡིད་ཀྱི་སེམས་པ་མེད་པར༔ འགྱུར་མེད་ཀྱི་བདེ་ཆེན་དུ༔ གཞི་གནས་བྱར་མེད་ཀྱི་ཡེ་ཤེས་རྒྱས་པ་སྟེ༔ སལ་ལེ་སང་ངེ་ཝལ་ལེ་རིག་གེ་རྗེན་ནེ་ཡེ་རེ་བས་མཚན་ཉིད་དྲུག་དང་སངས་རྒྱས་ཀྱི་ཡོན་ཏན་བརྒྱད་ལྡན་འདི་སྤྲོས་བྲལ་མཛུབ་ཀྱི་བཙུག་པ་ཡིན་པར༔ སྣང་སྲིད་ཁ་སྦྱོར་བདུད་རྩིའི་ཐིག་པ་འཁོར་བ་ཐོག་མཐའ་གཅོད་པའི་རྒྱུད་ལས༔ སངས་རྒྱས་ཡེ་ནས་སེམས་ལ་གྲུབ༔ གྲུབ་ཟིན་དོན་ལས་མ་ཡེངས་པ༔ གཞན་ནས་སངས་རྒྱས་བཙལ་མི་དགོས༔ ཆོས་རྣམས་ཐམས་ཅད་སེམས་ལ་འདུས༔ ཞེས་དང་༔ སྣང་སྲིད་སེམས་ལ་འདུས་པས་སངས་རྒྱས་མཛུབ་བཙུག་ཡིན༔ ཞེས་སོགས་སངས་རྒྱས་མཛུབ་བཙུག་གི་ལེའུ་ལས་གསུངས་པ་ལྟ་བུའོ༔

གསུམ་པ་མཐོང་ལམ་དུ་ཡེ་ཤེས་རང་རིག་མངོན་དུ་གྱུར་པ་ནི༔ བླ་མས་བསྟན་པ་ལྟར་ཆོས་སྐུ་མངོན་སུམ་དུ་མཐོང་བ་ཡིན་ནོ༔

གཉིས་པ་བསྒོམ་ལམ་དུ་ལམ་བསྒོམ་པས་ཉམས་སུ་བླང་བ་ལ༔ དེ་ཉིད་བར་དོ་གང་གི་ཉམས་ལེན་ཡིན་པ་དང་༔ ཉམས་སུ་ལེན་པ་དངོས༔ དེའི་དགོས་པའམ་ཡོན་ཏན་གསུམ་ལས༔ དང་པོ་ནི༔ ལར་ཁྲེགས་ཆོད་དང་ཐོད་རྒལ་གྱི་ཉམས་ལེན་འདི་ནི་བར་དོ་དང་པོ་གཞི་དབྱིངས་ནམ་མཁའ་ལྟ་བུར་སྤྲོས་པ་ཐམས་ཅད་དང་བྲལ་བ་ཀ་དག་གི་རང་བཞིན་གང་གི་ཡང་ཕྱོགས་སུ་མ་ལྷུང་བ་ཞིག་སྐད་ཅིག་གསུམ་ལ་འཆར་བ་དེ་ནི་འཁོར་འདས་བར་དོ་ཟེར་བས་ན་དེ་ཉིད་དང་རྗེས་སུ་མཐུན་པས༔ འོད་གསལ་དཔེ་དོན་གང་རུང་ནི་ཁྲེགས་ཆོད་ཀྱི་སྐྱོང་བས་སྟོངས་ཐེབ་སྟེ་དེ་དུས་འོད་གསལ་ཡང་དག་པར་ཤར་བ་ལ་སྔར་ལྟར་ཉོན་ཤེས་ཕྲ་བ་ཙམ་ཡང་མེད་པའི་རང་ངོ་ཤེས་པ་དང་མཉམ་དུ་ཀ་དག་གི་ས་ལ་བྱང་ཆུབ་པ་དང་༔ ལྷུན་གྲུབ་སྐུ་དང་ཡེ་ཤེས་ཀྱི་རང་མདངས་འགགས་པ་མེད་པ་བར་དོ་གཉིས་པ་ཕན་ཆད་ལ་འཆར་བ་དེ་ཐོད་རྒལ་བསྒོམ་སྟོབས་ཀྱི་རང་ངོ་ཤེས་པས་འཇུག་པ་གཉིས་ལྡན་གྱི་སྒོ་ནས་གྲོལ་བ་ཐོབ་པར་འགྱུར་བས་དེ་གཉིས་ཁོ་ན་འོད་གསལ་སྣང་སྟོང་གི་ངོ་ཏི་ཟངས་མས་ཉམས་ལེན་ཡིན་ཏེ༔ འཇམ་དཔལ་ཡང་ཏི་ནག་པོའི་རྒྱུད་ལས༔ ངེས་དོན་རྟོགས་པའི་རྣལ་འབྱོར་པས༔ ལན་གཅིག་སྐྱེ་འཆིའི་བདུད་བྱུང་ཚེ༔ ཡེ་ཤེས་ཆོས་སྐུ་གཟུགས་བརྙན་ནི༔ ལོངས་སྤྱོད་རྫོགས་དང་སྤྲུལ་པ་འབྱུང་༔ ཞེས་སོ༔

གཉིས་པ་ལམ་ཉམས་སུ་ལེན་པ་ལ༔ ལེན་དགོས་པའི་རྒྱུ་མཚན་དང་༔ ཇི་ལྟར་ལེན་པའི་ཐབས་དང་༔ དགོངས་པའི་ངོ་བོ་གསུམ་ལས༔ དང་པོ་ནི༔ ད་ལྟ་དལ་འབྱོར་ཕུན་སུམ་ཚོགས་པ་ཐོབ་པའི་དུས་འདིར་རང་མགོ་ཆོས་ཀྱིས་འདོན་དགོས་ཀྱི༔ གཞན་སུས་ཀྱང་སངས་རྒྱས་སུ་བཙན་ཐབས་བྱེད་རྒྱུ་དཀོན་ལ༔ དེ་ཡང་ཐོས་པའི་ཤེས་རབ་ནི༔ རང་གང་ཉམས་སུ་བླང་རྒྱུ་དེ་ལ་ངེས་པར་ཐབས་མི་སྡུག་པ་ཞིག་དགོས་ཀྱི༔ དེ་ལས་མང་མི་དགོས་དེ་མི་ཚེ་ཡུད་ཙམ་དུ་གནས་ཤིང་དེ་ལ་སྤྲོས་རྒྱ་བསྐྱེད་ཆེས་པས་འཆི་བདག་གི་སླེབ་ན་ཅི་ཡང་མི་ཕན་པའི་སྟེང་དུ་བློ་ལྷག་རི་ཙམ་ཡོད་པའི་ཕྱིར་རོ༔ བསམ་པའི་ཤེས་རབ་ཀྱང་དེ་ལས་གལ་ཆེ་བར་རང་རྒྱུད་ལ་སྦྱོར་དགོས་ཤིང་༔ འབྱོར་བར་ཡང་འགྱུར་ན་ཧ་ཅང་སྤྲོས་པ་ཆེ་ན་མདས་བརྒྱབ་པའི་དུག་སོ་ལ་ཡོད་དམ་སྒྲོ་ལ་ཡོད་བསམ་གྱིས་བསྡད་ཀྱང་མི་ཕན་པར་དུག་གིས་ཟིན་ནས་འཆི་བར་དཔེ་བཞག་པར་མཛད༔ བསྒོམ་པའི་ཤེས་རབ་ནི་དེ་གཉིས་ལས་མཆོག་ཏུ་གྱུར་པ་ཡིན་ཏེ༔ དཔེར་ན་ཟས་ཡོད་ཀྱང་མ་ཟོས་ན་ལྟོག་ཕུང་མི་སེལ་བ་དང་༔ ཟོས་ན་སེལ་བ་འདྲ་བས་ན་ཤིན་ཏུ་གལ་ཆེ༔ དུས་ངན་གྱི་མཐའ་མ་ལ་བཤད་བསྒྲུབ་གཉིས་ལས༔ བཤད་པ་ལ་གཙོ་བོར་འདོད་པ་འདི༔ བལྟ་སྣང་གྲགས་འདོད་ཀྱི་བདུད་ཀྱིས་ཟིན་པ་དང་འབྲས་བུ་སངས་རྒྱས་ཐོབ་པའི་གེགས་སུ་དེ་ལས་ཆེ་བ་མེད་པར་ངེས་ཏེ༔ བསྒོམ་པའི་ཐབས་སུ་མིན་ན་མདོ་རྒྱུད་མན་ངག་དོན་མེད་པ་དང་བཅས་པར་འགྱུར་ཏེ་སྨྲ་ལ་དགའ་བས་ཤུན་པ་མི་བསྡུ་བར་མཉམ་པར་བཞག་པའི་སྙིང་པོ་ཚོལ་བ་འདི་གནད་གལ་པོ་ཆེ་ཡིན་ནོ༔ ཕལ་ཆེན་ལས༔ ཇི་ལྟར་འོན་པ་རོལ་མོ་མཁན༔ གཞན་དག་དེ་ཡིས་དགའ་བྱེད་ཅིང་༔ རང་ཉིད་ཀྱིས་ནི་མི་ཐོས་ལྟར༔ མ་བསྒོམ་ཆོས་ཀྱང་དེ་དང་འདྲ༔ ཇི་ལྟར་སྐོམ་པས་གདུང་པ་ཡིས༔ ཆུ་ནི་མཐོང་དང་ཐོས་ཙམ་གྱིས༔ སྐོམ་པའི་གདུང་བ་མི་སེལ་ལྟར༔ མ་བསྒོམ་ཆོས་ཀྱང་དེ་དང་འདྲ༔ ཇི་ལྟར་མཉེན་པ་མཁས་པ་ཞིག༔ གཞན་དག་དེ་ཡིས་སྒྲོལ་བྱེད་ཀྱང་༔ རང་ཉིད་དེར་ནི་འཆི་བ་ལྟར༔ མ་བསྒོམ་ཆོས་ཀྱང་དེ་དང་འདྲ༔ ཞེས་སོ༔ ཁྱད་པར་དུ་ཡང་རྟོག་གེའི་བློ་ལས་འདས་པ་དེ་བཞིན་གཤེགས་པའི་དགོངས་པ་ཟབ་མོ་ཐོས་བསམ་གྱི་ཡུལ་མ་ཡིན་པའི་ཕྱིར་གཞོན་ནུ་མ་ཡི་བདེ་བ་དམ་པ་ལྟ་བུའི་དབང་ཕྱུག་དམ་པ་ཉམས་སུ་མྱོང་བ་མེད་པའི་ཚུལ་གྱིས་ཉམས་སུ་མྱོང་བ་ནི་བསྒོམ་པ་ཡིན་པའི་ཕྱིར་ཡང་བསྒོམ་དགོས་པ་དང་༔ དེ་ལྟ་ནའང་སྤང་བྱ་ཉོན་མོངས་ཀྱི་བློ་མགོ་གནོན་པ་སེམས་ཀྱི་བསྒོམ་པ་དང་༔ དྲུང་ནས་འབྱིན་པ་མུན་པའི་སྨག་ལ་སྒྲོན་མེ་ལྟ་བུའི་ཡེ་ཤེས་རང་བྱུང་གི་ངང་དུ་འབྱམས་ཀླས་པའི་བསྒོམ་པ་གཉིས་སུ་ཡོད་པའི་མཆོག་ཡེ་ཤེས་ཀྱི་ངང་ལ་རྟོན་པ་ཉིད་ཡིན་གྱི་གཞན་ཐོས་བསམ་བཟང་འཁྲུལ་གསེར་སྒྲོག་གིས་འཁོར་བར་བཅིང་བའང་སེམས་སེམས་བྱུང་གི་བློ་དང་རྫས་མི་འགལ་ཞིང་སྣོན་མར་གྱུར་པ་དང་༔ ཡང་དེ་ལྟ་ན་དམིགས་གཏད་སེམས་ཀྱི་བསྒོམ་པའང་སེམས་དང་འཛིན་སྟངས་འགལ་ཡང་བློ་རྫས་སུ་མི་འགལ་བས་ན་ཕན་པ་ཆུང་ཞིང་༔ རྫོགས་པ་ཆེན་པོའི་ལམ་མྱུར་བའང་འདི་ནས་འགྲུབ་བོ༔ ཇི་སྐད་དུ༔ ཐོས་དང་བསམ་དང་བསྒོམ་པས་ནི༔ དེ་ཡི་དོན་ཉིད་ཤེས་མི་འགྱུར༔ སྒྲ་ཚད་རྣམས་ཀྱི་སྤྱོད་ཡུལ་མིན༔ ལུང་དང་རིག་པའི་སྤྱོད་ཡུལ་མིན༔ ཞེས་དང་༔ བསམ་དུ་མེད་པའི་ཆོས་ཉིད་བྱང་ཆུབ་སེམས༔ བསམ་དང་བསྒོམ་པས་གཏན་ལ་དབབ་དུ་མེད༔ ཅེས་དང་༔ སྤྲོས་གཅོད་སྡེ་ལྔ་ལས༔ ཡིད་ཀྱི་བཙོན་བཟུང་བསྒོམ་པ་དེ༔ དྲན་པ་བཞི་འགྱུར་བསྒོམ་པས་ཡིན༔ ཡིད་དཔྱོད་བློས་བསྒོམ་རྩོལ་བ་དང་༔ བསྒོམ་ཡུལ་སྒོམ་མཁན་རྩོལ་བ་དང་༔ བཅས་བཅོས་ཡིད་སྨོན་བསྒོམ་པ་དང་༔ དེ་དག་སེམས་ཀྱི་རྩོལ་བ་སྟེ༔ བསམ་དུ་མེད་པའི་དོན་མ་རྟོགས༔ ཞེས་སོ༔

གཉིས་པ་ཇི་ལྟར་ལེན་པའི་ཐབས་ལ༔ བཞག་ཐབས་ཀྱི་སྒོ་ནས་ཡེ་ཤེས་མངོན་དུ་འཆར་བའི་མན་ངག༔ ཏིང་འཛིན་གྱི་སྒོ་ནས་སྐུ་གསུམ་དུ་བཙན་ས་འཛིན་པའི་གདམས་ངག༔ དགོངས་སྤྱོད་ཀློང་དུ་སྐྱོལ་བའི་སྒོ་ནས་འོད་གསལ་མ་བུ་སྤྲད་པ༔ གྲོལ་ཚུལ་གྱི་སྒོ་ནས་སྣང་སྤྱོད་ཡེ་ཤེས་ཀྱི་གྲོགས་སུ་འཁྱེར་བའི་མན་ངག༔ ཟིལ་གནོན་གྱི་སྒོ་ནས་ལྟ་བསྒོམ་སྤྱོད་པ་ཉམས་བྱུང་གི་བདུད་གཅོད་པའི་མན་ངག་གོ༔

དང་པོ་ནི༔ དེ་ལ་ཡེ་ཤེས་ཀྱི་ངོ་བོ་བློས་བསྒོམ་དམིགས་ཀྱི་ཡུལ་དུ་མ་གྱུར་བས་ཅི་ཙམ་དུ་རྩོལ་བས་བསྒོམ་ཀྱང་ཕན་པ་མེད་པས་མ་བསྒོམ་པ་ཁོ་ན་གནད་ཡིན་ཏེ༔ སྣང་སེམས་ཐམས་ཅད་ཅོག་གིས་བཞག་པའི་སྤྲོས་བྲལ་ཡེ་ཤེས་ཆེན་པོའི་གཤིས་མཉམ་པ་ཉིད་ལ་རྣལ་འབྱོར་གྱི་བློ་ཡང་ཐོག་ཏུ་ཕོག་པ་ཞེས་བྱ་སྟེ༔ དོན་དུ་ཡེ་ཤེས་ཀྱི་གནས་ལུགས་ཀྱི་སྟེང་དུ་སླེབ་པ་ཡིན་ནོ༔ དེ་བས་བསྒོམ་དུ་མེད་པའི་བཞག་ཐབས་ལ་བརྩོན་པར་བྱ་སྟེ༔ ཡེ་ཤེས་གཏིང་རྫོགས་ལས༔ དེ་ལྟར་བསྒོམ་ཆེན་སེམས་ལ་དངོས་མེད་ན༔ མི་གནས་མི་རྟོགས་འཇོག་པ་རྣལ་འབྱོར་ཡིན༔ རྣལ་འབྱོར་ཅི་ཡང་ཡིད་ལ་མ་བསྒོམ་ན༔ ཡང་དག་ལྟ་བས་དོན་དང་མཐུན་པར་འགྲུབ༔ ཞེས་སོ༔

དེ་ལྟ་བུའི་བཞག་ཐབས་དེ་ལ༔ མདོ་དང་རྒྱས་པ༔ གནད་བསྡུས་གསུམ་ལས༔ དང་པོ་ནི༔ འདས་པའི་རྣམ་པར་རྟོག་གི་རྗེས་སུ་མི་འབྲང་༔ མ་འོངས་པའི་སྔོན་མི་བསུ༔ ད་ལྟ་བ་ལ་བློས་མི་དཔྱོད་པར་བཞི་ཆ་གསུམ་བྲལ་གྱི་ཡེ་ཤེས་ཆེན་པོའི་སྤྲོས་བྲལ་དབྱིངས་ཀྱི་བདེ་ཆེན་རིག་པ་ཡེ་ཤེས་བླ་མས་ངོ་སྤྲད་པ་དེ་ཉིད་ཀྱི་ངང་ལ་བཞག་པ་ནི༔ རིག་པ་ ༼ རིག་པ་ཅོག་བཞག །༽སྐྱེ་མེད་དུ་བཞག་པ་ཞེས་བྱ་བ་དང་༔ རིག་པ་དེའི་ངང་ལ་བཞག་གོ་སྙམ་ནས་ངོ་ལ་བལྟ་བ་ངང་ལ་བསྒོམ་པ་ཡིན་སྙམ་དུ་ཀུན་སྦྱོར་གྱི་དཀྲིས་པ་འོག་ཏུ་འགྱུ་བ་དང་༔ ཕྱིའི་ཡུལ་ལ་མངོན་དུ་རྒྱུ་བ་ཐམས་ཅད་རང་སར་བཞག་སྟེ་བསྒོམ་པའི་ཆ་ནས་ཡིད་འགྱུ་བ་མེད་པར་བཞག་པ་ ༼ སྣང་བ་ཅེར་བཞག །༽ ཞེས་བྱ་བ་དང་༔ སེམས་དང་ཡེ་ཤེས་ཕྱེད་པའི་གནད་ཀྱིས་ཚོགས་བརྒྱད་དང་གཟུང་འཛིན་རྩེ་གཅིག་གི་སེམས་གནས་ཙམ་དུའང་ལྟོས་མི་འཆའ་བར་དྭངས་ཕྱིན་པས་སེམས་ཉིད་ཟང་ཐལ་རྗེན་པའི་རིག་ཆ་གཅེར་བུ་བསམ་གཞིག་དམིགས་འཛིན་གྱི་མིང་དང་བྲལ་དེ་བཞག་པས༔ སེམས་མིང་མེད་དུ་ ༼ རྒྱ་མཚོ་ཅོག་བཞག །༽བཞག་པ་ཞེས་བྱའོ༔ སྣང་སྲིད་ཁ་སྦྱོར་བདུད་རྩིའི་བཅུད་ཐིག་འཁོར་བ་ཐོག་མཐའ་གཅོད་པའི་རྒྱུད་ལས༔ རིག་པ་སྐྱེ་བ་མེད་པའི་ངང་དུ་ ༼ རིག་པ་ཅོག་བཞག །༽ཞོག༔ ཡིད་ནི་འགྱུ་བ་མེད་པའི་ངང་ལ་ ༼ སྣང་བ་ཅེར་བཞག །༽ཞོག་སེམས་ནི་མིང་མེད་འཛིན་བྲལ་ངང་ ༼ རྒྱ་མཚོ་ཅོག་བཞག །༽ དུ་ཞོག༔ ངང་བཞག་ཐབས་ཀྱིས་དྲིལ་ན་གསུམ་པོར་འདུས༔ ཞེས་སོ༔ རྒྱས་པར་བཤད་པ་ནི༔ སྤྱིར་ལྟ་བ་རི་བོ་ཅོག་བཞག༔ བསྒོམ་པ་རྒྱ་མཚོ་ཅོག་བཞག༔ སྤྱོད་པ་སྣང་བ་ཅེར་བཞག༔ འབྲས་བུ་རིག་པ་ཅོག་བཞག་བཞི་སྟེ༔

