གཞན་ལུས་ཐབས་ལྡན་བསྡུས་པ་ཡེ་ཤེས་སྙིང་པོ

གཞན་ལུས་ཐབས་ལྡན་བསྡུས་པ་ཡེ་ཤེས་སྙིང་པོ་བཞུགས་སོ༔

ན་མོ་གུ་པདྨ་ཀཱ་ར་ཡེ༔ འདི་ལ་གསུམ་སྟེ༔ ཐ་མལ་གྱི་ཉེས་པས་མི་གོས་ཤིང་འཆིང་བ་མཐའ་དག་ལས་གྲོལ་བར་བསྟན༔ བརྟེན་པ་ཉིད་བསྒྲུབ་པའི་སྙིང་པོའི་བཤད༔ བརྟེན་ཚུལ་གྱི་ཉམས་ལེན་བསྡུས་པ་དང་༔ དེའི་ཡོན་ཏན་གྱི་བསྔགས་པ་བརྗོད་པའོ༔ དང་པོ་ནི༔ མི་ཚངས་སྤྱོད་པའི་ཉེས་པ་བྱུང་བ་ལ༔ གཞི་བསམ་སྦྱོར་བ་མཐར་ཐུག་རྣམས་ཚང་དགོས་པ་ལས། དང་པོ་གཞི་མིའི་བུད་མེད་ལས་ལྡོག་ཏེ༔ ཡབ་ཡུམ་ལྷར་བསྒོམ་པའི་འདུ་ཤེས་ཀྱིས་དེའི་ཡན་ལག་མ་ཚང༔ བསམ་པ་འཁྲིགས་བདེ་ཉམས་སུ་མྱོང་འདོད་ལ༔ འདིར་སེམས་ཅན་ཐམས་ཅད་ཀྱི་དོན་དུ་ལྷན་སྐྱེས་ཀྱི་བདེ་བ་ཕྱག་རྒྱ་ཆེན་པོ་མཆོག་གི་དངོས་གྲུབ་མངོན་དུ་བྱེད་པའི་འདུ་ཤེས་དང་ལྡན་པས་བསམ་པའི་ཡན་ལག་མ་ཚང་༔ སྦྱོར་བ་ཐབས་ལ་མི་མཁས་པའི་དབང་པོ་གཉིས་སྦྱོར་ཐ་མལ་ལས་ལྡོག་ཏེ༔ མཁའ་གསང་རྡོ་རྗེ་དང་པདྨའི་འདུ་ཤེས་དང་༔ སྦྱོང་བའི་སྒྱུ་རྩལ་དྲུག་ཅུ་སོགས་ལ་མཁས་པ་དང་༔ མཐར་ཐུག་ཁམས་འཕོ་བ་དང་འགྱུར་བའི་སྡུག་བསྔལ་ལས་འཕགས་ནས་འཕོ་མེད་དུ་བཟུང་ལྡོག་དགྲམ་པས་ཐིག་ལེ་གོང་འཕེལ་དུ་སྤེལ་བའི་ཁྱད་པར་རྨད་བྱུང་གི་གནད་ཀྱིས་ཚངས་སྤྱོད་མཆོག་ཏུ་གྱུར་པ་ཡིན་ཏེ༔ འཁོར་ལོ་བཅུ་པའི་མདོ་ལས༔ ཁྱིམ་ན་གནས་ཤིང་ཁ་སྤུ་མ་བྲེགས༔ ཆོས་གོས་མ་གྱོན་ཀྱང་༔ ཚུལ་ཁྲིམས་ཀྱང་མ་མནོས་ཀྱང་༔ འཕགས་པའི་ཆོས་ཉིད་དང་ལྡན་པ་དེ་ཉིད་དོན་དམ་པའི་དགེ་སློང་ཞེས་བྱ་བའོ༔ ཞེས་གསུངས་སོ༔ དེས་ན་ས་ར་ཧས༔ ཚངས་པར་སྤྱོད་པའི་དགེ་སློང་སྟེ༔ ཧེ་རུ་ཀ་དཔལ་དགེ་སློང་མཆོག༔ ཞེས་དང༔ གསང་འདུས་ལས༔ ཕ་རོལ་བུད་མེད་བསྟེན་པར་བྱ༔ ཞེས་སོ༔ དེར་མ་ཟད་འདིའི་སྟོང་བཞིའི་རིམ་པར་ཁམས་གསུམ་གྱི་སེམས་སེམས་བྱུང་ཐམས་ཅད་བཙན་ཐབས་སུ་འགགས་ཤིང༔ དེ་ལ་བརྟེན་པའི་ལས་དང་བག་ཆགས་ཀྱི་འཆིངས་བ་མཐའ་དག་ལས་གྲོལ་བའང་༔བདེ་མཆོག་ལས༔ ཁྱད་པར་དུ་ནི་བསྒྲུབ་པ་པོའི་མ་དང་བུ་མོ་ལ་སོགས་པར༔ རྣམ་པ་འདི་ལྟའི་ཆོ་ག་ཡིས༔ འཆིང་བ་ལས་ནི་རབ་གྲོལ་ནས༔ ཞེས་སོ༔ གཉིས་པ་ནི༔ ཚངས་སྤྱོད་གཞན་གྱིས་ཁམས་བསྲུང་བར་བྱེད་ཀྱང་སྤེལ་བར་ནི་མ་ནུས་པ་ལ༔ འདིར་འདོད་པའི་རྒྱུ་རྩལ་གྱིས་ཁམས་རྒྱས་པར་བྱས་ནས་ཕྱག་རྒྱ་བརྟེན་ཏེ་འཛག་མེད་དུ་བཅིངས་ཤིང་དེར་མ་ཟད་རྒྱ་མཚོ་ལས༔ ཨཱ་ལི་ཀཱ་ལིའི་བདེ་བ་ཉིད༔ ཕན་ཚུན་མ་འདྲེས་གཅིག་པར་ཤེས༔ བཅུ་དྲུག་ངོས་མཉམ་མཚན་དང་ལྡན༔ ཕྱོགས་གཅིག་ཡེ་ཤེས་ལྔ་ལྡན་པ༔ བརྒྱད་བཅུ་བཟོད་སོགས་རྒྱུ་ལས་འཕགས༔ ཞེས་པ་ལྟར༔ མཚན་དང་དཔེ་བྱེད་ཀྱི་ངོ་བོ་སྤེལ་ནས༔ འཛག་བདེ་འགྱུར་བཅས་དེ་ཡང་ཐབས་ལམ་གྱི་སེམས་ལྔ་མཐར་ཆགས་སུ་སྐྱེས་ནས་མི་འགྱུར་བའི་བདེ་ཆེན་སྟོང་ཉིད་ཉི་ཤུའི་རང་བཞིན་ཅན་དང་༔ རྣམ་ཀུན་མཆོག་ལྡན་གྱི་སྟོང་ཉིད་འབྲས་ཆོས་མཐའ་དག་ལྷུན་གྲུབ་ཆེན་པོ་ལྷན་ཅིག་སྐྱེས་པའི་ཡེ་ཤེས་ལ་ཐུགས་ཀྱི་ཡེ་ཤེས་ལྔའི་བསྐོར་བར་བསྐྱེད་པ་ལ༔ ཐབས་ཀྱི་རྣམ་པའི་ཆ་ནས་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་མ་འདྲེས་ཡོངས་སུ་རྫོགས་པ་དང་༔ རྒྱུ་མཚན་དེས་ན་གནས་སྐབས་ཀྱི་འབྲས་བུ་ས་བཅུ་ལམ་ལྔའི་སྤང་རྟོགས་ཀྱི་ཆོས་ཀྱང་བདེ་སྟོང་ལྷུན་གྱིས་གྲུབ་པའོ༔ དེ་ལྟ་བུའི་ཉེ་ལམ་རྨད་དུ་བྱུང་བ་འདི་ལ༔རིག་མ་འདུ་བྱ་བ་ལ་སོགས་པའི་བསྙེན་པ་དང་༔ དབང་བསྐུར་ཆོས་བཤད་བྱིན་གྱིས་བརླབས་ནས་མཁའ་གསང་མཉམ་པར་སྦྱོར་བས་ཉེ་བསྙེན༔ སྐད་ཅིག་བཞིའི་སྔ་མ་རྣམ་པར་དགའ་བ་བཞི་སྐྱེས་པ་ནི་བསྒྲུབ་པ༔ མཆོག་ཏུ་མི་འགྱུར་བ་དགའ་བྲལ་རྒྱུད་ལ་སྐྱེས་པ་ནི་བསྒྲུབས་པ་ཆེན་པོ་སྟེ༔ གསང་འདུས་ལས༔ བསྒྲུབ་བྱའི་བསྒྲུབ་པར་ཡང་དག་སྦྱོར༔ གང་ཡིན་དེ་ནི་བསྙེན་པར་བཤད༔ རྡོ་རྗེ་པདྨ་མཉམ་སྦྱོར་བ༔ ཉེ་བར་བསྙེན་པ་ཞེས་བྱ་བའོ༔ ཞེས་སོ༔ དེ་ཡང་ཡི་གེ་ཧཱུྃ་དང་ཕཊ་ལྡན་པས༔ བསྐྱེད་པ་བསྒྲུབ་པ་ཞེས་བྱའོ༔ ངོ་བོ་ཉིད་བདེ་ཞི་བདེ་བ༔ བསྒྲུབ་པ་ཆེན་པོ་ཞེས་བྱའོ༔ ཞེས་སོ༔ དེ་ཡང་ཡབ་ཡུམ་གྱི་ཕུང་ཁམས་སྐྱེ་མཆེད་ཡེ་ནས་ལྷར་གནས་པ་སྐུ་ཕྱག་རྒྱ༔ ངག་ཡེ་གེའི་འཁོར་ལོར་གནས་པ་གསུང་ཆོས་རྒྱ༔ སེམས་ཡེ་ཤེས་ལྔའི་ངོ་བོར་གྲོལ་བ་ཐུགས་དམ་རྒྱ༔ སྙོམས་པར་འཇུག་པའི་ལས་ཀྱི་སྐྱེ་བ་སྤྲུལ་སྐུ་བསྐྲུན་ནས་དེའི་ཀྱང་ཞི་རྒྱས་དང་དབང་དྲག་གི་ལས་བྱེད་པ་ཕྲིན་ལས་རྒྱ་སྟེ་ཕྱག་རྒྱ་བཞི་དང་༔ ཡང་སྟོང་པ་དང༔ རིག་པ༔ ཟུང་འཇུག༔ ལྷ་ཡབ༔ ཡུམ༔ ཟུང་འཇུག༔ ཤེས་རབ་༔ ཐབས༔ དབྱེར་མེད་རྣམས་ཀྱི་ངོ་བོ་གཟུངས་སྔགས་རིག་སྔགས༔ གསང་སྔགས་ཀྱི་དེ་ཁོ་ན་ཉིད༔ ཆོས་ཉིད༔ ཆོས་ཅན༔ ནུས་མཐུ༔ བྱིན་གྱིས་རླབས་ཀྱིས་གྲུབ་པ་བཞི་ལྡན་དུ་ཡོད་པས་ན༔ དྲན་ཉམས་༔ མ་རྟོགས་ལོག་རྟོགས་ཐ་མལ་གྱི་མཚན་འཛིན་ལས་ཡེ་ཤེས་བདེ་མྱུར་དུ་སྐྱོབས་ཤིང༔ འདིར་ཐབས་ཀྱི་རྣམ་པ་ཡབ་ཡུམ་ལྷར་གསལ་བའི་ཟུང་འཇུག་དང་༔ དེའི་སྙིང་པོ་བདེ་སྟོང་གཉིས་མེད་ཀྱི་ཡེ་ཤེས་དབྱེར་མེད་ལ་ཡར་ལྡན་དུ་རྫོགས་པས་ན༔ རྣམ་སྣང་མངོན་བྱང་ལས༔ སྤྲོས་པ་མེད་པའི་དོན་གསང་སྔགས་ཀྱི་དངོས་པོ་དེ་ཉིད་ཅེས་དང་༔ གཉིས་མེད་ཡེ་ཤེས་འདི་ཉིད་ནི༔ ཐུབ་པས་སྔགས་སུ་གསུངས་པ་ཡིན༔ ཞེས་པས༔ དེ་ལྟར་སྔགས་གསུམ་དང་ཕྱག་རྒྱ་བཞི་ལྡན་པའི་ཆོ་གའི་བསྙེན་བསྒྲུབ་ཡན་ལག་བཞིའི་སྒོ་ནས་བསྒྲུབ་པ་ཡིན་པས་ན༔ གསང་འདུས་རྒྱུད་ཕྱི་མ་ལས༔ སྒྲུབ་བྱའི་སྒྲུབ་པར་ཡང་དག་སྦྱོར༔ ཞེས་དང་༔ བདེ་མཆོག་ལས༔ ཕྱག་རྒྱ་ཆེན་པོའི་ཡན་ལག་བསྒོམ༔ འགྱུར་མེད་བདེ་ཆེན་བསྒྲུབ་ནས་ནི༔ ཚེ་འདི་ཉིད་ལ་སངས་རྒྱས་འགྱུར༔ ཞེས་སོ༔ དེས་ན་མདོ་སྔགས་གང་གིས་ཀྱང་བསྒྲུབ་བྱའི་སྙིང་པོ་ལྷན་ཅིག་སྐྱེས་པའི་ཡེ་ཤེས་དོན་དམ་བྱང་ཆུབ་ཀྱི་སེམས་ཡིན་པས་འདིར་དེ་ཉིད་ཐབས་ཀྱི་སྒོ་ནས་སྐད་ཅིག་བཞིའི་རིམ་པར་རྒྱུད་ལ་འདྲེན་པའི་ལམ་རྨད་དུ་བྱུང་བ་བསྒྲུབ་བྱ་དང་བསྒྲུབ་པའི་སྙིང་བོར་གྱུར་བའོ༔

གསུམ་པ་ལ༔ སྦྱོར་བ་དངོས་གཞི་རྗེས་ཀྱི་རིམ་པ་ལས༔ དང་པོ་ནི༔ སེམས་ཅན་ཐམས་ཅད་ཀྱི་དོན་དུ་སངས་རྒྱས་ཐོབ་པར་བྱ༔ དེའི་ཆེད་དུ་བདེ་སྟོང་ལྷན་ཅིག་སྐྱེས་པའི་ཡེ་ཤེས་མངོན་དུ་བྱ་སྙམ་དུ་བྱང་ཆུབ་བླ་ན་མེད་པའི་སེམས་བསྐྱེད་དོ༔ གཉིས་པ་ལ༔ ཡབ་ཡུམ་ལྷར་བསྐྱེད་པ༔ མཁའ་གསང་བྱིན་གྱིས་བརླབས་པ༔ཐིག་ལེ་དབབ་པ༔ བསྐྱིལ་བ༔འདྲེན་པ༔ དགྲམ་པ༔ ཡེ་ཤེས་ཆེན་པོར་ལ་བཟླ་བའོ༔ དང་པོ་ནི༔ རང་ཉིད་སྐད་ཅིག་གིས་ཀུན་ཏུ་བཟང་པོ་སྐུ་མདོག་མཐིང་ཀ་གཅེར་བུ་མཉམ་བཞག་གི་ཕྱག་རྒྱ་ཅན༔ ཞབས་རྡོ་རྗེའི་སྐྱིལ་ཀྲུང་དུ་བཞུགས་པ་ལ༔ ཡུམ་ཀུན་ཏུ་བཟང་མོ་མཐིང་སྐྱ་པདྨའི་མཉམ་བཞག་དང་སྐྱིལ་ཀྲུང་གིས་མཁྱུད་པ༔ ཡབ་ཡུམ་གཉིས་ཀ་དགྱེས་ཆགས་ཞི་བདེའི་ཉམས་ཀྱིས་རོལ་བར་སྣང་སྟོང་ཆུ་ཟླར་ལྟར་བསྐྱེད་ལ༔ བཛྲ་ས་མ་ཡ་ཛ༔ ཡེ་ཤེས་པ་སྤྱན་དྲངས་ས་མ་ཡ་ཏིཥྛ་ལྷན་གྱིས་གཉིས་སུ་མེད་པར་བསྟིམ༔ སྤྱི་བོར་བླ་མ་ཡབ་ཡུམ་སྙོམས་པར་འཇུག་པར་བསྒོམ་མོ༔ གཉིས་པ་མཁའ་གསང་བསྐྱེད་པ་ནི༔དེ་ནས་ཡབ་ཀྱི་གསང་བ་རྡོ་རྗེ་སྔོན་པོ་རྩེ་ལྔ་བའི་ཁང་སེང་གི་བུམ་པ་ན་ཧཱུྃ་འོད་འབར་བས་བུག་པ་བཀགས་པར་བསམ༔ ཡུམ་མཁའ་པདྨ་དམར་པོ་འདབས་བཞིའི་དབུས་ནས་ཕཊ་སྔོན་པོའི་བུག་པ་བཀག་པར་བསམ་མོ༔ གསུམ་པ་ཐིག་ལེ་དབབ་པ་ནི༔ ཡབ་ཡུམ་ལྷ་སྐུ་སྙོམས་པར་ཞུགས་ལ༔ དལ་བུར་བསྐྱོད་ནས་སྤྱི་བོར་ཐིག་ལེ་ཞུ་བའི་བདེ་བ་འོག་གཡོ་བ་ལ་སེམས་ཅུང་ཟད་མཉམ་པར་བཞག༔ དེ་ནས་བསྐྱོད་པས་ཐིག་ལེ་མགྲིན་པར་སླེབས་པས་ཡུལ་རང་སར་རྟོག་པ་འགག་པ་ནི་དགའ་བའི་ཡེ་ཤེས་ཏེ་དེའི་ངང་ལ་བཞག་གོ༔ ཡང་སྙིང་ཀར་སླེབས་པར་བསྒོམ་ལ་ཞིབ་པར་དཔྱོད་པའང་འགག་པའི་མཆོག་ཏུ་དགའ་བ་ལའང་ཉམས་སུ་བླང་ངོ་༔ ཡང་ལྟེ་བར་ཡབ་ཡུམ་དུ་འཛིན་པའི་རྟོག་པ་རགས་པའང་འགག་ནས་བདེ་བའི་ངོ་བོར་ཞིབ་པར་དཔྱོད་པ་དང་༔ སྐྱེས་པ་ནི་ཁྱད་པར་གྱི་དགའ་བ་སྟེ༔ དེའི་ངང་ལ་མཉམ་པར་བཞག༔ དེ་ནས་གསང་བར་བབས་པས་བདེ་བའི་འཛིན་པ་ཙམ་ཡང་རྣམ་པར་དག་ཀྱང་༔སྣང་བ་མ་འགགས་ལ༔ རང་བཞིན་སྟོང་གསལ་སྤྲོས་པ་དང་བྲལ་བར་ཉམས་སུ་མྱོང་བ་ནི་ལྷན་ཅིག་སྐྱེས་པའི་དགའ་བ་ཞེས་བྱ་སྟེ༔ དེ་ཉིད་ཀྱི་རང་ཚུགས་མ་ཤོར་བར་ངོ་བོ་ཉིད་ལ་བལྟ་བཞིན་པའི་ངང་ནས་ཉམས་སྐྱོང་པ་ནི་སྙིང་པོ་བླ་ན་མེད་པ་སྟེ༔ དེ་ལྟར་དབབ་པའི་གནད་དུ་རྡོ་རྗེ་བདེ་བའི་རྩལ་གཏད་དེ༔ སྟེང་རླུང་མནན༔འོག་རླུང་འཐེན༔རྐང་ལག་སོར་མོ་བསྐུམ་ཏེ༔ དལ་བུར་བསྐྱོད་དོ༔ བཞི་པ་བསྐྱིལ་བ་ནི༔གོམ་པ་ཡང་རབ་ཀྱིས་ཡུམ་མཁར་དཀར་དམར་ཞལ་འདྲེས་པར་བསྐྱིལ་བ་དང་༔ རབ་ཀྱིས་རྡོ་རྗེའི་རྩེ་མོ༔ འབྲིང་གིས་བུམ་པར༔ ཐ་མས་རྩ་བར་སླེབས་པ་ན༔ སྟེང་རླུང་ཅུང་ཟད་མནན༔ རྒྱུ་མ་རྒལ་བ་ལ་བཅར༔ མིག་བར་སྣང་ལ་ཟློག༔ རྡོ་རྗེའི་རྩེ་མོའི་ཧཱུཾ་དང་༔ སྤྱི་བོའི་བླ་མ་ཡབ་ཡུམ་གྱི་བདེ་བ་ལ་སེམས་བཟུང་ངོ་༔ དེ་ཡང་མ་ཟིན་ན༔ གསང་རྩ་མནན༔ ཐུར་སེལ་གྱེན་འཐེན༔ རིག་པ་ཀ་དག་གི་ངང་ལ་མཉམ་པར་བཞག་པས་མི་ཟིན་མི་སྲིད་དོ༔ དེའི་ངང་ནས་ཡུན་བསྐྱང་དེ་ཉམས་སུ་བླང་ངོ་༔ ཡང་ཡང་བདེ་བ་ཡལ་ཡལ་འདྲ་ན་སྔར་ལྟར་ཅུང་བསྐྱོད་དེ་ཡང་བཟུང་ཞིང་ངོ་བོ་ལ་བལྟའོ༔ དེས་ལྷན་ཅིག་སྐྱེས་པའི་ཡེ་ཤེས་བདེ་སྟོང་གི་ཏིང་ངེ་འཛིན་མྱུར་དུ་འབྱོང་ཞིང་༔ བརྟན་པ་ཐོབ་ནས་དེ་ཉིད་ཀྱི་ངང་ལ་ཉིན་མཚན་ཁོར་ཡུག་ཏུ་འདའོ༔ལྔ་བ་ཐིག་ལེ་འདྲེན་པ་ནི༔ ཟིན་ཡང་མ་ལྡོག་ན་ཆུ་དང་བསྡོངས་ནས་འཆོར་བས་ན༔ ལུས་གནད་ཡན་ལག་བཞི་བསྡུ། རྒྱུ་མ་སྒལ་བ་ལ་བཅར༔ ལྕེ་ཡ་རྐན་ལ་སྦྱར༔མིག་སྤྱི་བོའི་སྒྲོན་མ་ལ་ཕྱོགས༔ འགོ་བོ་བསྐྱོད༔ འོག་གི་རླུང་འཐེན་ལ༔སེམས་ཀྱི་གནད་དུ་དབུ་མ་ནས་ཧཱུཾ་གི་རྒྱུན་ཚོགས་དཀར་ལ་འཚེར་བ་བལྟར་ལ་བརྒྱུས་པའི་ཚུལ་དུ་འཁོར་ལོ་བཞིར་རིམ་གྱིས་ལྡོག་པས་ལུགས་ལྡོག་གི་དགའ་བཞི་ཉམས་སུ་མྱོང་བར་བསམ་ཞིང་མཉམ་པར་བཞག་གོ༔ངག་གི་གནད་དུ་ཧཾ་གི་སྟོང་འདྲེན་མང་པོ་བྱའོ༔དེའི་འདྲེན་ཐུབ་པ་ཡིན་ནོ༔ དྲུག་པ་དགྲམ་པ་ནི༔ དེ་ལྟར་རླུང་སྟོབས༔ ལུས་གནད་ཀྱིས་ལྡོག་ནུས་ཀྱང་༔ མ་ཁྲེམ་ན་རྩ་གནས་གང་དུ་ཆགས་པ་ནས་ནད་དུ་འགྲོ་བས་ན་དགྲམ་པ་འདི་གལ་ཆེ་སྟེ༔ དེ་ལ་ལུས་གནད་ནི༔ རླུང་ཐུར་དུ་ལན་གསུམ་བརྫང་༔ གྱེན་དུ་ལན་གསུམ་འཕེན༔ ནང་དུ་ལན་གསུམ་དྲངས༔ ལུས་གནད་འགྲེ་ལྡོག་ལན་གསུམ༔ སྤྲུག་སྟངས་གསུམ༔ སུག་བཞི་ས་ལ་བཙུགས་ནས་ཡན་ལག་གང་རུང་རེ་འཕེན་སྡུད་གསུམ་གསུམ་བྱེད༔ སེམས་གནད་སྤྱི་བོའི་ཐིག་ལེའི་གཏམས་པ་ལུས་དང་འཁོར་ལོ་ལྔའི་རྩ་འདབས་ཐམས་ཅད་དུ་ཁྱབ་པར་མཉམ་པར་བཞག་གོ༔ བདུན་པ་ཡེ་ཤེས་ཆེན་པོར་ལ་བཟླ་བ་ནི༔ ལུས་དྲང་པོར་བསྲང་བའམ༔ གན་རྐྱལ་དུ་ཉལ་ལ་འགུལ་བསྐྱོད་མི་བྱེད༔ ངག་གིས་མི་བརྗོད༔ སེམས་མི་བསམ་པར་གློད་དེ༔ ཡིན་ལུགས་སྤྲོས་པ་དང་བྲལ༔ དགག་སྒྲུབ་སྤང་ལེན་མེད་པ༔ ངོ་བོ་ངོས་བཟུང་ལས་འདས་པའི་རང་བྱུང་གི་ཡེ་ཤེས་སྔར་བདེ་བའི་རང་བཞིན་མཐོང་བའི་ངང་དུ་ལ་བཟླ་ཞིང་འཇོག་པ་ནི་སྦྱོར་བའི་འབྲས་བུ་བླ་ན་མེད་པའོ༔ གསུམ་པ་རྗེས་ཀྱི་རིམ་པ་ནི༔ དམ་གྲིབ་ཉམས་ཆགས་ལ་འཛེམ༔ ཕ་རོལ་གྱི་གཟུང་མ་བསྟེན་པ་ལ་མི་སྨོད་ཅིང་༔ མ་ཟད་སེམས་ཅན་གྱི་འཁྲིགས་པ་སྤྱོད་པ་ཡན་ཆད་ལ་ཡི་དམ་གྱི་ལྷ་ཡབ་ཡུམ་ཏུ་མོས་ཤིང་༔ སྐྱེ་བ་སྤྲུལ་པའི་སྐུར་བཞེངས་པའི་ཐབས༔ ཡུམ་མཁར་ཉི་ཟླའི་གདན་ལ་ཡི་དམ་གང་ཡིན་གྱི་ས་བོན་གསལ་བཏབ་ནས༔ རིག་པ་བསྲེ་འཕོའི་ཧཱུཾ་ཕྱག་མཚན་དེ་ཉིད་སྐུ་ཡོངས་རྫོགས་དཔའ་བོ་གཅིག་པར་བསྐྱེད་པ་ལ་སོགས་པའི་དམིགས་པ་ཡང་བྱ་ཞིང་༔ དེ་ཙམ་མིན་ཡང་སྐྱབས་སུ་འགྲོ་ཞིང་དབང་ཞུ་བའི་འདུན་པ་ཙམ་བྱས་ཏེ་མིག་སེར་ལོག་ལྟ་སོགས་ཀྱི་བློ་ངན་འདི་མ་བོར་ན་སྲིད་པ་བར་དོ་ཆོད་ཐབས་ཤིག་གཏན་ནས་མེད་པས་ན༔ རང་ཉིད་ཉམས་ཉེས་ཀྱི་གཡང་ས་ལ་འཇུག་གི་དོགས་པས་བག་ཟོན་ཅུང་ཟད་རེ་མཛད་པ་དང་༔ ཐབས་ཆེན་གྱི་སྦྱོར་བ་ལ་དད་པ་དང་༔ བྱང་སེམས་ཉེས་པའི་སྤྱོད་པ་སྤང་བ་དང་༔ རྟག་ཏུ་ཡང་ལམ་ལ་སློབ་པ་དང་༔ དགའ་བ་བཞི་དང་༔ སྟོང་པ་བཞི་དང་༔ མཐར་གྱི་གནས་པའི་སྙོམས་པར་འཇུག་པ་དགུ༔ ཚད་མེད་བཞི༔ རྣམ་ཐར་སྒོ་གསུམ༔ སྡོམ་པ་གསུམ༔ ཕར་ཕྱིན་བཅུ༔ ས་བཅུ༔ ལམ་ལྔ༔ ཐེག་པ་དགུ༔ དབང་བཞི༔ རིགས་ལྔ༔ སྐུ་ལྔ༔ ཡུམ་ལྔ་ལ་སོགས་པའི་ཡེ་ཤེས་ཀྱི་བྱེ་བྲག་གི་ཡོན་ཏན་ཚད་མེད་པའི་ཉམས་མྱོང་འབྱུང་བའི་ཚུལ་རྒྱས་པར་ཁོ་བོའི་གཞན་དུ་སྨོས་པ་ལ་སོགས་པའི་ངེས་པ་བློ་ལ་བྱང་བ་རེ་མཛད་ནས་ངོས་བཟུང་བ་དང་། གེགས་འབྱུང་གིས་དོགས་པ་ན་རྡོ་རྗེའི་བྲོ་བརྡུང་གིས་བསལ་བར་བྱ་བ་རྣམས་བྱའོ༔ གསུམ་པ་དེའི་ཡོན་ཏན་དང་བསྔགས་པ་བརྗོད་པ་ནི། དེའི་གནས་སྐབས་སུ་སྣང་སྲིད་ཆོས་སྐུར་ཤར༔ སྡུག་བསྔལ་བདེ་ཆེན་དུ་གྲོལ༔ གྲུབ་པ་བརྒྱད་ལ་རང་དབང་བསྒྱུར༔ ཕྲིན་ལས་རབ་འབྱམས་འགྲུབ༔ འདུ་བ་གསུམ་འབྱུང་༔ རྫུ་འཕྲུལ་དང་མངོན་ཤེས་འགྲུབ་པ་དང་༔ མཐར་ཐུག་འཁོར་ལོ་ཚོགས་ཆེན་གྱི་ས་ཐོབ་ནས་སྐུ་གསུམ་ལྷུན་གྲུབ་པའི་འབྲས་བུ་མངོན་དུ་འགྱུར་པ་ཡིན་ནོ༔ ཟབ་མོའི་དབང་གིས་སྨིན་པ་རྒྱ་མཚོ་ལ༔ རྒྱལ་ཐབས་སྤྱི་བླུགས་ཆུ་འགོ་ལས་འཆེད་དེ༔ དབང་དང་གདམས་པའི་ཐབས་སུ་བབས་པའི་རྒྱུན༔ སྐལ་ལྡན་ལས་འཕྲོ་ཅན་གྱི་གསོས་སུ་ཤར༔ ཞེས་ཀྱང་བླ་མ་དམ་པ་ཚུལ་ཁྲིམས་བཟོ་སྐོམ་སྤྲུལ་བའི་སྐུ་མཆོག་ཐུབ་ལོ་སྔགས་ལ་མོས་པ་ཡེ་ཤེས་སོགས་ཀྱི་དོན་སླད་དུ་ག་གཱ་ཨ་བྷྱེས་མཁའ་འགྲོའི་གསང་མཛོད་ལས་བསྒྱུར་བའོ། །དགེའོ། །དགེའོ། །དགེའོ། །སརྦ་མངྒ་ལཾ། །