རྫོགས་པ་ཆེན་པོའི་རྒྱུད་ཉི་མའི་སྙིང་པོ།
རྫོགས་པ་ཆེན་པོའི་རྒྱུད་ཉི་མའི་སྙིང་པོ་བཞུགས་སོ༔
རྒྱ་གར་སྐད་དུ༔ མ་ཧཱ་ཨཱ་ཏི་ཡོ་ག་སུརྱ་གརྦྷ་ཏནྟྲ༔ བོད་སྐད་དུ༔ རྫོགས་པ་ཆེན་པོ་ཉི་མའི་སྙིང་པོའི་རྒྱུད༔ མཁའ་ཀློང་ཡངས་པར་ཕྱག་འཚལ་ལོ༔ རྟོགས་པའི་ཡོན་ཏན་ཁྱད་པར་འཕགས༔ སངས་རྒྱས་རྣམས་གྱི་རྣམ་པར་དག༔ མི་རྟོག་ཡེ་ཤེས་ཟག་པ་མེད༔ ༡ ཁྱབ་བརྡལ་ལྷུན་གྲུབ་འདུས་མ་བྱས༔ མཚན་མ་ཚིག་གི་སྤྱོད་ཡུལ་འདས༔ འདས་དང་མ་འདས་མི་གནས་ལ༔ ཐམས་ཅད་ཐམས་ཅད་མཁའ་རུ་སྦྲུམ༔ ༢ སྐུ་གསུང་ཐུགས་ཀྱི་འཁོར་ལོ་རུ༔ རྣམ་ཀུན་ཡེ་ནས་འུབས་སུ་ཆུབ༔ བྱང་ཆུབ་མཉམ་རོལ་ཐིག་ལེ་ཆེ༔ ཆེད་དུ་སྒྲུབ་ཀྱང་རྩོལ་བའི་མཐའ༔ ༣ ངང་ལ་སྦྱངས་རྒྱུར་གང་ཡང་མཉམ༔ གཤིས་ལ་ཐོབ་དང་མ་ཐོབ་མེད༔ སྔར་ལས་འཕྲལ་སངས་རྒྱས་པ་མེད༔ ཉག་གཅིག་ཕྱམ་ཕྱལ་ཡངས་པོ་ཆེ༔ ༤ མཐའ་དང་ཕྱོགས་ལས་རྣམ་པར་རྒྱལ༔ རྣམ་ཀུན་མཆོག་ལྡན་འགྱུར་བ་མེད༔ རིག་དབྱིངས་གདངས་ཀྱི་ཤེས་རབ་མཆོག༔ མ་ཉམས་མ་སྨད་ཉོན་མི་མོངས༔ ༥ བྱ་རྩོལ་འབད་པའི་འཕྱང་རྒྱ་གྲོལ༔ གྲོལ་འཁྲུལ་མཉམ་དག་སྐྱེ་མ་མྱོང་༔ གཅིག་དང་དུ་མའི་མཚན་བཅས་ཞིག༔ སྲིད་དང་ཞི་ལ་རྣམ་མི་གནས༔ ༦ འཆིང་དང་གྲོལ་བ་སླད་མི་འཚལ༔ ཡེ་ནས་རང་བཞིན་བརྗོད་དུ་མེད༔ མེད་མཉམ་དག་མཉམ་བབ་ཀྱི་ངང་༔ དཔེ་དང་མཚོན་པ་གནམ་པོར་འགྱུར༔ ༧ ཐེག་པའི་བྱེ་བྲག་གང་གིས་ཀྱང་༔ ཡིད་ཀྱི་དཔྱོད་པས་དབྱེར་མི་བྱེད༔ རྨོངས་གཉིས་དྲི་མ་ཐམས་ཅད་ཀུན༔ ངོ་བོ་ཉིད་དུ་གཞི་རྩ་བྲལ༔ ༨ ངོ་བོ་ཉིད་ལ་བསྟན་དུ་མེད༔ ངོ་བོ་ཉིད་ལ་གཟུང་དུ་མེད༔ ངོ་བོ་ཉིད་ལ་དམིགས་སུ་མེད༔ ངོ་བོ་ཉིད་ལ་མེད་མཐའ་ཟད༔ ༩ངོ་བོ་ཉིད་ལ་སྤྲོས་པ་དག༔ ངོ་བོ་ཉིད་ལ་སྤྲོས་མེད་ཧར༔ ངོ་བོ་ཉིད་ཅེས་གཞན་དུ་མེད༔ ངོ་བོ་ཉིད་ཀྱང་སྐྱེ་བ་མེད༡༠ངོ་བོ་ཉིད་ལ་གནས་འགགས་མེད༔ ངོ་བོ་ཉིད་ནི་བྱང་ཆུབ་སེམས༔ ཉི་མ་སྙིང་པོ་ཅི་ལྟ་སྟེ༔ ངོ་བོ་ཉིད་ལས་མ་གཡོས་བཞིན༔ ༡༡ངོ་བོ་ཉིད་ཀྱི་སྐུ་རུ་ཤར༔ བྱང་ཆུབ་སེམས་ཀྱི་གསུང་དུ་བསྒྲུན༔ རང་བྱུང་ཡེ་ཤེས་ཐུགས་སུ་བརྡལ༔ དེས་ན་གཉིས་སུ་མ་རྟོགས་བཞི༔ ༡༢༔ ཉི་མ་འོད་ཟེར་ཀུན་ཏུ་དགྲམ༔ དེ་བཞིན་གཡོ་བའི་སེམས་མེད་པའི༔ ཕྱོགས་མེད་རྒྱན་གྱི་འཁོར་ལོ་སྤེལ༔ སྤེལ་བཞིན་པའང་རང་བཞིན་དག༔ ༡༣ཡང་ཅིག་ཉི་མས་རྩོལ་མེད་དུ༔ ཕྱོགས་མཐའི་མུན་པ་དཔྱིས་ནས་འབྱིན༔ དེ་བཞིན་བྱང་ཆུབ་ཐིག་ལེ་ཆེའི༔ མཐའ་ཡས་ཁམས་ལྡན་མོས་ངོར་བརྩེ༔ ༡༤བརྩེ་བའི་སྤྲུལ་བ་རང་བྱུང་བ༔ ཐུགས་རྗེ་དམ་པའི་དཔལ་ཆེན་པོ༔ ནམ་མཁའ་བཞིན་དུ་ཕྱོགས་རིས་མེད༔ སྟོང་ལ་སྙིང་རྗེ་ཐབས་སུ་རྒྱས༔ ༡༥རྫོགས་པ་ཆེན་པོ་ཉི་མའི་སྙིང་པོ་ལས༔ གཞི་ཁྱབ་བརྡལ་ཆེན་པོའི་རིག་པའི་སྐབས་སྟེ་དང་པོའོ༔ ༈ དེ་ལྟར་གཤིས་ལུགས་ཐབས་ཤེས་མཉམ་བརྡལ་བ༔ མ་རྟོགས་གུད་དུ་བཅད་པའི་ཞེན་འཐས་སྒྲིབ༔ རང་ཞལ་སྐྱེ་མེད་ངང་དུ་གཞིལ་བའི་ཕྱིར༔ བསྒོམ་པ་ཉམས་སུ་ལེན་པའི་རིམ་པ་ལ༔ ༡ལར་ནི་དཀར་ནག་ལས་གང་མཉམ་བརྡལ་དུ༔ རིག་པའི་སྒྲིབ་པར་གཞི་ལ་མཉམ་ནའང་༔ རྩོལ་མེད་རྟོགས་བའི་ཡེ་ཤེས་མ་ཤར་བར༔ རྒྱུ་འབྲས་ཀུན་རྫོབ་བདེན་བའི་དོན་ཤེས་མཛོད༔ ༢ཁྱད་པར་ཟད་མེད་ཤེས་རབ་རིག་པའི་མཚོན༔ སྲིད་རྩ་ང་རུ་འཛིན་པའི་དགྲ་ལ་ཕོབས༔ སོར་རྟོགས་ཡེ་ཤེས་རྡོ་རྗེའི་འདུ་འཕྲོ་ཡིས༔ ཉོན་མོངས་དམར་སྙིང་འབྱིན་ལ་གདོད་མི་ཟ༔ ༣ཞི་གནས་ཉོན་མོངས་རྙོགས་པ་བྲལ་བའི་མཚོར༔ ལྷག་མཐོང་ཤེས་རབ་ཟླ་བ་གཉིས་པར་འཕོ༔ ལམ་གྱི་རིག་པ་རྣལ་དུ་འབྱོར་བའི་ཕྱིར༔ བྱུང་གནས་འགྲོ་གསུམ་གཞི་རྩ་སེམས་ལ་གཞལ༔ ༤གནས་ཚུལ་ཡང་དག་མཐོང་རྒྱུ་འདི་ལ་ཡོད༔ ངོ་བོ་མངོན་དུ་བྱས་ན་སྟོང་སང་ངེ༔ རང་བཞིན་བབ་ཀྱི་གནས་ན་རང་མདངས་གསལ༔ རྩལ་ལས་འཁོར་འདས་སྣང་སྲིད་རྒྱན་སྣང་དགྲམ༔ ༥བསྐྱང་ཞིང་བསྐྱང་ན་དམིགས་མེད་རང་སར་ཧར༔ རྩལ་སྣང་སེམས་བྱུང་རྒྱུ་བ་རྣམ་ཞི་ནས༔ ཤར་སྟོང་ངོ་བོ་མཐོང་ན་གཅིག་དུ་གྱུར༔ དྲན་བའི་རང་ཚུགས་ཐུབ་ནས་གཟུ་བོར་བསྟི༔ ༦དྲན་སྟོང་མལ་དུ་དུབ་ན་སྲིད་རྩེར་སྦྲོན༔ བདེ་གསལ་ཉམས་ཀྱི་བསླུས་ན་འདོད་གཟུགས་འདུ༔ སྟོང་གསལ་ངང་ན་རང་གསལ་རྗེན་པར་ཤར༔ འདི་དུས་རིག་པའི་དབྱིངས་སུ་འཁྱོལ་བ་ལགས༔ ༧རྫོགས་པ་ཆེན་པོའི་རྒྱུད་ཉི་མའི་སྙིང་པོ་ལས༔ སེམས་ལ་ལམ་བྱས་ནས་རིག་པའི་དབྱིངས་སུ་སྐྱོལ་བའི་སྐབས་ཏེ་གཉིས་པའོ༔ ༈ རྣམ་པ་ཐམས་ཅད་མཁྱེན་པའི་ཡེ་ཤེས་ནི༔ སེམས་ཅན་ཀུན་ལ་རང་ཆོས་ ༼ ཆས་དཔྱད ༽ གནས་ནའང་༔ མ་རྟོགས་ལོག་པའི་སྡུག་བསྔལ་བསམ་མི་ཁྱབ༔ རྟོགས་ན་ད་ལྟ་ཉིད་ནས་གདོད་མར་ཕྱིན༔ ༡དྲི་མེད་ཡེ་ཤེས་རྣམ་པར་དག་པ་སྟེ༔ རང་གི་རིག་པ་ཁྱབ་བརྡལ་གཅིག་དུ་གནས༔ འདི་ཉིད་མ་མཐོང་ནམ་ཡང་གྲོལ་མི་སྲིད༔ མཐོང་ན་མི་གནས་སར་བསྒྲོད་གཏ༵ན་ཚི༵ག་གཅི༵ག༔ ༢ཐོས་བསམ་བསྒོམ་པའི་མིག་བུ་དག་པ་དང་༔ ཚོགས་སྨོན་བསོད་ནམས་བཟང་པོའི་བྱེ་བྲག་དང་༔ ཁྱད་པར་རང་སྣང་སྟོན་པའི་ཕྲིན་ལས་ཀྱིས༔ འདི་ན་རིག་པའི་རྩལ་དབང་ཟབ་མོ་ཡི༔ ༣དབང་དོན་བཞི་བའི་ཡེ་ཤེས་སྐྱེ་འགྱུར་གྱི༔ ཐབས་ཀྱིས་ཕོངས་བའི་འོལ་ཚོད་བསམ་སྤྱོད་ཅན༔ ཁ་ལྟ་སྟོང་སྐད་ཆེ་ཡང་ཆུ་འབབ་སྒྲ༔ དེ་ལ་ཞེ་གཅོད་ལ་སོགས་དོན་རྡོའི་སྟོང་༔ ༤སྐུ་གསུམ་འདུ་འབྲལ་མེད་པའི་རིག་པ་ནི༔ དུས་གསུམ་སྐྱེ་འགགས་བྲལ་བའི་ཤེས་རབ་ཆེ༔ རྒྱལ་བ་ཐམས་ཅད་དཀྱིལ་འཁོར་འདི་ལ་རྫོགས༔ དེ་ཡི་རྒྱུ་རྐྱེན་དད་དང་མོས་གུས་ཡིན༔ ༥དེ་ཉིད་བླ་མའི་ཐུགས་རྗེའི་ངོ་འཕྲོད་ནས༔ ཡུལ་ལ་མི་འདྲེས་སེམས་སུ་མ་འཁྲུལ་པའི༔ ལམ་རིག་ཆ་རྫོགས་མངོན་དུ་གྱུར་ནས་ཀྱང་༔ ངང་ལ་ཅེར་གྱི་གནས་པའི་ལྷག་མཐོང་ནི༔ ༦ལྟ་དང་གཏད་སོ་མེད་པར་ཧར་སང་ངེ༔ དམིགས་དང་རྩོལ་བློ་མེད་པར་ཕྱམ་བརྡལ་ལེ༔ ཉོན་མོངས་རྙོགས་པ་མེད་པར་རྗེར་ཁྲེས་སེ༔ རྣམ་རྟོག་དམིགས་པ་མེད་པར་རང་གསལ་ལེ༔ ༧སྒོམ་དང་ཡིད་བྱེད་མེད་པར་ཟང་ཐལ་ལེ༔ གཉིས་འཛིན་སྤངས་བླངས་མེད་པར་ཅོག་གི་གནས༔ མཚན་མའི་སྤྲོས་པ་མེད་པར་བབ་ཀྱི་གནས༔ མ་བྱེད་མ་བྱེད་དགག་སྒྲུབ་བློ་མ་བྱེད༔ ༨ཐམས་ཅད་ཆོས་ཉིད་དག་པའི་རང་རྩལ་ལ༔ རིམ་པར་དགག་ན་སྨྱོ་འབོགས་བརྒྱལ་བའི་རྒྱུ༔ མ་འཛིན་མ་འཛིན་འཁོར་གསུམ་བློ་མ་འཛིན༔ བཟུང་ཤིང་བཟུང་ན་དོན་ལ་གཟུང་མཁན་སྟོང་༔ ༩སྟོང་ལ་སྣང་བའི་རྒྱས་འདེབས་ག་ལ་འཐད༔ དག་པའི་རིག་པ་ཆོས་ཉིད་གདོད་མའི་རྒྱལ༔ འཕོ་འགྱུར་སྐྱེ་འཇིག་མེད་པའི་རྒྱལ་ས་ནས༔ གཡོས་ན་དེ་ལ་ཐར་ལམ་ཅི་ཞིག་ཡོད༔ ༡༠འཁོར་འདས་སྣང་སྲིད་གཉིས་སུ་ཤར་བ་དང་༔ ལུས་དང་དབང་བོ་ཡུལ་དང་ཡིད་དྲུག་བཅས༔ ཐམས་ཅད་མ་ལུས་འདི་ཡི་སྤྱི་རྒྱས་བཅིངས༔ སྟོང་ཉིད་གཅིག་པུ་རིག་པར་རྟོགས་པ་ན༔ ༡༡དེ་ཡི་གཞན་དུ་ལྟ་བ་ཞེས་བྱ་བ༔ འགའ་ལ་ཡོད་ན་ཡིད་དཔྱོད་ལོག་རྟོག་ཞིག༔ བསྐལ་བར་གཉེར་ཀྱང་ཚི་ཆད་འཁོར་བ་རུ༔ འདའ་བར་སྤྲོ་བས་བསྒྲོན་པའི་བྱེད་པོ་ཡིན༔ ༡༢རིག་པ་དེ་ཡང་འདི་ཞེས་འཛིན་ཡོད་ནས༔ སེམས་ཀྱི་སེམས་ལ་ལྷག་པའི་སྣོན་མ་ཞིག༔ འཛིན་མེད་སྟོང་གསལ་ཉིད་དུ་ཉེ་བ་ལས༔ དགོན་པར་བྲོས་བ་ངེས་པའི་གཏ༵ན་ཚི༵ག་གཉིས༔ ༡༣ བ༵ཞི་ཆ༵་གསུམ༵་བྲལ༵་ཟང་ཐལ་གཅེར་ཡན་པ༔ སྒྲ་དང་ཚིག་གི་གཞལ་ནས་སྨྲ་བའང་༔ ནམ་མཁའ་སྟོང་བ་ཁ་དོག་སྤྲོས་མེད་ལ༔ སྐྱེ་བོ་རྣམས་ཀྱིས་སྔོན་པོ་གྲགས་པ་བཞིན༔ ༡༤ཇི་ལྟར་ནམ་མཁའ་ཉི་མ་ཟླ་བ་དང་༔ སྤྲིན་དང་ཁུག་སྣས་བཅོས་བསྒྱུར་མེད་པ་བཞིན༔ དགེ་སྡིག་བཟང་ངན་རྟོག་པ་ཐམས་ཅད་ཀུན༔ ཐུག༵ས་ཕྲད༵་རང་དག་རྗེས་མེད་ཨ་ལ་ལ༔ བསལ་བཞག་མེད་པ་ཐམས་ཅད་ཡེ་ཤེས་རྒྱན༔ ༡༥འཁྲུལ་བ་རྒྱ་འབྱམས་དམིགས་པ་བྱུང་རྒྱལ་མིན༔ ཕྱི་གདངས་རང་གསལ་ནམ་མཁའ་དག་པ་དང་༔ བར་དུ་འོད་ལྔ་ནང་མདངས་དག་པ་ན༔ གསང་བ་ཆོས་ཉིད་དག་པའི་ནམ་མཁའ་མཐོང་༔ ༡༦འདི་ཉིད་ངོ་བོ་རང་བཞིན་བདག་ཉིད་ཅན༔ མཐོང་བས་གཤིས་ཐོག་སོན་པའི་ཀུན་བཟང་ནི༔ དགེ་སྡིག་རྒྱུ་འབྲས་གང་གི་གཞན་དབང་དུ༔ མ་གྱུར་རང་ཞལ་མཇལ་བའི་ཁྱད་ཆོས་ཡིན༔ ༡༧རྫོགས་པ་ཆེན་པོའི་རྒྱུད་ཉི་མའི་སྙིང་པོ་ལས༔ ལམ་བསྒོམ་པ་རང་བཞག་ཆེན་པོའི་སྐབས་སྟེ་གསུམ་པའོ༔ ༈ལམ་གྱི་རིག་པ་མངོན་གྱུར་ཆ་རྫོགས་ནས༔ མཐར་ཕྱིར་འབྲས་བུ་སྐུ་དང་ཡེ་ཤེས་ཡིན༔ དེ་ཡི་རྒྱུ་རྐྱེན་ལྟ་སྤྱོད་གཉིས་ཆ་སྟེ༔ ཅོག་བཞག་རང་བབ་ངང་ལ་ཆམ་བརྡལ་ལེ༔ ༡བཟང་ངན་གང་ཡང་སྒྲོག་དུ་བཙུད་པ་འདྲ༔ དེ་ཕྱིར་ཐམས་ཅད་མཉམ་པར་ཁྲིགས་ཆོད་དེ༔ སྣ་ཚོགས་སྤྲོས་བ་བསྐྱུང་བའི་རྗེས་ཐོབ་ཏུ༔ རྒྱུ་འབྲས་རྟེན་འབྲེལ་རྩི་བསྒྲངས་ཞིབ་པ་དགོས༔ ༢འགའ་ཞིག་ངས་ནི་སྟོང་ཉིད་རྟོགས་ཞེས་ནས༔ སྲོག་གཅོད་ལ་སོགས་སྡིག་པ་ཁྱད་དུ་གསོད༔ དེ་ནི་མ་རྟོགས་མཚུངས་བ་གསལ་བྱེད་དུ༔ མེད་བཞིན་འཁྲུལ་ལ་སྙིང་རྗེ་ཟད་པ་ཡིན༣༔ མེ་ལ་དྲོད་བཞིན་སྟོང་ཉིད་ཕྱི་མཚན་ནི༔ སྙིང་རྗེའི་བདོ་དར་ལང་ཚོ་བཞད་བཞིན་དུ༔ སྲིད་པའི་འདམ་དུ་ཉེར་དཀྱུས་དྲོད་གཤེར་སྐྱེས༔ ཆུས་མི་ཆགས་བཞིན་རྣམ་པར་རྟོགས་པ་ཟད༔ ༤རྫོགས་པ་ཆེན་པོ་ཉི་མའི་སྙིང་པོ་ལས༔ གྲོགས་སྤྱོད་པ་བསྟན་པ་སྟེ་གནས་བཞི་བའོ༔ ༈དེ་ལྟར་སྒོམ་དོན་ཚོལ་བའི་རྣལ་འབྱོར་གྱི༔ ཤན་འབྱེད་འཕྱོང་ལ་མཁས་པ་གནད་ཡིན་ཏེ༔ སེམས་དང་རིག་པ་གཉིས་ཀྱི་ཤན་འབྱེད་མོད༔ སེམས་ནི་སྣ་ཚོགས་ཡུལ་གྱི་རྗེས་སུ་འགྲོ༔ ༡རིག་པ་ཡུལ་མེད་ཟང་ཐལ་གསལ་སྟོང་ཁྱད༔ རྣམ་ཤེས་གང་གི་ཉེ་བར་འདྲེན་བསྒྱུར་བྱེད༔ ཡེ་ཤེས་ཐམས་ཅད་རང་དག་མཉམ་པའི་ཁྱད༔ ཡིད་ནི་ཚོགས་དྲུག་འཁྲུལ་བཞད་བརྩེན་པའི་བདག༔ ༢ཤེས་རབ་རང་གསལ་སོ་སོར་འབྱེད་པ་ལ༔ ཉོན་མོངས་མི་དམིགས་སྣང་གསུམ་ཀ་ནས་དག༔ ཀུན་གཞི་གདངས་གསུམ་སྙིགས་མར་འཕོ་བ་ཡིན༔ ཆོས་སྐུ་གདངས་མདངས་རྩལ་གསུམ་ཡོན་ཏན་རྫོགས༔ ༣རྫོགས་པའི་བྱང་ཆུབ་སྐུ་ལྔ་ལྷུན་གྱིས་གྲུབ༔ ཡེ་ནས་ཕྱལ་བ་སྐྱོན་ཀུན་དམིགས་པ་དག༔ འུབ་ཆུབ་གཅིག་གི་ཐམས་ཅད་ཆོ་འཕྲུལ་ངོམ༔ རིག་པའི་དབྱིངས་སུ་ཆོས་ཅན་རྟོག་པ་གྲོལ༔ རྫོགས་པ་ཆེན་པོ་ཉི་མའི་སྙིང་པོ་ལས༔ ཐམས་ཅད་ཀྱི་གོལ་ས་ཤན་འབྱེད་ཀྱི་སྐབས་སྟེ་ལྔ་བའོ༔ ༈མཐར་ཐུག་འབྲས་བུ་ཡང་སངས་རྒྱས་པ་ནི༔ ཡེ་སངས་རྒྱས་ལ་འབྱུང་བའི་གནམ་གཟེར་གསུམ༔ གདངས་ལ་གདངས་ཞུགས་ལྷུན་གྲུབ་ནང་དབྱིངས་སུ༔ དབང་པོ་དྭངས་མ་ཁྱད་པར་ཆོས་ཕུན་ཚོགས༔ མདངས་ལ་མདངས་ཞུགས་སྐུ་དང་ཡེ་ཤེས་སུ༔ འཛིན་མེད་རང་གྲོལ་འབྲིང་གི་ལ་བཟླས་དོན༔ རྩལ་ཉིད་རོལ་བར་ཤར་བའི་གྲོལ་བཞི་རུ༔ གདེངས་རྙེད་ཙམ་ན་རང་བཞིན་སྤྲུལ་བར་རོ༔ གཤིས་ལ་གཤིས་སོན་མཁའ་ལ་མཁའ་ཐིམ་བཞིན༔ ངང་ལ་ངང་རོལ་ཤེལ་སྒོང་འཇའ་འོད་བཞིན༔ རྩལ་ལས་རོལ་བ་ཆུ་ནང་ཉ་འཕར་བཞིན༔ མ་བང་བུ་འཇུག་ཐི་བྱ་ཚང་ཞུགས་བཞིན༔ དཔེ་དྲུག་གནད་ཀྱི་གྲོལ་བ་དྲུག་དང་ལྡན༔ ཇི་ལྟར་སྒོང་ངའི་ནང་ནས་འདབ་རྒྱས་བྱ༔ སྒོང་རྒྱ་རལ་བཞིན་ལུས་རྒྱ་གྲོལ་མ་ཐག༔ འོད་གསལ་ལྷུན་གྲུབ་རང་བཞིན་མཁའ་ལ་འཕྱོ༔ རྫོགས་པ་ཆེན་པོ་ཉི་མའི་སྙིང་པོ་ལས༔ ཡེ་སངས་རྒྱས་པ་ལ་ཡང་སངས་རྒྱས་པའི་འབྱུང་བའི་ཚུལ་བསྟན་པ་སྟེ་དྲུག་པའི་བདག་ཉིད་ཅན་གྱིས་རྫོགས་པའོ༔ རྡོ་རྗེའི་མཆེད་ཀྱི་བཀའི་བསྐུལ་བ་མ་ལྡོག་ཙམ་དུ་རྨོངས་པ་ག་ག་ཨ་བྷྱེའི་ཁ་ལ་གང་བ་ཤར་མར་བྲིས་པ་ཉེས་འགལ་མཆིས་ན་མཐོལ་ལོ་བཤགས། །