དང་པོ་ནི༔ ལྟ་བས་ཐབས་སུ་རི་བོ་ཅོག་བཞག་ལ༔ ཕྱི་ལྟར་ན་ལུས་མི་འགུལ་རི་བོ་ཅོག་བཞག་ཅེས་ཆོས་བདུན་ནམ༔ སྐུ་གསུམ་གྱི་བཞུགས་སྟངས་ལས་མི་གཡོ་བས་ལུས་དྲང་བས་རྩ་དྲང་༔ རྩས་རླུང་༔ དེས་ཐིག་ལེ་དྲང་ཞིང་བརྟན་པ༔ དེས་ཐིག་ལེ་དེ་ལ་བརྟེན་པའི་སེམས་དྲང་༔ དེས་ཡེ་ཤེས་ཀྱི་རྩལ་གཞི་ལ་ཐིམ་ནས་འགྱུ་བ་རང་སར་དག་པའི་ཆོས་ཉིད་མ་ལས་གསལ་བས་ན་རི་བོ་ཅོག་བཞག་དུ་ཟབ་ལ༔ ཡང་རིག་པ་བླ་མས་ངོ་སྤྲད་པ་དེ་ལ་གནས་ནས་བསྒོམ་པ་ན་སྣང་སེམས་ཀྱི་དམིགས་པས་མི་བསྒུལ་བར་བརྟན་པོར་གནས་པའི་ཆ་ནས་ཀྱང་རི་བོ་ཅོག་བཞག་དུ་འགྱུར་བ་དང་༔ ཡང་ན་དེ་ཉིད་ལས༔ མཆོག་རབ་རྩེ་ནས་བལྟས་པས་རི་ཕྲན་ཐམས་ཅད་མཐོང་༔ རྒྱ་མཚོ་ཆེན་པོར་བལྟས་པས་ཆུ་ཕྲན་ཐམས་ཅད་མཐོང་༔ ཞེས་པ་ལྟར་ལྟ་བས་ཐག་ཆོད་དེ་རི་རབ་ཀྱི་རྩེ་ནས་རི་ཕྲན་མཐོང་བ་ལྟར་ཐེག་པ་འོག་མ་ཐམས་ཅད་ཀྱི་དགོངས་པ་ཡོངས་སུ་འདུས་པར་ཐག་ཆོད་པས་གཅིག་ཤེས་ཀུན་གྲོལ་གྱི་ངང་ལ་གནས་པས་ཀྱང་ལྟ་བ་རི་བོ་ཅོག་བཞག་ཅེས་བྱའོ༔ འཁོར་བ་ཐོག་མཐའ་གཅོད་པའི་རྒྱུད་ལས༔ ང་ལ་སྒོམ་པར་བྱེད་པ་རྣམས༔ སྒོམ་པར་མ་བྱེད་གཡོ་མེད་ངང་ལ་ཞོག༔ ཞེས་དབུས་མ་ལས་དགོངས་པ་བཟུང་ན་རྒྱུ་འབྲས་ངོ་བོ་ཉིད་དུ་ཡོད་པས་ཐོག་མཐའི་གཉིས་ཀྱི་གནད་དེར་འདུས་ལ་ཅོག་བཞག་འདི་གཞུང་གི་ཅོག་བཞག་བཞི་པོ་ཐམས་ཅད་ཀྱི་སྤྱི་ཆིངས་སུ་ཐིམ་པས༔ གནས་ལུགས་ཐམས་ཅད་འགྱུར་མེད་ངང་དུ་ཞོག༔ ཞེས་པས་འདིར་གསུམ་དུ་བཞག་པས་ཆོག་གོ༔

གཉིས་པ་རྒྱ་མཚོ་ཅོག་བཞག་ལ་སོགས་པ་ནི་བསྡུས་དོན་ལྡོག་པའི་གོ་རིམ་ཏེ༔ དང་པོ་ལ༔ ཕྱི་ལྟར་ན་མིག་གི་དབང་པོ་ན་ཡེ་ཤེས་ཀྱི་རྩ་དར་དཀར་སྣལ་མ་དང་ཕྲ་ལ་འཁྲིལ་གཉིས་ཡོད་པས༔ མར་སྣ་ཡེ་ཤེས་ཀྱི་དཀྱིལ་འཁོར་གསེར་གྱི་རྩ་ཆེན་དུ་རིག་པའི་ཡེ་ཤེས་བཞུགས་པ་ལས་ལམ་བྱུང་ནས་ཡུལ་ལ་འཆར་བའི་མིག་ཕྱེས་ཏེ་མ་འགུལ་བས་རིག་པའི་འོད་གསལ་གཡོ་བ་མེད་པས་ཀྱང་རྒྱ་མཚོ་ཅོག་བཞག་ཞེས་བྱ་ལ༔ ཁྱད་པར་དུ་ཤེས་པ་དྭངས་བ་རྒྱ་མཚོ་ལྟ་བུའི་ངང་ལ་རྟོག་པའི་རྦ་རླབས་རང་སར་དྭངས་ནས་མ་བསྒུལ་པར་གནས་པས་ཀྱང་རྒྱ་མཚོ་ཅོག་བཞག་ལ༔ རིག་པ་སྤྲོས་པ་དང་བྲལ་བའི་ངང་དྭངས་འོད་གསལ་གྱི་ཆ་ལ་རང་བཞིན་བབ་ཀྱི་བསམ་གཏན་འདུ་འབྲལ་མེད་པའི་ངང་དུ་ཕོག་པ་ནི་ཏིང་ངེ་འཛིན་གྱི་རླན་གྱིས་བརླན་པས་ན་རྒྱ་མཚོ་ཅོག་བཞག་དེའི་ངོ་བོ་བླ་ན་མེད་པའོ༔ འདིར་དབུས་མ་ལས་བཟུང་བས་གཞན་གཉིས་རྒྱུ་འབྲས་སུ་ལྡན་པས༔ དེ་ཉིད་ལས༔ སེམས་ལ་མིང་འདོག་མེད་པ་ཡི༔ ཆགས་འཛིན་སྤྲོས་པ་བརྟགས་ཞེན་མེད་པའི་ངང་ལ་བཞག༔ བརྟགས་སྣང་རྣམ་རྟོག་ཐམས་ཅད་ཀྱང་གཉིས་མེད་ངང་དུ་ཐམས་ཅད་ཞོག༔ སྤྲོས་པ་ཐམས་ཅད་ཐག་ཆོད་ངང་དུ་ཞོག༔ ཡིད་དཔྱོད་སེམས་ཀྱི་དྲན་རིག་རྣམས༔ རང་དྭངས་ཆེན་པོའི་ངང་ལ་ཞོག༔ རྟོག་ཚོགས་སེམས་ཀྱི་ཆོ་འཕྲུལ་རྣམས༔ རང་སང་ཆེན་པོའི་ངང་ལ་ཞོག༔ འགྱུ་བ་རིག་པ་རྟོགས་པ་རྣམས༔ གསལ་དྭངས་ཆེན་པོའི་ངང་ལ་ཞོག༔ ཞེས་རྒྱུད་དཀྲུགས་སྡེབས་སུ་ཡོད་དོ༔ རིན་པོ་ཆེའི་བཅུད་ཐིག་ལས༔ མཁའ་གསལ་དཔེ་ནི་ནམ་མཁའ་ལ༔ འཆར་སྒོ་གསལ་བྱེད་མིག་བསྐྱོད་བགྲད༔ ཆོས་དབྱིངས་གསལ་ཁྱབ་དྭངས་པ་ལ༔ རིག་པ་གཏིང་གསལ་ཆེན་པོར་ཞོག༔ མ་བཅོས་སྤྲོས་བྲལ་ཀློང་ཡངས་སུ༔ འགྱུ་བ་དྭངས་སངས་ཆེན་པོར་བཞག༔ ཅེས་སོ༔

གསུམ་པ་སྣང་བ་ཅེར་བཞག་ནི༔ ཕྱི་དཀར་དམར་སྣ་ཚོགས་པས་ཆོས་ཡིད་ཀྱི་རྟོག་པས་སྒྲ་དོན་བསྲེས་ནས་འདྲེས་འཛིན་གྱི་འདི་དང་འདིའོ་ལ་སོགས་པ་ངོ་བོ་དང་༔ དེའི་ཁྱད་པར་ལ་རགས་ཕྲའི་ཚུལ་དུ་འཛིན་ཅིང་འགྱུ་བས་རྣམ་རྟོག་སློང་བྱེད་ཐམས་ཅད་ལ་དེར་འཛིན་ཡུལ་རྗེས་སུ་མི་འབྲང་༔ ཡུལ་མི་དགག༔ མི་བསྒྲུབ༔ སེམས་ཀྱིས་མི་བཟུང་བར༔ ཡུལ་སེམས་སྤྲོས་བྲལ་དུ་རྟོགས་པའི་གདེང་གིས་འགྲོ་བས་སྣང་ལ་རང་བཞིན་མེད་པར་གསལ་ལ་དེར་འཛིན་དང་བྲལ་བར་ཆོས་ཅན་སྤྱི་དང་དུམ་བུ་ལ་བསླབས་པས་ཅེར་ས་འམ་སྣང་ས་དེར་ཅེར་གྱིས་བཞག་པ་སྟེ་རྩལ་ཕྱི་ཤར་ལ་བསླབ་པའི་ཕྱོགས་སུ་ངེས་སོ་༡༔ རྡོ་རྗེ་དང་ཤེས་རབ་ཀྱི་མིག་གི་བསླབ་པས་ཅེར་བཞག་ཟེར་ལ་༢༔ ངོ་བོ་ལས་རིག་པ་སྣང་བ་ཅེར་འཛིན་ཤར་གྲོལ་དུ་ཡོད་པ་རྟོགས་འབྲས་ལས་༣སྔ་མ་གཞིར་བཟུང་ནས༔ རྒྱུ་འབྲས་ཕྱི་མ་གཉིས་སོ༔ དེ་ཉིད་ལས༔ གནས་ལུགས་འགྱུར་མེད་ངང་ལ་ཞོག༔ སྣང་བ་སོར་བཞག་ངང་ལ་ཞོག༔ དེ་གཉིས་དབྱེ་བསལ་མེད་པར་ཞོག༔ གནས་ལུགས་དངོས་པོ་མེད་པར་ཞོག༔ སྣང་བ་དགག་སྒྲུབ་མེད་པར་ཞོག༔ དེ་གཉིས་རྩིས་ལས་འདས་པར་ཞོག༔ ཕྱི་ཡི་དཀར་དམར་ཡུལ་རྣམས་ཀུན༔ སྣང་ལ་རང་བཞིན་མེད་པར་ཞོག༔ ཞེས་དང་༔ ཡིད་ལ་འགྱུ་བ་མེད་པ་ཡི༔ གཡོས་པ་མེད་པའི་ངང་ལ་ཞོག༔ བར་གྱི་གཉིས་སྣང་རང་བཞིན་ཀུན༔ སྤྲོས་པ་ཐག་ཆོད་ངང་ལ་ཞོག༔ རྟོག་ཚོགས་བློ་ལ་སྣང་བའི་ཡུལ་སྣང་རྣམས༔ སྣང་ལ་རང་བཞིན་མེད་པའི་ངང་དུ་ཞོག༔ ཞེས་དང་༔ རིན་ཆེན་བཅུད་ཐིག་ལས༔ སྣང་ཡུལ་མེ་ལོང་ལྟར་གནས་ལ༔ རྐྱེན་སྣང་སྐྱེ་མེད་རང་གྲོལ་བཞག༔ ཅེས་སོ༔ འདི་ནི་སྣང་ཤེས་དབྱེར་མེད་རོ་མཉམ་དུ་དག་པར་བྱེད་པའི་ལྟ་བས་ཟིན་པ་གལ་ཆེ་ཡི་རང་གར་བློས་མི་གཏད་དོ༔ ཞེས་པདྨ་ངས་སྨྲའོ༔

དོན་བཞི་པ་རིག་པ་ཅོག་བཞག་ནི༔ རིག་པ་སྐྱེ་མེད་དང་༔ ལྟ་བསྒོམ་ལྷུན་རྫོགས་སུ་བཞག་པ་སྟེ་གཉིས་ལས༔ དང་པོ་ལ་དངོས་དང་དེའི་ཁྱད་འདོན་གཉིས་ལས་དང་པོ་ནི༔ སེམས་རྣམ་རྟོག་གི་རླུང་གིས་མི་གཡོ་བ་རི་བོ་ཅོག་བཞག་དང་༔ རྨུགས་འཐིབ་སྐྱོན་དང་བྲལ་བ་རྒྱ་མཚོ་ཅོག་བཞག༔ སྣང་བའི་རྗེས་སུ་མ་ཤོར་བ་ཅེར་བཞག་མཉམ་པ་གསུམ་གྱི་གྲུབ་པའི་འབྲས་བུ་ནི་རིག་པ་ཟང་ཐལ་རྗེན་ལ་བུད་དེ་འཆར་བ་དེ་ལས་མི་གཡོ་བར་རྒྱལ་པོ་གདན་ས་ཟིན་ཏེ་མི་འགྱུར་བ་ལྟར༔ རྩལ་གཞི་ལ་ཐིམ་སེམས་རིག་ནང་འཕྲད་དུ་འཁོར་འདས་རྒྱབ་གྱེས༔ བློན་པོ་བཙོན་དུ་བཟུང་ནས་མི་འགྱུར་བ་ལྟར༔ སེམས་ཡིད་ཀྱི་རྣམ་ཤེས་འགྱུ་བ་རྒྱུན་ཆད་པས་རིག་པ་ལ་རང་དབང་བསྒྱུར༔ རིག་པ་རང་ས་ཟིན་པ་དང་དམངས་ཆམ་ལ་འབེབས་སྟེ་མི་འགྱུར་བ་ལྟར་དུ༔ སྒོ་ལྔའི་འཆར་གཞི་སེམས་ཡིན་པས་དེ་ཉིད་དག་པའི་སྟོབས་ཀྱིས་སྒོ་ལྔ་མཚན་གཞི་མེད་པས་འཁོར་བ་སྟོངས་པའོ༔ ཅིའི་ཕྱིར་ན་རིག་པ་ཡེ་སངས་རྒྱས་པའི་སྟེང་དུ་བཞག་པས་རིག་པ་ཅོག་བཞག་ཟེར་རོ༔ དེ་སྐད་དུ་སྤྲོས་བྲལ་དོན་གསལ་ཆེན་པོའི་རྒྱུད་ལས༔ དེ་ནི་རྒྱལ་པོ་གདན་ལ་བཞུགས་ཤིང་གདན་ཐོག་ཏུ་བཏང་བའི་ཐབས་སོ༔ དེའི་རིག་པ་ནི་རྒྱལ་པོ་དང་འདྲ་སྟེ་རང་ས་ཟིན་པའོ༔ བློན་པོ་ནི་སེམས་སྟེ༔ ལུས་དང་མ་བྲལ་བར་དབུགས་ཡོད་དེ༔ རིག་པ་ལ་རྟ་ཡོད་པས་བློན་པོ་ལྟ་བུའོ༔ བཙོན་དུ་ཟིན་པ་དང་འདྲ་སྟེ༔ རྟོག་པའི་རླུང་ཡོད་ལ་རྒྱུ་མི་ནུས་པས་སོ༔ སྒོ་ལྔ་འབངས་དང་འདྲ་བས་ལས་བྱེད་པ་ཡིན་ནོ༔ དུས་དེར་གསལ་ལ་རྟོག་པ་མེད་དོ༔ དེ་ནི་འབངས་ཆམ་ལ་འདེབས་པ་ལྟ་བུའོ༔ ཞེས་དང་༔ རིན་པོ་ཆེའི་བཅུད་ཐིག་ལས༔ ཀ་དག་དོན་གྱི་ཆོས་ཉིད་ལ༔ སེམས་ཀྱི་འཛིན་པ་མེད་པར་བཞག༔ ངང་དྭངས་ཀུན་ཁྱབ་ཟང་ཐལ་ལ༔ ཆོས་སྐུ་གཅེར་བུ་གློད་དེ་བཞག༔ ཅེས་སོ༔

ཡང་ཐོད་རྒལ་དང་སྦྱར་ན་ཤེས་རབ་རང་བྱུང་སྒྲོན་མའི་ངོ་བོ་རིག་པ་རྣམ་དག་ཆེན་པོ་ནི་རྒྱལ་པོ་དང་འདྲ་ལ༔ དབྱིངས་རྣམ་པར་དག་པ་ནི་གདན༔ བློན་པོ་ནི་སེམས་དང་༔ སྒོ་ལྔ་ཡུལ་དང་བཅས་པ་འབངས་འདྲ་ན༔ སེམས་ཀྱི་འཁྲུལ་སྣང་༔ སྒོ་ལྔའི་ཡུལ་དང་ཤེས་པ་ཐམས་ཅད་དག་སྣང་མཐོང་དུས་འགགས་པ་ལའང་སྦྱར་ན༔ དེ་ཉིད་ལས༔ རྒྱལ་པོ་གདན་ལ་བཞག་པ་དང་༔ བློན་པོ་བཙོན་དུ་བཟུང་བ་དང་༔ དམངས་རྣམས་ཆམ་ལ་ཤུགས་ཀྱིས་ཕབས་སོ༔ རྡོ་རྗེ་འཛིན་པ་ལེགས་པར་ཟུང་ཤིག༔ རྒྱལ་པོ་ནི་རང་རིག་དག་པ་ཆོས་ཀྱི་སྐུའོ༔ གདན་ནི་རང་བཞིན་རྣམ་པར་དག་པ་ནམ་མཁའི་ཡུལ་དུ་སྣང་བ་འདིའོ༔ དོན་དུ་དབྱིངས་ཀྱི་ཐིག་ལེ་ཡུལ་དུ་སྣང་བ་འདིའོ༔ ཞེས་སོགས་ནས༔ རྣམ་རྟོག་ཆོམ་པའོ་སོགས་སྦྱར་ཏེ་གསུངས་སོ༔ ཞེས་སོ༔ འདིར་ནི་རིག་པ་སྐྱེ་མེད་འཛིན་མྱང་གང་ཡང་མེད་པ་ཐིག་ལེ་ཉག་གཅིག་གི་བདེ་ཀློང་དུ་འཁྱིལ་པ་ལ་བྱ་ཡི༔ ཆེད་དུ་དགག་ནས་བཟུང་བ་དང་འདི་དང་འདིའོ་རུ་ངོས་བཟུང་དུ་ཡོད་ན་རྣམ་པར་རྟོག་པ་ལས་མ་འདས་པས་རྩོལ་བློ་དམིགས་འཛིན་གང་ཡང་མེད་པར་སེམས་ཀྱི་ཤུན་པ་དང་བྲལ་དུས་ཀྱི་གསལ་སྟོང་རིག་པ་བརྗོད་བསམ་ལས་འདས་པའི་རང་ཐོག་ཏུ་སླེབ་པ་ནི༔ ཡུལ་དང་ཡུལ་ཅན་དབྱེར་མེད་པའི་ཡེ་ཤེས་རང་རིག་གི་བསྒོམ་པ་ཡིན་པར་ཤེས་དགོས་སོ༔ སྔ་མ་ལས༔ རིག་པ་སྐྱེ་བ་མེད་པ་ཡི༔ མྱང་པ་མེད་པའི་ངང་ལ་ཞོག༔ ཞེས་དང་༔ སྙིང་པོ་ཆོས་སྐུའི་རང་བཞིན་ནི༔ མི་སྣང་རང་བཞིན་མེད་པའི་ངང་ལ་ཞོག༔ ཡིད་དཔྱོད་སེམས་ཀྱི་དྲན་རིག་རྣམས༔ རང་དྭངས་ཆེན་པོའི་ངང་ལ་ཞོག༔ ཞེས་སོ༔

