ཟབ་དོན་གཅོད་ཀྱི་གནད་བསྡུས།
ཡེ་ཤེས་སྒྱུ་འཕྲུལ་དྲྭ་བ་ལས༔ ཟབ་དོན་གཅོད་ཀྱི་གནད་བསྡུས་བརྒྱུད་དྲུག་གཅིག་འདུས་བཞུགས་སོ༔
ན་མོ་གུ་རུ་པདྨ་ཀཱ་ར་ཡེ༔ བདུད་གཅོད་ཟབ་མོ་ཉམས་ལེན་པས༔ རྒྱུན་གྱི་རྣལ་འབྱོར་སྤྲོས་པ་མེད༔ བརྒྱུད་ཚུལ་ཀུན་གྱི་ལྡེའུ་མིག་དུ༔ མན་ངག་སྒོ་བརྒྱ་འབྱེད་འདི་ལོངས༔ ས་མ་ཡཱ༔ དེ་ལ་ཐོག་མར་བདག་དང་ཡུལ་གྱི་འཆིང་བ་ཐད་ཀར་དུ་གཅོད་པའི་ཕྱིར་བྱུང་གནས་འགྲོ་གསུམ་གཟུགས་དབྱིབས་ཁ་དོག་སོགས་ཀྱིས་གང་ཟག་གི་བདག་གམ་སེམས་ལ་དཔྱད་པས༔ བདག་སྟོང་ཉིད་དུ་གོ༔ གཅིག་དང་དུ་མ་དང་༔ སྒྱུ་མའི་དཔེ་བཅུ་སོགས་ཀྱིས་དཔྱད་པས༔ ཡུལ་སྟོང་ཉིད་དུ་གོ་ཡང་༔ སྟོང་པ་ཕན་མེད་གནོད་མེད་དུ་གྱུར་ནས༔ སྙེམས་ཐག་མ་ཆོད་པའི་གང་ཟག་གི༔ གཉན་སར་སོང་ནས་རྐྱེན་དང་བསྲེས་པས་བདུད་བཞི་གཅིག་ཆར་དུ་གཅོད་པའི་ཐབས་མཁས་ཡིན་པས༔ དེ་ལ་སྔ་ནོན༔ བར་ནོན༔ ཕྱི་ནོན་གསུམ་གསུམ་གྱིས་བསྡུས་པའི་ཐོག་མར་སྔ་ནོན་ནི༔ རིམ་པ་གསུམ་དང་༔ ཡང་ན་ཐམས་ཅད་ལ་ཁྱབ་པའི་གཅིག་གིས་ཀྱང་ཆོག༔ དང་པོ་རང་གི་གནས་ཁང་ནས་སྔ་ནོན་འཕེན་པ་ནི༔ རང་ཉིད་ཁྲོས་མ་ནག་མོ་ཕྱག་གཡས་གྲི་གུག་གཡོན་ཐོད་ཁྲག་འཛིན་པ་ཞབས་གཉིས་གར་སྟབས་ཀྱིས་པད་ཉི་རོའི་གདན་གྱི་སྟེང་དུ་བརྫིས་པ༔ རྣ་ལྟག་གཡས་སུ་ཕག་ཞལ་ངུར་བ༔ ཞལ་གཅིག་ཕྱག་གཉིས་པར་གསལ་བའི་ཐུགས་ཀ་ནས་མཁའ་འགྲོ་སྡེ་ལྔ་དཀར་སེར་དམར་ལྗང་མཐིང་ནག་གཡས་པས་མི་ལྤགས་ཀྱི་གཡང་གཞི་སྡེབ་པས་ཁམས་གསུམ་དབང་དུ་སྡུད་པ༔ གཡོན་མི་རྐང་གི་གླང་བུ་འབུད་པས་སྲིད་གསུམ་ཟིལ་གྱིས་གནོན་པ༔ ཤར་ལྷོ་ནུབ་བྱང་ཕྱོགས་མཚམས་སྟེང་འོག་ཏུ་འཕྲོས་པས༔ ཉོན་མོངས་ལྔས་བསྐྱེད་པའི་ལྷ་འདྲེ་ཐམས་ཅད་དབང་དུ་བསྡུས་ཤིང་བཀུག་ནས་གཉན་ས་དེར་མི་ནག་པོ་གཅིག་ཏུ་བསྒྱུར་ནས་སྲུང་བའི་འཁོར་ལོ་རིམ་པ་དྲུག་གི་ནང་དུ་ཚུད་པར་བསམ༔ གཉན་མིག་རིགས་དེ་ནས་ཡང་དེ་ལྟར་ཟིལ་ནོན་འཕེན་པ་ནི་སྔ་ནོན་བར་བ༔ གཉན་སར་སླེབ་ནས་ཡང་དེ་ལྟར་ཟིལ་ནོན་འཕེན་པ་ནི་སྔ་ནོན་ཕྱི་མའོ༔ ཡང་ན་སྔ་ནོན་གསུམ་པོ་ལ་རང་ཁྲོས་མའི་ཐུགས་ཀ་ནས་འོད་ཟེར་སྣང་སྲིད་ཐམས་ཅད་ཁྱབ་པར་འཕྲོས་པས༔ འོད་ཇེ་ཆུང་དུ་འདུས་པའི་ནང་དུ་ལྷ་འདྲེ་ཐམས་ཅད་བསྡུས་ནས་གཉན་ས་དེར་གནས་པའི་མཐར་སྲུང་འཁོར་བསྒོམ་པ་སྤྱིའི་ཟིལ་ནོན་གྱིས་འཐུས༔ བར་ནོན་དང་པོ་ནི༔ བྲོ་ར་ཕུར་ཁྱེར་དམིགས་པ་འདོན་ཆ་བཞིན༔ བར་ནོན་བར་བ་ནི༔བདག་ཟིལ་གྱིས་ནོན་ཕྱིར་བདག་འཛིན་གྱི་སྙེམས་ཐག་བཅད་དེ༔ བདག་མེད་དང་ཁྲོས་མར་བསྒོམ༔ གནས་ཟིལ་གྱིས་ནོན་ཕྱིར་ལུས་པོ་ལུང་པ་གང་བར་བསམ་པའི་འོག་ཏུ་གནས་དེའི་ལྷ་འདྲེ་མི་ནག་ཏུ་གསལ་བ་དེ་མནན་ནས་སྐད་ངན་ཙི་རི་རི་འདོན་པར་བསམ༔ ལྷ་འདྲེས་ཟིལ་གྱིས་ནོན་ཕྱིར་སྣང་སྲིད་ཀྱི་ལྷ་འདྲེ་ཐམས་ཅད་འོད་ཟེར་སྔར་ལྟར་སྤྲོས་ནས་གདན་འོག་གི་མི་ནག་ལ་ཡང་ཡང་ཐིམ་པར་བསམ༔ བར་ནོན་ཐ་མ་ནི༔ བར་བར་དུ་ལུས་སྦྱིན་བྱས་ནས་མགྲོན་གྱི་ལྷ་འདྲེ་ཐམས་ཅད་སྔར་ལྟར་བསྟིམས་པ་དང་༔ ཅི་ནས་ཀྱང་སློང་མ་ཐུབ་ན་རི་བོ་ཁམ་ཆོད་ལ་སོགས་པ་མཐར་གཏད་ཀྱི་དམིགས་པ་བྱ་བའོ༔ ཕྱི་ནོན་དང་པོ་ནི༔ ཤ་ཁྲག་མགྲོན་དུ་འགྱེད་ནས་གནས་དེའི་ལྷ་འདྲེ་དྲེགས་ཤོས་རྣམས་ལ་ངས་གནས་འདིར་སྔར་མེད་ཀྱི་ལྷ་འདྲེ་ནང་དུ་མ་བཏང་༔ འདིར་གནས་ཀྱི་ལྷ་འདྲེ་ཕྱིར་མ་བཏང་༔ ཁྱེད་རྣམས་ཀྱིས་ཕྱག་མཆོད་ཀྱི་རྟེན་འདིས་ཀྱིས་ཤིག༔ ཅེས་ཨོཾ་ཨཱཿཧཱུྃ་བྲིས་ལ་རབ་གནས་བྱས་ཏེ་བཞག་པའོ༔ ཕྱི་ནོན་བར་བ་ནི༔ ཁྲོཾ་གཅིག་བྲིས་པ་བྱ་ཁྱུང་མེ་འབར་བར་བསྒོམ་ལ་ཤ་ཁྲག་གི་ཕོག་གཏད་ནས་ངའི་རྗེས་སུ་ལྷ་འདྲེ་མ་མངག་ཞེས་ཕྲིན་ལས་བཅོལ་ལ་ཕྱི་བལྟས་མི་བྱེད་པར་འགྲོའོ༔ ཕྱི་ནོན་ཐ་མ་ནི༔ རང་གི་རྣམ་ཤེས་ཕཊ་ཀྱིས་དབྱིངས་ཀུན་ཏུ་བཟང་མོའི་མཁའ་ཀློང་དུ་བསྲེས་ཏེ་དབྱིངས་ལས་འོད་ཟེར་ཁ་དོག་ལྔ་ལྡན་ཤིན་ཏུ་ཕྲ་བའི་ནང་དུ་རིག་པ་འོད་ཀྱི་ཐིག་ལེ་འདྲིལ་ནས་རང་ཁྱིམ་དུ་སོང་བར་བསམ་པའམ༔ གཉན་ས་གཞན་དུ་འགྲོ་ན་དེ་ནས་སྔ་ནོན་འཕེན༔ ལར་གཉན་སར་འགྲོ་དུས་སྦྲུལ་ནག་འཁྱིལ་འགྲོས་ཀྱིས་ལྷ་འདྲེ་ཐམས་ཅད་དེད་དེ་འགྲོ་བར་བསམ་པ་དང་༔ མཁའ་འགྲོའི་གར་འགྲོས་ཀྱིས་ལྷ་འདྲེ་རང་ལུས་ལ་བསྟིམས་ཏེ་འགྲོ་བར་བསམ་པ་དང་༔ ལྟ་བའི་གདེང་འགྲོས་ཀྱིས་འཁོར་འདས་རང་སྣང་དུ་ཤེས་པའི་ངང་ནས་འགྲོ་བར་བསམ་པ་སོགས་འགྲོ་ལུགས་ལྔ་སོགས་གང་རུང་གིས་འགྲོ༔ དེའི་སློང་ཚད་ལ་དགའ་སྡུག་རེ་དོགས་སྐྲག་དངངས་སོགས་འབྱུང་༔ ཚར་ཚད་ལ་དབང་དུ་འདུས་པ༔ ཟིལ་གྱིས་གནོན་པ༔ བྲན་དུ་ཁོལ་བའི་རྟགས་སོགས་ཡོད་ཀྱང་ཀུན་ལ་དགའ་སྡུག་རེ་དོགས་མི་བྱ་བར༔ ལྟ་བ་སྟོང་ཉིད་ཀྱི་ངང་མདངས་དང་མ་བྲལ་བར་བྱའོ༔ ཐུན་བཞིར་ཞི་གཅོད་དཀར་འགྱེད་དང་ཁྲ་འགྱེད༔ དྲག་གཅོད་དམར་འགྱེད་དང་ནག་འགྱེད་སོགས་བྱའོ༔ ས་མ་ཡཱ༔ རྒྱ་རྒྱ་རྒྱ༔ ཞེས་པ་འདི་ཡང་གནད་དོན་གོ་སླ་བར་དྲིལ་དེ་ག་གཱ་བས་སོ། །