སྣང་སྟོང་གི་ལམ་བསྒོམ་པ་ཉིན་མཚན་ཁ་སྦྱོར་དུ་བྱེད་པའི་གདམས་ངག་འོད་གསལ་འཁོར་།

སྣང་སྟོང་གི་ལམ་བསྒོམ་པ་ཉིན་མཚན་ཁ་སྦྱོར་དུ་བྱེད་པའི་གདམས་ངག་འོད་གསལ་འཁོར་ལོ་ཞེས་བྱ་བ་བཞུགས་སོ༔

དེ་ལ་འདིར་ཉིན་མོ་འོད་གསལ་གྱི་གདེང་གཉིས་ཀྱིས་སྣང་བ་ལ་མཉམ་པར་བཞག་ཀྱང་༔ མཚན་སྣང་དང་བསྲེ་མ་ཤེས་ན་དུས་སུ་མི་སྟོངས་པའི་ཕྱིར༔ དེའི་ཐབས་ལ་རྒྱས་པར་ནི་རྨི་ལམ་གྱི་རྣལ་འབྱོར་དང་འོད་གསལ་གྱི་རྣམ་འབྱོར་གཉིས་ཡིན་ཡང་འདིར་ཐོད་རྒལ་སྤྱི་ལ་བསྟུན་ནས་འཁྱེར་བདེ་བར་ལམ་དུ་བྱེད་ན༔

དང་པོ་གཉིད་འོད་གསལ་དུ་སྦ་བ་ནི༔ ཕྱི་ནང་གསང་གསུམ་སྟེ༔ ཕྱི་ལྟར་ན་འདུན་པའི་སྒོ་ནས་འོད་གསལ་འཆར་པ་ངོས་ཟིན་པར་བྱའོ་སྙམ་དུ༔ ཐོག་མར་གཡུ་འབྲུག་ཐུར་དབབ་ཀྱིས་ནམ་མཁའི་རྣལ་འབྱོར་སྒོམ་པ་ཞེས་བྱ་སྟེ༔ རླུང་སྦྱོར་བསྒོམ་ནས་གསལ་སྟོང་མི་རྟོག་པའི་ཡེ་ཤེས་ལ་མཉམ་པར་བཞག་གོ༔ དེའི་ངང་ལས་གཉིད་པའམ༔ ཡང་ན་ནང་ལྟར་དུ་གཏུམ་མོའི་མེ་སྦར་བ་ལ་སྟེ༔ ལུས་དབུས་སུ་རྩ་གསུམ་འཁོར་ལྔ་གསལ་ཞིང་༔ ལྟེ་བའི་འོག་གི་སོར་བཞིའི་ཐད་དུ་ཨ་ཤད་དམ་ཐིག་ལེ་དམར་པོ་གསལ་བ་ལས་མེ་འབར་བས་སྤྱི་བོའི་ཧཾ་ལ་རེག་པས་ཧཾ་ལས་བདུད་རྩིའི་ཐིག་པ་བབས་པ་དང་བསྣོལ་མའི་རྒྱུད་ལ་སེམས་བཟུང་བ་ན་སེང་ཕྲུག་རྩལ་སྦྱོང་གི་གནད་ཅེས་བྱའོ༔ དེའི་བདེ་སྟོང་གི་འོད་གསལ་འཆར་བར་འགྱུར་བས་དེ་ལས་མ་ཡེངས་པར་གཉིད་དུ་ཕྱོགས་པ་དང་༔ གསང་བ་ཉི་ཟླ་ཁ་སྦྱོར་གྱི་དགོངས་པས་སྦྱང་བ་ནི༔ དེ་ནས་མེ་དང་ཐིག་ལེ་ཆེར་མཆེད་དེ༔ ལུས་ཡུལ་གྱི་དངོས་འཛིན་ཐམས་ཅད་བསྲེགས་ཤིང་འོད་ལུས་ཀྱང་ནང་དུ་སྙིང་ཀའི་འཁོར་ལོ་དཀར་དམར་རམ་མེ་ཆུ་ཁ་སྦྱོར་དུ་ཡོད་པའི་དབུས་སུ་སེམས་ཀྱི་ངོ་བོ་ཕྱི་གསལ་ནང་གསལ་གྱི་ཐིག་ལེ་ཤེལ་སྒོང་ལྟ་བུ་གཅིག་བསྒོམ་པ་ལས་མ་ཡེངས་པར་སེམས་བཟུང་བས་འོད་གསལ་སྣང་སྟོང་རིགས་གསུམ་དབྱེར་མེད་པའི་བདག་ཉིད་འཆར་བའི་འཕྲུལ་གསང་བླ་ན་མེད་པའོ༔

གཉིས་པ་ཤེས་བྱ་བུམ་པར་བསྡུ་བ་ནི༔ ཕྱི་ནང་གསང་གསུམ་ལས༔ ཕྱི་དབྱིངས་སྣང་འོད་ཟེར་གྱི་དྲྭ་བར་གཟུད་པའི་མན་ངག་ནི༔ ནམ་ཕྱེད་གྱེན་དུ་ལང་སྟེ༔ དྲང་སྲོང་གི་འདུག་སྟངས་སུ་བྱས་ལ་ལུས་པོ་ཉེད་ཉེད་པོར་གཅུན་ཏེ༔ སྟེང་རླུང་མནན་པས་བདེ་ཆེན་དང་ལོངས་སྤྱོད་འཁོར་ལོའི་རྩ་འདབས་སུ་ཡེ་རླུང་འཕྲོས་པ་དབུ་མར་བསྡུ༔ འོག་རླུང་བསྐུམ་སྟེ༔ སྙིང་གར་རླུང་བཟུང་བས་བདེ་སྐྱོང་དང་སྤྲུལ་འཁོར་གྱི་རྩ་འདབ་ཀྱི་ཡེ་རླུང་དབྱིངས་རྣམ་དག་གི་སྒྲོན་མའི་ཆ་ཐམས་ཅད་དབུ་མར་བསྡུས་ལ༔ སྙིང་གསེར་གྱི་རྩ་ཆེན་གྱི་དྲྭ་ཕྱེད་མིག་མང་རིས་སུ་བྲིས་པའི་དབྱིངས་ཀྱིས་གང་བར་མོས་ཤིང་༔ གཉིད་དུ་ཕྱོགས་པས་རླུང་ལྔ་དབྱིངས་སུ་འཆིང་ནས་རང་བཞིན་གསལ་བའི་འོད་གསལ་ཟིན་པར་འགྱུར་རོ༔ གཉིས་པ་ཐིག་ལེ་རང་མལ་དུ་བསྐྱལ་བའི་མན་ངག་མགྲོན་པོས་རང་ཡུལ་སྙོགས་པ་ལྟ་བུ་ནི༔ རྩ་ཁམས་ཀྱི་ཐིག་ལེ་རྣམས་འཁོར་དབུས་ཀྱི་ཨེ་ཡཾ་བཾ་ལཾ་རཾ་རྣམས་ལ་འདུས༔ དེ་དག་གི་འོད་ཀྱིས་ལུས་ཐམས་ཅད་ཁྱབ་པར་དམིགས་ལ༔ ཀུན་ཀྱང་ཡས་མན་སྡུད་རིམ་གྱིས་སྙིང་ཀའི་ཨེ་ལ་ཁ་སྦྱོར་ཞིང་ཐིག་ལེ་སྟོང་པའི་སྒྲོན་མ་རྨ་བྱའི་སྒོ་ང་ལྟ་བུ་ནང་སྟོང་པ༔ ཕྱིའི་འོད་ཟེར་གྱིས་ལུས་ཐམས་ཅད་ཁྱབ་པ་ཞིག་དབྱིངས་རང་མལ་གྱི་དྲྭ་བའི་ཁྱིམ་དུ་གནས་པར་བསྒོམ་ལ༔ དེ་ལས་མ་ཡེངས་པར་བྱས་པས་ཐུགས་རྗེ་ཀུན་ཁྱབ་ཀྱི་ཡེ་ཤེས་ཟིན་པར་འགྱུར་རོ༔ གསུམ་པ་སྐུ་རྡོ་རྗེ་བུམ་པ་རིན་པོ་ཆེའི་དགོངས་པའམ༔ བརྫུས་སྐྱེས་པདྨོའི་མངལ་གནས་ཀྱི་དགོངས་པས་འོད་གསལ་མ་བུ་སྤྲོད་པ་ཞེས་བྱ་སྟེ༔ ཐིག་ལེའི་ཁང་བའི་དཀྱིལ་དུ་བླ་མ་ཀུན་བཟང་ཡབ་ཡུམ་ཆོས་སྐུའི་ཆ་ལུགས་ཅན་གཅིག་བསྒོམ་པའི་ཐུགས་ཀར་ཨཱཿམཐིང་ཀ་འོད་དང་འོད་ཟེར་འབར་བ་གཅིག་གསལ་ལ༔ ལུས་ཀྱིས་དབྱིངས་མི་བསྒྲིབ༔ དབྱིངས་ཀྱིས་ཏི་ལ་ཀ་མི་བསྒྲིབ༔ ཐིག་ལེས་སྐུ་མི་བསྒྲིབ༔ སྐུས་ཡི་གེ་མི་བསྒྲིབ་པས་མི་བསྒྲིབ་རྣམ་བཞིའི་འོད་ཟེར་གྱི་གོང་བུར༔ ལུག་རྒྱུད་ཀྱི་རྣམ་པར་ཕྲ་ཞིང་འཁྱོགས་པ་མར་མེ་བཞིན་པར་སེམས་བཟུང་ལ་གཉིད་པས་ཟུང་འཇུག་ངོ་བོ་ཉིད་སྟོང་པ་ཆེན་པོའི་འོད་གསལ་ཟིན་པར་འགྱུར་རོ༔ འདི་ལ་ཅིས་ཕྱིར་ཤེས་བྱ་བུམ་པར་བསྡུ་བ་ཞེ་ན༔ ཕྱིའི་སྣང་བའི་ཁམས་གསུམ་སྒོ་གསུམ་ལས་མེད་པར་ཐག་ཆོད་ཅིང་གཉིད་ཀྱིས་ཅུང་ཟད་ནོན་པ་ན༔ ཕྱི་ཡུལ་གྱི་རྟོག་པ་ནང་དུ་བསྡུས་པའི་ཕྱིར་དང་༔ ཡེ་ཤེས་ཀྱི་རླུང་ལུས་ལ་བྱེར་བ་ཐམས་ཅད་རྩ་བའི་རྩ་བའི་རླུང་འོད་ཟེར་ལྔ་བ་ལ་བསྡུ་བའི་ཕྱིར་དང་༔ ཐིག་ལེ་མ་ལ་བསྡུ་བའི་ཕྱིར་དང་༔ སྐུ་ནང་གསལ་གཞོན་ནུ་བུམ་པ་ཡེ་ཤེས་གཞི་གནས་ཨ་ཡིག་གིས་བསྡུས་པ་ལ་ཤེས་བྱའི་བློ་ཡི་དམིགས་པ་བསྡུ་བའི་ཕྱིར་རོ༔

