བཏགས་གྲོལ་གྱི་རྒྱབ་ཡིག་འདུ་བྱེད་རང་གྲོལ།
བཏགས་གྲོལ་གྱི་རྒྱབ་ཡིག་འདུ་བྱེད་རང་གྲོལ་བཞུགས་སོ། །
ན་མོ་གུ་རུ་མ་ར་སྱེ་ན་པྲ་མརྡྷ་ན་བཛྲ་ཡེ། ཁྱོན་སྤོམ་ཐིག་ལེ་ཉེར་བཞི་པོ་མཐིང་ཤོག་ལ་གསེར་གྱིས་བྲིས་ལ་རས་ཀྱི་ནང་དུ་གཡོག་ནས་ཁ་ཕྱེ་བདེ་བའམ། ཡང་ན་འདོན་རྒྱུའི་ཡི་གེ་ཞིག་ཟུར་དུ་བྲིས་ལ་སུས་ཀྱང་མཐོང་མི་ཉན། དེ་ནི་རླུང་བྱེར་ཟུག་འཁྲུགས་གནས་དང་སྦྱར་ཏེ་འདོན་ཞིང་ཚེ་ཐར་རེ་དང་མཆོད་པ་མར་མེ་རེ་དང་སྦྱིན་པ་ཁྱི་སྤྲང་ལ་ཟན་ཡན་ཆད་སྦྱིན། མདུན་ནས་ཀུན་བཟང་ཡབ་ཁ་ནང་བསྟན་དང་གཅིག །རྒྱབ་ནས་བཟང་མོ་ནང་བསྟན་དང་གཉིས་ཀྱི་བར་དུ་ཙཀྲ་རྣམས་ཡི་གེའི་གོ་རིམ་བཞིན་གཅིག་རྒྱབ་གཅིག་བཞག་བྱ། དེ་ཡང་མཆོད་བརྗོད་ཡན་ཆད་ཙཀྲ་གཅིག །ཚིག་བཞི་བཅུ་པོ་ཙཀྲ་བཅུ། ལྷག་མ་མཛད་བྱང་དང་བཅས་ཙཀྲ་བརྒྱད་ ༼ བཅུ་དཔྱད། ༽ ཀུན་བཟང་ཡབ་ཡུམ་ཙཀྲ་གཉིས་དང་། རིགས་བརྒྱའི་སྲོག་ཡིག་ཙཀྲ་གཅིག་དང་ཁྱོན་ཐིག་ལེ་ཉེར་གསུམ་ཡེ་དྷརྨ་སྟེ་བསྟན་པ་སྤྱིའི་སྙིང་པོ་ཙཀྲ་གཅིག་དང་ཉེར་བཞི་པོ་ལ། རྫས་ནི་རྒྱུད་གྱི་བུ་བརྒྱ་ཚར་གྱི་བྱིན་གྱིས་བརླབས་པའམ། ཡང་ན་བཏགས་གྲོལ་ཕུང་པོ་རང་གྲོལ་བརྒྱས་རབ་གནས་བསྔགས་པའི་བྱས་པའི་བདུད་རྩི་ཆོས་སྨན་སེལ་མེད་དང་། དམ་རྫས་རིལ་བུ་སོགས་སེལ་མེད་ཀྱིས་བྱུག །བཟང་དྲུག་གི་ཆུས་ཀྱང་བྱུག་ལ། རྟེན་འབྲེལ་སྙིང་པོ་ཚད་རབ་འབུམ། འབྲིང་ཁྲི་ཐ་ནའང་སྟོང་གིས་རབ་གནས་བྱས། དམིགས་པ་ནི་རྫོགས་ཆེན་སྟོན་པ་བཅུ་གཉིས་སོགས་དགོངས་བརྡ་སྙན་བརྒྱུད་ཀྱི་བླ་མ་རྣམས་བྱོན་ནས་ཐིམ་པ་ལས་འོད་ཟེར་བདག་གི་གནས་བཞིའམ་ལྔ་ལ་ཐིམ་པས་སྒོ་ལྔའི་སྒྲིབ་པ་བག་ཆགས་དང་བཅས་པ་དག་དབང་བཞི་འོད་ཟེར་ཆེན་པོ་དང་ལྔ་ཐོབ་སྐུ་ལྔ་མངོན་དུ་གྱུར་བར་བསམ་ལ་དབང་བཞི་བླང་དེ་སུས་ཀྱང་མཐོང་ཐོས་མེད་པར་བཅིང་ངོ་། །ཟླ་འཛིན་ཉི་འཛིན་ས་གཡོ། སྒྲ་གྲགས་པ་དུས་དབྱར་དགུན་སྟོན་དཔྱིད་ཀྱི་འབྲིང་བོའི་བཅོ་ལྔ་ལ་ཡིན་མཆན། བཞི་རྣམས་སུ་རླུང་བྱེར་ཟུག་དང་སྦྱར་མཆན། རང་ཀུན་བཟང་ཡབ་ཡུམ་རིགས་བརྒྱ་འདུས་པའི་ངོ་བོར་བསྒོམ་ལ་ལྕེ་རྡོ་རྗེ་རྭ་གདེངས་བར་བསྒོམ་པས་བཟླའོ། །གསེར་མ་འབྱོར་ན་མཚལ་ལམ་གསེར་འགྱུར་ལ་གསེར་བཏབ་བྲིའོ། །འདི་ལྟར་དྲོད་དང་མ་བྲལ་བ་གལ་ཆེའོ། །བསྲེགས་ཚེ་རོ་དང་མ་འབྲལ་བར་བྱ་བ་ཡང་། ལུས་བཟང་དྲུག་གི་ཆུས་བཀྲུས་ལ་ཕོའི་མཆན་གཡས། མོས་གཡོན་དུ་བཏགས་ཏེ་བསྲེགས་སོ། །གྲོལ་རྟགས་གདུང་རིང་བསྲེལ་འཇའ་འོད་དཀར་སེར་དམར་ལྗང་མེ་མདོག་དང་བཅས་པའི་རིགས་གང་གི་སྤྲུལ་བར་དབུགས་འབྱིན་ཤེས་སོ། །འདིའི་ཆ་ལག་འཕོ་བ་རབ་ཀྱི་སྐུ་གསུམ་གསང་ལམ། འབྲིང་གི་པདྨའི་ཕྲེང་བ། ཐ་མའི་བདེ་ཆེན་ལམ་བཟང་། ཡང་ན་སྔ་སོར་ཁོ་བོས་བྱས་པ་དེས་འཐེར་རོ། །ཅེས་ཀྱང་འོད་གསལ་རྫོགས་པ་ཆེན་པོའི་རྣལ་འབྱོར་བ་ག་ག་ཨ་བྷྱེས་རང་གཞན་ཀུན་ལ་ཕན་སླད་བྲིས་པ་དུས་གསུམ་ཀུན་ཏུ་དགེ་བར་གྱུར་ཅིག །སརྦ་མངྒ་ལཾ། རླུང་བྱེར་ཟུག་ནི་སྤྱི་དང་མཐུན་ཏེ། དེ་ཡང་ཉིན་དུས་ཀྱི་ནམ་ལངས་ནས་དྲོས་པོ་ཆེའི་བར་དུ་བྱེར་པའོ། །དེ་ནས་གུང་ལ་མ་སླེབ་བར་དུ་ཟུག་པའོ། །གུང་མཐིལ་པོ་ནི་སྙོམས་པའོ། །གྲིབ་བསིལ་ཕེབས་ནས་ཉི་མ་ནུབ་བའི་བར་ནི་འཁྲུགས་པའོ། །མཚན་དུས་ཀྱི་སྟོད་བྱེར་བ། སྟོད་ཡོལ་ཟུག་པ། ནམ་ཕྱེད་སྙོམས་པ། ཐོ་རངས་འཁྲུགས་པའོ། །ས་གཡོ་བ་༡ནད་༢་མུ་གེ་༣། ཉི་ཟླ་འཛིན་༤ཐོག་༥རྟགས་དེ་རྣམས་བྱེར་བ་ལ་བྱུང་ན་ཀློག །ཟུག་པ་ལ་བསྒོམ། སྙོམས་པ་ལ་སྦྱིན་ཡུལ་འབོད་པ་དང་། ཚེ་ཐར་སྲོག་བསླུ་སོགས་བྱ། འཁྲུགས་པ་ལ་ཚོགས་འཁོར་དང་མཆོད་པ་སོགས་བྱ་བ་སྤྱི་ལྟར་རོ། །