གཉིས་པ་དེའི་ཁྱད་པར་འདོན་པ་ནི༔ དེང་སང་རིག་པ་ཅོག་བཞག་ཟེར་ཞིང་སེམས་གསལ་རིག་ཙམ་ལམ་དུ་བྱེད་པས་གཟུགས་ཁམས་ཀྱི་གོལ་ས་ལྡང་༔ ཀུན་གཞི་རྟོག་མེད་ལམ་དུ་བྱེད་པས་གཟུགས་མེད༔ བདེ་གསལ་གྱི་རྟོག་པ་ལམ་དུ་བྱེད་པས་འདོད་པར་འཁོར་བས་ན༔ གཞན་སེལ་གྱི་ཤེས་རབ་མཆོག་གི་དེ་དག་བཅད་དེ་ཁྱད་འདོན་དགོས་པ་ལ༔ སྣང་ཡང་མ་མཐོང་བ་༡༔ ཀུན་ལ་ཁྱབ་ཀྱང་ངོས་བཟུང་མེད་པ་༢༔ དངོས་གཞིར་གྲུབ་པ་མེད་པ་༣༔ མ་ཕྱེ་པ་༤༔ མི་སྣང་པ་༥༔ མ་བྱས་པ་༦༔ མ་བཙལ་བ་༧༔ མ་སྤང་པ་༨༔ མ་བསྒྲུབ་པ་༩༔ མ་བརྟགས་པ་༡༠༔ མ་མཚོན་པ་༡༡༔ མ་ཤེས་པ་༡༢༔ སུས་ཀྱང་མ་བསྐྱེད་པར་རྫོགས་པ་༡༣༔ སྐྱེ་བ་མེད་པ་༡༤༔ མ་རྟོགས་པ་༡༥སྟེ་སྤྲོས་པ་ཐམས་ཅད་དང་བྲ་བའི་ངང་ལ་བཞག་པར་བྱ་བར་གསུངས་པ་ལྟར་ལ་བཟླ་ཞིང་བཞག་པར་བྱའོ༔ དེ་ཉིད་ལས༔ སྐྱེ་བ་མེད་པའི་ངང་དུ་ཞོག༔ སྨྲ་བསམ་བརྗོད་མེད་ངང་དུ་ཞོག༔ འགགས་མེད་ཆོས་སྐུའི་ངང་དུ་ཞོག༔ ཅེས་པས་སྐྱེ་མེད་ཀྱི་ངང་དུ་བཞག་པས་ལུས་སྣང་བའི་གྲོང་ཁྱེར་འདོད་ཁམས་ཀྱི་སེམས་དང་༔ སྨྲ་བསམ་མེད་པའི་ངང་དུ་བཞག་པས་ངག་ཕྱེད་སྣང་གཟུགས་ཁམས་ཀྱི༔ འགགས་པ་མེད་པའི་སེམས་མི་སྣང་བ་གཟུགས་མེད་ཀྱི་སེམས་ཀྱི་བསྒོམས་པའི་ཕྱོགས་སུ་མི་གོལ་བར་ཁྱད་པར་འདོན་པའོ༔ འདི་དག་གི་གནད་ནི༔ གཟུགས་མེད་ལ་རྟོག་མེད་གཏི་མུག་མཚུངས་ལྡན་གྱི་རྟིང་བ་དེ་རྒྱ་མཚོ་ཅོག་བཞག་ ༼ མིང་མེད་འགགས་མེད། ༽ གིས་སྦྱོང་༔ གཟུགས་ཁམས་ཡུལ་ལ་ཆགས་པ་ ༼ ཡིད་འགྱུ་མེད་ཀྱི་ ༽ སྣང་བ་ཅེར་བཞག་གིས་སྦྱོང་༔ འདོད་ཁམས་སེམས་རགས་པར་རྩེན་པ་སེམས་རིག་ ༼ རིག་པ་སྐྱེ་མེད་ ༽ ཁྱད་ཕྱེ་ནས་རིག་པ་ཅོག་བཞག་གིས་སྦྱོང་ངོ་༔ ༼ ཡང་གོ་ལྡོག་ཏུ་ ༽ ཡང་སྐྱེ་མེད་ཀྱི་གཟུགས་མེད་པས་ ༼ རིག་པ་ཅོག་བཞག་ ༽ སེམས་ལས་འཕགས༔ བརྗོད་མེད་དམ་འགྱུ་མེད་ ༼ སྣང་བ་ཅེར་བཞག །༽ ཀྱི་གཟུགས་ཁམས༔ འགགས་མེད་ཀྱི་ ༼ རྒྱ་མཚོ་ཅོག་བཞག་ ༽ འདོད་ཁམས་ཀྱི་སེམས་རྙོགས་པ་ལས་འཕགས་པའི༔ འདི་དག་གི་གནད་ཀྱང་གཟུགས་མེད་ལ་འཛིན་པ་ཕྱོགས་གཅིག་ཡོད་མིན་མེད་མིན་ནོ་བསམ་ནས་བསྒོམ་པའི་འཛིན་པ་ཡོད་པ་དང་༔ གཟུགས་ཁམས་ཡུལ་ཆགས་པའི་བདེ་བ༔འདོད་ཁམས་རྣམ་རྟོག་དག་གི་ཁྱད་པར་འདོན་ནོ༔

གཉིས་པ་ལྟ་བསྒོམ་ལྷུན་རྫོགས་སུ་བཞག་པའི་ཡོན་ཏན་རང་གནས་མངོན་སུམ་དུ་བྱེད་པ་ནི༔ རང་གནས་ཀྱི་རིག་པ་ངོ་བོ་ལྟ་བསྒོམ་སྤྱོད་འབྲས་བཞི་ལས་འདས་ཤིང་༔ རང་བཞིན་གྱི་གཞིའི་ཡོན་ཏན་རྫོགས་པར་ལྷུན་གྱིས་གྲུབ་པས་ན༔ བལྟས་པས་ནི་མི་མཐོང་སྟེ་མཐོང་བའི་ཡུལ་མེད་པའི་ཕྱིར་དང་༔ བསྒོམ་པས་མི་མཐོང་སྟེ་བློ་རྫས་འགལ་བའི་ཕྱིར་དང་༔ བསྒོམ་བྱའོ་ཆོས་མ་གྲུབ་པའི་ཕྱིར་རོ༔ སྤྱད་བྱའི་ཡུལ་དང་བྲལ་བའི་ཕྱིར་དང་༔ རྩོལ་བས་སྤྱད་ཀྱང་འཆིང་བའི་ཕྱིར་སྤྱད་པར་མི་བྱ་ལ༔ ཡེ་ནས་སངས་རྒྱས་པའི་ཆོས་ཉིད་རང་གི་ངོ་བོ་ལ་སྐྱེད་བསྲིང་དུ་མེད་པའི་ཐོབ་རྒྱུའི་འབྲས་བུ་ལོག་ནས་མི་འབྱུང་བས་རྒྱུ་མཚན་དེ་དག་གི་གོ་རིམ་ལྟར་ལྟ་བསྒོམ་སྤྱོད་འབྲས་ཀྱི་རྩོལ་བ་གང་གིས་ཀྱང་མ་དཀྲུགས་པར་བཞག་པས་བལྟར་མེད་ཀྱི་ལྟ་བ་མཆོག༔ བསྒོམས་མེད་ཀྱི་བསྒོམ་པ་མཆོག༔ སྤྱོད་མེད་ཀྱི་སྤྱོད་པའི་མཆོག༔ སྒྲུབ་དུ་མེད་པའི་འབྲས་བུ་མཆོག་རང་ལ་ལྷུན་གྱིས་གྲུབ་པའི་གཤིས་སུ་ཕྱིན་ཏེ་ལྟ་བསྒོམ་སྤྱོད་འབྲས་ཐམས་ཅད་དང་མཇལ་བ་ནི་རང་ཡིན་པས་གཞན་དུ་ཚོལ་ཕྱིན་པས་མི་རྙེད་ཀྱང་ཚུར་རང་ངོ་ཤེས་པས་མ་བཙལ་བར་རྙེད་པ་དང་འདྲ་བས་ན༔ ཁྱུང་ཆེན་ལས༔ རང་གམ་བཞག་ནས་གཞན་ལ་རྒྱང་དུ་ཚོལ༔ བྱར་མེད་བདེ་བོར་རྩོལ་བ་དང་དུ་ལེན༔ ཚི་ཆད་ནད་དུ་དེ་ལས་ཆེ་བ་མེད༔ ཅེས་དང་༔ ཡེ་ཤེས་ཀློང་གི་རྒྱུད་ལས༔ ང་ལ་བལྟས་པས་མཐོང་བའི་ཡུལ་མེད་ཀྱི༔ མ་བལྟས་བཞག་པས་ལྟ་བ་ཉིད་དང་མཇལ༔ བསྒོམ་པར་མ་བྱེད་གཡོ་མེད་ཞོག༔ འགྱུ་མེད་ངང་ལ་བཞག་པས་བསྒོམ་པ་ཉིད་དང་མཇལ༔ སྤྱོད་པར་བྱ་བྱེད་བྱར་མེད་ངང་ལ་ཞོག༔ བྱར་མེད་ངང་ལ་བཞག་པས་སྤྱོད་པ་ཉིད་དང་མཇལ༔ ང་ལ་ཐོབ་པར་འདོད་པ་རྣམས༔ ཐོབ་རྒྱུ་མེད་ཀྱི་རང་སར་ངང་ལ་ཞོག༔ བཞག་ཏུ་མེད་པའི་འབྲས་བུ་ཆེན་པོ་ཐོབ༔ ཐོབ་ཏུ་མེད་པས་ཐོབ་པའི་དོན་དང་མཇལ༔ ཞེས་སོ༔

གནད་བསྡུས་ཏེ་ཡོན་ཏན་བཤད་པ་ནི༔ བཞག་ཐབས་བཞི་ཡི་གནད་བསྡུས་པ་དང་༔ ཡོན་ཏན་ལས༔ དང་པོ་ནི༔ རིག་པ་རྗེན་པའི་ ༼ རིག་པ་ཅོག་བཞག །༽ ངང་དུ་བཞག་པས་སེམས་ཡུལ་ ༼ སྣང་བ་དང་རྒྱ་མཚོ། ༽ དང་བཅས་དབྱིངས་སུ་གྲོལ་ཏེ་བྱིང་རྒོད་སོགས་ཀྱི་སྐྱོན་མ་བྱུང་བར་བརྟན་པོར་ ༼ རི་བོ། ༽ གནས་པ་གཅིག་པུ་ལ་བཞི་པོ་རྫོགས་པ་ཡིན་པར༔ ཡི་གེ་མེད་པའི་རྒྱུད་མཆོག་ལས༔ རྩ་བའི་དགོངས་པ་ཆེན་པོ་ནི༔ གྲངས་ནི་བཞི་ཡིས་གཏན་ལ་ཕབ་པར་འགྱུར༔ ཞེས་དང་༔ ཐད་ཀ་གྲོགས་སུ་ཤེས་ན་ཅོག་བཞག་གཅིག་གི་ངང་༔ ཞེས་སོ༔ གཉིས་པ་ཡོན་ཏན་ནི༔ སྐྱེ་བ་མེད་པའི་ཅོག་བཞག་གི་དུས་དེ་ཉིད་ནས་ ༼ ལྷག་མཐོང་གི་ཤེས་རབ་དེའི་ ༽ གཏི་མུག་རྩད་ནས་ཆོད༔ སྟེང་ལྷའི་སྲིད་པ་ཟིལ་གྱིས་གནོན༔ ཀུན་གྱི་གཞི་མཚན་ཉིད་པ་དག་པའི་འབྲས་བུ་གཟུགས་མེད་པའི་ཁམས་སུ་མི་སྐྱེ་བས་ཕྱགས་མས་བཏབ་སྟེ༔ ངོ་བོ་སྟོང་པ་ཉིད་ཆོས་སྐུའི་སྣང་བ་ལམ་བྱེད་དང་༔ སྣང་བ་ཅེར་བཞག་གི་འགྱུ་མེད་བསམ་བྲལ་དགག་སྒྲུབ་བྲལ་བར་བཞག་པས་བར་མིའི་སྲིད་པ་ཟིལ་གྱིས་གནོན༔ འདོད་ཆགས་རྩད་ནས་ཆོད༔ གཟུགས་ཁམས་ཕྱགས་མས་བཏབ༔ རང་བཞིན་གསལ་བའི་ཡེ་ཤེས་ཀྱི་རང་སྣང་ལོངས་སྐུའི་ལམ་བྱེད༔ སེམས་མིང་མེད་སྤྲོས་བྲལ་གཏིང་གསལ་རྣམ་རྟོག་རང་སངས་ཆེན་པོར་རྒྱ་མཚོ་ལྟར་ཅོག་གིས་བཞག་པས༔ འོག་དམྱལ་བའི་སྲིད་པ་ཟིལ་གྱིས་གནོན༔ ཞེ་སྡང་རྩད་ནས་བཅད༔ འདོད་ཁམས་ཕྱགས་མས་བཏབ་པས་ཐུགས་རྗེ་ཀུན་ཁྱབ་སྤྲུལ་སྐུ་ལམ་དུ་བྱེད་པའི་ཀུན་ཏུ་འོད་སྤྲུལ་སྐུའི་ས༔ པདྨ་ཅན་ལོངས་སྤྱོད༔ འཁོར་ལོ་ཚོགས་ཆེན་ཆོས་སྐུའི་རང་སར་ནོན༔ སྐུ་གསུམ་ཐོབ་ཏུ་མེད་པར་རང་སར་གྲོལ་བ་ད་ལྟ་མཉམ་བཞག་ཐུན་གཅིག་ལའང་ཡེ་ཤེས་བླ་མའི་ས་ལ་ཕྱིན་པར་བཤད་པ་དང་འདྲ་བར་བསྟན་ནོ༔ སྤྱན་རས་གཟིགས་ཏིང་འཛིན་རྩེ་གཅིག་གི་རྒྱུད་ལས༔ ཐམས་ཅད་གཅིག་ཏུ་དྲིལ་བའི་བཞག་ཐབས་རྣམ་གསུམ་འདི༔ ཐོབ་ཏུ་མེད་པའི་སྐུ་གསུམ་འདིས༔ སྲིད་གསུམ་ཟིལ་གནོན་ས་གསུམ་གནོན༔ དུག་གསུམ་རྩད་ཆོད་ཁམས་གསུམ་ཕྱགས་མས་བཏབས༔ ངོ་བོ་རང་བཞིན་ཐུགས་རྗེའི་སྣང་བའོ༔ ཞེས་པའོ༔ ཡང་རི་བོ་ཅོག་བཞག་གི་སྐུ་ཐོབ་པ་ནི་དབྱེར་མེད་རྡོ་རྗེ་ལྟ་བུའི་དོན་དམ་སྤྲོས་བྲལ་དབྱིངས་དང་༔ ཀུན་རྫོབ་བདེ་བ་མངོན་བྱང་སྣང་ཆའི་ཟུང་འཇུག་ཏུ་བཞག་པའི་ཐོབ་པ་ཡིན་ནོ༔

གཉིས་པ་ཏིང་ངེ་འཛིན་གྱི་སྒོ་ནས་སྐུ་གསུམ་དུ་བཙན་ས་འཛིན་པའི་མན་ངག་ལ་གསུམ་ལས་དང་པོ༔ རང་གནས་ཆོས་སྐུ་རྡོ་རྗེ་ལྟ་བུའི་ཏིང་ངེ་འཛིན༔ ཚོགས་དྲུག་གི་ཡུལ་གང་ལའང་འཛིན་པའི་བཟོ་རྒྱ་མི་བསྐྱེད་པར་ཕྱི་ནང་བར་མེད་ཧར་སངས་ཀ་དག་ཆེན་པོའི་ངང་ལས་རྟོག་བྲལ་དུ་བཞག་པའི་ཆོས་སྐུ་ལ་བཙན་ས་ཟིན་པ་སྟེ༔ ཀློང་དྲུག་པ་ལས༔ མདོར་ན་ལུས་ངག་རང་སོ་ལ༔ ཡིད་འབྱུང་ཆ་རྣམས་ཕྱིར་མ་ཤོར༔ དབང་པོའི་ཡུལ་རྣམས་དྲུག་ལ་ཡང་༔ ཤེས་བཞིན་དཔྱོད་པའི་ཡིད་མ་འགྱུའི༔ རང་སྣང་མི་རྟོག་ཆེན་པོ་ལ༔ གསལ་ལ་རྟོག་མེད་ཉམས་སྐྱེས་པའོ༔ ཞེས་སོ༔

གཉིས་པ་ཡེ་ཤེས་ཕྱག་རྒྱའི་ཏིང་ངེ་འཛིན་ནི༔ ལུས་སྐྱིལ་ཀྲུང་མིག་ཕྱིའི་བར་སྣང་ལ་ཧྲིག་གེར་བལྟས་ནས་བཞག་པའི་གནད་ཀྱིས་ནང་སེམས་ཉིད་སྤྲོ་བསྡུ་བྲལ་བར་དྭངས་སང་ཕྱེད་པའི་གསང་བ་ཆོས་ཉིད་དོན་གྱི་ནམ་མཁའ་གསལ་སྟོང་དག་པར་འཆར་བའི་རང་བཞིན་གསལ་བ་ལོངས་སྤྱོད་རྫོགས་སྐུའི་ངང་དུ་བཙན་ས་ཟིན་པའི་རྣལ་འབྱོར་ཏེ༔ དེ་ཉིད་ལས༔ སྣང་བ་རྒྱས་འདེབས་ཏིང་འཛིན་ནི༔ ལུས་དང་ཡུལ་དང་རིག་པ་ཡི༔ རང་སྣང་དག་པའི་ཚད་རྣམས་བཟུང་༔ ཞེས་སོ༔

གསུམ་པ་ཐོག་ཆེན་ཡུལ་འབེབས་ཀྱི་ཏིང་ངེ་འཛིན་ནི༔ རྣམ་རྟོག་གི་སྤྲོས་པ་ཤར་བ་ན་དེ་ཡི་ངོ་ལ་མི་བལྟ༔ ངང་ལ་མི་བསྐྱང་བར་གང་ཤར་བཅར་ཕོག་ཏུ་རང་སང་དུ་བཏང་ནས་ཡེ་ཤེས་ཀྱི་ཐོག་ཏུ་ལྷོད་པའམ་རང་ངོས་བཟུང་བ་ནི་རིག་སྟོང་དབྱེར་མེད་སྤྲུལ་པ་སྐུའི་རྣལ་འབྱོར་ཞེས་བྱ་བར་གྱུར་ཏོ༔ དེ་ཉིད་ལས༔ ཐོག་བབས་ཆེན་པོའི་ཏིང་འཛིན་ནི༔ ལུས་ནི་ཐ་མལ་ལྟ་བུ་ལ༔ ངག་ནི་སྨྲ་བརྗོད་ཚིག་དང་བྲལ༔ སེམས་ནི་དམ་དུ་མ་བཅིང་བས༔ རང་ཤར་ངང་ལ་མ་ཡེངས་བའོ༔ ཞེས་སོ༔ དེ་དག་གི་ཚུལ་ཡང་༔ དེ་ཉིད་ལས༔ ཏིང་ངེ་འཛིན་འདི་སུས་བཟུང་བ༔ སྐུ་གསུམ་ལའང་མངོན་པར་དགའ༔ ཞེས་སོ༔ འདིར་ཐོག་བབས་དང་རྒྱས་འདེབས་གཉིས་འགའ་ཞིག་གི་བརྗོད་ཚུལ་དང་ཅུང་ཟད་བསྣོལ་ཡང་༔ སྣང་བ་ལོངས་སྐུ་ཡིན་པ་དང་༔ གཟིགས་སྟངས་གླང་ཆེན་ཡིན་པ་དང་༔ མཐོང་སྣང་ཡེ་གདངས་ལས་གཙོ་བོར་བཟུང་བས་ཀྱང་འགལ་བ་མེད་པར་གནས་སོ༔

གསུམ་པ་དགོངས་སྤྱོད་དུ་སྐྱོལ་པས་སྒོ་ནས་འོད་གསལ་མ་བུ་སྤྲད་པའི་མན་ངག་ལ༔ སྤྲོས་པ་བསྡུ་བ་དང་༔ ངང་ལ་སྐྱེས་བ༔ ཡུལ་མེད་དུ་བསྐྱང་བ་གསུམ༔ དང་པོ་ནི༔ ལྟ་བས་གཏན་ལ་ཕབ་པའི་དོན་བཞིན་སྟོང་ཉིད་ཆེན་པོ་བསྡུ་བའམ་རྟོགས་པའི་ཡིན་ལུགས་ཤེས་བཞིན་པས་ངང་ཚུགས་མ་ཤོར་བས་གདངས་རང་ཤུགས་ཀྱིས་གོམས་པར་གནས་པ་དང་༔ ཡུལ་མེད་བཞིན་དུ་བློས་ཡུལ་སྣ་ཚོགས་སུ་བརྟགས་པའི་བློ་ཆོས་ཙམ་ཡང་མིང་མེད་སྤྲོས་བྲལ་རྣམ་གྲངས་བའི་དོན་དམ་གྱི་གཟེབ་ཏུ་མི་འཛུད་པར་བློ་ཡིས་དཔྱད་རྟོག་གི་ལ་བརྒལ་ཏེ་འཛིན་པ་ཐམས་ཅད་དང་བྲལ་བའི་བློ་འདས་ཆེན་པོར་ཧར་སངས་ཡན་པ་དང་༔ ཡང་ན་ཕྱིའི་ཆོས་ཐམས་ཅད་རང་ས་ནས་ཡེ་གྲོལ་མཉམ་པ་ཉིད་དུ་བསྡུ་ཞིང་ཕྱིར་མི་རྟོགས་མི་དགག་མི་གྲུབ་མི་ཞེན་པར་གནས་པ་དང་༔ ནང་བློའི་རང་བཞིན་ཡོད་པར་སྲིན་བུའི་ཁ་ཆུས་རང་འཆིང་བ་ལྟར་སྣ་ཚོགས་སུ་ཞེན་པས་མིང་བརྟགས་དོན་བཟུང་དངོས་པོར་བལྟས་པས་མ་མཉམ་པ་ཉིད་མིང་གདགས་བྱ་འདོགས་བྱེད་གདགས་ཡུལ་གསུམ་ཀའི་འཛིན་པས་མ་བསླད་པར་ཡེ་གྲོལ་ཆེན་པོ་བསྟན་དུ་མེད་པའི་སར་ཐག་ཆོད་པར་གདེངས་ཀྱིས་རང་ཤུགས་ཀྱིས་བསྡུ་པ་སྟེ༔ ནམ་མཁའ་འབར་བ་ལས༔ སྣང་བའི་ཆོས་ཀུན་སྟོང་པར་བསྡུ༔ བློའི་བརྟགས་ཆོས་ཀུན་བློ་འདས་བསྡུ༔ ཡང་ན་ཆོས་ཀུན་རང་སར་གྲོལ་བར་བསྡུ༔ མིང་བརྟགས་བསྟན་དུ་མེད་པར་བསྡུ༔ ཞེས་སོ༔ ཡང་ན་དེ་གཉིས་ཀྱི་གནད་བསྡུས་ཏེ་ཕྱི་སྣང་བ་ཐམས་ཅད་དགག་སྒྲུབ་བཟང་ངན་མེད་པར་ཅེར་སའམ་སྣང་ས་དེ་ནས་ཡུལ་གྱི་སྤྲོས་པ་རང་ཆོད་དེ་བློ་ལ་མི་ཆགས་པ་དང་༔ ནང་བརྟགས་ཆགས་སེམས་ཀྱི་ཚོགས་པའང་ཅེར་སའམ་སྣང་ས་དེ་ནས་བློ་མ་ཡིན་པར་སྤྲོས་པ་རང་ཆོད་དེ་ཡུལ་ལ་མི་རྟོག༔ སྣང་སེམས་གཞི་ནས་སངས་བས་རིག་པ་མཚོན་བརྗོད་མེད་པའི་ཡེ་ཤེས་ཀྱི་གཉེན་པོ་ཡེ་ལྷག་པའི་མ་བསྡུས་པར་རང་འདུས་པ་ཞེས་བྱ་སྟེ༔ གནད་ཕྱི་ནང་གི་དམིགས་འཛིན་ཐམས་ཅད་མི་སྤྲོ༔ བར་མི་བཅད་པར་རང་བྱུང་ངོ་ཤེས་པའི་རང་འདུས་སོ༔ དེ་ལས༔ ཡང་ན་སྣ་ཚོགས་ཆོས་རྣམས་ཀུན༔ བཟང་ངན་དགག་སྒྲུབ་མེད་པར་བསྡུས༔ བརྟགས་ཆགས་མཚོན་བརྗོད་བྲལ་བར་བསྡུ༔ ཞེས་སོ༔ ༼ འདི་ཅུང་ཟད་ཟུར་ཕྱིན་དུ་ཡོད་པས་སླད་ཞུ་དག་དགོས། ༽

