བར་དོ་དྲུག་ཁྲིད་ཀྱི་བསྡུས་དོན་ནོར་བུའི་ཕྲེང་བ།

ཡེ་ཤེས་སྒྱུ་འཕྲུལ་དྲྭ་བ་ལས༔ བར་དོ་དྲུག་ཁྲིད་ཀྱི་བསྡུས་དོན་ནོར་བུའི་ཕྲེང་བ་ཞེས་བྱ་བ་བཞུགས་སོ༔

ན་མོ་གུ་རུ་པདྨ་ཀཱ་ར་ཡེ༔ འདིར་གནད་ལས་གནད་དུ་བསྡུས་པ་ནི༔ ཐོག་མར་བར་དོ་དང་པོ་སྐྱེ་གནས་བར་དོ་སྦྱོང་བའི་སྒྱུ་ལུས་དང་བསྐྱེད་རིམ་གཉིས་ལས༔ སྒྱུ་ལུས་ལ༔ ལུས་སྒྱུ་མ་ལྟར་སྦྱངས་བ༔ ངག་བྲག་ཆ་ལྟར༔ སེམས་ན་བུན་ལྟར་སྦྱངས་བ་གསུམ་ལས༔

དང་པོ་ནི༔ མེ་ལོང་དྭངས་བ་ཞིག་མདུན་དུ་བཤམས་ནས༔ གཟུགས་གཞན་མི་མཐོང་བར་དེ་ལ་བལྟས་ནས༔ ཅི་ཞིག་ན་ཕྱི་ནང་ཐམས་ཅད་དུ་བཙལ༔ རང་གི་ལུས་ལ་ཡང་དེ་དང་འདྲ་བར་བློ་སྦྱངས༔ ཡང་བྲག་ཆ་དེ་བྲག་གི་ཕྱི་ནང་ཐམས་ཅད་ལ་བཙལ༔ རང་གི་ངག་ཀྱང་དེ་ལྟ་བུར་བཙལ་ནས་འདྲེས་པར་སྦྱངས༔ ཡང་ནམ་མཁའི་སྤྲིན་གྱི་བྱུང་གནས་འགྲོ་གསུམ་དང་སེམས་ཀྱི་བྱུང་གནས་འགྲོ་གསུམ་མཉམ་པར་བཙལ་ཏེ་མཉམ་པར་སྦྱངས༔ དེ་དག་ལ་མཉམ་རྗེས་བསྲེ་ཕྱིར༔ རྗེས་ཐོབ་ཐམས་ཅད་སྒྱུ་མའི་དོན་དེ་གསུམ་གྱི་འདུན་པ་རྒྱུན་བསྲིང་ངོ་༔

གཉིས་པ་ནི༔ ང་ལྷ་ཡིན་བསམ་ནས་ཡི་དམ་གྱི་འདུན་པ་བྱ༔ ཀུན་བཟང་ཡབ་ཡུམ་ཟུང་འཇུག་རྒྱན་མེད་གཅེར་བུའམ༔ སྤྲོ་ཞིང་ནུས་ན་ཞི་ཁྲོ་ཡོངས་རྫོགས་ཀྱི་སྐུ་བསྒོམ་མོ༔ དེ་ཡང་སྣང་སྟོང་སྒྱུ་མ་ལྟ་བུའི་དྲན་པ་བྱ་བས་རྣམ་དག་དྲན༔ ཆ་ལུགས་འདི་ལྟ་བུའོ་བསམ་པ་ལས་མ་ཡེངས་པས་རྣམ་པ་གསལ་བ༔ ཕྱི་ནང་གི་ཆོས་ཐམས་ཅད་ལྷ་དང་ཞིང་ཁམས་སུ་ཤེས་པས༔ གང་ཟག་དང་ཆོས་ཀྱི་བདག་གཉིས་ཀྱི་འཛིན་པ་སྦྱོང་ངོ་༔

