ཁྲེགས་ཆོད་ཀྱི་གཟེར་ཡིག་གནད་གྱི་མེ་བཙའ།
ཁྲེགས་ཆོད་ཀྱི་གཟེར་ཡིག་གནད་གྱི་མེ་བཙའ་བཞུགས་སོ། །
ཁྲེགས་ཆོད་ཀྱི་གནད་དུ་ཐོག་མར། ཕྱི་ནང་སྣོད་བཅུད་ཐམས་ཅད་སེམས་ཀྱིས་བཟོས་པའི་འཁྲུལ་སྣང་། མེད་པ་སྟོང་གཟུགས། རབ་རིབ་དང་སྐྲ་ཤད། སྒྱུ་མའི་དཔེ་བཅུ་ལ་སོགས་པ་ལྟར་སྣང་སྟོང་ཟུང་འཇུག་ཕྱི་ནང་བདེན་གྲུབ་ཀྱི་དངོས་པོ་མེད་པར་ཐག་ནང་ནས་ཆོད་དགོས། དེ་ལྟར་བཟོ་བྱེད་ཀྱི་མཁན་པོ་སེམས་ཉིད་ཀྱང་། བྱུང་གནས་འགྲོ་གསུམ་ཡུལ་དང་མཁན་པོའི་སྟོང་བས། གཟུགས་དབྱིབས་ཁ་དོག་སོགས་མཚན་མ་ཐམས་ཅད་དང་བྲལ་བར་བརྟགས་དཔྱད་གོམས་འདྲིས་མི་དམན་པར་ཐག་ནང་ནས་ཆོད་པ་ཞིག་དགོས། འོན་ཀྱང་སྟོང་ཉིད་ཆད་མཐའ་རུ་མ་ལྷུང་བར་རང་མདངས་འགགས་མེད་ལ། ངོ་བོ་སྟོང་པ་དང་ཡེ་ནས་ཟུང་དུ་འཇུག་པའི་སྣང་སྟོང་རིས་མེད་མཉམ་པ་ཆེན་པོ། ངོས་བཟུང་གི་མཚན་མ་ཐམས་ཅད་ལས་འདས་པ། གཡོ་བྱེད་རྣམ་རྟོག་གི་རླུང་རང་སར་དེངས་པ། དམིགས་གཏད་གཟུང་འཛིན་ཆེད་དུ་བློས་བྱས་ཐམས་ཅད་དང་བྲལ་ཞིང་། རྟོག་བྲལ་རང་གསལ་ཟང་ཐལ་རྗེན་པའི་ཡེ་ཤེས་སུ་ཤར་བ་ཉིད་ནི། ཐོག་མའི་སངས་རྒྱས་ཀུན་ཏུ་བཟང་པོའི་དགོངས་པ་མ་འཁྲུལ་བ་རང་ལ་གནས་པའི་དེ་བཞིན་ཉིད་ཅེས་བྱའོ། །དེ་ངོ་ཤེས་ནས་དེས་ངང་ལས་བློ་དང་ཡིད་དཔྱོད་ཀྱིས་མ༵་བཅོ༵ས། ཚོགས་དྲུག་གི་ཡུལ་ལ་ཕྱིར་མ༵་ཡེང༵ས། འགྱུ་བྱེད་གཟུང་འཛིན་གྱི་རྣམ་པར་རྟོག་པས་མ༵་བསླད༵། ནང་སེམས་གནས་ཀྱི་ངོ་བོ་ལ་འདི་དང་འདིའོ་སྙམ་ནས་ཆེད་དུ་མ༵་བཟུང༵། རྣམ་རྟོག་སྐྱོན་དུ་བལྟས་ནས་དགག་པར་རྩོམ་པའི་རྩོལ་བ་སྤངས་བས་མ༵་དག༵ག །སྣང་སྟོང་ཞི་ལྷག་ཕྱོགས་རེ་ནས་བཞག་པའི་བསྒོམ་པའི་འོད་གསལ་བ་མ༵་བསྒྲུབ༵་པའི། གནད་ཀྱི་གཟེར་བུ་ཆེན་པོ་དྲུག་གིས་མངོན་སུམ་རང་ཐོག་ལས་མི་འཆུགས་པར་གདམས་པའི་ལ་བཟློ་བའམ་ཐག་གཅིག་ཐོག་ཏུ་བཅད་པ་སྒོམ་པའི་གནད་ཟིན། རྗེས་ཐོབ་ཀྱི་དུས་སུ་རྣམ་རྟོག་གང་ཤར་ཐམས་ཅད་ངོ་བོ་ཡེ་སྟོང་འཆིང་བྱེད་མེད་པར་ཡེ་ནས་གྲོལ་བར་ཤེས་པའི་གདེངས་དང་ལྡན་པའམ། སྣང་ཆ་ཅེར་གྲོལ་ཚུག་ཐུབ་དུ་གྲུབ་པ་མེད་པར་ཤེས་པའི་གདེངས་དང་གྲོལ་བྱེད་ཀྱི་གཉེན་པོ་གཞན་མ་དགོས་པར་བཞག་པས་རང་གྲོལ་དུ་འགྲོ་བ་ཤེས་པའི་གདེང་དང་། འོད་གསལ་རིག་སྟོང་ཐིག་ལེ་ཉག་གཅིག་གི་ངང་ལ་བཞག་པས་ཀུན་གྲོལ་བར་ཤེས་པའི་གདེང་གང་རུང་གིས་སྤྱོད་པས། མཉམ་རྗེས་ཀྱི་དགོངས་པ་དབྱེར་མེད་དུ་འདྲེས་ནས་གདེང་གྲོལ་ཐོག་ཏུ་འཆོས་པར་འགྱུར་རོ། །དེ་ལྟ་བུའི་བསྒོམ་སྤྱོད་པའི་གནད་ཀྱིས་གཞི་ཇི་བཞིན་པ་མངོན་དུ་གྱུར་ནས། རང་ཐོག་རང་ས་ཟིན་ཞིང་། རང་ལ་རང་གདེང་ཐོབ་པས་གཞི་ཉིད་འབྲས་བུར་སྨིན་པའི་སངས་རྒྱས་སྐུ་གསུམ་ཕྱིར་མི་ལྡོག་པའི་ཚད་དང་ལྡན་པར་འགྱུར་རོ། །ཁྲེགས་ཆོད་ཀྱི་གཟེར་ཡིག་འཇིག་དགའི་ངོར་ག་གཱ་ཨ་བྷྱེས་སོ། །