གཉིས་པ་ནི་དགོངས་པའི་ངོ་བོའི་ཕུག་གང་ལ་སྐྱོལ་ན༔ ཆོས་རྣམས་ཀྱི་གྲུབ་མཐའ་མེད་པ་ཐེག་པའི་ཕུག་ཏུ་བསྐྱལ་བའི་ངང་དུ་གདེངས་འཆོས་པ་དང་༔ བློ་དང་རྣམ་རྟོག་ཟད་པ་ཆོས་ཉིད་ཀྱི་ཕུག་ཏུ་སྐྱོལ་བ་དང་༔ ཡུད་རིག་སེམས་ཀྱི་ཆགས་སྡང་དགག་སྒྲུབ་མེད་པ་ངང་དྭངས་ཀྱི༔ ཐེག་པ་བློའི་བཅོས་ཀྱི་འཇུག་སྒོ་མེད་པ་ཡང་ཏི་རྫོགས་པ་ཆེན་པོའི་ཕུག་ཏུ་སྐྱེལ་ཞིང་༔ གང་ལའང་རེ་སྨོན་ཡིད་གཉིས་བཅས་བཅོས་དགག་སྒྲུབ་དང་བྲལ་བར་སྐྱོང་དུ་མེད་པའི་སྐྱོང་བ་ཆེན་པོར་བྱའོ༔

གསུམ་པ་ནི༔ རང་བྱུང་གི་ངོ་བ་སྐྱོང་བ༔ དེ་བསྒོམ་དུ་མེད་པའི་བསྒོམ་པར་བསྟན་པའོ༔ དང་པོ་ནི༔ རང་བབས་ཀྱི་རིག་པ་རྗེན་ནེ་བཞག་པ་ལས༔ ཕྱིར་མི་བསམ༔ ནང་དུ་མི་བསྡུ༔ བར་དུ་མི་རྟོག་པར་རང་ངོ་ལ་བལྟས་པས་ཟང་ཐལ་རང་གསལ་དུ་རྗེན་རྗེན༔ བདེན་གསུམ་དང་བྲལ་བའི་ཀ་དག༔ རང་བྱུུང་རང་ཤར་གྱི་ཡེ་ཤེས༔ ལྟ་བ་དང་བསྒོམ་པས་མ་བསླད༔ རྣམ་རྟོག་དང་བཟོ་བཅོས་སུ་མ་སོང་བར༔ གཟུང་འཛིན་གྱི་སྤྲོས་པ་མེད་པ༔ སེམས་ཡིད་ཀྱི་རྟོག་པ་མེད་པ༔ རང་གནས་ལ་འཛིན་པ་མེད་པ༔ མཉམ་པ་ལ་བར་མེད་པ༔ རང་བཞིན་བབས་ཀྱི་གནས་ལུགས༔ སྣང་བས་མ་བསྒྱུར་བར་དྲན་པ་འགགས་མེད༔ དྭངས་ཤིང་གསལ་བ་རྒྱ་མཚོ་ལྟ་བུ༔ མཐའ་ཡིས་མ་རེག་པ་ནམ་མཁའ་ལྟ་བུ་སལ་ལེ༔ སང་ངེ༔ ཝལ་ལེ༔ རིག་གེ༔ རྗེན་ནེ༔ ཧད་དེ་ཁྱད་པར་བཞི་ལྡན་གྱི་ཆོས་སྐུ་ངོས་བཟུང་བའི་ཐོག་ཏུ་གཞིའི་འོད་གསལ་ཡེ་ནས་དེ་ལྟ་བུར་གནས་པ་ལ་བུའི་འོད་གསལ་རིག་པའི་ངང་ལས་བསྐྱོད་པས་འདྲེ་ས་དང་འདྲེ་མཁན་མེད་པར་ཆོས་ཟད་རང་ས་ཟིན་པ་དུས་གསུམ་ཡིད་ཀྱིས་འབྲེལ་ཐག་ཆོད་པའི་རང་བཞིན་བར་མེད་ཀྱི་གསམ་གཏན་རྐྱེན་ཁ་ན་མེད་པ་ཞེས་བྱ་བར༔ ལྟ་བ་ཡེ་ཤེས་གཏིང་རྫོགས་ལས༔ ཨ་ཏི་རྫོགས་ཆེན་ཆོས་སྐུ་བདེན་གཉིས་བྲལ༔ ངོ་བོ་ཉིད་ཀྱི་རང་བྱུང་རང་ཤར་བས༔ ཡོད་མེད་དབུས་ཀྱི་ཡེ་ཤེས་མཐའ་གསུམ་བྲལ༔ ཡུལ་ལ་སྤངས་སྡུད་གཉིས་པོ་གདོད་ནས་མེད༔ དཔེར་ན་ནམ་མཁའི་ངང་དུ་ཤེས་པར་བྱ༔ ཅི་བཞིན་མ་ནོར་རང་སེམས་རྟོག་པ་ཡི༔ ལུས་ངག་མ་སྐྱེས་རྟོག་པའི་གཞི་མེད་ཕྱིར༔ སྐྱིལ་ཀྲུང་དྲང་འདུག་སྨྲ་བཅད་ཁ་ན་མེད༔ དེ་ཕྱིར་སེམས་ཀྱང་དངོས་མེད་རྟག་ཆད་བྲལ༔ རྟོག་སྤངས་མི་རྟོག་བསྒོམ་པས་ཁར་མི་འོང་༔ རྣལ་འབྱོར་དམིགས་པའི་སེམས་ཀྱིས་བསྒོམ་མི་དགོས༔ ཞེས་དང་༔ ལྟ་བ་ཐམས་ཅད་ཀྱི་སྙིང་པོའི་རྒྱུད་ལས༔ རྣམ་པར་མི་རྟོག་སལ་ལེ་བ༔ ས་ལེ་བ་ལ་རྟོག་པ་མེད༔ དེ་ནི་རང་བྱུང་ཡེ་ཤེས་ཡིན༔ མིང་དུ་མི་ཐོག་ཉམས་མྱོང་ཞིང་༔ འཁུར་བ་ཆུ་ཡི་ཅི་བཞིན་དུ༔ ཡེ་ཤེས་སྣང་བས་དོན་ལ་ཕེབས༔ ཞེས་སོ༔ དེའི་དུས་སུ་འཆར་རམ་གནས་ཀྱང་གང་ལྟར་ཡང་ཟང་ཐལ་གྱི་ཡེ་ཤེས་རྗེན་ལ་བུད་པའི་མི་རྟོག་སྤྲོས་བྲལ་ཆེན་པོའི་ངང་མ་བརྗེད་པས༔ ཤར་བ་ལ་བསྐྱང་ན་རིག་པ་བཞེངས་པ་དང་འདྲ་བས་ཐད་ཀ་ན་རིག་པ་མ་གཏོགས་མེད་པ་ངོས་ཟིན་དུས་བཟང་ངན་བདེ་ཆེན་དུ་རང་གྲོལ་བའི་ཆོས་སྐུ་འཆར་ཏེ༔ ཀུན་བྱེད་ལས༔ དོན་ནི་ཀུན་དོན་སྐྱེ་བ་མེད་ཤེས་ན༔ རྣམ་རྟོག་མཚན་མ་དེ་བཞིན་རིག་ཤེས་ན༔ དྲན་བསམ་ཡིད་ལ་འགྱུར་བ་མ་ལུས་པ༔ སྐྱེ་བ་མེད་པའི་ངང་ལས་མ་ཡེངས་ན༔ གང་ལྟར་བསམ་ཡང་བསྒོམ་པ་ཡིན་ཤེས་ན༔ མ་བསྒོམ་གང་ལྟར་བཞག་ཀྱང་ཡེངས་པ་མེད༔ ཅེས་དང་༔ ལྟ་བའི་སྙིང་པོ་ལས༔ རྣམ་རྟོག་མཚན་མ་སྐྱེས་པའི་ཚེ༔ ཆོས་སྐུ་རྟོག་པ་མེད་པའི་ངང་༔ འབྱུང་བའི་ཡོན་ཏན་ལྔ་སྤྱོད་ཚེ༔ ལོངས་སྤྱོད་རྫོགས་པ་སྐུ་ཡི་ངང་༔ འགྲོ་དྲུག་གཟུགས་སུ་སྣང་བའི་ཚེ༔ སྤྲུལ་སྐུ་ཐུབ་པ་ཆེན་པོའི་ངང་༔ སྡུག་བསྔལ་སྣ་ཚོགས་སྐྱེས་པའི་ཚེ༔ ཡེ་ཤེས་བདེ་བ་ཆེན་པོའི་ངང་༔ རྐྱེན་གྱིས་ཆགས་སྡང་སྐྱེས་པའི་ཚེ༔ རང་བྱུང་ཡེ་ཤེས་ཤར་པ་ཡིན༔ ཞེས་དང་༔ ལྟ་བ་ལ་ཤན་རིན་ཆེན་སྒྲོན་མེ་ལས༔ ལོག་པའི་རྒྱུད་ལས་གྲོལ་བའི་བདེ་ཆེན་དོན༔ འཁྲུལ་ཞེན་གྲོལ་ཚེ་བདག་གཞན་ཡོད་མ་ཡིན༔ ཞེས་དང་༔ ལྟ་བ་ལ་ཐལ་ལས༔ གང་ཡང་ཆེད་དུ་མི་བསྒྲུབ་པས༔ དེས་ན་ལྟོས་པ་དགག་མི་སྤྱོད༔ དེ་ནི་མིང་གི་ལྷུན་གྲུབ་སྟེ༔ དེ་ཡི་མཚན་ནི་རྫོགས་ཆེན་ཡིན༔ གསང་བའི་མཚན་དུ་ཡང་ཏི་ལགས༔ ཞེས་སོ༔ ཡང་གནས་པའམ་མི་རྟོག་པའི་དུས་ཀྱི་རིག་ཆ་རྗེན་སང་ངེ་བས་ཆོས་སྐུ་རང་གནས་ཆེན་པོ་ཞེས་བྱ་བ་ལས་ཆེད་དུ་བཟུང་བའི་མི་རྟོག་པ་དེ་བསྒོམ་པ་མིན་པས་ཁྱད་པར་ཡང་ཤེས་ལ༔ དེ་ལྟར་མི་རྟོག་པའི་དུས་ཀྱི་རིག་པ་ཟང་ཐལ་གྱི་ངང་ཚུགས་མ་ཤོར་བར་ཐོག་བབ་ཀྱི་ཏིང་འཛིན་ལས་བསྐྱང་བར་བྱ་བ་སྟེ༔ ཀློང་ཆེན་དྲུག་པར༔ འཛིན་པ་མེད་པའི་སེམས་ཉིད་ལ༔ རང་ཤར་ཆེན་པོའི་སྣང་བ་ནི༔ མ་འགགས་མི་རྟོག་དགོངས་པ་ཞེས༔ ཀུན་ཏུ་བཟང་པོ་ང་ཡིས་བསྟན༔ ཞེས་སོ༔ འདི་ལྟ་བའི་དོན་ལ་གོམས་པས་སེམས་ལས་འདས་པའི་སེམས་ཀྱི་ཆོས་ཀྱིས་མི་གོས་པས་བྱིང་རྒོད་ལ་སོགས་པའི་སྐྱོན་འབྱུང་མི་སྲིད་པའི་ཡོན་ཏན་དང་༔ ལྟ་བ་དེའི་ཕྱག་རྒྱས་ཐེབ་པས་སྐྱོན་དུ་མི་འགྱུར་པ་དང་༔ མཐར་གསེར་གླིང་དུ་ས་རྡོ་མི་རྙེད་པ་ལྟར༔ རྣམ་རྟོག་ཐམས་ཅད་སེམས་སྤྲོས་བྲལ་དུ་དག་མཉམ་པའི་ཏིང་ངེ་འཛིན་ལ་དོར་བ་མེད་པའི་གནད་དང་ལྡན་པ་སྟེ༔ ལྟ་བ་ལ་ཐལ་གྱི་རྒྱུད་ལས༔ དེ་བཞིན་ཡེ་ཤེས་ངོས་ཟིན་པས༔ བྱིང་རྒོད་མི་འབྱུང་ཡེ་ཤེས་གསལ༔ དུག་ལ་སྨན་བཏབས་ནད་སེལ་ལྟར༔ ཆགས་སྡང་ལ་སོགས་དུག་ལྔ་ལ༔ དེ་ཉིད་གསལ་བཏབས་བལྟ་བས་སྟོངས༔ ཞེས་དང་༔ ལྟ་བའི་སྙིང་པོ་ལས༔ དཔེར་ན་རིན་ཆེན་གསེར་གླིང་ལ༔ ས་རྡོ་བཙལ་ཀྱང་མི་རྙེད་བཞིན༔ ཐམས་ཅད་སེམས་སུ་དོན་རྟོགས་པའི༔ ཏིང་འཛིན་དག་ལ་འབྱུང་འཇུག་མེད༔ ཅེས་སོ༔

གཉིས་པ་དེ་བསྒོམ་དུ་མེད་པའི་བསྒོམ་པར་བཤད་པ་ནི༔ དེ་ལྟ་བུའི་དོན་ལ་གནས་པ་ནི་བྱར་མེད་རང་བཞག་རང་ཤར་ཆེན་པོ་ཡིན་པས་རྣམ་རྟོག་འཕྲོ་འདུས་བསྐྱེད་པའི་ཏིང་འཛིན་མ་ཡིན་ལ༔ གལ་ཏེ་དེའི་སྒོ་ནས་ཅི་ལྟར་བསྒོམ་ཡང་མི་མཐོང་བའི་ཕྱིར་དང་༔ སེམས་གནས་ངལ་བསོའི་བསྒོམ་པས་རྐྱེན་མི་ཐུབ་ཅིང་སྔར་བཤད་པ་ལྟར་བློ་རྫས་འགལ་བའི་ཕྱིར་ཡང་བསྒོམ་དུ་མེད་པ་འབའ་ཞིག་ལ་གདེངས་ཆོས་པར་བྱའོ༔ དེ་སྐད་དུའང་ཏིང་འཛིན་རྩེ་གཅིག་གི་རྒྱུད་ལས༔ ཉག་གཅིག་རྟོགས་སྒོམ་ཉམས་ལས་འདས༔ ཡེ་ཤེས་བསྒོམ་པ་མ་ཡིན་ཏེ༔ ཡེ་ཤེས་བསྒོམ་མེད་བློ་སྣང་མེད༔ བློ་སྣང་བསྒོམ་པས་རྐྱེན་མི་ཐུབ༔ ངོ་བོ་བློ་སྣང་རང་སྒོ་སྟེ༔ ཡེ་ཤེས་རང་ཤར་ཏིང་འཛིན་རྐྱེན་ཐུབ་ཡིན༔ ཞེས་དང་༔ ཀུན་བྱེད་ལས༔ སྒྲོ་སྐུར་འདས་པས་དོན་གྱི་སྙིང་པོ་ལ༔ བསྒོམ་དང་མི་བསྒོམ་མཁའ་ལ་རྩོད་པ་འདྲ༔ རྟོག་པའི་དོན་ལས་མ་ཡེངས་དགོངས་པ་སྟེ༔ དངོས་པོ་མ་ཡིན་དངོས་པོ་མེད་མ་ཡིན༔ ཞེས་དང་༔ བསྒོམ་དུ་མེད་པའི་དོན་ལ་མ་བསྒོམ་ན༔ མཚན་མའི་གྲངས་ལ་བསྐལ་བ་བརྒྱར་བསྒོམས་ཀྱང་༔ ཀུན་བྱེད་ང་ཡི་དགོངས་པ་རྟོགས་མི་འགྱུར༔ རྣམ་རྟོག་ཡུལ་ལ་མཚན་མའི་གྲངས་ལས་འདས༔ ཀུན་བྱེད་བྱ་མི་དགོས་པར་བྱར་ཡང་མེད༔ བྱ་བ་མཚན་མའི་རྣམ་རྟོག་རྗེས་ཞུགས་ཤིང་༔ བྱ་བས་མི་ཟིན་རྟོག་པས་རྟོག་པ་འཇིལ༔ ཆུ་ལས་རྙོགས་མ་བཞིན་དུ་བྱིས་པ་བསླུས༔ ཞེས་སོ༔

བཞི་བ་གྲོལ་ཚུལ་གྱི་སྒོ་ནས་སྣང་སྤྱོད་ཡེ་ཤེས་ཀྱི་གྲོགས་སུ་འཆར་བའི་མན་ངག་ལ༔ གྲོལ་ལུགས་བཞིའི་གནད་སྤྱིར་བཤད༔ རང་གྲོལ་ཆེན་པོའི་དགོངས་པའི་འགགས་བྱེ་བྲག་ཏུ་བསྡམ་པའོ༔