གཉིས་པ་རྨི་ལམ་བར་དོ་སྦྱོང་བ་ནི༔ ཆོས་ཐམས་ཅད་རྨི་ལམ་ལྟ་བུར་ཤེས་པ་ལྟ་བས་ཐག་བཅད་དེ༔ འདུན་པས་རྨི་ལམ་བཟུང་ཕྱིར་ཉིན་མོ་དུས་ཀུན་ཏུ་རྨི་ལམ་ངོ་ཤེས་པར་བྱ་བསམ་པའི་བློ་བརྟན་ནས༔ རྨི་ལམ་དུ་ཡང་དེ་འདྲ་འབྱོངས་ལ༔ བར་ཞིག་ན་ཉིན་སྣང་ལ་བདེན་འཛིན་དགག་སྒྲུབ་མ་ཤོར་ན་རྨི་ལམ་དང་བར་དོ་དེ་འདྲ་ལ༔ བར་ཞིག་ན་རྨི་ལམ་གྱི་དུས་ན་ཐོག་བརྫིས་བྱ་ནུས་པ་ན་བར་དོ་ཆོད་པར་འགྱུར་རོ༔ ཁྱད་པར་དུ་ཉལ་ཁ་སྒོམ་བསྐྱེད་རིམ་འོད་གསལ་སོགས་ལ་གནས་པའི་འདུན་པ་རྨི་ལམ་དང་ཡང་འདྲེའོ༔ ཡང་ན་སྙིང་ཁར་བླ་མའི་ཐུགས་ཀར་ཨཱཿཡིག་དཀར་པོ་ལ་སེམས་བཟུང་བས་རྨི་ལམ་འོད་གསལ་དུ་འཆར་ཞིང་ཟིན་པར་གསོལ་བ་བཏབ༔ གཉིད་ཁར་ཡང་ཡང་འདུན་པ་བསྒྱུར་རོ༔ དེའི་སྲབ་མའི་འོད་གསལ་གྱི་སྣང་བ་མཐོང་བ་དང་༔ བདེ་གསལ་མི་རྟོག་པ་འཆར་ལ༔ འཐུག་པོའི་འོད་གསལ་རང་བཞིན་བརྒྱད་ཅུའི་འགག་ནས༔ གཉིས་འཐུག་གཏི་མུག་གི་སྐྱོན་དང་བྲལ་བའི་རང་བཞིན་དོན་གྱི་འོད་གསལ་འཆར་བ་ཟིན་པར་འགྱུར་རོ༔ ཁྱད་པར་ཁྲེགས་ཐོད་ཀྱི་འོད་གསལ་གྱི་ངང་མ་ཤོར་པས་ཟིན་པ་ཐབས་ལམ་རྨད་བྱུང་ངོ་༔

གསུམ་པ་བསམ་གཏན་བར་དོ་ཟིན་ཕྱིར༔ རྟེན་ཤིང་བུ་རྡེའུ་ལ་སོགས་པ་ལ་གཏད་པ་དང་༔ སྐུ་གསུང་ཐུགས་རྟེན་དངོས་ལ་གཏད་པ་དང་༔ སྐུ་གསུང་ཐུགས་རྟེན་བསྒོམ་ལ༔ ལུས་སྣང་མཛད་ཀྱི་ཆོས་བདུན་དང་ལྡན་པས་གནས་ནས་མིག་མི་འགུལ་བར་བརྟན་པོས༔ སེམས་གནས་ཆའི་བསམ་གཏན་གསལ་ཆའི་ལྷག་མཐོང་ངམ་རང་བཞིན་མེད་པར་ཤེས་པའི་ངང་ལས་མ་ཡེངས་པས་ཞི་ལྷག་ཟུང་འཇུག་གོ༔ དེ་ལྟ་བུའི་སྐྱོན་བསལ་བའི་ཕྱིར༔ བྱིང་ན་ལྟ་སྟངས་བསྟོད་ནས་འཁྱག་སར་བསྒོམ༔ རྒོད་ན་ཕབ་ལ་དྲོ་སར་བསྒོམ་མོ༔ ཁྱད་པར་དུ་ལུས་དབུས་སུ་རྩ་གསུམ་འཁོར་ལྔ་གསལ་བས་སྣ་བུག་གཡས༔ གཡོན༔ མཉམ་པར་རླུང་དུག་གསུམ་བསལ་ལ༔ རང་ལྷར་གསལ༔ འབྲུ་གསུམ་རྡོ་རྗེའི་བཟླས་པས་ངག་བྱིན་གྱིས་བརླབས༔ དེ་ནས་མདུན་དུ་རྒྱལ་བ་སྲས་བཅས་ཀྱི་བྱིན་རླབས༔ ཁམས་གསུམ་སྣོད་བཅུད་ཀྱི་བཅུད་དང་དྭངས་བྱིན་ནམ་མཁའི་རླུང་གི་རྣམ་པར་སྣ་བུག་ནས་དྲངས་ནས་དབུ་མ་ལ་བཙུད་པས་ལས་རླུང་དབུ་མར་ཚུད་པར་བསམ༔ ཕྱིར་རླུང་དུག་གི་རྣམ་པར་འཕང་བ་སྒྲོགས་མདོའི་ཨ་ཤད་ལས་མེ་འབར་བ་གཏུམ་མོ༔ ཐིག་ལེ་སྤྱི་བོ་ནས་བབས་པ་འཁོར་ལོ་ལྔར་ཁྱབ་པས༔ གནས་ལྔར་རིགས་ལྔ་མཆོད༔ དབང་ལྔ་ཐོབ༔ དགའ་བཞི་དང་སྟོང་བཞི་ལ་སོགས་པ་མངོན་དུ་གྱུར༔ སྒྲིབ་བཞི་དག༔ ཡེ་ཤེས་ལྔ་མངོན་དུ་གྱུར་པར་བསམ་པ་ཐིག་ལེའི་རྣལ་འབྱོར་རོ༔ དེ་ཡིས་བདེ་གསལ་རྣམ་པར་བསམ་པ་ཐིག་ལེའི་རྣལ་འབྱོར་རོ༔ དེ་ཡིས་བདེ་གསལ་རྣམ་པར་མི་རྟོག་པའི་ཏིང་འཛིན་བསམ་གཏན་ཐོབ་བོ༔

བཞི་བ་འཆི་ཁ་བར་དོ་སྦྱོང་བ་ལ༔ ད་ལྟ་དཀར་དམར་ནག་པོ་དང་༔ ཉིན་མཚན་བར་གསུམ་དང་ཉི་ཟླ་མུན་པ་སོགས་ལ་བར་དོའི་འདུ་ཤེས་བཞག་ལ་ངོ་ཤེས་པར་བྱ༔ དཀར་དམར་ལ་སོགས་པའོ་བསམ་ནས་འཕོ་བ་སྦྱངས༔ དེ་ཡང་བསྐྱེད་རིམ་ལ་གོམས་པས་ལྷ་སྐུ་ལ༔ རྫོགས་རིམ་པས་འོད་གསལ་ལ༔ རྫོགས་ཆེན་པས་ཀ་དག་ལའམ༔ རིག་པ་རྡོ་རྗེ་ཧཱུྃ་མཚན་ཅན་སྤྱི་བོ་ནས་རང་བཞིན་སྤྲུལ་སྐུའི་ཞིང་ལྔའམ་སྤྱི་བོ་བླ་མ་ལ༔ ཐོད་རྒལ་བས་དབྱིངས་ཐིག་ལ་མིག་ནས༔ སྒྱུ་ལུས་བས་རླུང་སེམས་ཀྱི་ཐིག་ལེ་འདུ་ཤེས་བཞི་ལྡན་གྱིས་འཕོའོ༔ གསལ་འདེབས་པ་ནི་སོ་སོ་ལྟར་རོ༔

ལྔ་བ་ཆོས་ཉིད་བར་དོ་སྦྱོང་བ་ནི༔ ཞི་ཁྲོ་དབྱིངས་ཐིག་སོགས་ཀྱི་བཟོ་སྤྲུལ་སྐུ་ལ༔ ཤེལ་མིག་སྦྱར་བས་བལྟས་ཏེ་རང་སྣང་སྐུ་གསུམ་གྱི་བར་དོ་དངོས་ཡིན༔ ངོ་ཤེས་པར་བྱ་སྙམ་པའི་འདུན་པ་དྲག་པོས་སྦྱངས་བ་དང་༔ ཡང་ན་གདམས་ངག་གིས་སྦྱངས་བ་ནི༔ ཁྲེགས་ཆོད་དང་ཐོད་རྒལ་ཏེ༔ དང་པོ་ནི༔ ད་ལྟའི་རང་གི་སེམས་འདི་ཉིད་སྣ་ཚོགས་སུ་སྣང་ཡང་ཡོད་པ་ལྟར་བཟུང་ནས་དགག་སྒྲུབ་སྤངས་ལེན་སྣ་ཚོགས་སུ་བྱས་ཀྱང་༔ ངོ་བོ་ལ་བལྟས་ན་བྱུང་གནས་འགྲོ་གསུམ༔ གཟུགས་དབྱིབས་ཁ་དོག༔ ཕྱི་ནང་བར་གསུམ༔ ངོས་བཟུང་གི་ཆོས་སུ་གྲུབ་པ་ཅུང་ཟད་ཀྱང་མེད་ལ༔ སྟོང་པ་བྱིང་ཆད་དུ་མ་སོང་བས་རང་བཞིན་རང་གསལ༔ གསལ་སྟོང་དབྱེར་མེད་རང་བྱུང་གི་ཡེ་ཤེས་བདེན་པ་དབྱེར་མེད་ཆེན་པོ༔ སེམས་ཀྱི་གནས་ལུགས་རང་བཞིན་གྱི་བབས་ནི་གཞི་ཡིན་ལ༔ བློས་དགག་སྒྲུབ་སྤང་བླང་འཛིན་སྟངས་ཐམས་ཅད་བོར་བའི་བྱར་མེད་དུ་བཞག་དུས༔ དེའི་གཤིས་ཐོག་ཏུ་སླེབས་པ་ཡིན་པས་བསྒོམ་པ་ངང་བཞག་རྒྱ་ཡན་ཆེན་པོ་སྟེ༔ བཞག་ཐབས་ནི༔ ཕྱི་སྣང་བ་ལ་མི་འཛིན་མི་དགག་པས་སྣང་བ་ཅེར་བཞག །ནང་ཤེས་པ་བྱིང་རྨུགས་འཐིབ་གསུམ་གྱི་སྐྱོན་དང་བྲལ་བའི་ངང་དྭངས་རང་སངས་རྒྱ་མཚོ་ཅོག་བཞག༔ རྣམ་རྟོག་གི་རླུང་གིས་མི་བསྒུལ་བས་རི་བོ་ཅོག་བཞག༔ ངོ་བོ་ངོས་བཟུང་དགག་སྒྲུབ་སྤང་བླང་མེད་པའི་ཆོས་ཉིད་ཀྱི་རྗེས་སུ་འཇོག་པའི་ཅོག་བཞག་བཞིའི༔ རྣམ་རྟོག་གི་ངོ་བོ་སྤྲོས་པའི་མཐ༵འ་ ༼ གྲོལ༵་ ༽ཐམས་ཅད་ལས་གྲོལ་བར་ཡེ༵་ ༼ གྲོལ༵ ༽ནས་སངས་རྒྱས་པ་དང་༔ སྐྱེས་པ་ལ་གཉེན་པོ་མི་དགོས་པར་ ༼ རང༵་གྲོལ་ ༽མཐོང་ཡལ་ ༼ ཅེ༵ར་གྲོལ༵ ༽ཆེན་པོར་རང་གྲོལ༵་བའི་གནད༔ ཡུལ་སེམས་ཀྱི་བར་དུ་རིག་པ་གཅིག་གི་ངང་དུ་ ༼ གཅི༵ག་གྲོལ༵ ༽ཅོག་གེར་བཞག་པས་ཐམས་ཅད་དུས་གཅིག་ ༼ ཡོང༵ས་གྲོལ༵་ ༽ལ་ཟིན་པའོ༔ ཡང་ལུས་ཀྱི་འདུག་སྟངས་དང་༔ མིག་གི་ལྟ་སྟངས་གིས་སྣང་སེམས་ཀྱི་འཛིན་པ་དབྱིངས་སུ་རང་ཡུལ་ཆེན་པོར་རྒྱས་ཐེབ་ཅིང་༔ གལ་ཏེ་ཡུལ་སེམས་ལ་གཟུང་འཛིན་སྐྱེས་ན་ཡང་དགག་སྒྲུབ་མི་བྱེད་པར་རིག་པ་ཐོག་བབས་སུ་ཡུལ་ལ་དབབ་ནས༔ རང་གནས་ཡེ་ཤེས་ཀྱི་ངང་ལས་མི་འདའ་བའི་ཏིང་འཛིན་གསུམ་གྱི་གནད་ཚང་ལ༔ སྣང་སེམས་རིག་གསུམ་སྤྲོས་བྲལ་དུ་ཤེས་པའི་གདེངས་གིས་ཟིལ་གནོན་གསུམ་གྱི་གནད་ཚང་བའོ༔

