འོག་སྒོའི་གནད་བསྡུས་པ་བདེ་ཆེན་ཡེ་ཤེས་མྱུར་འདྲེན
ཡེ་ཤེས་སྒྱུ་འཕྲུལ་དྲྭ་བ་ལས༔ འོག་སྒོའི་གནད་བསྡུས་པ་བདེ་ཆེན་ཡེ་ཤེས་མྱུར་འདྲེན་ཞེས་བྱ་བ་བཞུགས་སོ༔
ན་མོ་གུ་རུ་པདྨ་ཀ་ར་ཡེ༔ དུས་གསུམ་རྒྱལ་བ་ཐམས་ཅད་ཀུན༔ བདེ་བ་ཆེན་པོའི་ཡེ་ཤེས་ཀྱི༔ གནས་ཚུལ་ཇི་བཞིན་དེ་བཞིན་དུ༔ རྟོགས་ནས་རྗེས་སུ་གཤེགས་པ་ཡིན༔ ས་མ་ཡཱ༔ དེ་ཡི་ཐབས་ནི་ཕྱག་རྒྱ་སྟེ༔ བརྟགས་དང་འགུགས་དང་སྦྱངས་པའོ༔ གང་ལའང་གཏུམ་མོའི་དམ་ཚིག་གི༔ ཕྱག་རྒྱ་རབ་ཏུ་གོམས་པར་བྱ༔ རྩ་རླུང་ཐིག་ལེ་ལས་རུང་གི༔ ཡིད་རིག་ཆོས་ཀྱི་ཕྱག་རྒྱ་ལ༔ ཡང་དུ་ཡང་དུ་སྦྱངས་ནས་སུ༔ ཐིག་ལེ་མི་འཕོའི་གདེངས་གྱུར་ན༔ གདོད་ཀྱི་དངོས་རིག་ཉིད་ལས་སུ༔ བསྙེན་པ་དང་ནི་ཉེ་བར་བསྙེན༔ བསྒྲུབ་པ་དང་ནི་བསྒྲུབ་ཆེན་པོ༔ རྟེན་འབྲེལ་གནད་དང་ལྡན་པ་གཅེས༔ དེ་ནས་དང་པོ་བརྟགས་པ་ནི༔ མཁའ་འགྲོ་ལྔ་དང་དབྱིངས་ལྔ་དང་༔ ཤེས་རབ་ལྔ་དང་ཡེ་ཤེས་ལྔ༔ རིགས་ལྔའི་ཆོས་ལྔའི་བསྡུ་ཕྱིར་དང་༔ ངོ་བོ་ལྔ་ཡི་རྟེན་འབྲེལ་ལས༔ བུད་མེད་སྒྱུ་མའི་རྣམ་པ་ལྔ༔ ཤེས་རབ་ཡེ་ཤེས་བུམ་པའི་གཟུགས༔ ཉོན་མོངས་ལྔ་དག་སྐུ་ལྔར་སྦྱོར༔ ས་མ་ཡ༔ དེ་ལྟར་བུད་མེད་རིགས་རྣམས་ཐམས་ཅད་ལ༔ བརྟགས་བཀུགས་སྦྱང་བསྒྲོད་བཞི་ལས་དང་པོ་ལ༔ སྐྱོན་དང་ཡོན་ཏན་ཅན་གྱི་བྱེ་བྲག་གཉིས༔ དང་པོ་ལ་ནི་དད་དང་ངོ་ཚ་མེད༔ རིགས་དང་རང་བཞིན་ཉམས་པ་སྤངས་བར་བྱ༔ དེ་ཡང་སོ་སོའི་ལས་ཀྱི་ཡུལ་ལས་ལྡོག༔ རང་བཞིན་རྩུབ་ཅིང་སྒོ་གསུམ་མི་དགེ་པའོ༔ ཁྱད་པར་རྩ་ཞིག་ཞ་གུད་བདེ་བྲལ་སྐྱོན༔ བུ་ཚ་སྐྱེ་དང་དཔྱད་ཀྱིས་བདེ་ལམ་ཉམས༔ ལས་དྲག་མྱ་ངན་སྟོབས་ཀྱིས་གུད་པའོ༔ མ་སྨིན་ཟད་ཡལ་སྐྱོན་ཅན་གོ་རིམ་བཞིན༔ ལོ་བཅུ་མན་དང་སུམ་ཅུ་དངས་མ་ཟག༔ བུ་ཚ་སྐྱེ་དང་ཁམས་ཟས་མེད་ཉམས་པའོ༔ སྐྱོན་ཅན་ནད་བུ་ཡོད་པ་ཐམས་ཅད་དེ༔ གཞན་ཡང་བཀྲ་མི་ཤིས་པའི་རིག་མ་ཀུན༔ རྣམ་པར་མ་སྤངས་འདོད་པས་དབང་མེད་སྤྱོད༔ དེ་དག་སྔགས་པ་ངན་སོང་སྐྱེ་བའི་རྒྱུ༔ སྐྱོན་བྲལ་ཡོན་ཏན་ཕུན་ཚོགས་གཟུང༵ས་མ༵་ནི༔ སྒྱུ་མ་མཆོག་གི་བདེ་ཆེན་ཡེ་ཤེས་འདྲེན༔ དེ་ཕྱིར་ཐོག་མར་བརྟགས་པར་བྱ་བ་ལ༔ རྒྱལ༵་རྗེ༵་དམངས་གཙང་བྲམ་ཟེའུ་གདོལ་བ་ནི༔ རིམ་བཞིན་སངས་རྒྱས་རྡོ་རྗེ་རིན་པོ་ཆེ༔ པདྨ་ལས་རིགས་སངས་རྒྱས་འགྲུབ་པ་ལས༔ རེ་རེའི་ཐམས་ཅད་འགྲུབ་པ་དཀའ་བའི་ཕྱིར༔ མཁའ་འགྲོ་སྡེ་ལྔའི་གྲངས་ཀྱི་ཡུམ་ལྔར་ངེས༔ ནང༵་ལྟར་གནོད་སྦྱིན་ལྷ་ཀླུ་ཚངས་བུ་མོ༔ བརྒྱ་བྱིན་བུ་མོའི་རིགས་ལྔའི་སངས་རྒྱས་འགྲུབ༔ གས༵ང་བ༵་རྩ་རིགས་ལྔ་ལས་རིགས་ལྔར་བསྔགས༔ དུང་ཅན་རི་དྭགས་རི་མོ་བ་གླང་དང་༔ སྣ་ཚོགས་ཅན་གྱི་རིགས་ལྔ་སོ་སོ་དང་༔ པདྨ་ཅན་ནི་ལྔ་འདུས་ཀུན་ཏུ་བཟང་༔ རི་དྭགས་དུང་ཅན་གླང་པོ་པདྨས་ནི༔ ལུས་ངག་ཡིད་སེམས་བདེ་བ་རྒྱས་པར་བྱེད༔ སྣ་ཚོགས་ཅན་ནི་ལས་བཞི་འགྲུབ་ལ་བསྔགས༔ ཁྱད་པར་མི་མོ་མཁའ་འགྲོའི་ཐུན་མཆོག་གི༔ དངོས་གྲུབ་བདེ་བླག་འགྲུབ་པོ་ས་མ་ཡཱ༔ རྒྱས་ལྔའི་སྟོབས་ཅན་གསལ་བྱེད་ཕྱི་ཡི་རྒྱན༔ ཨྠི༔ ཕྱི་ནང་གསང་བ་ཡོངས་རྫོགས་རིགས་བཅུ་བདུན༔ མཁའ་འགྲོ་ལས་བཞིན་མི་མོ་ཅིར་ཡོད་པས༔ ལྔ་བཅུ་ལ་སོགས་བསམ་གྱིས་མི་ཁྱབ་པ༔ རྒྱུད་སྡེའི་དགོངས་པ་མང་ཞིག་གསལ་ནའང་༔ ཐམས་ཅད་བསྡུས་ཏེ་རིགས་ལྔར་ངེས་པའི་ཕྱིར༔ འདི་ན་དེ་དག་བརྟགས་པའི་མཚན་དཔེ་བཤད༔ རྗེས་འབྲེལ་བཀུགས་སྦྱངས་འབྱོར་ཐབས་དང་བཅས་སོ༔ ཆོས་བདག་མཁའ་འགྲོའི་འཁྲེན་གཟེར་མ་ཆེ་ཞིག༔ ས་མ་ཡཱ༔ ཁྱད་པར་ལྷ་མོ་ཀླུ་མོ་རིགས་ངན་མོ༔ སྡོང་གཅིག་མེས་རག་ན་ཚོད་སྲ་རྟགས་ལས༔ བརྟགས་པ་མང་ཞིག་སོ་སོའི་རྒྱུད་ལས་བཀར༔ ཉི་ཟླ་མཉམ་དང་རེས་མོས་འཛེག་རིམ་གྱི༔ ཡབ་ཡུམ་གཉིས་ཀ་བདེ་བཞི་བཅུ་གཉིས་དང་༔ བཅུ་དྲུག་ཉི་ཤུ་ཐམ་པས་འགྲུབ་པ་ཡིན༔ དེ་དག་གང་ཡང་རིགས་ཅན་སྔ་མའི་བསྡུས༔ ཐུགས་གསུང་སྐུ་ཡི་རིགས་ལ་བསྔགས་པ་ཡིན༔ མདོར་བསྡུས་ཁ་དོག་འགྲོས་དང་སྐད་ཀྱི་བརྟགས༔ པདྨ་ཅན་ནི་བྱད་ཟླུམ་ཁ་དོག་སྨུག༔ སྐད་ཕྲ་ཡིད་འོང་བོང་ཆུང་སྦོམ་ཡིད་འོང་༔ ཆགས་པ་སྐྱེད་མཁས་སྐྲ་སེར་འཇམ་ཞིང་འཐུག༔ སེན་མོའི་འོད་དམར་སྨིན་མཚམས་བར་མ་ཆད༔ བཅོ་ལྔའི་ལོ་ཚུན་པདྨ་རྒྱས་པའི་ཚད༔ བྱད་ཟླུམ་ཆེ་ཆུང་སྙོམ་མཛེས་ཁ་དོག་དཀར༔ སོ་དཀར་ལུས་རགས་དཔའ་རྟུལ་ཆེ་བ་དང་༔ མིག་རྩ་ཅུང་དམར་སྐྲ་གནག་འཛུམ་ཁ་སྙི༔ སོར་མོ་ཕྲ་མཉེན་སེང་གེའི་འགྲོས་དང་ལྡན༔ སྐད་ནི་ཚངས་དབྱངས་དང་མཚུངས་བཅུ་དྲུག་ལོ༔ དུང་ཅན་མ་ཡི་རིགས་ལ་ངེས་པར་རྟོགས༔ རི་དྭགས་སྟོད་འདྲ་ཤ་རྒྱས་ནུ་མ་ཆེ༔ རི་དྭགས་སྨད་བཞིན་ཤ་རྒྱས་བྷ་ག་རུབ༔ ཉེ་གནས་དབུག་བཅས་གླ་རྩི་བྲོ་བ་སྟེ༔ སྐེད་པ་ཕྲ་ཞིང་འགྲོས་དལ་མི་འཛུམ་བལྟ༔ སྐད་སྙན་པ་སྟེ་སྤྱི་ཡི་རྡོ་རྗེའི་ཡུམ༔ རི་མོ་ཅན་ནི་ཁ་ཆུང་ཤ་ཡང་སེར༔ བྱད་དཀྱུས་རིང་ཞིང་གཟུགས་ཕྲ་སྨྲ་བ་ཉུང་༔ དཔའ་བརྟུལ་ཆེ་ཞིང་མིག་འབྲས་དཀར་ནག་འབྱེད༔ ཤ་སྲབ་མཚོན་སྤུ་གསལ་ཞིང་ང་རོ་ཆུང་༔ ཡིད་འོང་གླང་ཆེན་འགྲོས་ལྡན་བཅུ་བཞི་ལོ༔ བ་གླང་ཅན་ནི་བྱད་རིང་ཤ་རྩི་སྔོ༔ སོ་དཀར་མིག་གི་དཀྱུས་རིང་ནག་པོར་ཡོད༔ མི་རིང་ཁོད་སྙོམས་ཁོང་དལ་ཆེ་བ་སྟེ༔ རྣ་བ་ཆེ་ཞིང་ཡན་ལག་ཐུང་ངུ་ལ༔ ངོ་ཚ་ཁ་དབང་ཆེ་ཞིང་སྤྱོད་པ་རྩིང་༔ ལྷོད་ཆགས་སྐད་སྙན་དྲི་ཞིམ་མནམ་པའོ༔ གོང་བསྟན་རིམ་པས་མཚན་བརྟགས་རེ་གཉིས་འཛོམ༔ སྣ་ཚོགས་མ་ཞེས་ལས་ཀྱི་རིགས་ཀྱི་ཡུམ༔ དེ་དག་ཕྱི་རྟགས་མཚན་མ་འབྱུང་བ་ནི༔ ནང་གི་དྷཱུ་ཏཱིའི་མར་སྣ་ཡོད་ཚུལ་དང་༔ མཚན་ཉིད་འདྲ་བར་དུང་ཅན་སྣ་དང་སྐྲ༔ རིང་འཁྱིལ་རི་དྲགས་ཨེ་ནའི་བྱིན་པ་བཞིན༔ རྩ་ཕྲ་ཁ་བཙུམ་རིང་བ་རི་མོ་དང་༔ ལུས་སྦོམ་རི་དྭགས་ཅན་གྱི་རྟགས་སུ་ངེས༔ རི་མོ་ཅན་གྱི་རྩ་ལ་ཡན་ལག་ཨ༔ དེ་རྟགས་ཐོད་པར་འགྲེང་བས་རི་མོ་འཕྲེད༔ བ་གླང་ཅན་གྱི་རྩ་ནི་བག་ཉལ་བས༔ ཤེས་པ་རྨུགས་འཐིབ་ཅུང་ཟད་བླུན་པོ་འདྲ༔ གཡོན་ནས་གཡས་སུ་འཁྱིལ་བས་རྩ་སྣའི་དབྱིབས༔ བུད་མེད་དེ་ཡི་དྲི་འཛིན་གཡས་སུ་འཁྱིལ༔ སྣ་ཚོགས་མ་ནི་རེ་གཉིས་མ་ངེས་འཛོམ༔ པདྨ་ཅན་མཆོག་པདྨའི་དབྱིབས་རྩའི་རྟགས༔ སྣ་ཡང་མེ་ཏོག་ཛ་བའི་དབྱིབས་ལྟར་ཡོད༔ གནད་ལ་རིམ་བཞིན་གཅུད་དང་སློང་བ་དང་༔ ཆགས་སློང་འགུགས་དང་ལྷན་ཅིག་ཚོགས་པ་དང་༔ རྩ་ཁ་འབྱེད་པ་པདྨ་ཅན་ལའོ༔ བསྟེན་ཅིང་སྦྱར་དང་མཐོང་དང་རེག་པས་བསམ༔ ཡང་ན་བསམ་སྦྱར་བསྟེན་པས་རིམ་པ་ཡི༔ དམན་འབྲིང་མཆོག་གི་དངོས་གྲུབ་འདུ་བྱེད་དོ༔ བརྟེན་མ་བསྒྲོད་ཚུལ་གྷ་ཧ་ར་ཏི་དང་༔ བི་ལ་སའི་ཆིང་གཉིས་ལ་ཁྱབ་པར་འཇུག༔ བྱོལ་སོང་གིས་ལྟར་པདྨའི་བྱེད་པ་རྣམས༔ རྐང་གཉིས་ཕྲག་བཀལ་འོག་ནས་བསྒྲོད་པ་དང་༔ རྡོ་རྗེ་སེམས་ལྟར་སྐྱིལ་ཀྲུང་གཉིས་ཡིན་ཏེ༔ རྒྱབ་དང་ཐ་མལ་ལྟར་དུ་སྟེང་ནས་སོ༔ དེ་ཡི་ངེས་པ་ཕྱག་རྒྱའི་བདེ་བའི་རྩ༔ པདྨའི་ཟེ་བ་དྲང་བོར་དུང་ཅན་གྱི༔ བཤང་པའི་ལམ་དངོས་སྟེང་ན་ལྷོ་ནུབ་ཀྱི༔ ཟེའུའི་འགོ་རུ་བ་གླང་ཟེའུ་འབྲུའི་རྩེར༔ པདྨ་ཅན་གྱི་རྩ་ལ་གདབས་ཡུལ་ཡོད༔ རིགས་ཀྱི་མཚན་མ་འདི་ལས་ཕྱེ་བ་ཡི༔ བཟང་ངན་བར་བའི་ཁྱད་པར་བཅོ་ལྔར་འགྱུར༔ གཞན་དོན་སྙིང་རྗེའི་གཟུངས་ནུས་གང་ཟག་གི༔ རིགས་དང་སྐྱེ་གནས་འདམ་ཀ་མེད་པར་སྤྱོད༔ ས་མ་ཡཱ༔ གཉིས་པ་བདག་གིར་འགུགས་པའི་རིམ་པ་ལ༔ རྫས་སྔགས་འཁོར་ལོའི་དམིགས་པའི་འགུགས་ཚུལ་ནི༔ དང་པོ་རིལ་བུ་ཕྱེ་མ་གཏོར་པ་དང་༔ རང་གི་སྤྱི་བོར་ཐིག་ལེ་བྱ་བའོ༔ ཡང་ན་རྒོད་རུས་རང་གི་བྱང་ཆུབ་སེམས༔ ཁྱི་ཡི་སྙིང་ཁྲག་པདྨའི་རཀྟ་དང་༔ བོང་བའི་ས་བོན་ཁབ་ལེན་ཟར་མིའི་ཆུ༔ སྐྱེས་དར་སྲིན་ལག་ཁྲག་གི་རྫས་དེ་དག༔ ཁྱི་ཡི་ལང་ཀའི་དྲེགས་པ་སྦྲང་ཆ་མཉམ༔ བཟའ་བཏུང་དང་སྦྱར་བྱིན་པས་དབང་དུ་འདུས༔ དམིགས་བྱར་བྲབ་ཅིང་རང་གི་དཔྲལ་བར་ནི༔ ཐིག་ལེ་བྱས་ཤིང་ཤོག་ཤོག་སྨྲས་པས་འགྲུབ༔ མི་ཁྱིའི་ལག་ངར་གཡས་པ་བསྲེག་ཐལ་ལ༔ རྒོད་བྲུན་བྱང་བལྟས་ཕུག་པར་སྐྱེས་པའི་རྩ༔ རྩེ་མོ་ལྷོར་བསྟན་བཞི་སྦྱར་དཔྲལ་བ་རུ༔ ལི་ཁྲི་དང་བསྲེས་ཐིག་ལེ་བྱས་ལ་བསྟན༔ ས་མ་ཡཱ༔ སྔགས་ནི༔ ཨོཾ་ལྷང་ལྷང་བསྡུས་བསྡུས་བཛྲ་ས་ཏྭ་ཙིཏྟ་བྲེང་བྲེང་མངལ་གྱི་སྲིན་བུ་སློང་ཆྒཻམོ་བྷ་ཤི་ཀུ་རུ་ཧོ༔ སྟོང་བཟླས༔ ཨོཾ་མ་ཧཱ་བྷོ་དྷི་ཙིཏྟ་ཛྙཱ་ན་སུ་ཁ་ཧོ༔ སརྦ་མ་ཧཱ་མུ་དྲ་ཝ་ཤཾ་ཀུ་རུ་ཡེ་སྭཱ་ཧཱ༔ ཞེས་ཁྲི་དང་ཀ་ལི་སོ་བཞི་བཏབས་པས་ཀྱང་འགྲུབ་པོ༔ ཡང་འཁོར་ལོར་རྩིབས་བརྒྱད་པ་ཆ་གཅིག་དར་དམར་ལ་སྐེགས་ཀྱི་བྲིས༔ གཅིག་ལས་ལ་སྦྱར་ཚེ་རང་གི་ལག་པ་ལ་བྲིས་ཏེ་མོ་ལ་བསྟན་པས་དབང་དུ་འགྱུར་རོ༔ དེ་ཡང་ལྟེ་བ་ལ་མིང་སྤེལ་ལ་དབང་དུ་གྱུར་ཅིག༔ ཨཾ་ཀུ་ཤ་ཛ༔ ཞེས་དང་རྩིབས་བརྒྱད་ལ༔ ཧྲཱི༔ དང་ཡང་ན་དེ་དང་སྤེལ་ནས་༼ སྔགས་འདི་རྩིབས་མཆན་ལ་བྲི་ ༽མ་ཧཱ་སརྦ་མུ་དྲ་ཝ་ཤཾ་ཀུ་རུ་ཧོ༔ ཞེས་བྲིས་དབྱངས་གསལ་རྟེན་སྙིང་རང་སྔགས་ཀྱི་རབ་གནས་བྱས་པའི་སྟེང་དུ༔ རྫས་མཚལ༔ ལི་ཁྲི༔ ལྡོང་རོས༔ པདྨ་རཀྟ༔ ཁྲའམ་མ་རྙེད་ན་བྱ་མོའི་སེར་སྒོང་བཅས་བྱུག་ཤིས་པ་བརྗོད་དོ༔ མོ་ལ་བསྟན་དུས་ཤོག་ཤོག་ཛ་ཛ༔ བརྗོད་པས་འགུགས་ངེས་སོ༔ ཡང་དམིགས་པ་ནི༔ རང་གི་གཡས་སུ་ཆོས་སྐྱོངས་ཀྱི་ཐུགས་ཀ་ནས་ཧྲཱི༔ ༼ དམར་ ༽འཕྲོས་པའི་འོད་ཀྱིས་སེམས་དབང་དུ་བྱས༔ ཕྱག་གི་ལྕགས་ཀྱུའི་ལུས་དབང་དུ་བྱ་བར་བསྒོམ་མོ༔ དེས་ངེས་པར་ཁུག་འོང་ངོ༔ གསུམ་པ་སྦྱང་བར་བྱེད་པའི་ཐབས་མཁས་སུ༔ ཐུན་མོང་སྐྱབས་གསུམ་འཛིན་པ་ནས་བཟུང་སྟེ༔ དབང་མཆོག་རྫོགས་པར་དམ་ཚིག་དང་བཅས་བཤད༔ གསལ་བར་ལྡན་རབ་མིན་ཀྱང་གནས་ཀུན་བརླབས༔ མ་སྨིན་རིག་མ་བརྟེན་ན་དམ་ཚིག་ཉམས༔ དེ་གྲུབ་འདོད་པས་བསྟན་ཆོས་ཀྱིས་རྒྱས་ཕྱིར༔ རྩ་བ་བརྒྱད་དང་ཡན་ལག་དྲུག་ཅུ་སྤྱད༔ བསྡུས་ན་དྲི་ཞིམ་ལུས་ལ་སྐུད་པ་དང་༔ རྣ་བར་སེན་མོ་བཟོད་པར་བཅུ་གསུམ་ཚུགས་མཉེ་ཞིང་མཁལ་འཕོང་མཆན་ལ་སེན་མོ་རྩེན༔ མི་སྤྱོད་འཁྱུད་པ་གཡའ་ཟའི་གནས་དང་ནི༔ མིག་ཕོན་ཡ་མཆུར་སོ་འདེབས་ལྕེ་གཞིབ་པོ༔ སྐྱེ་སྒོ་པདྨ་ལ་སོགས་རྩ་ཕྲས་བསྐུལ༔ ཐུན་མོང་མ་ཡིན་ནང་དང་གསང་བ་གཉིས༔ དང་པོ་སོ་སོ་དག་ལ་གདམས་ངག་དྲུག༔ དུང་ཅན་བཅུད་ཕྱིར་རང་གི་གསང་རྩའི་སྦུབས༔ གཞན་གྱི་རྒྱས་པའི་བུ་མོ་ཤེས་རབ་རྩ༔ ཆགས་སྤྱོད་དུས་སུ་ཅུང་ཟད་ཕྱིར་རིང་བར༔ བྱ་རོག་གདོང་རྩེར་ལྷག་པ་བཅུག་ཅིང་བསྡམ༔ སློང་བའི་ཐབས་སུ་རྫས་ཀྱི་མཆོག་གྱུར་བ༔ བྱ་བྲ་སྦྲང་སྦྱར་རང་གི་རྡོ་རྗེར་བྱུག༔ ཡང་ན་ཡུང་བ་བྱང་བུལ་མ་ནི་དང་༔ རྒྱ་ཚ་བྱ་བྲ་ཆ་གས་ཕྱེ་མ་བྱུག༔ སྲིན་ལག་བུ་མོའི་གཡོན་ཕྱོགས་རྩིབས་མ་དང་༔ ནུ་མ་མཉེད་དང་མགྲིན་པའི་སྟེང་འོག་འཁྱུད༔ ཧ་ལ་དབྱིངས་བཞིའི་ལྡན་པའི་སྒྲ་དབྱངས་སྒྲོགས༔ སྤྱི་བོ་ཉིད་ལ་མཁྲིས་སྣའི་ཐིག་ལེ་བྱ༔ ཆགས་པ་སློང་བ་གོང་གི་རྩ་ཚིག་བཞིན༔ ཚོལ་བ་སྤྱི་ལ་རང་རང་གནས་སུ་དཀྱོགས༔ འགུགས་ཤིང་བཟུང་བ་ཁྱི་སྒོག་ཛ་ཏི་དང་༔ ལི་ཁྲིའམ་སིན་རྡུ་ར་བྱུག་འཆོར་མི་སྲིད༔ ཐམས་ཅད་ཚོགས་བྱས་བུ་མོའི་ཁམས་རྒྱས་འགྱུར༔ རྩ་བ་ལྔ་དང་ལུག་ཐུག་ཚང་ར་དང་༔ མཆིལ་བའི་ཤ་དང་བུ་རམ་བསྲེས་ལ་སྦྱིན༔ པད་ཅན་ལས་གཙོ་ཀུན་ལ་རྩ་ཡི་ཁ༔ ཕྱེད་ཕྱིར་རྡོ་རྗེ་མཁའ་འགྲོ་ལ་སོགས་པ༔ གསར་མའི་རྒྱུད་དང་དཀྱིལ་ཆོག་རྡོར་ཕྲེང་དང་༔ བ་ཚབ་འགྱུར་གསལ་༼ པ་ཚབ་འགྱུར་གསར་དཔྱད། ༽རྡོ་རྗེ་གུར་མགོན་སོགས༔ དགོངས་པ་ལེན་ཚུལ་སོར་མོ་གསུམ་བཀུགས་ནས༔ སྐྱེ་གནས་དཀྲུག་དང་སྔགས་པའི་རོ་འཛིན་གྱིས༔ བྱ་རོག་གདོང་བསྒུལ་རྩ་ཁ་ཕྱེད་ནུས་རྟགས༔ སྲིད་ཅེས་རང་སྒྲ་འབྱུང་བའི་ཡིན་གསུང་ཀྱང་༔ སྨེ་སྤྱོད་དེ་དང་གསང་དབང་སློབ་དཔོན་གྱིས༔ ལྕེ་ཡི་བླངས་པ་རོ་མྱོང་ཕོ་དབང་ལ༔ དགོངས་པ་བླངས་ནས་བསྐྱོད་འདྲུད་ཁྱད་པར་འཕགས༔ ལས་རྒྱར་ལྕེ་དང་མཛུབ་མོར་ཡི་གེ་བཀོད༔ སྦྱར་བས་ཐིག་ལེ་དབབས་བརྟན་མེད་བཞིན་ཏུ༔ ཁྱད་ཆོས་འདི་ཀུན་ཡོད་པའི་སྐད་གསང་ལ༔ ལྟོས་ན་པདྨའི་རྗེས་ཞུགས་མཚོན་དུ་མེད༔ བྱིང་བས་རྡོ་རྗེ་རྒོད་ཚིལ་འབྲུ་མར་གྱིས༔ བྱུག་པ་ཕྱག་རྒྱའི་གཅི་ལམ་ནས་གཞུགས་ཏེ༔ མཁལ་ཁུང་གྲུ་གུ་ཆུང་བ་གཉིས་བསྡམས་བཅིང་༔ རྒྱབ་ནས་སྒ་བསྟད་གན་རྐྱལ་བསྙལ་བ་ན༔ བྷ་གའི་ཟུར་གཉིས་འབུར་པོར་འབྱུང་བ་སྟེ༔ དེ་དུས་བྷ་ག་ཁ་ཕྱེས་བལྟས་པ་ན༔ དུང་ཅན་མ་ནི་རྩ་སྣ་འཁྱིལ་ནས་འོང་༔ པདྨ་ཅན་དག་པདྨའི་ཟེ་བ་འདྲ༔ རི་དྭགས་ཅན་ནི་གླ་བའི་ལྟེ་སྦུབས་བཞིན༔ གླང་པོ་མ་ནི་ཅུང་ཟད་འཁྱིལ་ཞིང་བསྲིང་༔ སྣ་ཚོགས་བྱ་གདོང་ངམ་བྱི་ཐུར་བཞིན་དུ་ཟིང་༔ ཕལ་བའི་རྩ་ནི་འཁྱིལ་འཁྱུགས་གཏུམ་པར་འོང་༔ རྩ་སྣ་རིང་ཐུང་སྦོབ་ཕྲ་འབྲིང་པོའི་ལས༔ བདེ་བ་བསྐྱེད་བསྡུད་གནས་པ་ཐ་དད་པས༔ སྐྱོན་སེལ་སླད་དུ་སྤོམ་ན་མངར་གསུམ་དང་༔ འོ་མ་རྩི་མར་ཁྱི་ཡི་ཚིལ་བྱུག་པས༔ ཐབས་ངན་དེ་འདྲ་མི་དགོས་ལེགས་པར་འབྱེད༔ འདི་འདྲ་གཙང་བདེ་རྙིང་མ་མཆོག་གི་སྤྱད༔ ས་མ་ཡཱ༔ གཉིས་པ་གསང་ལྟར་སྦྱངས་ཞིང་སྦྱོད༼ སྤྱོད་དཔྱད། ༽་བ་ལ༔ བདག་དང་རིག་མ་གསལ་ལྡན་ཕན་ཚུན་དུ༔ ལྷ་རུ་བསྒོམ་པ་རྩ་རླུང་སྤྱི་འགྲོ་དང་༔ བསྟུན་ནས་རིགས་གཅིག་ཁྲོ་བོའི་རྒྱལ་པོ་ཡི༔ ལུས་དཀྱིལ་བཀོད་ཅིང་སྙིང་ཀར་ཡེ་ཤེས་སེམས༔ ཞི་བའི་ལྷ་ཚོགས་བཞི་བཅུ་རྩ་གཉིས་དང་༔ གནས་ལྔར་དཔལ་ཆེན་བསྒྲུབ་པ་བཀའ་བརྒྱད་པོའི༔ ཕོ་རྣམས་ཡབ་ཀྱི་ལུས་ལ་རྫོགས་པ་དང་༔ ཡུམ་རྣམས་ཡུམ་གྱི་ལུས་ལ་ཞུགས་པ་ཡི༔ གནས་ཡུལ་ཉེར་བཞིའི་དཔའ་བོ་མཁའ་འགྲོ་སོགས༔ དཀྱིལ་འཁོར་ཐམས་ཅད་མོས་ངེས་རྫོགས་རིམ་གྱིས༔ སྤྱི་བོར་བླ་མ་རིགས་ཀུན་ཁྱབ་བདག་ནི༔ སྐྱེ་བ་སྤྲུལ་སྐུའི་དབང་རྟགས་ཅོད་པཎ་ཆེ༔ ཡབ་ཡུམ་ཟུང་འཇུག་གཅེར་བུ་འཁྲིལ་སྦྱོར་རོལ༔ རྩ་གསུམ་འཁོར་ལོ་ཡང་ཕྲན་དང་བཅས་པ༔ སྟོང་ཕྲག་བདུན་ཅུ་རྩ་གཉིས་ཚང་བར་བསྐྱེད༔ རྩ་གསུམ་ཀ་བ་ལྟ་བུར་དབུས་གནས་པའི༔ ཨ་ཧཾ་མགོན་པོ་ལྷ་མོར་བཅས་པ་ཡི༔ རླུང་གིས་བསྐུལ་བས་གཏུམ་མོའི་མེ་འབར་ནས༔ བདེ་ཆེན་དབུ་མའི་ལམ་ནས་ཡར་ཐལ་ཏེ༔ མར་སྣེའི་མདུད་པ་པདྨའི་ཕཊ་ཀྱིས་ཌལ༔ བླ་མ་ཡབ་ཡུམ་ལུས་དཀྱིལ་བཅས་པ་ཡི༔ ཟླ་བ་འཇུ་འདུལ་བདུད་རྩི་ཡས་འབབ་བསམ༔ ཡབ་ཡུམ་ཡི་དམ་ལྷ་རུ་གསལ་བ་ཡི༔ ལིང་ཀ་རྡོ་རྗེ་སྔོན་པོ་རྭ་གདེངས་པ༔ རྩེ་ལྔའི་སྦུག་མ་བུམ་པའི་རྣམ་པ་ཅན༔ པདྨ་གེ་སར་འཛུམ་པའི་གཞལ་ཡས་ཁང་༔ གནས་པར་བསྒོམ་ཞིང་ཅུང་ཟད་སྲུབས་བསྐྱོད་ནས༔ རྡོ་རྗེ་པདྨོའི་སྦུ་གུ་ཧྲཱི༔ ཕཊ་ཀྱིས༔ དགག་པས་སྦྱོར་བཞི་རླུང་ཐིག་འབེབས་སྦྱོང་གིས༔ འཁོར་ལོ་བཞི་རུ་ཨོཾ༔གདང་རིམ་ནུབ་ཀྱིས༔ ཆ་འདྲེས་དུས་ཚད་བསྟུན་པས་དབབ་བཟུང་བཟློག༔ འགྲེམ་ཞིང་ཀ་དག་སྟོང་བར་ལ་བཟླ་བའི༔ ཕྱག་རྒྱ་གསུམ་གསུམ་སྨིན་སྦྱོངས་ཁྱད་པར་དུ༔ འགྲོ་བ་འདི་ལས་ཐབས་མཁས་རྣམ་པ་བཞིའི༔ དགོས་པ་ལྷུན་གྲུབ་སྔགས་ཀྱི་ཁྱད་ཆོས་ཏེ༔ ས་མ་ཡཱ༔ དངོས་གཞི་ཐིག་ལེ་དབབ་བསྐྱིལ་ལྡོག་དང་དགྲམ༔ ཡེ་ཤེས་ཆེན་པོའི་ངང་དུ་ལ་བཟླ་བའོ༔ དབབས་ལ་མཁས་པ་ཞུན་བྱེད་ལྟ་བུ་ཞེས༔ ལྷ་སྐུ་སྣང་སྟོང་སྒྱུ་མའི་ཡབ་ཡུམ་གཉིས༔ མཐའ་ཡས་འགྲོ་ལ་བྱམས་དང་སྙིང་རྗེའི་ཤུགས༔ མ་འགགས་བྱང་ཆུབ་སེམས་མཆོག་བསྐྱེད་པ་ནི༔ ཐབས་འདིའི་བདེ་ཆེན་ལྷན་ཅིག་སྐྱེས་པ་ཉིད༔ བསྒྲུབ་ནས་བདག་གཞན་དོན་གཉིས་ལྷུན་གྲུབ་བྱེད༔ སྙམ་ཞིང་འདུ་ཤེས་གསུམ་གྱིས་སྙོམས་པར་ཞུགས༔ སོར་མོ་ནང་༡བསྐུམ་རྒྱུ་མ་གྱེན་༢ལ་ཟེད༔ ནཻ་ཚོ་མཁར་༣ལྡོག་ཉི་ཟླའི་ས་བླར་༤བསྒྲོད༔ རླུང་གནད་ཁ་༥སྦྱོར་ངག་གི་ཧཱུྃ༦བརྗོད་བྱ༔ ལུས་ཀྱི་གནད་དྲུག་རླུང་དང་བཅས་པ་ཡི༔ འཁོར་ལོ་ལྔར་ཕབ་བདེ་ལ་སེམས་བཟུང་ངོ་༔ གཟུང་འཛིན་རྣམ་རྟོག་འགགས་པའི་བསམ་གཏན་གྱི༔ རང་བཞིན་དགའ་བ་བཞི་པོ་ཉམས་སུ་མྱོང་༔ གནས་རེར་སེམས་ཀྱི་ཡེ་ཤེས་ངོས་བཟུང་བསྒོམ༔ བསྐྱོད་པ་དལ་བས་མན་ངག་ཟབ་པའི་མཐར༔ རང་དབང་ལྡན་པའི་བརྟན་ཐོབ་བུམ་པའི་རྩེ༔ གཞན་པ་དག་གི་རྩ་བར་རབ་ཏུ་ཕབ༔ གཉིས་པ་བསྐྱིལ་ལ་མཁས་པ་མཐིལ་བསྡོམ་བཞིན༔ སྟེང་གི་རླུང་ལ་ནོར་བུའི་རྩ་རྩེར་མནན༔ འོག་རླུང་ཐེམ་བུའི་ཐིག་ལེ་འཕོ་བ་དགགས༔ རོལ་མཚོའི་རང་བཞིན་རི་རབ་ངོས་ལ་བལྟ༔ སྐར་ཁུང་ནམ་མཁའི་འོད་ཐག་ལ་དཔྱང་ནས༔ ཡབ་ཡུམ་དཀར་དམར་ཞལ་འདྲེས་བདེ་སྟོང་རོ༔ ཟུང་འཇུག་ཁྱད་པར་དགའ་བ་ལ་བསྒོམ་མོ༔ སྤྱི་བོར་བཞུགས་པའི་རིགས་བདག་བདེ་བ་དང་༔ ནོར་བུ་བདུད་རྩིའི་མི་གཡོ་ཁེངས་བ་དང་༔ རྩེ་མོའི་ཧཱུྃ་མཐིང་ཉིད་དུ་སེམས་ཡང་བཟུང་༔ གསང་རྩ་མནན་ཅིང་རྟིང་བས་འོག་སྒོ་མནན༔ བདེ་བ་ཉུང་ན་ཅུང་ཟད་བསྐྱོད་པར་བྱེད༔ ངག་གི་རིང་པོའི་ཧཱུྃ༔བརྗོད་བཟུང་བ་ཡི༔ ནོར་བུའི་རྩེ་དང་རྐེད་རྟིང་རུ་ཕབ་པས༔ ཆོས་དང་དམ་ཚིག་ལས་རྒྱའི་བདེ་བ་མྱོང་༔ དབུ་མ་ཆེན་པོའི་འཆར་རིམ་མཐར་ཕྱིན་ནས༔ རང་བྱུང་སྐུ་གསུང་ཐུགས་ཀྱི་རྡོ་རྗེ་ཆེ༔ རྒྱ་གསུམ་ལྡན་པས་པདྨོ་བྱང་སེམས་སྦྱངས༔ དགག་ལ་མཁས་པས་བྱང་སེམས་སྤོང་མི་བྱ༔ གལ་ཏེ་དམིགས་པའི་སྟོབས་དང་བྲལ་བ་ཡི༔ རང་དབང་མ་ཐོབ་འཆོར་ལ་ཉེ་བ་རུ༔ ལུས་གནད་རླུང་གི་བཟུང་བའི་བརྟུལ་ཞུགས་དང་༔ རྫས་ཀྱི་ནུས་པས་བཟུང་བའི་ཆོ་ག་ནི༔ ཁྱི་ཡི་འབྲས་བུ་བོང་བུའི་རྡོར་འབྲས་བཅས༔ ཀུ་ཀུའི་རྡོ་རྗེ་རྩ་རྣམས་ཞིབ་ཕྱེ་བྱས༔ རང་གི་རྡོ་རྗེ་ལ་བྱུག་སྦྱོར་བ་དང་༔ ཡང་ཅིག་ཉི་ཟླ་གྱེན་ལྡོག་སྨན་གྱིས་བྱུག༔ ལུས་ཀྱི་འདུག་སྟངས་བཤང་ལམ་དྲག་པོར་བསྡམས༔ རྒྱུ་མ་སྒལ་བར་བཅར་ཞིང་ལྕེ་མན་སྦྱོར༔ ལུས་ཀྱི་རིག་མའི་སྒྱིད་ཁུང་ནས་འཁྱུད་དང་༔ མིང་ནི་སྟག་མོ་རོལ་སྤྱོད་ཅེས་བྱའོ༔ སེངྒེ་རྩལ་སྤྲུག་ལྟ་བུར་སྦྱང་བ་ནི༔ ཁོག་སྟོད་གྱེན་དུ་གཏེགས་ཅིང་སྨད་ཆ་བསྒུང་༔ འཕོང་ཚོས་ས་ལ་བཙུག་ཅིང་ལག་པ་གཉིས༔ སར་བཙུག་ལྷག་མ་ལྷོད་ལ་བོར་བའོ༔ ལུས་སྤྱིའི་རྩ་ལ་འདར་ཆར་རབ་བསྐུར་ནས༔ ཡན་ལག་བཞི་བོ་བསྐུམ་སྟབས་གནད་དུ་གཅུན༔ ལུས་སྤྱི་བསྒུང་ལ་གཅུད་ཕུར་ལུས་ཡར་འཐེན༔ སྟོང་འདྲེན་གནད་ཀྱིས་མི་འཆོར་རབ་ཏུ་ཟིན༔ སེམས་ཀྱིས་ཐིག་ལེ་དམར་པོ་སྣ་རྩེར་བསྒོམ༔ ཡང་ཅིག་ཧཱུྃ་སྔོན་སྣ་ཡི་རྩེ་མོར་བསམ༔ ཡང་ནི་མི་བསྒུལ་རང་བབས་གནས་པར་བྱ༔ དེ་ལས་དམིགས་པས་རྡོ་རྗེའི་བཀག་པ་ཡི༔ ཐིག་ལེ་མི་འཕོ་རབ་ཏུ་བསྡམས་པར་དམིགས༔ གཞན་ཡང་བཞུགས་སྟངས་རྩ་རླུང་ནང་གི་བཞིན༔ འཁྲུལ་འཁོར་གནད་དང་ལྡན་པ་ཐབས་ཀྱི་ཟིན༔ རྩ་ཡི་གནད་དུ་གཅུད་ལ་བོར་བ་དང་༔ རླུང་གནད་ཡར་འཐེན་བསྒྲིན་པོར་བྱ་བའོ༔ གསུམ་པ་གྱེན་ལྡོག་སྦུབས་ཆུ་འདྲེན་པ་ལྟར༔ ལུས་ངག་ཡིད་ཀྱི་གནད་ལས་དང་པོ་ནི༔ གླིང་བཞི་བསྡུས་ནས་ཆུ་བོ་ཆེན་པོ་ནི༔ རྒྱ་མཚོར་འབབས་བཞིན་མིག་གི་ལྟ་སྟངས་གཟིར༔ འཕྲིན་པོ་བཙོན་བཏང་ཁྱད་པར་སྟངས་སྟབས་ཀྱི༔ ཉེད་པ་མཆོག་གསུམ་གུམ་པར་བཅས་སུ་བྱ༔ རླུང་ནི་གྱེན་བརྫང་ངག་གི་སྟོང་འདྲེན་དོར༔ རིག་པ་སྤྱི་བོའི་ཐིག་ལེ་ལ་བསྡུ་ཞིང་༔ ཧཱུྃ་གི་རྒྱུན་ཚོགས་བྱང་ཆུབ་སེམས་ཐིག་ལེ༔ དབུ་མ་ཁོང་སྟོང་སྦུབ་ནས་མས་བརྟན་དུ༔ གཅིག་ལ་གཅིག་ཐིམ་སྤྱི་བོའི་བར་དུ་བསྡུ༔ ངག་གི་གསང་གནས་ལྡོག་ལ་ཐུང་ངུ་བརྗོད༔ དེ་ཉིད་སྙིང་ཀའི་བར་དུ་ཉིས་འགྱུར་ཚད༔ མགྲིན་པར་སུམ་འགྱུར་སྤྱི་བོར་བཞི་ཡི་ཚད༔ རིང་པོར་བརྗོད་ལ་འོག་རླུང་དྲག་ཏུ་འཐེན༔ མགོ་བསྒྲིལ་རྒྱུ་ཞབས་འུབ་བསྡུས་ཐིམ་རིམ་ལ༔ དམིགས་པ་གཏད་དེ་སྦུབས་ཆུ་བཞིན་དུ་དྲངས༔ ཁྲོ་བོ་རོལ་པའི་ཐུགས་ཀྱི་ཐིག་ལེར་བསྡུ༔ ཡས་བརྟན་གཟུགས་མེད་རྫོགས་པའི་བྱང་ཆུབ་རྒྱན༔ དགའ་བ་བཞི་ཡི་ཡེ་ཤེས་རང་ཞལ་བལྟ༔ རང་གི་ཐིག་ལེ་རྐྱང་བར་མ་ཟད་པར༔ ཕོ་ཉའི་དམར་ཆ་དང་བཅས་གཉིས་མེད་དུ༔ རོ་མྱོང་རྩ་ལ་གཏད་དེ་དྲངས་ནས་བསྲེས༔ བདེ་སྟོང་དབྱིངས་རིག་དབྱེར་མེད་རང་བཞིན་ཅན༔ བྱིན་རླབས་རླུང་དང་ཡེ་ཤེས་མེ་དང་ནི༔ དགའ་བཞིའི་རོ་མྱོང་སེམས་ལྔའི་དྲངས་པ་ཡི༔ སྟོང་བཞིའི་ཡེ་ཤེས་རྒྱན་གྱི་མཆོད་པ་ཀུན༔ ལྡོག་པའི་སྦྱོར་བས་ཕྲིན་ལས་ལྷུན་གྱིས་གྲུབ༔ ཁྱད་པར་གཙུག་ཏོར་བསམ་གྱིས་མི་ཁྱབ་པའི༔ རང་བྱུང་ཡེ་ཤེས་དབྱིངས་སུ་འཁྱིལ་བ་མཚོན༔ ས་མ་ཡཱ༔ ཨྠི༔ བཞི་བ་དེ་ལས་དགྲམ་བའི་མན་ངག་གིས༔ སྦྱིན་ཤུགས་ཅན་གྱི་ཡོ་ལངས་འགྱེད་འདྲ་ནི༔ ཨིག་ཅེས་ཁུ་ཚུར་བཅིངས་ནས་ཉི་ཟླ་ལྡོག༔ རླུང་ཁམས་ནང་དུ་བརྡིག་པས་རྩ་མིག་ཁྲེམ༔ རླུང་ཉིད་ཐུབ་ཐང་ནང་དུ་བཟུང་བར་བྱ༔ ཡང་ན་ལག་གཉིས་འཐེབ་སྲིན་ས་ལ་བཙུག༔ ལུས་ཀྱི་ལྕིད་ཕབ་སྟེང་རླུང་དྲག་དུ་བརྫང་༔ དེ་རྗེས་ཕཊ་སྒྲ་དྲག་ལ་བཅད་ཐོན་པ༔ ཉི་ཤུ་རྩ་གཅིག་བརྗོད་པར་བྱ་བའམ༔ ཡང་ནི་རླུང་རོ་ཕྱིར་བཏོན་བཛྲ་གྱི༔ ཧེ་རུ་ཀ་དཔལ་ལ་སོགས་རིགས་ལྔ་ཡི༔ ཕྱག་རྒྱའི་རྫུ་འཕྲུལ་བརྡུང་བ་མན་ངག་གོ༔ ལར་ནི་རྩ་རླུང་རྡོ་རྗེའི་བྲོ་བརྡུང་སྟེ༔ དེང་འདིར་གཙོ་བོར་གྱུར་སྟེང་འོག་སྒོ་ཡི༔ གང་དུ་ཡང་ནི་དགྲམ་པའི་བརྟུལ་ཞུགས་དང་༔ མ་དག་ལས་ཀྱི་རྩ་རླུང་བཅོམ་ལྡན་འདས༔ དག་པ་དོན་གྱི་རྩ་རླུང་འབྱོང་བརྟན་སྨིན༔ མདུད་གྲོལ་ལེགས་པར་ཡེ་རླུང་བདེ་ལུགས་རྒྱུ༔ དེ་སླད་དགོས་པའི་སྟོང་འདིའི་ཀུན་ལ་ཐེབ༔ དམིགས་པ་ཐིག་ལེ་སྐྱ་ཕྲུལ་གྱིས་འཐོར་ཏེ༔ འཁོར་ལོ་ལྔ་ཡི་རྩ་འདབ་ཐམས་ཅད་ཁྱབ༔ དེར་བཞུགས་དཀྱིལ་འཁོར་ཞི་ཁྲོ་དཔའ་བོ་དང་༔ དཔའ་མོ་རྣལ་འབྱོར་བསྒྲུབ་པ་བཀའ་བརྒྱད་ཚོགས༔ དཀར་དམར་རྩ་བརྒྱད་སྟོང་སྦྱར་སྨན་རཀྟ༔ བདེ་སྟོང་བདུད་རྩིའི་རོལ་དངར་བྷ་ལིང་ཏ༔ ཡེ་ཤེས་མེ་རླུང་ཆུ་ཡི་སྦྱངས་སྤེལ་ཏེ༔ བདེ་སྟོང་དྲོད་རླངས་བསྐྱོད་པའི་དགྱེས་སྤྲིན་མཆོད༔ དཀར་དམར་མ་དག་མཚན་མ་དབྱིངས་སུ་ཞི༔ བསམ་ཞིང་ཡང་ཡང་བརྡབ་པས་ཁྱད་པར་བརྡལ༔ ལྔ་པ་ཡེ་ཤེས་ཆེན་པོར་ལ་བཟླ་བ༔ བདེ་བའི་རང་བཞིན་གྲོལ་བ་མཆོག་གི་སྐུ༔ བདེ་བཞིའི་སྟོང་བ་ངོས་བཟུང་ཀུན་ལས་འདས༔ ཡེ་སྟོང་རྩ་བྲལ་ཀ་དག་ཟང་མ་ཐལ༔ ཉམས་ལ་ཆགས་དང་སྟོང་བ་རྒྱས་འདེབས་ལྟའི༔ ཕྱོགས་ཀྱི་མི་མཚོན་གནས་ལུགས་དོན་ཀྱི་ངང་༔ རང་བཞིན་ཟུང་འཇུག་བྱང་ཆུབ་རང་རིག་དག༔ ཐོག་མཐའ་བར་དུ་བདེ་གྲོལ་རྒྱུན་ཆད་མེད༔ འདོད་ཆགས་འཛིན་མེད་འཁོར་གསུམ་གཏན་ནས་དག༔ ལ་བཟླ་མཆོག་ལ་ཡང་དག་རྒྱས་པའི་ཕྱིར༔ སྟན་སྟེང་གན་རྐྱལ་ཡན་ལག་གནམ་དུ་བསྒྲེང་༔ གང་དུ་མི་རྟོག་མཉམ་པའི་བློ་ལ་གནས༔ བདེ་བའི་ངང་ལ་གཟུང་འཛིན་བྱུང་ཚར་ཞི༔ བདེ་སྟོང་སྤྲོས་བྲལ་ཡེ་ཤེས་སྐད་ཅིག་འཆར༔ དེ་ནི་ཆེ་མཆོག་ཀུན་བཟང་ཡབ་ཡུམ་གྱི༔ གཉིས་མེད་དགོངས་པ་མཐར་ཐུག་སྐྱེལ་སོ་ཟབ༔ ཡང་ན་ལུས་གནད་སྐྱིལ་ཀྲུང་བཞག་ཀྱང་རུང་༔ རླུང་གནད་འགྱུ་བ་མི་ཚོར་གྲོགས་སུ་ཟབ༔ སེམས་གནད་བདེ་སྟོང་གཉུག་མའི་ངང་མི་གཡོ༔ དེ་ཡིས་ཆོས་ཉིད་བདེན་པ་ཡང་དག་མཐོང་༔ དངོས་པོ་ལྷན་སྐྱེས་སེམས་ཀྱི་དཔྱད་མཐའ་དང་༔ དཔེ་ཡི་ཡེ་ཤེས་ཉིད་ལས་རབ་འདས་ནས༔ སེམས་བསྐྱེད་དབང་བཞི་རྒྱུ་འབྲས་བཅས་པ་དང་༔ ལམ་ལྔ་ས་བཅུ་ཡོན་ཏན་འགྱུར་ཚང་བས༔ མ་ཟད་སངས་རྒྱས་ས་ཡི་ཡེ་ཤེས་ལྔ༔ སྐུ་གསུང་ཐུགས་ཡོན་ཕྲིན་ལས་འབྲས་བུའི་ཆོས༔ མཐའ་དག་དུས་གཅིག་ལྷུན་གྱིས་གྲུབ་པར་རོལ༔ ཐེག་རིམ་དགུ་དང་ཕ་རོལ་ཕྱིན་པའི་ལམ༔ སྐུ་གཉིས་ཕྲིན་ལས་བསམ་གྱིས་མི་ཁྱབ་པའི༔ མཚན་དཔེ་ངོམ་པའི་འདོད་ཡོན་རིག་མའི་མཆོག༔ ལོངས་སྤྱོད་སྐལ་ལྡན་ཚུལ་ཁྲིམས་ཀུན་སྦྱོར་དག༔ གཞི་ལམ་འབྲས་རྒྱུད་དབྱེར་མེད་ཟུང་འཇུག་ཏུ༔ རྣམ་གྲོལ་བྱེད་པོ་འདི་ལས་སུ་ཞིག་ཡོད༔ རྣམ་ཀུན་ཐིག་ལེ་ཉམས་པར་མ་གྱུར་བ༔ གསང་སྔགས་རྡོ་རྗེའི་དམ་ཚིག་ཟབ་མོ་ཡང་༔ དགོས་དབང་འཆི་བ་བརྟགས་ལ་གནང་བ་དང་༔ གསང་བའི་དབང་དང་བསྟན་པ་རྒྱས་པའི་སླད༔ གནང་ཞིང་བཀག་པ་མེད་པའི་ཚུལ་ཡོད་བཞིན༔ གཞན་དོན་ཡབ་ཡུམ་རིགས་གསུམ་མགོན་པོ་སོགས༔ མཁྱེན་བརྩེ་ནུས་པར་ལྡན་ཕྱིར་ཕྱག་རྒྱར་གསལ༔ ཁྱད་པར་འདིར་ནི་ཆེ་མཆོག་ཡབ་ཡུམ་གྱི༔ ཡུམ་མཁའ་དཀྱིལ་འཁོར་དབུས་སུ་དམར་ཆ་ཉིད༔ ཉི་གདན་སྟེང་དུ་ཐིག་ལེ་རིགས་ལྔའི་སྐུར༔ བྱོན་ནས་བཞུགས་པའི་དམ་ཚིག་སེམས་དཔའ་ལ༔ ཡེ་ཤེས་སེམས་དཔའ་སྤྱན་དྲངས་དབྱེར་མེད་བསྟིམ༔ ཆོས་འབྱུང་དཀྱིལ་འཁོར་སྒོ་ལ་ཕྲིན་ལས་བཞིའི༔ བདུད་བཞི་འཇོམས་པས་སྒོ་བ་ཡབ་ཡུམ་བསྐྱེད༔ ཕྱི་ནང་གསང་བའི་བར་ཆད་བཟློག་བསམ་ཞིང་༔ ཟླ་བ་བཅུ་ན་སྐྱེ་བ་སྤྲུལ་སྐུར་བཞེངས༔ རང་གཞན་དོན་འགྲུབ་དབང་གི་རྒྱལ་པོར་འགྱུར༔ སྟོབས་བཅུ་མངོན་ཤེས་དྲུག་གི་ཡོན་ཏན་སོགས༔ ཟག་མེད་ཆོས་ཁམས་རྒྱ་མཚོའི་མཛེས་བྱས་པའི༔ ཐབས་ཀྱིས་མཆོག་གྱུར་ཟུང་འཇུག་ཁ་སྦྱོར་དང་༔ བདེ་ཆེན་བདུན་ལྡན་གྲུབ་པ་མཆོག་གི་དངོས༔ འདི་ལ་མ་བརྟེན་སྔ་ཕྱི་བར་གསུམ་དུ༔ མཐར་ཕྱིན་འབྲས་བུ་ཐོབ་པར་མི་སྲིད་སླད༔ རྒྱུད་སྡེ་ཀུན་ནས་ཡང་ཡང་བསྔགས་པར་མཛད༔ གཞི་ལ་ལོངས་སྐུ་གྲུབ་པའི་སྙོམ་འཇུག་སྟེ༔ ལམ་དུ་རྣལ་འབྱོར་ཐབས་ཀྱི་ཁྱད་པར་སྤྱོད༔ འབྲས་བུ་བྲལ་ཐོབ་ལོངས་སྤྱོད་རྫོགས་པ་ནི༔ དཀྱིལ་འཁོར་ཀུན་གྱི་ངོ་བོར་བྱང་ཆུབ་ཐོབ༔ ཐབས་ཆེན་འདི་ཡི་གེགས་སེལ་བོག་འདོན་དང་༔ གཞན་ཡང་དེ་ལ་སྒྱུ་མ་བསྒྲུབ་བའི་ཐབས༔ སྣ་ཚོགས་དམིགས་ཀྱང་བསྡུས་ཏེ་བསྟན་པ་འདི༔ གང་ན་རྡོ་རྗེ་ཁྲོ་རྒྱལ་ཧེ་རུ་ཀ༔ པདྨ་བདུད་འདུལ་མཆོག་གི་རྗེས་འཇུག་ཏུ༔ ཆོས་དང་སྐྱེ་གནས་དོན་རྟགས་མ་འཛོལ་བ༔ དུས་མཐའི་སྔགས་རྒན་ག་ག་ཨ་བྷྱེ་ཡི༔ གུ་རུ་ཆེན་པོ་ཚུལ་ཁྲིམས་མཚན་ཅན་གྱི༔ བཀའ་ནན་མ་བཟོད་ཐུན་གསེབ་གཉིས་ལ་བྲིས༔ ཡི་གེའི་རིས་སུ་བཀོད་པའི་བརྩོན་འགྲུས་ཅན༔ གུས་པས་གསུང་གི་ཉམས་ཆགས་སྡིག་སྒྲིབ་ཀུན༔ རྨེག་མེད་མཛད་པའི་གནས་བརྟན་མཆོག་གྱུར་བ༔ འགྱུར་མེད་རྣམ་པར་རྒྱལ་བའི་རྒྱལ་མཚན་ནོ༔ དགེ་བ་འདི་ཡིས་འགྲོ་བ་ཐམས་ཅད་ཀུན༔ ཕྱམ་གཅིག་ཟུང་འཇུག་ལམ་གྱི་རྣལ་འབྱོར་ནས༔ ཉེ་རྒྱུའི་ལམ་གྱིས་གྲུབ་ཐོབ་ཕྱི་མའི་མུར༔ ཧེ་རུ་ཀ་དཔལ་ཆེན་པོའི་གཟུགས་སྐུ་ཡི༔ འགོགས་མེད་ཕྲིན་ལས་རྒྱུན་ཆད་མེད་ལྡན་གྱིས༔ གང་འདུལ་འགྲོ་ལ་ཕན་པ་ལྷུན་གྲུབ་ཤོག༔ བཀྲ་ཤིས་ཤོག །