དང་པོ་ལ་ཡེ་གྲོལ་ཆེན་པོའི་ལྟ་བས༔ མཐའ་གྲོལ་ཆེན་པོའི་དགོངས་པས༔ ཅེར་གྲོལ་ཆེན་པོའི་སྤྱོད་པས༔ གཅིག་གྲོལ་ཆེན་པོའི་འབྲས་བུ་གདེང་གིས་གྲོལ་ཐོག་ཏུ་རང་མལ་འཆའ་བའོ༔ དང་པོ་ནི༔ འགྲོ་བའི་ལུས་སོགས་གཟུགས་སྣང་བ་ཐམས་ཅད་འབྱུང་བ་རང་གནད་ཀྱི་སྣང་སྟོང་བདེ་གཤེགས་ཀྱི་སྐུ་རུ་གྲོལ༔ སྒྲ་སྐད་ཐམས་ཅད་གསལ་དག་སྒྲ་དོན་གྱི་གྲགས་སྟོང་བདེ་བར་གཤེགས་པའི་གསུང་གི་རྡོ་རྗེ་གྲོལ༔ ཅི་བསམ་དགོངས་གནད་ཀྱི་དྲན་སྟོང་སངས་རྒྱས་ཀྱི་ཐུགས་རྣམ་པར་མི་རྟོག་དུ་ཡེ་ནས་གྲོལ་བ་སྟེ༔ དེའི་ཕྱིར་ན་བསྐྱར་ནས་གྲོལ་མི་དགོས་པར་རིག་པས༔ འབད་རྩོལ་གྱི་མཐའ་ལ་མི་གནས་པར་བློ་བདེ་བའོ༔ དེ་བས་ན་རང་བྱུང་གི་རིག་པ་དང་༔ དེའི་རྩལ་ལས་རོལ་པར་ཤར་བའི་ཆོས༔ སྣང་ཞེན་ཐམས་ཅད་ཀྱང་ཡེ་ནས་གྲོལ་བ་ཤེས་པས་གཞི་མེད་རྩ་བྲལ༔ མེད་སྣང་སྟོང་པའི་རང་གཟུགས༔ ཤར་གྲོལ་རིས་མེད་དགག་སྒྲུབ་བཅས་བཅོས་སུ་མེད་པར་བཞག་པས༔ དཔེར་ན་ཆུ་ཟླ་སྣང་བ་དང་འགགས་པ་ལ་མེད་པར་ཁྱད་མེད་པ་ལྟར༔ དེ་ལས་གཞན་དུ་སྔར་མ་གྲོལ་བ་སླད་ནས་གྲོལ་རྒྱུ་མེད་པའི་གདེངས་རང་མལ་དུ་འཆོས་པའོ༔ ལྟ་བ་ལ་ཐལ་ལས༔ ལམ་གྱི་བཅོས་སུ་ག་ལ་ཡོད༔ ཡེ་ནས་གྲོལ་བའི་ཆོས་སྐུ་ལ༔ ལྟ་བསྒོམ་སྤྱོད་པ་འཆིང་བའི་རྒྱུད༔ ཡེ་གྲོལ་ཆེན་པོ་ཕྱོགས་མེད་ལ༔ ཕྱོགས་སུ་འཛིན་པ་འཁྲུལ་པའི་ལམ༔ ཞེས་དང་༔ དེ་སྐད་དུ་རྒྱ་མཚོ་ཀློང་གསལ་ལས༔ སྡུག་བསྔལ་མ་སྤང་སྐུ་ལྔར་གྲོལ༔ དུག་གསུམ་མ་སྤང་སྐུ་གསུང་ཐུགས་སུ་གྲོལ༔ མ་རིག་ཡེ་ཤེས་ཆེན་པོར་གྲོལ༔ སྒྲིབ་གཡོག་མ་སྤངས་འོད་གསལ་ཆེན་པོར་གྲོལ༔ རྣམ་རྟོག་མ་སྤངས་ཆོས་ཉིད་ཆེན་པོར་གྲོལ༔ སེམས་ཅན་མ་སྤངས་སངས་རྒྱས་ཆེན་པོར་གྲོལ༔ འཁོར་བ་མ་སྤངས་མྱང་འདས་ཆེན་པོར་གྲོལ༔ སྣང་བ་མ་སྤངས་ཞིང་ཁམས་ཆེན་པོར་གྲོལ༔ ཕྱི་ནང་མ་སྤང་ཡུལ་མེད་ཆེན་པོར་གྲོལ༔ བཟང་ངན་མ་སྤངས་དགག་སྒྲུབ་མེད་པར་གྲོལ༔ གཟུང་འཛིན་མ་སྤངས་དབྱེ་བསལ་མེད་པར་གྲོལ༔ དངོས་པོ་གཤིས་ཀྱི་གནས་ལུགས་ནི༔ བཅོས་པས་འགྲུབ་པར་མ་གསུངས་བས༔ དངོས་པོ་མེད་པ་ཡེ་ནས་གྲོལ༔ ཟང་ཐལ་ཆེན་པོར་ཡེ་ནས་གྲོལ༔ ཞེས་དང་ཀློང་གསལ་ལས༔ སྟོང་ལས་ཀུན་འབྱུང་སྟོང་པར་གྲོལ༔ མེད་ལས་སྣ་ཚོགས་མེད་པར་གྲོལ༔ ཐོལ་བྱུང་ཡིད་རིག་བྱུང་ཚད་གྲོལ༔ ཝལ་བྱུང་དྲན་རྟོག་སྙིང་པོར་གྲོལ༔ ཁམས་གསུམ་སེམས་ཅན་ལུས་ངག་ཡིད་གསུམ་སྟེ༔ དུས་གསུམ་སངས་རྒྱས་སྐུ་གསུང་ཐུགས་སུ་གྲོལ༔ ཞེ་འདོད་རྩོལ་སྒྲུབ་བྱས་ནས་གྲོལ་མིན་ཏེ༔ ཐོག་མ་ཉིད་ནས་མ་སྤངས་མི་གནས་གྲོལ༔ ཞེས་དང་༔ ལྟ་བ་ལ་ཐལ་ལས༔ ཡེ་གྲོལ་ཆེན་པོར་ཤར་བ་ལ༔ རྩོལ་སྒྲུབ་བྱེད་པ་འཁྲུལ་པའི་ལམ༔ ཞེས་པས་མཚན་ཉིད་སོགས་ཀྱི་ཡེ་གྲོལ་གྱི་གནད་ལ་མ་ཕབ་པར་རྩོལ་སྒྲུབ་བྱས་ཆོས་ཀྱི་སྤྲིན་དཀར་པོས་ཉི་མ་བསྒྲིབ་པ་ལྟར་སོང་བས་ཤར་གྱི་དོན་གཉེར་ལ་ཁ་ཤར་དུ་བལྟས་ནས་འགྲོ་བ་སྤངས་ཏེ་ནུབ་ཏུ་ཕྱིན་པ་དང་འདྲ་སྟེ་དོན་མེད་པའོ༔ དེས་ན་ཡེ་གྲོལ་སོར་བཞག་འདི་གནད་རབ་ཏུ་ཟབ་པོ༔ འཁྲུལ་སྣང་རྩད་གཅོད་སྣང་གསལ་སྤུ་གྲིའི་རྒྱུད་ལས༔ དཔེར་ན་དོན་ཡོད་ལམ་ཞུགས་ན༔ ཤར་ན་དོན་ཡོད་ནུབ་ལ་ཕྱིན༔ ནུབ་ཀྱིས་ཤར་གྱི་དོན་མི་འགྲུབ༔ ལམ་རྒྱུས་མི་ཤེས་འཁྲུལ་པ་འབྱུང་༔ ཞེས་པ་ལྟར་རོ༔ འཇམ་དཔལ་ཡང་ཏི་ནག་པོ་ལས༔ ཐམས་ཅད་ཡེ་གྲོལ་བསྟན་པ་ལ༔ ཡང་ཏི་ནག་པོ་འབྲུ་གཅིག་ཤར༔ བྱིན་གྱིས་བརླབ་ཀྱི་བྱུང་བ་ཡི༔ འབྲས་བུ་ཡེ་གྲོལ་རྒྱུད་ཆེན་ལ༔ ངང་ངམ་ཤུགས་ཀྱིས་ཤར་བའོ༔ ཞེས་སོ༔ འདི་ནི་ལྟ་བའི་ངོས་ནས་ཡེ་གྲོལ་ཡིན་པའི་རྗེས་སུ་འཇོག་པས་ཕྱིར་ཡེ་གྲོལ་ཆེན་པོའི་དབང་གི་ཉམས་ལེན་ནོ༔

གཉིས་པ་མཐའ་གྲོལ་ཆེན་པོའི་དགོངས་པ་ནི༔ ཡོད་པ་དང་མེད་པ༔ གཉིས་གཉིས་མིན་གང་དུའང་རིག་པའི་ངོ་བོ་གྲུབ་པ་མེད་པ་དང་༔ དེའི་རྩལ་ལས་བྱུང་བ་ཐམས་ཅད་ཀྱང་མཐའ་ལས་གྲོལ་ཟིན་པས༔ ད་ལྟ་བསྒོམ་པའི་དུས་སུའང་གང་དུའང་ལྟོས་མི་འཆའ་པར་འདི་ཡིན་མིན་གྱི་རྩིས་གདབས་མི་སྤྲོ་བར་ཆོས་ཉིད་རང་ལ་ཤར་བ་ཉིད་བསྒོམ་མི་བསྒོམ་གྱི་སྤྲོས་པ་དང་བསྡུ་བ་སོགས་དམིགས་པའི་འཛིན་སྟངས་ཐམས་ཅད་དང་བྲལ་བར་ཅོག་གིས་བཞག་པ་སྟེ་སྣང་རིག་མཐའ་གྲོལ་ཀུན་ཏུ་བཟང་པོའི་དགོངས་པ་རང་ལ་རྙེད་པ་ཡིན་ནོ༔ དེ་ཡང་མཐའ་གྲོལ་གྱི་དགོངས་པའི་ངོ་བོ་རིག་པ་རང་བྱུང་གི་སངས་རྒྱས་རང་ངོ་ཅེར་གྱིས་མཐོང་བས་རྩལ་གཞི་ཐིམ་མཐའ་གྲོལ་དུ་དག་པ་ཤུགས་ལས་འབྱུང་བར་འགྱུར་རོ༔ མུ་ཏིག་ཕྲེང་བ་ལས༔ འབད་པས་གྲོལ་བ་མ་ཡིན་ཏེ༔ ཡེ་ཉིད་ནས་ནི་གྲོལ་བར་གནས༔ ཞེས་གཞི་ལྟ་བ་མཐའ་གྲོལ་ཆེན་པོ་བསྟན༔ ཉི་ཟླ་བཀོད་པ་ལས༔ དངོས་པོར་སྣང་བའི་ཆོས་རྣམས་ལ༔ མིང་མེད་མཐའ་སྟོང་གྲོལ་བར་བཞག༔ དབང་པོ་འབྲིང་གིས་འདི་ལྟར་ཤེས་པར་བྱ༔ བྱར་མེད་གཏད་མེད་མཐའ་ལས་གྲོལ་བར་བསྟེན༔ ཞེས་ལམ་བསྒོམ་པ་མཐའ་གྲོལ་ཆེན་པོ༔ དེ་ལྟར་བསྒོམ་པས་རིག་པ་མཐའ་གྲོལ་ཀུན་ཏུ་བཟང་པོ་རང་ལ་རྙེད་པ་ནི་འབྲས་བུ་མུ་མེད་མཐའ་སྟོང་རྟོགས་པར་བཞག་སྟེ༔ ཉི་ཟླ་བཀོད་པ་ལས༔ ཡེ་ཤེས་ཉི་མ་ཤར་བས་མུ་མེད་མཐའ་སྟོང་རྟོགས༔ མ་རིག་གཏི་མུག་སངས་བས་མུ་མེད་མཐའ་སྟོང་རྟོགས༔ དུག་ལྔ་རང་སར་གྲོལ་བས་མུ་མེད་མཐའ་སྟོང་རྟོགས༔ འཁྲུལ་སྒོ་འཁྲུལ་སྣང་མེད་པས་མུ་མེད་མཐའ་སྟོང་རྟོགས༔ སྣང་སྟེ་གྲུབ་པ་མེད་པས་མུ་མེད་མཐའ་སྟོང་རྟོགས༔ རིག་ཀྱང་ངོས་བཟུང་མེད་པས་མུ་མེད་མཐའ་སྟོང་རྟོགས༔ སེམས་ཀྱང་དངོས་གཞི་མེད་པས་མུ་མེད་མཐའ་སྟོང་རྟོགས༔ སྣང་བ་རང་སོར་བཞག་པས་མུ་མེད་མཐའ་སྟོང་རྟོགས༔ རིག་པ་མིང་མེད་རིག་མེད་མུ་མེད་མཐའ་སྟོང་རྟོགས༔ ཞེས་སོ༔ འདི་ནི་བསྒོམ་པ་ཐམས་ཅད་ཀྱི་མཆོག་སྟེ༔ རྒྱལ་བ་ཀུན་གྱི་ལམ་པོ་ཆེ་ཡིན་ནོ༔ བསྒོམ་པ་མིང་མེད་མཐའ་སྟོང་ངོ་༔ ཞེས་ཉི་ཟླ་འོད་འབར་ལས་གསུངས་སོ༔ རིན་ཆེན་སྒྲོན་མེ་ལས༔ མིང་མེད་མཐའ་གྲོལ་བློ་འདས་རང་ངོ་འདི༔ མ་རྟོགས་གཉིས་འཛིན་གྲུབ་མཐས་བཅིང་པ་རྣམས༔ བློས་བཏགས་མཐར་འཛིན་རང་སར་གྲོལ་བའི་ཕྱིར༔ དེ་ཡི་འཛིན་པའི་མཐའ་ལས་འདི་ལྟར་གྲོལ༔ ཞེས་གསུངས་སོ༔

གསུམ་པ་ཅེར་གྲོལ་ནི༔ ལར་རྣམ་རྟོག་ཐམས་ཅད་རྒྱུན་ཆད་མེད་པའི་རིག་རྩལ་ཡིན་པས་འགགས་མེད་དུ་ཡུལ་ལ་ཤར་དུས༔ ཤར་གྲོལ་དུ་ས་ལ་ལ་ཡོད་པའི་མཐོང་སའམ་ཅེར་ས་དེར་ཡེ་ནས་མ་གྲོལ་བ་མེད་ཀྱང་ངོ་མ་ཤེས་པས་སེམས་ཅན་འཁྲུལ་པ་ལ༔ རྣལ་འབྱོར་པས་རྒྱུ་འབྲས་མེད་པར་རྟོགས་ནས་ཤར་སའམ་ཅེར་ས་དེར་བཞག་པའི་སྐད་ཅིག་ལ་རང་ཡལ་རྗེས་མེད་དུ་སངས་ངེ་བའི་ངང་ནས་རིག་པ་ཟང་ཐལ་ལྷག་གེར་ཤར་བ་ངོས་བཟུང་པ་ནི་ཅེར་གྲོལ་གྱི་འགགས་ཆོས་ཉིད་དུ་བསྡམ་པ་ཞེས་བྱའོ༔ ཅེར་གྲོལ་གྱི་ལུགས་ནི་འོད་གསལ་མ་བུ་འཕྲད་པས་གྲོལ་བ་ཡིན་པས་མཐོང་བ་དང་འོད་གསལ་ཡིན་པར་ཤེས་བའི་ཆོས་ཉིད་མངོན་སུམ་གྱི་རྩིས་ཐེབ་ནས་བཅས་བཅོས་དགག་སྒྲུབ་གང་ཡང་མི་དགོས་པར་གདེང་གི་བློ་བདེ་ཁོང་ནས་ཤར་བས་ཡུལ་སེམས་ཀྱི་སྤྲོས་པ་ཆོད་པ་ཞིག་གོ༔ འདི་ནི་རིག་པ་ཐོག་ཐབས་སུ་ཡུལ་དང་ཤེས་པའི་བར་ལ་དབབ་པ་ཡིན་པས་སྤྱོད་པའི་རྩལ་སྦྱོང་དུ་འགྲོ་བའོ༔ དེའི་ཐབས་ནི་ཡུལ་དྲུག་གང་ལ་ཤེས་པ་སྐྱེ་པ་ན་སེམས་ཀྱི་སྐད་ཅིག་དང་༔ མིག་གི་ལྟ་སྟངས་ཐོག་བབས་ཀྱི་གཟིར་ཏེ་ཅེར་གྱིས་གཏད་ནས་ཅོག་གིས་བཞག་པས་སྤྱི་དང་དུམ་བུ་གང་ལའང་སྣང་སེམས་བར་ལག་བྲལ་ནས་ཆོས་ཟད་བློ་འདས་ཀྱི་རང་བཞིན་དུ་ལྟོས་གཞི་མེད་པར་གྲོལ་བ་ཡིན་ཏེ༔ བཞག་ཐབས༔ སྣང་བ་ཅེར་བཞག་གི་གྲོལ་ལུགས་དང་སྔར་འདྲེས་ཀྱི་མི་དང་འཕྲད་པ་ལྟར་གྲོལ་བ་དང་༔ ཏིང་འཛིན་ཐོག་བབས་ཆེན་པོའི་གནད་ཀྱང་འདིས་ཡིན་པར་ཤེས་དགོས་སོ༔ ཐལ་འགྱུར་ལས༔ ཅེར་གྱིས་གྲོལ་བས་མཐོང་སར་གྲོལ༔ ཞེས་དང་༔ གསེར་གྱི་སྙིང་པོ་ལས༔ ཅེར་གྲོལ་ཆེན་པོའི་ལྟ་སྟངས་ཀྱིས༔ སངས་རྒྱས་སེམས་ཅན་གཉིས་ཀ་གྲོལ༔ ཞེས་དང་༔ ཁྱུང་ཆེན་ལས༔ ཅེར་གྲོལ་རང་དག་མཐའ་གྲོལ་ཡོངས་སུ་རྫོགས༔ གང་གི་མཐའ་བྲལ་གང་གཉིས་རང་གསལ་བས༔ བྱ་བྲལ་ཀློང་ཆེན་མ་བཙལ་ཆེན་པོའི་འགགས༔ ལུས་ངག་བྱ་བྲལ་སྣང་སྟོང་བར་དེར་བསྡམ༔ ཞེས་སོ༔ ཡང་ཅེར་གྲོལ་ནི༔ ཡུལ་མ་བཀག་པར་ལྟ་ལྟངས་དང་བཅས་ཅེར་གྱིས་གཏད་ནས་རིག་ངོ་ལ་བཞག་པས་ཡུལ་གྱི་འཛིན་པ་རང་ཞིག་གཏན་ཡལ་ལ་ ༼ དབང་པོའི་ཤེས་པ་རྟོག་མེད་ཀྱི་གྲོལ་ཚུལ་དུ། མཆན། ༽ སོང་བ་ལ་བྱས་ཀྱང་བློ་ལ་གོ་བ་བཟུང་བདེ་བའོ༔ ཡང་དབང་པོ་ལྔས་ཀྱང་བསླབ་ཏུ་རུང་སྟེ༔ སྒྲོན་མ་བརྩེགས་པ་ལས༔ དབང་པོ་ལྔ་ཉིད་ཅེར་གྲོལ་བས༔ ཡུལ་སྣང་གསལ་དག་ངང་དུ་གྲོལ༔ ཞེས་སོ༔