གསུམ་པ་ཐོ་རངས་འབྱུང་ཁམས་དག་སྦྱོར་ནི༔ མལ་ནས་ལང་སྟེ་རླུང་རོ་ལན་གསུམ་སྤྲུགས་པའི་རྗེ་ས་སུ་ཆོས་སྐུའི་བཞུགས་སྟངས་ཀྱིས་གནས་པའི་སྙིང་ཀའི་བུམ་སྐུ་ལས་ཨ་མཐིང་གཅིག་སྨིན་མཚམས་ཐད་ཀྱི་ནམ་མཁའ་ལ་སྤྲོས་པ་ཀུན་ཏུ་བཟང་མོ་གཅེར་བུ་མཉམ་བཞག་གི་ཕྱག་རྒྱ་ཅན་ཞིག་དུ་བསྒོམ་པའི་ཐུགས་ཀའི་འོད་ཀྱིས་འབྱུང་བ་ནམ་མཁའི་ཁམས་ཐམས་ཅད་འོད་མཐིང་གི་རྣམ་པར་ཁྱབ་སྟེ༔ འོད་དེ་ཇེ་ཆུང་ལ་འུབ་འདུས་ནས་བཟང་མོའི་ཐུགས་ཀར་ཐིམ་པས་ནམ་མཁར་འཛིན་པའི་རྟོག་སྒྲིབ་ཐམས་ཅད་ཡུམ་ཆེན་མོའི་རང་བཞིན་དུ་སངས་རྒྱས་པར་མོས་ཤིང་༔ སྐུ་ལ་ཅི་གནས་སུ་སེམས་བཟུང་བའི་བྱིན་རླབས་ཀྱིས་ཟླ་བ་གཅིག་ན་ཆོས་ཀྱི་དབྱིངས་ཀྱི་ཡེ་ཤེས་འཆར་རོ༔ ཡང་དེ་གྲུབ་པ་ན༔ སངས་རྒྱས་སྤྱན་དང་༔ མ་ཀི༔ གོས་དཀར༔ དམ་ཚིག་སྒྲོལ་རྣམས་ཀྱི་ཐུགས་ཀ་ནས་རང་མདོག་གི་འོད་ཟེར་འཕྲོས་པས་འབྱུང་བ་ལྷག་མ་འོད་དུ་སྡུད་དེ༔ ཡུམ་བཞི་ལ་ཐིམ་ཞིང་༔ དེའི་རང་བཞིན་དུ་སངས་རྒྱས་པར་བསྒོམ་པས་ཞག་བཅོ་ལྔ་རེ་ནས་སོ་སོའི་རྟོག་སྒྲིབ་དབྱིངས་སུ་དག་སྟེ༔ ཡུམ་ལྔའི་གོ་ལ་སྦྱོར་བས་འབྱུང་བ་རང་ཟད་ཀྱི་དགོངས་པ་འུབ་ཆུབ་ཆེན་པོ་ཞེས་བྱ་སྟེ་གནད་ཤིན་ཏུ་ཟབ་མོའོ༔ བར་སྐབས་དང་ཐུན་མཐའ་ཐམས་ཅད་དུ་མི་དམིགས་པར་འཇོག་པ་ཀུན་ལ་དགོས་པ་དང་༔ དེ་དག་གི་ཆོས་དབྱིངས་ཡེ་ཤེས་བཞི་ལྡན་གྱི་འོད་གསལ་མངོན་དུ་འགྱུར་པ་ཡིན་ནོ༔ ས་མ་ཡཱ༔

༈ བར་སྐབས་སུ་འཆི་བ་སྦྱངས་པའི་མན་ངག་ནི༔ འཕོ་བའི་གདམས་པ་ལྟར་སྲོད་ཐུན་ལ་ནམ་རེས་བྱེད་དགོས་པས་ཟུར་བ་མེད་དོ༔ དེ་དག་གི་གནད་བསྡུས་ན༔ ནུབ་མོ་ཉལ་ཁ་གཅིག་པོ་ལ༔ རང་སེམས་ཀྱི་ངོ་བོ་འོད་ཀྱི་ཐིག་ལེ་ཤིན་ཏུ་འཚེར་བའི་དཀྱིལ་ན་ཨཱ༔མཚན་པ་ཡོད་པ་གཅིག་བསྒོམ་ལ༔ ཧིག་གིས་རང་བཞིན་སྤྲུལ་སྐུའི་ཞིང་ལྔའམ་སྤྱི་བོར་བླ་མ་གསལ་བའི་ཐུགས་ཀར་བརྒྱང་བ་དང་༔ བཅོམ་ལྡན་རིགས་ལྔའི་ཡེ་ཤེས་དང་བླ་མའི་ཐུགས་རྣམ་པར་མི་རྟོག་པའི་ངོ་བོ༔ རང་སེམས་འོད་ཀྱི་ཐིག་ལེ་ཕྱིར་འོང་ནས་ཚངས་བུག་ནས་ཞུགས་ཏེ་སྙིང་ཀར་གནས་པའི་འོད་ཀྱིས་ལུས་ཕྱི་ནང་ཐམས་ཅད་གསལ་བ་མར་མེ་ལྟ་བུའི་སྙིང་པོ་སྙིང་ཀའི་ཐིག་ལེ་ལ་སེམས་བཟུང་བས༔ འཕོ་བའི་འཆི་སྦྱང་དང་༔ གཉིད་འོད་གསལ་དུ་སྦ་བ་དང་༔ ཤེས་བྱ་བུམ་སྡུད་གསུམ་གྱི་གནད་འདུས་ལ༔ ཐོ་རེངས་དེ་ལས་ཐིག་ལེ་གཉིས་པ་ཞིག་སྨིན་མཚམས་སུ་ཆད་དེ༔ དེའི་འོད་ཟེར་གྱིས་ཁམས་གསུམ་སྣོད་བཅུད་འབྱུང་བཞི་དང་བཅས་པ་འུབ་ཀྱིས་བསྡུས་ནས་ཐིག་ལེ་ལ་གཞུག་པ་དང་༔ དེ་རྩ་བའི་ཐིག་ལེ་ལ་ཐིམ༔ དེ་ཡི་གེ་མེད་པ་ཆོས་ཀྱི་དབྱིངས་ཀྱི་རང་བཞིན་དུ་མི་དམིགས་པར་མཉམ་པར་བཞག་པས་ཆོས་དབྱིངས་ཀུན་ནས་བཟླུམ་པའི་ཐིག་ལེ་ཆེན་པོ་སྤྲོས་པའི་གྲྭ་ཟུར་དང་བྲལ་བ་མངོན་དུ་གྱུར་བའི་གནད་དོ༔ དེ་སྐད་དུ་ཨོ་རྒྱན་གྱི་སློབ་དཔོན་ཆེན་པོ་པདྨ་འབྱུང་གནས་ཀྱིས་གསང་ཆེན་ངེས་པའི་རྒྱུད་བཅུ་བདུན་གྱི་བུ་ཡིག་བརྒྱ་རྩ་སོགས་ནས་ཟུར་སོ་སོར་བྱུང་བ་ཁོང་སྙིང་བསྡེབ་ནས་ཕྱོགས་གཅིག་ཏུ་བཀོད་པའོ༔ དེ་ལྟར་འཁྲུལ་བ་བཙན་ཐབས་སྦྱོང་བ་དང་༔ སྣང་སྟོང་འོད་གསལ་འཁོར་ཡུག་འདྲེས་པའི་ལམ༔ བསྒོམ་པའི་རྒྱལ་པོ་ཉིན་མཚན་ཁ་སྦྱོར་འདིས༔ མ་ལུས་འཆིང་གྲོལ་མེད་པའི་བྱང་ཆུབ་ཤོག༔ ས་མ་ཡཱ༔ ཞེས་ཀྱང་དུས་མཐའི་སྔགས་མིང་ག་གཱ་ཨ་བྷྱེ་ནས་དག་པར་ཕབ་པའི་ཡི་གེ་པ་ནི་ཝ་ཀི་ཤྭ་རིའོ། །དགེའོ། །དགེའོ། །དགེའོ། །