གཉིས་པ་ཐོད་རྒལ་ནི༔ གཞི་དབྱིངས་རིག་རང་གི་སྙིང་ནང་ན་ཡེ་ཤེས་སུམ་བརྩེགས་ཀྱི་ཚུལ་དུ་ཡོད་པ་དང་༔ ལམ་རྩ་ནང་དུ་ཤར་བའི༔ འབྲས་བུ་ཉི་ཟླ་མར་མེ་མན་ཤེལ་ནམ་མཁའ་ལྔའི་ཡུལ་ལ༔ ཆོས་ལོངས་སྤྲུལ་གསུམ་གྱི་ལྟ་སྟངས་གྱེན་དང་ཟླུམ་པོ་སྣ་རྩེར་ཕབ་པ་གསུམ༔ མངོན་བྱང་གཡས༔ རྡོ་རྗེ་གཡོན་དུ་མནན་པའི་ཕྱེད་བཙུམ་གྱིས༔ བཞུགས་སྟངས་སེངྒེ༔ གླང་ཆེན༔ དྲང་སྲོང་གི་སྒོ་གསུམ་མི་འགུལ་བར་སྡོད་ཅིང་༔ རླུང་གནད་མཆུ་སོ་མ་རེག་པའི་བར་ནས་ཡུད་ཙམ་ཕྱིར་རིང་པའི༔ རིག་གནད་དབྱིངས་ཀྱི་དབུས་སུ་སེམས་མི་རྟོག་པར་ལུག་རྒྱུད་བཙོན་དུ་བཟུང་༔ དབྱིངས་གནད་ཕྱོག་བཞི་དབུས་ལྔ་གང་ལ་འཆར་བདེ་བ་དེར་ཁྲིད་ཅིང་བལྟས་པས༔ དབྱིངས་མཐིང་ཀ་དང་༔ ཁ་དོག་སྣ་ཚོགས་པའི་འཇའ་ཚོན་དུ༔ ཐིག་ལེ་ཕྱི་ནང་རིམ་པ་ལྔར་འཁོར་བའི་སྟོང་སྒྲོན་རྨ་བྱའི་སྒྲོ་ཐིག་ལྟ་བུ་དང་༔ རིག་གདངས་རྡོ་རྗེ་ལུ་གུ་རྒྱུད་ཆུན་འཕྱང་གི་ཚུལ་དུ་ཡོད་པ་རྣམས་ནང་གི་དབྱིངས་ཐིག་གི་འོད་གདངས༔ སྒོ་འོད་ཀྱི་རྩ་སྣ་རྒྱང་ཞགས་ཆུའི་སྒྲོན་མ་ལས་ཐོན་ཏེ་འཆར་བ་ལ༔ མིག་རྒྱ་མཚོ་ཅོག་བཞག་ལྟ་སྟངས་ལས་མི་གཡོ་བར༔ ལུས་རི་བོ་ཅོག་བཞག་བཞུགས་སྟངས་དང་༔ སེམས་སྣང་བ་ཅེར་བཞག་འོད་སྣང་ལ་སྤུ་རིས་མི་འབྱེད་པར་རང་སར་བཞག་པས༔ ངོ་བོ་སྤྲོས་པ་གང་དུ་ཡང་མ་གྲུབ་པའི་རིག་པ་ཅོག་བཞག་རྡོ་རྗེ་ལུ་གུ་རྒྱུད་ཀྱི་ངོ་བོ་འཆར་བ་ཡུལ་དང་བཅས་པ་ལ༔ དངོས་པོར་མི་འཛིན་པའི་ལྟ་བ༔ ངང་ལས་མི་འདའ་པའི་བསྒོམ་པ༔ རང་སར་བཞག་པའི་སྤྱོད་པ༔ འབྲས་བུ་སངས་རྒྱས་ཀྱི་སྐུ་དང་ཡེ་ཤེས་སུ་ཤེས་པའི་ངེས་ཤེས་རྒྱུད་དུ་བྱེད་པའི་རྣལ་འབྱོར་བཞིའི་ཉམས་སུ་བླང་བར་བྱའོ༔

དྲུག་པ་སྲིད་པ་བར་དོའི་ཉམས་ལེན་ནི༔ ཉིན་མཚན་ཉི་ཟླ་སོགས་གཡང་ས་གསུམ་དུ་འདུན་པས་སྦྱངས་པ་དང་༔ གྲགས་པ་ཐམས་ཅད་སྒྲ་བཞིར་འདུན་པས་སྦྱངས་པ་དང་༔ དྲན་བསམ་ཐམས་ཅད་སྲིད་པ་བར་དོའི་སྣང་བར་འདུན་པས་སྦྱངས་ཤིང་༔ འཇིགས་སྐྲག་དགའ་དངོས་ཀྱི་གཟུགས་ཐམས་ཅད་ལ་ཆགས་ཞེན་མཁན་པོ་བདག་ཡུལ་དང་བཅས་པ་སྙེམས་བྱེད་དང་ཕུང་པོའི་བདུད་དུ་ཤེས་ཤིང་འཁྲི་བ་བཙན་ཐབས་སུ་བཅད༔ སྤངས་ལེན་འདོད་སྡང་གི་རྣམ་རྟོག་ཐམས་ཅད་ཉོན་མོངས་པའི་བདུད་དང་ལྷ་བདུད་ཀྱི་གཡབ་མོར་ཤེས་པས་འཁྲི་བ་བཙན་ཐབས་སུ་གཅོད་པ་དང་༔ བརྟུལ་ཞུགས་ཐུག་ཕྲད་ཐོག་བབས་རང་གྲོལ་དུ་རྩལ་སྦྱངས་བའམ༔ ཡང་ན་ང་ཤི་འདུག་པས་རང་བཞིན་སྤྲུལ་སྐུའི་ཞིང་དུ་འགྲོའོ་སྙམ་པའི་འདུན་པ་དུང་དུང་ངེ་བའི་ངང་ནས་འཕོ་བའི་སྦྱོར་བ་དྲག་པོ་སྦྱར་བས་གྲོལ་བ་ཐོབ་པར་གདོན་མི་ཟའོ༔ ཡང་ཉམས་ལེན་ཉིན་མཚན་ཁ་སྦྱོར་དུ་འདོད་པས༔ རང་གི་སྙིང་ནང་དུ་རྣམ་ཤེས་ཐིག་ལེ་སྟོང་སྒྲོན་དུ་གསལ་བ༔ ཧིཀ་གིས་རང་བཞིན་སྤྲུལ་སྐུའི་ཞིང་ལྔར་བླ་མ་རྒྱལ་བ་རིགས་ལྔའི་ཐུགས་ཀར་བསྟིམས་པ་དང་༔ ཐུགས་ཡེ་ཤེས་ལྔའི་རང་བཞིན་འོད་ཀྱི་ཐིག་ལེ་སླར་བྱུང་ནས་རང་གི་སྙིང་ཀར་གནས་པའི་འོད་ཀྱིས༔ ལུས་དང་སྣང་བ་ཐམས་ཅད་ཁྱབ་པ་ལ་འདུན་པ་བཟུང་ནས་གཉིད་འོད་གསལ་དུ་སྦ་ཞིང་ཤེས་བྱ་བུམ་པར་བསྡུ་བར་འགྱུར༔ ནང་མོ་སད་དུས་དེ་ལས་ཐིག་ལེ་གཉིས་པ་ཞིག་སྣ་རྩེར་ཆད་ནས༔ ཕྱི་རོལ་གྱི་འབྱུང་ལྔ་འོད་དུ་ཞུ་བ་སྣ་རྩེའི་ཐིག་ལེ་ལ་ཐིམ་པར་མོས་པས་དེ་ལ་སེམས་བཟུང་༔ འབྱུང་ཁམས་དག་སྦྱོར་དུ་ཡང་འགྱུར་རོ༔ དེ་ལྟར་མན་ངག་ཀུན་གྱི་གནད་འདུས་པ༔ ཚིག་ཉུང་གོ་སླ་ཤིན་ཏུ་ཁྱེར་བདེ་འདི༔ གང་ན་པདྨའི་ཐུགས་རྗེས་ཉེར་འཚོ་བ༔ ག་གཱ་ཨ་བྷྱེའི་དུས་བབས་ཕྲིན་ལས་ཏེ༔ མ་གྱུར་འགྲོ་བའི་ཉེར་འཚོར་འགྱུར་བར་ཤོག༔ འདི་འདྲ་འབྲི་དགོས་བླ་མས་བཀའ་ཕེབས་ནས༔ བཟོ་རིགས་འདུ་བྱེད་ཀརྨའི་མིང་གིས་སོ༔ ཞེས་རང་གི་ཚེ་རབས་སྔོན་ནས་བླ་མར་གྱུར་པ་སྟུག་རྒྱ་སྤྲུལ་སྐུའི་བཀའ་མ་ལྡོག་པར་ག་གཱས་སོ། །དགེའོ། །དགེའོ། །དགེའོ། །སརྦ་མངྒ་ལཾ། །