བཞི་བ་གཅིག་གྲོལ་ནི་འབྲས་བུ་གྲོལ་བ་སྟེ༔ རང་བྱུང་གི་རིག་པ་བདེན་པ་དབྱེར་མེད་སྤྲོས་པའི་གྲྭ་ཟུར་མེད་པ་ཐིག་ལེ་ཉག་གཅིག་ནི་འཁོར་འདས་ཀྱི་ཆོས་ཐམས་ཅད་པས་གཞི་རྒྱུད་དེ་དེ་ལས་གཞན་དུ་གྱུར་པའི་ཡན་གར་བའི་ཆོས་གང་ཡང་རང་རྒྱུད་པར་མེད་པའི་རིག་པ་དེའི་ངང་དུ་ཡེ་ནས་གྲོལ་བས་ཆོས་ཀྱི་སྐུ་དེའི་ངང་ཚུགས་མ་ཤོར་ན༔ འགྲོ་བ་དང་༔ འདུག་པ༔ ཉལ་བ་དང་༔ ཟ་བ་དང་༔ སྡུག་བསྔལ་དང་༔ བདེ་དགའ་སྐྱིད་གསུམ་མྱོང་བ་ཐམས་ཅད་མེད་སྣང་རིག་པ་གཅིག་གི་ངང་ལས་མ་གཡོས་པས་སྟེ༔ རིག་པ་ནི་འགྲོ་འདུག་ཟ་ཉལ་སྐྱིད་སྡུག་ཐམས་ཅད་མེད་པའི་བདག་ཉིད་རྒྱལ་བའི་ཆོས་སྐུ་རུ་རང་ཤར་པ་ཡིན་པས་དེའི་ཕྱིར་མ་གྲོལ་བ་མེད་པར་སྐུ་རྡོ་རྗེའི་ངོ་བོ་རང་སར་གྲོལ་བ་དང་༔ ཡང་སྨྲས་དང་ཐོས་པ་ཐམས་ཅད་ཀྱང་རིག་པའི་ངང་ལས་གཞན་མེད་ལ༔ རིག་པ་བརྗོད་དུ་མེད་པའི་གྲགས་སྟོང་གསུང་རྡོ་རྗེའི་ངོ་བོར་རམ་རང་སར་སྒྲ་ཐམས་ཅད་གྲོལ་བ་དང་༔ དྲན་པ་དང་༔ ཤེས་པ་དང་༔ ཡིད་འགྱུས་པ་དང་༔ བློ་དང་རྟོག་པ་ཐམས་ཅད་ཀྱང་རྨི་ལམ་གྱི་རྟོག་པ་དང་ཁྱད་མེད་པར་མེད་ལ་ཡོད་པར་འཛིན་པས་འཁྲུལ་པ་ཙམ་དུ་ཟད་ཀྱི༔ དོན་ལ་རིག་པའི་ངང་ལས་མ་གཡོས་པའི་རིག་པ་དྲན་རྟོག་གི་ཡུལ་ལས་འདས་པས༔ རྣམ་པར་མི་རྟོག་པའི་ཡེ་ཤེས་སངས་རྒྱས་ཐམས་ཅད་ཀྱི་ཐུགས་རྡོ་རྗེའི་ངོ་བོར་རྣམ་རྟོག་རང་སར་གྲོལ་བ་དང་༔ དེ་ལྟ་ན་འཁོར་བ་མེད་སྣང་རྫུན་ལ༔ རིག་པའི་སྣང་ཚུལ་ལྷག་པ་ཀུན་རྫོབ་པས་བདེན་པ་སྐུ་གསུང་ཐུགས་ལྷུན་གྱིས་གྲུབ་པ་ཞེས་བྱ་བས་ན་འཁོར་འདས་ཐམས་ཅད་རིག་པ་ལས་གཞན་ན་མེད་པས༔ རིག་པ་གཅིག་གྲོལ་ན་འཁོར་འདས་ཀུན་གྲོལ་བའི་གནད་ཟབ་མོ་སྟེ༔ ཉི་ཟླ་འོད་འབར་མཁའ་ཀློང་རྣམ་དག་གི་རྒྱུད་ལས༔ འགྲོ་ཡིན་འགྲོ་ཡིན་རང་སར་གྲོལ༔ སྡོད་ཀྱིན་སྡོད་ཀྱིན་རང་སར་གྲོལ༔ ཉལ་གྱིན་ཉལ་གྱིན་རང་སར་གྲོལ༔ ཟ་ཡིན་ཟ་ཡིན་རང་སར་གྲོལ༔ སྡུག་གིན་སྒུག་གིན་རང་སར་གྲོལ༔ སྐྱིད་ཀྱིན་སྐྱིད་ཀྱིན་རང་སར་གྲོལ༔ གང་ན་གནས་ཀྱང་རྡོ་རྗེའི་སྐུར་ནི་གྲོལ༔ ཅི་ལ་སྤྱོད་ཀྱང་མ་ཞེན་རང་སར་གྲོལ༔ ཇི་ལྟར་སྨྲས་ཀྱང་གྲགས་སྟོང་གྲོལ༔ ཇི་ལྟར་ཐོས་ཀྱང་མ་ཉན་གྲོལ༔ སྒོ་ལྔ་གསལ་བའི་ཤེས་པ་ལ༔ ཡིད་ལྔ་མ་སྒྲུབ་ཟང་ཐལ་གྲོལ༔ ཡིད་རིག་འགྱུས་ཀྱང་མ་བཟུང་གྲོལ༔ འགྱུ་བ་དྲན་པ་བློ་རྟོག་རྣམས༔ ཅིག་ཆོད་ཆོས་སྐུ་ལྷུན་གྲུབ་ཟང་ཐལ་ཡེ་ནས་གྲོལ༔ ཞེས་སོ༔ འཁོར་འདས་ཀྱི་ཆོས་རྣམས་རིག་པ་ཆོས་སྐུ་གཅིག་གི་ངང་དུ་ཡེ་ནས་གྲོལ་བས་བདེན་གཉིས་དབྱེར་མེད་ཆེན་པོ་ངོས་ཟིན་ནས་ངང་དུ་མ་བཅོས་པར་བཞག་པས་སྐུ་གསུམ་གྱི་བཙན་ས་ཟིན་པ་ཡིན་པས་ཀྱང་གཅིག་གྲོལ་འཐད་དེ༔ ཆོས་ཉིད་དུ་ངོ་ཤེས་པའི་སྣང་ཤེས་ཀུན་གྲོལ་བ༔ དཔེར་ན་ཚྭ་གཅིག་གི་རོ་ཤེས་པས་ཀུན་གཏན་ལ་ཕབ་པ་ལྟར་དུ་མ་རོ་གཅིག་ཏུ་ཤེས་པས་ཀྱང་ངོ་༔ རིག་པ་ཆོས་སྐུ་གཅིག་གི་ངང་དུ་བཞག་པས་སྣང་སེམས་ཐམས་ཅད་ཀྱི་སྤུན་ཐག་ཆད་དེ༔ གཟུང་འཛིན་མེད་པའི་ཡེ་གྲོལ་རང་མལ་དུ་ཕོག་པས་ཀྱང་གཅིག་གྲོལ་ལོ༔ དེ་ཡང་སྒྲོན་མ་བརྩེགས་པའི་རྒྱུད་ལས༔ གཉིས་འཛིན་རྟོག་པ་མ་ལུས་ཀུན༔ དབྱེར་མེད་ཤེས་རབ་ཡེ་ཤེས་མེ༔ རྒྱུ་རྐྱེན་མེད་པར་རང་འབར་བས༔ སྤངས་ཐོབ་དགག་སྒྲུབ་ཀུན་ལས་འདས༔ རྣམ་རྟོག་ཆོས་ཉིད་ངང་དུ་དེངས༔ གཉིས་མེད་འཛིན་པའི་རྒྱར་མ་ཆད༔ དེ་ལྟར་གཅིག་གིས་གྲོལ་བའི་ཕྱིར༔ མུ་མཐའ་མ་ལུས་རང་སར་གྲོལ༔ གྲོལ་དང་མ་གྲོལ་གཉིས་ལས་འདས༔ ཞེས་དང་༔ མུ་ཏིག་རིན་པོ་ཆེ་ཕྲེང་བའི་རྒྱུད་ལས༔ གཅིག་གྲོལ་ཡིན་པས་དུ་མ་སྟོངས༔ ཞེས་དང་༔ གསེར་གྱི་སྙིང་པོ་ལས༔ གཅིག་པུ་གྲོལ་བའི་སེམས་ཉིད་ནི༔ དུ་མ་རོ་གཅིག་ཡིན་པའི་ཕྱིར༔ ཞེས་སོ༔

གཉིས་པ་རང་གྲོལ་ཆེན་པོའི་དགོངས་པའི་འགགས་བྱེ་བྲག་ཏུ་བསྡམས་པ་ནི༔ གོང་དུ་བཤད་པའི་གྲོལ་ལུགས་བཞི་བོ་ཐམས་ཅད་ཀྱང་རྩ་བ་རང་གྲོལ་གཉེན་པོ་མེད་པ་ལ་ཐུག་པས་འདི་ལྟར་རྩལ་སྦྱངས་བས་ཐམས་ཅད་ཀྱང་གྲུབ་པར་འགྱུར་རོ༔ དེ་ལ་རྣམ་རྟོག་ཐམས་ཅད་ཡེ་ཅི་བཞིན་དུ་ཡོད་མ་མྱོང་དུ་མ་ཤེས་ན༔ སྤངས་སྦྱངས་བསྒྱུར་བ་ལ་སོགས་པ་གང་གིས་མི་གྲོལ་ཏེ༔ ཡེ་ཤེས་ཀྱིས་མི་སྤོང་བར་སེམས་ཀྱི་ཡེ་ཤེས་མི་མཐོང་༔ ཡེ་ཤེས་ཀྱིས་སེམས་མི་མཐོང་བས་སོ༔ སེམས་ཀྱིས་མི་སྤོང་སྟེ་སྤངས་གཉེན་རྫས་གཅིག་པས་དག་པར་མི་རུང་བའི་ཕྱིར་དང་༔ སེམས་སྔ་མ་ཕྱི་མས་མི་སྤོང་ཏེ༔ འདས་འོངས་རྫས་འགལ་བའི་ཕྱིར་དང་༔ དུས་མཉམ་པ་མི་སྤོང་སྟེ་ཕན་ཚུན་འཆོལ་བའི་ཕྱིར་དང་སེམས་རྒྱུན་གཅིག་ལ་དུས་མཉམ་པའི་ཕྱིར་རོ༔ ཡང་སེམས་དེ་ཉིད་ལས་ཉོན་མོངས་འབྱུང་བ་ལུས་དང་གྲིབ་མ་བཞིན་པས་སྤོང་སྦྱོང་བསྒྱུར་བར་མི་རུང་པའི་ཕྱིར་ན༔ གྲོལ་བ་ཐམས་ཅད་རང་གྲོལ་ཡིན་དེ༔ ཆུའི་རི་མོ་ལྟར་རང་གིས་རང་གྲོལ་བའི་གནད་དུ་ཤེས་པར་བྱའོ༔ དེ་ཡང་རང་གིས་གྲོལ་བའི་བྱ་བ་བྱས་པའི་རང་གྲོལ་ཡང་མིན་ཏེ༔ སྣང་སྲིད་འཁོར་འདས་ཀྱི་ཆོས་ཐམས་ཅད་བྱུང་ཡང་རང་ལས་བྱུང་༔ གྲོལ་ཡང་རང་གྲོལ་པས༔ སྣང་བ་སྣང་བ་ནས་རང་གྲོལ༔ སྟོང་པ་སྟོང་པ་ནས་གྲོལ་བ་སྟེ༔ དེ་ལས་མ་གཏོགས་པའི་ཆོས་ཉིད་གང་ཡང་མེད་པའི་ཕྱིར་རོ༔ དེས་ན་ཐོག་མ་ནས་ངོ་བོ་ཡོད་མ་མྱོང་བས་རང་གྲོལ༔ ཐབས་ཤེས་ལམ་རྐྱེན་བླ་མའི་མན་ངག་གི་གྲོལ་བྱེད་ལ་རག་མ་ལུས་པ་ཡིན་པས༔ ལམ་འདིར་ཞུགས་པའི་སྐལ་ལྡན་གྱིས་རིག་པ་ཟང་ཀ་ཀ་དག་རྗེན་པ་དེ་ངོ་ཤེས་ནས་རང་ས་ཟིན་ན༔ རྩལ་གྱི་རྣམ་རྟོག་ཐམས་ཅད་སྦྲུལ་མདུད་དམ་རྟ་རྔའི་མདུད་པ་ལྟར་རང་ཞིག་དུ་གྲོལ་བའི་ཕྱིར༔ མདོར་ན་དེ་ཉིད་ལས་མ་གཏོགས་པའི་གྲོལ་རྒྱུའམ་གྲོལ་རྐྱེན་མེད་པར་ཤར་དུས་ཉིད་ནས་ཡོད་མེད་རྟག་ཆད་ལས་འདས་པའི་ཆོས་ཉིད་རང་ལ་གྲུབ་ཟིན་པ་འདི་ཤེས་པའི་གདེང་གིས་ཤར་གནས་གྲོལ་གསུམ་རིག་པ་རྗེན་པར་འགགས་བསྡམ་པར་བྱའོ༔ དེ་ཡང་རང་བཞིན་གྱིས་མ་གྲོལ་ན་སླད་ནས་གྲོལ་བར་བཅོས་སུ་མེད་པ་སོལ་བ་ལ་བྱི་དོར་གྱིས་དཀར་པོ་མི་འགྱུར་བ་ལྟ་བུ་ཡིན་ཡང་༔ རང་གྲོལ་རང་ངོ་མ་ཤེས་ན་ཕན་མི་ཐོགས་པ་རིན་ཆེན་ངོ་མ་ཤེས་པས་དབུལ་བ་མི་སེལ་བ་ལྟ་བུ་དང་༔ ཤེས་ན་སླད་ནས་བཅོས་སུ་མེད་པ་བུམ་པ་གྲུབ་ཟིན་ན་བཅའ་མི་དགོས་པ་ལྟ་བུའོ༔ སྤྱན་རས་གཟིགས་ཏིང་འཛིན་རྩེ་གཅིག་གི་རྒྱུད་ལས༔ རང་བྱུང་གྲོགས་སུ་ཤར་བས་རྐྱེན་ཐུབ་ཡིན༔ སྣང་བ་འོད་གསལ་ཕྱི་ཡི་རྐྱེན་ཐུབ་ཡིན༔ ཚོགས་དྲུག་རང་དག་ནང་གི་རྐྱེན་ཐུབ་ཡིན༔ འགྱུ་བ་རང་སང་གསང་བའི་རྐྱེན་ཐུབ་ཡིན༔ རོལ་བ་རང་གྲོལ་ངོ་བོའི་རྐྱེན་ཐུབ་ཡིན༔ ཞེས་དང་༔ མཁའ་ཀློང་རྣམ་དག་གི་རྒྱུད་ལས༔ ཉོན་མོངས་བརྒྱད་ཁྲི་བཞི་སྟོང་གྲོལ༔ དཔེར་ན་སྦྲུལ་གྱི་མདུད་པ་བཞིན༔ བཅིང་མཁན་གྲོལ་མཁན་མེད་པར་གྲོལ༔ དེ་བཞིན་རྟག་ཆད་ཆོས་རྣམས་མ་ལུས་ཀུན༔ མ་བཅིང་མ་གྲོལ་སྙིང་པོར་གྲོལ༔ དཔེར་ན་རྔ་མའི་བདུད་པ་བཞིན༔ མཚན་མ་སྣ་ཚོགས་རང་གྲོལ་ཉིད༔ ཅེས་དང་༔ ནམ་མཁའ་ཀློང་ཡངས་ལས༔ དོན་གྱི་ངོ་བོ་གནས་ལུགས་ལ༔ སྒྲོ་སྐུར་གཉིས་ཀྱི་སྐྱོན་མེད་པའི༔ དུག་ལྔ་ཀུན་བརྟགས་རང་སར་གྲོལ༔ དེ་ཕྱིར་ཆོས་སྐུ་སྙིང་པོར་གསུངས༔ ཞེས་དང་༔ རང་གྲོལ་ཆེན་པོར་གནས་པ་ཉིད༔ རྒྱུ་རྐྱེན་གཉེན་པོ་མེད་པར་གནས༔ ཞེས་སོ༔ འདི་ལའང་དང་པོ་དང་བར་བ་དང་ཐ་མའི་གོམས་སྟོབས་ཀྱིས༔ སྔར་འདྲེས་ཀྱི་མི་ལྟར་གྲོལ་བ་དང་༔ སྦྲུལ་མདུད་ལྟར་གྲོལ་བ་དང་༔ ཁང་སྟོང་གི་རྐུན་པོ་ལྟ་བུ་གསུམ་ལས་འབད་བཅས་ཀྱི་ཉོན་མོངས་གང་སྐྱེས་ངོས་བཟུང་ནས་རང་སར་བཞག་པས་འགྱུ་བ་གནས་དག་དུ་སྦྱངས་པ་དང་༔ ཕྱི་མ་འབད་མེད་ནི་སྦྲུལ་འདུད་ལྟ་བུའོ༔

འདིར་གྲོལ་ལུགས་ལྔ་པོ་ཐམས་ཅད་ཀྱི་འགགས་རང་གྲོལ་ཆེན་པོ་འདིར་འདུས་པ་སྟེ༔ རིག་པ་བྱང་ཆུབ་ཀྱི་སེམས་ལས་རྩལ་སྣང་ཉོན་མོངས་དང་རྣམ་རྟོག་ཅེར་གྱི་སྣང་ཙམ་ནས་མཐའ་འམ་ཕྱོགས་གང་དུའང་གྲུབ་པ་མེད་པར་ཡེ་ནས་བཅིང་མཁན་རང་རྒྱུད་པ་ཆོས་ཉིད་དུ་སངས་རྒྱས་པའི་གཞི་རིག་པ་གཅིག་གི་ངང་དུ་རང་ས་ཟིན་པས་ཆོས་ཉིད་མ་བུ་འཕྲད་དེ་རང་གྲོལ་བ་ཡིན་པས་རང་གྲོལ་འབའ་ཞིག་ཏུ་གནད་འདུས་པ་ཡིན་ནོ༔ དེའི་རྒྱུ་མཚན་གྱི་དེ་འབའ་ཞིག་ཏུ་རྩལ་སྦྱངས་ཀྱང་མཆོག་ཏུ་གྱུར་ལ༔ ལར་གྲོལ་ལུགས་བཞི་པོའང་གང་ཟག་གཅིག་ལ་བརྩི་དགོས་པ་མ་ཡིན་གྱི་རང་རང་གང་ལ་མོས་པ་དེ་ཉིད་ཀྱིས་འདུལ་ཞིང་གནད་འདུས་སོ༔ དེ་ལྟར་གཅིག་གིས་ཀུན་གྲོལ་བའི༔ རང་གྲོལ་ཡེ་གྲོལ་ཡོངས་གྲོལ་དང་༔ ཅེར་གྲོལ་མཐའ་གྲོལ་བླ་མེད་པས༔ ཞེས་གཅིག་ཤེས་ཀུན་གྲོལ་གྱི་རྒྱུད་ལས་གསུངས་སོ༔

ལྔ་པ་ཟིལ་གནོན་གྱི་སྒོ་ནས་ལྟ་སྒོམ་སྤྱོད་པ་ཉམས་བྱུང་གི་བདུད་གཅོད་པའི་མན་ངག་ནི༔ བདུད་རྟགས་དང་༔ དེ་གཅོད་པའོ༔ དང་པོ་ལ་བཞི་ལས༔ དང་པོ་ལྟ་བའི་བདུད་ནི༔ མཉམ་བཞག་རྗེས་ཐོབ་གང་རུང་རུང་དུ་འབྱུང་བས་བཞི་ལས༔ མཉམ་བཞག་ཏུ་མཚན་མོ་མུན་པའི་སྨག་ཏུ་ཡང་ནམ་ལངས་བ་ལྟར་གསལ་བས༔ ཁམས་གསུམ་སེམས་ཅན་ཐམས་ཅད་ཀྱི་ལས་དགེ་སྡིག་གང་ཡང་མ་ལུས་པར་སྔ་ཕྱི་མེད་པར་ཤེས་ནས་དེའི་ཚེ་སྙིང་རྗེའི་བདུད་ཞུགས་ཏེ༔ ཏིང་འཛིན་བཏང་ནས་གཞན་དོན་བྱ་བར་བརྩམས་པས་གཡེང་ནས་བདུད་ཞུགས་པ་དང་༔ ཡང་ནམ་མཁའ་ནས་སྒྲ་ཆོས་ཀྱི་ཚིག་སྣ་ཚོགས་སྟོན་པ་དང་༔ ཞིང་ཁམས་རྒྱན་གྱིས་བརྒྱན་པ་དང་༔ ཡིད་དུ་འོང་བའི་སྒྲ་ཐོས་པར་འགྱུར་ཞིང་ཏིང་འཛིན་བཏང་ནས་གླུ་གར་བྱེད་པ་དང་༔ གཞན་ལ་ངོམས་ཤིང་ངོ་མཚར་མགུ་བས་གཡེངས་ནས་བསླུ་བ་དང་༔ ཡང་ཉམས་དང་རྨི་ལམ་གང་རུང་དུ༔ འཇིགས་པའི་གཟུགས་སྣ་ཚོགས་མི་དགེ་བས་ངང་ལ་གནས་པར་སྡིག་པར་འགྱུར་པས༔ བསམ་གཏན་བཏང་ནས་མྱ་ངན་གྱིས་ནོན་པས་འཆི་བདུད་ཞུགས་ནས་བསླུ་བ་དང་༔ ལྕེབ་པ་སོགས་བྱེད་དོ༔ ཡང་དངོས་ཉམས་རྨི་ལམ་གང་རུང་དུ་ཡིད་འོང་གི་གཟུགས་བསྟན་ནས་དུས་གསུམ་ལུང་བསྟན་ཏེ༔ དང་པོ་ཐམས་ཅད་བདེན༔ བར་དུ་ཕྱེད་བདེན༔ ཐ་མ་ཐམས་ཅད་རྫུན་པར་འགྱུར་བས་བསླུ་བདུད་སྙིང་ལ་ཞུགས་པས་ལྟ་བའི་བདུད་བཞི་སྟེ༔ ངེས་དོན་འདུས་པ་ལས༔ སྣང་བ་འོད་དང་གྲགས་པ་སྒྲ༔ འཇིགས་པའི་གཟུགས་དང་བསླུ་བའི་བདུད༔ ཅེས་པས་དེ་དག་ནི་ཡུལ་གོལ་སར་མ་ཤེས་པས་ལན་པ་ཡིན་པས་ཡུལ་ཟིལ་གྱིས་གནོན་པར་བྱ་དགོས་སོ༔

གཉིས་པ་བསྒོམ་པའི་བདུད་ལ་གསུམ་ལས༔ འབྲས་བུ་ཐོབ་པ་ལ་རེ་ནས་དྲག་ཏུ་བསྒོམ་ཉེས་པས་གསལ་བའི་བདུད་ཞུགས་ནས༔ སྒོ་ལྔ་བྱིང་སྟེ་གཉིད་དུ་གཡུར་བ་དང་༔ འཐིབ་ཆའི་རྟིང་པ་དང་༔ རང་རིག་པའི་ཡེ་ཤེས་ངོས་མ་ཟིན་པའི་ཕྱིར་དང་༔ བདེ་བ་ཉམས་ཤིང་ངང་བསྒོམ་རྨུགས་པར་འགྱུར་བ་དང་༔ ལྷག་མཐོང་གི་དོན་དང་བྲལ་བས་བསྒོམས་ཀྱང་དོན་མེད་པ་དང་༔ ཡང་རྐྱེན་ཡུལ་འདུ་འཛི་སོགས་ལ་དགའ་བས་གཡེངས་ནས་ཏིང་ངེ་འཛིན་བཏང་བ་དང་དྲན་བསམ་སྣ་ཚོགས་པས་མི་རྟོག་པས་ཞི་གནས་མེད་པས་ཉོན་མོངས་འབྱུང་བ་དང་༔ ཡང་འཕྲོ་བ་རྐུན་བུའི་བདུད་གང་ཡང་རུང་བས་ཚིག་ཙམ་ཡིད་ལ་བྱས་ནས་མི་གཡོ་བས་ཉམས་དང་བྲལ་ཏེ་འོག་འགྱུ་ལང་ལོང་ཡང་ནས་ཡང་དུ་འབྱུང་བ་སྟེ༔ བདེ་བ་འཁོར་ལོའི་རྒྱུད་ལས༔ ཏིང་འཛིན་མྱུར་དུ་ཐོབ་འདོད་ན༔ སྒོ་ལྔ་བྱིང་བ་གསལ་བའི་བདུད༔ རྐྱེན་གྱི་རྒོད་པ་མི་རྟོག་བདུད༔ འཕྲོ་པ་མི་གཡོའི་བདུད་རྣམས་འབྱུང་༔ ཞེས་པས་དེ་ཐམས་ཅད་ཀྱང་གདམས་ངག་གི་ངེས་པའི་གདེངས་དང་མ་ལྡན་ཞིང་མེད་པའི་ལན་གྱིས་ཡིན་པས་གདམས་ངག་གིས་ཆགས་པ་བཅད་པར་བྱ་དགོས་སོ༔

གསུམ་པ་སྤྱོད་པའི་བདུད་ནི༔ རང་ཉིད་དབེན་པར་གནས་ན་འཁོར་འདུ་བ༔ ལོངས་སྤྱོད་འདུ་བ་ལ་སོགས་པའི་དབང་དུ་གྱུར་ནས་གཞན་གྱི་སེམས་བཟུང་སྟེ༔ ཟས་ནོར་འདོད་པ་དང་༔ གཞན་ལ་ཁ་ལེན་འདེབས་པས་གཡེངས་བས་བསླུ་པ་དང་༔ ཡང་རང་གི་གནས་ཡིད་དང་མཐུན་པར་ཉམས་དགའ་བའི་ཁང་བ་བརྩིགས་པ་དང་༔ དེ་ལ་ཆགས་ནས་གཞན་དུ་འགྲོ་དབང་མེད་པར་གནས་ལ་ཆགས་པའི་ཞེན་པ་སྐྱེ་བ་དང་༔ ཡང་གཞན་དོན་བྱང་ཆུབ་ཡིན་ཟེར་ནས་སྨན་བསླབ་བྱ་སློབ་པ་གནས་ལྔ་སོགས་ཀྱིས་གཡེངས་ན་བདུད་ཡིན་པ་དང་༔ ཡང་ཁོང་འཁྲུགས་ནས་འཁོར་ངན་ལ་བཀྱོན་པ་རྩུབས་པས་གཞན་གྱི་ལོག་ལྟ་བྱས་པས་སེམས་འཁྲུགས་ཏེ་བདུད་ཀྱི་བསླུ་བར་འགྱུར་རོ༔ དེ་སྐད་དུ་ཀུན་ཏུ་བཟང་པོ་ཡེ་ཤེས་ཀློང་གི་རྒྱུད་ལས༔ བྱ་བ་འདུ་འཛི་ལོངས་སྤྱོད་བདུད༔ ཉམས་དགའ་ཞེན་པ་གནས་ཀྱི་བདུད༔ བསླབ་པའི་ཡོན་ཏན་གཡེངས་པའི་བདུད༔ སེམས་འཁྲུགས་འཁོར་ངན་བདུད་རྣམས་འབྱུང་ཞེས་སོ༔ དེ་ལྟ་བུའི་སྤྱོད་པའི་བདུད་དེ་དག་ནི་འཇིག་རྟེན་ཆོས་བརྒྱད་ལ་ཆགས་པ་ལས་བྱུང་བས་ན་ཟིལ་གྱིས་གནོན་པར་བྱའོ༔

བཞི་པ་ཉམས་ཀྱི་བདུད་ལ་དྲུག་ལས༔ མཁའ་འགྲོ་མས་ལུང་སྟོན་པ་དང་༔ གཟུགས་སྟོན་པ་ནི་བསླུ་བ་མཁའ་འགྲོའི་བདུད་དོ༔ ཟབ་ཅིང་ཆ་ཕྲ་བའི་ཉམས་ཞི་གནས་སུ་ཆགས་པས་ལྷག་མཐོང་མེད་པའི་བདུད་ཞུགས་པ་དང་༔ རང་རིག་པའི་ཡེ་ཤེས་ཀྱི་རང་མདངས་སྐྱོང་བ་ལས་ཉམས་པ་དང་༔ ཡང་གཞན་ངོར་ཚུལ་འཆོས་ཀྱི་ཆོས་ལྟར་བཅོས་ནས་གཞན་བྲིད་པ་དང་༔ གསང་དོན་གྱི་གནད་འཁྱོགས་པོར་སྟོན་པ་དང་༔ དབང་གསུམ་པའི་དགའ་བཞིའི་བདེ་བ་ལ་ཞེན་པས་འདོད་སྲེད་ཀྱི་བདུད་ཞུགས་ནས་བསླུས་པ་དང་༔ ལུང་ལྡན་གྱི་རྣལ་འབྱོར་ལ་མཉམ་པར་རེ་ནས་འགྲན་པའི་ཕྱིར་དུ་སྨད་པ་དང་ཞེ་སྡང་གི་བདུད་ཞུགས་ཏེ༔ གཞན་ལ་སྐུར་པ་འདེབས་པས་རང་ལྟུང་བ་དང་༔ ང་རྒྱལ་ཆེན་པོ་བསྐྱེད་ནས་བཀའ་རྐུན་ལ་སོགས་པ་བྱེད་པ་དང་དྲུག་གོ༔ རྫོགས་པ་ཆེན་པོའི་དོན་འདུས་རང་བྱུང་བདེ་བ་འཁོར་ལོ་ལས༔ འཇིག་རྟེན་མཁའ་འགྲོའི་ལུང་སྟོན་བདུད༔ ཉམས་སུ་མྱོང་བ་ཞེན་པའི་བདུད༔ ཞེ་འདོད་ཚུལ་འཆོས་བདུད་དང་ནི༔ བསྐམ་ཆགས་བདེ་བ་བོགས་འདོན་བདུད༔ གདེངས་མེད་སྐུར་འདེབས་ཞེ་སྡང་བདུད༔ ང་རྒྱལ་སྒྲོ་འདོག་བདུད་རྣམས་འབྱུང་༔ ཞེས་སོ༔ དེ་ལྟ་བུའི་བདུད་རྣམས་ལྟ་བ་མ་རྟོགས་པའི་དབང་གིས་འབྱུང་བ་ནི༔ བདུད་བཅོ་བརྒྱད་པོའི་དེ་དག་ཇི་ལྟར་འདུལ་ན༔ ཟིལ་གནོན་བཅོ་བརྒྱད་ཀྱིས་འདུལ་བ་དང་༔ གསུམ་དུ་བསྡུ་བ་དང་༔ གཅིག་གིས་ཆོད་པར་འདུལ་པ་གསུམ་ལས༔ དང་པོ་ནི༔ གཟུགས་སྒྱུ་མའམ་གཟུགས་བརྙན་ལྟ་བུར་ཟིལ་གྱིས་མནན༔ སྒྲ་བྲག་ཆ་ལྟར་ཤེས་པས་ཟིལ་གྱིས་མནན༔ འཇིགས་པའི་གཟུགས་རྨི་ལམ་ལྟར་ཟིལ་གྱིས་གནོན༔ བསླུ་བའི་ཚིག་ཆོས་ཉིད་ཚིག་འདས་སུ་རྟོགས་པས་མནན་ནོ༔

བསྒོམ་པའི་བདུད་ནི༔ འཐིབ་ན་བླ་མ་བསྒོམ་ལ་ཡར་ཐུགས་ཡིད་བསྲེ༔ ལྟ་སྟངས་མཐོ་བར་བྱ༔ སེམས་ལྷོད་ཅིང་སྤྲོ་བ་དང་༔ ལུས་ཆུའི་འོལ་ཀ་ལ་བཟེད༔ རྡོ་ཐོག་ཏུ་བསྒོམ༔ ལྷག་མཐོང་རིག་པའི་ངར་བཏོན༔ རྨུགས་པ་བདེ་བའི་བདུད་བྱུང་ནའང་དེ་བཞིན་དུ་ཟིལ་གྱིས་མནན་ཏེ་རིག་པ་ལ་ལྟ་བས་སོ༔ རྒོད་པ་མི་རྟོག་གྱི་བདུད་བྱུང་ན་ལྟ་སྟངས་སྨད༔ ཞ་མགོ་ཐོག་ཏུ་བཞག༔ བླ་མ་རང་ལ་བསྟིམ༔ དལ་ཅིག་སྙིང་གར་ཐིག་ལེ་ལ་སེམས་བཟུང་པས་དང་༔ རང་རིག་འཕྲོ་རྒོད་མེད་པས་བསམ་གཏན་གྱི་རྟེན་ལ་གཏད་པས་སེལ་ལོ༔ འཕྲོ་བ་མི་གཡོ་བའི་བདུད་བྱུང་ན༔ ཡེ་ནས་མི་འགྱུར་བའི་རང་བྱུང་གི་ཡེ་ཤེས་ངོས་ཟིན་ནས་འོག་འགྱུ་བྱུང་མ་བྱུང་རྟོགས་པའི་དྲན་པས་མི་བརྗེད་པའི་གཟུངས་དང་ལྡན་པས་ཟིལ་གྱིས་མནན་ནོ༔

སྤྱོད་པའི་བདུད་ནི༔ འདུ་འཛི་ཏིང་འཛིན་གྱི་དགྲ་རུ་ཤེས་པས་འདོད་ཆུང་ཆོག་ཤེས་ཀྱིས་ཟིལ་གྱིས་མནན༔ ཡུལ་ཆགས་རི་དྭགས་ལྟ་བུའི་སྤྱོད་པས་ངེས་མེད་གཉན་ཁྲོད་འགྲིམས་ནས་ཟིལ་གྱིས་མནན་ཞིང་༔ ལྟ་བ་རང་རིག་ཡུལ་མེད་ཆེན་པོའི་གདེང་གི་ཟིལ་གྱིས་མནན༔ གཡེང་བདུད་རང་དོན་མ་འགྲུབ་པར་གཞན་དོན་མི་འགྲུབ་པར་ཤེས་ནས་གཞན་དབང་དུ་མི་གཏོང་བར་ཟིལ་གྱིས་མནན་ནོ༔ འཁོར་ངན་སེམས་འཁྲུགས་ལ༔ མཐར་ཐུག་འགྱེས་ཆོས་ཅན་འབྲེལ་བ་མེད་པ་དང་༔ གནས་སྐབས་འབྲེལ་བ་རང་བཞིན་གྱི་དགྲར་ཤེས་ནས་སྤངས་བར་བྱས་ཏེ་ཆགས་པ་གཅོད་པས་ཟིལ་གྱིས་མནན་ནོ༔

ཉམས་ཀྱི་བདུད་ནི༔ མཁའ་འགྲོའི་ལུང་བསྟན་ན་རང་རིག་འགྱུར་མེད་ལས་གཞན་དུ་ལུང་སྟོན་ན་བསླུ་བར་ཤེས་ནས་རེ་དོགས་མེད་པར་ཟིལ་གྱིས་མནན་པར་བྱའོ༔ ཉམས་མྱོང་རྐྱེན་གྱི་བདུད་བྱུང་ན༔ སྔ་ཕྱི་མེད་པའི་ཆོས་སྐུ་འགྱུར་མེད་ཏིང་འཛིན་གྱི་འགྱུར་མི་རུང་བའི་ཕྱིར༔ བདུད་དུ་ཤེས་ནས་ཞེན་མེད་ལྟ་བས་ཟིལ་གྱིས་མནན་ནོ༔ ཚུལ་འཆོས་ཀྱི་བདུད་བྱུང་ན༔ མ་བཅོས་རང་བྱུང་གི་དོན་དྲན་པས་ཆོས་སྐུའི་གདེང་གི་རྟོགས་པ་བཞག་པའི་རྣལ་འབྱོར་གྱིས་མནན་ནོ༔ བོག་དབྱུང་གི་བདུད་བྱུང་ན༔ རང་བྱུང་གི་རྟེན་མེད་པར་ཤེས་པས་དབང་ལ་མི་ལྟོས་པར་ལྷུན་གྱིས་གྲུབ་པའི་དོན་དྲན་ནས་རྒྱུ་རྐྱེན་གྱིས་འབྱུང་བར་འདོད་ནས་རྩོལ་བ་ཟིལ་གྱིས་མནན་ནོ༔ བདེན་མེད་སྐུར་འདེབས་ཀྱི་བདུད་ནི༔ ཆོས་སྐུ་སྒྲོ་སྐུར་དང་བྲལ་བའི་ལུང་ལྡན་ལ་གནོད་མི་ནུས་པའི་ཚུལ་ཤེས་པས་ཟིལ་གྱིས་མནན་ནོ༔

ང་རྒྱལ་སྒྲོ་འདོག་གི་བདུད་ནི་སྣོད་ངན་ལ་གསང་བ་མི་འཆལ་བ་དང་༔ གསང་དོན་ལ་གཅེས་སྤྲས་ཀྱིས་མི་བསླད་པར་ཟིལ་གྱིས་གནོན་པར་བྱའོ༔

གཉིས་པ་གསུམ་དུ་བསྡུས་ན་དེ་དག་ཀུན་ཀྱང་ཡུལ་དང་ཤེས་པས་བསྡུས་པའི་སྣང་བ་དང་ཆོས་བརྒྱད་ལ་བདེན་པར་བཟུང་ནས་དགག་བསྒྲུབ་ཀྱི་ལན་ཡིན་པས༔ ཕྱི་སྣང་བའི་ཡུལ་བཟང་ངན་བསྟོད་སྨད་ཐམས་ཅད་སྒྱུ་མའི་དཔེ་བརྒྱད་ལྟ་བུར་ཤེས་པས་དེ་ལ་ཐོབ་ཤོར་ལ་སོགས་པ་མེད་པར་རེ་དོགས་རང་སར་བཅད་དེ་ཟིལ་གྱིས་གནོན༔ དེ་ལྟར་སྣང་མཁན་ནམ་དགག་སྒྲུབ་མཁན་གྱི་སེམས་ཡང་བར་སྣང་གི་སེར་བུ་ལྟར་སྐད་ཅིག་ཆ་མེད་བྱུང་ཞིག་གི་ངོ་བོ་ངོས་བཟུང་གི་ཆོས་སུ་གྲུབ་པ་མེད་པར་ཤེས་ནས༔ དེ་གཅིག་རྗེས་གཅིག་ཞེན་དུ་མི་སྤྲོ་བར་ཟིལ་གྱིས་གནོན་པ་དང་༔ གསང་བ་རང་རིག་པའི་བདེ་ཆེན་ཡང་སྤྲོས་བྲལ་ཟང་ཐལ་ནམ་མཁའ་ལྟ་བུར་འཛིན་ཞེན་ནམ་དམིགས་པ་མེད་པར་ཟིལ་གྱིས་མནན་པ་སྟེ་གསུམ་པོ་འདིས་ཚར་ཕྱིན་ཏེ༔ ཕྱི་སྣང་བ་མེད་པའི་ཡུལ་གང་ལའང་དགག་སྒྲུབ་ཆགས་སྡང་འཛིན་ཞེན་བྲལ་བར༔ ནང་འཛིན་པ་མེད་པའི་ཡུལ་ཅན་གང་གིས་ཀྱང་དེ་དག་བྱེད་པོ་བྲལ་བར་གསང་བ་ཡེ་ཤེས་ཙམ་དུའང་གྲུབ་པ་མེད་པའི་དམིགས་གཏད་མཚན་མ་ཐམས་ཅད་ཧར་སངས་བས་དགོངས་པ་མངོན་དུ་གྱུར་དངོས་གྲུབ་རང་ལ་བརྙེས་པར་འགྱུར་རོ༔ སེངྒེ་རྩལ་རྫོགས་ལས༔ རྫོགས་ཆེན་གསང་སྔགས་ངོ་བོ་ཉིད༔ མཆོད་པའི་དངོས་གྲུབ་མི་འབྱུང་སྟེ༔ ཟིལ་གནོན་རྣམ་པ་གསུམ་ལ་ཐུག༔ ཅེས་དང་༔ ཡེ་ཤེས་ནམ་མཁའ་མཉམ་པ་ལས༔ ཆོས་ཉིད་རང་རིག་དོན་ཤེས་ན༔ དུག་ལྔ་ཡེ་ཤེས་རྩིས་ཟིན་པས༔ ཉོན་མོངས་རང་རྒྱུད་ཟིལ་གནོན་ཉམས༔ བ་མོ་ལ་ནི་ཉི་ཤར་འདྲ༔ སྣང་བ་ཆོས་དབྱིངས་ཉམས་མྱོང་ནི༔ སྒྱུ་མ་འདྲ་སྟེ་དངོས་པོ་མེད༔ ལྟ་བ་གདེང་ལྡན་ཉམས་མྱོང་བ༔ སྤྲིན་དང་ཆུ་བུར་ཉམས་མྱོང་འདྲ༔ ཞེས་སོ༔

གསུམ་པ་གྲོལ་བ་ཅིག་ཆོད་ཀྱིས་འདུལ་བ་ནི༔ དེ་ལྟ་བུའི་བདུད་དེ་དག་ཐམས་ཅད་ལྟ་བ་ཀློང་དུ་མ་གྱུར་བས་ལན་པས་ན༔ ཀུན་ཏུ་བཟང་པོ་ཀློང་གི་རྒྱུད་ལས༔ བདུད་ཀྱི་སྤྱོད་པ་བཅོ་བརྒྱད་ཀྱང་༔ ལྟ་བའི་བདུད་ཉིད་གཅིག་པུ་ཡིན༔ དེ་ཕྱིར་ལྟ་བ་དམན་པའི་བདུད༔ ཅེས་སོ༔ དེས་ན་ལྟ་བ་རང་རིག་པའི་ཡེ་ཤེས་ལ་འཁོར་བ་ཉིད་སྒྲིབ་པའི་ཚུལ༔ མྱང་འདས་ཉིད་ཡོན་ཏན་གྱི་ཚུལ་དུ་རྫོགས་པར༔ དེ་གཉིས་ཀྱང་མཐོང་བ་ཡང་ལོག་གི་ཚུལ་དུ་རྫོགས་པར་ཤེས་ནས་རེ་དོགས་དབྱིངས་སུ་གཅོད་པ་དང་བསམ་ན་བློ༔ བསྒོམ་ན་འཆིང་རྒྱ༔ དགག་ན་རྩོལ་བ༔ སྒྲུབ་ན་ཚི་ཆད༔ རྟོགས་ན་འཁོར་བ༔ བཞག་ན་གྲོལ་བའི་ཚུལ་ཤེས་པས་གདེངས་ཀྱིས་གང་བྱུང་མེད་སྣང་བསླུ་ཆོས་སུ་ཤེས་པས་ཟིལ་གྱིས་མནན་ནོ༔ དེའི་འབྲས་བུ་ཡེ་ཤེས་ཆོས་ཀྱི་སྐུའི་ངོ་བོ་ལྷུན་གྱིས་གྲུབ་པའི་དངོས་གྲུབ་ཐོབ་པར་འགྱུར་རོ༔ བདེ་བ་འཁོར་ལོ་ལས༔ ལྟ་སྒོམ་བདུད་ནི་དེ་དག་ཀྱང་༔ རང་བྱུང་ཆོས་སྐུ་འདི་རྟོགས་པས༔ གང་བྱུང་ཟིལ་གནོན་རང་བརླགས་པས༔ འབྲས་བུ་ཡེ་ཤེས་ལྷུན་གྱིས་གྲུབ༔ རྟོགས་ན་རང་བྱུང་ཆོས་སྐུ་ཡིན༔ དེ་ཕྱིར་དོན་དྲན་བདུད་མེད་པས༔ ཟིལ་གྱིས་མནན་པས་ཐབས་མི་དགོས༔ ཞེས་སོ༔

གསུམ་པ་དགོངས་པའི་ངོ་བོ་ནི༔ དེ་ལྟ་བུའི་ཐབས་དག་ལས་རང་ཤར་བ་སྟེ༔ རང་སེམས་སྙིང་པོ་ཆོས་ཀྱི་སྐུའི་གཤིས་ཐོག་ཏུ་སླེབ་པ་ལས་དམིགས་གཏད་མཚན་མའི་གཟུང་བྱ་མེད་དེ༔ མཉམ་བཞག་ཏུ་གཉིས་སྣང་མེད་པའི་ཅི་ཙམ་དུ་འཛིན་རྩོལ་བསྒོམ་དམིགས་ཡོད་རང་ལ་ཡང་དག་པ་མིན་ནོ༔ ཡེ་ཤེས་གཏིང་རྫོགས་ལས༔ རྫོགས་ཆེན་གོལ་ས་བཅད་པའི་ཕྱིར༔ ཡེ་ཤེས་བསྒོམ་མེད་དག་ཏུ་རབ་རྟོགས་ན༔ རང་སེམས་དོན་རྟོགས་སྙིང་པོ་ཆོས་སྐུ་ལས༔ བསྒོམ་བྱའི་ཡེ་ཤེས་ཆོས་སྐུ་གུད་ན་མེད༔ ཅེས་པ་ལྟར་རོ༔ དེ་ལྟར་བཞག་པའི་ཐོག་མར་ཞི་ལྷག་ཟུང་དུ་ཆུད་ནས་མཉམ་བཞག་གི་ཚེ་འཁོར་འདས་ཀྱི་ཆོས་ལ་རྟོག་དཔྱོད་ཀྱི་སྤྲོས་པ་དང་བྲལ་བར་གཉིས་འཛིན་རང་སར་གྲོལ་བ་ནི་སྣང་སྲིད་གཞིར་བཞེངས་ཀྱི་དགོངས་པ་གནས་ལུགས་དང་པོ་ཤར་བ་ཡིན་ལ༔ དེ་ནས་ཡང་སྤངས་རྟོགས་གཉུག་བསྲིང་སྟེ་གོམས་པས༔ བར་དུ་སྣང་སྲིད་གཞིར་བཞག་དུ་སོང་ནས་མཉམ་རྗེས་ཁྱད་མེད་དུ་གྱུར་སྒོམ་ཆེན་བསྒོམ་གྱིས་མི་གཏོང་བར་གདེངས་ཐོབ༔ ཡང་གོམས་མཐོང་ཇེ་བཟང་གི་ངེས་པས་ཁམས་གསུམ་ཡོངས་གྲོལ་དུ་འཆར་བས་འཁོར་བ་མིང་མེད་དུ་འགྱུར་བའི་གདེངས་ཐོབ༔ མཐར་ནི་ཡིད་ལ་བྱ་རྒྱུའི་ཆོས་ཐམས་ཅད་བོར་བ་དང་༔ ཡང་གོམས་པས་ཉོན་མོངས་པ་ཀུན་ནས་ལྡང་བའི་དྲི་མ་སྒོ་གསུམ་ལ་མངོན་གྱུར་དུ་མེད་པས་སྲིད་གསུམ་ཀ་དག་གི་དགོངས་པ་ཤར་བ་ཞེས་བྱའོ༔ འདི་ལ་ཁྱད་པར་ནི་སྔ་མ་ལ་མཉམ་བཞག་དུ་འཁྲུལ་སྣང་ཡོད་ཀྱང་ཆོས་ཉིད་ཀྱི་ངང་དུ་ལ་ཟློ་ཐུབ་པ་ཙམ་དང་༔ དེ་ནས་རྗེས་ཐོབ་དུའང་སོ་སོར་རྟོགས་པའི་ཤེས་རབ་དེའི་ངང་ཚུགས་མི་ཤོར་བ་དང་༔ དེ་ནས་མཉམ་བཞག་དུ་འཁྲུལ་སྣང་འཁྲུལ་འཛིན་འགགས་པ་དང་༔ དེ་ནས་མཉམ་རྗེས་གང་དུའང་སྲིད་གསུམ་ཀ་དག་འབའ་ཞིག་ཏུ་འཆར་བ་ཡིན་ནོ༔ རིན་པོ་ཆེ་སྤུངས་པ་ཡི་རྒྱུད་ལས༔ བཞག་ཐབས་མན་ངག་རྣམ་བཞི་ཡིས༔ རིག་པ་རྟེན་མེད་གནས་སུ་བཞག༔ དེ་དོན་དགོངས་པ་རྣམ་བཞི་ཡི༔ སྣང་སྲིད་ཆོས་ཀུན་གདར་ཤ་བཅད༔ དུས་ཚོད་གང་ཟག་རྣམ་བཞི་ཡིས༔ ཆོས་རྣམས་ཀུན་ལ་རང་བྱན་ཚུད༔ དག་ལུགས་གྲོལ་ལུགས་རྣམ་བཞི་ཡི༔ ཉོན་མོངས་རྣམས་ལས་རང་དབང་བསྒྱུར༔ ཞེས་སོ༔ གཞན་དུ་སྣང་བ་ཡུལ་གྱི་བློ་ཅན་ལ་ཚན་དུ་ཕྱེ་བས་བསྟན་ཀྱང་༔ རང་སྣང་གི་བློ་ཅན་ལ་མེད་པ་ནི་མ་ཡིན་ཏེ༔ བཞག་ཐབས་དང་གྲོལ་ལུགས་བཞིན་ནོ༔ འདི་ལས་གཞན་དུ་དགོངས་པ་དང་པོ་ལ་འཁོར་འདས་ཀྱི་ཆོས་ཐམས་ཅད་བློ་ཐོག་ཏུ་བུང་གི་ཤར་ནས་རྟོག་དཔྱོད་ཀྱི་གང་སྣང་ལམ་དུ་བྱས་དེ་གང་ལའང་ཐོགས་པ་མེད་པར་གྱུར་ནས་ཉོན་མོངས་ཤར་བ་དང་ཡེ་ཤེས་ཤར་བ་ཁྱད་མེད་པར་ཉོན་མོངས་ཡེ་ཤེས་སུ་གྲོལ་བར་ཕྱེད་ཐུབ་པས་མི་གནོད་པ་དང་༔ གཉིས་པ་ལ་གཞི་བཞག་དུ་སོང་ནས་རྟོག་དཔྱོད་ཀྱི་སྤྲོས་པ་ཡོད་དམ༔ སྤྲོས་པ་མེད་པའི་གཞི་དངོས་པོའི་གཤིས་ཀྱི་ངང་ལ་ལྷན་ནེར་གནས་ནུས་ནས་ཉོན་མོངས་རྩོལ་མེད་དུ་གྲོལ་ཐུབ་པ་དང་༔ དེ་ནས་དགོངས་པ་ཁམས་གསུམ་ཡོངས་གྲོལ་དུ་ཤར་ཏེ༔ རྟོགས་ལྡན་གྱི་ངོར་མ་གྲོལ་བ་ཆ་ཙམ་ཡང་མེད་པར་རྟོགས་པ་དང་༔ མཐར་གནས་འགྱུར་ཐོབ་ནས་ལས་ཉོན་བག་ཆགས་ཐམས་ཅད་མེད་པར་གྲོལ་བས་ཁམས་གསུམ་གྱི་མིང་ཙམ་ཡང་དག་པ་དང་བཞི་ལས༔

དང་པོ་ནི༔ མཉམ་བཞག་དུ་ཆོས་ཟད་ཀ་དག་གི་ངོ་བོ་མཐོང་བ་དང་༔ གཉིས་པ་ནི་མཉམ་རྗེས་འདྲེས་པ་ལ་ཕྱོགས་པས་རིག་པ་ཚད་ལ་ཕེབས་པ༔ གསུམ་པ་ནི་འདྲེས་ནས་ཡེ་ཤེས་ཀྱི་སྣང་ཉམས་གོང་དུ་འཕེལ་བ་དང་༔ བཞི་པ་ནི་འཁོར་བའི་གཤིས་ཉམས་དང་༔ ཤེས་པ་མཐར་འགྱུར་གྱི་ཉམས་ཐམས་ཅད་དག་པས་ཆོས་ཉིད་མངོན་སུམ་པས་གཤིས་ཐོག་ཏུ་ཕེབས་པ་ཡིན་ནོ༔ དེ་བས་ན་བཞི་པོ་དེ་དགོངས་པས་ངོ་བོར་བཟུང་ངོ་༔ ལར་མཉམ་བཞག་ཐུན་གཅིག་ལའང་དགོངས་ཀློང་དེ་དག་གི་ཤས་སུ་རྫོགས་པ་དང་༔ སྣང་བཞི་ཡང་རྫོགས་པའོ༔ མི་རྟོག་པ་དང་རྒོད་པ་མེད་པའི་ཞི་གནས༔ རིག་ཆ་སྤྲོས་བྲལ་གྱི་ངོ་བོ་ལས་མ་བྱིང་བས་ལྷག་མཐོང་དང་ལམ་རིག་སྐུ་བཞི་ཡེ་ཤེས་ལྔ་ལྡན་ཕ་རོལ་ཕྱིན་བཅུ་དང་ས་བཅུ་ལྷུན་གྱིས་གྲུབ་པའི་རང་བཞིན་དུ་བཞུགས་པ་ནི་དགོངས་པའི་ངོ་བོ་ཡིན་ནོ༔ སྔ་མ་ནི་ངོ་བོ་དེ་ཤར་རིམ་གྱིས་བཞག་གོ༔

གསུམ་པ་དེའི་དགོས་པའམ་ཡོན་ཏན་ནི༔ སྲིད་པ་ལྟོ་ནས་བསྒྱུར་བ་དང་༔ ཉོན་མོངས་ཇ་ལོག་ཏུ་སངས་རྒྱས་པས༔ དངོས་མེད་རྣལ་མ་ཐོབ་པ༔ རྒྱལ་བའི་དགོངས་པ་འདུས་པ་སྟེ༔ དང་པོ་ནི༔ ཕྲག་དོག་ཁྱི་དང་༔ འདོད་ཆགས་བྱ་དང་༔ ཞེ་སྡང་སྦྲུལ་དང་༔ གཏི་མུག་ཕག་རྣམས་ཡེ་ཤེས་ཀྱི་ཀློང་དུ་བསད་ནས༔ རང་བྱུང་གི་ཡེ་ཤེས་ཤེས་རབ་ལྔའི་རྩལ་དང་བཅས་པའི་མེ་སྤར་བས་སྲིད་པའི་མཚོ་བསྐམ༔ མ་རིག་པའི་མུན་པ་བསལ་ཏེ༔ སྐྱེ་མེད་ཀ་དག་རྗེན་པའི་རང་ཞལ་ཡང་དག་པར་རྟོགས་པ་ཡིས་སྲིད་པ་སྐྱེ་མེད་དུ་འགྱུར་བ་དང་༔ རྩལ་སྣང་ཐམས་ཅད་སྐྱེ་འགགས་འགྱུར་མེད་ཡེ་ཤེས་ཆེན་པོའི་ངང་དུ་གྲོལ་ལུགས་ཀྱི་གནད་བཞིའི་སྒོ་ནས་དང་པོ་ཉམས་སུ་བླངས་ཤིང་ལ་བཟློས་པས༔ མཐར་སྲིད་པ་སངས་རྒྱས་ཀྱི་དགོངས་པར་བསྒྱུར་ནུས་པ་སྟེ༔ དེ་ལྟ་བུའི་ཡོན་ཏན་དག་ཀྱང་བསྒོམ་མེད་ཡེངས་མེད་དུ་མཉམ་པར་བཞག་པས་འཐོབ་པར༔ བདུད་རྩི་རྒྱ་མཚོ་འཁྱིལ་བའི་རྒྱུད་ལས༔ སྲིད་པ་ལྟོ་བསྒྱུར་འདི་ལྟར་བསྒྱུར༔ ཁྱི་ཕག་བྱ་དང་སྦྲུལ་བསད་ལས༔ མེ་འབར་མཚོ་སྐེམས་མུན་པ་བསལ༔ སྐྱེ་མེད་ཀ་དག་རྟོགས་པ་ཡིས༔ སྲིད་པ་སྐྱེ་བ་མེད་པར་བསྒྱུར༔ སྐྱེ་འགགས་གཉིས་མེད་རང་གྲོལ་བས༔ སྲིད་པ་སངས་རྒྱས་དགོངས་པར་བསྒྱུར༔ ཞེས་སོ༔

གཉིས་པ་ནི༔ ཉོན་མོངས་པ་ཐམས་ཅད་རང་སར་གྲོལ་ནས་ཡེ་ཤེས་ལྔར་སངས་རྒྱས་པས་དུག་ལྔ་ཇ་ལོག་སྐུ་ལྔར་གྱུར་པ་ནི༔ དཔལ་རི་བོ་བརྩེགས་པ་ལས༔ དེ་ཡང་ཇི་ལྟར་འགྱུར་ཞེ་ན༔ གཏི་མུག་ཇ་ལོག་ཆོས་སྐུར་གྱུར༔ ཞེ་སྡང་ཇ་ལོག་ལོངས་སྐུར་འགྱུར༔ འདོད་ཆགས་ཇ་ལོག་སྤྲུལ་སྐུར་འགྱུར༔ ང་རྒྱལ་ཇ་ལོག་མཉམ་པ་ཉིད༔ ཕྲག་དོག་ཇ་ལོག་བདེ་ཆེན་སྐུ༔ ཞེས་སོ༔

གསུམ་པ་དངོས་མེད་ཐོབ་པ་ནི༔ སྒོ་གསུམ་རྩོལ་མེད་དུ་བཞག་ལ༔ ལྟ་སྒོམ་སྤྱོད་པ་སྤང་ལེན་བསལ་བཞག་མེད་པར་དངོས་མེད་ཡེ་ཤེས་བློ་འདས༔ གསལ་སྟོང་སང་ངེ་སལ་ལེ་དངོས་མཚན་མེད་པ༔ བསམ་རྟོགས་ལས་འདས་པ༔ ཟང་ཀ་མའི་ངང་དུ༔ ཡུལ་གང་ལའང་འཛིན་རྟོག་མེད་པར༔ ཡིད་རིག་དྲན་བསམ་ལས་འདས་ཤིང་ཞེ་འདོད་རྩིས་གདབ་མེད་པར་བཞག་པས་དངོས་མེད་རྣལ་མ་ཐོབ་པ་ནི༔ དྲི་མེད་ཀ་དག་གི་རྒྱུད་ལས༔ ལུས་ངག་ཡིད་གསུམ་རྩོལ་བཞག་ལ༔ མི་བལྟ་མི་བསྒོམ་སྤྱོད་ཐོབ་མེད༔ དངོས་མེད་ཡེ་ཤེས་བློ་ལས་འདས༔ གསལ་སྟོང་ང་ལ་མི་འབྲལ་བ༔ སང་ངེ་སལ་ལེ་དངོས་མཚན་མེད༔ གང་ཡང་མི་རྟོག་བསམ་ལས་འདས༔ དངོས་མེད་རྣལ་མ་ཟང་ཀ་ལ༔ གང་ལ་སེམས་མེད་འཛིན་རྟོག་མེད༔ ཡིད་རིག་དྲན་བསམ་བློ་ལས་འདས༔ ཞེ་འདོད་རྩི་གདབས་མེད་པའི་ཐོབ༔ ཐོབ་པའི་དུས་ན་དངོས་མེད་བློ་ལས་འདས༔ སྣང་སྲིད་ཆོས་ལ་དབྱེ་བསལ་འདས༔ ཞེས་སོ༔

རྒྱལ་བའི་དགོངས་པ་ཟིན་པ་ནི༔ རྒྱལ་བ་ཐམས་ཅད་ཀྱི་དགོངས་པ་འདུས་པ་དང་༔ དེ་ལ་བཞག་པས་དགོངས་ཀློང་དུས་གཅིག་ལ་ཟིན་པ་ནི༔ དེ་ཉིད་ལས༔ ཆོས་ཉིད་རྣམ་པར་དག་པས་ན༔ ཆོས་ཀུན་རང་བཞིན་ཀ་ནས་དག༔ དེ་བཞིན་གཤེགས་པ་ཐམས་ཅད་ཀྱི༔ ཐུགས་ཀྱི་ཡང་བཅུད་འདིར་འདུས་བས༔ དགོངས་པའི་མདོ་རྣམས་གཅིག་བསྡུས་པས༔ ཡེ་ནས་ཟིན་པ་སོགས་སོ༔ རང་ཤར་ལས༔ རང་བྱུང་རིག་པའི་དོན་རྟོགས་ན༔ སངས་རྒྱས་མ་བསྒོམ་གཅིག་ཀྱང་མེད༔ ཅེས་སོ༔

དེ་དག་གི་སྒོམ་ལམ་དུ་གོང་ནས་གོང་དུ་སྤེལ་བའི་གདམས་ངག་རྫོགས་ནས༔ ད་ནི་མཐར་ཕྱིན་པའི་ལམ་དུ༔ ཤར་གྲོལ་སྤྲུལ་པ་སྐུའི་ཡེ་ཤེས་དེ་ཉིད་གོང་དུ་འཕེལ་ནས་ལོངས་སྐུ་ཡོངས་གྲོལ་ཀ་དག་ལ་ཐིམ་པ་ན་མི་འཇིགས་པའི་གདེངས་ཆེན་བཞི་ཐོབ༔ དེ་ནས་ཤེས་སྒྲིབ་ཕྲ་བ་ཡན་ཆད་རྡོ་རྗེ་ལྟ་བུའི་ཏིང་ངེ་འཛིན་གྱིས་མཐར་བྱས་ཏེ་སངས་རྒྱས་ཀྱི་ས་དྲུག་མངོན་དུ་གྱུར་པའི་བར་ནི་མཐར་ཕྱིན་ལམ་དུ་བཞེད་དོ༔ དེ་ལྟ་ན་ལྷུན་གྲུབ་རིག་འཛིན་མདོ་ལམ་གྱི་ས་བཅུ་གཅིག་པ་མི་སློབ་པའི་ལམ་སྣང་སྐུ་ལྔ་ལྷུན་གྲུབ་རྡོ་རྗེ་འཆང་གི་ཆ་ལུགས་འཛིན་པ་བྱ་བ་རྫོགས་པའི་སྤྲུལ་སྐུའམ་བསོད་ནམས་བསགས་པའི་ཆོས་སྐུ་ཞེས་བྱ་བ་དེ་ནང་དབྱིངས་གདོད་མའི་ཀ་དག་དུ་དབྱེར་མེད་པར་འདྲེས་པ་ནི་མཐར་ཐུག་གི་འབྲས་བུ་སྟེ༔ ལམ་གྱུར་གྱི་འབྲས་བུ་མཐར་ཐུག་པ་ནི་མཐར་ཕྱིན་ལམ༔ འབྲས་བུ་མཐར་ཐུག་ནི་ཁྱད་ཆོས་དྲུག་ལྡན་གཞོན་ནུ་བུམ་པའི་སྐུ་བརྙེས་པར་བཟུང་བར་བྱའོ༔

དེ་ལྟར་ཚིག་ཉུང་དོན་འདུས་སྙིང་པོའི་བསྟན༔ རབ་ཏུ་གསལ་བྱེད་ཆོས་ཉིད་དོན་གསལ་འདི༔ མན་ངག་སྡེ་གསུམ་ཐིག་ལེར་བཅས་པའི་གནད༔ རྒྱ་མཚོ་ཆེན་པོར་ཆུ་ཕྲན་འདུ་བ་བཞིན༔ སྤྲོས་པའི་ཚིག་གིས་མང་པོར་བྱས་པ་རྣམས༔ དཔེ་ཆར་ལུས་ཤིང་ཉམས་སུ་མི་འཆུན་པས༔ ཁོང་སྙིང་སྡེབ་པོ་པདྨ་ཀ་རའི་ལུགས༔ གཞན་ལ་ཉམས་མྱོང་སྲོག་གི་དབུལ་པོར་ཡོད༔ ཀྱེ་ལགས་མང་ཐོས་བསྒོམ་པའི་སྙིང་པོ་ནི༔ གཅིག་ཏུ་མ་བརྟན་གཞར་འདེབས་ཆུ་ཤིང་ལས༔ དཔག་བསམ་ལྗོན་པའི་འབྲས་བུ་བཟར་འདོད་པ༔ ཐོབ་ཤོར་མེད་པས་ཚིག་ཆད་ཡི་མུག་དགོད༔ དེ་ཕྱིར་སྒྲུབ་བརྒྱུད་རང་ལུགས་དྲི་མ་མེད༔ གཞུང་མང་ཚིག་འཁྲིའི་ཚོལ་བས་བསྒྲིབ་བསྒྲིབ་ནས༔ འཆི་ཁ་བྲང་ལག་འཐམ་ནས་མཆི་མ་དཀུ༔ དེ་ལས་ཕ་ཁྱིམ་བུ་འགྲོའི་རྣལ་འབྱོར་སྐྱིད༔ བཤད་ཡང་སྙན་སྙན་གྲགས་པའི་རྔ་སྟོང་ལྡིར༔ ང་རྒྱལ་དཔང་མཐོའི་རི་བོའི་སྤོ་ལ་འགྱིང་༔ མི་རྟག་འཆི་བ་དྲན་ནས་མ་ཎི་ཙམ༔ ཁ་ཏོན་ཆགས་མེད་མ་མྱོང་སྙིང་རྗེའི་གནས༔ ལྟ་བའི་སྙིང་པོ་ཁོ་ལ་ཡོད་དོ་སྐད༔ སྡང་ཞུགས་ཙམ་གྱི་ཁ་ནས་མ་བྲི་བའི༔ དགེ་སློང་དེ་འདྲ་གྲུབ་མཐའ་འཛིན་པའི་རིགས༔ བདག་ཕྱོགས་ཆགས་པའི་ཁ་སྐྱོང་མ་གཡེལ་ཙམ༔ ཁྱད་པར་སྭཱ་མཾ་ཡ་ནཾ་ཀརྟ་ཀ༔ སྟོང་ལྟ་འཆད་དང་བྷ་སིང་ཧསྟ་ཡིས༔ རྟག་པར་ལྟ་བ་སྔགས་ཀྱི་སྒྲོལ་བའི་མཐུ༔ མ་སྨད་པདྨའི་ཕོ་ཉའི་ཕྲན་གཏེར་བ༔ ག་ག་ཨ་བྷྱེས་ཡང་ཏིའི་རང་སྲོག་ནི༔ དོན་ལ་རྣལ་འབྱོར་བྱེད་པས་འཛིན་པར་ངེས༔ དེ་དུས་ཚིག་གི་སྤུན་ལ་རྟོགས་ཡོད་ཀྱང་༔ ལྟ་བ་ཀློང་ཡངས་ངང་དུ་བཟོད་པར་མཛོད་ས་མ་ཡཱ༔ རྒྱ་རྒྱ་རྒྱ༔ སྐུ་གསུང་ཐུགས་ཡེ་ཤེས་རྡོ་རྗེའི་ཟབ་གསང་སྦས་གཏད་སྨོན་ལམ་དབང་བསྐུར་གྱི་རྒྱ་རྒྱ་རྒྱ༔ དགེའོ། །དགེའོ། །དགེའོ། །སརྦ་མངྒ་ལཾ། །